《《平民ê基督传》》

 | | | 转寄

Tē it koàn Tī Κhí-thâu 第一卷 Tī起头, 第一章 未有世界，伊to̍h已经Tī-Teh」之一

作者 Tâi-e̍k:Ko Tek-chiong, Siu-tèng: Chng Hūi-phêng&Lîm Chùn-io̍k 2020.12.13

"Tī khí-thâu ū tō, tō kah Siōng-tè tông-chāi, tō to̍h sī Siōng-tè.” Lán ài tùi chia lâi kóng khí Ki-tok ê seng-gâi. Tī sè-kan bô-lūn sím-mi̍h úi-tāi ê lâng, i ê toān-kì, lán lóng sī tùi i chhut-sì, i chho͘ chhut-hiān ê ji̍t lâi kóng khí. Chóng-.sī lūn lán ê Chú ê toān-kì, lán ê su-siúⁿ tio̍h ài tò-tńg siūⁿ kàu tī I só͘ sio̍k hit-ê éng-oán ê sè-kài, chāi tī hit-ê sè-kài teh khòaⁿ, lán chit-ê, sī kan-taⁿ bô-ì tiong ê sū. Poâⁿ-kòe lán só͘ bat chit-ê sè-kài, pôaⁿ-kòe chèng chheⁿ-sîn, í-ki̍p bu̍t-chit, khong-kan, sî-kan ê kài-hān gōa. Ū chi̍t-ê si̍t-chāi ê sè-kài, éng-oán chiá ê sè-kài, to̍h sī Siōng-tè í-ki̍p chèng sèng sái só͘ tiàm ê, to̍h sī lán chit-ê sè-kài í-ki̍p kî-tha ê ê gôan-thâu ê sè-kài tī-.leh. Che sī lán ê sìn-gióng ê it-chhè só͘ kin-kì ê sū-si̍t. Lán bē-tàng khòaⁿ-kìⁿ hit-ê sè-kài, lán bē-tàng chhek-liông hit-ê lio̍k-tē, hit-ê hái-hōaⁿ. Hit-ê n̂g-kim siâⁿ-chhī ê kong-chhái, m̄-bat kha̍p-tio̍h lán ê ba̍k-chiu. Chóng-.sī lán sìn hit-ê sè-kài sī tùi éng-oán ū pau-ûi tī lán ê sin-piⁿ, ia̍h Hit-ê tùi hia lâi ê, ū kā lán kóng khí hit só͘-chāi ê siau-sit.

I m̄ hān-tiāⁿ pò lán chai hit-ê sè-kài sī chi̍t-ê bû-hān liōng ê sèng ê sè-kài, iáu-kú, hoān-sè ē khah khak-si̍t lâi kám-tōng lán chē-chē lâng ê, to̍h sī kóng, hit-ê sè-kài sī chi̍t-ê bû-hān liōng ê chhin-chhiat, iú-ài ê sè-kài, iā in tī hit-pêng ê lâng jia̍t-sêng teh koan-sim tī lán chit-pêng ê lâng. Chiàu sèng-chheh ê kiàn-kái, tī hit-ê bô khòaⁿ-kìⁿ ê sè-kài, ū kui tōa-tīn ê lâng chhim-chhim teh koan-sim lán sè-kan lâng ê seng-oa̍h.” Lán í-keng ū chò kiàn-chèng ê lâng kàu hiah chē, chhin-chhiūⁿ hûn ûi lán." Hit-ê éng-oán ê sè-kài, sī I-é-su ê chó͘-ke, só͘-í I ū sî-siông kám-kak chit-ê tāi-chì. I ū pò lán chai thiⁿ-.ni̍h ê pē, sî-siông ēng thiàⁿ-thàng kah ai-siong ê sim teh khòaⁿ-kò͘ lán. I ū pò lán chai, tī tē-.ni̍h chi̍t-ê chōe-jîn hóan-hóe, to̍h tī thiⁿ-.ni̍h ūi-tio̍h án-ne lâi hoaⁿ-hí. I ū pò lán chai, hiah-ê teh chiàu-kò͘ tē-chiūⁿ ê sè-hàn gín-á ê thiⁿ-sài ū "siông-siông kìⁿ góa tī thiⁿ-.ni̍h ê pē ê bīn." I ū pò lán chai, A-bu-la-hàm tī hit-ê bô khòaⁿ-kìⁿ ê sè-kài, teh hoaⁿ-hí lâi khòaⁿ i ê ji̍t tī-chia, chhin-chhiūⁿ, hit-ê sè-kài ū put-chí teh koan-sim tī lán. Tī I-é-su piàn iông-māu ê kò͘-sū tiong, ū nn̄g ūi Kū-iok sî-tāi ê sèng-tô͘, to̍h sī Mô͘-se, E-li-iah tùi hit-ê bô khòaⁿ-kìⁿ ê sè-kài ū lâi chih-chiap in ê Chú, lâi kah I kóng-ōe, — sī kóng sím-mi̍h? Kám sī kóng khí Hoâ-láu ông kah Âng-hái ê sū, A-hap ông kah Na-bot ê phû-tô hn̂g ê sū, kám sī in tī tē-chiūⁿ só͘ tē it koan-sim ê sū? Hé, m̄-sī. In iû-gôan ū tui-jip tī hit-ê úi-tāi ê cheng-sîn, to̍h sī tùi hit-ê éng-oán ê sè-kài só͘ teh chú-ì lán-.ê ê chhin-chhiat ê liām-thâu."In tâm-lūn I ê pān-sè, to̍h sī I tī Ê-lú-sa-lèm só͘ beh le̍k-kòe ê." Che kám m̄-sī àm-sī lán chai in chhim-chhim só͘ koan-sim ê, kám sī tī hit-ê tiùⁿ-lî lāi, in í-ki̍p in ê tōa ê tâng-phōaⁿ tī tē-bīn chiūⁿ chín-kiù ê sū-gia̍p tiong só͘ koan-sim ê?

「Tī起头有道，道kah上帝同在，道to̍h是上帝。」咱ài tùi chia来讲起基督ê生涯。Tī世间无论甚物伟大ê人，伊ê传记，咱lóng是tùi伊出世，伊初出现ê日来讲起。总是论咱ê主ê传记，咱ê思想tio̍h ài倒tńg想到tī他所属hit-ê永远ê世界，在tī hit-ê世界teh看，咱chit-ê，是kan-taⁿ无意中ê事。Pôaⁿ过咱所bat chit-ê世界，pôaⁿ过众星辰，以及物质、空间、时间ê界限外。有一个实在ê世界，永远者ê世界，to̍h是上帝以及众圣使所tiàm ê，to̍h是咱chit-ê世界以及其它ê ê源头ê世界tī-.leh。这是咱ê信仰ê一切所根据ê事实。咱bē-tàng看见hit-ê世界，咱bē-tàng测量hit-ê陆地，hit-ê海岸。Hit-ê黄金城市ê光彩，m̄-bat kha̍p-tio̍h咱ê目睭。总是咱信hit-ê世界是tùi永远有包围tī咱ê身边，亦Hit-ê tùi hia来ê，有kā咱讲起hit所在ê消息。

伊m̄限定报咱知hit-ê世界是一个无限量ê圣ê世界，iáu-kú，hoān-sè ē khah确实来感动咱chē-chē人ê，to̍h是讲，hit-ê世界是一个无限量ê亲切、友爱ê世界，也in tī hit-pêng ê人热诚teh关心tī咱chit-pêng ê人。照圣册ê见解，tī hit-ê无看见ê世界，有kui大阵ê人深深teh关心咱世间人ê生活。「咱已经有做见证ê人到hiah chē，亲像云围咱。」Hit-ê永远ê世界，是耶稣ê祖家，所以他有时常感觉chit-ê代志。他有报咱知天里ê父，时常用疼痛kah哀伤ê心teh看顾咱。伊有报咱知，tī地里一个罪人反悔，to̍h tī天里为tio̍h án-ne来欢喜。伊有报咱知，hiah-ê teh照顾地chiūⁿ ê细汉gín-á ê天使有「常常见我tī天里ê父ê面。」他有报咱知，亚伯拉罕tī hit-ê无看见ê世界，teh欢喜来看伊ê日tī chia，亲像，hit-ê世界有不止teh关心tī咱。Tī耶稣变容貌ê故事中，有两位旧约时代ê圣徒，to̍h是摩西、以利亚tùi hit-ê无看见ê世界有来chih接in ê主，来kah他讲话，—是讲甚物？Kám是讲起法老王kah红海ê事，亚哈王kah拿伯ê葡萄园ê事，kám是in tī地chiūⁿ所第一关心ê事? Hé，m̄是。In犹原有追jip tī hit-ê伟大ê精神，to̍h是tùi hit-ê永远ê世界所teh主意咱ê ê亲切ê念头。「In谈论他ê pān势，to̍h是他tī耶路撒冷所beh历过ê。」这kám m̄是暗示咱知in深深所关心ê，kám是tī hit-ê帐篱内，in以及in ê大ê同伴tī地面上拯救ê事业中所关心ê?