《《平民ê基督传》》

 | | | 转寄

Tēsaⁿ koàn Tēla̍k chiuⁿ Nîkotémô͘ 第三卷 第六章 Nî-ko-té-mô͘

作者 Tâi e̍k:Ko Tekchiong,Siutēng Lîm Chùnio̍k & Chng Hūiphêng 2024.05.19





Tēla̍k chiuⁿ Nîkotémô͘

Lán thang sióngsiōng tī hit àm, Êlúsalem̀ siâⁿ úntàng ū tōa iôchoah, tōa siū kámtōng chiah tio̍h. Inūi chitê siàuliân ê siansiⁿ, ū tī hiahê tùi ta̍k só͘chāi chūchi̍p lâi ê chèng Iûthàilâng ê bīnchêng, lâi siochèⁿ, lêngjio̍k kàuhōe íki̍p kokbîn ê thâulâng ê koânsè, sòa kongjiân lâi kongkek, kóng in sī hō͘ kàuhōe piànchò chi̍t chióng ê chha̍t siū! chhì siūⁿ, nā ū chhinchhiūⁿ chit khoán ê lâng lâi kongkek lán ê kàmtokhōe! Á sī tī lán ê gīhōe ê tiongkan, ū chi̍tê chèng lâng só͘ chunkèng ê sèng chiá hiánchhut chi̍tê koânui chiá ê siūkhì ê bīnmāu, tùi gōabīn tōa hoa̍h ti̍tti̍t ji̍plâi. Tī Siōngtè kah chènggī ê miâ, lâi soanthoân âukiò kóng, lín chiahê gīoân lóng sī līiōng kong che tīteh tô͘bô͘ sukí ê līek, lán siūⁿ siáⁿ khoán? lán kám bô phahsǹg hitê siâⁿ・ni̍h ê lâng beh ūitio̍h ánne, lâi tāmpo̍h iôchoah ?

Khaksi̍t, hit àm tī Êlúsalem̀, keke hō͘hō͘ tīteh chia̍h àm pn̄g ê sî, iā tī kelō͘・ni̍h, tīchia tīhia ū kiat kui tóng, lóng sī teh kóng khí chitê siàuliân, kîī ê sianti lâng íki̍p I tī sèngtiān só͘ kiâⁿ hitê ōe hō͘ lâng chheⁿkiaⁿ ê tāichì. Tī Êlúsalem̀ hiahê teh ūi kìsêng cho͘chit ê lâng, simlāi ū phō hoánkhòng kah phoephêng ê thāitō͘, Chóng・sī liân tī Hoatlīsài lâng ê tiongkan hiahê khah chhim siūⁿ・ê, khòaⁿkìⁿ I só͘ kiâⁿ ê sū, simlāi mā sī siū tōa ê kámkek. Putkoán siáⁿ khoán, I sī chi̍tê sèngchiá, sī chi̍tê ióngkám ê chènggī ê chiànsū. Hit sî úntàng ū chin chē lâng tāike sèsè siaⁿ teh kóng, I tek khak m̄ sī kantaⁿ chi̍tê pêngsiông ê lâng niāniā. Hit sî úntàng tùi pak pêng ū chin chē Galílaiah ê lâng sòa tòa chióngchióng kîī ê hongsiaⁿ lo̍hlâi lâm pêng. Lán iā thang liāusióng, Iôhaneh íki̍p i ê siàuliân ê tângphōaⁿ, úntàng íkeng ū kóngkhí kiâⁿsélé Iôhaneh ū ánchóaⁿ lâi kiànchèng Iésu ê sū. Inūi hit sî chèng lâng lóng sī sìniōng kiâⁿsélé Iôhaneh só͘ kiànchèng ê ōe.

Hoānsè Iôhaneh in tāike íkeng ū kóngkhí, Chóng・sī chiàu khah tōabīn in sībô kóng chiah tio̍h, iā khah tōabīn Iésu ū chó͘chí in. Inūi in nā kóngkhí I só͘ kiâⁿ ê sînjiah, lâng tiāⁿtio̍h ài lūnkhí I ê tāichì, iā khióngkiaⁿ hoántńg ē chó͘tòng tio̍h I só͘ beh chò ê kang, lâi kantaⁿ chūchi̍p chēchē bô líkái ê lâng tiàm tī I ê sin piⁿ. Inūi Êlúsalem̀ ê jînbîn, sībô kohiūⁿ Galílaiah ê jînbîn, in khiok sī ū teh siūⁿ kóng, Siōngtèkok sī chènggī ê kok, Chóng・sī kîsi̍t in tēit koansim・ê, sī teh siūⁿ kóng, in ê kok beh chiâⁿchò Isulael ê êngkng, iā hit sî Iéhobah púnsin beh chò in ê ông, Mesíiah beh chò in ê chítō chiá, chò bānkoânlêng ê Siōngtè ê tāipiáu lâi chénglí tēbīn chiūⁿ itchhè ê koânpèng.

Itpoaⁿ ê Iûthàilâng to lóng sī khǹg chhinchhiūⁿ chit khoán ê ìkiàn, só͘í I nā khéng kah in tôngì, beh lâi chūchi̍p kui tōatīn ê lâng, jia̍tsim lâi chò I ê khachhiú, tī I ê sin piⁿ lâi ênghián in ê kok, che úntàng sībô ohtit ê sū, Chóng・sī chit chióng sū sī put ha̍p, bô koanhē tī I ê chinsi̍t kèōe. I chinsi̍t ê kèōe sī beh thêko jînlūi lêngsèng ê sengoa̍h sūgia̍p. Só͘í chiàu khòaⁿ I sī bênghián ài únba̍t I púnsin, bô ài hiánjiân tī Êlúsalem̀, iā sī ū chó͘chí itchhè sio̍k tī sî bōekàu ê ta̍k ténghō ê miâsiaⁿ.

Chóng・sī chèng lâng tiāⁿtio̍h ài susiúⁿ I ê tāichì, tī ta̍k kaikip to ū chin chē lâng teh susiúⁿ I, Iôhaneh ū kéngsoán chi̍tê tùhiān ê lē lâi chísī lán chaiiáⁿ hit sî ê chêng kéng.

"Ū chi̍tê Hoatlīsài lâng, miâ Nekotémô͘, sī Iûthàilâng ê koaⁿ."Chitê Nekotémô͘ ū chhimchhim teh siūⁿ i só͘ kiâⁿ ê sū, suijiân i ê tângphōaⁿ lóng sī teh hoánkhòng Iésu, Chóng・sī i khòaⁿkìⁿ chitê ióngkám ê siàuliân ê sianti lâng só͘ chò ê sū, simlāi tōatōa siū kámtōng. I tī simlāi chin kîkoài teh sàmsu Iésu ê sū, i ài chaiiáⁿ I ê tāichì. Chiàu khòaⁿ i sī chi̍tê sêngsi̍t jia̍tsêng ê lâng, khósioh i sī ū khah siótáⁿ, khah pósiú ê kàutô͘; chit khoán ê lâng tī ta̍k sîtāi to lóng sī bô khoàikhoài lâi piáusī i ê ìsù. Só͘í i ū tī Pôaⁿkòecheh goe̍h àmmê, chhēng tn̂gtn̂g ê gōathò, àmtiong kakī chi̍t lâng thaucháu chhutkhì kiâⁿ tī kelō͘ ê ū chhiūìm àmàm ê só͘chāi, siūⁿ beh chhōe Iésu, to̍h kiâⁿ kàu chi̍t ūi, to̍h sī tōabīn Iésu ê ha̍kseng Iôhaneh ū kah I chòhóe tiàm ê só͘chāi.

Lán thang sióngsiōng Iôhaneh ū ànnāi chitê chhutmiâ ê lângkheh, chiūⁿkhì tī i kah i ê siansiⁿ só͘ tiàm hitê m̄ chiâⁿ mi̍h ê lâuténg, ia̍h i ū chē tīhia chùì lâi thiaⁿ, sòa kìtit i tī ū chi̍t ji̍t só͘ beh tùi sèkài lâi kiànchèng ê sū. Lán teh siūⁿ Iôhaneh nā ēthang kohkhah gâu kìtit chit chàn sū sī chin hó, che kám sī bô kèngkhiân ê só͘chāi? inūi i chíū kì tété kúikù ōe, beh lâi chò lán ê lō͘ēng. Só͘í lán tio̍h chimchiok lâi siūⁿ sèngchheh só͘ kì ê ígōa ê ìsù, sòa chiàu lán só͘ ē・ê, lâi chengpó͘ lo̍hkhì chiah hó.

Lán thang liāusióng Nekotémô͘ sī himbō͘ ài thiaⁿ Iésu kánglūn I só͘ beh kiànsiat ê ôngkok; iā iûgoân thang siūⁿ, I sī ū khǹg itpoaⁿ ê Iûthàilâng ê Siōngtèkok ê koanliām tī・leh. I sī bô kohiūⁿ kîî ê lâng, iûgoân ū teh thènghāu Isulael tēbīn chiūⁿ ê ôngkok, beh tittio̍h êngkng, chhiongsēng; iā teh siūⁿ, chūjiân ta̍kê Isulael lâng, tùi chhutsì to̍h sī chiâⁿchò hitê ôngkok ê chi̍toân. I sī ū tōatōa teh kîthāi Iésu beh chiâⁿchò hitê só͘ ioksok ê Mesíiah. I sī chi̍tê lāutōalâng, koh ū chhongbêng; iā tī chongkàu kài mā sī chi̍tê koânui chiá, só͘í hoānsè i ū khǹg chhinchhiat ê ìsù, teh ǹgbāng i só͘ khó͘khǹg ê ōe íki̍p i ê kámhòa, ūkàu gia̍h ē khamtit thang hō͘ chákhí hiahni̍h piàⁿmiā, lâi chhutthâu chitê siàuliân ê jia̍tsimka hoaⁿhí chiapla̍p. Iā bián giâugî, i úntàng ū teh siūⁿ, siatsú Iésu nāsī beh kiànsiat chhinchhiūⁿ i só͘ teh liāu bāng ê ôngkok, i sī ē chiâⁿchò chi̍tê tôngchì ê lâng, iā putchí ū la̍t thang pangchō͘ i.

Chhinchhiūⁿ ánne, Nekotémô͘ ū hiánchhut i ēthang pangchō͘ i hō͘ i thang siū I ê unchêng ê thāitō͘, iā Iésu tekkhak sī ū ēng tiāmchēng, koh ū uigiâm ê ōe lâi chekpī i, hō͘ i cheksî khiampi chiah tio̍h. Só͘í i chiah ū ēng hitkhoán chhimchhim chunkèng ê thāitō͘, lâi chhengho͘ chitê siàuliân ê chngkhalâng kóng,"La̍hbí, goán chai lí chò siansiⁿ, sī tùi Siōngtè lâi・ê, inūi nā m̄ sī Siōngtè kah Lí tī・leh, to̍h bô lâng ē kiâⁿ Lí só͘ kiâⁿ chiahê sîn jiah."

Lán lóng bô thiaⁿkìⁿ Nekotémô͘ ū sòachiap koh kóngkhí siáⁿmi̍h tāichì, lán chíū thang thuichhek jîí, inūi Iésu hutjiânkan ū chó͘chí Nekotémô͘ ê ōe, iā kahná chhinchhiūⁿ ū liáukái tī i ê thâunáu lāi só͘ teh gîbūn ê būntê; sòa lâi ìntap i kóng,"góa si̍tsi̍t kā lí kóng, lâng nā bô têngthâuseⁿ, to̍h bōeē khòaⁿkìⁿ Siōngtè kok."

Lán thang phahsǹg, Iésu ū kohkhah siôngsè lâi soatbêng I ê ìsù, kóng,"La̍hbí, lí só͘ siūⁿ・ê, lūn Siōngtè kok ê ìsù sī choânjiân chhògō͘ lah. Lí iáubōe koh kóng ê chìnchêng, chhiáⁿ iôngín góa lâi chísī lí sìchiàⁿ ê kiànkái. Lūn góa só͘ kiànsiat ê ôngkok, lóng bô ū hitkhoán chèngtī íki̍p tē chiūⁿ ê koânsè kah te̍kkoân ê ìsù tī・leh. Góa ê ôngkok to̍h sī hitkhoán ū sêngsi̍t sim ê lâng ê kok; iā bôlūn tapo͘, á・sī chabó͘, hoānnā tī simté, ū chûn úitāi ê lísióng, tiongsi̍t hângho̍k Siōngtè ê lâng, to̍h sī góa ê ôngkok ê chi̍toân. Só͘í m̄ sī kantaⁿ tio̍h chhutsì chò Iûthàilâng, mā m̄ sī ū Iûthàilâng ê te̍kkoân to̍h ēthang chiâⁿchò góa ê ôngkok ê chi̍toân. Lâng bô hun siáⁿ lâng, he̍ksī Iûthài á・sī gōapang, nāsī bô têngthâuseⁿ, bô tùi téngbīn, tùi Siōngtè ê sîn lâi seⁿ, to̍h bōeē ji̍p tī hitê sêngsi̍t sim ê ôngkok."

Lán úntàng beh kîkoài, ánchóaⁿ chit chióng ê tōlí ū hiahni̍h bêloān chitê chhimtîm ê chongkàuka La̍hbí, Nekotémô͘ ê sim leh? lūn têngthâuseⁿ ê tōlí, chāi Iûthàilâng to m̄ sī hihán ê ōe. In bat teh phahsǹg gōapang lâng nā lâi chiapla̍p Iûthàikàu, sī khòaⁿchò têngthâuseⁿ ê ìsù. Κiámchhái i ē jûloān kàu ánne, sī ūitio̍h i ū thiaⁿtio̍h Iésu kóng, ta̍k lâng liân Iûthàilâng to lóng tio̍h têngthâuseⁿ; iáukoh chiàu La̍hbí ê ōe sī kóng, ta̍kê Isulael lâng chūjiân sī lóng beh ū hūn tī hitê chionglâi ê sèkài. Iésu só͘ kóng ê ōe, tekkhak sī ū bênghián khah kohiūⁿ tī i só͘ teh siūⁿ ê ìsù. Tùi ánne i chiah kóng,"góa lóng bētàng liáukái, lâng to íkeng lāu, ánchóaⁿ ē têngthâuseⁿ? kám ē koh ji̍p lāubú ê paktó͘ lāi lâi seⁿ?"

Nekotémô͘ ū mn̄g kóng, ánchóaⁿ? Iáukoh Iésu lóng bô soatbêng hitê "ánchóaⁿ." i sī ū ēng lâng ê kenggiām lâi chhuipek i, hō͘ i kakī lâi phòaⁿtoàn hitê tāichì kóng,"jio̍kthé kah sînlêng, á・sī chūjiân lâng oa̍h tī chit sèkan kah sînlêng ê lâng, simkoaⁿ choan ǹg Siōngtè, hitê chengchha lí chai. Tùi jio̍kthé seⁿ・ê, sī jio̍kthé; tùi sîn seⁿ ê, sī sîn. Lâng ē seⁿchhut hitkhoán sînlêng ê liāmthâu, kosiōng ê lísióng ê io̍kbōng, m̄ sī chhut tùi bôìtiong, á・sī chūjiân só͘ ē・ê. Hit khoán sū tiāⁿtio̍h sī tùi Siōngtè ê sîn chiah ēthang sêngchiū i. Nāsī beh lâi lūnkhí hitê "ánchóaⁿ", lán chíū sī thang kóng ánne niāniā, chitê īsiōng sī pôaⁿkòe lán só͘ ē liáukái ê sū lah. Inūi Sèng Sîn ê kámhòa sī chhinchhiūⁿ hong, chūiû chūchāi, sī chīnchāi òbiāu ê sū. Chit sî lí thiaⁿkìⁿ hong teh chhoe, tī gōabīn ê chhiūchâng, Iáukoh lí m̄ chai i tùi tó ūi lâi, iā beh tùi tó ūi khì. Kiànnā tùi Sèng Sîn seⁿ・ê, ia̍h sī ánne. Góa ê kok to̍h sī tùi Sèng Sîn têngthâuseⁿ・ê, tùi Siōngtè ê sîn só͘ seⁿ ê lâng ê kok."

Hitê lāu La̍hbí thiaⁿliáu mā lóng bōe hiáutit siáⁿmi̍h, sòa kantaⁿ mn̄g I kóng,"ánchóaⁿ ē ánne ah?"

"Lí chò Isulael ê siansiⁿ, iā m̄ chai che? góa kóng, lâng tio̍h suiàu Siōngtè ê sîn ê kámtōng, chiah ē chiâⁿchò sînlêng ê lâng. Chitê tansûn ê sūsi̍t, lí siōngchhiáⁿ to thiaⁿ bōe hiáutit leh; góa nā kā lí kóng, sio̍k tī thiⁿténg ê khah chhimò ê sū, lín thài beh sìn? inūi chíū góa chiah ēthang kā lín kóng hitê sū. Bô lâng bat chiūⁿthiⁿ lâi bat hitê sū, chíū tī thiⁿ・ni̍h ê Jînchú, tùi thiⁿ kànglo̍h・ê niāniā. Lí iáubōe liáukái góa íki̍p góa ê kok ê íchêng, iáu ū chin chē thang chheⁿkiaⁿ ê sūsi̍t, lí tio̍h ài bat. Góa m̄ sī chiàu lín só͘ teh siūⁿ ê khoán, ài beh lâi chē kunông ê gio̍kchō, lâi hiánchhut Siōngtè ê koânpèng, sī beh lâi sêngsiū hitkhoán kiànsiàu ê si̍pjīkè, lâi hiánchhut Siōngtè ū ánchóaⁿ hiseng I púnsin lâi thiàⁿ sèkan lâng. Κoh chhinchhiūⁿ Mô͘se kíkhí chôa tī khòngiá kiù Isulael, Jînchú ia̍h tekkhak tio̍h ánne siū kíkhí."

Chhiáⁿ sióngsiōng chitê lāu La̍hbí chimchiok thiaⁿliáu i ê chengsîn chōngthāi sī siáⁿ khoán. Chitê khiā tī Nekotémô͘ ê bīnchêng ê Iésu sī chi̍tê bô miâ siaⁿ siàuliân ê chngkhalâng; i bô sêngsiū siáⁿmi̍h ha̍khāu ê kàuio̍k; mā sī bô siū kàuhōe ê jīnkhó, iáukoh tī bô ìsek ê tiongkan, i ū tittio̍h I ê tēūi, lâi chiâⁿchò Nekotémô͘ ê sītōa; koh tùi i kiànchèng púnsin sī tùi thiⁿténg lo̍hlâi・ê, ū chaiiáⁿ Siōngtè ê kèōe, sòa kiànchèng I sī beh lâi chiâⁿchò sèkan ê chin kng, éngoán ê oa̍hmiā ê goânthâu. Khaksi̍t, I nā m̄ sī chitê bāngsióngka, to̍h sī tī I ê lāibīn tiāⁿtio̍h sī ū hitkhoán sînsèng ê iàusò͘ tī・leh.

In tī sio biānhōe ê tiongkan só͘ kóng ê ōe, chiàu lán só͘ ēthang chaiiáⁿ・ê, tāikhài sī chhinchhiūⁿ téngbīn ê khoánsit. In ê tâmlūn sī ánchóaⁿ kiatkio̍k, lán lóng m̄ chai, inūi chiàu sèngchheh só͘ kì hitê kiatbóe ê ōe sī kóng, hō͘ kiànnā sìn ê lâng tiàm tī i ū éngoa̍h, m̄koh chit kù bêngbêng sī Iôhaneh só͘ chùkái ê ōe. Chitê tōa La̍hbí thiaⁿliáu m̄chai sī ū liáukái I ê ìsù, á・sī thiaⁿliáu iubūn to̍h khì, lán mā sī lóng m̄ chai. Lán sī chin ài chaiiáⁿ hitê kiatkio̍k, inūi Nekotémô͘ suijiân sī ū khah sòejī, khah siótáⁿ ê lâng, iáukoh sī chi̍tê sêngsi̍t teh cháuchhōe chinlí ê lâng, só͘í lūn i ê sū sī putchí ē giú lán ê sim. Hitê kiatkio̍k, bôlūn sī siáⁿ khoán, tùi hit sî khí, i ê sim úntàng sībô bē kìtit Iésu chiah tio̍h. Chitê tāichì liáuāu, lán ū koh thiaⁿtio̍h i ê miâ nn̄g pái. Ia̍h ta̍kpái i lóng sī ū ūi Iésu. Ia̍h ta̍kpái mā sī ū hiánchhut i ê siótáⁿ ê sèngchit. Chhinchhiūⁿ bat ū chi̍t pái, jînbîn chènglâng ê thâulâng tehbeh kongjiân lâi títe̍k Iésu ê sî, i ū ēng bô kàu jōa hunbêng ê thāitō͘ lâi ūi I kóng,"bô thiaⁿ lâng ê piānkái, lán ê lu̍thoat kám ū tēng siáⁿmi̍h lâng ê chōe?"Koh ū chi̍t pái Iésu hō͘ lâng tèngsí, iā Alēmáthài ê Iôséhuh beh lâi bâichòng i ê sinsi ê sî, tī sèngchheh ū kìchài kóng,"koh ū Nekotémô͘, khíthâu bat mêsî chiūkīn Iésu・ê" ia̍h lâi, ū tòa bu̍tio̍h chhiau tîmhiuⁿ. Che sī i chòeāu só͘ ēthang thè chitê siàuliân ê pêngiú só͘ chò ê sū; i chit sî suijiân khòaⁿkìⁿ Iésu siū lâng hāisí, chitê sūsi̍t bêngbêng sī teh piáubêng Iésu ê sitpāi, iáukoh Iésu sī i só͘ chunkèng ê chi̍tê pêngiú, só͘í chiah the̍h hiahni̍h kùitiōng ê mi̍h lâi beh boah Iésu ê sinsi.

Chhinchhiūⁿ ánne, lán tùi chit sî khí sībô koh ū khòaⁿkìⁿ Nekotémô͘ ê chhutthâu. Chóng・sī lán tekkhak bētàng chū ánne lâi soahkhì, ōaⁿ lâi kóng pa̍t mi̍h ê sū; lán tiāⁿtio̍h tio̍h thêng sùnkan tīchia koh lâi chòhóe siūⁿ i só͘ teh bêloān ê būntê.

Lūn hitê būntê chìchió lán sī ēthang ánne siūⁿ, lán tùi jînlūi chìnhòa ê sūsi̍t, ū tittio̍h chitê kàuhùn tī・leh. Siōngtè tùi lán jînlūi sī ū chûn chi̍tê oántāi ê kèōe tī・leh, Siōngtè ū hō͘ hitkhoán khah hāténg ê siūchōbu̍t chiāmchiām chìnhòa kàu chiâⁿchò khah kosiōng ê chûnchāi chiá, to̍h sī chiâⁿchò chi̍tê chūjiân ê lâng; chhinchhiūⁿ ánne, i ū hō͘ chūjiân lâng chìnhòa kàu chiâⁿchò kohkhah kosiōng ê chûnchāi chiá, to̍h sī chiâⁿchò sînlêng ê lâng, to̍h sī hitkhoán kah Siōngtè ū sio kiatliân ê lâng. Chūjiân lâng sī ēthang chìnhòa kàu chiâⁿchò sînlêng ê lâng, chhinchhiūⁿ niûá, ēthang chìnhòa kàu chiâⁿchò bóetia̍p kāngkhoán. Iáukoh m̄ sī kóng, ta̍k chiah niûá lóng ū chìnhòa kàu chiâⁿchò bóetia̍p; iā ta̍kê lâng mā m̄ sī kóng lóng ū chìnhòa kàu chiâⁿchò sînlêng ê lâng. Lâng lóng ē, Chóng・sī bô lóng ánne. Iésu ū kóng, chūjiân lâng nāsī beh tittio̍h chiâⁿchò sînlêng ê lâng, tek khak tio̍h ài kah Siōngtè ū jînkehtek ê liânlo̍k tī・leh. I ê oa̍hmiā tekkhak tio̍h hō͘ Siōngtè ê Sèng Sîn chhiongmóa lâi tittio̍h oa̍hkhì. Chūjiân lâng hoānsè sī ē chiâⁿchò oa̍hkhì, chūjiân lâng hoānsè sī ōe chiâⁿchò iusiù ê lâng, chhinchhiūⁿ niûá ē chiâⁿchò iuliông ê niûá kāngkhoán. Iáukoh hitkhoán siōng iuliông niûá mā bōe ēngtit kóng, sī bóetia̍p . I sī iáu ū sitlo̍h i ê chinsi̍t ê thianhūn. Chhinchhiūⁿ ánne, hitkhoán siōng iusiù ê chūjiân lâng, mā iáubōe ēngtit kóng, sī sînlêng ê lâng. I iáu ū suiàu Siōngtè ê sîn thang lâi tittio̍h oa̍hmiā ê liânlo̍k.

Kiâⁿsélé Iôhaneh kàu ū thêngtō͘ sī íkeng ū kàsī chit tiâu ê tōlí, i kóng,"góa chí ū sī ēthang chúnpī lín ê sim, ēng chúi kā lín kiâⁿsélé, hō͘ lín hóekái niāniā. Chóng・sī to̍kto̍k hitê lō͘bóe góa lâi・ê, chiah ēthang hō͘ lín tittio̍h sînlêng ê oa̍hmiā, to̍kto̍k I chiah ē ēng chúi kah Sèng Sîn kā lín sé."

Hoānsè lán tiongkan, ū ê lâng sī chhinchhiūⁿ Nekotémô͘, khòaⁿ che sī kahná chún chin ohtit ê ōe. Chóng・sī Iésu to íkeng ū hiahni̍h chhutla̍t lâi kiànchèng, lán kám m̄ sī tio̍h chimchiok lâi siūⁿ chiah hó? lán tiongkan chēchē lâng sī kantaⁿ boánchiok hitkhoán ū kòe káiliông ê niûá, hitkhoán toanchong, hó bô͘iūⁿ ê chūjiân lâng jîí. Kîsi̍t Siōngtè ê sîn, tùi lán ū khǹg oántāi ê ǹgbāng tī・leh. I chit sî putsî to teh thènghāu lán. Sèng Sîn sī chhinchhiūⁿ lán ta̍k sî só͘ teh ho͘khip ê khongkhì kāngkhoán, chūiû chūchāi ūnhêng tī lán ê sin piⁿ. Lán bētàng kóngkhí i tùi tóūi lâi, iā tùi tóūi khì. Lán sī lóng bētàng kóng siáⁿ khoán, iáukoh che sī ū móamóa ê ǹgbāng ê susiúⁿ. Lán thang sìn, Siōngtè ê Sîn, I ê chūiû ê ūnhêng, tekkhak m̄ sī kantaⁿ kàihān tī lán ê kàuhōe lāi, kantaⁿhiahê ū te̍kkoân ê chèng sèngtô͘ chiah ū thang tittio̍h I ê chhiongmóa niāniā.

Siatsú lán nā ū thiaⁿkìⁿ, ū siáⁿmi̍h bô siū kàuio̍k ê pō͘peng, tióngtōa tī pháiⁿ ê katêng, lâi o̍h lâng kóng chēchē ê pháiⁿōe, iā lóng bōeē hiáu kîtó, Chóng・sī i ê pêngiú tāike chin thiàⁿthàng i, inūi i chò lâng sī choânjiân bô kò͘ tio̍h kakī, iā i ê chòeāu, sī chhinchhiūⁿ Kitok ê khoán, ū thè pa̍t lâng lâi sí. Lán tùi khòaⁿkìⁿ chit chióng sūsi̍t, puttekput tio̍h siūⁿ kóng, hoānnā sio̍k tī hitkhoán hó, koh oânchoân ê hêngûi, lóng sī chhut tùi téngbīn lâi・ê; lán puttekput tio̍h siūⁿ kóng, che sī tùi Iésu só͘ kóng khí, hitê Siōngtè sînpì ê ê Sèng Sîn hong ê só͘ kámhòa・ê, inūi "lán m̄ chai i tùi tóūi lâi, tùi tóūi khì."



第六章 Nî-ko-té-mô͘


咱thang想像tī hit暗，耶路撒冷城稳当有大摇choah，大受感动chiah tio̍h。因为chit-ê少年ê先生，有tī hiah-ê tùi ta̍k所在聚集来ê众偤太人ê面前，来sio-chèⁿ，凌辱教会以及国民ê头人ê权势，续公然来攻击，讲in是hō͘教会变做一种ê贼siū！试想，若有亲像chit款ê人来攻击咱ê监督会！Á是tī咱ê议会ê中间，有一个众人所尊敬ê圣者显出一个权威者ê受气ê面貌，tùi外面大hoa̍h直直入来。Tī上帝kah正义ê名，来宣传喉叫讲，lín chiah-ê议员lóng是利用公职tī-teh图谋私己ê利益，咱想啥款？咱kám无phah算hit-ê城里ê人beh为tio̍h án-ne，来淡薄摇choah ?

确实，hit暗tī耶路撒冷，家家户户tī-teh食暗饭ê时，也tī街路里，tī-chia tī-hia有结kui党，lóng是teh讲起chit-ê少年，奇异ê先知人以及伊tī圣殿所行hit-ê话hō͘人生惊ê tāi-chì。Tī耶路撒冷hiah-ê teh为既成ê组织ê人，心内有抱反抗kah批评ê态度，总是连tī法利赛人ê中间hiah-ê khah深想-・ê，看见伊所行ê事，心内mā是受大ê感激。不管啥款，伊是一个圣者，是一个勇敢ê正义ê战士。Hit时稳当有真chē人大家细细声teh讲，伊的确m̄是kan-taⁿ一个平常ê人niā-niā。Hit时稳当tùi北pêng有真chē加利利ê人续带种种奇异ê风声落来南pêng。咱也thang料想，约翰以及伊ê 少年ê同伴，稳当已经有讲起行洗礼约翰有án怎来见证耶稣ê事。因为hit时众人lóng是信用行洗礼约翰所见证ê话。

Hoān-sè约翰in大家已经有讲起，总是照khah大面in是无讲chiah tio̍h，也khah大面耶稣有阻止in。因为in若讲起伊所行ê神迹，人tiāⁿ-tio̍h ài论起伊ê tāi-chì，也恐惊反转会阻挡tio̍h伊所beh做ê工，来kan-taⁿ聚集chē-chē无理解ê人tiàm tī伊ê 身边。因为耶路撒冷ê人民，是无koh样加利利ê人民，in却是有teh想讲，上帝国是正义ê国，总是其实in第一关心-・ê，是teh想讲，in ê国beh成做以色列ê荣光，也hit时耶和华本身beh做in ê王，弥赛亚beh做in ê指导者，做万权能ê上帝ê代表来整理地面上一切ê权柄。

一般ê偤太人to lóng是khǹg亲像chit款ê意见，所以伊若肯kah in同意，beh来聚集kui大阵ê人，热心来做伊ê脚手，tī伊ê 身边来荣显in ê国，这稳当是无oh得ê事，总是chit种事是不合，无关系tī伊ê 真实计画。伊真实ê计画是beh提高人类灵性ê生活事业。所以照看伊是明显ài稳密伊本身，无ài显然tī耶路撒冷，也是有阻止一切属tī时未到ê ta̍k等号ê名声。

总是众人tiāⁿ-tio̍h ài思想伊ê tāi-chì，tī ta̍k阶级to有真chē人teh思想伊，约翰有拣选一个着现ê例来指示咱知影hit时ê情景。

「有一个法利赛人，名尼哥底谋，是偤太人ê官。」Chit-ê尼哥底谋有深深teh想伊所行ê事，虽然伊ê 同伴lóng是teh反抗耶稣，总是伊看见chit-ê勇敢ê少年ê先知人所做ê事，心内大大受感动。伊tī心内真奇怪teh三思耶稣ê事，伊ài知影伊ê tāi-chì。照看伊是一个诚实热诚ê人，可惜伊是有khah小胆，khah保守ê教徒；chit款ê人tī ta̍k时代to lóng是无快快来表示伊ê 意思。所以伊有tī Pôaⁿ过节月暗暝，穿长长ê外套，暗中ka-kī一人偷走出去行tī街路ê有树荫暗暗ê所在，想beh chhōe耶稣，to̍h行到一位，to̍h是大面耶稣ê学生约翰有kah伊做伙 tiàm ê所在。

咱thang想像约翰有àn-nāi chit-ê出名ê人客，上去tī伊kah伊ê 先生所tiàm hit-ê m̄成物ê楼顶，亦伊有坐tī-hia注意来听，续记得伊tī有一日所beh对世界来见证ê事。咱teh想约翰若ē-thang koh-khah gâu记得chit层事是真好，这kám是无敬虔ê所在?因为伊只有记短短几句话，beh来做咱ê路用。所以咱tio̍h chim-chiok来想圣册所记ê以外ê意思，续照咱所ē-・ê，来增补落去chiah好。

咱thang料想尼哥底谋是欣慕ài听耶稣讲论伊所beh建设ê王国；也犹原thang想，伊是有khǹg一般ê偤太人ê上帝ê国ê观念tī-・leh。伊是无koh样其余ê人，犹原有teh thèng候以色列地面上ê王国，beh得tio̍h荣光、昌盛；也teh想，自然ta̍k-ê以色列人，tùi出世to̍h是成做hit-ê王国ê一员。伊是有大大teh期待耶稣beh成做hit-ê所约束ê弥赛亚。伊是一个老大人，koh有聪明；也tī宗教界mā是一个权威者，所以hoān-sè伊有khǹg亲切ê意思，teh ǹg望伊所苦劝ê话以及伊ê 感化，有够额会堪得thang hō͘早起hiah-ni̍h拚命，来出头chit-ê少年ê热心家欢喜接纳。也免侥疑，伊稳当有teh想，设使耶稣若是beh建设亲像伊所teh料望ê王国，伊是ē成做一个同志ê人，也不止有力thang帮助伊。

亲像án-ne，尼哥底谋有显出伊ē-thang帮助伊hō͘伊thang受伊ê恩情ê态度，也耶稣的确是有用恬静，koh有威严ê话来责备伊，hō͘伊即时谦卑chiah tio̍h。所以伊chiah有用hit款深深尊敬ê态度，来称呼chit-ê少年ê庄脚人讲：「拉比，阮知你做先生，是tùi上帝来-・ê，因为若m̄是上帝kah你tī-・leh，to̍h无人ē行你所行chiah-ê神迹。」

咱lóng无听见尼哥底谋有续接koh讲起啥物tāi-chì，咱只有thang推测而已，因为耶稣忽然间有阻止尼哥底谋ê话，也kah-ná亲像有了解tī伊ê 头脑内所teh疑问ê问题；续来应答伊讲：「我实实kā你讲，人若无重头生，to̍h bōe-ē看见上帝国。」

咱thang phah算，耶稣有koh-khah详细来说明伊ê 意思，讲：「拉比，你所想-・ê，论上帝国ê意思是全然错误lah。你iáu未koh讲ê 进前，请容允我来指示你四正ê见解。论我所建设ê王国，lóng无有hit款政治以及地上ê权势kah特权ê意思tī-・leh。我ê王国to̍h是hit款有诚实心ê人ê国；也无论ta-po͘，á是cha-bó͘，凡若tī心底，有存伟大ê理想，忠实降服上帝ê人，to̍h是我ê王国ê一员。所以m̄是kan-taⁿ tio̍h出世做偤太人，mā m̄是有偤太人ê特权to̍h ē-thang成做我ê王国ê一员。人无分啥人，或是偤太á是外邦，若是无重头生，无tùi顶面，tùi上帝ê神来生，to̍h bōe-ē入tī hit-ê诚实心ê王国。」

咱稳当beh奇怪，án怎chit种ê道理有hiah-ni̍h迷乱chit-ê深沈ê宗教家拉比，尼哥底谋ê心leh？论重头生ê道理，在偤太人to m̄是稀罕ê话。In bat teh phah算外邦人若来接纳偤太教，是看做重头生ê意思。Κiám-chhái伊ē jû乱到án-ne，是为tio̍h伊有听tio̍h耶稣讲，ta̍k人连偤太人to lóng tio̍h重头生；iáu-koh照拉比ê话是讲，ta̍k-ê以色列人自然是lóng beh有份tī hit-ê将来ê世界。耶稣所讲ê话，的确是有明显khah koh样tī伊所teh想ê意思。Tùi án-ne伊chiah讲：「我lóng bē-tàng了解，人to已经老，án怎会重头生？kám ē koh入老母ê腹肚内来生?」

尼哥底谋有问讲，án怎？Iáu-koh耶稣lóng无说明hit-ê「án怎。」伊是有用人ê经验来催逼伊，hō͘伊ka-kī来判断hit-ê tāi-chì讲：「肉体kah神灵，á是自然人活tī chit世间kah神灵ê人，心肝专ǹg上帝，hit-ê精差你知。Tùi肉体生ê，是肉体；tùi神生ê，是神。人ē生出hit款神灵ê念头，高尚ê理想ê欲望，m̄是出tùi无意中，á是自然所ē-・ê。Hit款事tiāⁿ-tio̍h是tùi上帝ê神chiah ē-thang成就伊。若是beh来论起hit-ê「án怎」，咱只有是thang讲án-ne niā-niā，chit-ê异象是pôaⁿ过咱所ē了解ê事lah。因为圣神ê感化是亲像风，自由自在，是尽在奥妙ê事。Chit时你听见风teh吹，tī外面ê树丛，Iáu-koh你m̄ 知伊tùi tó位来，也beh tùi tó位去。见若tùi圣神生-・ê，亦是án-ne。我ê国to̍h是tùi圣神重头生-・ê，tùi上帝ê神所生ê人ê国。」

Hit-ê老拉比听了mā lóng bōe晓得啥物，续kan-taⁿ问伊讲：「án怎ē án-ne ah?」

「你做以色列ê先生，也m̄ 知这?我讲，人tio̍h需要上帝ê神ê感动，chiah ē成做神灵ê人。Chit-ê单纯ê事实，你尚且to听bōe晓得leh；我若kā你讲，属tī天顶ê khah深奥ê事，lín thài beh信？因为只有我chiah ē-thang kā lín讲hit-ê事。无人bat chiūⁿ天来bat hit-ê事，只有tī天里ê人子，tùi天降落-・ê niā-niā。你iáu未了解我以及我ê国ê以前，iáu有真chē thang生惊ê事实，你tio̍h ài bat。我m̄是照lín所teh想ê款，ài beh来坐君王ê玉座，来显出上帝ê权柄，是beh来承受hit款见笑ê十字架，来显出上帝有án怎牺牲伊本身来疼世间人。Κoh亲像摩西举起蛇tī旷野救以色列，人子亦的确tio̍h án-ne受举起。」

请想像chit-ê老拉比chim-chiok听了伊ê 精神状态是啥款。Chit-ê khiā tī尼哥底谋ê面前ê耶稣是一个无名声少年ê庄脚人；伊无承受啥物学校ê教育；mā是无受教会ê认可，iáu-koh tī无意识ê中间，伊有得tio̍h伊ê 地位，来成做尼哥底谋ê序大；koh tùi伊见证本身是tùi天顶落来-・ê，有知影上帝ê计画，续见证伊是beh来成做世间ê真光，永远ê活命ê源头。确实，伊若m̄是chit-ê梦想家，to̍h是tī伊ê 内面tiāⁿ-tio̍h是有hit款神圣ê要素tī-・leh。

In tī相面会ê中间所讲ê话，照咱所ē-thang知影-・ê，大概是亲像顶面ê款式。In ê谈论是án怎结局，咱lóng m̄ 知，因为照圣册所记hit-ê结尾ê话是讲，hō͘见若信ê人tiàm tī伊有永活，m̄-koh chit句明明是约翰所注解ê话。Chit-ê大拉比听了m̄知是有了解伊ê意思，á是听了忧闷to̍h去，咱mā是lóng m̄ 知。咱是真ài知影hit-ê结局，因为尼哥底谋虽然是有khah sòe-jī，khah小胆ê人，iáu-koh是一个诚实teh走chhōe真理ê人，所以论伊ê 事是不止ē giú咱ê心。Hit-ê结局，无论是啥款，tùi hit时起，伊ê心稳当是无bē记得耶稣chiah tio̍h。Chit-ê tāi-chì了后，咱有koh听tio̍h伊ê 名两pái。亦ta̍k-pái伊lóng是有为耶稣。亦ta̍k-pái mā是有显出伊ê小胆ê性质。亲像bat有一pái，人民众人ê头人teh-beh公然来抵敌耶稣ê时，伊有用无到jōa分明ê态度来为伊讲：「无听人ê 辩解，咱ê律法kám有定啥物人ê罪?」Koh有一pái耶稣hō͘人钉死，也A-lē-má-thài ê约瑟beh来埋葬伊ê身尸ê 时，tī圣册有记载讲：「koh有尼哥底谋，起头bat暝时就近耶稣-・ê」亦来，有带没药chhiau沈香。这是伊最后所ē-thang替chit-ê少年ê朋友所做ê事；伊chit时虽然看见耶稣受人害死，chit-ê事实明明是teh表明耶稣ê失败，iáu-koh耶稣是伊所尊敬ê一个朋友，所以chiah the̍h hiah-ni̍h贵重ê物来beh抹耶稣ê身尸。

亲像án-ne，咱tùi chit时起是无koh有看见尼哥底谋ê出头。总是咱的确bē-tàng自án-ne来soah去，换来讲别物ê事；咱tiāⁿ-tio̍h tio̍h停瞬间tī-chia koh来做伙想伊所teh迷乱ê问题。

论hit-ê问题至少咱是ē-thang án-ne想，咱tùi人类进化ê事实，有得tio̍h chit-ê教训tī-・leh。上帝tùi咱人类是有存一个远大ê计画tī-・leh，上帝有hō͘ hit款khah下等ê受造物渐渐进化到成做khah高尚ê存在者，to̍h是成做一个自然ê人；亲像án-ne，伊有hō͘自然人进化到成做koh-khah高尚ê存在者，to̍h是成做神灵ê人，to̍h是hit款kah上帝有相结连ê人。自然人是ē-thang进化到成做神灵ê人，亲像娘á，ē-thang进化到成做尾蝶仝款。Iáu-koh m̄是讲，ta̍k只娘á lóng有进化到成做尾蝶；也ta̍k-ê人mā m̄是讲lóng有进化到成做神灵ê人。人lóng ē，总是无lóng án-ne。耶稣有讲，自然人若是beh得tio̍h成做神灵ê人，的确tio̍h ài kah上帝有人格的ê联络tī-・leh。伊ê 活命的确tio̍h hō͘上帝ê圣神充满来得tio̍h活气。自然人hoān-sè是ē成做活气，自然人hoān-sè是ōe成做优秀ê人，亲像娘á会成做优良ê娘á仝款。Iáu-koh hit款上优良娘á mā bōe用得讲，是尾蝶。伊是iáu有失落伊ê 真实ê天分。亲像án-ne，hit款上优秀ê自然人，mā iáu未用得讲，是神灵ê人。伊iáu有需要上帝ê神thang来得tio̍h活命ê联络。

行洗礼约翰到有程度是已经有教示chit条ê道理，伊讲：「我只有是ē-thang准备lín ê心，用水kā lín行洗礼，hō͘ lín悔改niā-niā。总是独独hit-ê路尾我来-・ê，chiah ē-thang hō͘ lín得tio̍h神灵ê活命，独独伊chiah ē用水kah圣神kā lín洗。」

Hoān-sè咱中间，有ê人是亲像尼哥底谋，看这是kah-ná准真oh得ê话。总是耶稣to已经有hiah-ni̍h出力来见证，咱kám m̄是tio̍h chim-chiok来想chiah好?咱中间chē-chē人是kan-taⁿ满足hit款有过改良ê娘á，hit款端庄、好模样ê自然人而已。其实上帝ê神，tùi咱有khǹg远大ê ǹg望tī-・leh。伊chit时不时to teh thèng候咱。圣神是亲像咱ta̍k时所teh呼吸ê空气仝款，自由自在运行tī咱ê身边。咱bē-tàng讲起伊tùi tó位来，也tùi tó位去。咱是lóng bē-tàng讲啥款，iáu-koh这是有满满ê ǹg望ê思想。咱thang信，上帝ê神，伊ê 自由ê运行，的确m̄是kan-taⁿ界限tī咱ê教会内，kan-taⁿhiah-ê有特权ê众圣徒chiah有thang得tio̍h伊ê 充满niā-niā。

设使咱若有听见，有啥物无受教育ê步兵，长大tī pháiⁿ-ê家庭，来学人讲chē-chē ê pháiⁿ话，也lóng bōe-ē晓祈祷，总是伊ê 朋友大家真疼痛伊，因为伊做人是全然无顾tio̍h ka-kī，也伊ê 最后，是亲像基督ê款，有替别人来死。咱tùi看见chit种事实，不得不tio̍h想讲，凡若属tī hit款好，koh完全ê行为，lóng是出tùi顶面来-・ê；咱不得不tio̍h想讲，这是tùi耶稣所讲起，hit-ê上帝神秘的ê圣神风ê所感化-・ê，因为「咱m̄ 知伊tùi tó位来，tùi tó位去。」