《绿色短评》

 | | | 转寄

习近平胡言乱语讲台湾！

作者 李南衡, ChoânTâijī/全台字 by Chng Hūiphêng 2022.11.06

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　 Lí Lâmhêng

　　　　　　　　 习近平 ô͘giân loāngí kóng Tâioân!

Cha̍pgoe̍h cha̍pla̍k, Tiongkok Kiōngsántóng tē jīcha̍p pái choân kok tāipiáu tāihōe tī Pakkiaⁿ jînbîn tāihōetn̂g chèngsek khuibō͘, Τiongkiōng chóngsukì 习近平 hoatpiáu jīcha̍ptōa chèngtī pòkò, i kóng Tiongkok beh kiâⁿ hiòng toh khì, ah sī i koattēng beh choh bānnî éngkiú ê hôngtè, lóng sī intau ê tāichì kah lán bô koanhē, lán bô pitiàu chhap i. Tānsī i o͘pe̍h loān kóngtio̍h Tâioân ê pō͘hūn, lán tio̍h chi̍ttiám chi̍ttiám kā i tôaⁿ tò tńgkhì.

　　 习近平 kóng, "chó͘kok oânchoân thóngit ittēng tio̍h si̍thiān". Sitlé, in Tiongkok lāuhòeá kok chiah ū siáⁿmi̍h "chó͘kok", in beh kah siáⁿ lâng khì thóngit, sī in tau ê tāichì, kah lán Tâioân bô tītāi. Lán chhengchhun siàuliân ê Tâioân bô siáⁿmi̍h "chó͘kok", lán kanta ū "bókok", lán nn̄gchheng saⁿpah bān lia̍p hanchîákiáⁿ búchhin ê miâ kiò Tâioân.

　　 习近平 kóng,"káikoat Tâioân būntê sī Tiongkoklâng kakī ê tāichì, tio̍h iû Tiongkoklâng lâi koattēng!" lán Tâioânlâng kòe bînchú, chūiû, ū jînkoân, ū chungiâm ê sengoa̍h, ná ū siáⁿ būntê? "Tâioân būntê" sī in Tiongkok kóng ê. Tâioân chún nāsī ū būntê, mā sī Tâioânlâng kakī ê tāichì, lán Tâioânlâng tongjiân ē kakī káikoat, ná tio̍h lôhoân chhùpiⁿ ê Tiongkok lâi thâukhak thiàⁿ? 1949 nî cha̍pgoe̍h chheit, Tionghôa Jînbîn Kiōnghôkok kiànkok ílâi kàu taⁿ, liân chi̍t kang to m̄bat thóngtī kòe Tâioân, chi̍t lâng chi̍t ke tāi, kongmá sûi lâng chhāi. Tùi Tâioân lâi kóng, Tiongkok sī kah Tâioân oânchoân bô koanhē ê gōakok. Ná ē kóng,"káikoat Tâioân būntê sī Tiongkoklâng kakī ê tāichì" leh? 习近平 lâng hóhó, ná ē thâukhak hiah bô chhengchhó, ē kóng "Tâioân būntê tio̍h iû Tiongkoklâng lâi koattēng" leh? Che ná chhiūⁿkóng; Tiongkok būntê, tio̍h iû Bôngkó͘lâng lâi koattēng; ah sī kóng, Phûtôgê būntê, tio̍h iû Spanish lâng lâi koattēng, siáⁿ lâng thiaⁿtio̍h mā chaiiáⁿ oânchoân bô tōlí. Chit chióng oânchoân bô tōlí, bô siôngsek ê ōe, 习近平 ná kóng ē chhut chhùi?

　　 习近平 kóng "kiankoat hoántùi Tâito̍k hunlia̍t hêngkèng, kiankoat hoántùi gōa pō͘ sèle̍k kansia̍p. "Tâioân chūlâi m̄bat kah Tionghôa Jînbîn Kiōnghôkok chòhóe・ kòe, sī beh ánchóaⁿ "hunlia̍t" chhutkhì? kàu kináji̍t ûichí, îit "gōa pō͘ sèle̍k kansia̍p" Tâioân, sī ùi Tiongkok lâi ê. Lán Tâioânlâng tongjiân kiankoat hoántùi.

　　 习近平 kóng "goán kianchhî ēng siōng tōa ê sêngì, chīn siōng tōa ê ló͘le̍k chengchhú hôpêng thóngit ê chiânkéng, tānsī choa̍ttùi bô sênglo̍k hòngkhì súiōng búle̍k, póliû chháichhú itchhè pitiàu chhòsi ê soán hāng." Che tio̍h náchhiūⁿ chi̍tê lâng khòaⁿ ha̍pì chhùpiⁿ ê chhù, ài kah lâunōa. I tio̍h kā chhùpiⁿ kóng, lí chit keng chhù góa ittēng beh ài, góa kianchhî ēng siōng tōa ê sêngì, ē chīn siōng tōa ê ló͘le̍k hóhóá kah lí kóng, tānsī choa̍ttùi bô sênglo̍k bô beh giâ to giâ chhèng, ē póliû chháichhú itchhè pitiàu ēng chhiúⁿ ēng thâi ēng phah ê soán hāng. Nā chiàu Kitokkàu ( paukoat Thianchúkàu, Kitokkàu, tang chèngkàu), Isulânkàu (mā kiò choh hôekàu), Iôtáiahkàu kok tōa chongkàu só͘ chunsiú ê《 cha̍pkài》, tēcha̍p kài kóng,"M̄thang tham lí ê chhùpiⁿ ê chhù; mā m̄thang tham lí ê chhùpiⁿ ê bó͘, lô͘po̍k, lúpī, gû, lî, íki̍p lí ê chhùpiⁿ itchhè só͘ū ê." ánne lán tio̍h chaiiáⁿ, Tiongkok 习近平 tham i ê chhùpiⁿ ê Tâioân, sī ge̍k thiⁿ ê chokhoat, thianlí putiông! (221021)

Chù, 习近平 　 chhiáⁿ liām Hôagí


Pe̍h-ōe-jī-pán/白话字版


《 Le̍k-sek toán-phêng 》　　　 Lí Lâm-hêng

　　　　　　　　 习近平 ô͘-giân loān-gí kóng Tâi-oân!

Cha̍p-goe̍h cha̍p-la̍k, Tiong-kok Kiōng-sán-tóng tē jī-cha̍p pái choân kok tāi-piáu tāi-hōe tī Pak-kiaⁿ jîn-bîn tāi-hōe-tn̂g chèng-sek khui-bō͘, Τiong-kiōng chóng-su-kì 习近平 hoat-piáu jī-cha̍p-tōa chèng-tī pò-kò, i kóng Tiong-kok beh kiâⁿ hiòng toh khì, ah sī i koat-tēng beh choh bān-nî éng-kiú ê hông-tè, lóng sī in-tau ê tāi-chì kah lán bô koan-hē, lán bô pit-iàu chhap i. Tān-sī i o͘-pe̍h loān kóng-tio̍h Tâi-oân ê pō͘-hūn, lán tio̍h chi̍t-tiám chi̍t-tiám kā i tôaⁿ tò tńg-khì.

　　 习近平 kóng, "chó͘-kok oân-choân thóng-it it-tēng tio̍h si̍t-hiān". Sit-lé, in Tiong-kok lāu-hòe-á kok chiah ū siáⁿ-mi̍h "chó͘-kok", in beh kah siáⁿ lâng khì thóng-it, sī in tau ê tāi-chì, kah lán Tâi-oân bô tī-tāi. Lán chheng-chhun siàu-liân ê Tâi-oân bô siáⁿ-mi̍h "chó͘-kok", lán kan-ta ū "bó-kok", lán nn̄g-chheng saⁿ-pah bān lia̍p han-chî-á-kiáⁿ bú-chhin ê miâ kiò Tâi-oân.

　　 习近平 kóng,"kái-koat Tâi-oân būn-tê sī Tiong-kok-lâng ka-kī ê tāi-chì, tio̍h iû Tiong-kok-lâng lâi koat-tēng!" lán Tâi-oân-lâng kòe bîn-chú, chū-iû, ū jîn-koân, ū chun-giâm ê seng-oa̍h, ná ū siáⁿ būn-tê? "Tâi-oân būn-tê" sī in Tiong-kok kóng ê. Tâi-oân chún nā-sī ū būn-tê, mā sī Tâi-oân-lâng ka-kī ê tāi-chì, lán Tâi-oân-lâng tong-jiân ē ka-kī kái-koat, ná tio̍h lô-hoân chhù-piⁿ ê Tiong-kok lâi thâu-khak thiàⁿ? 1949 nî cha̍p-goe̍h chhe-it, Tiong-hôa Jîn-bîn Kiōng-hô-kok kiàn-kok í-lâi kàu taⁿ, liân chi̍t kang to m̄-bat thóng-tī kòe Tâi-oân, chi̍t lâng chi̍t ke tāi, kong-má sûi lâng chhāi. Tùi Tâi-oân lâi kóng, Tiong-kok sī kah Tâi-oân oân-choân bô koan-hē ê gōa-kok. Ná ē kóng,"kái-koat Tâi-oân būn-tê sī Tiong-kok-lâng ka-kī ê tāi-chì" leh? 习近平 lâng hó-hó, ná ē thâu-khak hiah bô chheng-chhó, ē kóng "Tâi-oân būn-tê tio̍h iû Tiong-kok-lâng lâi koat-tēng" leh? Che ná chhiūⁿ-kóng; Tiong-kok būn-tê, tio̍h iû Bông-kó͘-lâng lâi koat-tēng; ah sī kóng, Phû-tô-gê būn-tê, tio̍h iû Spanish lâng lâi koat-tēng, siáⁿ lâng thiaⁿ-tio̍h mā chai-iáⁿ oân-choân bô tō-lí. Chit chióng oân-choân bô tō-lí, bô siông-sek ê ōe, 习近平 ná kóng ē chhut chhùi?

　　 习近平 kóng "kian-koat hoán-tùi Tâi-to̍k hun-lia̍t hêng-kèng, kian-koat hoán-tùi gōa pō͘ sè-le̍k kan-sia̍p. " Tâi-oân chū-lâi m̄-bat kah Tiong-hôa Jîn-bîn Kiōng-hô-kok chò-hóe-・ kòe, sī beh án-chóaⁿ "hun-lia̍t" chhut-khì? kàu kin-á-ji̍t ûi-chí, î-it "gōa pō͘ sè-le̍k kan-sia̍p" Tâi-oân, sī ùi Tiong-kok lâi ê. Lán Tâi-oân-lâng tong-jiân kian-koat hoán-tùi.

　　 习近平 kóng "goán kian-chhî ēng siōng tōa ê sêng-ì, chīn siōng tōa ê ló͘-le̍k cheng-chhú hô-pêng thóng-it ê chiân-kéng, tān-sī choa̍t-tùi bô sêng-lo̍k hòng-khì sú-iōng bú-le̍k, pó-liû chhái-chhú it-chhè pit-iàu chhò-si ê soán hāng." Che tio̍h ná-chhiūⁿ chi̍t-ê lâng khòaⁿ ha̍p-ì chhù-piⁿ ê chhù, ài kah lâu-nōa. I tio̍h kā chhù-piⁿ kóng, lí chit keng chhù góa it-tēng beh ài, góa kian-chhî ēng siōng tōa ê sêng-ì, ē chīn siōng tōa ê ló͘-le̍k hó-hó-á kah lí kóng, tān-sī choa̍t-tùi bô sêng-lo̍k bô beh giâ to giâ chhèng, ē pó-liû chhái-chhú it-chhè pit-iàu ēng chhiúⁿ ēng thâi ēng phah ê soán hāng. Nā chiàu Ki-tok-kàu ( pau-koat Thian-chú-kàu, Ki-tok-kàu, tang chèng-kàu), I-su-lân-kàu (mā kiò choh hôe-kàu), Iô-tá-iah-kàu kok tōa chong-kàu só͘ chun-siú ê《 cha̍p-kài》, tē-cha̍p kài kóng,"M̄-thang tham lí ê chhù-piⁿ ê chhù; mā m̄-thang tham lí ê chhù-piⁿ ê bó͘, lô͘-po̍k, lú-pī, gû, lî, í-ki̍p lí ê chhù-piⁿ it-chhè só͘-ū ê." án-ne lán tio̍h chai-iáⁿ, Tiong-kok 习近平 tham i ê chhù-piⁿ ê Tâi-oân, sī ge̍k thiⁿ ê chok-hoat, thian-lí put-iông! (221021)

Chù, 习近平 　 chhiáⁿ liām Hôa-gí



十月十六，中国共产党第二十次全国代表大会tī北京人民大会堂正式开幕，中共总书记习近平发表二十大政治报告，伊讲中国beh行向toh去，ah是伊决定beh作万年永久ê皇帝，lóng是intauê代志kah咱无关系，咱无必要插伊。但是伊乌白乱讲tio̍h台湾ê部分，咱tio̍h一点一点kā伊弹倒转去。

　　习近平讲「祖国完全统一一定tio̍h实现」。失礼，in中国老岁á国chiah有啥物「祖国」，in beh kah啥人去统一，是intauê代志，kah咱台湾无值事（tī-tāi）。咱青春少年ê台湾无啥物「祖国」，咱kan-ta有「母国」，咱两千三百万粒蕃薯á kiáⁿ母亲ê名叫台湾。

　　习近平讲：「解决台湾问题是中国人家己ê代志，tio̍h由中国人来决定！」咱台湾人过民主、自由、有人权、有尊严ê生活，ná有啥问题？「台湾问题」是in中国讲ê。台湾准若是有问题，mā是台湾人家己ê代志，咱台湾人当然ē家己解决，ná tio̍h劳烦厝边ê中国来头壳疼？1949年十月初一，中华人民共和国建国以来到taⁿ，连一工都m̄-bat统治过台湾，一人一家代，公妈随人chhāi。对台湾来讲，中国是kah台湾完全无关系ê外国。ná ē讲：「解决台湾问题是中国人家己ê代志」咧？习近平人好好，náē头壳hiah无清楚，ē讲「台湾问题tio̍h由中国人来决定」咧？Chená像讲；中国问题，tio̍h由蒙古人来决定；ah是讲：葡萄牙问题，tio̍h由西班牙人来决定，啥人听tio̍h mā知影完全无道理。Chit种完全无道理、无常识ê话，习近平ná讲ē出嘴？

　　习近平讲「坚决反对台独分裂行径，坚决反对外部势力干涉。」台湾自来m̄-bat kah中华人民共和国做伙过，是beh按怎「分裂」出去？到今á日为止，唯一「外部势力干涉」台湾，是ùi中国来ê。咱台湾人当然坚决反对。

　　习近平讲「阮坚持用上大ê诚意，尽上大ê努力争取和平统一ê前景，但是绝对无承诺放弃使用武力，保留采取一切必要措施ê选项。」Che tio̍h ná像一个人看合意厝边ê厝，爱kah流涎（nōa）。伊tio̍h kā厝边讲，你chit间厝我一定beh爱，我坚持用上大ê诚意，ē尽上大ê努力好好á kah你讲，但是绝对无承诺无beh夯刀夯铳，ē保留采取一切必要用抢用刣用拍ê选项。若照基督教（包括天主教、基督教、东正教），伊斯兰教（mā叫作回教），犹太教各大宗教所遵守ê《十戒》，第十戒讲：「M̄-thang贪你ê厝边ê厝；mā m̄-thang贪你ê厝边ê某、奴仆、女婢、牛、驴，以及你ê厝边一切所有ê。」án-ne咱tio̍h知影，中国习近平贪伊ê厝边ê台湾，是逆天ê作法，天理不容！(221021)

注：习近平　请念华语