《绿色短评》

 | | | 转寄

权力一旦la̍k-・tio̍h，放bē掉！

作者 李南衡, ChoânTâijī/全台字 by Chng Hūiphêng 2022.11.13

Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》　 Lí Lâmhêng

　　　　　Koânle̍k ittàn la̍k・tio̍h, pàng bē tiāu!

　　 Koânle̍k sī chiok bêlâng・ê. Chi̍tê chèngtī jînbu̍t tio̍h kengkòe kúi cha̍p nî ê hùntàu phahpiàⁿ, chiah ū khólêng peh kàu choân kok siōng koân ê tēūi, la̍k tio̍h choân kok siōng tōa ê koânle̍k. Koânle̍k ittàn la̍k・tio̍h, khah chò mā bē kàu khùi. Pàng bē tiāu! lán ēng Gôlô chóngthóng Phûteng kah Tiongkok kokka chúsek 习近平 nn̄gūi choh lē lâi kóng.

　　 Gôlô ê Phûteng kiⁿî 70 hòe, 1999 nî thâuchi̍t piàn chò chónglí, 2000 nî tēit pái tòngsoán chóngthóng, 2004 nî liân jīm sêngkong. 2008 nî sià jīm āu, tamjīm thóngit Gôlô tóngchúse̍k kiam chènghú chónglí, Che tāipiáu i kèsio̍k chiángak kokka si̍t koân. Kinkì Gôlô hiànhoat, múi kài chóngthóng ke̍k ke ēsái liân jīm chi̍t piàn. 2008 nî cha̍pitgoe̍h, Gôlô kokhōe siukái hiànhoat, chóngthóng jīm kî ùi 4 nî iântiông choh 6 nî. 2012 nî Phûteng tēsaⁿ pái tòngsoán chóngthóng, 2018 nî koh soántio̍h liân jīm, jīm kî la̍k nî, ánne, i ēsái chipchèng kàu 2024 nî gō͘goe̍h chhechhit. 2021 nî sìgoe̍h chhegō͘, Phûteng chhiamsú chi̍t hāng hiànhoat siuchèngàn, kā íkeng ū ê chóngthóng tòngsoán chhùsò͘ lóng kui lêng, ùi thâu tiôngsin sǹgkhí, chún i ēsái kohchài chhamka nn̄g kài ê chóngthóng tōasoán, iā tio̍h sī kóng Phûteng nāsī chóngthóng chò bē siān, ēsái chòkàu 2036 nî, 84 hòe chiah sià jīm.

Tiongkok léngtōchiá ê sánseng, iā tio̍h sī "koânle̍k choánî" ê hongsek, kah sehong bînchú kokka ēng bînchú soánkí sánseng ê hongsek oânchoân bô kâng. Chákî sī iû keklia̍t tàucheng sánseng・ê. Itti̍t kàu Tēⁿ Siópêng chiah lia̍tchhut chi̍tê kuikí, hō͘ Τiongkiōng ê chengeng chèngtī chhuthiān chètō͘ hòa, siôngkui hòa ê chhusè. Khakli̍p "chi̍t tāi, nn̄g jīm, cha̍p nî","chi̍pthé léngtō","keh tāi chítēng chiap panjîn", kah "nîlêng ōe sòaⁿ" chiahê goânchek. Iû 7 chì 9 ūi Chèngtīkiok siôngjīm úigoân cho͘sêng ê "Chèngtīkiok Siôngúihōe" chòhóe chò koatchhek. Tēⁿ siópêng kah chi̍t tīn tōaló kéng tio̍h江泽民, 胡锦涛 choh chiappanjîn, kehtāi chítēng chiappan, jîchhiáⁿ hō͘ in khaktēng ê chitchek. Kànpō͘ soán jīm ū chi̍tê tiōngiàu goânchek sī "chhit siōng peh hē", tī ōaⁿ kài ê sî, 67 hòe íhā ēsái lâu jīm, 68 hòe ísiōng tio̍h thèhiu. Chiahê goânchek bo̍ktek chin chhengchhó, chúiáu sī ūitio̍h hôngchí chàichhù chhuthiān chi̍tê tōakoân to̍k lám ê to̍kchhâichiá, tôngsî mā káikoat kànpō͘ lóhòa ê būntê.

　　2007 nî, Τiongkiōng "Cha̍pchhit tōa" chinpó͘ Siōnghái chhīúi sukì 习近平, Liâulêng séngúi sukì Lí Khekkiông, Tiongiong cho͘chit pō͘tiúⁿ Hō Kokkiông, kongan pō͘tiúⁿ Chiu Éngkhong téng 4 ūi sin lâng chìnji̍p chèngtīkiok siôngúihōe, 习近平, Lí Khekkiông nn̄g lâng koh khah sī hông khòaⁿ choh sī Τiongkiōng tēgō͘ tāi léngtōpan he̍ksim sêngoân ê pôeióng jînsoán. Tēgō͘ tāi léngtō he̍ksim tio̍h ánne chhuthiān, 2017 nî, Τiongkiōng "Cha̍pkáu Tōa" bô thêchhut sinlâng chìnji̍p chèngtīkiok siôngúihōe, lâng tio̍h chaiiáⁿ 习近平 tēcha̍p nî kokka léngtōchiá chò liáu, ē koh kèsio̍k lo̍hkhì chò gō͘ nî. 2018 nî saⁿgoe̍h chhegō͘, choânkok jînbîn tāipiáu tāihōe siuhiàn, chhúsiau kokka chúse̍k liânjīm hānchè.

Kiⁿî Τiongkiōng "Jīcha̍p Tōa", íkeng chhitcha̍p chi̍t hòe ê 习近平, mā bô thêpoa̍t nîkhin hûha̍p chukeh ê léngtōchiá ji̍pkhì chèngtīkiok siôngúihōe chúnpī chítēng chiappanjîn, khókiàn 2027 nî, Τiongkiōng "Jīit Tōa" mā sī bô chúnpī chiappanjîn, 习近平nā chò bē siān, tongjiân ē kèsio̍k chòkàu 2036 nî, pehcha̍pgō͘ hòe.

　　 Koânle̍k la̍k・tio̍h pàng bē tiāu! kuiê chiappanjîn chètō͘ hō͘ 习近平 phòhoāi liáuliáu, Tiongkok chèngtī ē kiâⁿ tòthè tńgkhì chi̍tê tōakoân to̍k lám ê to̍kchhâichiá, kah koânle̍k keklia̍t tàucheng ê sîtāi, sī Tiongkok ê puthēng!. 　　(221028)

Chù, 习近平 　　 chhiáⁿ liām Hôagí



Pe̍h-ōe-jī-pán/白话字版


《 Le̍k-sek toán-phêng 》　 Lí Lâm-hêng

　　　　　Koân-le̍k it-tàn la̍k-・tio̍h, pàng bē tiāu!

　　 Koân-le̍k sī chiok bê-lâng-・ê. Chi̍t-ê chèng-tī jîn-bu̍t tio̍h keng-kòe kúi cha̍p nî ê hùn-tàu phah-piàⁿ, chiah ū khó-lêng peh kàu choân kok siōng koân ê tē-ūi, la̍k tio̍h choân kok siōng tōa ê koân-le̍k. Koân-le̍k it-tàn la̍k-・tio̍h, khah chò mā bē kàu khùi. Pàng bē tiāu! lán ēng Gô-lô chóng-thóng Phû-teng kah Tiong-kok kok-ka chú-sek 习近平 nn̄g-ūi choh lē lâi kóng.

　　 Gô-lô ê Phû-teng kin-nî 70 hòe, 1999 nî thâu-chi̍t piàn chò chóng-lí, 2000 nî tē-it pái tòng-soán chóng-thóng, 2004 nî liân jīm sêng-kong. 2008 nî sià jīm āu, tam-jīm thóng-it Gô-lô tóng-chú-se̍k kiam chèng-hú chóng-lí, Che tāi-piáu i kè-sio̍k chiáng-ak kok-ka si̍t koân. Kin-kì Gô-lô hiàn-hoat, múi kài chóng-thóng ke̍k ke ē-sái liân jīm chi̍t piàn. 2008 nî cha̍p-it-goe̍h, Gô-lô kok-hōe siu-kái hiàn-hoat, chóng-thóng jīm kî ùi 4 nî iân-tiông choh 6 nî. 2012 nî Phû-teng tē-saⁿ pái tòng-soán chóng-thóng, 2018 nî koh soán-tio̍h liân jīm, jīm kî la̍k nî, án-ne, i ē-sái chip-chèng kàu 2024 nî gō͘-goe̍h chhe-chhit. 2021 nî sì-goe̍h chhe-gō͘, Phû-teng chhiam-sú chi̍t hāng hiàn-hoat siu-chèng-àn, kā í-keng ū ê chóng-thóng tòng-soán chhù-sò͘ lóng kui lêng, ùi thâu tiông-sin sǹg-khí, chún i ē-sái koh-chài chham-ka nn̄g kài ê chóng-thóng tōa-soán, iā tio̍h sī kóng Phû-teng nā-sī chóng-thóng chò bē siān, ē-sái chò-kàu 2036 nî, 84 hòe chiah sià jīm.

Tiong-kok léng-tō-chiá ê sán-seng, iā tio̍h sī "koân-le̍k choán-î" ê hong-sek, kah se-hong bîn-chú kok-ka ēng bîn-chú soán-kí sán-seng ê hong-sek oân-choân bô kâng. Chá-kî sī iû kek-lia̍t tàu-cheng sán-seng-・ê. It-ti̍t kàu Tēⁿ Sió-pêng chiah lia̍t-chhut chi̍t-ê kui-kí, hō͘ Τiong-kiōng ê cheng-eng chèng-tī chhut-hiān chè-tō͘ hòa, siông-kui hòa ê chhu-sè. Khak-li̍p "chi̍t tāi, nn̄g jīm, cha̍p nî","chi̍p-thé léng-tō","keh tāi chí-tēng chiap- pan-jîn", kah "nî-lêng ōe sòaⁿ" chiah-ê goân-chek. Iû 7 chì 9 ūi Chèng-tī-kiok siông-jīm úi-goân cho͘-sêng ê "Chèng-tī-kiok Siông-úi-hōe" chò-hóe chò koat-chhek. Tēⁿ sió-pêng kah chi̍t tīn tōa-ló kéng tio̍h江泽民, 胡锦涛 choh chiap-pan-jîn, keh-tāi chí-tēng chiap-pan, jî-chhiáⁿ hō͘ in khak-tēng ê chit-chek. Kàn-pō͘ soán jīm ū chi̍t-ê tiōng-iàu goân-chek sī "chhit siōng peh hē", tī ōaⁿ kài ê sî, 67 hòe í-hā ē-sái lâu jīm, 68 hòe í-siōng tio̍h thè-hiu. Chiah-ê goân-chek bo̍k-tek chin chheng-chhó, chú-iáu sī ūi-tio̍h hông-chí chài-chhù chhut-hiān chi̍t-ê tōa-koân to̍k lám ê to̍k-chhâi-chiá, tông-sî mā kái-koat kàn-pō͘ ló-hòa ê būn-tê.

　　2007 nî, Τiong-kiōng "Cha̍p-chhit tōa" chin-pó͘ Siōng-hái chhī-úi su-kì 习近平, Liâu-lêng séng-úi su-kì Lí Khek-kiông, Tiong-iong cho͘-chit pō͘-tiúⁿ Hō Kok-kiông, kong-an pō͘-tiúⁿ Chiu Éng-khong téng 4 ūi sin lâng chìn-ji̍p chèng-tī-kiok siông-úi-hōe, 习近平, Lí Khek-kiông nn̄g lâng koh khah sī hông khòaⁿ choh sī Τiong-kiōng tē-gō͘ tāi léng-tō-pan he̍k-sim sêng-oân ê pôe-ióng jîn-soán. Tē-gō͘ tāi léng-tō he̍k-sim tio̍h án-ne chhut-hiān, 2017 nî, Τiong-kiōng "Cha̍p-káu Tōa" bô thê-chhut sin-lâng chìn-ji̍p chèng-tī-kiok siông-úi-hōe, lâng tio̍h chai-iáⁿ 习近平 tē-cha̍p nî kok-ka léng-tō-chiá chò liáu, ē koh kè-sio̍k lo̍h-khì chò gō͘ nî. 2018 nî saⁿ-goe̍h chhe-gō͘, choân-kok jîn-bîn tāi-piáu tāi-hōe siu-hiàn, chhú-siau kok-ka chú-se̍k liân-jīm hān-chè.

Kin-nî Τiong-kiōng "Jī-cha̍p Tōa", í-keng chhit-cha̍p chi̍t hòe ê 习近平, mā bô thê-poa̍t nî-khin hû-ha̍p chu-keh ê léng-tō-chiá ji̍p-khì chèng-tī-kiok siông-úi-hōe chún-pī chí-tēng chiap-pan-jîn, khó-kiàn 2027 nî, Τiong-kiōng "Jī-it Tōa" mā sī bô chún-pī chiap-pan-jîn, 习近平 nā chò bē siān, tong-jiân ē kè-sio̍k chò-kàu 2036 nî, peh-cha̍p-gō͘ hòe.

　　 Koân-le̍k la̍k-・tio̍h pàng bē tiāu! kui-ê chiap-pan-jîn chè-tō͘ hō͘ 习近平 phò-hoāi liáu-liáu, Tiong-kok chèng-tī ē kiâⁿ tò-thè tńg-khì chi̍t-ê tōa-koân to̍k lám ê to̍k-chhâi-chiá, kah koân-le̍k kek-lia̍t tàu-cheng ê sî-tāi, sī Tiong-kok ê put-hēng!. 　　(221028)

Chù, 习近平 　　 chhiáⁿ liām Hôa-gí




　　权力是足迷人ê。一个政治人物tio̍h经过kúi十年ê奋斗拍拼，才有可能peh到全国上koân ê地位，la̍k tio̍h全国上大ê权力。权力一旦la̍k-・tio̍h，khah做mā bē够气。放bē掉！咱用俄罗总统浮丁kah中国国家主席习近平两位作例来讲。

　　俄罗ê浮丁今年70岁，1999年头一遍做总理，2000年第一次当选总统，2004年连任成功。2008年卸任后，担任统一俄罗党主席兼政府总理，Che代表伊继续掌握国家实权。根据俄罗宪法，每届总统极加ē-sái连任一遍。2008年十一月，俄罗国会修改宪法，总统任期ùi 4年延长作6年。2012年浮丁第三次当选总统，2018年koh选tio̍h连任，任期六年，án-ne，伊ē-sái执政到2024年五月初七。2021年四月初五，浮丁签署一项宪法修正案，kā已经有ê总统当选次数lóng归零，ùi头重新算起，准伊ē-sái koh再参加两届ê总统大选，也tio̍h是讲浮丁若是总统做bē倦（siān），ē-sái做到2036年、84岁chiah卸任。

　　中国领导者ê产生，也tio̍h是「权力转移」ê方式，kah西方民主国家用民主选举产生ê方式完全无仝。早期是由激烈斗争产生ê。一直到邓小平才列出一个规矩，hō͘中共ê菁英政治出现制度化、常规化ê趋势。确立「一代、两任、十年」、「集体领导」、「隔代指定接班人」，kah「年龄划线」chiah-ê原则。由7至9位政治局常任委员组成ê「政治局常委会」做伙做决策。邓小平kah一阵大老拣tio̍h江泽民、胡锦涛作接班人，隔代指定接班，而且hō͘ in确定ê职责。干部选任有一个重要原则是「七上八下」，tī换届ê时，67岁以下ē-sái留任，68岁以上tio̍h退休。Chiah-ê原则目的真清楚，主要是为tio̍h防止再次出现一个大权独揽ê独裁者，同时mā解决干部老化ê问题。

　　2007年，中共「十七大」甄补上海市委书记习近平、辽宁省委书记李克强、中央组织部长贺国强、公安部长周永康等4位新人进入政治局常委会，习近平、李克强两人koh khah是hông看作是中共第五代领导班核心成员ê培养人选。第五代领导核心tio̍h án-ne出现，2017年，中共「十九大」无提出新人进入政治局常委会，人tio̍h知影习近平第十年国家领导者做了，ēkoh继续落去做五年。2018年三月初五，全国人民代表大会修宪，取消国家主席连任限制。

今年中共「二十大」，已经七十一岁ê习近平，mā无提拔年轻符合资格ê领导者入去政治局常委会准备指定接班人，可见2027年，中共「二一大」mā是无准备接班人，习近平若做bē倦（siān），当然ē继续做到2036年，八十五岁。

　　权力la̍k tio̍h放bē掉！kui个接班人制度hō͘习近平破坏了了，中国政治ē行倒退转去一个大权独揽ê独裁者、kah权力激烈斗争ê时代，是中国ê不幸!。　　(221028)

注：习近平　　请念华语