《绿色短评》

 | | | 转寄

中国共产党出四个头，舞kah你无头！

作者 李南衡, ChoânTâijī/全台字 by Chng Hūiphêng 2021.03.21

Choânbîn Tâioânjī pán/全民台湾字版简称ChoânTâiJī

Tiongkok kiōngsántóng chhut sìê thâu, bú kah lí bô thâu! 　　
Chòekīn ū chi̍t ūi khì Tiongkok tâuchu, bú kah móabīn choân tāuhoe tńglâi Tâioân ê senglí lâng oànthàn kóng, 1989 nî Pakkiaⁿ Thiananmn̂g sūkiāⁿ liáuāu, chhaputto só͘ū ê gōakoklâng lóng thêngchí tī Tiongkok tâuchu siat chhiúⁿ hit tongsî, Tiongkok kiōngsántóng tùi Hiangkáng kah Tâioân ê senglí lâng te̍kpia̍t hó, hibāng Kángsiong kah Tâisiong ētàng khì Tiongkok tâuchu siat chhiúⁿ, iaukiû siáⁿmi̍h tiâukiāⁿ lóngchóng tapèng, tùi Kángsiong , Tâisiong ēsái kóng sī hólé khoánthāi kàu "kha̍pthâu" ê thêngtō͘. Khí kangtiûⁿ kîkan, téngténg ēē lóng lâi tàusaⁿkāng, chènghú ê "léngtō" chhaputto ta̍k kang kàu. Ài chúi ū chúi, ài tiān ū tiān, chò khah bô chiuchoân ê só͘chāi, pôechōe hōe sitlé bô thêng. Tán kàu kangchhiúⁿ beh sengsán ê sî, pangbâng bō͘chi̍p chitoân kanglâng, náchhiūⁿ tēhng chènghú in kakī ê khangkhòe; tán kàu chèngsek sengsán liáuāu, bôlūn sī lio̍ksiōng háisiōng ūnsu, pòsòe kòe háikoan, ta̍khāng pangbâng chīnliōng hō͘ lán hongpiān. Inūi sūsi̍t siōng lán chhutkháu pí in ke chin ū kenggiām, tōapō͘hūn lóng sī lán teh kà in.

　　 Chi̍tⁿ̄g nî āu, chi̍tkóa gōakok kongsi mā koh cháulâi Tiongkok tâuchu siat chhiúⁿ, m̄nā Ji̍tpún, Hânkok, Sinkapho, liân Bíkok, Engkok, Tekkok mā lóng piàⁿlâi. Tiongkok kiōngsántóng ê thāitō͘ tio̍h ū siókhóa káipiàn, suijiân iûgoân chiâⁿhó, kanta ēsái kóng sī ùi "kha̍pthâu" káipiàn choh "tìm thâu". Chìnji̍p tējī kaitōaⁿ, thâukhíseng in ē késian choh sukhó ê khoán kóng," Zhège yào yánjiū yánjiū ", lán chi̍tsî thiaⁿ bô, siūⁿ kui po͘ chiah chaiiáⁿ i sī kóng ài sàng "hun" kah "chiú". Chi̍tsî chi kan kokkok lâikhí ê kangchhiúⁿ tio̍h ū pah gōa keng, kangchhiúⁿ jú khí jú tōa, kanglâng jú chhiàⁿ jú chē. Chènghú koaⁿoân ê ūikháu mā jú lâi jú tōa. Ū chi̍t nî lán kóaⁿ beh chhuthòe khì Bíkok hù Sèngtànchiat, só͘ū ê chhiúsio̍k lóng pān hósè, háikoan kanta m̄ tǹg ìná pàng kiâⁿ. Taⁿ tio̍h chìnji̍p tēsaⁿ kaitōaⁿ, " iôthâu", ánchóaⁿ kóng mā bēsái, iôthâu koh iô thâu. Chi̍tēá chiah khuichhùi kóng," Zhème jí de shì wèishéme bù tíqián lái jiǎng ?" ēng chhiú pí saⁿ ki chéngthâuá. Oh, i kóng" Tíqián lái jiǎng "sī kóng "the̍h chîⁿ lâi kóng!"hó lah hó lah, saⁿbān tio̍h saⁿbān, hòe chhut ē chhutkhì khah iàukín.

Goán se̍ksāi lán Tâioân chi̍t keng tōa kongsi ê siàuiâ, i ba̍kchiu peh bô kim, ū chi̍t kang kah chhī léngtō tōa sèsiaⁿ, jiáng liáu i tio̍h soan tńglâi Tâioân, tējī kang chiah thiaⁿkóng léngtō beh pān i lāusòe. Bānit i nā cháu bô lī, ū khólêng koaiⁿ kah i thâumn̂g chhùichhiu pe̍h, sīmchì ū khólêng bô miā, che tio̍h sī Tiongkok kiōngsántóng ê tēsì pō͘,"chāmthâu".

　　 Góa chiah kah kóng, Tiongkok imga̍kka Mǎsīcōng, 1949 nî Tionghoa Jînbîn Kiōnghôkok kiànkok chêng, Tiongkok kiōngsántóng tùi i hû phōtháⁿtháⁿ, kiànkok liáuāu pàithok i choh thâuchi̍t jīm ê Tiongtiong Imga̍k Ha̍kīⁿ īⁿtiúⁿ. 1966 nî bûnhòa tōakekbēng ê sî hō͘ chōhoánphài phoetàu, 1967 nî it・go̍eh chiah thaucháu kàu Hiangkáng jîāu tńgkhì Bíkok. 1987 nî gō͘・go̍eh tī Bíkok kòesin. I chāiseⁿ ê sî ū lâi Tâioân kúi piàn, i bat kóng Tiongkok kiōngsántóng siōng līhāi ê ū sìê thâu, suiàu lí ê sî ēsái tùi lí kha̍pthâu, jîāu tùi lí tìm thâu, jîāu tùi lí iôthâu, siōnglō͘bóe lia̍h lí khì chāmthâu. Tiongkok kiōngsántóng chhut chit sìê thâu sī ū i iukú ê thoânthóng le̍ksú!

　　 Tiongkok kiōngsántóng chhut sìê thâu, bú kah lí bô thâu! 　（210312）
Chù, Zhège yào yánjiū yánjiū Zhème jí de shì wèishéme bù tíqián lái jiǎng ? 　 Tíqián lái jiǎng 　 Mǎsīcōng　chhiáⁿ liām Hôagí


Pe̍h-ōe-jī-pán/白话字版


Tiong-kok kiōng-sán-tóng chhut sì-ê thâu, bú kah lí bô thâu! 　　
Chòe-kīn ū chi̍t ūi khì Tiong-kok tâu-chu, bú kah móa-bīn choân tāu-hoe tńg-lâi Tâi-oân ê seng-lí lâng oàn-thàn kóng, 1989 nî Pak-kiaⁿ Thian-an-mn̂g sū-kiāⁿ liáu-āu, chha-put-to só͘-ū ê gōa-kok-lâng lóng thêng-chí tī Tiong-kok tâu-chu siat chhiúⁿ hit tong-sî, Tiong-kok kiōng-sán-tóng tùi Hiang-káng kah Tâi-oân ê seng-lí lâng te̍k-pia̍t hó, hi-bāng Káng-siong kah Tâi-siong ē-tàng khì Tiong-kok tâu-chu siat chhiúⁿ, iau-kiû siáⁿ-mi̍h tiâu-kiāⁿ lóng-chóng tap-èng, tùi Káng-siong , Tâi-siong ē-sái kóng sī hó-lé khoán-thāi kàu "kha̍p-thâu" ê thêng-tō͘. Khí kang-tiûⁿ kî-kan, téng-téng ē-ē lóng lâi tàu-saⁿ-kāng, chèng-hú ê "léng-tō" chha-put-to ta̍k kang kàu. Ài chúi ū chúi, ài tiān ū tiān, chò khah bô chiu-choân ê só͘-chāi, pôe-chōe hōe sit-lé bô thêng. Tán kàu kang-chhiúⁿ beh seng-sán ê sî, pang-bâng bō͘-chi̍p chit-oân kang-lâng, ná-chhiūⁿ tē-hng chèng-hú in ka-kī ê khang-khòe; tán kàu chèng-sek seng-sán liáu-āu, bô-lūn sī lio̍k-siōng hái-siōng ūn-su, pò-sòe kòe hái-koan, ta̍k-hāng pang-bâng chīn-liōng hō͘ lán hong-piān. In-ūi sū-si̍t siōng lán chhut-kháu pí in ke chin ū keng-giām, tōa-pō͘-hūn lóng sī lán teh kà in.

　　 Chi̍t-nn̄g nî āu, chi̍t-kóa gōa-kok kong-si mā koh cháu-lâi Tiong-kok tâu-chu siat chhiúⁿ, m̄-nā Ji̍t-pún, Hân-kok, Sin-ka-pho, liân Bí-kok, Eng-kok, Tek-kok mā lóng piàⁿ-lâi. Tiong-kok kiōng-sán-tóng ê thāi-tō͘ tio̍h ū sió-khóa kái-piàn, sui-jiân iû-goân chiâⁿ-hó, kan-ta ē-sái kóng sī ùi "kha̍p-thâu" kái-piàn choh "tìm thâu". Chìn-ji̍p tē-jī kai-tōaⁿ, thâu-khí-seng in ē ké-sian choh su-khó ê khoán kóng," Zhège yào yánjiū yánjiū ", lán chi̍t-sî thiaⁿ bô, siūⁿ kui po͘ chiah chai-iáⁿ i sī kóng ài sàng "hun" kah "chiú". Chi̍t-sî chi kan kok-kok lâi-khí ê kang-chhiúⁿ tio̍h ū pah gōa keng, kang-chhiúⁿ jú khí jú tōa, kang-lâng jú chhiàⁿ jú chē. Chèng-hú koaⁿ-oân ê ūi-kháu mā jú lâi jú tōa. Ū chi̍t nî lán kóaⁿ beh chhut-hòe khì Bí-kok hù Sèng-tàn-chiat, só͘-ū ê chhiú-sio̍k lóng pān hó-sè, hái-koan kan-ta m̄ tǹg ìn-á pàng kiâⁿ. Taⁿ tio̍h chìn-ji̍p tē-saⁿ kai-tōaⁿ, " iô-thâu", án-chóaⁿ kóng mā bē-sái, iô-thâu koh iô thâu. Chi̍t-ē-á chiah khui-chhùi kóng," Zhème jí de shì wèishéme bù tíqián lái jiǎng ?" ēng chhiú pí saⁿ ki chéng-thâu-á. Oh, i kóng" Tíqián lái jiǎng "sī kóng "the̍h chîⁿ lâi kóng!"hó lah hó lah, saⁿ-bān tio̍h saⁿ-bān, hòe chhut ē chhut-khì khah iàu-kín.

Goán se̍k-sāi lán Tâi-oân chi̍t keng tōa kong-si ê siàu-iâ, i ba̍k-chiu peh bô kim, ū chi̍t kang kah chhī léng-tō tōa sè-siaⁿ, jiáng liáu i tio̍h soan tńg-lâi Tâi-oân, tē-jī kang chiah thiaⁿ-kóng léng-tō beh pān i lāu-sòe. Bān-it i nā cháu bô lī, ū khó-lêng koaiⁿ kah i thâu-mn̂g chhùi-chhiu pe̍h, sīm-chì ū khó-lêng bô miā, che tio̍h sī Tiong-kok kiōng-sán-tóng ê tē-sì pō͘,"chām-thâu".

　　 Góa chiah kah kóng, Tiong-kok im-ga̍k-ka Mǎsīcōng, 1949 nî Tiong-hoa Jîn-bîn Kiōng-hô-kok kiàn-kok chêng, Tiong-kok kiōng-sán-tóng tùi i hû phō-tháⁿ-tháⁿ, kiàn-kok liáu-āu pài-thok i choh thâu-chi̍t jīm ê Tiong-tiong Im-ga̍k Ha̍k-īⁿ īⁿ-tiúⁿ. 1966 nî bûn-hòa tōa-kek-bēng ê sî hō͘ chō-hoán-phài phoe-tàu, 1967 nî it-・go̍eh chiah thau-cháu kàu Hiang-káng jî-āu tńg-khì Bí-kok. 1987 nî gō͘-・go̍eh tī Bí-kok kòe-sin. I chāi-seⁿ ê sî ū lâi Tâi-oân kúi piàn, i bat kóng Tiong-kok kiōng-sán-tóng siōng lī-hāi ê ū sì-ê thâu, su-iàu lí ê sî ē-sái tùi lí kha̍p-thâu, jî-āu tùi lí tìm thâu, jî-āu tùi lí iô-thâu, siōng-lō͘-bóe lia̍h lí khì chām-thâu. Tiong-kok kiōng-sán-tóng chhut chit sì-ê thâu sī ū i iu-kú ê thoân-thóng le̍k-sú!

　　 Tiong-kok kiōng-sán-tóng chhut sì-ê thâu, bú kah lí bô thâu! 　（210312）
Chù, Zhège yào yánjiū yánjiū Zhème jí de shì wèishéme bù tíqián lái jiǎng ? 　 Tíqián lái jiǎng 　 Mǎsīcōng　chhiáⁿ liām Hôa-gí


中国共产党出四个头，舞kah你无头！

　　最近有一位去中国投资，舞kah满面全豆花转来台湾ê生理人怨叹讲，1989年北京天安门事件了后，差不多所有ê外国人lóng停止tī中国投资设厂hit当时，中国共产党对香港kah台湾ê生理人特别好，希望港商kah台商会tàng去中国投资设厂，要求啥物条件lóng总答应，对港商、台商ē-sái讲是好礼款待到「磕头」ê程度。起工场期间，顶顶下下lóng来斗相仝，政府ê「领导」差不多逐工到。爱水有水、爱电有电，做khah无周全ê所在，陪罪会失礼无停。等到工厂beh生产ê时，帮忙募集职员工人，ná像地方政府in家己ê工课；等到正式生产了后，无论是陆上海上运输、报税过海关，逐项帮忙尽量hō͘咱方便。因为事实上咱出口比in加真有经验，大部分lóng是咱teh教in。

　　一两年后，一寡外国公司mā koh走来中国投资设厂，m̄-nā日本、韩国、新加坡，连美国、英国、德国mā lóng拼来。中国共产党ê态度tio̍h有小khóa改变，虽然犹原诚好，kan-taē-sái讲是ùi「磕头」改变作「tìm头」。进入第二阶段，头起先in会假仙作思考ê款讲：「这个要研究研究」，咱一时听无，想归晡才知影伊是讲爱送「烟」kah「酒」。一时之间各国来起ê工厂tio̍h有百外间，工厂愈起愈大，工人愈倩愈济。政府官员ê胃口mā愈来愈大。有一年咱赶beh出货去美国赴圣诞节，所有ê手续lóng办好势，海关kan-tam̄ tǹg印仔放行。Taⁿ tio̍h进入第三阶段：「摇头」，按怎讲mā bē使，摇头koh摇头。一下á才开嘴讲：「这么急的事为什么不提前来讲？」用手比三枝指头á。Oh，伊讲「提前来讲」是讲「the̍h钱来讲！」好lah好lah，三万tio̍h三万，货出ē出去khah要紧。

阮熟似咱台湾一间大公司ê少爷，伊目睭peh无金，有一工kah市领导大细声，嚷了伊tio̍h soan转来台湾，第二工才听讲领导beh办伊漏税。万一伊若走无离，有可能关kah伊头毛嘴须白，甚至有可能无命，che tio̍h是中国共产党ê第四步：「斩头」。

　　我才kah讲，中国音乐家马思聪，1949年中华人民共和国建国前，中国共产党对伊扶扶tháⁿ-tháⁿ，建国了后拜托伊作头一任ê中央音乐学院院长。1966年文化大革命ê时hō͘造反派批斗，1967年一月才偷走到香港而后转去美国。1987年五月tī美国过身。伊在生ê时有来台湾几遍，伊bat讲中国共产党上厉害ê有四个头：需要你ê时ē-sái对你磕头，而后对你tìm头，而后对你摇头，上路尾掠你去斩头。中国共产党出chit四个头是有伊悠久ê传统历史！

　　中国共产党出四个头，舞kah你无头！　（210312）

注：这个要研究研究　 这么急的事为什么不提前来讲？　提前来讲　 马思聪　 　　请念华语