《绿色短评》

 | | | 转寄

马英九前总统敢bē神经错乱？

作者 李南衡, ChoânTâijī/全台字 by Chng Hūiphêng 2021.03.28

Choânbîn Tâioânjī pán/全民台湾字版简称ChoânTâiJī

Má Engkiú chêng chóngthóng káⁿ bē sînkeng chhòloān?

　　 Tiongkok itti̍t kā Hiangkáng chún choh "itkoklióngchè" ê kiànpúntû lâi iúkoái Tâioân, suijiân ū chi̍tkóa chhinchhiūⁿ Má Engkiú chêng chóngthóng chitkhoán ê gōnglâng, siongsìn Tiongkok bôlūn ánchóaⁿ mā bôkhólêng hó͘ⁿtēng Tēⁿ Siópêng chhinchhùi só͘ kóng ê Hiangkáng "gō͘cha̍p nî bē piàn". Tānsī tōapō͘hūn ê Tâioânlâng bô siongsìn Tiongkok Kiōngsántóng kóng ê ōe, jîchhiáⁿ Hiangkánglâng tùi Tiongkok jú lâi jú giâmkeh ê thóngtī hongsek chia̍h bē siau, chi̍tpiàn pí chi̍tpiàn koh khah piàⁿsì teh tuikiû bînchú kah chūiû, hō͘ Pakkiaⁿ chènghú chin thâuthiàⁿ. Chòekīn m̄nā o͘pe̍h lia̍h chūiûphài ê gīoân, liân pān pòchóa ê Lê Tìeng mā ēng ûihoán kokanhoat ê chōemiâ kā lia̍hkhì koaiⁿ, tī iáubōe símphòaⁿ chìnchêng, chōemiâ tio̍h chi̍ttiâu koh ke chi̍ttiâu. Siōng khàm līphó͘ ê sī, kiⁿî saⁿgoe̍h cha̍pit,"Tiongkok choân kok jînbîn tāipiáu tāihōe" piáukoat thongkòe siukái [ koanû oânsiān Hiangkáng te̍kpia̍t hêngchèngkhu soánkí chètō͘ ê koattēng ], khakpó "í àikokchiá ūi chú thé ê ' káng lâng tī káng ". Ēsái kóng sī kā "itkok lióngchè " ê kiànpúntû kuiê thiahthiahtiāu. Má Engkiú chêng chóngthóng náchhiūⁿ sī hō͘ Tiongkok Kiōngsántóng ê kùná kòng chi̍tē chiah chengsîn, saⁿgoe̍h cha̍pjī, Má Engkiú chhutse̍k Sun Tiongsoaⁿ sēsè 96 chiunî kìliām oa̍htāng chiapsiū hóngbūn ê sî piáusī, che sī ùi 1984 nî Tēⁿ Siópêng thêchhut "itkoklióngchè" ê siūⁿhoat ílâi, chitê kò͘sióng chèngsek ê chìnji̍p le̍ksú. Má Engkiú koh kóng, ōaⁿ chi̍tkùōe lâi kóng, che téngî sī soankò "itkok lióngchè" ê síbông, hō͘ i kámkak chin ûihām.

Koh khah ûihām ê sī, saⁿgoe̍h cha̍pchhit, Tiongkok koktâipān hoatgiânjîn Chu Hōngliân chhiàngsiaⁿ, hibāng Tâioân iúkoan chèngtóng kah jînsū ētàng khehkoan, būsi̍t khòaⁿthāi oânsiān Hiangkáng te̍kkhu soánkí chètō͘ ê iúkoan chòhoat, hiatsak phiankiàn, tio̍h bêngpiān sīhui. Ìsù sī kóng Má Engkiú chêng chóngthóng bēhiáu piānpia̍t sūhui.

　　 Nā kóng Má Engkiú chêng chóngthóng bēhiáu piānpia̍t sūhui, m̄bián Tiongkok koktâipān lâi jīnchèng, choân Tâioân ê lâng lóng mā chaiiáⁿ. 2020 nî pehgoe̍h chhecha̍p, Má Engkiú chêng chóngthóng kóng, Tiongkok ê kong tâi chiànlio̍k sī "siúchiàn tio̍h sī chiongchiàn", ìsù sī kóng chi̍t khaisí chiàn tio̍h chiàn soah, Tiongkok ittàn hoattōng chiàncheng tio̍h ē tī chin té ê sîkan lāi phah soah, hō͘ Tâioân bô kihōe tán Bíkun lâi chioân, jîchhiáⁿ hiānchāi Bíkun kinpún bôkhólêng lâi. Chò chóngthóng ê lâng tio̍h engkai mài hō͘ chiàncheng hoatseng. Ìsù sī kóng i chò chóngthóng ê sî, Tiongkok bôlūn kóng siáⁿ, i lóng kín kóng sī sī sī, hó hó hó, tio̍h sī phiahbián chiàncheng. Má Engkiú chêng chóngthóng bēhiáu piānpia̍t sīhui kah chitkhoán! Lí nā kantāⁿ thiaⁿtio̍h siaⁿ, khólêng ē siūⁿkóng sī Tiongkok tùitâipān ê lâng teh kóngōe.

　　 Saⁿgoe̍h cha̍pchhit, Bíkok kokbūkheng Antony Blinken chêngāu ū tī Ji̍tpún kah Lâmhân hoatpiáu tâmōe, chíkhòng Tiongkok tī Tanghái, Lâmhái kah kîtha kokka hoatseng léngthó͘ chenggī ê sî, in ê só͘ kóng só͘ chò jú lâi jú ū chhimlio̍ksèng kah appeksèng, tùi Tâioân ê chuthài, m̄nā bô kàngkē khue̍k kíntiuⁿ, hoántńg sī sengkoân. I kiôngtiāu, Bíkok bē tiāmtiām chē leh khòaⁿ, bô koán, jîchhiáⁿ kéngkò Tiongkok bēsái o͘pe̍h loān tāng, nāsī ū pitiàu, Bíkok ē ka hoánkek phah tòtńg.

　　 Má Engkiú chêng chóngthóng saⁿ kóng sì m̄tio̍h, i ê chhùiphóe hông ánne siàn kòelâi koh siàn kòekhì, Má Engkiú chêng chóngthóng káⁿ bē sînkeng chhòloān? (210319)

Pe̍h-ōe-jī-pán/白话字版

Má Eng-kiú chêng chóng-thóng káⁿ bē sîn-keng chhò-loān?

　　 Tiong-kok it-ti̍t kā Hiang-káng chún choh "it-kok-lióng-chè" ê kiàn-pún-tû lâi iú-koái Tâi-oân, sui-jiân ū chi̍t-kóa chhin-chhiūⁿ Má Eng-kiú chêng chóng-thóng chit-khoán ê gōng-lâng, siong-sìn Tiong-kok bô-lūn án-chóaⁿ mā bô-khó-lêng hó͘ⁿ-tēng Tēⁿ Sió-pêng chhin-chhùi só͘ kóng ê Hiang-káng "gō͘-cha̍p nî bē piàn". Tān-sī tōa-pō͘-hūn ê Tâi-oân-lâng bô siong-sìn Tiong-kok Kiōng-sán-tóng kóng ê ōe, jî-chhiáⁿ Hiang-káng-lâng tùi Tiong-kok jú lâi jú giâm-keh ê thóng-tī hong-sek chia̍h bē siau, chi̍t-piàn pí chi̍t-piàn koh khah piàⁿ-sì teh tui-kiû bîn-chú kah chū-iû, hō͘ Pak-kiaⁿ chèng-hú chin thâu-thiàⁿ. Chòe-kīn m̄-nā o͘-pe̍h lia̍h chū-iû-phài ê gī-oân, liân pān pò-chóa ê Lê Tì-eng mā ēng ûi-hoán kok-an-hoat ê chōe-miâ kā lia̍h-khì koaiⁿ, tī iáu-bōe sím-phòaⁿ chìn-chêng, chōe-miâ tio̍h chi̍t-tiâu koh ke chi̍t-tiâu. Siōng khàm lī-phó͘ ê sī, kin-nî saⁿ-goe̍h cha̍p-it,"Tiong-kok choân- kok jîn-bîn tāi-piáu tāi-hōe" piáu-koat thong-kòe siu-kái [ koan-û oân-siān Hiang-káng te̍k-pia̍t hêng-chèng-khu soán-kí chè-tō͘ ê koat-tēng ], khak-pó "í ài-kok-chiá ūi chú- thé ê ' káng lâng tī káng ". Ē-sái kóng sī kā "it-kok lióng-chè " ê kiàn-pún-tû kui-ê thiah-thiah-tiāu. Má Eng-kiú chêng chóng-thóng ná-chhiūⁿ sī hō͘ Tiong-kok Kiōng-sán-tóng ê kùn-á kòng chi̍t-ē chiah cheng-sîn, saⁿ-goe̍h cha̍p-jī, Má Eng-kiú chhut-se̍k Sun Tiong-soaⁿ sē-sè 96 chiu-nî kì-liām oa̍h-tāng chiap-siū hóng-būn ê sî piáu-sī, che sī ùi 1984 nî Tēⁿ Sió-pêng thê-chhut "it-kok-lióng-chè" ê siūⁿ-hoat í-lâi, chit-ê kò͘-sióng chèng-sek ê chìn-ji̍p le̍k-sú. Má Eng-kiú koh kóng, ōaⁿ chi̍t-kù-ōe lâi kóng, che téng-î sī soan-kò "it-kok lióng-chè" ê sí-bông, hō͘ i kám-kak chin ûi-hām.

Koh khah ûi-hām ê sī, saⁿ-goe̍h cha̍p-chhit, Tiong-kok kok-tâi-pān hoat-giân-jîn Chu Hōng-liân chhiàng-siaⁿ, hi-bāng Tâi-oân iú-koan chèng-tóng kah jîn-sū ē-tàng kheh-koan, bū-si̍t khòaⁿ-thāi oân-siān Hiang-káng te̍k-khu soán-kí chè-tō͘ ê iú-koan chò-hoat, hiat-sak phian-kiàn, tio̍h bêng-piān sī-hui. Ì-sù sī kóng Má Eng-kiú chêng chóng-thóng bē-hiáu piān-pia̍t sū-hui.

　　 Nā kóng Má Eng-kiú chêng chóng-thóng bē-hiáu piān-pia̍t sū-hui, m̄-bián Tiong-kok kok-tâi-pān lâi jīn-chèng, choân Tâi-oân ê lâng lóng mā chai-iáⁿ. 2020 nî peh-goe̍h chhe-cha̍p, Má Eng-kiú chêng chóng-thóng kóng, Tiong-kok ê kong tâi chiàn-lio̍k sī "siú-chiàn tio̍h sī chiong-chiàn", ì-sù sī kóng chi̍t khai-sí chiàn tio̍h chiàn soah, Tiong-kok it-tàn hoat-tōng chiàn-cheng tio̍h ē tī chin té ê sî-kan lāi phah soah, hō͘ Tâi-oân bô ki-hōe tán Bí-kun lâi chi-oân, jî-chhiáⁿ hiān-chāi Bí-kun kin-pún bô-khó-lêng lâi. Chò chóng-thóng ê lâng tio̍h eng-kai mài hō͘ chiàn-cheng hoat-seng. Ì-sù sī kóng i chò chóng-thóng ê sî, Tiong-kok bô-lūn kóng siáⁿ, i lóng kín kóng sī sī sī, hó hó hó, tio̍h sī phiah-bián chiàn-cheng. Má Eng-kiú chêng chóng-thóng bē-hiáu piān-pia̍t sī-hui kah chit-khoán! Lí nā kan-tāⁿ thiaⁿ-tio̍h siaⁿ, khó-lêng ē siūⁿ-kóng sī Tiong-kok tùi-tâi-pān ê lâng teh kóng-ōe.

　　 Saⁿ-goe̍h cha̍p-chhit, Bí-kok kok-bū-kheng Antony Blinken chêng-āu ū tī Ji̍t-pún kah Lâm-hân hoat-piáu tâm-ōe, chí-khòng Tiong-kok tī Tang-hái, Lâm-hái kah kî-tha kok-ka hoat-seng léng-thó͘ cheng-gī ê sî, in ê só͘ kóng só͘ chò jú lâi jú ū chhim-lio̍k-sèng kah ap-pek-sèng, tùi Tâi-oân ê chu-thài, m̄-nā bô kàng-kē khu-e̍k kín-tiuⁿ, hoán-tńg sī seng-koân. I kiông-tiāu, Bí-kok bē tiām-tiām chē leh khòaⁿ, bô koán, jî-chhiáⁿ kéng-kò Tiong-kok bē-sái o͘-pe̍h loān tāng, nā-sī ū pit-iàu, Bí-kok ē ka hoán-kek phah tò-tńg.

　　 Má Eng-kiú chêng chóng-thóng saⁿ kóng sì m̄-tio̍h, i ê chhùi-phóe hông án-ne siàn kòe-lâi koh siàn kòe-khì, Má Eng-kiú chêng chóng-thóng káⁿ bē sîn-keng chhò-loān? (210319)



马英九前总统敢bē神经错乱？

　　中国一直kā香港准作「一国两制」ê见本櫉来诱拐台湾，虽然有一寡亲像马英九前总统chit款ê戆人，相信中国无论按怎mā无可能否定邓小平亲嘴所讲ê香港「五十年bē变」。但是大部分ê台湾人无相信中国共产党讲ê话，而且香港人对中国愈来愈严格ê统治方式食bē消，一遍比一遍koh khah拼势teh追求民主kah自由，hō͘北京政府真头疼。最近m̄-nā乌白掠自由派ê议员，连办报纸ê黎智英mā用违反国安法ê罪名kā掠去关，tī犹未审判进前，罪名tio̍h一条koh加一条。上盖离谱ê是，今年三月十一，「中国全国人民代表大会」表决通过修改《关于完善香港特别行政区选举制度ê决定》，确保「以爱国者为主体ê『港人治港』」。Ē-sái讲是kā「一国两制」ê见本櫉归个拆拆掉。马英九前总统那像是hō͘中国共产党ê棍á扛一下才精神，三月十二，马英九出席孙中山逝世96周年纪念活动接受访问ê时表示，che是ùi 1984年邓小平提出「一国两制」ê想法以来，这个构想正式ê进入历史。马英九koh讲，换一句话来讲，che等于是宣告「一国两制」ê死亡，hō͘伊感觉真遗憾。

Koh khah遗憾ê是，三月十七，中国国台办发言人朱凤莲唱声，希望台湾有关政党kah人士会tàng客观、务实看待完善香港特区选举制度ê有关做法，hiat-sak偏见，tio̍h明辨是非。意思是讲马英九前总统bē晓辨别事非。

　　若讲马英九前总统bē晓辨别事非，m̄免中国国台办来认证，全台湾ê人拢mā知影。2020年八月初十，马英九前总统讲，中国ê攻台战略是「首战tio̍h是终战」，意思是讲一开始战tio̍h战煞，中国一旦发动战争tio̍h会tī真短ê时间内拍soah，hō͘台湾无机会等美军来支援，而且现在美军根本无可能来。做总统ê人tio̍h应该mài hō͘战争发生。意思是讲伊做总统ê时，中国无论讲啥，伊拢紧讲是是是，好好好，tio̍h是避免战争。马英九前总统bē晓辨别是非kah chit款！你若kan-ta听tio̍h声，可能会想讲是中国对台办ê人teh讲话。

　　三月十七，美国国务卿富林肯（Antony Blinken）先后有tī日本kah南韩发表谈话，指控中国tī东海、南海kah其他国家发生领土争议ê时，in ê所讲所做愈来愈有侵略性kah压迫性，对台湾ê姿态，m̄-nā无降低区域紧张，反转是升悬。伊强调，美国bē恬恬坐leh看无管，而且警告中国bē使乌白乱动，若是有必要，美国会kā反击拍倒转。

　　马英九前总统三讲四m̄-tio̍h，伊ê嘴phóe hôngán-ne搧过来koh搧过去，马英九前总统敢bē神经错乱？ (210319)