《绿色短评》

 | | | 转寄

提升台美关系加真强ê《台湾政策法案》

作者 李南衡, ChoânTâijī/全台字 by Chng Hūiphêng 2022.09.25

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

Thêseng TâiBí koanhē ke chin kiông ê《 Tâioân Chèngchhek Hoatàn 》

　　2022 nî jīgoe̍h jīsì, Gôlô chóngthóng Phûteng tùi kehpiah kok 乌克兰 ê chânpō ji̍pchhim, ínkhí choân sèkài bînchú kokka ê tōa tio̍hkiaⁿ kah hùnnō͘, tôngsî mā hō͘hóe sūchêng tùi 乌克兰 bô kàu koansim kah bô kàu bêngkhak ê thāitō͘, tìsú ínkhí Gôlô thâulâng ê gō͘ phòaⁿ, chhutpeng phah 乌克兰. Lūisū ê chênghêng ū khólêng hoatseng tī Tiongkok tùi Tâioân ê chhimlio̍k. Tiongkok chit kúi nî kakiông kunsū kiànsiat, chiamtùi Tâioân pō͘sū sin kisu̍t, sin búkhì, che sī tùi kui ê Ìnthài tēkhu úntēng ê uihia̍p. Chòekīn, Tiongkok chhaputto ta̍k kang phài kunki chìnji̍p Tâioân ê Hôngkhong Sekpia̍tkhu kah Háikiap Tiongsòaⁿ, Tiongkok háikun tī konghái siōng chìnhêng iánsi̍p, ìtô͘ appek kah khiónghat Tâioân. Thàn chitmá iáu ū sîkan, Bíkok tio̍h kā tùi Tâioân ê chèngchhek bêngkhak hòa, pangchō͘ Tâioân chètēng, si̍tsi chi̍t chióng sin ê, koh khah ū chhunkiu ê chiànlio̍k.

　　 Inūi ánne, 2022 nî sìgoe̍h cha̍psì àm, Bíkok Liânpang Chhamgīīⁿ Gōakau Úigoânhōe chúse̍k, Bînchútóng chek Menentechù (Bob Menendez) kah Bíkok Liânpang Chhamgīīⁿ Ūsoàn Úigoânhōe Kiōnghôtóng chek gīoân Kulahàm (Lindsey Graham) chhōa kokhōe tāipiáuthoân hóngbūn Tâioân, pàihōe Chhòa Engbûn chóngthóng. La̍kgoe̍h cha̍pla̍k liânmiâ thêchhut 《2022 nî Tâioân Chèngchhek Coatàn 》 chhóàn, lāṳông chúiàu pun choh nn̄g tōa lūi, tēit tōa lūi sī chúkoân siōngteng, chhuitōng chù Bí Tāipiáuchhù ùi "Tāipak Kengchè Bûnhòa Pānsū chhù " chiàⁿmiâ choh "Tâioân Tāipiáuchhù", chísī Kokbūkheng thiatsiau kìmchí Tâioân koaⁿoân hóngbūn Bíkok. Tējī tōalūi sī kunsū kiônghòa, siuchèng 《 Tâioân Koanhēhoat 》 Bíkok tùi Tâioân ê búkhì kiòngèng ùi "hônggūsek" khoktōa kàu "ētàng uiliap Jînbîn káihòngkun chhimlio̍k hêngûi iúlī ê búkhì." siūkoân sì nî lāi thêkiong 45 ek bíkim ê gōakok kunsū chukim poahkhoán. Chítēng Tâioân choh "chúiàu ê hui Pakiok bêngkok". Chichhî Tâioân chhamú kokchè cho͘chit.

　　 Káugoe̍h chhechhit, Bíkok Pe̍kkiong Kokan kò͘būn So͘ Lībān kóng, i ē kah kokhōe léngsiù thólūn 《 Tâioân Chèngchhekhoat 》, i thánpe̍k kóng " pō͘hūn lāṳông hō͘ goán siókhóa hoânló". Kengkòe nn̄g piàn iânkî símcha, káugoe̍h cha̍psì, Bíkok Chhamgīīⁿ Gōaúihōe thongkòe chitê siū chùba̍k ê "Tâioân Chèngchhek Hoatàn", sòa lo̍hkhì tio̍h tī mênî itgoe̍h pún kài kokhōe kîmóa chêng thongkòe Chhamgīīⁿ kah Chiònggīīⁿ Īⁿhōe, chiah ē toekau Bíkok chóngthóng chhiamsú āu senghāu. Káugoe̍h cha̍psì hōe āu, pún hoatàn thêàn lâng kóng, thongkòe ê pánpún ū siókhóa siukái, paukoat chù Bí tāipiáuchhù káimiâ, Bíkok Chāitâi Hia̍phōe (AIT) chhùtiúⁿ jīmbēng su Chhamīⁿ thongkòe pō͘hūn kái choh "kiàngī". Goân pánpún "gōakok kunsū iôngchu" hongsek thêkiong Tâioân 4 nî 45 ek bíkim, sinpán kachù sī "bô siông" oânchō͘, tē 5 nî ke beh 20 ek bíkim, piàn choh 5 nî chónggia̍h 65 ek bíkim. Goân pánpún kā chítēng Tâioân choh "chúiàu hui Pakiok bêngiú" tēūi, siukái choh "í hui Pakiok bêngiú tângténg thāigū".

　　Chitê hoatàn nā thang kòe, Tiongkok chù Bí tāisài 秦刚 chin siūkhì kóng, ū 《 Tâioân Chèngchhek Hoatàn 》tio̍h bô TiongBí koanhē. Bíkok chin gâu "pàngphùi an káusim", hoatàn kiôngtiāu, jīmhô lāṳông lóng bēsái káisek choh kah Tâioân hoeho̍k koaⁿhong gōakau koanhē, ásī káipiàn Bíkok chènghú tùi Tâioân kokchè tēūi ê li̍ptiûⁿ.

Kámsiā Bíkok koh khah chhengchhó thoânta̍t tī kok hongbīn hia̍pchō͘ Tâioân, thêseng TâiBí koanhē ke chin kiông.

Chù, 乌克兰　　 秦刚　　 chhiáⁿ liām Hôagí


Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng

Thê-seng Tâi-Bí koan-hē ke chin kiông ê《 Tâi-oân Chèng-chhek Hoat-àn 》

　　2022 nî jī-goe̍h jī-sì, Gô-lô chóng-thóng Phû-teng tùi keh-piah kok 乌克兰 ê chân-pō ji̍p-chhim, ín-khí choân sè-kài bîn-chú kok-ka ê tōa tio̍h-kiaⁿ kah hùn-nō͘, tông-sî mā hō͘-hóe sū-chêng tùi 乌克兰 bô kàu koan-sim kah bô kàu bêng-khak ê thāi-tō͘, tì-sú ín-khí Gô-lô thâu-lâng ê gō͘ phòaⁿ, chhut-peng phah 乌克兰. Lūi-sū ê chêng-hêng ū khó-lêng hoat-seng tī Tiong-kok tùi Tâi-oân ê chhim-lio̍k. Tiong-kok chit kúi nî ka-kiông kun-sū kiàn-siat, chiam-tùi Tâi-oân pō͘-sū sin ki-su̍t, sin bú-khì, che sī tùi kui ê Ìn-thài tē-khu ún-tēng ê ui-hia̍p. Chòe-kīn, Tiong-kok chha-put-to ta̍k kang phài kun-ki chìn-ji̍p Tâi-oân ê Hông-khong Sek-pia̍t-khu kah Hái-kiap Tiong-sòaⁿ, Tiong-kok hái-kun tī kong-hái siōng chìn-hêng ián-si̍p, ì-tô͘ ap-pek kah khióng-hat Tâi-oân. Thàn chit-má iáu ū sî-kan, Bí-kok tio̍h kā tùi Tâi-oân ê chèng-chhek bêng-khak hòa, pang-chō͘ Tâi-oân chè-tēng, si̍t-si chi̍t chióng sin ê, koh khah ū chhun-kiu ê chiàn-lio̍k.

　　 In-ūi án-ne, 2022 nî sì-goe̍h cha̍p-sì àm, Bí-kok Liân-pang Chham-gī-īⁿ Gōa-kau Úi-goân-hōe chú-se̍k, Bîn-chú-tóng chek Me-nen-te-chù (Bob Menendez) kah Bí-kok Liân-pang Chham-gī-īⁿ Ū-soàn Úi-goân-hōe Kiōng-hô-tóng chek gī-oân Kulahàm (Lindsey Graham) chhōa kok-hōe tāi-piáu-thoân hóng-būn Tâi-oân, pài-hōe Chhòa Eng-bûn chóng-thóng. La̍k-goe̍h cha̍p-la̍k liân-miâ thê-chhut 《2022 nî Tâi-oân Chèng-chhek Coat-àn 》 chhó-àn, lāi-iông chú-iàu pun choh nn̄g tōa lūi, tē-it tōa lūi sī chú-koân siōng-teng, chhui-tōng chù Bí Tāi-piáu-chhù ùi "Tāi-pak Keng-chè Bûn-hòa Pān-sū chhù " chiàⁿ-miâ choh "Tâi-oân Tāi-piáu-chhù", chí-sī Kok-bū-kheng thiat-siau kìm-chí Tâi-oân koaⁿ-oân hóng-būn Bí-kok. Tē-jī tōa-lūi sī kun-sū kiông-hòa, siu-chèng 《 Tâi-oân Koan-hē-hoat 》 Bí-kok tùi Tâi-oân ê bú-khì kiòng-èng ùi "hông-gū-sek" khok-tōa kàu "ē-tàng ui-liap Jîn-bîn kái-hòng-kun chhim-lio̍k hêng-ûi iú-lī ê bú-khì." siū-koân sì nî lāi thê-kiong 45 ek bí-kim ê gōa-kok kun-sū chu-kim poah-khoán. Chí-tēng Tâi-oân choh "chú-iàu ê hui Pak-iok bêng-kok". Chi-chhî Tâi-oân chham-ú kok-chè cho͘-chit.

　　 Káu-goe̍h chhe-chhit, Bí-kok Pe̍k-kiong Kok-an kò͘-būn So͘ Lī-bān kóng, i ē kah kok-hōe léng-siù thó-lūn 《 Tâi-oân Chèng-chhek-hoat 》, i thán-pe̍k kóng " pō͘-hūn lāi-iông hō͘ goán sió-khóa hoân-ló". Keng-kòe nn̄g piàn iân-kî sím-cha, káu-goe̍h cha̍p-sì, Bí-kok Chham-gī-īⁿ Gōa-úi-hōe thong-kòe chit-ê siū chù-ba̍k ê "Tâi-oân Chèng-chhek Hoat-àn", sòa lo̍h-khì tio̍h tī mê-nî it-goe̍h pún kài kok-hōe kî-móa chêng thong-kòe Chham-gī-īⁿ kah Chiòng-gī-īⁿ Īⁿ-hōe, chiah ē toe-kau Bí-kok chóng-thóng chhiam-sú āu seng-hāu. Káu-goe̍h cha̍p-sì hōe āu, pún hoat-àn thê-àn lâng kóng, thong-kòe ê pán-pún ū sió-khóa siu-kái, pau-koat chù Bí tāi-piáu-chhù kái-miâ, Bí-kok Chāi-tâi Hia̍p-hōe (AIT) chhù-tiúⁿ jīm-bēng su Chham-īⁿ thong-kòe pō͘-hūn kái choh "kiàn-gī". Goân pán-pún "gōa-kok kun-sū iông-chu" hong-sek thê-kiong Tâi-oân 4 nî 45 ek bí-kim, sin-pán ka-chù sī "bô siông" oân-chō͘, tē 5 nî ke beh 20 ek bí-kim, piàn choh 5 nî chóng-gia̍h 65 ek bí-kim. Goân pán-pún kā chí-tēng Tâi-oân choh "chú-iàu hui Pak-iok bêng-iú" tē-ūi, siu-kái choh "í hui Pak-iok bêng-iú tâng-téng thāi-gū".

　　Chit-ê hoat-àn nā thang kòe, Tiong-kok chù Bí tāi-sài 秦刚 chin siū-khì kóng, ū 《 Tâi-oân Chèng-chhek Hoat-àn 》tio̍h bô Tiong-Bí koan-hē. Bí-kok chin gâu "pàng-phùi an káu-sim", hoat-àn kiông-tiāu, jīm-hô lāi-iông lóng bē-sái kái-sek choh kah Tâi-oân hoe-ho̍k koaⁿ-hong gōa-kau koan-hē, á-sī kái-piàn Bí-kok chèng-hú tùi Tâi-oân kok-chè tē-ūi ê li̍p-tiûⁿ.

Kám-siā Bí-kok koh khah chheng-chhó thoân-ta̍t tī kok hong-bīn hia̍p-chō͘ Tâi-oân, thê-seng Tâi-Bí koan-hē ke chin kiông.

Chù, 乌克兰　　 秦刚　　 chhiáⁿ liām Hôa-gí




　　2022年二月二四，俄罗总统浮丁对隔壁国乌克兰ê残暴入侵，引起全世界民主国家ê大tio̍h惊kah愤怒，同时mā后悔事前对乌克兰无够关心kah无够明确ê态度，致使引起俄罗头人ê误判，出兵拍乌克兰。类似ê情形有可能发生tī中国对台湾ê侵略。中国chit几年加强军事建设，针对台湾部署新技术、新武器，che是对归个印太地区稳定ê威胁。最近，中国差不多ta̍k工派军机进入台湾ê防空识别区kah海峡中线，中国海军tī公海上进行演习，意图压迫kah恐吓台湾。趁chit-má犹有时间，美国tio̍h kā对台湾ê政策明确化，帮助台湾制定、实施一种新ê、koh khah有chhunkiuê战略。

　　因为按呢，2022年四月十四暗，美国联邦参议院外交委员会主席、民主党籍Me-nen-techù（Bob Menendez）kah美国联邦参议院预算委员会共和党籍议员Kulahàm-（Lindsey Graham）chhōa国会代表团访问台湾，拜会蔡英文总统。六月十六联名提出《2022年台湾政策法案》草案，内容主要分作两大类：第一大类是主权象徵，推动驻美代表处ùi「台北经济文化办事处」正名作「台湾代表处」，指示国务卿撤销禁止台湾官员访问美国。第二大类是军事强化，修正《台湾关系法》美国对台湾ê武器供应ùi「防御式」扩大到「ētàng威慑人民解放军侵略行为有利ê武器。」授权四年内提供45亿美金ê外国军事资金拨款。指定台湾作「主要ê非北约盟国」。支持台湾参与国际组织。

　　九月初七，美国白宫国安顾问苏利万讲，伊ēkah国会领袖讨论《台湾政策法》，伊坦白讲「部分内容hō͘阮小khóa烦恼」。经过两遍延期审查，九月十四，美国参议院外委会通过chit-ê受瞩目ê「台湾政策法案」，续落去tio̍h tī明年一月本届国会期满前通过参议院kah众议院院会，chiah ē递交美国总统签署后生效。九月十四会后，本法案提案人讲，通过ê版本有小khóa修改，包括驻美代表处改名、美国在台协会（AIT）处长任命需参院通过部分改作「建议」。原版本「外国军事融资」方式提供台湾4年45亿美元，新版加注是「无偿」援助，第5年加码20亿美元，变作5年总额65亿美元。原版本kā指定台湾作「主要非北约盟友」地位，修改作「以非北约盟友同等待遇」。

　　Chit-ê法案若通过，中国驻美大使秦刚真受气讲：有《台湾政策法案》tio̍h无中美关系。美国真gâu「放屁安狗心」，法案强调，任何内容lóng bē-sái解释作kah台湾恢复官方外交关系，抑是改变美国政府对台湾国际地位ê立场。

感谢美国koh khah清楚传达tī各方面协助台湾，提升台美关系加真强。

注：乌克兰　　秦刚　　请念华语