《绿色短评》

 | | | 转寄

中国无人机实在是皮chiūⁿ，欠拍！

作者 李南衡, ChoânTâijī/全台字 by Chng Hūiphêng 2022.09.18

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　 Lí Lâmhêng

　　　　　　 Tiongkok bôlângki si̍tchāi sī phôechiūⁿ, khiàm phah!

Pehgoe̍h chhejī, Bíkok Liânpang Chiònggīīⁿ gītiúⁿ Phelosi (Nancy Pelosi) sūnlī chhōa thoân hóngbūn Tâioân, Tiongkok chó͘tòng bô hāu, kiànsiàu tńg siūkhì, ùi pehgoe̍h chhesì tiongtàu kàu chhechhit tiongtàu, tī Tâioân sìkho͘ûi la̍kê háie̍k chìnhêng huitôaⁿ si̍ttôaⁿ iánsi̍p liáuāu, tī Tiongkok kok háihōaⁿ si̍tsi si̍t tôaⁿ iánsi̍p. Chit tiongkan, Tiongkok khaisí ēng bôlângki jiáuloān Κimmn̂g Lia̍ttó, pehgoe̍h chhechhit àm thâu chi̍tchiah Tiongkok bôlângki poelâi Κimmn̂g jiáuloān, tējī àm koh poelâi chi̍t chiah. Pehgoe̍h chhekáu àm chi̍t chiah bôlângki poelâi Chio̍htiāⁿtó, pehgoe̍h cha̍pla̍k ēpo͘ chi̍t chiah poelâi Jītáⁿ, kokkun ēng chio̍hthâu kā khian, bôlângki ū hip tio̍h chitê kiàⁿthâu, tī Tiongkok ê bānglō͘ itti̍t pòchhut. Pehgoe̍h jīchhit, chi̍t chiah bôlângki poelâi Lia̍tsū, pehgoe̍h jīkáu ēpo͘, chi̍t chiah bôlângki poelâi Saisū. Tiongkok bôlângki poelâi Κimmn̂g Lia̍ttó náchhiūⁿ teh kiâⁿ chàukha.

　 Pehgoe̍h jīkáu. Tiongkok gōakaupō͘ kìchiáhōe, ū kìchiá mn̄g khí Tiongkok bôlângki poe khì Κimmn̂g hipsiōng chit kiāⁿ tāichì, Tiongkok gōakau pō͘ hoatgiânjîn Tiō Li̍pkian kóng,"Tiongkok ê bôlângki tī Tiongkok ê niáthó͘ téng thâu poe chi̍tē, ū siáⁿmi̍h ta̍ttit tōakiaⁿsiókoài? " kâng chi̍t ji̍t, Tâipak chhītiúⁿ Koa Bûntiat kóng " góa bē sitkhùi kah ēng chio̍hthâu khian bôlângki, chá tio̍h giâ chhèng kā phahlo̍hlâi." lâng mn̄g kóng, nāsī lí chò chóngthóng kám ē kā Kiōngki phah lo̍hlâi? Koa Bûntiat ìn kóng :,"góa ē bē m̄chai, tānsī 小英 khaktēng bô hoattō͘."

Pehgoe̍h saⁿcha̍p ēpo͘, Chhòa Engbûn chóngthóng sītō háikun 146 Kàmtūi liáuāu tì sû, chíchhut kīnlâi Tiongkok Káihòngkun kunián liáuāu ēng bôlângki chhimjiáu téng "phúsek tētài" chhiongtu̍t ê chhiúhoat, i ho͘io̍k ta̍kê "tekkun jú chhiàngtù, lán tio̍h jú léngchēng. Lán bē hō͘ tùihōaⁿ ū puttong ê chiàkháu lâi chèchō chhiongtu̍t, lán bē thiaukhí chiàntoan, lán chūngó͘ khekchè, tānsī pēng m̄ sī piáusī lán bē hoánchè." i íkeng hālēng Kokhôngpō͘, tī sektòng ê sîchūn chháichhú pitiàu jîchhiáⁿ kiông koh ūla̍t ê hoánchè chhòsi, siúhō͘ kokka niákhong ê anchoân.

Pehgoe̍h saⁿcha̍p ēpo͘ gō͘ tiám 59 hun, chi̍t chiah Tiongkok bôlângki poelâi Jītáⁿ, kokkun kéngkò bô hāu, khui chhèng kā phah bô phah tio̍h. Che sī "Patpehsaⁿ Phàuchiàn" 1979 nî chiaⁿgoe̍h chheit chèngsek thênghóe 43 nî āu, Κimmn̂g kokkun phah ê tēit chhèng, ínkhí kokchè koansim. Tējī kang Tiongkok bānglō͘ ū pòchhut chitê ōebīn, koh ke pò chhut chi̍tê Tiongkok chohsitlâng the̍h chi̍t tè chhânthô͘ kā bôlângki khianlo̍hlâi ê ōebīn, teh chhiò Tâioân kunjîn ê chúichún tio̍h sī ánne nānīa. Káugoe̍h chheit tiongtàu cha̍pjī tiám 3 hun, chi̍t chiah Tiongkok bôlângki poelâi Κimmn̂g Saisū, kokkun sīkéng khulī bô hāu liáuāu khui chhèng kā phah lo̍h hái. Tiongkok Koktâipān hoatgiânjîn Chu Hōngliân kóng,"Bînchìntóng chiá kihōe chháchoh, chèchō kíntiuⁿ khìhun, seng koân nn̄g hōaⁿ tùili̍p tùikhòng, chinchiàⁿ līkeng hóchhiò."

　　 Káugoe̍h chhejī sinbûn, kokkun íkeng kā 40 ki bôlângki kanjiáuchhèng sàng kàu gōató, nńg ê ngē ê chiànhoat chòhóe lâi, seng phah bôlângki, kanjiáuchhèng phòhoāi i ê GPS hēthóng, náchhiūⁿgíná sîtāi khòaⁿ koaáhì bútiûⁿ ê "tēngsinhoat", tiám lo̍hkhì, tùihong tiāmtiām bē tíntāng, lán chiah khòaⁿ beh ánchóaⁿ kā chhúlí. Chóngkóng chi̍t kù tio̍h sī hō͘ Tiongkok bôlângki ū lâi tio̍h bô tńgkhì, chīnliōng hō͘ Chu Hōngliân kèsio̍k chhiò, chhiò bē soah.

　　 Tiongkok bôlângki si̍tchāi sī phôechiūⁿ, khiàm phah! (220909)

Chù, 小英 chhiáⁿ tha̍k Hôagí


Pe̍h-ōe-jī-pán/白话字版

《 Le̍k-sek toán-phêng 》　 Lí Lâm-hêng

　　　　　　 Tiong-kok bô-lâng-ki si̍t-chāi sī phôe chiūⁿ, khiàm phah!

Peh-goe̍h chhe-jī, Bí-kok Liân-pang Chiòng-gī-īⁿ gī-tiúⁿ Phe-lo-si (Nancy Pelosi) sūn-lī chhōa thoân hóng-būn Tâi-oân, Tiong-kok chó͘-tòng bô hāu, kiàn-siàu tńg siū-khì, ùi peh-goe̍h chhe-sì tiong-tàu kàu chhe-chhit tiong-tàu, tī Tâi-oân sì-kho͘-ûi la̍k-ê hái-e̍k chìn-hêng hui-tôaⁿ si̍t-tôaⁿ ián-si̍p liáu-āu, tī Tiong-kok kok hái-hōaⁿ si̍t-si si̍t tôaⁿ ián-si̍p. Chit tiong-kan, Tiong-kok khai-sí ēng bô-lâng-ki jiáu-loān Κim-mn̂g Lia̍t-tó, peh-goe̍h chhe-chhit àm thâu chi̍t-chiah Tiong-kok bô-lâng-ki poe-lâi Κim-mn̂g jiáu-loān, tē-jī àm koh poe-lâi chi̍t chiah. Peh-goe̍h chhe-káu àm chi̍t chiah bô-lâng-ki poe-lâi Chio̍h-tiāⁿ-tó, peh-goe̍h cha̍p-la̍k ē-po͘ chi̍t chiah poe-lâi Jī-táⁿ, kok-kun ēng chio̍h-thâu kā khian, bô-lâng-ki ū hip tio̍h chit-ê kiàⁿ-thâu, tī Tiong-kok ê bāng-lō͘ it-ti̍t pò-chhut. Peh-goe̍h jī-chhit, chi̍t chiah bô-lâng-ki poe-lâi Lia̍t-sū, peh-goe̍h jī-káu ē-po͘, chi̍t chiah bô-lâng-ki poe-lâi Sai-sū. Tiong-kok bô-lâng-ki poe-lâi Κim-mn̂g Lia̍t-tó ná-chhiūⁿ teh kiâⁿ chàu-kha.

　 Peh-goe̍h jī-káu. Tiong-kok gōa-kau-pō͘ kì-chiá-hōe, ū kì-chiá mn̄g khí Tiong-kok bô-lâng-ki poe khì Κim-mn̂g hip-siōng chit kiāⁿ tāi-chì, Tiong-kok gōa-kau pō͘ hoat-giân-jîn Tiō Li̍p-kian kóng,"Tiong-kok ê bô-lâng-ki tī Tiong-kok ê niá-thó͘ téng thâu poe-- chi̍t-ē, ū siáⁿ-mi̍h ta̍t-tit tōa-kiaⁿ-sió-koài? " kâng chi̍t ji̍t, Tâi-pak chhī-tiúⁿ Koa Bûn-tiat kóng " góa bē sit-khùi kah ēng chio̍h-thâu khian bô-lâng-ki, chá tio̍h giâ chhèng kā phah--lo̍h-lâi." lâng mn̄g kóng, nā-sī lí chò chóng-thóng kám ē kā Kiōng-ki phah-- lo̍h-lâi? Koa Bûn-tiat ìn kóng :,"góa ē bē m̄-chai, tān-sī 小英 khak-tēng bô hoat-tō͘."

Peh-goe̍h saⁿ-cha̍p ē-po͘, Chhòa Eng-bûn chóng-thóng sī-tō hái-kun 146 Kàm-tūi liáu-āu tì sû, chí-chhut kīn-lâi Tiong-kok Kái-hòng-kun kun-ián liáu-āu ēng bô-lâng-ki chhim-jiáu téng "phú-sek tē-tài" chhiong-tu̍t ê chhiú-hoat, i ho͘-io̍k ta̍k-ê "tek-kun jú chhiàng-tù, lán tio̍h jú léng-chēng. Lán bē hō͘ tùi-hōaⁿ ū put-tong ê chià-kháu lâi chè-chō chhiong-tu̍t, lán bē thiau-khí chiàn-toan, lán chū-ngó͘ khek-chè, tān-sī pēng m̄ sī piáu-sī lán bē hoán-chè." i í-keng hā-lēng Kok-hông-pō͘, tī sek-tòng ê sî-chūn chhái-chhú pit-iàu jî-chhiáⁿ kiông koh ū-la̍t ê hoán-chè chhò-si, siú-hō͘ kok-ka niá-khong ê an-choân.

Peh-goe̍h saⁿ-cha̍p ē-po͘ gō͘ tiám 59 hun, chi̍t chiah Tiong-kok bô-lâng-ki poe-lâi Jī-táⁿ, kok-kun kéng-kò bô hāu, khui chhèng kā phah bô phah tio̍h. Che sī "Pat-peh-saⁿ Phàu-chiàn" 1979 nî chiaⁿ-goe̍h chhe-it chèng-sek thêng-hóe 43 nî āu, Κim-mn̂g kok-kun phah ê tē-it chhèng, ín-khí kok-chè koan-sim. Tē-jī kang Tiong-kok bāng-lō͘ ū pò-chhut chit-ê ōe-bīn, koh ke pò- chhut chi̍t-ê Tiong-kok choh-sit-lâng the̍h chi̍t tè chhân-thô͘ kā bô-lâng-ki khian--lo̍h-lâi ê ōe-bīn, teh chhiò Tâi-oân kun-jîn ê chúi-chún tio̍h sī án-ne nā-nīa. Káu-goe̍h chhe-it tiong-tàu cha̍p-jī tiám 3 hun, chi̍t chiah Tiong-kok bô-lâng-ki poe-lâi Κim-mn̂g Sai-sū, kok-kun sī-kéng khu-lī bô hāu liáu-āu khui chhèng kā phah lo̍h hái. Tiong-kok Kok-tâi-pān hoat-giân-jîn Chu Hōng-liân kóng,"Bîn-chìn-tóng chiá ki-hōe chhá-choh, chè-chō kín-tiuⁿ khì-hun, seng koân nn̄g hōaⁿ tùi-li̍p tùi-khòng, chin-chiàⁿ lī-keng hó-chhiò."

　　 Káu-goe̍h chhe-jī sin-bûn, kok-kun í-keng kā 40 ki bô-lâng-ki kan-jiáu-chhèng sàng kàu gōa-tó, nńg-- ê ngē-- ê chiàn-hoat chò-hóe lâi, seng phah bô-lâng-ki, kan-jiáu-chhèng phò-hoāi i ê GPS hē-thóng, ná-chhiūⁿgín-á sî-tāi khòaⁿ koa-á-hì bú-tiûⁿ ê "tēng-sin-hoat", tiám-- lo̍h-khì, tùi-hong tiām-tiām bē tín-tāng, lán chiah khòaⁿ beh án-chóaⁿ kā chhú-lí. Chóng-kóng chi̍t kù tio̍h sī hō͘ Tiong-kok bô-lâng-ki ū lâi tio̍h bô tńg-khì, chīn-liōng hō͘ Chu Hōng-liân kè-sio̍k chhiò, chhiò bē soah.

　　 Tiong-kok bô-lâng-ki si̍t-chāi sī phôe-chiūⁿ, khiàm phah! (220909)

Chù, 小英 chhiáⁿ tha̍k Hôa-gí



八月初二，美国联邦众议院议长Phe-lo-si（Nancy Pelosi）顺利chhōa团访问台湾，中国阻挡无效，见笑转受气，ùi八月初四中昼到初七中昼，tī台湾四箍围六个海域进行飞弹实弹演习了后，tī中国各海岸实施实弹演习。Chit中间，中国开始用无人机扰乱金门列岛：八月初七暗头一只中国无人机飞来金门扰乱，第二暗koh飞来一只。八月初九暗一只无人机飞来石碇岛，八月十六下晡一只飞来二胆，国军用石头kā khian，无人机有hip tio̍h chit-ê镜头，tī中国ê网路一直播出。八月二七，一只无人机飞来烈屿，八月二九下晡，一只无人机飞来狮屿。中国无人机飞来金门列岛ná-chhiūⁿteh行灶脚。

　 八月二九。中国外交部记者会，有记者问起中国无人机飞去金门hip相chit件tāi-chì，中国外交部发言人赵立坚讲，「中国ê无人机tī中国ê领土顶头飞飞一下，有啥物值得大惊小怪？」仝一日，台北市长柯文哲讲「我bē失气（sit-khùi）kah用石头khian无人机，早tio̍h giâ铳kā拍落来。」人问讲，若是你做总统kámēkā共机拍落来？柯文哲应讲:：「我ēbē m̄知，但是小英确定无法度。」

八月三十下晡，蔡英文总统视导海军146舰队了后致词，指出近来中国解放军军演了后用无人机侵扰等「phú色地带」冲突ê手法，伊呼吁ta̍k-ê「敌军lúchhiàng-tù，咱tio̍h愈冷静。咱bē hō͘对岸有不当ê藉口来制造冲突，咱bē挑起战端，咱自我克制，但是并m̄是表示咱bē反制。」伊已经下令国防部，tī适当ê时阵采取必要而且强koh有力ê反制措施，守护国家领空ê安全。

八月三十下晡五点59分，一只中国无人机飞来二胆，国军警告无效，开铳kā拍无拍tio̍h。Che是「八二三炮战」1979年正月初一正式停火43年后，金门国军拍ê第一铳，引起国际关心。第二工中国网路有播出chit-ê画面，koh加播出一个中国作穯人the̍h一块田涂kā无人机khian落来ê画面，teh笑台湾军人ê水准tio̍h是án-ne nā-nīa。九月初一中昼十二点3分，一只中国无人机飞来金门狮屿，国军示警驱离无效了后开铳kā拍落海。中国国台办发言人朱凤莲讲：「民进党藉机会炒作，制造紧张气氛，升koân两岸对立对抗，真正离经好笑。」

　　九月初二新闻，国军已经kā 40支无人机干扰铳送到外岛，软ê硬ê战法做伙来：先拍无人机，干扰铳破坏伊êGPS系统，ná-chhiūⁿgín-á时代看歌仔戏武场ê「定身法」，点落去、对方tiām-tiām bē振动，咱才看beh按怎kā处理。总讲一句tio̍h是hō͘中国无人机有来tio̍h无转去，尽量hō͘朱凤莲继续笑、笑bē soah。

　　中国无人机实在是皮chiūⁿ，欠拍！　　　(220909)

注：小英　　请读华语