《绿色短评》

 | | | 转寄

无知，koh-beh骂人，实在可恶！

作者 李南衡, ChoânTâijī/全台字 by Chng Hūiphêng 2022.09.04

Choânbîn Tâioânjī pán/全民台湾字版简称ChoânTâiJī

《 Le̍ksek Toánphêng 》　　 Lí Lâmhêng

　　　　 Bûti, kohbeh mē lâng, si̍tchāi khóò͘ !

　 Pehgoe̍h jīit, Tiongkok Kokbîntóng Tâipak chhīgīoân 徐巧芯 itchài phàuhong Bînchìntóng Tâipak chhītiúⁿ chhamsoánjîn, Chiân Ōehokpō͘tiúⁿ Tân Sîtiong pō͘tiúⁿ bô kongpò͘ e̍kbiâu chháikáng lāṳông. I tī bīnchheh téngbīn piáusī, chêng kúi kang chiah kóng Tân Sîtiong pō͘tiúⁿ ê "kongkhai thàubêng" sī chi̍tê chhiòōe, bô kúi kang tio̍h piak chhut i ê e̍kbiâu chháikáng kèkeh kèngjiân lia̍t choh "kibi̍t" tio̍h hongchûn 30 nî, kàu kái bi̍t ê sî Tân Sîtiong pō͘tiúⁿ íkeng beh 100 hòe ah. 徐巧芯 gīoân kóng Ji̍tpún chènghú Châibūséng kiⁿî sìgoe̍h tio̍h íkeng kongpò͘, e̍kbiâu chháikáng kah paukoat phòesàng kàu choân kéng téng hùṳōng, pêngkin chi̍t che iok sintâipè 622 kho͘, io̍h chhiúⁿ, chóng hùṳōng lóng cha̍phun chhengchhó, jîchhiáⁿ Hônghái chhòngpānjîn Koeh Tâibêng chháikáng BⁿT mā ū kangkhai kèkeh, kaⁿā Tân Sîtiong pō͘tiúⁿ kóng póbi̍t 30 nî.

Tâipakchhī hù chhītiúⁿ, chit piàn Tâipak chhītiúⁿ chham soánjîn N̂g Sansan mā jīnûi, tûliáu Ji̍tpún kongkhai ígōa, Hônghái chhòngpānjîn Koeh Tâibêng mā kóng kòe ēng jōachē chîⁿ, Tâipakchhī chènghú kūnî pianlia̍t 28 ek beh bé e̍kbiâu chháikáng ūsoàn mā ū sûnkè, hiánsī kèchîⁿ pēng m̄ sī kibi̍t, chhiàng Bînchìntóng Tâipak chhītiúⁿ chhamsoánjîn Tân Sîtiong pō͘tiúⁿ "ēng jōachē chîⁿ kā jînbîn kóng kám chiahni̍h khùnlân?"

Hông kengthé sī chit piàn Tâipak chhītiúⁿ tēsì ūi chhamsoánjîn, sin kiam Bînchiòngtóng chúse̍k ê Tâipak chhītiúⁿ Koa Bûntiat, tī Kohiông chiapsiū hóngbūn ê sî tōatōa khausé Tân Sîtiong pō͘tiúⁿ kóng "bé hiah chē e̍kbiâu, chhiamiok íāu tio̍h bēsái kongkhai, kám ū siáⁿmi̍h bē kìⁿ tit chèng ê tāichì?"

　　 Poehgoe̍h jīit, chiamtùi Tâipak chhīgīoân徐巧芯ê chitgî, Tân Sîtiong pō͘tiúⁿ kóng "gīoân phoephêng tio̍h ài kinkì sūsi̍t", choân sèkài m̄ sī kaⁿā Ji̍tpún chi̍tê kokka, Tâioân, Ji̍tpún kongpò͘ ê sī kāngkhoán, ēng jōachē chîⁿ, chìn jōachē e̍kbiâu téng, pauhâm ūnhùi, lénglēng chhngtû ê bu̍tliû khaisiau téng. Tân Sîtiong pō͘tiúⁿ chiap lo̍hkhì kóng, cháchêng tī Li̍phoatīⁿ, Símkè tanūi lóng ū pòkò kui pit e̍kbiâu chháikáng ê khaisiau,Hônghái mā sī kui pit, bē sái kóngchhut tankè, ittēng tio̍h siámkhui.

　　 Kóng paukoat Koa Bûntiat isu chāilāi in chiahê lâng bûti, sī in m̄chai iáⁿ io̍hphín kah e̍kbiâu tankè sī huisiông giâmkeh ê sionggia̍p pìbi̍t. Chènghú kaⁿā ē siá kóng lóng chóng khai jōachē chîⁿ, choa̍ttùi bē sái kóngchhut tamkè.

Bînchìntóng Tâipakchhī gīoân chhamsoánjîn「口译哥」Tiō îsiông piáusī, Pílīsî tī 2020 nî cha̍pjīgoe̍h cha̍ppeh kongkhai e̍kbiâu kèkeh ínkhí chenggī, châichèng pō͘tiúⁿ Te Pulekhoh(De Bleeker) lúsū bô chùì tī “Twitter” hoat bûn siáchhut Aubêng bé ê kok chióng e̍kbiâu ê tankè liáuāu, hoathiān m̄tio̍h sûisî santiāu kín hōe sitlé, tānsī BⁿT téng io̍hchhiúⁿ iûgoân m̄ pàng i soah, mē kah chhàuthâu. Inūi ánne sī ûihoán siongbū ha̍piok ê hêngûi, sīmchì "khólêng ē sionghāi tio̍h kakī ê chènghú". Tiō îsiông kiôngtiāu, kongkhai chènghú chháikáng ha̍piok sī lísióng, tānsī tī hiānsi̍t sèkài biānlîm sionggia̍p kibi̍t ê sî, chènghú éngoán kā jînbîn kiānkhong kǹg tī tēit ūi, sī hū chekjīm chènghú engkai chò ê. Beh kongkhai e̍kbiâu tankè chin kántan, tānsī chènghú sìniōng ē oânchoân phah pháiⁿ, beh koh bé e̍kbiâu khióngkiaⁿ ū khùnlân,

　　Ánne, lán tio̍h chaiiáⁿ, bûti, kohbeh mē lâng, si̍tchāi khóò͘ ! 　(220826)

Chù, 徐巧芯 「口译哥」赵怡翔 chhiáⁿ liām Hôagí i ê sèⁿmiâ ke liām chi̍t piàn Tâigí hō͘ i chhutmiâ.


Pe̍h-ōe-jī-pán/白话字版

《 Le̍k-sek Toán-phêng 》　　 Lí Lâm-hêng

　　　　 Bû-ti, koh-beh mē lâng, si̍t-chāi khó-ò͘ !

　 Peh-goe̍h jī-it, Tiong-kok Kok-bîn-tóng Tâi-pak chhī-gī-oân 徐巧芯 it-chài phàu-hong Bîn-chìn-tóng Tâi-pak chhī-tiúⁿ chham-soán-jîn, Chiân Ōe-hok-pō͘-tiúⁿ Tân Sî-tiong pō͘-tiúⁿ bô kong-pò͘ e̍k-biâu chhái-káng lāi-iông. I tī bīn-chheh téng-bīn piáu-sī, chêng kúi kang chiah kóng Tân Sî-tiong pō͘-tiúⁿ ê "kong-khai thàu-bêng" sī chi̍t-ê chhiò-ōe, bô kúi kang tio̍h piak chhut i ê e̍k-biâu chhái-káng kè-keh kèng-jiân lia̍t choh "ki-bi̍t" tio̍h hong-chûn 30 nî, kàu kái bi̍t ê sî Tân Sî-tiong pō͘-tiúⁿ í-keng beh 100 hòe ah. 徐巧芯 gī-oân kóng Ji̍t-pún chèng-hú Châi-bū-séng kin-nî sì-goe̍h tio̍h í-keng kong-pò͘, e̍k-biâu chhái-káng kah pau-koat phòe-sàng kàu choân kéng téng hùi-iōng, pêng-kin chi̍t che iok sin-tâi-pè 622 kho͘, io̍h chhiúⁿ, chóng hùi-iōng lóng cha̍p-hun chheng-chhó, jî-chhiáⁿ Hông-hái chhòng-pān-jîn Koeh Tâi-bêng chhái-káng BⁿT mā ū kang-khai kè-keh, kan-nā Tân Sî-tiong pō͘-tiúⁿ kóng pó-bi̍t 30 nî.

Tâi-pak-chhī hù chhī-tiúⁿ, chit piàn Tâi-pak chhī-tiúⁿ chham- soán-jîn N̂g San-san mā jīn-ûi, tû-liáu Ji̍t-pún kong-khai í-gōa, Hông-hái chhòng-pān-jîn Koeh Tâi-bêng mā kóng kòe ēng jōa-chē chîⁿ, Tâi-pak-chhī chèng-hú kū-nî pian-lia̍t 28 ek beh bé e̍k-biâu chhái-káng ū-soàn mā ū sûn-kè, hián-sī kè-chîⁿ pēng m̄ sī ki-bi̍t, chhiàng Bîn-chìn-tóng Tâi-pak chhī-tiúⁿ chham-soán-jîn Tân Sî-tiong pō͘-tiúⁿ "ēng jōa-chē chîⁿ kā jîn-bîn kóng kám chiah-ni̍h khùn-lân?"

Hông keng-thé sī chit piàn Tâi-pak chhī-tiúⁿ tē-sì ūi chham-soán-jîn, sin kiam Bîn-chiòng-tóng chú-se̍k ê Tâi-pak chhī-tiúⁿ Koa Bûn-tiat, tī Ko-hiông chiap-siū hóng-būn ê sî tōa-tōa khau-sé Tân Sî-tiong pō͘-tiúⁿ kóng "bé hiah chē e̍k-biâu, chhiam-iok í-āu tio̍h bē-sái kong-khai, kám ū siáⁿ-mi̍h bē kìⁿ tit chèng ê tāi-chì?"

　　 Poeh-goe̍h jī-it, chiam-tùi Tâi-pak chhī-gī-oân徐巧芯ê chit-gî, Tân Sî-tiong pō͘-tiúⁿ kóng "gī-oân phoe-phêng tio̍h ài kin-kì sū-si̍t", choân sè-kài m̄ sī kan-nā Ji̍t-pún chi̍t-ê kok-ka, Tâi-oân, Ji̍t-pún kong-pò͘ ê sī kāng-khoán, ēng jōa-chē chîⁿ, chìn jōa-chē e̍k-biâu téng, pau-hâm ūn-hùi, léng-lēng chhng-tû ê bu̍t-liû khai-siau téng. Tân Sî-tiong pō͘-tiúⁿ chiap lo̍h-khì kóng, chá-chêng tī Li̍p-hoat-īⁿ, Sím-kè tan-ūi lóng ū pò-kò kui pit e̍k-biâu chhái-káng ê khai-siau,Hông-hái mā sī kui pit, bē sái kóng-chhut tan-kè, it-tēng tio̍h siám-khui.

　　 Kóng pau-koat Koa Bûn-tiat i-su chāi-lāi in chiah-ê lâng bû-ti, sī in m̄-chai iáⁿ io̍h-phín kah e̍k-biâu tan-kè sī hui-siông giâm-keh ê siong-gia̍p pì-bi̍t. Chèng-hú kan-nā ē siá kóng lóng chóng khai jōa-chē chîⁿ, choa̍t-tùi bē sái kóng-chhut tam-kè.

Bîn-chìn-tóng Tâi-pak-chhī gī-oân chham-soán-jîn「口译哥」Tiō î-siông piáu-sī, Pí-lī-sî tī 2020 nî cha̍p-jī-goe̍h cha̍p-peh kong-khai e̍k-biâu kè-keh ín-khí cheng-gī, châi-chèng pō͘-tiúⁿ Te Pulekhoh(De Bleeker) lú-sū bô chù-ì tī “Twitter” hoat bûn siá-chhut Au-bêng bé ê kok chióng e̍k-biâu ê tan-kè liáu-āu, hoat-hiān m̄-tio̍h sûi-sî san-tiāu kín hōe sit-lé, tān-sī BⁿT téng io̍h-chhiúⁿ iû-goân m̄ pàng i soah, mē kah chhàu-thâu. In-ūi án-ne sī ûi-hoán siong-bū ha̍p-iok ê hêng-ûi, sīm-chì "khó-lêng ē siong-hāi tio̍h ka-kī ê chèng-hú". Tiō î-siông kiông-tiāu, kong-khai chèng-hú chhái-káng ha̍p-iok sī lí-sióng, tān-sī tī hiān-si̍t sè-kài biān-lîm siong-gia̍p ki-bi̍t ê sî, chèng-hú éng-oán kā jîn-bîn kiān-khong kǹg tī tē-it ūi, sī hū chek-jīm chèng-hú eng-kai chò ê. Beh kong-khai e̍k-biâu tan-kè chin kán-tan, tān-sī chèng-hú sìn-iōng ē oân-choân phah pháiⁿ, beh koh bé e̍k-biâu khióng-kiaⁿ ū khùn-lân,

　　Án-ne, lán tio̍h chai-iáⁿ, bû-ti, koh-beh mē lâng, si̍t-chāi khó-ò͘ ! 　(220826)

Chù, 徐巧芯 「口译哥」赵怡翔 chhiáⁿ liām Hôa-gí i ê sèⁿ-miâ ke liām chi̍t piàn Tâi-gí hō͘ i chhut-miâ.




　　八月二一，中国国民党台北市议员徐巧芯一再炮轰民进党台北市长参选人、前卫福部长陈时中无公布疫苗采购内容。伊tī面册顶面表示，前几工才讲陈时中ê「公开透明」是一个笑话，无几工tio̍h piak出伊ê疫苗采购价格竟然列作「机密」tio̍h封存30年，到解密ê时陈时中已经beh 100岁ah。徐巧芯议员讲日本政府财务省今年四月tio̍h已经公布，疫苗采购kah包括配送到全境等费用，平均一剂约新台币622元，药厂、总费用lóng十分清楚，而且鸿海创办人郭台铭采购BⁿT mā有公开价格，kan-nā陈时中讲保密30年。

台北市副市长、chit遍台北市长参选人黄珊珊mā认为，除了日本公开以外，鸿海创办人郭台铭mā讲过用jōa-chē钱，台北市政府旧年编列28亿beh买疫苗采购预算mā有询价，显示价钱并m̄是机密，唱民进党台北市长参选人陈时中「用jōa-chē钱kā人民讲kám有chiah-ni̍h困难？」

Hông供体（keng-thé）是chit遍台北市长第四位参选人、身兼民众党主席ê台北市长柯文哲，tī高雄接受访问ê时大大khau-sé陈时中讲「买hiahchē疫苗，签约以后tio̍h bē-sái公开，kám有啥物bē见得众ê代志？」

　　八月二一，针对台北市议员徐巧芯ê质疑，陈时中讲「议员批评tio̍h爱根据事实」，全世界m̄是kan-nā日本一个国家，台湾、日本公布ê是仝款，用jōachē钱、进jōachē疫苗等，包含运费、冷链仓储ê物流开销等。陈时中接落去讲，早前tī立法院、审计单位lóng有报告kui笔疫苗采购ê开销，鸿海mā是kui笔，bē sái讲出单价、一定tio̍h闪开。

　　讲包括柯文哲医师在内in chiah-ê人无知，是in m̄知影药品kah疫苗单价是非常严格ê商业秘密。政府kan-nāēsiá讲lóng总开jōachē钱，绝对bē sái讲出单价。

民进党台北市议员参选人「口译哥」赵怡翔Tiō Yî-siông表示，比利时tī 2020年十二月十八公开疫苗价格引起争议，财政部长Te Pulekhoh（De Bleeker）女士无注意tī“Twitter”发文写出欧盟买ê各种疫苗ê单价了后，发现m̄-tio̍h随时删掉紧会失礼，但是辉瑞（BⁿT）等药厂犹原m̄放伊soah、骂kah臭头。因为án-ne是违反商务合约ê行为，甚至「可能ē伤害tio̍h家己ê政府」。赵怡翔Tiō Yî-siông强调，公开政府采购合约是理想，但是tī现实世界面临商业机密ê时，政府永远kā人民健康kǹgtī第一位，是负责任政府应该做ê。Beh公开疫苗单价真简单，但是政府信用ē完全拍pháiⁿ，beh koh买疫苗恐惊有困难。

　　Án-ne，咱tio̍h知影，无知，koh-beh骂人，实在可恶！　(220826)

注：徐巧芯　　「口译哥」赵怡翔　　请念华语　　伊ê姓名　加念一遍台语 　　Hō͘伊出名。