《绿色短评》

 | | | 转寄

中国ê制裁，啥人ē惊？

作者 李南衡, ChoânTâijī/全台字 by Chng Hūiphêng 2022.08.28


Choânbîn Tâioânjī pán/全民台湾字版简称ChoânTâiJī

《 Le̍ksek Toánphêng 》　　 Lí Lâmhêng

　　　　 Tiongkok ê chèchhâi, siáⁿ lâng ē kiaⁿ?

　　 Pehgoe̍h cha̍pla̍k sinbûn pòtō, Tiongkok chènghú í Bíkok Liânpang Chiònggīīⁿ gītiúⁿ Phelosi(Nancy Pelosi) hóngbūn Tâioân choh chiàkháu, tùi Tâioân hoattōng tōa kuibô͘ bûnkongbúheⁿh. Tiongkok Káihòngkun tī Tâioân chiuûi 6 ê háikhonge̍k chìnhêng si̍t tôaⁿ siākek kunsū iánsi̍p, Tiongkok chù Bí tāisài Chîn Kong tī Bíkok hoattōng soanthoân chiàn, tī “Twitter” téngbīn hoat bûn, pehgoe̍h chhesì tī 《 Washengton Iûpò 》 tâusu kóng Tâioân chúkoân sī Tiongkok ê, chíchek Phelosi hóngbūn Tâioân sī "ûipōe Bíkok bô beh kah Tâioân hoattián koaⁿhong koanhē ê sênglo̍k."

Lán Tâioân ê chù Bí tāipiáu Siau Bíkhîm chekke̍k èngchiàn. Pehgoe̍h chhegō͘ chì cha̍pit, chhit kang lāi chiapsiū paukoat CBS Sinbûn Bāng, Bíkok Kongkiōng Tiānsītâi, Microsoft Kokka Kóngpò͘ Kongsi, CNN kah Fox sinbûn téng Bíkok gō͘ keng chúiàu mûithé choanhóng, hiòng Bíkok kokkài jînsū soatbêng bo̍kchêng Tâihái kio̍ksè, Tâioân chènghú chèngchhek kah li̍ptiûⁿ, hoánpo̍k Tiongkok tùi Tâi chúkoân biūlūn, chengchhú kokchè ûlūn chichhî.

　　 Pehgoe̍h cha̍pla̍k, Τiongkiōng Tiongiong Tâipān hoatgiânjîn soanpò͘ tùi chi̍t phoe "台独顽固分子" si̍tsi chèchhâi, ū Siau Bíkhîm, Kò͘ Li̍phiông, Chhòa Kîchhiong,Koa Kiànbêng,Lîm Huiphâng, Tân Siokhôa, Ông Tēngú téng chhit ê lâng.

　　 Siūⁿkhí Bíkok Liânpang Chiònggīīⁿ gītiúⁿ Phelosi hóngbūn Tâioân tńgkhì Bíkok liáuāu, Tiongkok chènghú sûisî soanpò͘ chèchhâi Phelosi choânke. I ê suná kekiám ge Tiongkok, mn̄g amá kóng,"Tiongkok kā lán chèchhâi, sī m̄ sī beh santû TekTok tiùⁿhō? tānsī góa kinpún m̄bat ēng kòe TekTok!"

　　 Bíkok chèchhâi Hiangkáng koaⁿoân chiah ē hông kiaⁿ. Bíkok chèchhâi paukoat Hiangkáng Te̍ksiú LîmTēⁿ Goa̍tngô͘ chāilāi cha̍pit ūi koaⁿoân, hongsó ti̍tchiap á・sī kanchiap tī Bíkok chhîiú ê pângsán kah koânek, bētàng súiōng kah Bíkok siongkoan gînhâng ê sìniōngkhá. Kìmchí chiahê koaⁿoân kah Bíkok lâng á・sī tī Bíkok kénglāi chò senglí, bô hoattō͘ chò jīmhô kah Bíkok kikim, hòephín, ho̍kbū ê bébē, bētàng ū Bíkok ji̍pkéng chhiamchèng.

　　 Tiongkok kóng beh chèchhâi Phelosi, hiānsî kiàkha Bíkok ê1989 nî O̍hūn léngsiù Ông Tan kā Tiongkok chng siáu, kóng thêkiong 4 hāng chèchhâi hō͘ Phelosi hō͘ Tiongkok chhamkhó, tēit "kìmchí Phelositī Hôlâmséng chhuntìn gînhâng chûnkhoán. "Chòekīn Hôlâmséng chhuntìn gînhâng tósiàu, putchún chûnkhoánjîn khì niá chîⁿ; tējī "kìmchí Phelosi tī Tn̂gsoaⁿ chhī pòaⁿmê chhutmn̂g khì chia̍h Siauiā. "La̍kgoe̍h chhecha̍p pòaⁿmê, Tn̂gsoaⁿ chhī chi̍t keng hangbah tiàm, ū chi̍tê lâmchú beh bíkosiûⁿ chi̍t ūi lúsèng kò͘kheh bô chiâⁿ, kiànsiàu tńg siūkhì chhutchhiú phah lâng. Tēsaⁿ "kìmchí Phelosi tī Tiongkok tāikhoán bé 烂尾楼." 2020 nî Tiongkok chènghú hānchè kiànsiong tāi khoán, gînhâng koattēng thiu cháu kiànsiong gîn kin, chin chē pângtēsán khaihoat siong chhuthiān ûiiok. Tiongkok chènghú kīchoa̍t ūitio̍h iáu bōe oânkang ê 烂尾楼 hù khoán bé chhù ê bînchiòng pângok tāikhoán, ū chhiaukòe 240 bān hō͘, ha̍p kè iok sin tâipè 11.09 tiāu. Tēsì "kìmchí Phelosi khì Chhîchiu thàmsī Thi̍hliānlú." 2022 nî itgoe̍h Chhîchiu Sóliānlú ge̍kthāi sūkiāⁿ, khansia̍p tochhù jînkháu hoànūn ànkiāⁿ, ū chi̍t miâ chengsîn īⁿsiòng hông siûkim ê lúchú ū sengio̍k peh ê gíná ê pikio̍k. Ông Tan mn̄g kóng ísiōng 4 hāng chèchhâi, Phelosiē kiaⁿ ah bē?!

　　 Tiongkok ê chèchhâi ke̍kke sī, put chún lí khì Tiongkok, Hiangkáng kah Òmn̂g. Siáⁿ lâng ē kiaⁿ? 　(220819)

Chù,"台独顽固分子" 烂尾楼 　　 chhiáⁿ liām Hôagí

Pe̍h-ōe-jī-pán/白话字版

《 Le̍k-sek Toán-phêng 》　　 Lí Lâm-hêng

　　　　 Tiong-kok ê chè-chhâi, siáⁿ lâng ē kiaⁿ?

　　 Peh-goe̍h cha̍p-la̍k sin-bûn pò-tō, Tiong-kok chèng-hú í Bí-kok Liân-pang Chiòng-gī-īⁿ gī-tiúⁿ Phe-lo-si(Nancy Pelosi) hóng-būn Tâi-oân choh chià-kháu, tùi Tâi-oân hoat-tōng tōa kui-bô͘ bûn-kong-bú-heⁿh. Tiong-kok Kái-hòng-kun tī Tâi-oân chiu-ûi 6 ê hái-khong-e̍k chìn-hêng si̍t tôaⁿ siā-kek kun-sū ián-si̍p, Tiong-kok chù Bí tāi-sài Chîn Kong tī Bí-kok hoat-tōng soan-thoân chiàn, tī “Twitter” téng-bīn hoat bûn, peh-goe̍h chhe-sì tī 《 Washengton Iû-pò 》 tâu-su kóng Tâi-oân chú-koân sī Tiong-kok ê, chí-chek Phe-lo-si hóng-būn Tâi-oân sī "ûi-pōe Bí-kok bô beh kah Tâi-oân hoat-tián koaⁿ-hong koan-hē ê sêng-lo̍k."

Lán Tâi-oân ê chù Bí tāi-piáu Siau Bí-khîm chek-ke̍k èng-chiàn. Peh-goe̍h chhe-gō͘ chì cha̍p-it, chhit kang lāi chiap-siū pau-koat CBS Sin-bûn Bāng, Bí-kok Kong-kiōng Tiān-sī-tâi, Microsoft Kok-ka Kóng-pò͘ Kong-si, CNN kah Fox sin-bûn téng Bí-kok gō͘ keng chú-iàu mûi-thé choan-hóng, hiòng Bí-kok kok-kài jîn-sū soat-bêng bo̍k-chêng Tâi-hái kio̍k-sè, Tâi-oân chèng-hú chèng-chhek kah li̍p-tiûⁿ, hoán-po̍k Tiong-kok tùi Tâi chú-koân biū-lūn, cheng-chhú kok-chè û-lūn chi-chhî.

　　 Peh-goe̍h cha̍p-la̍k, Τiong-kiōng Tiong-iong Tâi-pān hoat-giân-jîn soan-pò͘ tùi chi̍t phoe "台独顽固分子" si̍t-si chè-chhâi, ū Siau Bí-khîm, Kò͘ Li̍p-hiông, Chhòa Kî-chhiong,Koa Kiàn-bêng,Lîm Hui-phâng, Tân Siok-hôa, Ông Tēng-ú téng chhit ê lâng.

　　 Siūⁿ-khí Bí-kok Liân-pang Chiòng-gī-īⁿ gī-tiúⁿ Phe-lo-si hóng-būn Tâi-oân tńg-khì Bí-kok liáu-āu, Tiong-kok chèng-hú sûi-sî soan-pò͘ chè-chhâi Phe-lo-si choân-ke. I ê sun-á ke-kiám ge Tiong-kok, mn̄g a-má kóng,"Tiong-kok kā lán chè-chhâi, sī m̄ sī beh san-tû TekTok tiùⁿ-hō? tān-sī góa kin-pún m̄-bat ēng kòe TekTok!"

　　 Bí-kok chè-chhâi Hiang-káng koaⁿ-oân chiah ē hông kiaⁿ. Bí-kok chè-chhâi pau-koat Hiang-káng Te̍k-siú Lîm-Tēⁿ Goa̍t-ngô͘ chāi-lāi cha̍p-it ūi koaⁿ-oân, hong-só ti̍t-chiap á-・sī kan-chiap tī Bí-kok chhî-iú ê pâng-sán kah koân-ek, bē-tàng sú-iōng kah Bí-kok siong-koan gîn-hâng ê sìn-iōng-khá. Kìm-chí chiah-ê koaⁿ-oân kah Bí-kok lâng á-・sī tī Bí-kok kéng-lāi chò seng-lí, bô hoat-tō͘ chò jīm-hô kah Bí-kok ki-kim, hòe-phín, ho̍k-bū ê bé-bē, bē-tàng ū Bí-kok ji̍p-kéng chhiam-chèng.

　　 Tiong-kok kóng beh chè-chhâi Phe-lo-si, hiān-sî kià-kha Bí-kok ê1989 nî O̍h-ūn léng-siù Ông Tan kā Tiong-kok chng siáu, kóng thê-kiong 4 hāng chè-chhâi hō͘ Phe-lo-si hō͘ Tiong-kok chham-khó, tē-it "kìm-chí Phe-lo-sitī Hô-lâm-séng chhun-tìn gîn-hâng chûn-khoán. "Chòe-kīn Hô-lâm-séng chhun-tìn gîn-hâng tó-siàu, put-chún chûn-khoán-jîn khì niá chîⁿ; tē-jī "kìm-chí Phe-lo-si tī Tn̂g-soaⁿ chhī pòaⁿ-mê chhut-mn̂g khì chia̍h Siau-iā. "La̍k-goe̍h chhe-cha̍p pòaⁿ-mê, Tn̂g-soaⁿ chhī chi̍t keng hang-bah tiàm, ū chi̍t-ê lâm-chú beh bí-ko-siûⁿ chi̍t ūi lú-sèng kò͘-kheh bô chiâⁿ, kiàn-siàu tńg siū-khì chhut-chhiú phah lâng. Tē-saⁿ "kìm-chí Phe-lo-si tī Tiong-kok tāi-khoán bé 烂尾楼." 2020 nî Tiong-kok chèng-hú hān-chè kiàn-siong tāi- khoán, gîn-hâng koat-tēng thiu cháu kiàn-siong gîn kin, chin chē pâng-tē-sán khai-hoat siong chhut-hiān ûi-iok. Tiong-kok chèng-hú kī-choa̍t ūi-tio̍h iáu bōe oân-kang ê 烂尾楼 hù khoán bé chhù ê bîn-chiòng pâng-ok tāi-khoán, ū chhiau-kòe 240 bān hō͘, ha̍p kè iok sin tâi-pè 11.09 tiāu. Tē-sì "kìm-chí Phe-lo-si khì Chhî-chiu thàm-sī Thi̍h-liān-lú." 2022 nî it-goe̍h Chhî-chiu Só-liān-lú ge̍k-thāi sū-kiāⁿ, khan-sia̍p to-chhù jîn-kháu hoàn-ūn àn-kiāⁿ, ū chi̍t miâ cheng-sîn īⁿ-siòng hông siû-kim ê lú-chú ū seng-io̍k peh ê gín-á ê pi-kio̍k. Ông Tan mn̄g kóng í-siōng 4 hāng chè-chhâi, Phe-lo-siē kiaⁿ ah bē?!

　　 Tiong-kok ê chè-chhâi ke̍k-ke sī, put chún lí khì Tiong-kok, Hiang-káng kah Ò-mn̂g. Siáⁿ lâng ē kiaⁿ? 　(220819)

Chù,"台独顽固分子" 烂尾楼 　　 chhiáⁿ liām Hôa-gí

《绿色短评》　　李南衡

　　　　　　　　中国ê制裁，啥人ē惊？

　　八月十六新闻报导，中国政府以美国联邦众议院议长Phe-lo-si（Nancy Pelosi）访问台湾作藉口，对台湾发动大规模文攻武吓。中国解放军tī 台湾周围6个海空域进行实弹射击军事演习，中国驻美大使秦刚tī 美国发动宣传战，tī “Twitter”顶面发文，八月初四tī 《华盛顿邮报》投书讲台湾主权是中国ê，指责Phe-lo-si访问台湾是「违背美国无beh kah台湾发展官方关系ê承诺。」

咱台湾ê驻美代表萧美琴积极应战。八月初五至十一，七工内接受包括CBS新闻网、美国公共电视台、微软国家广播公司、CNN kah Fox新闻等美国五间主要媒体专访，向美国各界人士说明目前台海局势，台湾政府政策kah立场，反驳中国对台主权谬论，争取国际舆论支持。

　　八月十六，中共中央台办发言人宣布对一批「台独顽固分子」实施制裁，有萧美琴、顾立雄、蔡其昌、柯建铭、林飞帆、陈椒华、王定宇等七个人。

　　想起美国联邦众议院议长Phe-lo-si访问台湾转去美国了后，中国政府随时宣布制裁Phe-lo-si全家。伊ê孙仔加减ge中国、问A妈讲，「中国kā咱制裁，是m̄是beh删除TikTok帐号？但是我根本m̄-bat用过TikTok！」

　　美国制裁香港官员才ēhông惊。美国制裁包括香港特首林郑月娥在内十一位官员，封锁直接抑是间接tī 美国持有ê房产kah权益，bē-tàng使用kah美国相关银行ê信用卡。禁止chiah-ê官员kah美国人抑是tī 美国境内做生理，无法度做任何kah美国基金、货品、服务ê买卖，bē-tàng有美国入境签证。

　　中国讲beh制裁Phe-lo-si，现时旅居美国ê1989年学运领袖王丹kā中国装siáu，讲提供4项制裁hō͘ Phe-lo-si hō͘中国参考：第一「禁止Phe-lo-sitī 河南省村镇银行存款。」最近河南省村镇银行倒数，不准存款人去领钱；第二「禁止Phe-lo-sitī 唐山市半暝出门去食宵夜。」六月初十半暝，唐山市一间烘肉店，有一个男子beh 米糕siûⁿ一位女性顾客无成，见笑转受气出手拍人。第三「禁止Phe-lo-sitī 中国贷款买烂尾楼。」2020年中国政府限制建商贷款，银行决定抽走建商银根，真chē房地产开发商出现违约。中国政府拒绝为tio̍h犹未完工ê烂尾楼付款买厝ê民众房屋贷款，有超过240万户，合计约新台币11.09兆。第四「禁止Phe-lo-si去徐州探视铁链女。」2022年一月徐州锁链女虐待事件，牵涉多次人口贩运案件，有一名精神异常hông囚禁ê女子有生育八个gín-á ê悲剧。王丹问讲以上4项制裁，Phe-lo-siē惊抑bē？！

　　中国ê制裁极加是，不准你去中国、香港kah奥门。啥人ē惊？　(220819)

注：「台独顽固分子」 烂尾楼　　请念华语