《绿色短评》

 | | | 转寄

美国chhōe tio̍h失散chē-chē年ê gín-á—中国

作者 李南衡, ChoânTâijī/全台字 by Chng Hūiphêng 2022.08.21


Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　 Lí Lâmhêng

　 Bíkok chhōe tio̍h sit sòaⁿ chēchē nî ê gín’á— Tiongkok

Bô jōa kú chìnchêng, Tiongkok chiâⁿ liûhêng ēng " Pahtō͘ tētô͘" chhiau chhōe Tâioân, paukoat í Tiongkok siâⁿchhī miâ hōmiâ ê kelō͘, chhiūⁿkóng Lâmkiaⁿ lō͘, Kńgchiu ke, á・sī kah Tiongkok tēmiâ siongkoan ê chhanthiaⁿ, chhiūⁿkóng Hok chiu hîoân tamī, Sòaⁿthâu hóeko, lóng hō͘ Tiongkok bāngiú kámkak chiâⁿ chhùbī, chiâⁿ hikî, chhiau chhōe liōng tōatōa chēngka, sīmchì chē kah tìsú " Pahtō͘ tētô͘" chi̍t sî "pang khì" bô hoattō͘ súiōng.

Pehgoe̍h chhechhit, hiānjīm Tiongkok gōakaupō͘ pō͘tiúⁿ chō͘lí, gōakaupō͘ hoatgiânjîn 华春莹 lúsū chi̍t sî chhiú giauⁿ, ēng Engbûn tī “Twitter” téngbīn hoatpiáu kolūn, i tī kolūn tiong ū tah chi̍t tiuⁿ "Pahtō͘ tētô͘" ê chia̍t tô͘, i kóng, tī " Pahtō͘ tētô͘" hiánsī, Tâipakchhī ū 38 keng Soaⁿtang chúikiáu koán, 67 keng Soaⁿsai mī koán. Bīkak bē phiàn lâng, Tâioân itti̍t sī Tiongkok ê chi̍tpō͘hūn. Sit sòaⁿ chēchē nî ê gíná kuibóe chóng・sī tio̍h tńglâi chhù・ni̍h.

I ê bûnchiuⁿ chi̍tē chhut・lâi, chhiò tò kúi pahbān lâng. Kantāⁿ chhiò iáu bô kàu, chin chē lâng chin phahpiàⁿ kā i thíchhiò á・sī kā i chiàⁿ khau tò siah, putchí lāujia̍t, mā chēngka ta̍kê chhiàutâm ê chuliāu. Tâioân chuchhim kiûphêng Chio̍h Bêngkín tī bīnchheh téngbīn piáusī, kinkì thóngkè, Tâioân ū 9,000 keng Ji̍tpún liāulí tiàm, bīkak bē phiàn lâng. Tâioân chokka Chu Iūhun kā华春莹ê bûn choán hoat kàu bīnchheh, mn̄g kóng,"lí kámkáⁿ sǹg Tâioân ū kúi keng Bíkok sek, Ji̍tpún sek, Hânkok sek chhanthiaⁿ? iáu ū Ìtāilī mī?" ū chi̍t ūi Tiongkok bāngiú mā khòaⁿ bē lo̍hkhì, piáusī kóng "góa hāi ah, goán chhù hūkīn 麦当劳, 星巴克, 肯德基lóng chóng ū, goânlâi góa sī tī Bíkok!" lēnggōa chi̍t ūi Tiongkok bāngiú mn̄g kóng, góa ta̍k kang lim Tâioân ê 珍珠奶茶, khòaⁿ beh ánchóaⁿ?

Ji̍tpún 《 Sánkeng sinbûn 》 Tāipak chikio̍ktiúⁿ Yaita san（矢板明夫）tī bīnchheh hoat bûn kóng, i tī Tāipak tòa nn̄g nî pòaⁿ, kámkak Tāipak ê Ji̍tpún lamī tiàm, súsih tiàm, 居酒屋 ūiáⁿ bē chió. Tānsī i chaiiáⁿ, choa̍ttùi bô jīmhô chi̍tê chèngsiông ê Ji̍tpún lâng, ē liânsióng kàu "Tâioân ê Ji̍tpún chhankoán chiahnī chē, Tâioân tio̍h engkai sio̍k tī Ji̍tpún. I koh chhâliáu, tī Tangkiaⁿ kèngjiân ū 9,000 gōa keng Tionghôa liāulí. Chitê pílē engkai sī choân sèkài chúiàu siâⁿchhī tiong siōng koân ê. Siatsú ū chi̍t kang, Τiongkiōng gōakaupō͘ ēsái koattēng kokchè tia̍tsū, khióngkiaⁿ Ji̍tpún ê siúto͘ tio̍h ē sûisî piàn choh Τiongkiōng ê o͘h.

Tâioân ū chi̍t ūi bāngiú khòaⁿ pòtō liáuāu kóng,"chin hóchhiò, 华春莹 sī ēng Engbûn hoat ê, chinchiàⁿ piàn choh kokchè chhiòōe. "Ūiáⁿ to̍h tio̍h, inūi i ēng Engbûn siá ê koh sī tī “Twitter” téngbīn hoatpiáu ê, chiah ē ínkhí Bíkok Kokbūīⁿ chêng hoatgiânjîn Otagusu（Morgan Ortagus） lúsū mā kāngkhoán tī “Twitter” téngbīn, seng kā华春莹ê PO bûn chia̍t tô͘, chiah koh ēng 华春莹ê khùi kháu kóng,"Tiongkok ū chhiaukòe 8,500 keng Kenthaki chhanthiaⁿ, bīkak bē phiàn lâng, Tiongkok itti̍t sī Bíkok Kenthaki chiu ê chi̍tpō͘hūn. Sit sòaⁿ chēchē nî ê gíná kuibóe chóng・sī tio̍h tńglâi chhù・ni̍h."

Bôìtiong, Bíkok Kenthaki chiu soah chhōe tio̍h sit sòaⁿ chēchē nî ê gín’á— Tiongkok ．(220812)

Chù,华（Húa）春莹 麦当劳 星巴克 肯德基 珍珠奶茶 居酒屋 　 chhiáⁿ liām Hôagí

Pe̍h-ōe-jī-pán/白话字版


《 Le̍k-sek toán-phêng 》　　 Lí Lâm-hêng

　 Bí-kok chhōe tio̍h sit sòaⁿ chē-chē nî ê gín-á— Tiong-kok

Bô jōa kú chìn-chêng, Tiong-kok chiâⁿ liû-hêng ēng " Pah-tō͘ tē-tô͘" chhiau chhōe Tâi-oân, pau-koat í Tiong-kok siâⁿ-chhī miâ hō-miâ ê ke-lō͘, chhiūⁿ-kóng Lâm-kiaⁿ lō͘, Kńg-chiu ke, á-・sī kah Tiong-kok tē-miâ siong-koan ê chhan-thiaⁿ, chhiūⁿ-kóng Hok- chiu hî-oân ta-mī, Sòaⁿ-thâu hóe-ko, lóng hō͘ Tiong-kok bāng-iú kám-kak chiâⁿ chhù-bī, chiâⁿ hi-kî, chhiau chhōe liōng tōa-tōa chēng-ka, sīm-chì chē kah tì-sú " Pah-tō͘ tē-tô͘" chi̍t sî "pang khì" bô hoat-tō͘ sú-iōng.

Peh-goe̍h chhe-chhit, hiān-jīm Tiong-kok gōa-kau-pō͘ pō͘-tiúⁿ chō͘-lí, gōa-kau-pō͘ hoat-giân-jîn 华春莹 lú-sū chi̍t sî chhiú giauⁿ, ēng Eng-bûn tī “Twitter” téng-bīn hoat-piáu ko-lūn, i tī ko-lūn tiong ū tah chi̍t tiuⁿ "Pah-tō͘ tē-tô͘" ê chia̍t tô͘, i kóng, tī " Pah-tō͘ tē-tô͘" hián-sī, Tâi-pak-chhī ū 38 keng Soaⁿ-tang chúi-kiáu koán, 67 keng Soaⁿ-sai mī koán. Bī-kak bē phiàn lâng, Tâi-oân it-ti̍t sī Tiong-kok ê chi̍t-pō͘-hūn. Sit sòaⁿ chē-chē nî ê gín-á kui-bóe chóng-・sī tio̍h tńg-lâi chhù-・ni̍h.

I ê bûn-chiuⁿ chi̍t-ē chhut-・lâi, chhiò tò kúi pah-bān lâng. Kan-tāⁿ chhiò iáu bô kàu, chin chē lâng chin phah-piàⁿ kā i thí-chhiò á-・sī kā i chiàⁿ khau tò siah, put-chí lāu-jia̍t, mā chēng-ka ta̍k-ê chhiàu-tâm ê chu-liāu. Tâi-oân chu-chhim kiû-phêng Chio̍h Bêng-kín tī bīn-chheh téng-bīn piáu-sī, kin-kì thóng-kè, Tâi-oân ū 9,000 keng Ji̍t-pún liāu-lí tiàm, bī-kak bē phiàn lâng. Tâi-oân chok-ka Chu Iū-hun kā华春莹ê bûn choán hoat kàu bīn-chheh, mn̄g kóng,"lí kám-káⁿ sǹg Tâi-oân ū kúi keng Bí-kok sek, Ji̍t-pún sek, Hân-kok sek chhan-thiaⁿ? iáu ū Ì-tāi-lī mī?" ū chi̍t ūi Tiong-kok bāng-iú mā khòaⁿ bē lo̍h-khì, piáu-sī kóng "góa hāi ah, goán chhù hū-kīn 麦当劳, 星巴克, 肯德基lóng chóng ū, goân-lâi góa sī tī Bí-kok!" lēng-gōa chi̍t ūi Tiong-kok bāng-iú mn̄g kóng, góa ta̍k kang lim Tâi-oân ê 珍珠奶茶, khòaⁿ beh án-chóaⁿ?

Ji̍t-pún 《 Sán-keng sin-bûn 》 Tāi-pak chi-kio̍k-tiúⁿ Ya-ita san（矢板明夫）tī bīn-chheh hoat bûn kóng, i tī Tāi-pak tòa nn̄g nî pòaⁿ, kám-kak Tāi-pak ê Ji̍t-pún la-mī tiàm, sú-sih tiàm, 居酒屋 ū-iáⁿ bē chió. Tān-sī i chai-iáⁿ, choa̍t-tùi bô jīm-hô chi̍t-ê chèng-siông ê Ji̍t-pún lâng, ē liân-sióng kàu "Tâi-oân ê Ji̍t-pún chhan-koán chiah-nī chē, Tâi-oân tio̍h eng-kai sio̍k tī Ji̍t-pún. I koh chhâ-liáu, tī Tang-kiaⁿ kèng-jiân ū 9,000 gōa keng Tiong-hôa liāu-lí. Chit-ê pí-lē eng-kai sī choân sè-kài chú-iàu siâⁿ-chhī tiong siōng koân ê. Siat-sú ū chi̍t kang, Τiong-kiōng gōa-kau-pō͘ ē-sái koat-tēng kok-chè tia̍t-sū, khióng-kiaⁿ Ji̍t-pún ê siú-to͘ tio̍h ē sûi-sî piàn choh Τiong-kiōng ê o͘h.

Tâi-oân ū chi̍t ūi bāng-iú khòaⁿ pò-tō liáu-āu kóng,"chin hó-chhiò, 华春莹 sī ēng Eng-bûn hoat ê, chin-chiàⁿ piàn choh kok-chè chhiò-ōe. "Ū-iáⁿ to̍h tio̍h, in-ūi i ēng Eng-bûn siá ê koh sī tī “Twitter” téng-bīn hoat-piáu ê, chiah ē ín-khí Bí-kok Kok-bū-īⁿ chêng hoat-giân-jîn Otagusu（Morgan Ortagus） lú-sū mā kāng-khoán tī “Twitter” téng-bīn, seng kā华春莹ê PO bûn chia̍t tô͘, chiah koh ēng 华春莹ê khùi kháu kóng,"Tiong-kok ū chhiau-kòe 8,500 keng Ken-thaki chhan-thiaⁿ, bī-kak bē phiàn lâng, Tiong-kok it-ti̍t sī Bí-kok Ken-thaki chiu ê chi̍t-pō͘-hūn. Sit sòaⁿ chē-chē nî ê gín-á kui-bóe chóng-・sī tio̍h tńg-lâi chhù-・ni̍h."

Bô-ì-tiong, Bí-kok Ken-thaki chiu soah chhōe tio̍h sit sòaⁿ chē-chē nî ê gín-á— Tiong-kok ．(220812)

Chù, 华（Húa）春莹 麦当劳 星巴克 肯德基 珍珠奶茶 　居 酒屋 　 chhiáⁿ liām Hôa-gí


无jōa久进前，中国chiâⁿ流行用「百度地图」搜chhōe台湾，包括以中国城市名号名ê街路，像讲南京路、广州街，抑是kah中国地名相关ê餐厅，像讲福州鱼丸干面、汕头火锅，lóng hō͘中国网友感觉chiâⁿ趣味、chiâⁿ稀奇，搜chhōe量大大增加，甚至chē kah致使「百度地图」一时「崩去」无法度使用。

八月初七，现任中国外交部部长助理、外交部发言人华春莹女士一时手痒（giauⁿ），用英文tī“Twitter”顶面发表高论，伊tī高论中有贴一张「百度地图」ê截图，伊讲，tī「百度地图」显示，台北市有38间山东水饺馆、67家山西面馆。味觉bē骗人，台湾一直是中国ê一部分。失散（sit-sòaⁿ）chēchē年ê gín-ákui尾总是tio̍h转来厝里。

伊ê文章一下出来，笑倒几百万人。干单笑犹无够，真chē人真拍拼kā伊耻笑抑是 kā伊正刨（khau）倒削，不止闹热，mā增加逐个笑谈ê资料。台湾资深球评石明谨tī面册顶面表示，根据统计，台湾有9,000家日本料理店，味觉bē骗人。台湾作家朱宥（iū）勋kā华春莹ê文转发到面册，问讲：「你kám-káⁿ算台湾有几间美国式、日本式、韩国式餐厅？犹有义大利面？」有一位中国网友mā看bē落去，表示讲「我害ah，阮厝附近麦当劳、星巴克、肯德基lóng总有，原来我是tī美国！」另外一位中国网友问讲，我逐工lim台湾ê珍珠奶茶，看beh按怎？

日本《产经新闻》台北支局长Ya-ita san（矢板明夫）tī面册发文讲，伊tī台北tòa两年半，感觉台北ê日本拉面店、寿司店、居酒屋有影bē少。但是伊知影，绝对无任何一个正常ê日本人，会联想到「台湾ê日本餐馆chiah-nīchē，台湾tio̍h应该属tī日本。伊koh查了，tī东京竟然有9,000外间中华料理。这个比例应该是全世界主要城市中上koânê。设使有一工，中共外交部会使决定国际秩序，恐惊日本ê首都tio̍h会随时变作中共ê o͘h。

台湾有一位网友看报导了后讲：「真好笑，华春莹是用英文发ê，真正变作国际笑话。」有影to̍h tio̍h，因为伊用英文写êkoh是tī“Twitter”顶面发表ê，chiahē引起美国国务院前发言人Otagusu（Morgan Ortagus）女士mā仝款tī“Twitter”顶面，先kā华春莹êPO文截图，才koh用华春莹ê气口讲：「中国有超过8,500间Ken-thaki餐厅，味觉bē骗人，中国一直是美国Ken-thaki州ê一部分。失散chēchē年ê gín-ákui尾总是tio̍h转来厝里。」

无意中，美国Ken-thaki州soah chhōe tio̍h失散chēchē年ê gín-á—中国．(220812)

注：华（Húa）春莹 麦当劳 星巴克 肯德基 珍珠奶茶　居酒屋　请念华语