《绿色短评》

 | | | 转寄

深深感谢Phe-lo-si议长来台湾访问！

作者 李南衡, ChoânTâijī/全台字 by Chng Hūiphêng 2022.08.14

Choânbîn Tâioânjī pán/全民台湾字版简称ChoânTâiJī

《 Le̍ksek Toánphêng 》　 Lí Lâmhêng

　　　 Chhimchhim kámsiā Phelosi gītiúⁿ lâi Tâioân hóngbūn!

Chhitgoe̍h cha̍pkáu, Engkok 《 Kimiông Sîpò 》to̍kka pòtō, sìgoe̍h inūi Búhàn hìiām khakchín kā goânpún beh khì Achiu hóngbūn hêngthêng sóa thèāu ê Bíkok Liânpang Chiònggīīⁿ gītiúⁿ Phelosi(Nancy Pelosi), ē tī pehgoe̍h chhōa thoân khì Tâioân hóngbūn tiánhiān chichhî, i ē sī 25 nî lâi koh ū chi̍t ūi Bíkok Liânpang Chiònggīīⁿ gītiúⁿ khì hóngbūn Tâioân.

　　 Chhitgoe̍h jīkáu, Phelosi gītiúⁿ khétêng chêng lâi Achiu liáuāu, Tiongkok kâng chi̍t ji̍t tio̍h hoatpò͘ hânghêng kéngkò, chhitgoe̍h saⁿcha̍p ē tī Hokkiàn Pêⁿthâm chúie̍k chiphêng si̍t tôaⁿ siākek hùnliān, Pêⁿthâm sī Tâioân háikiap siōng e̍h ê só͘chāi, sīui bī cha̍pchiok. Pehgoe̍h chheit thiaⁿkóng Phelosi gītiúⁿ chhejī ē kàu Tâioân, Tiongkok Háisūkio̍k hoatpò͘ hânghêng kéngkò, pehgoe̍h chhejī ē tī Lâmhái pō͘hūn háie̍k chìnhêng "kunsū hùnliān". Thiⁿtin,Liâulêng, Háilâm Háisūkio̍k tângpō͘ hoatchhut kunsū iánsi̍p hânghêng kéngkò, Tiongkok chinchiàⁿ ū kunsū hôeèng.

　　 Chhitgoe̍h jīpeh, Bíkok chóngthóng Biden kah Tiongkok kokka chúsek习近平 jia̍tsòaⁿ kóngōe tiong, 习近平 chúse̍k kéngkò Bíkok, sńg hóe ê ittēng ē kakī sio tio̍h. Tiongkok koaⁿhong mûithé ê kéngkò chi̍t piàn pí chi̍t piàn khah pháiⁿ. Chhitgoe̍h jīla̍k, Tiongkok Kokhôngpō͘ hoatgiânjîn Thâm Khekhui piáusī, Tiong hong iaukiû Bí hong í si̍tchè hêngtōng líhêng put chichhî "Tâito̍k" ê sênglo̍k, bē sái anpâi Phelosi hóng Tâi. Pehgoe̍h chheit, Tiongkok Gōakaupō͘ kéngkò Phelosi nā khì Tâioân hóngbūn ē hiōkó giâmtiōng, Káihòngkun bē tiāmtiām chē lehhia m̄koán. Chêng Khoânkiû Sîpò chóngpianchi̍p Ô͘ Siahchìn tī "Bî poa̍h" kah “Twitter” téngbīn tōasiaⁿ kóng siatsú Bíkun chiànki nā hō͘sàng Phelosi hóng Tâi, Káihòngkun nā kā i khulī bô hāu tio̍h ēsáe kā "phah lo̍hlâi"; i kóng Phelosi nāsī tī Tâioân thêngliû, tio̍h sī tiám to̍h Tâioân háikiap kio̍ksè hóeio̍htháng, Káihòngkun íkeng chò hó chhionghun ê chúnpī.

Pehgoe̍h chhejī àm cha̍ptiámgōa, Bíkok Liânpang Chiònggīīⁿ gītiúⁿ Phelosi chhōa thoân lâi Tâioân hóngbūn, i tī Tâioân chi̍t kang só͘ kóng ê ōe chin iàukín. Tûliáu oló Tâioân ê bînchú sêngchiū kah liônghó ê tīlí, te̍kpia̍t kiôngtiāu Bíkok bē sái bē kìtit 1979 nî "Tâioân koanhē hoat" tùi Tâioân ê sênglo̍k. Kináji̍t Tiongkok pō͘ pō͘ chìn pek, tī kunsū, kengchè, gōakau téng kok chânbīn táⁿap Tâioân. Tiongkok khólêng ētàng chó͘tòng Tâioân léngsiù chhamú kokchè hōegī, tānsī in bētàng chó͘tòng sèkài kok kok léngsiù a̍hsī jīmhô lâng lâi hóngbūn Tâioân. I lâikàu Tâioân tio̍h sī beh thoânta̍t Bíkok Kokhōe khòa tóngphài tùi Tâioân anchoân ê chichhî, pangchō͘ Tâioân siōng iúhāu ê chūngó͘ hônggū. Tiôngsin khakjīn, Tâioân, kah só͘ū bînchú kokka ê chūiû, ittēng tio̍h siū chuntiōng. Phelosi gītiúⁿ lâi Tâioân hóngbūn mā chha̍kphòa "Tâioân sī Tiongkok ê chi̍tpō͘hūn" chit kù sèkí ê pe̍hchha̍t ōe.

　　 Kóngtio̍h Tiongkok, thiⁿ to̍h o͘ chi̍t pêng. Thiaⁿtio̍h longlong ê siaⁿim, goânpún siūⁿkóng sī beh lo̍h tōa hō͘ teh tân lûikong. Siókhóa chimchiok thiaⁿ, chiah chaiiáⁿ sī Bíkok Liânpang Chiònggīīⁿ gītiúⁿ Phelosi beh lâi Tâioân hóngbūn, Tiongkok sìkè teh si̍ttôaⁿ iánsi̍p, sī tōaphàu sióchhèng ê siaⁿim beh kā Phelosi gītiúⁿ heⁿhkiaⁿ tio̍h. Khah chimchiok thiaⁿ, chiah thiaⁿ chhut he sī Tiongkok tōatōa sèsè koaⁿoân teh tôaⁿ chhàuphùi ê siaⁿ.

Lán chhimchhim kámsiā siáⁿmi̍h lóng m̄ kiaⁿ ê Phelosi gītiúⁿ lâi Tâioân hóngbūn! (220805)

Chù, 习近平 　　 chhiáⁿ liām Hôagí


Pe̍h-ōe-jī-pán/白话字版


《 Le̍k-sek Toán-phêng 》　 Lí Lâm-hêng

　　　 Chhim-chhim kám-siā Phe-lo-si gī-tiúⁿ lâi Tâi-oân hóng-būn!

Chhit-goe̍h cha̍p-káu, Eng-kok 《 Kim-iông Sî-pò 》to̍k-ka pò-tō, sì-goe̍h in-ūi Bú-hàn hì-iām khak-chín kā goân-pún beh khì A-chiu hóng-būn hêng-thêng sóa thè-āu ê Bí-kok Liân-pang Chiòng-gī-īⁿ gī-tiúⁿ Phe-lo-si(Nancy Pelosi), ē tī peh-goe̍h chhōa thoân khì Tâi-oân hóng-būn tián-hiān chi-chhî, i ē sī 25 nî lâi koh ū chi̍t ūi Bí-kok Liân-pang Chiòng-gī-īⁿ gī-tiúⁿ khì hóng-būn Tâi-oân.

　　 Chhit-goe̍h jī-káu, Phe-lo-si gī-tiúⁿ khé-têng chêng lâi A-chiu liáu-āu, Tiong-kok kâng chi̍t ji̍t tio̍h hoat-pò͘ hâng-hêng kéng-kò, chhit-goe̍h saⁿ-cha̍p ē tī Hok-kiàn Pêⁿ-thâm chúi-e̍k chip-hêng si̍t tôaⁿ siā-kek hùn-liān, Pêⁿ-thâm sī Tâi-oân hái-kiap siōng e̍h ê só͘-chāi, sī-ui bī cha̍p-chiok. Peh-goe̍h chhe-it thiaⁿ-kóng Phe-lo-si gī-tiúⁿ chhe-jī ē kàu Tâi-oân, Tiong-kok Hái-sū-kio̍k hoat-pò͘ hâng-hêng kéng-kò, peh-goe̍h chhe-jī ē tī Lâm-hái pō͘-hūn hái-e̍k chìn-hêng "kun-sū hùn-liān". Thiⁿ-tin,Liâu-lêng, Hái-lâm Hái-sū-kio̍k tâng-pō͘ hoat-chhut kun-sū ián-si̍p hâng-hêng kéng-kò, Tiong-kok chin-chiàⁿ ū kun-sū hôe-èng.

　　 Chhit-goe̍h jī-peh, Bí-kok chóng-thóng Biden kah Tiong-kok kok-ka chú-sek习近平 jia̍t-sòaⁿ kóng-ōe tiong, 习近平 chú-se̍k kéng-kò Bí-kok, sńg hóe-- ê it-tēng ē ka-kī sio-- tio̍h. Tiong-kok koaⁿ-hong mûi-thé ê kéng-kò chi̍t piàn pí chi̍t piàn khah pháiⁿ. Chhit-goe̍h jī-la̍k, Tiong-kok Kok-hông-pō͘ hoat-giân-jîn Thâm Khek-hui piáu-sī, Tiong hong iau-kiû Bí hong í si̍t-chè hêng-tōng lí-hêng put chi-chhî "Tâi-to̍k" ê sêng-lo̍k, bē sái an-pâi Phe-lo-si hóng Tâi. Peh-goe̍h chhe-it, Tiong-kok Gōa-kau-pō͘ kéng-kò Phe-lo-si nā khì Tâi-oân hóng-būn ē hiō-kó giâm-tiōng, Kái-hòng-kun bē tiām-tiām chē leh-hia m̄-koán. Chêng Khoân-kiû Sî-pò chóng-pian-chi̍p Ô͘ Siah-chìn tī "Bî poa̍h" kah “Twitter” téng-bīn tōa-siaⁿ kóng siat-sú Bí-kun chiàn-ki nā hō͘-sàng Phe-lo-si hóng Tâi, Kái-hòng-kun nā kā i khu-lī bô hāu tio̍h ē-sáe kā "phah-- lo̍h-lâi"; i kóng Phe-lo-si nā-sī tī Tâi-oân thêng-liû, tio̍h sī tiám to̍h Tâi-oân hái-kiap kio̍k-sè hóe-io̍h-tháng, Kái-hòng-kun í-keng chò hó chhiong-hun ê chún-pī.

Peh-goe̍h chhe-jī àm cha̍p-tiám-gōa, Bí-kok Liân-pang Chiòng-gī-īⁿ gī-tiúⁿ Phe-lo-si chhōa thoân lâi Tâi-oân hóng-būn, i tī Tâi-oân chi̍t kang só͘ kóng ê ōe chin iàu-kín. Tû-liáu o-ló Tâi-oân ê bîn-chú sêng-chiū kah liông-hó ê tī-lí, te̍k-pia̍t kiông-tiāu Bí-kok bē sái bē kì-tit 1979 nî "Tâi-oân koan-hē hoat" tùi Tâi-oân ê sêng-lo̍k. Kin-á-ji̍t Tiong-kok pō͘ -pō͘ chìn pek, tī kun-sū, keng-chè, gōa-kau téng kok chân-bīn táⁿ-ap Tâi-oân. Tiong-kok khó-lêng ē-tàng chó͘-tòng Tâi-oân léng-siù chham-ú kok-chè hōe-gī, tān-sī in bē-tàng chó͘-tòng sè-kài kok kok léng-siù a̍h-sī jīm-hô lâng lâi hóng-būn Tâi-oân. I lâi-kàu Tâi-oân tio̍h sī beh thoân-ta̍t Bí-kok Kok-hōe khòa tóng-phài tùi Tâi-oân an-choân ê chi-chhî, pang-chō͘ Tâi-oân siōng iú-hāu ê chū-ngó͘ hông-gū. Tiông-sin khak-jīn, Tâi-oân, kah só͘-ū bîn-chú kok-ka ê chū-iû, it-tēng tio̍h siū chun-tiōng. Phe-lo-si gī-tiúⁿ lâi Tâi-oân hóng-būn mā chha̍k-phòa "Tâi-oân sī Tiong-kok ê chi̍t-pō͘-hūn" chit kù sè-kí ê pe̍h-chha̍t ōe.

　　 Kóng-tio̍h Tiong-kok, thiⁿ to̍h o͘ chi̍t pêng. Thiaⁿ-tio̍h long-long ê siaⁿ-im, goân-pún siūⁿ-kóng sī beh lo̍h tōa hō͘ teh tân lûi-kong. Sió-khóa chim-chiok thiaⁿ, chiah chai-iáⁿ sī Bí-kok Liân-pang Chiòng-gī-īⁿ gī-tiúⁿ Phe-lo-si beh lâi Tâi-oân hóng-būn, Tiong-kok sì-kè teh si̍t-tôaⁿ ián-si̍p, sī tōa-phàu sió-chhèng ê siaⁿ-im beh kā Phe-lo-si gī-tiúⁿ heⁿh-kiaⁿ tio̍h. Khah chim-chiok thiaⁿ, chiah thiaⁿ chhut he sī Tiong-kok tōa-tōa sè-sè koaⁿ-oân teh tôaⁿ chhàu-phùi ê siaⁿ.

Lán chhim-chhim kám-siā siáⁿ-mi̍h lóng m̄ kiaⁿ ê Phe-lo-si gī-tiúⁿ lâi Tâi-oân hóng-būn! (220805)

Chù, 习近平 　　 chhiáⁿ liām Hôa-gí




七月十九，英国《金融时报》独家报导，四月因为武汉肺炎确诊kā原本beh去亚洲访问行程sóa退后ê美国联邦众议院议长Phe-lo-si（Nancy Pelosi），ētī八月chhōa团去台湾访问展现支持，伊ē是25年来koh有一位美国联邦众议院议长去访问台湾。

　　七月二九，Phe-lo-si议长启程前来亚洲了后，中国仝一日tio̍h发布航行警告，七月三十ētī福建平潭水域执行实弹射击训练，平潭是台湾海峡上e̍hê所在，示威味十足。八月初一听讲Phe-lo-si议长初二ē到台湾，中国海事局发布航行警告，八月初二ētī南海部分海域进行「军事训练」。天津、辽宁、海南海事局同步发出军事演习航行警告，中国真正有军事回应。

　　七月二八，美国总统Biden kah中国国家主席习近平热线讲话中，习近平主席警告美国：sńg火ê一定ē家己烧tio̍h。中国官方媒体ê警告一遍比一遍khah pháiⁿ。七月二六，中国国防部发言人谭克非表示，中方要求美方以实际行动履行不支持「台独」ê承诺，bē sái安排Phe-lo-si访台。八月初一，中国外交部警告Phe-lo-si若去台湾访问会后果严重，解放军bētiāmtiām坐leh-hia m̄管。前环球时报总编辑胡锡进tī「微博」kah“Twitter”顶面大声讲设使美军战机若护送Phe-lo-si访台，解放军若kā伊驱离无效tio̍hē-sáikā「拍落来」；伊讲Phe-lo-si若是tī台湾停留，tio̍h是点to̍h台湾海峡局势火药桶，解放军已经做好充分ê准备。

八月初二暗十点外，美国联邦众议院议长Phe-lo-si chhōa团来台湾访问，伊tī台湾一工所讲ê话真要紧。除了o-ló台湾ê民主成就kah良好ê治理，特别强调美国bē sái bē记得1979年「台湾关系法」对台湾ê承诺。今á日中国步步进迫，tī军事、经济、外交等各层面打压台湾。中国可能ē-tàng阻挡台湾领袖参与国际会议，但是in bē-tàng阻挡世界各国领袖a̍h是任何人来访问台湾。伊来到台湾tio̍h是beh传达美国国会跨党派对台湾安全ê支持，帮助台湾上有效ê自我防御。重新确认，台湾、kah所有民主国家ê自由，一定tio̍h受尊重。Phe-lo-si议长来台湾访问mā戳破「台湾是中国ê一部分」chit句世纪ê白贼话。

　　讲tio̍h中国，天to̍h乌一pêng。听tio̍h long-longê声音，原本想讲是beh落大雨teh tân雷公。小khóa- chim-chiok听，才知影是美国联邦众议院议长Phe-lo-si beh来台湾访问，中国四界teh实弹演习，是大炮小铳ê声音beh kā Phe-lo-si议长吓惊tio̍h。Khah chim-chiok听，才听出he是中国大大细细官员teh弹臭屁ê声。

咱深深感谢啥物lóng m̄惊êPhe-lo-si议长来台湾访问！ (220805)

注：习近平　　请念华语