《绿色短评》

 | | | 转寄

英国首相选举政见，soah变作反中言论比赛！

作者 李南衡, ChoânTâijī/全台字 by Chng Hūiphêng 2022.08.07

Choânbîn Tâioânjī pán/全民台湾字版简称ChoânTâiJī

《 Le̍ksek Toánphêng 》　　 Lí Lâmhêng

　　 Engkok siúsiòng soánkí chèngkiàn, soah piàn choh hoán Tiong giânlūn písài!

　　 Engkok inūi Ēīⁿ ( ū ê kokka kiò choh Chiònggīīⁿ) gīoân 54 ūi ( chhiaukòe Ēīⁿ Pósiútóng gīoân chóngsò͘ ê15%), hiòng "1922 Úigoânhōe" siōngsu, í bôkìmiâ hongsek tùi Tóngkhoe choh sìnjīm tâuphiò, kiatkó sī Tóngkhoe Chengsun bô hông sìnjīm, só͘í tio̍h têng soán Tóngkhoe. Tēit lûn Tóngkhoe tâuphiò, múi chi̍t ūi chhamsoánjîn chìchió tio̍h ū 20 ūi Pósiútóng Ēīⁿ gīoân thêmiâ, chhitgoe̍h cha̍psaⁿ thâuchi̍t lûn tâuphiò, tit phiò 30 phiò íhā ê phah tiāu. Tējī lûn khaisí, múi chi̍t lûn tit phiò siōngchió ê tio̍h phah tiāu, chòeāu chhun nn̄gūi, sī goânpún Châichèng Tāisîn Sunakuh (Rishi Sunak) kah goânpún Gōakau Tāisîn Chhoahsuh lúsū (Liz Truss). Tī gīhōe 5 lûn ê tâuphiò tiong, Sunakuh lóng iâⁿ Chhoahsuh 10% chóiū, tānsī chòeāu koattēng sī káugoe̍h chhejī, iû choânthé 16 bānmiâ Pósiútóng tóngoân chi̍t lâng chi̍t phiò í Iûtē tâuphiò hongsek, tit phiò khah chē ê hāusoánjîn tòngsoán sin Tóngkhoe. Inūi Ēīⁿ Pósiútóng sī tosò͘ tóng, só͘í sin chi̍t jīm ê Pósiútóng Tóngkhoe chūjiân tio̍h sī Engkok sin siúsiòng, siáng sī sin siúsiòng, ītēng káugoe̍h chhegō͘ kongpò͘, káugoe̍h chhela̍k chiūjīm.

　　Chit tiongkan ê bînì tiâucha, tiantò sī Chhoahsuh ê siaⁿsè lú lâi lú hó, sīmchì iâⁿkòe Sunakuh lú lâi lú chē. Siōng chúiàu ê goânin sī inūi Pakkiaⁿ tī Sinkiong kah Hiangkáng ê kiôngngē chèngchhek, tùi Tâioân ê uihia̍p, tùi Òchiu hoattōng ê bō͘e̍k chèchhâi, tùi Engkok gīoân ê chèchhâi, kah chiànlông gōakau ê hêngûi, tī Engkok kah chin chē bînchú kokka bînkan kah chèngkài káipiàn liáu tùi Tiongkok ê thāitō͘. 2010 nî chì 2016 nî ê Engkok Khamélóng (David Cameron) siúsiòng sîkî, i só͘ kóng ê,"Engkok sī Tiongkok tī sehong siōng kài hó ê tângphōaⁿ" hitê sîtāi íkeng it khì bô hôethâu ah!

　　Chhoahsuh tī bînì tiâucha khah ū iâⁿbīn, sī inūi i tùi Tiongkok kah Gôlô thāitō͘ chiâⁿ giâmlē. I bat kóng, chūiû sèkài engkai ùi Gôlô ji̍pchhim O͘kheklân tittio̍h kàuhùn, Liânchhiú hia̍pchō͘ Tâioân ētàng chūōe, koh ho͘io̍k chhit tōa kanggia̍p kok chi̍pthoân (G7) hòasin "kengchè Pakiok", tio̍h tùihù Tiongkok uihia̍p, sīmchì chhiàngsiaⁿ tio̍h chèchhâi Tiongkok. I phoephêng Sunakuh tùi Tiongkok loánjio̍k. Kūnî Sunakuh kóng, káisiān Eng Tiong bō͘e̍k koanhē sī Engkok bo̍kchêng siōng iàukín ê, tìsú hông khòaⁿ choh sī tùi Tiong unhôphài.

　　 Káugoe̍h chhejī soánkí chêng, iáu ū kúi tiûⁿ ê tiānsī piānlūn, sianghong lóng līiōng kihōe piàⁿsì choh chòeāu ê chhiongchhì. Chhoahsuh kóng, lán tùi Tiongkok tio̍h chháichhú siōng kiôngngē ê thāitō͘, bôlūn sī kah lán “G7” chi̍pthoân tângphōaⁿ chòhóe kiànli̍p thètāi Tiongkok "ittài itlō͘ " ê hongàn, á.sī bêngkhak chòkàu Tâioân tī bīntùi Tiongkok chhimhoān ê sî ū hoattō͘ chūōe. Khòaⁿ hongsè, Sunakuh tī tiānsī piānlūn ê sî, mā kín hē tāng kiâm, liân "Tiongkok bô engkai pàlêng paukoat Tâioân chāilāi ê kehpiah kok" chit khoán ōe tio̍h hoah chhut chhùi, khókiàn i lōanī tio̍hkip, i koh kóng, Tiongkok sī pún sèkí tùi Engkok kah choânkiû anchoân, hoânêng "siōng tōa ê uihia̍p". I kóng, Engkok ê Κhóngchú ha̍kīⁿ lóng sī Chhoahsuh tamjīm kàuio̍k tāisîn ê sî phoe chún siatli̍p ê, i nā tòngsoán beh kā kénglāi saⁿcha̍p keng Κhóngchú ha̍kīⁿ lóng koaiⁿ tiāu!

　　 Engkok siúsiòng soánkí chèngkiàn , soah piàn choh hoán tiong giânlūn písài, si̍tchāi chin chhùbī! (220729)


Pe̍h-ōe-jī-pán/白话字版

《 Le̍k-sek Toán-phêng 》　　 Lí Lâm-hêng

　　 Eng-kok siú-siòng soán-kí chèng-kiàn, soah piàn choh hoán Tiong giân-lūn pí-sài!

　　 Eng-kok in-ūi Ē-īⁿ ( ū ê kok-ka kiò choh Chiòng-gī-īⁿ) gī-oân 54 ūi ( chhiau-kòe Ē-īⁿ Pó-siú-tóng gī-oân chóng-sò͘ ê15%), hiòng "1922 Úi-goân-hōe" siōng-su, í bô-kì-miâ hong-sek tùi Tóng-khoe choh sìn-jīm tâu-phiò, kiat-kó sī Tóng-khoe Cheng-sun bô hông sìn-jīm, só͘-í tio̍h têng soán Tóng-khoe. Tē-it lûn Tóng-khoe tâu-phiò, múi chi̍t ūi chham-soán-jîn chì-chió tio̍h ū 20 ūi Pó-siú-tóng Ē-īⁿ gī-oân thê-miâ, chhit-goe̍h cha̍p-saⁿ thâu-chi̍t lûn tâu-phiò, tit phiò 30 phiò í-hā ê phah tiāu. Tē-jī lûn khai-sí, múi chi̍t lûn tit phiò siōng-chió-- ê tio̍h phah tiāu, chòe-āu chhun nn̄g-ūi, sī goân-pún Châi-chèng Tāi-sîn Su-nakuh (Rishi Sunak) kah goân-pún Gōa-kau Tāi-sîn Chhoah-suh lú-sū (Liz Truss). Tī gī-hōe 5 lûn ê tâu-phiò tiong, Su-nakuh lóng iâⁿ Chhoah-suh 10% chó-iū, tān-sī chòe-āu koat-tēng sī káu-goe̍h chhe-jī, iû choân-thé 16 bān-miâ Pó-siú-tóng tóng-oân chi̍t lâng chi̍t phiò í Iû-tē tâu-phiò hong-sek, tit phiò khah chē ê hāu-soán-jîn tòng-soán sin Tóng-khoe. In-ūi Ē-īⁿ Pó-siú-tóng sī to-sò͘ tóng, só͘-í sin chi̍t jīm ê Pó-siú-tóng Tóng-khoe chū-jiân tio̍h sī Eng-kok sin siú-siòng, siáng sī sin siú-siòng, ī-tēng káu-goe̍h chhe-gō͘ kong-pò͘, káu-goe̍h chhe-la̍k chiū-jīm.

　　Chit tiong-kan ê bîn-ì tiâu-cha, tian-tò sī Chhoah-suh ê siaⁿ-sè lú lâi lú hó, sīm-chì iâⁿ-kòe Su-nakuh lú lâi lú chē. Siōng chú-iàu ê goân-in sī in-ūi Pak-kiaⁿ tī Sin-kiong kah Hiang-káng ê kiông-ngē chèng-chhek, tùi Tâi-oân ê ui-hia̍p, tùi Ò-chiu hoat-tōng ê bō͘-e̍k chè-chhâi, tùi Eng-kok gī-oân ê chè-chhâi, kah chiàn-lông gōa-kau ê hêng-ûi, tī Eng-kok kah chin chē bîn-chú kok-ka bîn-kan kah chèng-kài kái-piàn liáu tùi Tiong-kok ê thāi-tō͘. 2010 nî chì 2016 nî ê Eng-kok Kha-mé-lóng (David Cameron) siú-siòng sî-kî, i só͘ kóng ê,"Eng-kok sī Tiong-kok tī se-hong siōng kài hó ê tâng-phōaⁿ" hit-ê sî-tāi í-keng it khì bô hôe-thâu ah!

　　Chhoah-suh tī bîn-ì tiâu-cha khah ū iâⁿ-bīn, sī in-ūi i tùi Tiong-kok kah Gô-lô thāi-tō͘ chiâⁿ giâm-lē. I bat kóng, chū-iû sè-kài eng-kai ùi Gô-lô ji̍p-chhim O͘-khek-lân tit-tio̍h kàu-hùn, Liân-chhiú hia̍p-chō͘ Tâi-oân ē-tàng chū-ōe, koh ho͘-io̍k chhit tōa kang-gia̍p kok chi̍p-thoân (G7) hòa-sin "keng-chè Pak-iok", tio̍h tùi-hù Tiong-kok ui-hia̍p, sīm-chì chhiàng-siaⁿ tio̍h chè-chhâi Tiong-kok. I phoe-phêng Su-nakuh tùi Tiong-kok loán-jio̍k. Kū-nî Su-nakuh kóng, kái-siān Eng Tiong bō͘-e̍k koan-hē sī Eng-kok bo̍k-chêng siōng iàu-kín ê, tì-sú hông khòaⁿ choh sī tùi Tiong un-hô-phài.

　　 Káu-goe̍h chhe-jī soán-kí chêng, iáu ū kúi tiûⁿ ê tiān-sī piān-lūn, siang-hong lóng lī-iōng ki-hōe piàⁿ-sì choh chòe-āu ê chhiong-chhì. Chhoah-suh kóng, lán tùi Tiong-kok tio̍h chhái-chhú siōng kiông-ngē ê thāi-tō͘, bô-lūn sī kah lán “G7” chi̍p-thoân tâng-phōaⁿ chò-hóe kiàn-li̍p thè-tāi Tiong-kok "it-tài it-lō͘ " ê hong-àn, á-.sī bêng-khak chò-kàu Tâi-oân tī bīn-tùi Tiong-kok chhim-hoān ê sî ū hoat-tō͘ chū-ōe. Khòaⁿ hong-sè, Su-nakuh tī tiān-sī piān-lūn ê sî, mā kín hē tāng kiâm, liân "Tiong-kok bô eng-kai pà-lêng pau-koat Tâi-oân chāi-lāi ê keh-piah kok" chit khoán ōe tio̍h hoah chhut chhùi, khó-kiàn i lōa-nī tio̍h-kip, i koh kóng, Tiong-kok sī pún sè-kí tùi Eng-kok kah choân-kiû an-choân, hoân-êng "siōng tōa ê ui-hia̍p". I kóng, Eng-kok ê Κhóng-chú ha̍k-īⁿ lóng sī Chhoah-suh tam-jīm kàu-io̍k tāi-sîn ê sî phoe chún siat-li̍p ê, i nā tòng-soán beh kā kéng-lāi saⁿ-cha̍p keng Κhóng-chú ha̍k-īⁿ lóng koaiⁿ tiāu!

　　 Eng-kok siú-siòng soán-kí chèng-kiàn , soah piàn choh hoán tiong giân-lūn pí-sài, si̍t-chāi chin chhù-bī! (220729)




　　英国因为下院（有ê国家叫作众议院）议员54位（超过下院保守党议员总数ê15%），向「1922委员会」上书，以无记名方式对党魁作信任投票，结果是党魁钟孙无hông信任，所以tio̍h重选党魁。第一轮党魁投票，每一位参选人至少tio̍h有20位保守党下院议员提名，七月十三头一轮投票，得票30票以下ê拍掉。第二轮开始，每一轮得票上少ê tio̍h拍掉，最后chhun两位，是原本财政大臣Su-nakuh（Rishi Sunak）kah原本外交大臣Chhuah-suh女士（Liz Truss）。Tī议会5轮ê投票中，Su-nakuhlóng赢Chhuah-suh 10%左右，但是最后决定是九月初二，由全体16万名保守党党员一人一票以邮递投票方式，得票khahchē ê候选人当选新党魁。因为下院保守党是多数党，所以新一任ê保守党党魁自然tio̍h是英国新首相，siáng是新首相，预定九月初五公布，九月初六就任。

　　Chit中间ê民意调查，顚倒是Chhuah-suh ê声势lú来lú好，甚至赢过Su-nakuh lú来lú chē。上主要ê原因是因为北京tī新疆kah香港ê强硬政策、对台湾ê威胁、对澳洲发动ê贸易制裁、对英国议员ê制裁、kah战狼外交ê行为，tī英国kah真chē民主国家民间kah政界改变了对中国ê态度。2010年至2016年ê英国Kha-mé-lóng（David Cameron）首相时期，伊所讲ê：「英国是中国tī西方上kài好ê同伴」hit-ê时代已经一去无回头ah！

　　Chhuah-suh tī民意调查khah有赢面，是因为伊对中国kah俄罗态度诚严厉。伊bat讲，自由世界应该ùi俄罗入侵乌克兰吸取教训，联手协助台湾ē-tàng自卫，koh呼吁七大工业国集团（G7）化身「经济北约」，tio̍h对付中国威胁，甚至唱声tio̍h制裁中国。伊批评Su-nakuh对中国软弱。旧年Su-nakuh讲，改善英中贸易关系是英国目前上要紧ê，致使hông看作是对中温和派。

　　九月初二选举前，犹有几场ê电视辩论，双方lóng利用机会拼势作最后ê冲刺。Chhuah-suh讲，咱对中国tio̍h采取上强硬ê态度，无论是kah咱“G7”集团同伴做伙建立替代中国「一带一路」ê方案，抑是明确做到台湾tī面对中国侵犯ê时有法度自卫。看风势，Su-nakuhtī电视辩论ê时，mā紧下重咸，连「中国无应该霸凌包括台湾在内ê隔壁国」chit款话tio̍h喝出嘴，可见伊lōa-nī tio̍h急．伊koh讲，中国是本世纪对英国kah全球安全、繁荣「上大ê威胁」。伊讲，英国ê孔子学院lóng是Chhuah-suh担任教育大臣ê时批准设立ê，伊若当选beh kā境内三十间孔子学院lóng关掉！

　　英国首相选举政见，soah变作反中言论比赛，实在真趣味！ (220729)