《绿色短评》

 | | | 转寄

台湾音乐家鲍恒毅ê风骨！

作者 李南衡, ChoânTâijī/全台字 by Chng Hūiphêng 2022.07.31

Choânbîn Tâioânjī pán/全民台湾字版简称ChoânTâiJī

《 Le̍ksek Toánphêng 》 Lí Lâmhêng


Tâioân imga̍k ka Pau Hênggē ê hongkut!

Chhitgoe̍h chhechhit àm sinbûn pòtō, kiⁿî Tekkok kah Tiongkok khèngchiok kiànkau 50 chiunî, kok só͘chāi lio̍ksio̍k ē kípān chi̍tkóa kìliām imga̍khōe, Tâioân lú AU chíhui ka Pau Hênggē chòekīn ū chiap tio̍h iauiok i chi̍t tiûⁿ "Tiong Tek kiànkau chiunî kìliām imga̍khōe" ê chíhui, iauchhiáⁿ tanūi kóng kiphiò tòasiok choân pau, koh thiaⁿkóng iánchhut siālé chiâⁿ tōa pau. Pau Hênggē kóng,"góa tongjiân chin kámsiā in ū siūⁿtio̍h góa. Chit kiāⁿ tāichì Tiongkok ê li̍ptiûⁿ tongjiân jīnûi Tâioân ' kāngkhoán’ sekha̍p khèngchiok, tānsī góa sī Tâioân lâng, góa siūⁿ góa bô sekha̍p." Pau Hênggē kóng,"suijiân chit piàn iánchhut ê kokka Tekkok sī góa siōng siūⁿ beh chengchhú ê só͘chāi, tānsī tiantò sī góa che itseng kīchoa̍t kòe siōng kín, kīchoa̍t liáu siōng assari ê chi̍t piàn iauiok. Siūⁿ kàu chia, góa kámsiā ha̍kgia̍p chòeāu chi̍t nî pòaⁿ, góa ê kokka Tâioân/ Tionghôa Bînkok Kàuio̍kpō͘ liûha̍k chióngha̍kkim kā góa ê chaipôe. "Só͘í Pau Hênggē sûisî chin khehkhì kā kīchoa̍t, jîchhiáⁿ chiâⁿ ū hongtō͘ kā iauiok kàisiāu hō͘ i ê lēnggōa chi̍t ūi Tiongkok pêngiú. I kóng,"Chitsìlâng nāsī ū kihōe kiànchèng tio̍h Tâi Tek kiànkau, chúnkóng bô jīmhô pòsiúⁿ, mā hoaⁿhí beh khì tàu poaⁿ íá, tàu giâ phó͘kè, ē tàng hōnghiàn kakī siósió ê khùila̍t."

　　 Kiⁿî saⁿcha̍p hòe ê Pau Hênggē sī phêⁿô͘ lâng,Mákeng kotiong pitgia̍p liáu khó ji̍p Kokli̍p Tāipak Kàuio̍k Tāiha̍k imga̍khē, 2014 nî pitgia̍p, 2016 nî khì Austria Ûṳāla̍p Kokli̍p Imga̍k kah Piáuián Gēsu̍t Tāiha̍k kongtha̍k koánhiânga̍k chíhui kah ha̍p chhiùⁿ chíhui siang se̍ksū. Ū tittio̍h kai tāiha̍k koánhiânga̍k chíhui chòeko iánchàu bûnpêng, bat tī Ûṳāla̍p Jînbîn Koakio̍kīⁿ téng Kio̍kīⁿ tamjīm chō͘lí chíhui. 2019 nî cha̍pjīgoe̍h cha̍pgō͘, tī Pholân chhamka tē 8 kài "Towards Polyphony" kokchè ha̍pchhiùⁿ chíhui tōasài, i chi̍t hēchhiú tittio̍h thâuchióng, Siōnghó Monteverdi Chhoansekchióng, Siōnghó Hiāntāi Imga̍k Chhoansekchióng íki̍p Siōnghó Pholân Chokphín Chhoansekchióng téng kúi hāng tōachióng. Suijiân i kokchek chùbêng "Tâioân/Austria", tānsī chúpān tanūi koaⁿhong bīnchheh tah tô͘ piausī "Tâioân lâi ê Pau Hênggē". Hit nî saⁿgoe̍h i tī Slovenia ê Aegis Carminis Kokchè Ha̍pchhiùⁿ Chíhui Tōasài tittio̍h tē 2 miâ, Siōnghó Slovenia Chokphín Chhoansek chióng, kâng nî chhitgoe̍h, i tī Romania tittio̍h tē 2 kài Bucharest Imga̍k Ha̍kīⁿ Kokchè Chíhui Tōasài Te̍kpia̍t chióng. 2019 nî ēsái kóng sī Pau Hênggē tōa hongsiu ê chi̍t nî. 2021 nî saⁿgoe̍h cha̍pit chì cha̍psì, siū iauchhiáⁿ khì Slovenia tamjīm Kokchè Chhengliân Imga̍kcheh kah sái sū chùcheh kángsu.

　　Pau Hênggē suijiân kheh ku háigōa, tānsī i bô kā kò͘hiong Tâioân pàng bē kìtit. Kūnî (2021) cha̍pitgoe̍h jīcha̍p, Pau Hênggē í Khehsek Chíhui sinhūn kah Tāipak Seklāi Ha̍pchhiùⁿthoân, tī Kokka Iánchàuthiaⁿ kiōngtông oânsêng 《 Si kah Koa ê Tongtāi Hôehiáng 》Imga̍khōe, che sī iû chhit pō͘ í tongtāi Tâioân sijîn sichoh phó͘khek ê tongtāi ha̍pchhiùⁿ chokphín. Kiⁿî pehgoe̍h jīpeh chì saⁿcha̍p it, Pau Hênggē ē tī Kohiông Ūibúiâⁿ Kokka Gēsu̍t Bûnhòa Tiongsim Imga̍kthiaⁿ, kah Tāipak Seklāi Ha̍pchhiùⁿthoân piáuián 《 Hoathiān ・ American》 imga̍khōe.

Tâioân ē tàng ū Pau Hênggē chiahni̍h kia̍tchhut, chiahni̍h ū hongkut ê imga̍kka, lán Tâioân lâng si̍tchāi chin hoaⁿhí! 　　(220722)


Pe̍h-ōe-jī-pán/白话字版


《 Le̍k-sek Toán-phêng 》 Lí Lâm-hêng


Tâi-oân im-ga̍k -ka Pau Hêng-gē ê hong-kut!

Chhit-goe̍h chhe-chhit àm sin-bûn pò-tō, kin-nî Tek-kok kah Tiong-kok khèng-chiok kiàn-kau 50 chiu-nî, kok só͘-chāi lio̍k-sio̍k ē kí-pān chi̍t-kóa kì-liām im-ga̍k-hōe, Tâi-oân lú AU chí-hui -ka Pau Hêng-gē chòe-kīn ū chiap tio̍h iau-iok i chi̍t tiûⁿ "Tiong Tek kiàn-kau chiu-nî kì-liām im-ga̍k-hōe" ê chí-hui, iau-chhiáⁿ tan-ūi kóng ki-phiò tòa-siok choân pau, koh thiaⁿ-kóng ián-chhut siā-lé chiâⁿ tōa pau. Pau Hêng-gē kóng,"góa tong-jiân chin kám-siā in ū siūⁿ-tio̍h góa. Chit kiāⁿ tāi-chì Tiong-kok ê li̍p-tiûⁿ tong-jiân jīn-ûi Tâi-oân ' kāng-khoán’ sek-ha̍p khèng-chiok, tān-sī góa sī Tâi-oân lâng, góa siūⁿ góa bô sek-ha̍p." Pau Hêng-gē kóng,"sui-jiân chit piàn ián-chhut ê kok-ka Tek-kok sī góa siōng siūⁿ beh cheng-chhú ê só͘-chāi, tān-sī tian-tò sī góa che it-seng kī-choa̍t kòe siōng kín, kī-choa̍t liáu siōng assari ê chi̍t piàn iau-iok. Siūⁿ kàu chia, góa kám-siā ha̍k-gia̍p chòe-āu chi̍t nî pòaⁿ, góa ê kok-ka Tâi-oân/ Tiong-hôa Bîn-kok Kàu-io̍k-pō͘ liû-ha̍k chióng-ha̍k-kim kā góa ê chai-pôe. "Só͘-í Pau Hêng-gē sûi-sî chin kheh-khì kā kī-choa̍t, jî-chhiáⁿ chiâⁿ ū hong-tō͘ kā iau-iok kài-siāu hō͘ i ê lēng-gōa chi̍t ūi Tiong-kok pêng-iú. I kóng,"Chit-sì-lâng nā-sī ū ki-hōe kiàn-chèng tio̍h Tâi Tek kiàn-kau, chún-kóng bô jīm-hô pò-siúⁿ, mā hoaⁿ-hí beh khì tàu poaⁿ í-á, tàu giâ phó͘-kè, ē tàng hōng-hiàn ka-kī sió-sió ê khùi-la̍t."

　　 Kin-nî saⁿ-cha̍p hòe ê Pau Hêng-gē sī phêⁿ-ô͘ lâng,Má-keng ko-tiong pit-gia̍p liáu khó ji̍p Kok-li̍p Tāi-pak Kàu-io̍k Tāi-ha̍k im-ga̍k-hē, 2014 nî pit-gia̍p, 2016 nî khì Austria Ûi-iā-la̍p Kok-li̍p Im-ga̍k kah Piáu-ián Gē-su̍t Tāi-ha̍k kong-tha̍k koán-hiân-ga̍k chí-hui kah ha̍p chhiùⁿ chí-hui siang se̍k-sū. Ū tit-tio̍h kai tāi-ha̍k koán-hiân-ga̍k chí-hui chòe-ko ián-chàu bûn-pêng, bat tī Ûi-iā-la̍p Jîn-bîn Koa-kio̍k-īⁿ téng Kio̍k-īⁿ tam-jīm chō͘-lí chí-hui. 2019 nî cha̍p-jī-goe̍h cha̍p-gō͘, tī Pho-lân chham-ka tē 8 kài "Towards Polyphony" kok-chè ha̍p-chhiùⁿ chí-hui tōa-sài, i chi̍t hē-chhiú tit-tio̍h thâu-chióng, Siōng-hó Monteverdi Chhoan-sek-chióng, Siōng-hó Hiān-tāi Im-ga̍k Chhoan-sek-chióng í-ki̍p Siōng-hó Pho-lân Chok-phín Chhoan-sek-chióng téng kúi hāng tōa-chióng. Sui-jiân i kok-chek chù-bêng "Tâi-oân/Austria", tān-sī chú-pān tan-ūi koaⁿ-hong bīn-chheh tah tô͘ piau-sī "Tâi-oân lâi ê Pau Hêng-gē". Hit nî saⁿ-goe̍h i tī Slovenia ê Aegis Carminis Kok-chè Ha̍p-chhiùⁿ Chí-hui Tōa-sài tit-tio̍h tē 2 miâ, Siōng-hó Slovenia Chok-phín Chhoan-sek- chióng, kâng nî chhit-goe̍h, i tī Romania tit-tio̍h tē 2 kài Bucharest Im-ga̍k Ha̍k-īⁿ Kok-chè Chí-hui Tōa-sài Te̍k-pia̍t- chióng. 2019 nî ē-sái kóng sī Pau Hêng-gē tōa hong-siu ê chi̍t nî. 2021 nî saⁿ-goe̍h cha̍p-it chì cha̍p-sì, siū iau-chhiáⁿ khì Slovenia tam-jīm Kok-chè Chheng-liân Im-ga̍k-cheh kah sái- sū chù-cheh káng-su.

　　Pau Hêng-gē sui-jiân kheh ku hái-gōa, tān-sī i bô kā kò͘-hiong Tâi-oân pàng bē kì-tit. Kū-nî (2021) cha̍p-it-goe̍h jī-cha̍p, Pau Hêng-gē í Kheh-sek Chí-hui sin-hūn kah Tāi-pak Sek-lāi Ha̍p-chhiùⁿ-thoân, tī Kok-ka Ián-chàu-thiaⁿ kiōng-tông oân-sêng 《 Si kah Koa ê Tong-tāi Hôe-hiáng 》Im-ga̍k-hōe, che sī iû chhit pō͘ í tong-tāi Tâi-oân si-jîn si-choh phó͘-khek ê tong-tāi ha̍p-chhiùⁿ chok-phín. Kin-nî peh-goe̍h jī-peh chì saⁿ-cha̍p it, Pau Hêng-gē ē tī Ko-hiông Ūi-bú-iâⁿ Kok-ka Gē-su̍t Bûn-hòa Tiong-sim Im-ga̍k-thiaⁿ, kah Tāi-pak Sek-lāi Ha̍p-chhiùⁿ-thoân piáu-ián 《 Hoat-hiān ・ American》 im-ga̍k-hōe.

Tâi-oân ē tàng ū Pau Hêng-gē chiah-ni̍h kia̍t-chhut, chiah-ni̍h ū hong-kut ê im-ga̍k-ka, lán Tâi-oân lâng si̍t-chāi chin hoaⁿ-hí! 　　(220722)



七月初七暗新闻报导，今年德国kah中国庆祝建交50周年，各所在陆续会举办一寡纪念音乐会，台湾旅欧指挥家鲍恒毅最近有接tio̍h邀约伊一场「中德建交周年纪念音乐会」ê指挥，邀请单位讲机票住宿（tòa-siok）全包，koh听讲演出谢礼chiâⁿ大包。鲍恒毅讲：「我当然真感谢in有想tio̍h我。Chit件tāi-chì中国ê立场当然认为台湾『仝款』适合庆祝，但是我是台湾人，我想我不适合。」鲍恒毅讲，「虽然chit遍演出ê国家德国是我上想beh争取ê所在，但是顚倒是我che一生拒绝过上紧、拒绝了上assari（阿沙力）ê一遍邀约。想到chia，我感谢学业最后一年半，我ê国家台湾／中华民国教育部留学奖学金kā我ê栽培。」所以鲍恒毅随时真客气kā拒绝，而且chiâⁿ有风度kā邀约介绍hō͘伊ê另外一位中国朋友。伊讲，「Chit世人若是有机会见证tio̍h台德建交，准讲无任何报偿，mā 欢喜beh去斗搬椅á、斗夯谱架，会tàng奉献家己小小ê气力。」

　　今年三十岁ê鲍恒毅是澎湖人，马公（Má-keng）高中毕业了考入国立台北教育大学音乐系，2014年毕业，2016年去奥地利维也纳国立音乐kah表演艺术大学攻读管弦乐指挥kah合唱指挥双硕士。有得tio̍h该大学管弦乐指挥最高演奏文凭，bat tī维也纳人民歌剧院等剧院担任助理指挥。2019年十二月十五，tī波兰参加第8届「Towards Polyphony」国际合唱指挥大赛，伊一下手得tio̍h头奖、最佳蒙台威尔第诠释奖、最佳现代音乐诠释奖以及最佳波兰作品诠释奖等几项大奖。虽然伊国籍注明「台湾∕奥地利」，但是主办单位官方面册贴图标示「台湾来ê鲍恒毅」。Hit年三月伊tīSlovenia ê Aegis carminis国际合唱指挥大赛得tio̍h第2名、最佳Slovenia作品诠释奖，仝年七月，伊tīRomania得tio̍h第2届布加勒斯特（Bucharest）音乐学院国际指挥大赛特别奖。2019年ē-sái讲是鲍恒毅大丰收ê一年。2021年三月十一至十四，受邀请去Slovenia担任国际青年音乐节kah赛事驻节讲师。

　　鲍恒毅虽然客居海外，但是伊无kā故乡台湾放bē记得。旧年（2021）十一月二十，鲍恒毅以客席指挥身分kah台北室内合唱团，tī国家演奏厅共同完成《诗kah歌ê当代回响》音乐会，che是由七部以当代台湾诗人诗作谱曲ê当代合唱作品。今年八月二八至三十一，鲍恒毅会tī高雄卫武营国家艺术文化中心音乐厅，kah台北室内合唱团表演《发现・亚美利坚》音乐会。

台湾会tàng有鲍恒毅chiah-nih杰出、chiah-nih有风骨ê音乐家，咱台湾人实在真欢喜！　　(220722)