《绿色短评》

 | | | 转寄

涉嫌诈领助理费，真正有志一同？

作者 李南衡, ChoânTâijī/全台字 by Chng Hūiphêng 2021.03.07

Choânbîn Tâioânjī pán/全民台湾字版简称ChoânTâiJī

　　　 Sia̍phiâm chàniá chō͘lí hùi, chinchiàⁿ iúchì ittông?

　　 Sintóng Tâipakchhī gīoân Phoaⁿ Hoâichong kah i ê pānkongsek Tân chújīm, sia̍phiâm chàniá chō͘lí hùi, kengkòe tn̂gkî chengpān, kiⁿî itgoe̍h jīla̍k iû Chújīm kiámchhatkoaⁿ Tân Bênghong, kiámchhatkoaⁿ Lîm Sūsûn chíhui Tâipakchhī Tiâuchachhù téng, chiphêng chhiauchhōe la̍kê só͘chāi jîchhiáⁿ khàuah siongkoan chèngkì, hoathiān Phoaⁿ, Tân nn̄g lâng līiōng lângthâu chàniá chō͘lí hùi lâu chò suēng, chho͘pō͘ kó͘sǹg chàniá kimgia̍h sintâipè 300 bān, sìn āu jīnûi nn̄g lâng ū ianbia̍t chèngkì kah kauchhoàn ê khólêng, nn̄g lâng siaⁿah kìm kìⁿ. Sūlîm Tēkiámsú chíchhut, Phoaⁿ Tân nn̄g lâng ùi 2008 nî kàu 2020 nî, chêngāu ēng lângthâu chàniá pó͘chō͘ hùi. Tānsī tējī kang chhâitēng Phoaⁿ Hoâichong 200 bān kaupó, Tân chújīm 150 bān kaupó, nn̄g lâng hānchè kuchū, chhutkéng chhut hái.

Siōng hóchhiò ê sī pêⁿpêⁿ Sintóng ê chhīgīoân Lí Khènggoân, i jīnûi Phoaⁿ Hoâichong chò tāichì únkiān pósiú, mā m̄sī thamchâi ê lâng, jîchhiáⁿ i ū chin chē hùgia̍p siuji̍p, chiàu siônglí lâi khòaⁿ i bē ūitio̍h chi̍t kò goe̍h nn̄gbān gōa kho͘ khì hoānhoat, siôngchêng engkai ū suiàu koh lîchheng.

Lán ná ē kóng Lí Khènggoân chhīgīoân hóchhiò, i káⁿ chinchiàⁿ m̄chaiiáⁿ "chiàu siônglí lâi khòaⁿ", ài chîⁿ ê lâng bô hun hógia̍h, sànchhiah. Siáng kóng hógia̍h lâng tio̍h bē tham sètiâu chîⁿ, sànchhiah lâng khòaⁿtio̍h chîⁿ chhiú ittēng tio̍h ē ngiau? Khah chhùbī ê sī, thamchâi ê lâng tóngphài bô hun nâ le̍k o͘pe̍h, tētiám bô hun tang, sai, lâm, pak, kimgia̍h bô hun tōatiâu sètiâu. Lán kanta khòaⁿ chòekīn chin chē sia̍phiâm chàniá chō͘lí hùi chit hāng tio̍h chiok chhengchhó.

　　 Kiⁿî it・goe̍h, Tiongkok Kokbîntóng Sinpakchhī gīoân Chan Hoànka, hông khòngkò ùi 2016 nî khí chàniá chō͘lí hùi nn̄gpah gōa bān, Sinpak Tēhng Hoatīⁿ hoatkoaⁿ jīnûi Chan Hoànka sia̍phoān Thamu tīchōe tiâulē kah hênghoat hō͘ kongbūoân tengchài putsi̍t chōehiâm, hoān tāngchōe koh ū chhoànchèng ê khólêng, chhâitēng kiah kìm kìⁿ. Phêⁿô͘ koān chêng bînchèngchhù tiúⁿ bôtóngchek Chiâⁿ Bānkǹg, hông khòngkò tamjīm nn̄g kài koāngīoân kîkan, sia̍phiâm ēng lângthâu pò chō͘lí hùi kiōng 829 bān kho͘, hō͘ Phêⁿô͘ Tēīⁿ í Thamu tīchōe tiâulē phòaⁿ chhú tô͘hêng cha̍pjī nî, Kohiông koân punīⁿ kiah móa saⁿ kògoe̍h liáuāu, chhâitēng kohchài iânah nn̄g kò goe̍h, i tio̍h tī lôngákeng kòenî. Tiongkok Kokbîntóng Sintek koāngīoân Tân Phekûi hông khòngkò ùi 2012 nî kàu 2017 nî chàniá chō͘lí hùi 191 bān gōa, tāng phòaⁿ saⁿ nî la̍k kògoe̍h. Bînchìntóng Sinpakchhī la̍k liânpà gīoân Ko Bínhūi sia̍phiâm chàniá chō͘lí hùi hông khísò͘, Sinpak tēīⁿ ha̍pgītêng í 600 bān kho͘ kaupó, hānchè chūku, chhutkéng chhuthái. Tiongkok Kokbîntóng Tâilâm chhīgīoân Lí Tionggîm sia̍phiâm chàniá chō͘lí hùi hō͘ kiámhong tī 2020 nî cha̍pjīgoe̍h chhe chengpān kaupó, cha̍pjīgoe̍h tiong, Tâilâm chhīgīhōe koh ū chi̍t miâ Tiongkok Kokbîntóng gīoân Chhòa Io̍khui mā sia̍phiâm chàniá chō͘lí hùi í peh bān kho͘ kaupó. Tàutàu chi̍tē 2020 nî Tâilâm chhīgīhōe íkeng ū gō͘ miâ hiānjīm gīoân kah chi̍t miâ siàjīm gīoân, lóng chóng la̍kê lâng inūi sia̍phiâm chàniá chō͘lí hùi hō͘ kiámtiàu tanūi chengpān. Tiongkok Kokbîntóng Tâitang koān gīoân Lîm Uichì sia̍phiâm chàniá chō͘lí hùi 56 bān kho͘, Tâitang tēkiámsú cha̍pjīgoe̍h té chengkiat khísò͘, kā chāiah ê Lîm Uichì îsàng Tâitang tēhng hoatīⁿ, hoatkoaⁿ têngsím āu, chhâitēng í 80 bān kaupó, pēng hānchè chūku kah tēngkî hiòng phàichhutsó͘ pòtò.

Tâioân kok chèngtóng chin chē ìkiàn bē ha̍p. Kîkoài, kanta chàniá chō͘lí hùi chit hāng, iúchì ittông! (210226)


Pe̍h-ōe-jī-pán/白话字版


　　　Sia̍p-hiâm chà-niá chō͘-lí hùi, chin-chiàⁿ iú-chì it-tông?

　　 Sin-tóng Tâi-pak-chhī gī-oân Phoaⁿ Hoâi-chong kah i ê pān-kong-sek Tân chú-jīm, sia̍p-hiâm chà-niá chō͘-lí hùi, keng-kòe tn̂g-kî cheng-pān, kin-nî it-goe̍h jī-la̍k iû Chú-jīm kiám-chhat-koaⁿ Tân Bêng-hong, kiám-chhat-koaⁿ Lîm Sū-sûn chí-hui Tâi-pak-chhī Tiâu-cha-chhù téng, chip-hêng chhiau-chhōe la̍k-ê só͘-chāi jî-chhiáⁿ khàu-ah siong-koan chèng-kì, hoat-hiān Phoaⁿ, Tân nn̄g lâng lī-iōng lâng-thâu chà-niá chō͘-lí hùi lâu chò su-ēng, chho͘-pō͘ kó͘-sǹg chà-niá kim-gia̍h sin-tâi-pè 300 bān, sìn āu jīn-ûi nn̄g lâng ū ian-bia̍t chèng-kì kah kau-chhoàn ê khó-lêng, nn̄g lâng siaⁿ-ah kìm kìⁿ. Sū-lîm Tē-kiám-sú chí-chhut, Phoaⁿ Tân nn̄g lâng ùi 2008 nî kàu 2020 nî, chêng-āu ēng lâng-thâu chà-niá pó͘-chō͘ hùi. Tān-sī tē-jī kang chhâi-tēng Phoaⁿ Hoâi-chong 200 bān kau-pó, Tân chú-jīm 150 bān kau-pó, nn̄g lâng hān-chè ku-chū, chhut-kéng chhut hái.

Siōng hó-chhiò ê sī pêⁿ-pêⁿ Sin-tóng ê chhī-gī-oân Lí Khèng-goân, i jīn-ûi Phoaⁿ Hoâi-chong chò tāi-chì ún-kiān pó-siú, mā m̄-sī tham-châi ê lâng, jî-chhiáⁿ i ū chin chē hù-gia̍p siu-ji̍p, chiàu siông-lí lâi khòaⁿ i bē ūi-tio̍h chi̍t kò goe̍h nn̄g-bān gōa kho͘ khì hoān-hoat, siông-chêng eng-kai ū su-iàu koh lî-chheng.

Lán ná ē kóng Lí Khèng-goân chhī-gī-oân hó-chhiò, i káⁿ chin-chiàⁿ m̄-chai-iáⁿ "chiàu siông-lí lâi khòaⁿ", ài chîⁿ ê lâng bô hun hó-gia̍h, sàn-chhiah. Siáng kóng hó-gia̍h lâng tio̍h bē tham sè-tiâu chîⁿ, sàn-chhiah lâng khòaⁿ-tio̍h chîⁿ chhiú it-tēng tio̍h ē ngiau? Khah chhù-bī ê sī, tham-châi ê lâng tóng-phài bô hun nâ le̍k o͘-pe̍h, tē-tiám bô hun tang, sai, lâm, pak, kim-gia̍h bô hun tōa-tiâu sè-tiâu. Lán kan-ta khòaⁿ chòe-kīn chin chē sia̍p-hiâm chà-niá chō͘-lí hùi chit hāng tio̍h chiok chheng-chhó.

　　 Kin-nî it-・goe̍h, Tiong-kok Kok-bîn-tóng Sin-pak-chhī gī-oân Chan Hoàn-ka, hông khòng-kò ùi 2016 nî khí chà-niá chō͘-lí hùi nn̄g-pah gōa bān, Sin-pak Tē-hng Hoat-īⁿ hoat-koaⁿ jīn-ûi Chan Hoàn-ka sia̍p-hoān Tham-u tī-chōe tiâu-lē kah hêng-hoat hō͘ kong-bū-oân teng-chài put-si̍t chōe-hiâm, hoān tāng-chōe koh ū chhoàn-chèng ê khó-lêng, chhâi-tēng ki-ah kìm kìⁿ. Phêⁿ-ô͘ koān chêng bîn-chèng-chhù tiúⁿ bô-tóng-chek Chiâⁿ Bān-kǹg, hông khòng-kò tam-jīm nn̄g kài koān-gī-oân kî-kan, sia̍p-hiâm ēng lâng-thâu pò chō͘-lí hùi kiōng 829 bān kho͘, hō͘ Phêⁿ-ô͘ Tē-īⁿ í Tham-u tī-chōe tiâu-lē phòaⁿ chhú tô͘-hêng cha̍p-jī nî, Ko-hiông koân pun-īⁿ ki-ah móa saⁿ kò-goe̍h liáu-āu, chhâi-tēng koh-chài iân-ah nn̄g kò goe̍h, i tio̍h tī lông-á-keng kòe-nî. Tiong-kok Kok-bîn-tóng Sin-tek koān-gī-oân Tân Phek-ûi hông khòng-kò ùi 2012 nî kàu 2017 nî chà-niá chō͘-lí hùi 191 bān gōa, tāng phòaⁿ saⁿ nî la̍k kò-goe̍h. Bîn-chìn-tóng Sin-pak-chhī la̍k liân-pà gī-oân Ko Bín-hūi sia̍p-hiâm chà-niá chō͘-lí hùi hông khí-sò͘, Sin-pak tē-īⁿ ha̍p-gī-têng í 600 bān kho͘ kau-pó, hān-chè chū-ku, chhut-kéng chhut-hái. Tiong-kok Kok-bîn-tóng Tâi-lâm chhī-gī-oân Lí Tiong-gîm sia̍p-hiâm chà-niá chō͘-lí hùi hō͘ kiám-hong tī 2020 nî cha̍p-jī-goe̍h chhe cheng-pān kau-pó, cha̍p-jī-goe̍h tiong, Tâi-lâm chhī-gī-hōe koh ū chi̍t miâ Tiong-kok Kok-bîn-tóng gī-oân Chhòa Io̍k-hui mā sia̍p-hiâm chà-niá chō͘-lí hùi í peh bān kho͘ kau-pó. Tàu-tàu chi̍t-ē 2020 nî Tâi-lâm chhī-gī-hōe í-keng ū gō͘ miâ hiān-jīm gī-oân kah chi̍t miâ sià-jīm gī-oân, lóng chóng la̍k-ê lâng in-ūi sia̍p-hiâm chà-niá chō͘-lí hùi hō͘ kiám-tiàu tan-ūi cheng-pān. Tiong-kok Kok-bîn-tóng Tâi-tang koān gī-oân Lîm Ui-chì sia̍p-hiâm chà-niá chō͘-lí hùi 56 bān kho͘, Tâi-tang tē-kiám-sú cha̍p-jī-goe̍h té cheng-kiat khí-sò͘, kā chāi-ah ê Lîm Ui-chì î-sàng Tâi-tang tē-hng hoat-īⁿ, hoat-koaⁿ têng-sím āu, chhâi-tēng í 80 bān kau-pó, pēng hān-chè chū-ku kah tēng-kî hiòng phài-chhut-só͘ pò-tò.

Tâi-oân kok chèng-tóng chin chē ì-kiàn bē ha̍p. Kî-koài, kan-ta chà-niá chō͘-lí hùi chit hāng, iú-chì it-tông! (210226)


　　　　涉嫌诈领助理费，真正有志一同？

　　新党台北市议员潘怀宗kah伊ê办公室陈主任，涉嫌诈领助理费，经过长期侦办，今年一月二六由主任检察官陈铭锋、检察官林士淳指挥台北市调查处等，执行搜揣六个所在而且扣押相关证据，发现潘、陈两人利用人头诈领助理费留做私用，初步估算诈领金额新台币300万，讯后认为两人有湮灭证据kah勾串ê可能，两人声押禁见。士林地检署指出，潘陈两人ùi 2008年到2020年，前后用人头诈领补助费。但是第二工裁定潘怀宗200万交保、陈主任150万交保，两人限制居住、出境出海。

上好笑ê是平平新党ê市议员李庆元，伊认为潘怀宗做代志稳健保守、mā m̄是贪财ê人，而且伊有真济副业收入，照常理来看伊bē为tio̍h一个月两万外kho͘ 去犯法，详情应该有需要koh厘清。

咱那会讲李庆元市议员好笑，伊敢真正m̄知影「照常理来看」，爱钱ê人无分好额、散赤。Siáng讲好额人tio̍h bē贪细条钱，散赤人看tio̍h钱手一定tio̍h会ngiau？Khah趣味ê是，贪财ê人党派无分蓝绿乌白，地点无分东西南北，金额无分大条细条。咱kan-ta看最近真济涉嫌诈领助理费chit项tio̍h足清楚。

　　今年一月，中国国民党新北市议员曾焕嘉，hông控告ùi 2016年起诈领助理费两百外万，新北地方法院法官认为曾焕嘉涉犯贪污治罪条例kah刑法hō͘公务员登载不实罪嫌，犯重罪koh有串证ê可能，裁定羁押禁见。澎湖县前民政处长无党籍成万贯，hông控告担任两届县议员期间，涉嫌用人头报助理费共829万元，hō͘澎湖地院依贪污治罪条例判处徒刑十二年，高雄高分院羁押满三个月了后，裁定koh再延押两个月，伊tio̍htī廊仔间过年。中国国民党新竹县议员陈栢维hông控告ùi 2012年到2017年诈领助理费191万外，重判三年六个月。民进党新北市六连霸议员高敏慧涉嫌诈领助理费hông起诉，新北地院合议庭以600万元交保，限制住居、出境出海。中国国民党台南市议员李中岑涉嫌诈领助理费hō͘检方tī 2020年十二月初侦办交保，十二月中，台南市议会koh有一名中国国民党议员蔡育辉mā涉嫌诈领助理费以八万元交保。斗斗一下2020年台南市议会已经有五名现任议员kah一名卸任议员，lóng总六个人因为涉嫌诈领助理费hō͘检调单位侦办。中国国民党台东县议员林威志涉嫌诈领助理费56万元，台东地检署十二月底侦结起诉，kā在押ê林威志移送台东地方法院，法官庭审后，裁定以80万交保，并限制住居kah定期向派出所报到。

台湾各政党真济意见bē合。奇怪，kan-ta诈领助理费chit项，有志一同！ (210226)