《绿色短评》

 | | | 转寄

中国军机明明tio̍h是来乱ê！

作者 李南衡, ChoânTâijī/全台字 by Chng Hūiphêng 2021.02.28

Choânbîn Tâioânjī pán/全民台湾字版简称ChoânTâiJī

Tiongkok kunki bêngbêng tio̍h sī lâi loān・ê!

Tiongkok kunki lâi jiáuloān lán kok ê hângkhong sekpia̍t khu íkeng chiâⁿ choh ji̍tsiông sengoa̍h ê chi̍tpō͘hūn, kòe nî chêng nn̄g kang ê jīgoe̍h chhekáu, chhecha̍p Tiongkok kunki bô lâi jiáuloān. Ū lâng siūⁿkóng sī Tiongkok khongkun chúnpī beh hóhó kòenî, bô gîgō͘ kūle̍k kòenî hit kang tiongtàu koh lâi loān, ū lâng iô thâu kóng :"chhùi kóng ”两岸一家亲 ”, khiok liân kòenî ji̍t to lâi loān, bô beh hō͘ lán ê khongkun kiānjî hóhó chia̍h chi̍t tǹg thoânîⁿpn̄g. Si̍tchāi chin khóò͘ⁿ !"Tiongkok kunki kòenî ji̍t tiongtàu cha̍pjī tiám saⁿcha̍psì hun chìnji̍p lán kok ê ADIZ ( sai lâm khonge̍k) , koântō͘ 2,000 kongchhioh, lán khongkun tī khongtiong kàmkhòng jîchhiáⁿ kóngpò͘ kā in kóaⁿcháu; kāng chi̍tê sîkan, lēnggōa ū chi̍t tâi Tiongkok khongkun 500 ūkéngki tī hôngkhong sekpia̍t khu gōa teh chìnhêng kéngkài.

Kantaⁿ kūle̍k sinchiaⁿ hioh chi̍t kang. Chhejī thàuchá káu tiám, chi̍t tâi Tiongkok ūn 8 hoánchiâmki kah chi̍t tâi ūn 8 kisu̍t chengchhatki tio̍h chìnji̍p lán sai lâm khonge̍k, koântō͘ 4,000 kongchhioh. Ū lâng khì kah tōasiaⁿ mē kóng, Chia m̄ sī lín gōake, bián lâi chòkheh! Koh ū lâng mē kóng, khuichhun chhejī tio̍h lâi jiáuloān pa̍t lâng, lín ē soe kui nî! chhesaⁿ chákhí cha̍pit tiám sìcha̍p pun, Tiongkok kunki chìnji̍p lán kok sai lâm khonge̍k, koântō͘ 2,100 kongchhioh, Chit nn̄g kang, lán khongkun lóng ū tī khongtiong kàmkhòng jîchhiáⁿ kóngpò͘ kā in kóaⁿcháu.

　　 Sinchiaⁿ chhesì, lán Tâioân lâng tī chit kang ngiâ châisîn, lán ngiâ châisîn kah in Tiongkok khongkun siáⁿtītāi? Thàuchá káu tiám, Tiongkok chi̍t tâi kunki Ūn̍ hoánchiâmki tio̍h chìnji̍p lán kok sai lâm khonge̍k hôngkhong sekpia̍t khu. Lán tûliáu ēng hôngkhong huitôaⁿ tuichong kàmkhòng ígōa, mā phài khongtiong sûnlô pengla̍t èngtùi, jîchhiáⁿ kóngpò͘ kā in kóaⁿcháu kóng,"Tionghôa Bînkok khongkun kóngpò͘, tī Tâioân sai lâm khonge̍k koântō͘ 3,000 kongchhioh ê Τiongkiōng kunki chùì! lí í chìnji̍p goán khonge̍k, énghióng goán poehâng anchoân, sûisî hôechóan līkhui!"

　　 Chhegō͘ kehkhui chákhí, Tiongkok chi̍t tâi "Ū8" hoánchiâmki ùi Tâioân háikiap tiong sòaⁿ ílâm chìnji̍p lán kok hôngkhong sekpia̍t khu, khongkun ū phài khongtiong sûnlô pengla̍t èngtùi, jîchhiáⁿ ēng kóngpò͘ kā in kóaⁿcháu.

Jīgoe̍h cha̍pchhit kūle̍k chhela̍k chákhí, Tiongkok nn̄g tâi "Ū8" kisu̍t chengchhatki chìnji̍p lán kok sai lâm khonge̍k hôngkhong sekpia̍t khu. Jīgoe̍h cha̍ppeh ēpo͘, Tiongkok chi̍t tâi" Ū8" kisu̍t chengchhatki chìnji̍p lán kok sai lâm khonge̍k hôngkhong sekpia̍t khu. Chiàu koànlē, lán lóng ū phài kunki èngtùi, hôngkhong huitôaⁿ kàmkhòng, kóngpò͘ kah in kóaⁿcháu.

　　 Kinkì Kokhôngpō͘ ê thóngkè, kūnî 2020 nî chi̍t nî saⁿpah la̍kcha̍pgō͘ kang, Tiongkok kunki chiapsio̍k bô thêng lâi jiáuloān lán kok sai lâm khonge̍k, ū 380 gōa tâi pái; chhaputto ta̍k kang to̍h ū chi̍t tâi Tiongkok kunki lâi pòtò. Kiⁿî itgoe̍h saⁿcha̍p it kang, Tiongkok kunki lâi loān lán sai lâm khonge̍k ū jīcha̍p chhit kang.

Lán chaiiáⁿ, Tiongkok kunki sī chìnji̍p lán kok ê sai lâm khonge̍k hôngkhong sekpia̍t khu, pēng m̄ sī léngkhong, Tiongkok kunki tongjiân mā chaiiáⁿ, lán bētàng khui chhèng tāngbú , kantaⁿ ē tàng ēng kóaⁿ ê. Chhiūⁿkóng kūnî 2020 nî la̍kgoe̍h jīsì pòaⁿmê, nn̄g tâi Gôlô hoánchiâmki IL38 poeji̍p Bíkok Alaska hôngkhong sekpia̍t khu, Bíkok mā sī kantaⁿ ē tàng kóaⁿkín chhut tāng F22 chiàntàuki khì kā in kóaⁿcháu niāniā.

　　 Tiongkok kunki itti̍t poelâi lán ê hôngkhong sekpia̍t khu, tongjiân m̄ sī lâi "kiâⁿchhun", sī lâi loān ê. （210219）
Chù, 两岸一家亲　 chhiáⁿ liām Hôagí


Pe̍h-ōe-jī-pán/白话字版

Tiong-kok kun-ki bêng-bêng tio̍h sī lâi loān-・ê!

Tiong-kok kun-ki lâi jiáu-loān lán kok ê hâng-khong sek-pia̍t khu í-keng chiâⁿ choh ji̍t-siông seng-oa̍h ê chi̍t-pō͘-hūn, kòe nî chêng nn̄g kang ê jī-goe̍h chhe-káu, chhe-cha̍p Tiong-kok kun-ki bô lâi jiáu-loān. Ū lâng siūⁿ-kóng sī Tiong-kok khong-kun chún-pī beh hó-hó kòe-nî, bô gî-gō͘ kū-le̍k kòe-nî hit kang tiong-tàu koh lâi loān, ū lâng iô thâu kóng :"chhùi kóng ”两岸一家亲 ”, khiok liân kòe-nî ji̍t to lâi loān, bô beh hō͘ lán ê khong-kun kiān-jî hó-hó chia̍h chi̍t tǹg thoân-îⁿ-pn̄g. Si̍t-chāi chin khó-ò͘ⁿ !"Tiong-kok kun-ki kòe-nî ji̍t tiong-tàu cha̍p-jī tiám saⁿ-cha̍p-sì hun chìn-ji̍p lán kok ê ADIZ ( sai lâm khong-e̍k) , koân-tō͘ 2,000 kong-chhioh, lán khong-kun tī khong-tiong kàm-khòng jî-chhiáⁿ kóng-pò͘ kā in kóaⁿ-cháu; kāng chi̍t-ê sî-kan, lēng-gōa ū chi̍t tâi Tiong-kok khong-kun 500 ū-kéng-ki tī hông-khong sek-pia̍t khu gōa teh chìn-hêng kéng-kài.

Kan-taⁿ kū-le̍k sin-chiaⁿ hioh chi̍t kang. Chhe-jī thàu-chá káu tiám, chi̍t tâi Tiong-kok ūn 8 hoán-chiâm-ki kah chi̍t tâi ūn 8 ki-su̍t cheng-chhat-ki tio̍h chìn-ji̍p lán sai lâm khong-e̍k, koân-tō͘ 4,000 kong-chhioh. Ū lâng khì kah tōa-siaⁿ mē kóng, Chia m̄ sī lín gōa-ke, bián lâi chò-kheh! Koh ū lâng mē kóng, khui-chhun chhe-jī tio̍h lâi jiáu-loān pa̍t lâng, lín ē soe kui nî! chhe-saⁿ chá-khí cha̍p-it tiám sì-cha̍p pun, Tiong-kok kun-ki chìn-ji̍p lán kok sai lâm khong-e̍k, koân-tō͘ 2,100 kong-chhioh, Chit nn̄g kang, lán khong-kun lóng ū tī khong-tiong kàm-khòng jî-chhiáⁿ kóng-pò͘ kā in kóaⁿ-cháu.

　　 Sin-chiaⁿ chhe-sì, lán Tâi-oân lâng tī chit kang ngiâ châi-sîn, lán ngiâ châi-sîn kah in Tiong-kok khong-kun siáⁿtī-tāi? Thàu-chá káu tiám, Tiong-kok chi̍t tâi kun-ki Ūn-8 hoán-chiâm-ki tio̍h chìn-ji̍p lán kok sai lâm khong-e̍k hông-khong sek-pia̍t khu. Lán tû-liáu ēng hông-khong hui-tôaⁿ tui-chong kàm-khòng í-gōa, mā phài khong-tiong sûn-lô peng-la̍t èng-tùi, jî-chhiáⁿ kóng-pò͘ kā in kóaⁿ-cháu kóng,"Tiong-hôa Bîn-kok khong-kun kóng-pò͘, tī Tâi-oân sai lâm khong-e̍k koân-tō͘ 3,000 kong-chhioh ê Τiong-kiōng kun-ki chù-ì! lí í chìn-ji̍p goán khong-e̍k, éng-hióng goán poe-hâng an-choân, sûi-sî hôe-chóan lī-khui!"

　　 Chhe-gō͘ keh-khui chá-khí, Tiong-kok chi̍t tâi "Ū-8" hoán-chiâm-ki ùi Tâi-oân hái-kiap tiong sòaⁿ í-lâm chìn-ji̍p lán kok hông-khong sek-pia̍t khu, khong-kun ū phài khong-tiong sûn-lô peng-la̍t èng-tùi, jî-chhiáⁿ ēng kóng-pò͘ kā in kóaⁿ-cháu.

Jī-goe̍h cha̍p-chhit kū-le̍k chhe-la̍k chá-khí, Tiong-kok nn̄g tâi "Ū-8" ki-su̍t cheng-chhat-ki chìn-ji̍p lán kok sai lâm khong-e̍k hông-khong sek-pia̍t khu. Jī-goe̍h cha̍p-peh ē-po͘, Tiong-kok chi̍t tâi" Ū-8" ki-su̍t cheng-chhat-ki chìn-ji̍p lán kok sai lâm khong-e̍k hông-khong sek-pia̍t khu. Chiàu koàn-lē, lán lóng ū phài kun-ki èng-tùi, hông-khong hui-tôaⁿ kàm-khòng, kóng-pò͘ kah in kóaⁿ-cháu.

　　 Kin-kì Kok-hông-pō͘ ê thóng-kè, kū-nî 2020 nî chi̍t nî saⁿ-pah la̍k-cha̍p-gō͘ kang, Tiong-kok kun-ki chiap-sio̍k bô thêng lâi jiáu-loān lán kok sai lâm khong-e̍k, ū 380 gōa tâi pái; chha-put-to ta̍k kang to̍h ū chi̍t tâi Tiong-kok kun-ki lâi pò-tò. Kin-nî it-goe̍h saⁿ-cha̍p it kang, Tiong-kok kun-ki lâi loān lán sai lâm khong-e̍k ū jī-cha̍p chhit kang.

Lán chai-iáⁿ, Tiong-kok kun-ki sī chìn-ji̍p lán kok ê sai lâm khong-e̍k hông-khong sek-pia̍t khu, pēng m̄ sī léng-khong, Tiong-kok kun-ki tong-jiân mā chai-iáⁿ, lán bē-tàng khui chhèng tāng-bú , kan-taⁿ ē tàng ēng kóaⁿ ê. Chhiūⁿ-kóng kū-nî 2020 nî la̍k-goe̍h jī-sì pòaⁿ-mê, nn̄g tâi Gô-lô hoán-chiâm-ki IL-38 poe-ji̍p Bí-kok Alaska hông-khong sek-pia̍t khu, Bí-kok mā sī kan-taⁿ ē tàng kóaⁿ-kín chhut tāng F-22 chiàn-tàu-ki khì kā in kóaⁿ-cháu niā-niā.

　　 Tiong-kok kun-ki it-ti̍t poe-lâi lán ê hông-khong sek-pia̍t khu, tong-jiân m̄ sī lâi "kiâⁿ-chhun", sī lâi loān ê. （210219）

Chù, 两岸一家亲　 chhiáⁿ liām Hôa-gí


中国军机来扰乱咱国ê航空识别区已经成作日常生活ê一部分，过年前两工ê二月初九、初十中国军机无来扰乱。有人想讲是中国空军准备beh好好过年，无疑误旧历过年hit工中昼koh来乱，有人摇头讲:「嘴讲 ”两岸一家亲”，却连过年日都来乱，无beh hō͘咱ê空军健儿好好食一顿团圆饭。实在真可恶 !」中国军机过年日中昼十二点三十四分进入咱国ê ADIZ（西南空域），悬度2,000公尺，咱空军tī空中监控而且广播kā in赶走；仝一个时间，另外有一台中国空军500预警机tī防空识别区外teh进行警戒。 Kan-taⁿ旧历新正歇一工。初二透早九点，一台中国运8反潜机kah一台运8技术侦察机tio̍h进入咱西南空域，悬度4,000公尺。有人气kah大声骂讲：Chia m̄是恁外家，免来做客！Koh有人骂讲：开春初二tio̍h来扰乱别人，lín会衰归年！初三早起十一点四十分，中国军机进入咱国西南空域，悬度2,100公尺，Chit两工，咱空军拢有tī空中监控而且广播kā in赶走。

　　新正初四，咱台湾人tī chit工迎财神，咱迎财神kah in中国空军啥tī-tāi？透早九点，中国一台军机运8反潜机tio̍h进入咱国西南空域防空识别区。咱除了用防空飞弹追踪监控以外，mā派空中巡逻兵力应对、而且广播kā in赶走讲：「中华民国空军广播，tī台湾西南空域悬度3,000公尺ê中共军机注意！你已进入阮空域，影响阮飞航安全，随时回转离开！」

　　初五隔开早起，中国一台「运8」反潜机ùi台湾海峡中线以南进入咱国防空识别区，空军有派空中巡逻兵力应对，而且用广播kā in赶走。

二月十七旧历初六早起，中国两台「运8」技术侦察机进入咱国西南空域防空识别区。二月十八下晡，中国一台「运8」技术侦察机进入咱国西南空域防空识别区。照惯例，咱lóng有派军机应对、防空飞弹监控、广播kah in赶走。

　　根据国防部ê统计，旧年2020年一年三百六十五工，中国军机接续无停来扰乱咱国西南空域，有380外台次；差不多逐工to̍h有一台中国军机来报到。今年一月三十一工，中国军机来乱咱西南空域有二十七工。

咱知影，中国军机是进入咱国ê西南空域防空识别区，并m̄是领空，中国军机当然mā知影，咱bē-tàng开铳动武，kan-taⁿ会tàng用赶ê。像讲旧年2020年六月二四半暝，两台俄罗反潜机IL-38飞入美国Alaska防空识别区，美国mā是kan-taⁿ会tàng赶紧出动F-22战斗机去kā in赶走niā-niā。

　　中国军机一直飞来咱ê防空识别区，当然m̄是来「行春」，是来乱ê。 （210219）
注：两岸一家亲　　请念华语