《绿色短评》

 | | | 转寄

值得咱尊敬ê泽连斯基总统！

作者 李南衡, ChoânTâijī/全台字 by Chng Hūiphêng 2022.05.15

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

Ta̍ttit lán chunkèng ê泽连斯基（Chêliansuki） chóngthóng!

　　 Jīgoe̍h jīsì, Gôlô ji̍pchhim ê chiànchhia chhiongkòe 乌克兰 piankài liáuāu, kuiê 乌克兰 hāmji̍p kiaⁿhiâⁿ kah kíntiuⁿ. Gôlô chhiàng siaⁿ káucha̍pla̍k tiámcheng lāi ( ìsù sī kóng sìkang lāi) tio̍h oânchoân káikoat 乌克兰. Kàu taⁿ íkeng kòeliáu cha̍pla̍k ê káucha̍pla̍k tiámcheng, 乌克兰 choânthé kunbîn ná chhiūⁿ jú chiàn jú ióng, tongjiân sī choânthé 乌克兰 kunbîn ū kiantēng póūi kakī ê kokka ê koatsim kah ìchì, tānsī betàng bô thêkhí ta̍ttit chunkèng ê Chêliansuki chóngthóng. I koat ì lâu tī siúto͘ Kihú, i bēnglēng koânkip chō͘chhiú, só͘ū ê lāikoh sêngoân kah tōapō͘hūn chènghú koaⁿoân lóng lâu lo̍hlâi. Kuiê koaⁿliâu kikò͘ chin kín tio̍h sūnlī chìnji̍p chiànsî chōngthāi. Gôlô ji̍pchhim ê tējī kang, i tio̍h hiòng choânkok kunbîn kóng,"siáⁿmi̍h búkhì lán lóng bēsái pàng lo̍hlâi, lán beh póūi lán kakī ê kokka."

　　Chêliansuki itti̍t kah koklāi siōng chúiàu ê chèngtek , chêng chóngthóng Piattò͘ Poroshenko chháunāu bô soah, tānsī chiàncheng po̍khoat liáu, in nn̄g lâng sûisî ta̍tsêng hôkái, tī kokkî ēbīn thoânkiat khílâi. Lán mā ū tī tiānsī pòtō tiong khòaⁿtio̍h chêng chóngthóng Piattò͘ Poroshenko choânhù búchong, giâ chhèng teh póūi kokka ê kiàⁿthâu.

　　 Múi chákhí, Chêliansuki tēit hāng tāichì tio̍h sī thiaⁿ búchong pō͘tūi sulēng ê tiānōe kánpò liáu, chiah khui lāikoh sīsìn hōegī. I tī Kihù kethâu sìkè kiâⁿ, khì pēⁿīⁿ thàmhóng siūsiong ê kunjîn, khì ko͘jîīⁿ sàng chi̍t tâi iPad pêⁿpán tiānnáu hō͘ choh seⁿji̍t ê gíná, i khì kàu tóūi hipsiòng kàu tóūi, ta̍k kang tī bīnchheh téngbīn hiànsin, thoânta̍t i ê ióngkhì kah chūsìn, chèngbêng chi̍tê ū ióngkhì ê lâng ē tòng tú chhengkunbānbé. I tongjiân chaiiáⁿ múikang pōlō͘ kakī ê kiâⁿchong honghiám chiâⁿ kông, tānsī antēng bînsim pí kiaⁿ hông àmsat koh khah iàukín.

Chiàncheng chho͘kî, i pàngsang hòebu̍t ūnsu koánchè, káikoat siúto͘ Kihù niûchhiong khiàmkhoeh ê tiōngtāi honghiám. Saⁿgoe̍h i kā ênggia̍psòe kàngkē kàu 2%, chiah kohchài piàn choh sûipiān gia̍pchú la̍psòe, i kóng, lín ētàng la̍p tio̍h la̍p, bētàng la̍p mā bô iàukín. Tìsú chin chē hòeūn kongsi chūgoān chàihòe khì siúto͘ lóng bô siu ūnhùi.

Chêliansuki chóngthóng ná chhiūⁿ thoânsoat tiong ê Tiō Chúliông, kui sengkhu lóng sī táⁿ, i oânchoân bô khólī Gôlô kunla̍t pí 乌克兰 kiông kòe kúi cha̍p pōe, i ióngkám èngchiàn. Chhinchhiūⁿ tiong ê siàuliân Tabi̍t, bīntùi Huilīsū iâⁿ chi̍tê kông koh tōa, Isulael kuntūi khòaⁿtio̍h i ē kiaⁿ, kui sin chiànkah ê Golīat, Tabi̍t chhun chhiú ji̍p tēá lāi, the̍h chi̍t tè chio̍há chhutlâi, ēng soh hìⁿ khì, siā tio̍h Golīat ê thâuhia̍h, chio̍há tîm ji̍p thâuhia̍h; i chiū tó lo̍hkhì, bīn phak tī tēnih. Chêliansuki chóngthóng kāngkhoán khò kèbô͘ í jio̍k sèng kiông, ēng kikhiáu kah tìhūi lâi iâⁿ kòe sèkài tējī tōa kunsū kok Gôlô.

　　Chêliansuki chóngthóng itti̍t póchhî chi̍tê bînsoán léngtōchiá ê jînchêngbī, putkoánsî tī kongkhai tiûⁿha̍p kah kìchiá, lāikoh sêngoân, gōakok lâihóng ê léngtōchiá, sīmchì kah 乌克兰 pêngbîn pehsèⁿ chiapchhiok, tâmōe ê hongsek, lóng hō͘ lâng kámsiūtio̍h chhinchhiat, unloán.

　　Chitkhoán ê Chêliansuki chóngthóng, si̍tchāi ta̍ttit lán chunkèng! 　　(220429)

Chù, 乌克兰　　 chhiáⁿ liām Hôagí

Pe̍h-ōe-jī-pán/白话字版


《 Le̍k-sek toán-phêng 》 Lí Lâm-hêng

Ta̍t-tit lán chun-kèng ê泽连斯基（Chê-lian-su-ki） chóng-thóng!

　　 Jī-goe̍h jī-sì, Gô-lô ji̍p-chhim ê chiàn-chhia chhiong-kòe 乌克兰 pian-kài liáu-āu, kui-ê 乌克兰 hām-ji̍p kiaⁿ-hiâⁿ kah kín-tiuⁿ. Gô-lô chhiàng siaⁿ káu-cha̍p-la̍k tiám-cheng lāi （ ì-sù sī kóng sì-kang lāi ）tio̍h oân-choân kái-koat 乌克兰. Kàu taⁿ í-keng kòe-liáu cha̍p-la̍k ê káu-cha̍p-la̍k tiám-cheng, 乌克兰 choân-thé kun-bîn ná chhiūⁿ jú chiàn jú ióng, tong-jiân sī choân-thé 乌克兰 kun-bîn ū kian-tēng pó-ūi ka-kī ê kok-ka ê koat-sim kah ì-chì, tān-sī be-tàng bô thê-khí ta̍t-tit chun-kèng ê Chê-lian-su-ki chóng-thóng. I koat- ì lâu tī siú-to͘ Ki-hú, i bēng-lēng koân-kip chō͘-chhiú, só͘-ū ê lāi-koh sêng-oân kah tōa-pō͘-hūn chèng-hú koaⁿ-oân lóng lâu-- lo̍h-lâi. Kui-ê koaⁿ-liâu ki-kò͘ chin kín tio̍h sūn-lī chìn-ji̍p chiàn-sî chōng-thāi. Gô-lô ji̍p-chhim ê tē-jī kang, i tio̍h hiòng choân-kok kun-bîn kóng,"siáⁿ-mi̍h bú-khì lán lóng bē-sái pàng-- lo̍h-lâi, lán beh pó-ūi lán ka-kī ê kok-ka."

　　Chê-lian-su-ki it-ti̍t kah kok-lāi siōng chú-iàu ê chèng-tek , chêng chóng-thóng Piat-tò͘ Poroshenko chháu-nāu bô soah, tān-sī chiàn-cheng po̍k-hoat liáu, in nn̄g lâng sûi-sî ta̍t-sêng hô-kái, tī kok-kî ē-bīn thoân-kiat khí-lâi. Lán mā ū tī tiān-sī pò-tō tiong khòaⁿ-tio̍h chêng chóng-thóng Piat-tò͘ Poroshenko choân-hù bú-chong, giâ chhèng teh pó-ūi kok-ka ê kiàⁿ-thâu.

　　 Múi chá-khí, Chê-lian-su-ki tē-it hāng tāi-chì tio̍h sī thiaⁿ bú-chong pō͘-tūi su-lēng ê tiān-ōe kán-pò liáu, chiah khui lāi-koh sī-sìn hōe-gī. I tī Ki-hù ke-thâu sì-kè kiâⁿ, khì pēⁿ-īⁿ thàm-hóng siū-siong ê kun-jîn, khì ko͘-jî-īⁿ sàng chi̍t tâi iPad pêⁿ-pán tiān-náu hō͘ choh seⁿ-ji̍t ê gín-á, i khì kàu tó-ūi hip-siòng kàu tó-ūi, ta̍k kang tī bīn-chheh téng-bīn hiàn-sin, thoân-ta̍t i ê ióng-khì kah chū-sìn, chèng-bêng chi̍t-ê ū ióng-khì ê lâng ē tòng tú chheng-kun-bān-bé. I tong-jiân chai-iáⁿ múi-kang pō-lō͘ ka-kī ê kiâⁿ-chong hong-hiám chiâⁿ kông, tān-sī an-tēng bîn-sim pí kiaⁿ hông àm-sat koh khah iàu-kín.

Chiàn-cheng chho͘-kî, i pàng-sang hòe-bu̍t ūn-su koán-chè, kái-koat siú-to͘ Ki-hù niû-chhiong khiàm-khoeh ê tiōng-tāi hong-hiám. Saⁿ-goe̍h i kā êng-gia̍p-sòe kàng-kē kàu 2%, chiah koh-chài piàn choh sûi-piān gia̍p-chú la̍p-sòe, i kóng, lín ē-tàng la̍p tio̍h la̍p, bē-tàng la̍p mā bô iàu-kín. Tì-sú chin chē hòe-ūn kong-si chū-goān chài-hòe khì siú-to͘ lóng bô siu ūn-hùi.

Chê-lian-su-ki chóng-thóng ná chhiūⁿ thoân-soat tiong ê Tiō Chú-liông, kui seng-khu lóng sī táⁿ, i oân-choân bô khó-lī Gô-lô kun-la̍t pí 乌克兰 kiông kòe kúi cha̍p pōe, i ióng-kám èng-chiàn. Chhin-chhiūⁿ tiong ê siàu-liân Ta-bi̍t, bīn-tùi Hui-lī-sū iâⁿ chi̍t-ê kông koh tōa, I-su-la-el kun-tūi khòaⁿ-tio̍h i ē kiaⁿ, kui sin chiàn-kah ê Go-lī-at, Ta-bi̍t chhun chhiú ji̍p tē-á lāi, the̍h chi̍t tè chio̍h-á chhut-lâi, ēng soh hìⁿ khì, siā tio̍h Go-lī-at ê thâu-hia̍h, chio̍h-á tîm ji̍p thâu-hia̍h; i chiū tó-- lo̍h-khì, bīn phak tī tē--nih. Chê-lian-su-ki chóng-thóng kāng-khoán khò kè-bô͘ í jio̍k sèng kiông, ēng ki-khiáu kah tì-hūi lâi iâⁿ kòe sè-kài tē-jī tōa kun-sū kok Gô-lô.

　　Chê-lian-su-ki chóng-thóng it-ti̍t pó-chhî chi̍t-ê bîn-soán léng-tō-chiá ê jîn-chêng-bī, put-koán-sî tī kong-khai tiûⁿ-ha̍p kah kì-chiá, lāi-koh sêng-oân, gōa-kok lâi-hóng ê léng-tō-chiá, sīm-chì kah 乌克兰 pêng-bîn peh-sèⁿ chiap-chhiok, tâm-ōe ê hong-sek, lóng hō͘ lâng kám-siū-tio̍h chhin-chhiat, un-loán.

　　Chit-khoán ê Chê-lian-su-ki chóng-thóng, si̍t-chāi ta̍t-tit lán chun-kèng! 　　(220429)

Chù, 乌克兰　　 chhiáⁿ liām Hôa-gí


　　二月二四，俄罗入侵ê战车冲过乌克兰边界了后，归个乌克兰陷入惊惶kah紧张。俄罗chhiàng声九十六点钟内（意思是讲四工内）tio̍h完全解决乌克兰。到taⁿ已经过了十六个九十六点钟，乌克兰全体军民ná像愈战愈勇，当然是全体乌克兰军民有坚定保卫家己ê国家ê决心kah意志，但是be-tàng无提起值得尊敬ê泽连斯基（Chê-lian-su-ki）总统。伊决意留tī首都基辅（ki-hú），伊命令高级助手、所有ê内阁成员kah大部分政府官员lóng留落来。归个官僚机构真紧tio̍h顺利进入战时状态。俄罗入侵ê第二工，伊tio̍h向全国军民讲：「啥物武器咱lóng bē-sái放落来，咱beh保卫咱家己ê国家。」

　　泽连斯基（Chê-lian-su-ki）一直kah国内上主要ê政敌、前总统彼得・波罗申科（Poroshenko）吵闹无soah，但是战争爆发了，in两人随时达成和解，tī国旗下面团结起来。咱mā有tī电视报导中看tio̍h前总统彼得・波罗申科全副武装，夯铳teh保卫国家ê镜头。

　　每早起，泽连斯基第一项代志tio̍h是听武装部队司令ê电话简报了，chiah开内阁视讯会议。伊tī基辅街头四界行、去病院探访受伤ê军人、去孤儿院送一台iPad平板电脑hō͘作生日ê gín-á，伊去到tó位翕相到tó位，逐工tī面册顶面现身，传达伊ê勇气kah自信，证明一个有勇气ê人ē挡抵千军万马。伊当然知影每工暴露家己ê行踪风险诚kông，但是安定民心比惊hông暗杀koh khah要紧。

战争初期，伊放松货物运输管制，解决首都基辅粮仓欠缺ê重大风险。三月伊kā营业税降低到2%，chiah koh再变作随便业主纳税，伊讲：恁ē-tàng纳tio̍h纳，bē-tàng纳mā无要紧。致使真chē货运公司自愿载货去首都lóng无收运费。

泽连斯基（Chê-lian-su-ki）总统ná像传说中ê赵子龙，归身躯lóng是胆，伊完全无考虑俄罗军力比乌克兰强过几十倍，伊勇敢应战。亲像《圣经》中ê少年大卫，面对腓利士营一个kông koh大、以色列军队看tio̍h伊ē惊、归身战甲ê歌利亚，大卫伸手入袋á内，the̍h一块石á出来，用索hìⁿ去，射tio̍h歌利亚ê头额，石á沉入头额；伊就倒落去，面phak tī地里。泽连斯基（Chê-lian-su-ki）总统仝款靠计谋以弱胜强，用技巧kah智慧来嬴过世界第二大军事国俄罗。

　　泽连斯基（Chê-lian-su-ki）总统一直保持一个民选领导者ê人情味，不管时tī公开场合kah记者、内阁成员、外国来访ê领导者，甚至kah乌克兰平民百姓接触、谈话ê方式，lóng hō͘人感受tio̍h亲切、温暖。

　　Chit款ê泽连斯基（Chê-lian-su-ki）总统，实在值得咱尊敬！　　(220429)

注：乌克兰　　请念华语