《绿色短评》

 | | | 转寄

中国ê「孔子学院」m̄-thang学！

作者 李南衡, ChoânTâijī/全台字 by Chng Hūiphêng 2022.05.22

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

Tiongkok ê "Κhóngchú ha̍kīⁿ" m̄thang o̍h!

Gō͘goe̍h chhejī, Tiongkok Kokbîntóng li̍púi Gô͘ Suhoâi tī li̍phoatīⁿ gōakau, kokhông úigoânhōe chitsûn piáusī, m̄thang chhinchhiūⁿ Ōehok pō͘tiúⁿ Tân Sîtiong pō͘tiúⁿ "逢中必反", Lāukiōng ê "Κhóngchú ha̍kīⁿ" bú chiah chē nî, tongchho͘ chòtit hiah hó, ittēng ū i ê iutiám, lán tio̍h í te̍k ūi su, tio̍h o̍h "Κhóngchú ha̍kīⁿ".

Tī Tâioân chin chē khòaⁿkhílâi khiáukhiáu ê lâng, inūi ū "Tiongkok sái khah phang" ê piànthài simlí, kóngōe khah ē chengchha khì. Chhiūⁿkóng chit nn̄g nî, ū chi̍t kóa lâng kiò lán chènghú tio̍h chháṳōng Tiongkok chè e̍kbiâu. Hó tit lán chènghú ū kianchhî, bô chhap in. Kináji̍t chèngbêng, Tiongkok e̍kbiâu tùi Búhàn hìiām piànchéng ê Delta pēⁿto̍k bô hônghō͘la̍t, tùi Omicron piànī pēⁿto̍k koh Khah biánkóng, chù saⁿ che mā bô hāukó.

　　2004 nî, Tiongkok sêngli̍p "Κhóngchú ha̍kīⁿ", iû Tiongkok Kàuio̍kpō͘ só͘ sio̍k ê kokka Hàngí Kokchè Thuikóng Léngtō Siócho͘ Pānkongsek koánlí, chóngpō͘ siat tī Pakkiaⁿ, Tiongkok kénggōa ê "Κhóngchú ha̍kīⁿ" lóng sī hunki kikò͘. Sī Tiongkok chènghú ūitio̍h hiòng sèkài thuikóng Hàngí, chengchìn sèkài kokkok tùi Tiongkok ê liáukái só͘ siatli̍p ê koaⁿhong kikò͘. Khòtêng hun sì tōa lūi, Siōngchúiàu sī o̍h Hôagí, tējī lūi sī pauhâm Tiongkok tê bûnhòa, Hànjī iánpiàn kah Hànjī bûnhòa, tēsaⁿ lūi sī paukoat Tiongkok bûnha̍k, le̍ksú kah tiatha̍k, tēsì lūi sī paukoat siôngbū, gēsu̍t, suhoat, chúchia̍h kah lúiû téng te̍ksek khòtêng. Cha̍psì nî āu ê 2018 nî káugoe̍h, choân sèkài ū 149 ê kokka ( tēkhu) kiànli̍p liáu 530 keng "Κhóngchú ha̍kīⁿ" kah 1,113 ê tiongsiáuha̍k Κhóngchú khòtn̂g , Tionggōa choankiamchit kàusu 4 bān 6,200 lâng, pôeióng o̍hoân chhiaukòe 900 bān lâng.

　　 Inūi chin chē kokka tamsim "Κhóngchú ha̍kīⁿ" kansia̍p ha̍ksu̍t chūiû, chò kàntia̍p kah siuchi̍p chêngpò ê kangchok,"Κhóngchú ha̍kīⁿ" kah Κhóngchú ha̍ksoat bô koanhē. Bôchhò! 2018 nî pehgoe̍h, bat chò kòe Tiongkok Kokbūīⁿ chónglí kah Τiongkiōng Tiongiong Chóngsukì 赵紫阳ê pìsu 鲍彤 kóng, hiānchāi phó͘ki̍p choânkiû ê "Κhóngchú ha̍kīⁿ", lóng sī teh thúnta̍h chit ūi sengtiat kah i ê ha̍ksoat. Chiahê "Κhóngchú ha̍kīⁿ" lóng kah Κhóngchú bô koanhē. In lóng sèⁿ Kiōng. Chiàu 习近平 ê kónghoat in lóng sèⁿ Tóng.

　　2005 nî Tiongkok tī Sūitián Sutokhom tāiha̍k sêngli̍p Auchiu tēit keng "Κhóngchú ha̍kīⁿ", 2019 nî cha̍pjīgoe̍h, Sūitián koaiⁿ tiāu tī 4 keng tāiha̍k siat ê "Κhóngchú ha̍kīⁿ", sī Auchiu tēitê oânchoân tûtiāu "Κhóngchú ha̍kīⁿ" ê kokka. 2004 nî cha̍pitgoe̍h cha̍pchhit, Bíkok Málílân tāiha̍k siatli̍p Pakbíchiu tēit keng "Κhóngchú ha̍kīⁿ", 2020 nî itgoe̍h cha̍pchhit koaiⁿ tiāu. Chit tiongkan chi̍t keng tāiha̍k chi̍t keng tāiha̍k siosòa siatli̍p "Κhóngchú ha̍kīⁿ", bô lōa kú, chi̍t keng chi̍t keng koaiⁿ tiāu. Goânpún ītēng 2020 nîté koaiⁿ tiāu choân BÍ "Κhóngchú ha̍kīⁿ".

　　 Sìgoe̍h jīla̍k, kah Tiongkok itlia̍pit ê Pakisuthán, siōng tōa to͘chhī Khahlachhì hoatseng chi̍t kiāⁿ chūsat sek chàtôaⁿ kongkek,"Κhóngchú ha̍kīⁿ īⁿtiúⁿ N̂g Kùipêⁿ, nn̄g miâ lāusu kah Pakisuthán suki hiānsí. Chit kiāⁿ po̍kchà àn hoatseng tī Khahlachhì tāiha̍k "Κhóngchú ha̍kīⁿ" hūkīn. Chàtôaⁿkheh sī chi̍t miâ saⁿcha̍p hòe, nn̄gê gíná ê lāubú, i sī "Κhóngchú ha̍kīⁿ" ê ha̍kseng, i mā tongtiûⁿ síbông.

　　 Siūⁿ "Tiongkok sái khah phang" ê lâng kóng ê ōe bē thiaⁿ tit, Tiongkok "Κhóngchú ha̍kīⁿ" m̄thang o̍h! (220506)
Chù,赵紫阳　鲍彤（ㄅㄠˋ ㄊㄨㄥˊ）习近平 chhiáⁿ liām Hôagí


Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng

Tiong-kok ê "Κhóng-chú ha̍k-īⁿ" m̄-thang o̍h!

Gō͘-goe̍h chhe-jī, Tiong-kok Kok-bîn-tóng li̍p-úi Gô͘ Su-hoâi tī li̍p-hoat-īⁿ gōa-kau, kok-hông úi-goân-hōe chit-sûn piáu-sī, m̄-thang chhin-chhiūⁿ Ōe-hok pō͘-tiúⁿ Tân Sî-tiong pō͘-tiúⁿ "逢中必反", Lāu-kiōng ê "Κhóng-chú ha̍k-īⁿ" bú chiah chē nî, tong-chho͘ chò-tit hiah hó, it-tēng ū i ê iu-tiám, lán tio̍h í te̍k ūi su, tio̍h o̍h "Κhóng-chú ha̍k-īⁿ".

Tī Tâi-oân chin chē khòaⁿ--khí-lâi khiáu-khiáu ê lâng, in-ūi ū "Tiong-kok sái khah phang" ê piàn-thài sim-lí, kóng-ōe khah ē cheng-chha khì. Chhiūⁿ-kóng chit nn̄g nî, ū chi̍t kóa lâng kiò lán chèng-hú tio̍h chhái-iōng Tiong-kok chè e̍k-biâu. Hó tit lán chèng-hú ū kian-chhî, bô chhap in. Kin-á-ji̍t chèng-bêng, Tiong-kok e̍k-biâu tùi Bú-hàn hì-iām piàn-chéng ê Delta pēⁿ-to̍k bô hông-hō͘-la̍t, tùi Omicron piàn-ī pēⁿ-to̍k koh Khah bián-kóng, chù saⁿ che mā bô hāu-kó.

　　2004 nî, Tiong-kok sêng-li̍p "Κhóng-chú ha̍k-īⁿ", iû Tiong-kok Kàu-io̍k-pō͘ só͘ sio̍k ê kok-ka Hàn-gí Kok-chè Thui-kóng Léng-tō Sió-cho͘ Pān-kong-sek koán-lí, chóng-pō͘ siat tī Pak-kiaⁿ, Tiong-kok kéng-gōa ê "Κhóng-chú ha̍k-īⁿ" lóng sī hun-ki ki-kò͘. Sī Tiong-kok chèng-hú ūi-tio̍h hiòng sè-kài thui-kóng Hàn-gí, cheng-chìn sè-kài kok-kok tùi Tiong-kok ê liáu-kái só͘ siat-li̍p ê koaⁿ-hong ki-kò͘. Khò-têng hun sì tōa lūi, Siōng-chú-iàu sī o̍h Hôa-gí, tē-jī lūi sī pau-hâm Tiong-kok tê bûn-hòa, Hàn-jī ián-piàn kah Hàn-jī bûn-hòa, tē-saⁿ lūi sī pau-koat Tiong-kok bûn-ha̍k, le̍k-sú kah tiat-ha̍k, tē-sì lūi sī pau-koat siông-bū, gē-su̍t, su-hoat, chú-chia̍h kah lú-iû téng te̍k-sek khò-têng. Cha̍p-sì nî āu ê 2018 nî káu-goe̍h, choân sè-kài ū 149 ê kok-ka ( tē-khu) kiàn-li̍p liáu 530 keng "Κhóng-chú ha̍k-īⁿ" kah 1,113 ê tiong-siáu-ha̍k Κhóng-chú khò-tn̂g , Tiong-gōa choan-kiam-chit kàu-su 4 bān 6,200 lâng, pôe-ióng o̍h-oân chhiau-kòe 900 bān lâng.

　　 In-ūi chin chē kok-ka tam-sim "Κhóng-chú ha̍k-īⁿ" kan-sia̍p ha̍k-su̍t chū-iû, chò kàn-tia̍p kah siu-chi̍p chêng-pò ê kang-chok,"Κhóng-chú ha̍k-īⁿ" kah Κhóng-chú ha̍k-soat bô koan-hē. Bô-chhò! 2018 nî peh-goe̍h, bat chò kòe Tiong-kok Kok-bū-īⁿ chóng-lí kah Τiong-kiōng Tiong-iong Chóng-su-kì 赵紫阳ê pì-su 鲍彤 kóng, hiān-chāi phó͘-ki̍p choân-kiû ê "Κhóng-chú ha̍k-īⁿ", lóng sī teh thún-ta̍h chit ūi seng-tiat kah i ê ha̍k-soat. Chiah-ê "Κhóng-chú ha̍k-īⁿ" lóng kah Κhóng-chú bô koan-hē. In lóng sèⁿ Kiōng. Chiàu 习近平 ê kóng-hoat in lóng sèⁿ Tóng.

　　2005 nî Tiong-kok tī Sūi-tián Sutokhom tāi-ha̍k sêng-li̍p Au-chiu tē-it keng "Κhóng-chú ha̍k-īⁿ", 2019 nî cha̍p-jī-goe̍h, Sūi-tián koaiⁿ tiāu tī 4 keng tāi-ha̍k siat ê "Κhóng-chú ha̍k-īⁿ", sī Au-chiu tē-it-ê oân-choân tû-tiāu "Κhóng-chú ha̍k-īⁿ" ê kok-ka. 2004 nî cha̍p-it-goe̍h cha̍p-chhit, Bí-kok Má-lí-lân tāi-ha̍k siat-li̍p Pak-bí-chiu tē-it keng "Κhóng-chú ha̍k-īⁿ", 2020 nî it-goe̍h cha̍p-chhit koaiⁿ tiāu. Chit tiong-kan chi̍t keng tāi-ha̍k chi̍t keng tāi-ha̍k sio-sòa siat-li̍p "Κhóng-chú ha̍k-īⁿ", bô lōa kú, chi̍t keng chi̍t keng koaiⁿ tiāu. Goân-pún ī-tēng 2020 nî-té koaiⁿ tiāu choân BÍ "Κhóng-chú ha̍k-īⁿ".

　　 Sì-goe̍h jī-la̍k, kah Tiong-kok it-lia̍p-it ê Pa-ki-su-thán, siōng tōa to͘-chhī Khah-la-chhì hoat-seng chi̍t kiāⁿ chū-sat sek chà-tôaⁿ kong-kek,"Κhóng-chú ha̍k-īⁿ īⁿ-tiúⁿ N̂g Kùi-pêⁿ, nn̄g miâ lāu-su kah Pa-ki-su-thán su-ki hiān-sí. Chit kiāⁿ po̍k-chà àn hoat-seng tī Khah-la-chhì tāi-ha̍k "Κhóng-chú ha̍k-īⁿ" hū-kīn. Chà-tôaⁿ-kheh sī chi̍t miâ saⁿ-cha̍p hòe, nn̄g-ê gín-á ê lāu-bú, i sī "Κhóng-chú ha̍k-īⁿ" ê ha̍k-seng, i mā tong-tiûⁿ sí-bông.

　　 Siūⁿ "Tiong-kok sái khah phang" ê lâng kóng ê ōe bē thiaⁿ tit, Tiong-kok "Κhóng-chú ha̍k-īⁿ" m̄-thang o̍h! (220506)
Chù,赵紫阳　鲍彤（ㄅㄠˋ ㄊㄨㄥˊ）习近平 chhiáⁿ liām Hôa-gí



五月初二，中国国民党立委吴斯怀tī立法院外交、国防委员会质询表示，m̄-thang亲像卫福部长陈时中「逢中必反」，老共ê「孔子学院」舞chiahchē年，当初做得hiah好，一定有伊ê优点，咱tio̍h以敌为师，tio̍h学「孔子学院」。

Tī台湾真chē看起来巧巧ê人，因为有「中国屎khah芳」ê变态心理，讲话khah会精差去。像讲chit两年，有一kóa人叫咱政府tio̍h采用中国制疫苗。好得咱政府有坚持、无chhap in。今á日证明，中国疫苗对武汉肺炎变种ê Delta病毒无防护力，对Omicron变异病毒koh Khah免讲，注三剂mā无效果。

　　2004年，中国成立「孔子学院」，由中国教育部所属ê国家汉语国际推广领导小组办公室管理，总部设tī北京，中国境外ê「孔子学院」lóng是分支机构。是中国政府为tio̍h向世界推广汉语、增进世界各国对中国ê了解所设立ê官方机构。课程分四大类，上主要是学华语，第二类是包含中国茶文化、汉字演变kah汉字文化，第三类是包括中国文学、历史kah哲学，第四类是包括商务、艺术、书法、煮食kah旅游等特色课程。十四年后ê2018年九月，全世界有149个国家（地区）建立了530间「孔子学院」kah 1,113个中小学孔子课堂，中外专兼职教师4万6,200人，培养学员超过900万人。

　　因为真chē国家担心「孔子学院」干涉学术自由，做间谍kah收集情报ê工作，「孔子学院」kah孔子学说无关系。无错！2018年八月，bat做过中国国务院总理kah中共中央总书记赵紫阳ê秘书鲍彤讲：现在普及全球ê「孔子学院」，lóng是teh thún踏这位先哲kah伊ê学说。Chiah-ê「孔子学院」lóng kah孔子无关系。In lóng姓共。照习近平ê讲法in lóng姓党。

　　2005年中国tī瑞典Sutokhom大学成立欧洲第一间「孔子学院」，2019年十二月，瑞典关掉tī4间大学设ê「孔子学院」，是欧洲第一个完全除掉「孔子学院」ê国家。2004年十一月十七，美国马里兰大学设立北美洲第一间「孔子学院」，2020年一月十七关掉。Chit中间一间大学一间大学相续设立「孔子学院」，无lōa久，一间一间关掉。原本预定2020年底关掉全美「孔子学院」。

　　四月二六，kah中国一粒一ê巴基斯坦，上大都市卡拉刺发生一件自杀式炸弹攻击，「孔子学院」院长黄桂平、两名老师kah巴基斯坦司机现死。Chit件爆炸案发生tī卡拉刺大学「孔子学院」附近。炸弹客是一名三十岁、两个gín-á ê老母，伊是「孔子学院」ê学生，伊mā当场死亡。

　　想「中国屎khah芳」ê人讲ê话bē听得，中国「孔子学院」m̄-thang学！ (220506)
注：赵紫阳　　鲍彤（ㄅㄠˋ ㄊㄨㄥˊ）　　习近平　　请念华语