《绿色短评》

 | | | 转寄

一个有良心ê中国人tī乌克兰发声！

作者 李南衡, ChoânTâijī/全台字 by Chng Hūiphêng 2022.04.10

Choânbîn Tâioânjī pán/全民台湾字版简称ChoânTâiJī

《Le̍ksek toánphêng 》　　　 Lí Lâmhêng

　　　　　　　 Chi̍tê ū liôngsim ê Tiongkok lâng tī 乌克兰 hoatsiaⁿ!

Ùi Tiongkok Pakkiaⁿ khì ê tiānnáu thêngsek siatkèsu Ông Kiathiân, i soánte̍k tī phiàu tiong lâu tī 乌克兰奥德萨, piànchoh kongbîn kìchiá, thàukòe Tiongkok 微信 （We Chat）kah Yo͘tube lio̍ksio̍k siōng thôaⁿ 乌克兰 chiàntē chênghóng, tìsú hō͘ loān thīn Gôlô ji̍pchhim 乌克兰ê Tiongkok sióhúnâng kā i tah "ûipōe kokka li̍ptiûⁿ" , "bîncho̍k poāntô͘" ê pioá. Kiⁿî saⁿcha̍pla̍k hòe ê Ông Kiathiân inūi ài gēsu̍t, sì tang chêng poaⁿlâi 奥德萨tio̍h tùi chitê siâⁿchhī ê gēsu̍t khìhun chin kahì; puthēng, jīgoe̍h jīsì Gôlô ji̍pchhim 乌克兰 liáuāu, Ông Kiathiân tio̍h ta̍k kang thàukòe 微信 kah Youtube thôaⁿ chi̍t ki iáⁿphìⁿ hiòng pēbú pò pêngan kah hunhióng chiàntē.

Saⁿgoe̍h cha̍pchhit （ pài sì ）基辅ê àmsî cha̍p tiám, i mn̄g kóng góa ê siaⁿim kám ū hiahni̍h khióngpò͘? Nā bô, sī ánchóaⁿ tī基辅 sîkan ēpo͘ saⁿ tiám, chiahni̍h hôchê kā góa miâē só͘ū ê tiùⁿhō choânpō͘ santû tiāu, paukoat góa kah goán pēbú îit ētàng liânlo̍k pò pêngan ê hongsek long hō͘ lín santiāu khì ah! Goán t īchia to ētàng goânliōng chhèng pàng lo̍hlâi ê Gôlô peng, sī ánchóaⁿ lín bētàng chiapsiū chi̍tê lín kakī ê kongbîn leh? Góa chíputkò sī chi̍tê tiānnáu thêngsek siatkèsu jîí. Lín ū pēbú bô? Lín ū kiáⁿjî bô? Siatsú lí ê kiáⁿjî tī chiàntiûⁿ, lí kám ē kā i kah in pēbú îit liânlo̍k ê hongsek chhiattn̄g? Góa chitmá kantaⁿētàng thàukòe pa̍t lâng hiòng góa ê pēbú choán ta̍t góa iáu oa̍hteh. Lín chiahê lám khasiàu, hiahni̍h chichhî Gôlô tī chia thâi 乌克兰 lâng, ánne kám tio̍h? Sòa lo̍hkhì lín beh chhòngsiáⁿ? Lín iáu ētàng chhòngsiáⁿ? Kóng pe̍hchha̍t sī lín itkoàn ê chokhong, mā sī lín îit ê gígiân. Siatsú góa pōeāu ê chó͘kok pek góa ittēng tio̍h choh chi̍t hāng soánte̍k, tàuté beh kūi lè oa̍h lo̍hkhì ah sī beh khiā lè síkhì? Sitlé, góa íkeng khiā chin kú ah, bē hiáu kūi. Lín kantaⁿētàng ēng lí ho̍k lâng, bētàng ēng pōle̍k ho̍k lâng.

　　 kîsi̍t Ông Kiathiân putkoánsî long ētàng līkhui 奥德萨, i khiok soánte̍k lâu lo̍h来. I tùi 《华尔街 ji̍tpò 》 kóng,"Tī chiàncheng kiatsok jîchhiáⁿ sī 乌克兰 sènglī chìnchêng, góa bē līkhui chia, inūi góa putho̍k. Sathāi pêngbîn pehsèⁿ, oaikhiok sūsi̍t, góa tio̍h sī putho̍k. Góa beh lâu tiàm chia, khòaⁿ 乌克兰 chòeāu ê sènglī. Engkai bián jōa kú." Ông Kiathiân kóng i chi̍tê lâng tio̍h bīntùi nn̄gê chiàntiûⁿ, chi̍tê sī Gôlô ê ji̍pchhim, chi̍tê sī ùi koklāi tôngpau ê kongkek.

Tùi Gôlô lâng, i ho͘io̍k hôpêng, i tōasiaⁿ hoánkek kò͘hiong ê Tiongkok lâng tùi Gôlô ji̍pchhim hêngûi ê chichhî siaⁿim. Chūchiông tēit phoe Gôlô poetôaⁿ khaisí phah乌克兰 ílâi, kúi pahbān ê Tiongkok lâng lâi khòaⁿ i tī 微信 （We Chat） téngbīn hoatpiáu ê kóngōe iáⁿphìⁿ. Chin kín i ê pîntō tio̍h chiâⁿchoh Tiongkok chènghú kah jînbîn koanchù ê chiautiám, ētàng hō͘ Tiongkok chhiûⁿá lāi ê lâng khòaⁿtio̍h hō͘ chiànhóe thúnta̍h ê 乌克兰, kah Tiongkok thīn Gôlô ê li̍ptiûⁿ tòhoán, koh khah sī kā Tiongkok thè Gôlô soanthoân" 乌克兰 kun tng teh súiōng ' Nazi chiànsut ‘ ê ké sìnsit siàn chhùiphóe. I ū tī chi̍ttōaⁿ iáⁿphìⁿ tiong kiôngtiāu,"Chiahê 乌克兰 kéngōe m̄ sī Nazi, in sī IT thêngsek siatkèsu, itpoaⁿ lâng, thìthâu saihū, in chíputkò sī pêngbîn."

　　 Chi̍tê ū liôngsim ê Tiongkok lâng tī 乌克兰 hoatsiaⁿ, ta̍ttit lán chunkèng! 　　(220325)


Chù, 乌克兰　奥德萨　 微信 　基辅　华尔街 　chhiáⁿ ēng Hôagí liām


Pe̍h-ōe-jī-pán/白话字版

《Le̍k-sek toán-phêng 》　　　 Lí Lâm-hêng

　　　　　　　 Chi̍t-ê ū liông-sim ê Tiong-kok lâng tī 乌克兰 hoat-siaⁿ!

Ùi Tiong-kok Pak-kiaⁿ khì ê tiān-náu thêng-sek siat-kè-su Ông Kiat-hiân, i soán-te̍k tī phiàu- tiong lâu tī 乌克兰奥德萨, piàn-choh kong-bîn kì-chiá, thàu-kòe Tiong-kok 微信 （We Chat）kah Yo͘tube lio̍k-sio̍k siōng thôaⁿ 乌克兰 chiàn-tē chêng-hóng, tì-sú hō͘ loān thīn Gô-lô ji̍p-chhim 乌克兰ê Tiong-kok sió-hún-âng kā i tah "ûi-pōe kok-ka li̍p-tiûⁿ" , "bîn-cho̍k poān-tô͘" ê pio-á. Kin-nî saⁿ-cha̍p-la̍k hòe ê Ông Kiat-hiân in-ūi ài gē-su̍t, sì tang chêng poaⁿ-lâi 奥德萨tio̍h tùi chit-ê siâⁿ-chhī ê gē-su̍t khì-hun chin kah-ì; put-hēng, jī-goe̍h jī-sì Gô-lô ji̍p-chhim 乌克兰 liáu-āu, Ông Kiat-hiân tio̍h ta̍k kang thàu-kòe 微信 kah Youtube thôaⁿ chi̍t ki iáⁿ-phìⁿ hiòng pē-bú pò pêng-an kah hun-hióng chiàn-tē.

Saⁿ-goe̍h cha̍p-chhit （ pài sì ）基辅ê àm-sî cha̍p tiám, i mn̄g kóng góa ê siaⁿ-im kám ū hiah-ni̍h khióng-pò͘? Nā bô, sī án-chóaⁿ tī基辅 sî-kan ē-po͘ saⁿ tiám, chiah-ni̍h hô-chê kā góa miâ-ē só͘-ū ê tiùⁿ-hō choân-pō͘ san-tû- tiāu, pau-koat góa kah goán pē-bú î-it ē-tàng liân-lo̍k pò pêng-an ê hong-sek long hō͘ lín san-tiāu khì ah! Goán t īchia to ētàng goân-liōng chhèng pàng lo̍h-lâi ê Gô-lô peng, sī án-chóaⁿ lín bē-tàng chiap-siū chi̍t-ê lín ka-kī ê kong-bîn leh? Góa chí-put-kò sī chi̍t-ê tiān-náu thêng-sek siat-kè-su jî-í. Lín ū pē-bú bô? Lín ū kiáⁿ-jî bô? Siat-sú lí ê kiáⁿ-jî tī chiàn-tiûⁿ, lí kám ē kā i kah in pē-bú î-it liân-lo̍k ê hong-sek chhiat-tn̄g? Góa chit-má kan-taⁿē-tàng thàu-kòe pa̍t lâng hiòng góa ê pē-bú choán ta̍t góa iáu oa̍h-teh. Lín chiah-ê lám kha-siàu, hiah-ni̍h chi-chhî Gô-lô tī chia thâi 乌克兰 lâng, án-ne kám tio̍h? Sòa-- lo̍h-khì lín beh chhòng-siáⁿ? Lín iáu ē-tàng chhòng-siáⁿ? Kóng pe̍h-chha̍t sī lín it-koàn ê chok-hong, mā sī lín î-it ê gí-giân. Siat-sú góa pōe-āu ê chó͘-kok pek góa it-tēng tio̍h choh chi̍t hāng soán-te̍k, tàu-té beh kūi lè oa̍h lo̍h-khì ah sī beh khiā lè sí-khì? Sit-lé, góa í-keng khiā chin kú ah, bē hiáu kūi. Lín kan-taⁿē-tàng ēng lí ho̍k lâng, bē-tàng ēng pō-le̍k ho̍k lâng.

　　 kî-si̍t Ông Kiat-hiân put-koán-sî long ē-tàng lī-khui 奥德萨, i khiok soán-te̍k lâu lo̍h-来. I tùi 《华尔街 ji̍t-pò 》 kóng,"Tī chiàn-cheng kiat-sok jî-chhiáⁿ sī 乌克兰 sèng-lī chìn-chêng, góa bē lī-khui chia, in-ūi góa put-ho̍k. Sat-hāi pêng-bîn peh-sèⁿ, oai-khiok sū-si̍t, góa tio̍h sī put-ho̍k. Góa beh lâu tiàm chia, khòaⁿ 乌克兰 chòe-āu ê sèng-lī. Eng-kai bián jōa kú." Ông Kiat-hiân kóng i chi̍t-ê lâng tio̍h bīn-tùi nn̄g-ê chiàn-tiûⁿ, chi̍t-ê sī Gô-lô ê ji̍p-chhim, chi̍t-ê sī ùi kok-lāi tông-pau ê kong-kek.

Tùi Gô-lô lâng, i ho͘-io̍k hô-pêng, i tōa-siaⁿ hoán-kek kò͘-hiong ê Tiong-kok lâng tùi Gô-lô ji̍p-chhim hêng-ûi ê chi-chhî siaⁿ-im. Chū-chiông tē-it phoe Gô-lô poe-tôaⁿ khai-sí phah乌克兰 í-lâi, kúi pah-bān ê Tiong-kok lâng lâi khòaⁿ i tī 微信 （We Chat） téng-bīn hoat-piáu ê kóng-ōe iáⁿ-phìⁿ. Chin kín i ê pîn-tō tio̍h chiâⁿ-choh Tiong-kok chèng-hú kah jîn-bîn koan-chù ê chiau-tiám, ē-tàng hō͘ Tiong-kok chhiûⁿ-á lāi ê lâng khòaⁿ-tio̍h hō͘ chiàn-hóe thún-ta̍h ê 乌克兰, kah Tiong-kok thīn Gô-lô ê li̍p-tiûⁿ tò-hoán, koh khah sī kā Tiong-kok thè Gô-lô soan-thoân" 乌克兰 kun tng teh sú-iōng ' Nazi chiàn-sut ‘ ê ké sìn-sit siàn chhùi-phóe. I ū tī chi̍t-tōaⁿ iáⁿ-phìⁿ tiong kiông-tiāu,"Chiah-ê 乌克兰 kéng-ōe m̄ sī Nazi, in sī IT thêng-sek siat-kè-su, it-poaⁿ lâng, thì-thâu sai-hū, in chí-put-kò sī pêng-bîn."

　　 Chi̍t-ê ū liông-sim ê Tiong-kok lâng tī 乌克兰 hoat-siaⁿ, ta̍t-tit lán chun-kèng! 　　(220325)


Chù, 乌克兰　奥德萨　 微信 　基辅　华尔街 　chhiáⁿ ēng Hôa-gí liām



Ùi中国北京去ê电脑程式设计师王吉贤，伊选择tī炮声中留tī乌克兰奥德萨，变作公民记者，透过中国微信（We Chat）kah Youtube陆续上传乌克兰战地情况，致使hō͘乱thīn俄罗入侵乌克兰ê中国小粉红kā伊贴「违背国家立场」、「民族叛徒」ê标á。今年三十六岁ê王吉贤因为爱艺术，四冬前搬来奥德萨tio̍h对chit-ê城市ê艺术气氛真合意；不幸，二月二四俄罗入侵乌克兰了后，王吉贤tio̍hta̍k工透过微信kah Youtube传一支影片向父母报平安kah分享战地。

三月十七（拜四）基辅ê暗时十点，伊问讲我ê声音kám有hiahni̍h恐怖？若无，是按怎tī基辅时间下晡三点，chiahni̍h和齐kā我名下所有ê帐号全部删除掉，包括我kah阮父母唯一ētàng连络报平安ê方式lónghō͘恁删掉去ah！阮tīchia都ētàng原谅铳放落来ê俄罗兵，是按怎恁bē-tàng接受一个恁家己ê公民咧？我只不过是一个电脑程式设计师而已。恁有父母无？恁有子女无？设使你ê子女tī战场，你kámēkā伊kah in父母唯一连络ê方式切断？我chit-má kan-taⁿē-tàng透过别人向我ê父母转达我犹活teh。恁chiah-ê lám脚数（kha-siàu），hiahni̍h支持俄罗tīchia刣乌克兰人，án-ne kám tio̍h？续落去恁beh创啥？恁犹ē-tàng创啥？讲白贼是恁一贯ê作风，mā是恁唯一ê语言。设使我背后ê祖国逼我一定tio̍h作一项选择：到底beh跪lè活落去ah是behkhiā lè死去？失礼，我已经khiā真久ah，bē晓跪。恁kan-taⁿē-tàng用理服人，bē-tàng用暴力服人。

　　其实王吉贤不管时lóngē-tàng离开奥德萨，伊却选择留落来。伊对《华尔街日报》讲：「Tī战争结束而且是乌克兰胜利进前，我bē离开chia，因为我不服。杀害平民百姓，歪曲事实，我tio̍h是不服。我beh留tiàm chia，看乌克兰最后ê胜利。应该免jōa久。」王吉贤讲伊一个人tio̍h面对两个战场：一个是俄罗ê入侵，一个是ùi国内同胞ê攻击。

对俄罗人，伊呼吁和平，伊大声反击故乡ê中国人对俄罗入侵行为ê支持声音。自从第一批俄罗飞弹开始拍乌克兰以来，几百万ê中国人来看伊tī微信（We Chat）顶面发表ê讲话影片。真紧伊ê频道tio̍h成作中国政府kah人民关注ê焦点，ē-tàng hō͘中国墙á内ê人看tio̍h hō͘战火thún踏ê乌克兰，kah中国thīn俄罗ê立场倒反，koh khah是kā中国替俄罗宣传「乌克兰军当teh使用『纳粹战术』」ê假讯息煽嘴phóe。伊有tī一段影片中强调，「Chiah-ê乌克兰警卫m̄是纳粹，in是IT程式设计师、一般人、剃头师傅，in只不过是平民。」

　　一个有良心ê中国人tī乌克兰发声，值得咱尊敬！　　(220325)


注：乌克兰　奥德萨　微信　基辅　华尔街　纳粹　　请用华语念