《绿色短评》

 | | | 转寄

中国khiā koân山看马相that。有巧！

作者 李南衡, ChoânTâijī/全台字 by Chng Hūiphêng 2022.04.17

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　 Lí Lâmhêng

　　　　 Tiongkok khiā koân soaⁿ khòaⁿ bé sio that. Ū khiáu!

　　 Jīgoe̍h jīsì Gôlô ji̍p chhim 乌克兰, kengkòe chi̍t kò goe̍h liáuāu, choân sèkài ū nn̄g chióng siaⁿim lóng tùi Tiongkok lâi. Chi̍t chióng sī hibāng thêng chiàn ê siaⁿim, lóng kóng beh khǹg Gôlô Phû Teng chóngthóng thêng chiàn, kantaⁿ Tiongkok kokka chúse̍k 习近平 ū hoat nāniā, inūi Tiongkok sī Gôlô siōng hó ê pêngiú. Mā sī inūi ánne, só͘í lēnggōa chi̍t chióng siaⁿim iûgoân hiòng Tiongkok lâi, hoânló Tiongkok ē chhutchhiú kunsū oânchō͘ Gôlô.

　　 Bôkoán tó chi̍t chióng siūⁿhoat ê lâng, lóng sī bô liáukái Tiongkok kah 习近平 chúse̍k. Nn̄g chiah bé teh sio that, ná ū hiah gōng ê lâng cháukhì choh kongchhin ê ? Bêngbêng khòaⁿ Gôlô tī 乌克兰ê chiànsū íkeng hāmji̍p chìn bô pō͘, thè bô lō͘ ê làmchhân, nā chhutbīn choh kongchhin khǹg Gôlô Phû Teng chóngthóng hó siu peng, suijiân sī chhut tī hóì beh hō͘ Phû Teng hó lo̍h lâuthui. Tānsī só͘ū ê to̍kchhâi chiá lóng chūsìn móamóa, ná ū khólêng thiaⁿ pa̍t lâng ê ōe?

　　 Hoânló Tiongkok ē khì kunoān Gôlô ê tongjiân mā sī gōng lâng. Saⁿgoe̍h jīkáu, 乌克兰 kokhông kongpò͘ Gôlô kun siōng kài sin ê chiàn sún thóngkè, Ùi jīgoe̍h jīsì Gôlô kun ji̍p chhim kàu saⁿgoe̍h jīkáu chásî la̍k tiám ûichí, Gôlô kun tāiiok tīnbông 1 bān 7,200 lâng, 乌克兰 kun chhuihúi Gôlô kun 597 tâi chiànchhia, 1,710 tâi chng kah chhia, 303 mn̂g hóephàu hēthóng, 96 tâi to koán hóechìⁿchhia, 54 cho͘ hôngkhang hēthóng, 127 tâi kunki, 129 chiah ti̍tsengki, 1,178 tâi koksek chhialióng , 7 tâi kàmthéng, 73 tâi iûkoànchhia, 71 chiah bôlângki, 21 ê te̍ksû siatpī kah 4 ê chiànsut poetôaⁿ chàikū. Kàu saⁿgoe̍h jīpeh ûichí, Gôlô ji̍p chhim 乌克兰 chiàncheng chìchió sitkhì chhit miâ kokip chiòngléng kah 16 miâ kokip chíhuikoaⁿ. Kèsio̍k ánne koh chiàn nn̄g kò goe̍h, saⁿ kògoe̍h, sèkài tējī tōa kunsū kok, koh ū sèkài siōng chē hu̍tchú búkhì ê Gôlô ē piànchoh siáⁿ khoán? Tiongkok tongjiân chiok ài khòaⁿ.

　　 Ūitio̍h pangchān 乌克兰, Bíkok chhōathâu ê "pak iok" kokka tōala̍t kunoān 乌克兰, Bíkok chóngthóng Pài Teng siosòa soanpò͘ thêkiong 乌克兰 kèta̍t 10 ek bíkim ê kunoān, koh soanpò͘ tùi 乌克兰 chēngka 100 chiah" tôaⁿ hông to"（Kamekaze sîn hong ） sióhêng bôlângki . Auchiu Lísūhōe thêkiong gia̍h gōa ê 3 ek Auphiò ūsoàn, koh beh thêkiong 乌克兰 só͘ suiàu ê hôngōe kunpī. Tekkok chengsàng 1,500 lia̍p "chìⁿ sek" hôngkhong poetôaⁿ kah 100 ki MG3 kchhèng. Czech chengsàng kèta̍t 760 bān Auphiò ê búkhì, Sulo̍kba̍k chengsàng kèta̍t 260 bān Auphiò ê búkhì kah 640 bān Auphiò ê kîtha bu̍tchu, Hoatkok koanchēng 3.5 ek Auphiò ê hônggūsèng búkhì, Hôlân chengsàng 200 lia̍p tòa leh kiâⁿ ê "chhì chiam" hôngkhong poetôaⁿ, lûita̍t hēthóng, sàulûi kikhìlâng; 爱沙尼亚 chengsàng piochhiuⁿ sek hoánchiànchhia poetôaⁿ kah iliâu siat pī. Pakiok kokka itti̍t chioân, Gôlô kah 乌克兰 Pakiok kokka jú chiàn jú jia̍t, nn̄g pêng só͘ siotiāu ê chîⁿ tongjiân jú lâi jú chē, siōng hó sī nn̄g pêng lóng phah kah chhichhám lo̍kphek. Chiàntiûⁿ lī Tiongkok hn̄ghn̄g, oânchoân bē siū sionghāi súnsit. Chhùitûn phôe jînchêng Tiongkok ē chhut tit, kunsū oânchō͘ Gôlô? Biánkóng. Bíkok Pài Teng chóngthóng kah Tiongkok 习近平 chúse̍k sīsìn hōegī, Pài Teng te̍kpia̍t hoanhù Tiongkok choa̍ttùi bē sái kunoān Gôlô, nā ûihoán ē siūtio̍h giâmle̍k ê chèchhâi. Ná siōngthian sù chiah hó ê chiàkháu, hāi 习近平 hoaⁿhí kah bē khùn tit, liân bînbāng mā ē bîbîá chhiò.

Tiongkok khiā koânsoaⁿ khòaⁿ bé sio that, ū khiáu! (220401)


Chù, 乌克兰　爱沙尼亚　 习近平 　chhiáⁿ liām Hôagí


Pe̍h-ōe-jī-pán/白话字版

《 Le̍k-sek toán-phêng 》　　　 Lí Lâm-hêng

　　　　 Tiong-kok khiā koân soaⁿ khòaⁿ bé sio that. Ū khiáu!

　　 Jī-goe̍h jī-sì Gô-lô ji̍p chhim 乌克兰, keng-kòe chi̍t kò goe̍h liáu-āu, choân sè-kài ū nn̄g chióng siaⁿ-im lóng tùi Tiong-kok lâi. Chi̍t chióng sī hi-bāng thêng chiàn ê siaⁿ-im, lóng kóng beh khǹg Gô-lô Phû Teng chóng-thóng thêng chiàn, kan-taⁿ Tiong-kok kok-ka chú-se̍k 习近平 ū hoat nā-niā, in-ūi Tiong-kok sī Gô-lô siōng hó ê pêng-iú. Mā sī in-ūi án-ne, só͘-í lēng-gōa chi̍t chióng siaⁿ-im iû-goân hiòng Tiong-kok lâi, hoân-ló Tiong-kok ē chhut-chhiú kun-sū oân-chō͘ Gô-lô.

　　 Bô-koán tó chi̍t chióng siūⁿ-hoat ê lâng, lóng sī bô liáu-kái Tiong-kok kah 习近平 chú-se̍k. Nn̄g chiah bé teh sio that, ná ū hiah gōng ê lâng cháu-khì choh kong-chhin ê ? Bêng-bêng khòaⁿ Gô-lô tī 乌克兰ê chiàn-sū í-keng hām-ji̍p chìn bô pō͘, thè bô lō͘ ê làm-chhân, nā chhut-bīn choh kong-chhin khǹg Gô-lô Phû Teng chóng-thóng hó siu peng, sui-jiân sī chhut tī hó-ì beh hō͘ Phû Teng hó lo̍h lâu-thui. Tān-sī só͘-ū ê to̍k-chhâi chiá lóng chū-sìn móa-móa, ná ū khó-lêng thiaⁿ pa̍t lâng ê ōe?

　　 Hoân-ló Tiong-kok ē khì kun-oān Gô-lô ê tong-jiân mā sī gōng lâng. Saⁿ-goe̍h jī-káu, 乌克兰 kok-hông kong-pò͘ Gô-lô kun siōng kài sin ê chiàn sún thóng-kè, Ùi jī-goe̍h jī-sì Gô-lô kun ji̍p chhim kàu saⁿ-goe̍h jī-káu chá-sî la̍k tiám ûi-chí, Gô-lô kun tāi-iok tīn-bông 1 bān 7,200 lâng, 乌克兰 kun chhui-húi Gô-lô kun 597 tâi chiàn-chhia, 1,710 tâi chng kah chhia, 303 mn̂g hóe-phàu hē-thóng, 96 tâi to koán hóe-chìⁿ-chhia, 54 cho͘ hông-khang hē-thóng, 127 tâi kun-ki, 129 chiah ti̍t-seng-ki, 1,178 tâi kok-sek chhia-lióng , 7 tâi kàm-théng, 73 tâi iû-koàn-chhia, 71 chiah bô-lâng-ki, 21 ê te̍k-sû siat-pī kah 4 ê chiàn-sut poe-tôaⁿ chài-kū. Kàu saⁿ-goe̍h jī-peh ûi-chí, Gô-lô ji̍p chhim 乌克兰 chiàn-cheng chì-chió sit-khì chhit miâ ko-kip chiòng-léng kah 16 miâ ko-kip chí-hui-koaⁿ. Kè-sio̍k án-ne koh chiàn nn̄g kò goe̍h, saⁿ kò-goe̍h, sè-kài tē-jī tōa kun-sū kok, koh ū sè-kài siōng chē hu̍t-chú bú-khì ê Gô-lô ē piàn-choh siáⁿ khoán? Tiong-kok tong-jiân chiok ài khòaⁿ.

　　 Ūi-tio̍h pang-chān 乌克兰, Bí-kok chhōa-thâu ê "pak iok" kok-ka tōa-la̍t kun-oān 乌克兰, Bí-kok chóng-thóng Pài Teng sio-sòa soan-pò͘ thê-kiong 乌克兰 kè-ta̍t 10 ek bí-kim ê kun-oān, koh soan-pò͘ tùi 乌克兰 chēng-ka 100 chiah" tôaⁿ hông to"（Kamekaze sîn hong ） sió-hêng bô-lâng-ki . Au-chiu Lí-sū-hōe thê-kiong gia̍h gōa ê 3 ek Au-phiò ū-soàn, koh beh thê-kiong 乌克兰 só͘ su-iàu ê hông-ōe kun-pī. Tek-kok cheng-sàng 1,500 lia̍p "chìⁿ sek" hông-khong poe-tôaⁿ kah 100 ki MG3 k-chhèng. Czech cheng-sàng kè-ta̍t 760 bān Au-phiò ê bú-khì, Su-lo̍k-ba̍k cheng-sàng kè-ta̍t 260 bān Au-phiò ê bú-khì kah 640 bān Au-phiò ê kî-tha bu̍t-chu, Hoat-kok koan-chēng 3.5 ek Au-phiò ê hông-gū-sèng bú-khì, Hô-lân cheng-sàng 200 lia̍p tòa leh kiâⁿ ê "chhì chiam" hông-khong poe-tôaⁿ, lûi-ta̍t hē-thóng, sàu-lûi ki-khì-lâng; 爱沙尼亚 cheng-sàng pio-chhiuⁿ sek hoán-chiàn-chhia poe-tôaⁿ kah i-liâu siat pī. Pak-iok kok-ka it-ti̍t chi-oân, Gô-lô kah 乌克兰 Pak-iok kok-ka jú chiàn jú jia̍t, nn̄g pêng só͘ sio-tiāu ê chîⁿ tong-jiân jú lâi jú chē, siōng hó sī nn̄g pêng lóng phah kah chhi-chhám lo̍k-phek. Chiàn-tiûⁿ lī Tiong-kok hn̄g-hn̄g, oân-choân bē siū siong-hāi sún-sit. Chhùi-tûn phôe jîn-chêng Tiong-kok ē chhut tit, kun-sū oân-chō͘ Gô-lô? Bián-kóng. Bí-kok Pài Teng chóng-thóng kah Tiong-kok 习近平 chú-se̍k sī-sìn hōe-gī, Pài Teng te̍k-pia̍t hoan-hù Tiong-kok choa̍t-tùi bē sái kun-oān Gô-lô, nā ûi-hoán ē siū-tio̍h giâm-le̍k ê chè-chhâi. Ná siōng-thian sù chiah hó ê chià-kháu, hāi 习近平 hoaⁿ-hí kah bē khùn tit, liân bîn-bāng mā ē bî-bî-á chhiò.

Tiong-kok khiā koân-soaⁿ khòaⁿ bé sio that, ū khiáu! (220401)


Chù, 乌克兰　爱沙尼亚　 习近平 　chhiáⁿ liām Hôa-gí



　　二月二四俄罗入侵乌克兰，经过一个月了后，全世界有两种声音lóng对中国来。一种是希望停战ê声音，lóng讲beh劝俄罗浮丁总统停战，kan-taⁿ中国国家主席习近平有法nā-niā，因为中国是俄罗上好ê朋友。Mā是因为án-ne，所以另外一种声音犹原向中国来，烦恼中国ē出手军事援助俄罗。

　　无管tó一种想法ê人，lóng是无了解中国kah习近平主席。两只马teh相that，ná有hiah戆ê人走去作公亲ê？明明看俄罗tī乌克兰ê战事已经陷入进无步、退无路ê湳田，若出面作公亲劝俄罗浮丁总统好收兵，虽然是出tī好意beh hō͘浮丁好落楼梯。但是所有ê独裁者lóng自信满满，ná有可能听别人ê话？

　　烦恼中国ē去军援俄罗ê当然mā是戆人。三月二九，乌克兰国防公布俄罗军上kài新ê战损统计：Ùi二月二四俄罗军入侵到三月二九早时六点为止，俄罗军大约阵亡1万7,200人，乌克兰军摧毁俄罗军597台战车、1,710台装甲车、303门火炮系统、96台多管火箭车、54组防空系统、127台军机、129只直升机、1,178台各式车辆、7台舰艇、73台油罐车、71只无人机、21个特殊设备kah 4个战术飞弹载具。到三月二八为止，俄罗入侵乌克兰战争至少失去七名高级将领kah 16名高级指挥官。继续án-ne koh战两个月、三个月，世界第二大军事国、koh有世界上chē核子武器ê俄罗ē变作啥款？中国当然足爱看。

　　为tio̍h帮赞乌克兰，美国chhōa头ê「北约」国家大力军援乌克兰：美国总统拜登相续宣布提供乌克兰价值10亿美金ê军援，koh宣布对乌克兰增加100只「弹簧刀」（Kamikaze神风）小型无人机。欧洲理事会提供额外ê3亿欧元预算，koh beh提供乌克兰所需要ê防卫军备。德国赠送1,500粒「箭式」防空飞弹kah 100枝MG3机铳。捷克赠送价值760万欧元ê武器，斯洛瓦克赠送价值260万欧元ê武器kah 640万欧元ê其他物资，法国捐赠3.5亿欧元ê防御性武器，荷兰赠送200粒带leh行ê「刺针」防空飞弹、雷达系统、扫雷机器人；爱沙尼亚赠送标枪式反坦克飞弹kah医疗设备。北约国家一直支援，俄罗kah乌克兰北约国家愈战愈热，两旁所烧掉ê钱当然愈来愈chē，上好是两旁lóng拍kah凄惨落魄。战场离中国远远，完全bē受伤害损失。嘴唇皮人情中国ē出得，军事援助俄罗？免讲。美国拜登总统kah中国习近平主席视讯会议，拜登特别吩咐中国绝对bē使军援俄罗，若违反ē受tio̍h严励ê制裁。ná像天赐chiah好ê藉口，害习近平欢喜kah bē困得，连眠梦māē微微á笑。

中国khiākoân山看马相that，有巧！ (220401)


注：乌克兰　爱沙尼亚　习近平　　请念华语