《绿色短评》

 | | | 转寄

叛乱团体beh ná有啥物外交部发言人？

作者 李南衡, ChoânTâijī/全台字 by Chng Hūiphêng 2022.02.20

Choânbîn Tâioânjī pán/全民台湾字版简称ChoânTâiJī
《 Le̍ksek toánphêng 》 Lí Lâmhêng
Poānloān thoânthé beh ná ū siáⁿmi̍h gōakaupō͘ hoatgiânjîn?

　　 Itgoe̍h jīpeh, hùchóngthóng Lōa Chhengtek chhamka 宏都拉斯chóngthóng chiūchit tiánlé ê sî, kah Bíkok hùchóngthóng贺锦丽ū hō͘siong chhéngan kóng kúikùōe, āulâi 贺锦丽 chhiūⁿtâi tìsû ê sî, mā te̍kpia̍t hiòng Lōa Chhengtek tìì, jîchhiáⁿ chí Lōa Chhengtek sī kah i "tùiténg" ê Tâioân koaⁿoân, ìsù sī kóng kāngkhoán sī hùchóngthóng.

　　 Itgoe̍h jīkáu, Tiongkok gōakaupō͘ hoatgiânjîn Tiō Li̍pkian mē kóng,"Tâioân chíputkò sī Tiongkok ê chi̍tê séng, beh ná ū siáⁿmi̍h ' hùchóngthóng 』!" Koh kóng Tionghong itkoàn hoántùi BíTâi chìnhêng jīmhô hêngsek ê koaⁿhong ónglâi, Lōa Chhengtek kakī kóng sī būsi̍t ê Tâito̍k kangchokchiá, ū kúi piàn hoatpiáu Tâito̍k giânlūn, Bíhong engkai khaksiú chi̍tê Tiongkok goânchek kah TiongBí saⁿê liânha̍p kongpò ê kuitēng, giâmsiok tùithāi Tionghong li̍ptiûⁿ kah koaiⁿchhiat, bētàng hiòng Tâito̍k sèle̍k hoatchhut jīmhô chhògō͘ ê sìnhō.

　　 Itgoe̍h saⁿcha̍p àm, Lio̍kúihōe giâmchiàⁿ sengbêng, Lōa hùchóngthóng chhōa thoân chhamka 宏都拉斯 chóngthóng chiūchit tiánlé, tāipiáu lán chènghú kah jînbîn tùi sin chènghú kiantēng ê chichhî, mā kah iúpang kah Bíkok téng iúhó kokka chiàⁿ, hù goânsiú, te̍ksàithoân tāipiáu kauliû; Tionghôa Bînkok sī chúkoân kokka, Tâioân chūlâi m̄ sī Tionghôa Jînbîn Kiōnghôkok ê chi̍tpō͘hūn, ná sī siáⁿmi̍h in ê chi̍t séng?

　　 Itgoe̍h saⁿcha̍p àm, Tiongkok Kokbîntóng Bûnthôaⁿhōe chúúi Lêng Tô thàukòe sinbûnkó piáusī, Tionghôa Bînkok sī chi̍tê chúkoân to̍kli̍p ê kokka, Tionghôa Bînkok chū chhòngkiàn ílâi, tio̍h siat ū chóngthóng chitbū; ikū "Tionghôa Bînkok hiànhoat" soánkí sánseng ê chóngthóng, hùchóngthóng, koânuisèng kah ha̍phoatsèng bô iôngín Tāilio̍k tongkio̍k chhah chhùi.

　　Khah khósioh ê sī, bôkoán sī Lio̍kúihōe á・sī Tiongkok Kokbîntóng, lóng sī ēng sinsū ê khùikháu teh tùi thó͘húi kóngōe, náchhiūⁿ bángá tèng gûkak —bē chiūⁿ mā bē thiàⁿ, si̍tchāi sī bôchháikang.

　　 Itgoe̍h saⁿcha̍p, chèngtī phênglūnka 黄暐瀚tī bīnchheh kóng, i ētàng líkái, khiā tī Tiongkok ê li̍ptiûⁿ ūi siáⁿmi̍h m̄ sêngjīn Tâioân sī chi̍tê kokka. Tānsī Tâioân ê chèngtī jînbu̍t, nāsī bô tùi Tiō Li̍pkian ê hoatgiân khònggī hoántùi, iáu koh beh chhamsoán Tionghôa Bînkok ê kongchit chhòng siáⁿ? khólêng sī góa ba̍kchiu chhùhchhuh, bô khòaⁿtio̍h Tiongkok Kokbîntóng ê chèngtī jînbu̍t tùi Tiō Li̍pkian ê bújio̍k ū chi̍ttiámá hoánèng. Chêng chi̍tchāmá ta̍kê teh tâmlūn Chiúⁿ Kengkok, siatsú chitmá ê chóngthóng sī Chiúⁿ Kengkok, i ê hùchóngthóng hông ánne bújio̍k, Chiúⁿ Kengkok ē ánchóaⁿ kóng leh? Ē kìtit 2003 nî Tâioân beh chhamka WHA, ū kìchiá mn̄g kóng "lín káⁿ bô thiaⁿtio̍h Tâioân 2,300 bān jînbîn ê suiàu?" Tiongkok tōakoaⁿ 沙祖康kóng,"谁理你们", chū ánne liáuāu Tiongkok tōakoaⁿ bôlūn kóng siáⁿmi̍h ōe, Tâioânlâng chá tio̍h si̍pkoàn bē siūkhì ah.

　　 黄暐瀚kóng, nā kóng Lōa Chhengtek m̄ sī hùchóngthóng. Ánne Gô͘ Tungī mā m̄sī, Siau Bāntiông, Lī Siùliân, Liân Chiàn, Lí Goânchhok, Lí Tenghui lóngchóng m̄sī. Siatsú nn̄g hōaⁿ iûgoân beh ánne hō͘siong diss ( ìsù sī "bô chuntiōng"), lán chit pêng sī m̄sī mā engkai hôe in chi̍t kù, "Tāilio̍k chíputkò sī chi̍tê poānloān thoânthé, beh ná ū siáⁿmi̍h gōakaupō͘ hoatgiânjîn leh?"

Chitkù ōe khaksi̍t mn̄g liáu sông koh ū la̍t. Chiâⁿ chàn! 　　(220204)
Chù,宏都拉斯　贺锦丽　黄暐瀚 沙祖康 "谁理你们" chhiáⁿ ēng Hôagí liām

Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng
Poān-loān thoân-thé beh ná ū siáⁿ-mi̍h gōa-kau-pō͘ hoat-giân-jîn?

　　 It-goe̍h jī-peh, hù-chóng-thóng Lōa Chheng-tek chham-ka 宏都拉斯chóng-thóng chiū-chit tián-lé ê sî, kah Bí-kok hù-chóng-thóng贺锦丽ū hō͘-siong chhéng-an kóng kúi-kù-ōe, āu-lâi 贺锦丽 chhiūⁿ-tâi tì-sû ê sî, mā te̍k-pia̍t hiòng Lōa Chheng-tek tì-ì, jî-chhiáⁿ chí Lōa Chheng-tek sī kah i "tùi-téng" ê Tâi-oân koaⁿ-oân, ì-sù sī kóng kāng-khoán sī hù-chóng-thóng.

　　 It-goe̍h jī-káu, Tiong-kok gōa-kau-pō͘ hoat-giân-jîn Tiō Li̍p-kian mē kóng,"Tâi-oân chí-put-kò sī Tiong-kok ê chi̍t-ê séng, beh ná ū siáⁿ-mi̍h ' hù-chóng-thóng 』!" Koh kóng Tiong-hong it-koàn hoán-tùi Bí-Tâi chìn-hêng jīm-hô hêng-sek ê koaⁿ-hong óng-lâi, Lōa Chheng-tek ka-kī kóng sī bū-si̍t ê Tâi-to̍k kang-chok-chiá, ū kúi piàn hoat-piáu Tâi-to̍k giân-lūn, Bí-hong eng-kai khak-siú chi̍t-ê Tiong-kok goân-chek kah Tiong-Bí saⁿ-ê liân-ha̍p kong-pò ê kui-tēng, giâm-siok tùi-thāi Tiong-hong li̍p-tiûⁿ kah koaiⁿ-chhiat, bē-tàng hiòng Tâi-to̍k sè-le̍k hoat-chhut jīm-hô chhò-gō͘ ê sìn-hō.

　　 It-goe̍h saⁿ-cha̍p àm, Lio̍k-úi-hōe giâm-chiàⁿ seng-bêng, Lōa hù-chóng-thóng chhōa thoân chham-ka 宏都拉斯 chóng-thóng chiū-chit tián-lé, tāi-piáu lán chèng-hú kah jîn-bîn tùi sin chèng-hú kian-tēng ê chi-chhî, mā kah iú-pang kah Bí-kok téng iú-hó kok-ka chiàⁿ, hù goân-siú, te̍k-sài-thoân tāi-piáu kau-liû; Tiong-hôa Bîn-kok sī chú-koân kok-ka, Tâi-oân chū-lâi m̄ sī Tiong-hôa Jîn-bîn Kiōng-hô-kok ê chi̍t-pō͘-hūn, ná sī siáⁿ-mi̍h in ê chi̍t séng?

　　 It-goe̍h saⁿ-cha̍p àm, Tiong-kok Kok-bîn-tóng Bûn-thôaⁿ-hōe chú-úi Lêng Tô thàu-kòe sin-bûn-kó piáu-sī, Tiong-hôa Bîn-kok sī chi̍t-ê chú-koân to̍k-li̍p ê kok-ka, Tiong-hôa Bîn-kok chū chhòng-kiàn í-lâi, tio̍h siat ū chóng-thóng chit-bū; i-kū "Tiong-hôa Bîn-kok hiàn-hoat" soán-kí sán-seng ê chóng-thóng, hù-chóng-thóng, koân-ui-sèng kah ha̍p-hoat-sèng bô iông-ín Tāi-lio̍k tong-kio̍k chhah- chhùi.

　　Khah khó-sioh ê sī, bô-koán sī Lio̍k-úi-hōe á-・sī Tiong-kok Kok-bîn-tóng, lóng sī ēng sin-sū ê khùi-kháu teh tùi thó͘-húi kóng-ōe, ná-chhiūⁿ báng-á tèng gû-kak —bē chiūⁿ mā bē thiàⁿ, si̍t-chāi sī bô-chhái-kang.

　　 It-goe̍h saⁿ-cha̍p, chèng-tī phêng-lūn-ka 黄暐瀚tī bīn-chheh kóng, i ē-tàng lí-kái, khiā tī Tiong-kok ê li̍p-tiûⁿ ūi siáⁿ-mi̍h m̄ sêng-jīn Tâi-oân sī chi̍t-ê kok-ka. Tān-sī Tâi-oân ê chèng-tī jîn-bu̍t, nā-sī bô tùi Tiō Li̍p-kian ê hoat-giân khòng-gī hoán-tùi, iáu koh beh chham-soán Tiong-hôa Bîn-kok ê kong-chit chhòng siáⁿ? khó-lêng sī góa ba̍k-chiu chhùh-chhuh, bô khòaⁿ-tio̍h Tiong-kok Kok-bîn-tóng ê chèng-tī jîn-bu̍t tùi Tiō Li̍p-kian ê bú-jio̍k ū chi̍t-tiám-á hoán-èng. Chêng chi̍t-chām-á ta̍k-ê teh tâm-lūn Chiúⁿ Keng-kok, siat-sú chit-má ê chóng-thóng sī Chiúⁿ Keng-kok, i ê hù-chóng-thóng hông án-ne bú-jio̍k, Chiúⁿ Keng-kok ē án-chóaⁿ kóng leh? Ē kì-tit 2003 nî Tâi-oân beh chham-ka WHA, ū kì-chiá mn̄g kóng "lín káⁿ bô thiaⁿ-tio̍h Tâi-oân 2,300 bān jîn-bîn ê su-iàu?" Tiong-kok tōa-koaⁿ 沙祖康kóng,"谁理你们", chū án-ne liáu-āu Tiong-kok tōa-koaⁿ bô-lūn kóng siáⁿ-mi̍h ōe, Tâi-oân-lâng chá tio̍h si̍p-koàn bē siū-khì ah.

　　 黄暐瀚kóng, nā kóng Lōa Chheng-tek m̄ sī hù-chóng-thóng. Án-ne Gô͘ Tun-gī mā m̄-sī, Siau Bān-tiông, Lī Siù-liân, Liân Chiàn, Lí Goân-chhok, Lí Teng-hui lóng-chóng m̄-sī. Siat-sú nn̄g hōaⁿ iû-goân beh án-ne hō͘-siong diss ( ì-sù sī "bô chun-tiōng"), lán chit pêng sī m̄-sī mā eng-kai hôe in chi̍t kù, "Tāi-lio̍k chí-put-kò sī chi̍t-ê poān-loān thoân-thé, beh ná ū siáⁿ-mi̍h gōa-kau-pō͘ hoat-giân-jîn leh?"

Chit-kù ōe khak-si̍t mn̄g liáu sông koh ū la̍t. Chiâⁿ chàn! 　　(220204)
Chù,宏都拉斯　贺锦丽　黄暐瀚 沙祖康 "谁理你们" chhiáⁿ ēng Hôa-gí liām


　　一月二八，副总统赖清德参加宏都拉斯总统就职典礼ê时，kah美国副总统贺锦丽有互相请安讲几句话，后来贺锦丽上台致词ê时，mā特别向赖清德致意，而且指赖清德是kah伊「对等」ê台湾官员，意思是讲仝款是副总统。

　　一月二九，中国外交部发言人赵立坚骂讲：「台湾只不过是中国ê一个省，beh那有啥物『副总统』！」Koh讲中方一贯反对美台进行任何形式ê官方往来，赖清德家己讲是务实ê台独工作者，有几遍发表台独言论，美方应该khak守一个中国原则kah中美三个联合公报ê规定，严肃对待中方立场kah关切，bē-tàng向台独势力发出任何错误ê信号。

　　一月三十暗，陆委会严正声明，赖副总统chhōa团参加宏都拉斯总统就职典礼，代表咱政府kah人民对新政府坚定ê支持，mā kah友邦kah美国等友好国家正、副元首、特使团代表交流；中华民国是主权国家，台湾自来m̄是中华人民共和国ê一部分、那是啥物inê一省？

　　一月三十暗，中国国民党文传会主委凌涛透过新闻稿表示，中华民国是一个主权独立ê国家，中华民国自创建以来，tio̍h 设有总统职务；依据「中华民国宪法」选举产生ê总统、副总统，权威性kah合法性无容允大陆当局插嘴。

　　Khah可惜ê是，无管是陆委会á是中国国民党，lóng是用绅士ê气口teh对土匪讲话，ná像蠓á叮牛角—bē chiūⁿ mā bē疼，实在是无彩工。

　　一月三十，政治评论家黄暐瀚tī面册讲：伊ētàng理解，khiā tī中国ê立场为啥物m̄承认台湾是一个国家。但是台湾ê政治人物，若是无对赵立坚ê发言抗议反对，犹koh beh参选中华民国ê公职创啥？可能是我目睭chhùh-chhuh，无看tio̍h中国国民党ê政治人物对赵立坚ê侮辱有一点á反应。前一站á ta̍k个teh谈论蒋经国，设使chit-máê总统是蒋经国，伊ê副总统hôngán-ne侮辱，蒋经国ē按怎讲咧？Ē记得2003年台湾beh参加WHA，有记者问讲「恁敢无听tio̍h台湾2,300万人民ê需要？」中国大官沙祖康讲：「谁理你们」，自án-ne了后中国大官无论讲啥物话，台湾人早tio̍h习惯bē受气ah。

　　黄暐瀚讲，若讲赖清德m̄是副总统。Án-ne吴敦义mā m̄是，萧万长、吕秀莲、连战、李元簇、李登辉lóng总m̄是。设使两岸犹原beh án-ne互相diss（意思是「无尊重」），咱chit旁是m̄是mā应该回in一句：「大陆只不过是一个叛乱团体，beh ná有啥物外交部发言人咧？」

Chit句话确实问了sông koh有力。诚赞！　　(220204)
注：宏都拉斯　贺锦丽　黄暐瀚　沙祖康讲：「谁理你们」　　请用华语念