《绿色短评》

 | | | 转寄

台北市议会chit条预算「冻」（tòng）了chiâⁿ赞！

作者 李南衡, ChoânTâijī/全台字 by Chng Hūiphêng 2022.02.13

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　　　 Lí Lâmhêng

　　　 Tâipak chhīgīhōe chit tiâu ūsoàn tòng liáu chiâⁿ chàn!

Tâipak chhīgīhōe símgī Koa Bûntiat chhītiúⁿ jīm kî chòeāu chi̍t nî nîtō͘ chóng ūsoàn àn, kengkòe la̍k kang chèngtóng chhamsiông liáuāu, itgoe̍h jīsì kiatsok; kîtiong siōngkài ū chenggī ê "siang siâⁿ lūn tôaⁿ" ūsoàn, Bînchìntóng siūⁿ kóng kīnlâi Chiná kunki, kunkàm itti̍t lâi jiáuloān Tâioân, só͘í thêchhut "m̄koh chheh", iaukiû "siang siâⁿ lūn tôaⁿ" kípān chêng, Chiná kunki, kunkàm nā kèsio̍k lâi jiáuloān Tâioân, chit tiâu ūsoàn tio̍h bē hō͘ tāngiōng, ìkiàn mā ū tittio̍h Chiná Kokbîntóng, Sintóng tóngthoân ê tôngì, ta̍tsêng koatgī.

　　 Kinkì Kokhôngpō͘ hoatpò͘ ê "cheksî kunsū tōngthài" chusìn, itgoe̍h jīsaⁿ, Chiná phài chhut 39 chiah pái kunki chìnji̍p lán kok Sailâm Khonge̍k Hông khang Sekpa̍tkhu, itgoe̍h jīsì koh phài chhut 13 chiah pái kunki lâi jiáuloān, nn̄g kang tàu khílâi, jiáuloān Tâioân ê Chiná kunki ū 52 chiah pái. Khíūchhúlí, chinchiàⁿ lóng bô i hoat?
　　 Tâipakchhī chènghú kiⁿîtō͘ ūsoàn, hòechhut pīⁿlia̍t 1,745.32 ek, hòe ji̍p sī 1,719.97 ek, itgoe̍h cha̍pchhit gīhōe khaisí chìnji̍p chèngtóng chhamsiông; "siâⁿchhī lūntôaⁿ" siongkoan hùṳōng iok 140 bān, Bînchìntóngthoân kah Siābîntóng gīoân Miâu Phokngálóng chútiuⁿ choânpō͘ santû, Chiná Kokbîntóng kah Sintóng khenghiòng póliû, chhamsiông bô kiatkó, goânpún tio̍h beh chìnji̍p piáukoat, m̄koh gītiúⁿ Tân Gímsiông chhâisī "kok thè chi̍t pō͘ " kèsio̍k chhamsiông, itgoe̍h jīsì chiah tittio̍h kiōngsek.

Bînchìntóngthoân chóngtiàu Niû Bûnkiat kóng,"siang siâⁿ lūntôaⁿ" kípān hiah chē nî, kòekhì lóng m̄bat santû kòe chi̍tkak gîn ê ūsoàn, m̄koh chòekīn nîgōa, Chiná kunki itti̍t lâi jiáuloān Tâioân, só͘í Bînchìntóngthoân chútiuⁿ chit tiâu ūsoàn choânpō͘ santû, siang siâⁿ bián siáⁿ kauliû. M̄koh Nâiâⁿ iûgoân siūⁿkóng engkai khóliōng chéngthé nn̄g hōaⁿ ê khìhun, chiah ē thêchhut chit ê "tānsu" choh piáuthài. Chiná Kokbîntóngthoân sukìtiúⁿ Ông Hingî chíchhut, tóngthoân chichhî póliû "siâⁿchhī lūntôaⁿ" ūsoàn, m̄koh Bînchìntóng thêchhut chòekīn Chiná kunki jiáuloān Tâioân phòhāi nn̄g hōaⁿ khìhun, khaksi̍t hō͘ Tâioân jînbîn koankám chin bái, só͘í tôngì chit ê "tānsu". Bînchìntóng kah Siābîntóng gīoân kianchhî, nā bô tī "tānsu" lāité chùbêng Chiná kunki, kunkàm, bô hoattō͘ chinchiàⁿ ta̍ttio̍h bêngkhak piáuthài ê ìgī, chòeāu mā ū tittio̍h Chiná Kokbîntóng kah Sintóng ê tôngì. Putkò gīhōe iûgoân chichhî kípān, îchhî siâⁿchhī kauliû, kípān ê sîki kau hō͘ Tâipakchhīhú koattēng, gīhōe bô pitiàu tùi chit hāng pōesu. Sintóng tiàuchi̍pjîn Phoaⁿ Hoâichong kóng, i kòjîn chútiuⁿ nāsī kàusî nn̄g hōaⁿ khìhun ū khah hó tio̍h kípān, nā bôhó tio̍h ētàng chhúsiau.

Ithiòng chútiuⁿ "nn̄g hōaⁿ chi̍tkechhin"ê Tâipak chhītiúⁿ Koa Bûntiat tio̍h ài khì siūⁿ pānhoat, khòaⁿ i sī m̄ sī ū hoattō͘ khì kah Chiná iúkoan tanūi kóngkóng leh, Chiná kunki, kunkàm hioh chi̍tchāmá mài lâi loān, hō͘ i ū ūsoàn lâi pān "siang siâⁿ lūntôaⁿ". Tán góa pān liáu, lín beh ánchóaⁿ jiáuloān tio̍h kah góa Koa Bûntiat chhītiúⁿ bô koanhē. Chiná nā chinchiàⁿ ū hō͘ Koa chhītiúⁿ bīnchú, ánne piáusī Koa chhītiúⁿ ūkàu la̍t. Nāsī Koa chhītiúⁿ liân che to̍h kóng bē kiâⁿ, beh kah lâng kóng siáⁿ mi̍h "chi̍tkechhin" leh?

Só͘í lán kóng, Tâipak chhīgīhōe chit tiâu ūsoàn tòng liáu chiâⁿ chàn! 　　(220128)


Pe̍h-ōe-jī-pán/白话字版



《 Le̍k-sek toán-phêng 》　　　　　 Lí Lâm-hêng

　　　 Tâi-pak chhī-gī-hōe chit tiâu ū-soàn tòng liáu chiâⁿ chàn!

Tâi-pak chhī-gī-hōe sím-gī Koa Bûn-tiat chhī-tiúⁿ jīm kî chòe-āu chi̍t nî nî-tō͘ chóng ū-soàn àn, keng-kòe la̍k kang chèng-tóng chham-siông liáu-āu, it-goe̍h jī-sì kiat-sok; kî-tiong siōng-kài ū cheng-gī ê "siang siâⁿ lūn tôaⁿ" ū-soàn, Bîn-chìn-tóng siūⁿ kóng kīn-lâi Chi-ná kun-ki, kun-kàm it-ti̍t lâi jiáu-loān Tâi-oân, só͘-í thê-chhut "m̄-koh chheh", iau-kiû "siang siâⁿ lūn tôaⁿ" kí-pān chêng, Chi-ná kun-ki, kun-kàm nā kè-sio̍k lâi jiáu-loān Tâi-oân, chit tiâu ū-soàn tio̍h bē hō͘ tāng-iōng, ì-kiàn mā ū tit-tio̍h Chi-ná Kok-bîn-tóng, Sin-tóng tóng-thoân ê tông-ì, ta̍t-sêng koat-gī.

　　 Kin-kì Kok-hông-pō͘ hoat-pò͘ ê "chek-sî kun-sū tōng-thài" chu-sìn, it-goe̍h jī-saⁿ, Chi-ná phài chhut 39 chiah pái kun-ki chìn-ji̍p lán kok Sai-lâm Khong-e̍k Hông khang Sek-pa̍t-khu, it-goe̍h jī-sì koh phài chhut 13 chiah pái kun-ki lâi jiáu-loān, nn̄g kang tàu khí-lâi, jiáu-loān Tâi-oân ê Chi-ná kun-ki ū 52 chiah pái. Khí-ū-chhú-lí, chin-chiàⁿ lóng bô i hoat?

　　 Tâi-pak-chhī chèng-hú kin-nî-tō͘ ū-soàn, hòe-chhut pīⁿ-lia̍t 1,745.32 ek, hòe -ji̍p sī 1,719.97 ek, it-goe̍h cha̍p-chhit gī-hōe khai-sí chìn-ji̍p chèng-tóng chham-siông; "siâⁿ-chhī lūn-tôaⁿ" siong-koan hùi-iōng iok 140 bān, Bîn-chìn-tóng-thoân kah Siā-bîn-tóng gī-oân Miâu Phok-ngálóng chú-tiuⁿ choân-pō͘ san-tû, Chi-ná Kok-bîn-tóng kah Sin-tóng kheng-hiòng pó-liû, chham-siông bô kiat-kó, goân-pún tio̍h beh chìn-ji̍p piáu-koat, m̄-koh gī-tiúⁿ Tân Gím-siông chhâi-sī "kok thè chi̍t pō͘ " kè-sio̍k chham-siông, it-goe̍h jī-sì chiah tit-tio̍h kiōng-sek.

Bîn-chìn-tóng-thoân chóng-tiàu Niû Bûn-kiat kóng,"siang siâⁿ lūn-tôaⁿ" kí-pān hiah chē nî, kòe-khì lóng m̄-bat san-tû kòe chi̍t-kak gîn ê ū-soàn, m̄-koh chòe-kīn nî-gōa, Chi-ná kun-ki it-ti̍t lâi jiáu-loān Tâi-oân, só͘-í Bîn-chìn-tóng-thoân chú-tiuⁿ chit tiâu ū-soàn choân-pō͘ san-tû, siang siâⁿ bián siáⁿ kau-liû. M̄-koh Nâ-iâⁿ iû-goân siūⁿ-kóng eng-kai khó-liōng chéng-thé nn̄g hōaⁿ ê khì-hun, chiah ē thê-chhut chit- ê "tān-su" choh piáu-thài. Chi-ná Kok-bîn-tóng-thoân su-kì-tiúⁿ Ông Hin-gî chí-chhut, tóng-thoân chi-chhî pó-liû "siâⁿ-chhī lūn-tôaⁿ" ū-soàn, m̄-koh Bîn-chìn-tóng thê-chhut chòe-kīn Chi-ná kun-ki jiáu-loān Tâi-oân phò-hāi nn̄g hōaⁿ khì-hun, khak-si̍t hō͘ Tâi-oân jîn-bîn koan-kám chin bái, só͘-í tông-ì chit- ê "tān-su". Bîn-chìn-tóng kah Siā-bîn-tóng gī-oân kian-chhî, nā bô tī "tān-su" lāi-té chù-bêng Chi-ná kun-ki, kun-kàm, bô hoat-tō͘ chin-chiàⁿ ta̍t-tio̍h bêng-khak piáu-thài ê ì-gī, chòe-āu mā ū tit-tio̍h Chi-ná Kok-bîn-tóng kah Sin-tóng ê tông-ì. Put-kò gī-hōe iû-goân chi-chhî kí-pān, î-chhî siâⁿ-chhī kau-liû, kí-pān ê sî-ki kau hō͘ Tâi-pak-chhī-hú koat-tēng, gī-hōe bô pit-iàu tùi chit hāng pōe-su. Sin-tóng tiàu-chi̍p-jîn Phoaⁿ Hoâi-chong kóng, i kò-jîn chú-tiuⁿ nā-sī kàu-sî nn̄g hōaⁿ khì-hun ū khah hó tio̍h kí-pān, nā bô-hó tio̍h ē-tàng chhú-siau.

It-hiòng chú-tiuⁿ "nn̄g hōaⁿ chi̍t-ke-chhin"ê Tâi-pak chhī-tiúⁿ Koa Bûn-tiat tio̍h ài khì siūⁿ pān-hoat, khòaⁿ i sī m̄ sī ū hoat-tō͘ khì kah Chi-ná iú-koan tan-ūi kóng-kóng leh, Chi-ná kun-ki, kun-kàm hioh chi̍t-chām-á mài lâi loān, hō͘ i ū ū-soàn lâi pān "siang siâⁿ lūn-tôaⁿ". Tán góa pān liáu, lín beh án-chóaⁿ jiáu-loān tio̍h kah góa Koa Bûn-tiat chhī-tiúⁿ bô koan-hē. Chi-ná nā chin-chiàⁿ ū hō͘ Koa chhī-tiúⁿ bīn-chú, án-ne piáu-sī Koa chhī-tiúⁿ ū-kàu la̍t. Nā-sī Koa chhī-tiúⁿ liân che to̍h kóng bē kiâⁿ, beh kah lâng kóng siáⁿ mi̍h "chi̍t-ke-chhin" leh?

Só͘-í lán kóng, Tâi-pak chhī-gī-hōe chit tiâu ū-soàn tòng liáu chiâⁿ chàn! 　　(220128)




台北市议会审议柯文哲市长任期最后一年ê年度总预算案，经过六工政党协商了后，一月二四结束；其中siōng-kài有争议ê「双城论坛」预算，民进党认为近来中国军机、军舰一直来扰乱台湾，所以提出「但书」，要求「双城论坛」举办前，中国军机、军舰若继续来扰乱台湾，chit条预算tio̍h bē使动用，意见mā有得tio̍h中国国民党、新党党团ê同意，达成决议。

　　根据国防部发布ê「即时军事动态」资讯，一月二三，中国派出39只次军机进入咱国西南空域防空识别区，一月二四koh派出13只次军机来扰乱，两工斗起来，扰乱台湾ê中国军机有52只次。Khí有此理，真正lóng无伊法？

　　台北市政府今年度预算，岁出编列1,745.32亿、岁入是1,719.97亿，一月十七议会开始进入政党协商；「城市论坛」相关费用约140万，民进党团kah社民党议员苗博雅lóng主张全部删除，中国国民党kah新党倾向保留，协商无结果、原本tio̍h beh进入表决，但是议长陈锦祥裁示「各退一步」继续协商，一月二四才取得共识。

民进党团总召梁文杰讲，「双城论坛」举办hiah chē年，过去lóng m̄-bat删除过一角银ê预算，但是最近年外，中国军机一直来扰乱台湾，所以民进党团主张chit条预算全部删除，双城免siáⁿ交流。但是蓝营犹原认为应该考量整体两岸ê气氛，才ē提出chit-ê「但书」作表态。中国国民党团书记长王欣仪指出，党团支持保留「城市论坛」预算，但是民进党提出最近中国军机扰乱台湾破坏两岸氛围，确实hō͘台湾民众观感真bái，所以同意chit-ê「但书」。民进党kah社民党议员坚持，若无tī「但书」内底注明中国军机、军舰，无法度真正达到明确表态ê意义，最后mā有得tio̍h中国国民党kah新党ê同意。不过议会犹原支持举办、维持城市交流，举办时机交hō͘台北市府决定，议会无必要对chit项背书。新党召集人潘怀宗讲，伊个人主张若是到时两岸氛围有khah好tio̍h举办，若无好tio̍hētàng取消。

一向主张「两岸一家亲」ê台北市长柯文哲tio̍h爱去想办法，看伊是m̄是有法度去kah中国有关单位讲讲咧，中国军机、军舰歇一站á mài来乱，hō͘伊有预算来办「双城论坛」。等我办了，恁beh按怎扰乱tio̍h kah我柯文哲市长无关系。中国若真正有hō͘柯市长面子，án-ne表示柯市长有够力。若是柯市长连che to̍h讲bē行，beh kah人讲siáⁿ物「一家亲」咧？

所以咱讲，台北市议会chit条预算tòng了chiâⁿ赞！　　(220128)