《绿色短评》

 | | | 转寄

方芳chit款ê无人情狗！

作者 李南衡, ChoânTâijī/全台字 by Chng Hūiphêng 2022.02.06

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

方芳 chit khoán ê bô jînchêng káu!


2021 nî cha̍pjīgoe̍h jīla̍k sinbûn pòtō, chuchhim gējîn 方芳 kòekhì tī Tâioân mā sǹg sī chonggē kài ê itché. Kúi kang chêng i tī siākûn téngbīn hoaⁿhí pò hō͘ ta̍kê chaiiáⁿ chi̍tê hó siausit, tio̍h sī i íkeng niá tio̍h Tiongkokkongbîn sinhūnchèng, ínkhí bāngiú jia̍tlia̍t thólūn. Chi̍tê Tâioân lâng hoaⁿhí beh chò Bíkoklâng, Tekkoklâng á・sī Ji̍tpúnlâng, sī i soánte̍k ê chūiû. I nā sūnlī the̍h tio̍h i só͘ ìài hit kok ê sinhūnchèng á・sī le̍kkhah chi lūi ê bûnkiāⁿ, lán suijiân kah i bô se̍ksāi mā thè i hoaⁿhí.. Sinbûn pòtō kóng, 方芳 chin hoaⁿhí hō͘ ta̍kê khòaⁿ i ê Tiongkok kongbîn sinhūnchèng, thàulō͘ i sī tī cha̍pitgoe̍h jīsaⁿ sinpò, cha̍pjīgoe̍h jīsì niá tio̍h sinhūnchèng, jîchhiáⁿ soankò kóng, Ùi chitmá khí, góa kah ta̍kê kāngkhoán, mā sī ū Tiongkok kongbîn sinhūnchèng ê lâng ah! ū Tâioân bāngiú tōasiaⁿ hoah kóng, 方芳 kìjiân the̍h tio̍h Tiongkok kongbîn sinhūnchèng, engkai kā Tâioân ê kiānpókhah chián tiāu bē sái koh tńglâi Tâioân khòaⁿ pēⁿ hióngsiū kiānpó. 方芳 ìn kóng, bô lâng ū khoânlī iaukiû góa chián tiāu Tâioân kiānpókhah! 方芳 kóngōe ná ē hiah tōasiaⁿ leh? Ū ba̍kchiu khah lāi ê bāngiú khòaⁿchhut 方芳 the̍h hō͘ lâng khòaⁿ hit tiuⁿ m̄ sī "Tionghôa Jînbîn Kiōnghôkok kubîn sinhūnchèng", kánchheng "Tiongkok kongbîn sinhūnchèng", sī kah 黄安in hit chióng lâng kāngkhoán the̍h ê sī "Tionghôa Jînbîn Kiōnghôkok Tâioân kubîn kuchūchèng", kánchheng "Tâipau kuchūchèng", putkoánsî iáu ētàng tńglâi Tâioân súiōng kiānpó khah khòaⁿpēⁿ. 方芳 nā chinchiàⁿ beh the̍h tio̍h "Tiongkok kongbîn sinhūnchèng", tio̍h ài chhinchhiūⁿ lēnggōa chi̍t ūi gējîn Chhengpahhūi ánne, seng hòngkhì Tâioân kokchek, chiah ētàng the̍h tio̍h "Tiongkok kongbîn sinhūnchèng", chhinchhiūⁿ 方芳 ánne bô sitkhì Tâioân kokchek, tongjiân iáu ētàng tńglâi Tâioân hiáng ēng kiānpókhah.

Kiⁿî chi̍tgoe̍hchhe, 方芳 chiapsiū Tiongkok Tiongng Tiānsītâi ,”《 Khòaⁿ Tâihái 》chiatbo̍k chúchhîjîn hóngbūn, i kóng, Tâioân sī góa tī hia chhutsì sengtióng ê só͘chāi, kóng tùi hit tè chúithô͘ bô kámchêng sī bô hū chekjīm, sī phiànlâng・ê. Tâioân iáu ū chin chē thiàⁿsioh góa ê pêngiú. Thiaⁿ・khí・lâi náchhiūⁿ tùi Tâioân iáu ū chin chhim ê kámchêng. Phiàn・ lâng・ê! I kóngtio̍h Tâioân ê sî, i kóng sinûi Tiongkok kongbîn, beh kóng chi̍t kù ōe, lán koánkà gíná ê honghoat, gíná nā kóng tōlí, tio̍h ēsái ka thiaⁿ, gíná nā bô kóng tōlí, ūsîchūn chinchiàⁿ tio̍h kā siàn nn̄gē chhùiphóe, i chiah ē chaiiáⁿ līhāi. Só͘í góa chinchiàⁿ huisiông kîthāi khòaⁿtio̍h Nn̄ghōaⁿ thóngit hit chi̍t kang. 　　方芳 káⁿ m̄chaiiáⁿ, Tiongkok nā chhutchhiú siàn Tâioân nn̄gē chhùiphóe , ū khólêng sī hiòng Tâioân phah kúi lia̍p huitôaⁿ, mā ū khólêng chiànki lâi Tâioân khongsi̍p kúi piàn, chhùthe̍h kahn̂g húihoāi, jînbîn chhám sí siūsiong. Chhèngchí bô seⁿ ba̍kchiu, m̄nā方芳 thóià ê Tâioânlâng siū hāi, chin ū khólêng chà sí chi̍t kóa方芳 chhùi・ni̍h só͘ kóng ê "chin chē thiàⁿsioh góa ê pêngiú"; suijiân tī Tâioân kah方芳 kāngkhoán jīntông kakī sī "Tiongkoklâng" ê kàu kiⁿî chiah chhun 2.8% niāniā, mā iáu ū la̍kcha̍psìbān sìchhenggōa lâng. Ittēng ē ū lâng sí tī chiànhóe tiong. 方芳 ê liôngsim íkeng khì hō͘ Tiongkok káu kākhì ah!

　　 Káu mā sī ū pahpahchióng, ū tiongsim ê káu, ū bôlūn siáⁿlâng the̍h mi̍hkiāⁿ hō͘ chia̍h tio̍h ē iô bóe ê káu, mā ū khì kā chhī i tōachiah ê chúlâng hit chióng bô jînchêng káu, 方芳 sǹg sī chit chióng "ok khián"! (220121)
Chù, 黄安 方芳 　chhiáⁿ liām Hôagí


Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng

方芳 chit khoán ê bô jîn-chêng káu!

2021 nî cha̍p-jī-goe̍h jī-la̍k sin-bûn pò-tō, chu-chhim gē-jîn 方芳 kòe-khì tī Tâi-oân mā sǹg sī chong-gē kài ê it-ché. Kúi kang chêng i tī siā-kûn téng-bīn hoaⁿ-hí pò hō͘ ta̍k-ê chai-iáⁿ chi̍t-ê hó siau-sit, tio̍h sī i í-keng niá tio̍h Tiong-kok-kong-bîn sin-hūn-chèng, ín-khí bāng-iú jia̍t-lia̍t thó-lūn. Chi̍t-ê Tâi-oân lâng hoaⁿ-hí beh chò Bí-kok-lâng, Tek-kok-lâng á-・sī Ji̍t-pún-lâng, sī i soán-te̍k ê chū-iû. I nā sūn-lī the̍h tio̍h i só͘ ì-ài hit kok ê sin-hūn-chèng á-・sī le̍k-khah chi lūi ê bûn-kiāⁿ, lán sui-jiân kah i bô se̍k-sāi mā thè i hoaⁿ-hí.
Sin-bûn pò-tō kóng, 方芳 chin hoaⁿ-hí hō͘ ta̍k-ê khòaⁿ i ê Tiong-kok kong-bîn sin-hūn-chèng, thàu-lō͘ i sī tī cha̍p-it-goe̍h jī-saⁿ sin-pò, cha̍p-jī-goe̍h jī-sì niá tio̍h sin-hūn-chèng, jî-chhiáⁿ soan-kò kóng, Ùi chit-má khí, góa kah ta̍k-ê kāng-khoán, mā sī ū Tiong-kok kong-bîn sin-hūn-chèng ê lâng ah! ū Tâi-oân bāng-iú tōa-siaⁿ hoah kóng, 方芳 kì-jiân the̍h tio̍h Tiong-kok kong-bîn sin-hūn-chèng, eng-kai kā Tâi-oân ê kiān-pó-khah chián tiāu bē sái koh tńg-lâi Tâi-oân khòaⁿ pēⁿ hióng-siū kiān-pó. 方芳 ìn kóng, bô lâng ū khoân-lī iau-kiû góa chián tiāu Tâi-oân kiān-pó-khah! 方芳 kóng-ōe ná ē hiah tōa-siaⁿ leh? Ū ba̍k-chiu khah lāi ê bāng-iú khòaⁿ-chhut 方芳 the̍h hō͘ lâng khòaⁿ hit tiuⁿ m̄ sī "Tiong-hôa Jîn-bîn Kiōng-hô-kok ku-bîn sin-hūn-chèng", kán-chheng "Tiong-kok kong-bîn sin-hūn-chèng", sī kah 黄安in hit chióng lâng kāng-khoán the̍h ê sī "Tiong-hôa Jîn-bîn Kiōng-hô-kok Tâi-oân ku-bîn ku-chū-chèng", kán-chheng "Tâi-pau ku-chū-chèng", put-koán-sî iáu ē-tàng tńg-lâi Tâi-oân sú-iōng kiān-pó khah khòaⁿ-pēⁿ. 方芳 nā chin-chiàⁿ beh the̍h tio̍h "Tiong-kok kong-bîn sin-hūn-chèng", tio̍h ài chhin-chhiūⁿ lēng-gōa chi̍t ūi gē-jîn Chheng-pah-hūi án-ne, seng hòng-khì Tâi-oân kok-chek, chiah ē-tàng the̍h tio̍h "Tiong-kok kong-bîn sin-hūn-chèng", chhin-chhiūⁿ 方芳 án-ne bô sit-khì Tâi-oân kok-chek, tong-jiân iáu ē-tàng tńg-lâi Tâi-oân hiáng ēng kiān-pó-khah.

Kin-nî chi̍t-goe̍h-chhe, 方芳 chiap-siū Tiong-kok Tiong-ng Tiān-sī-tâi ,”《 Khòaⁿ Tâi-hái 》chiat-bo̍k chú-chhî-jîn hóng-būn, i kóng, Tâi-oân sī góa tī hia chhut-sì seng-tióng ê só͘-chāi, kóng tùi hit tè chúi-thô͘ bô kám-chêng sī bô hū chek-jīm, sī phiàn-lâng・ê. Tâi-oân iáu ū chin chē thiàⁿ-sioh góa ê pêng-iú. Thiaⁿ・khí・lâi ná-chhiūⁿ tùi Tâi-oân iáu ū chin chhim ê kám-chêng. Phiàn・ lâng・ê! I kóng-tio̍h Tâi-oân ê sî, i kóng sin-ûi Tiong-kok kong-bîn, beh kóng chi̍t kù ōe, lán koán-kà gín-á ê hong-hoat, gín-á nā kóng tō-lí, tio̍h ē-sái ka thiaⁿ, gín-á nā bô kóng tō-lí, ū-sî-chūn chin-chiàⁿ tio̍h kā siàn nn̄g-ē chhùi-phóe, i chiah ē chai-iáⁿ lī-hāi. Só͘-í góa chin-chiàⁿ hui-siông kî-thāi khòaⁿ-tio̍h Nn̄g-hōaⁿ thóng-it hit chi̍t kang.

　　方芳 káⁿ m̄-chai-iáⁿ, Tiong-kok nā chhut-chhiú siàn Tâi-oân nn̄g-ē chhùi-phóe , ū khó-lêng sī hiòng Tâi-oân phah kúi lia̍p hui-tôaⁿ, mā ū khó-lêng chiàn-ki lâi Tâi-oân khong-si̍p kúi piàn, chhù-the̍h ka-hn̂g húi-hoāi, jîn-bîn chhám sí siū-siong. Chhèng-chí bô seⁿ ba̍k-chiu, m̄-nā方芳 thó-ià ê Tâi-oân-lâng siū hāi, chin ū khó-lêng chà sí chi̍t kóa方芳 chhùi・ni̍h só͘ kóng ê "chin chē thiàⁿ-sioh góa ê pêng-iú"; sui-jiân tī Tâi-oân kah方芳 kāng-khoán jīn-tông ka-kī sī "Tiong-kok-lâng" ê kàu kin-nî chiah chhun 2.8% niā-niā, mā iáu ū la̍k-cha̍p-sì-bān sì-chheng-gōa lâng. It-tēng ē ū lâng sí tī chiàn-hóe tiong. 方芳 ê liông-sim í-keng khì hō͘ Tiong-kok káu kā-khì ah!

　　 Káu mā sī ū pah-pah-chióng, ū tiong-sim ê káu, ū bô-lūn siáⁿ-lâng the̍h mi̍h-kiāⁿ hō͘ chia̍h tio̍h ē iô bóe ê káu, mā ū khì kā chhī i tōa-chiah ê chú-lâng hit chióng bô jîn-chêng káu, 方芳 sǹg sī chit chióng "ok khián"! (220121)

Chù, 黄安 方芳 　chhiáⁿ liām Hôa-gí


2021年十二月二六新闻报导，资深艺人方芳过去tī台湾mā算是综艺界ê一姊。几工前伊tī社群顶面欢喜报hō͘ta̍k个知影一个好消息,，tio̍h是伊已经领tio̍h中国公民身分证，引起网友热烈讨论。一个台湾人欢喜beh做美国人、德国人á是日本人，是伊选择ê自由。伊若顺利the̍h tio̍h伊所意爱hit国ê身分证á是绿卡之类ê文件，咱虽然kah伊无熟似mā替伊欢喜.。

新闻报导讲，方芳真欢喜hō͘ta̍k个看伊ê中国公民身分证，透露伊是tī十一月二三申报，十二月二四领tio̍h身分证，而且宣告讲：Ùi chit-má起，我kahta̍k个仝款，mā是有中国公民身分证ê人ah！有台湾网友大声喝讲，方芳既然the̍h tio̍h中国公民身分证，应该kā台湾ê健保卡剪掉bē使koh转来台湾看病享受健保。方芳应讲，无人有权利要求我剪掉台湾健保卡！方芳讲话ná ēhiah大声咧？有目睭khah利ê网友看出方芳the̍h hō͘人看hit张m̄是「中华人民共和国居民身份证」、简称「中国公民身份证」，是kah黄安in hit种人仝款the̍h ê是「中华人民共和国台湾居民居住证」、简称「台胞居住证」，不管时犹ē-tàng转来台湾使用健保卡看病。方芳若真正beh the̍h tio̍h「中国公民身份证」，tio̍h爱亲像另外一位艺人千百惠án-ne，先放弃台湾国籍，才ē-tàng the̍h tio̍h「中国公民身份证」，亲像方芳án-ne无失去台湾国籍，当然犹ētàng转来台湾享用健保卡。

今年一月初，方芳接受中国中央电视台《看台海》节目主持人访问，伊讲，台湾是我tīhia出世生长ê所在，讲对hit块水土无感情是无负责任、是骗人ê。台湾犹有真chē疼惜我ê朋友。听起来ná像对台湾犹有真深ê感情。骗人ê！伊讲tio̍h台湾ê时，伊讲身为中国公民，beh讲一句话，咱管教gín-á ê方法，gín-á若讲道理，tio̍hē-sáika听，gín-á若无讲道理，有时阵真正tio̍h kā煽两下嘴phóe，伊才ē知影厉害。所以我真正非常期待看tio̍h两岸统一hit一工。

　　方芳敢m̄知影，中国若出手搧台湾两下嘴phóe，有可能是向台湾拍几粒飞弹、mā有可能战机来台湾空袭几遍，厝宅家园毁坏，人民惨死受伤。铳子无生目睭，m̄-nā方芳讨厌ê台湾人受害，真有可能炸死一kóa方芳嘴里所讲ê「真chē疼惜我ê朋友」；虽然tī台湾kah方芳仝款认同家己是「中国人」ê到今年才chhun 2.8% niā-niā，mā犹有六十四万四千外人。一定ē有人死tī战火中。方芳ê良心已经去hō͘中国狗咬去ah！

　　狗mā是有百百种，有忠心ê狗、有无论啥人the̍h物件hō͘食tio̍hē摇尾ê狗，mā有去咬饲伊大只ê主人hit种无人情狗，方芳算是chit种「恶犬」！ (220121)
注：黄安 方芳　　请念华语