《绿色短评》

 | | | 转寄

「汉奸」是siáⁿ-mi̍h碗糕？

作者 李南衡, ChoânTâijī/全台字 by Chng Hūiphêng 2022.01.16

Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》　　　　　　　　 Lí Lâmhêng

　　　　　　　　　”汉奸”sī siáⁿmi̍h óaⁿko?


Cha̍pjīgoe̍h cha̍ppeh, Sùtāi Kongtâu kiatkó Tiongkok Kokbîntóng lóng su, tóng lāi tio̍h ū lâng khaisí teh "chhōe chiànhoān". Kóng sī kǹgthi̍h Hânhún, chuchhim imga̍k lâng Lâu Kachhiong kuiê lâng pang・khì, tōasiaⁿ mē kóng,"Hâu Iúgî m̄ sī poāntô͘, siáⁿmi̍h chiah sī poāntô͘? " phàuhong Chu Li̍plûn" chhōa chi̍t kûn Hànkan, siáng ē tòe lí chò chiàniú?" i ho͘io̍k ūitio̍h sulī bô kò͘ tóngkok ê Hâu Iúgî kah Lô͘ Siùiàn tio̍h ka khaitû tiāu, koh tiám miâ Kokim Sò͘mûi, Kang Khésîn hunpia̍t soán Sinpakchhī kah Tâitiong chhītiúⁿ. I kóng "2024 sī Tionghôa Bînkok kah Tâioân to̍kli̍p chòeāu ê koatchiàn", i ho͘io̍k Koeh Tâibêng tángsūtiúⁿ, chhutbé thè goán kái simgoān. "Kokbîntóng nā beh ài hôpêng thóngit, tio̍h seng hō͘ Tâioân siàuliânlâng chaiiáⁿ kakī sī tó chi̍t kok ê lâng".

Tâioân lâng íkeng chin kú bô thiaⁿtio̍h “汉奸” chitê mēlâng ê gísû. Ē kìtit choh gíná ê sîchūn, ta̍k kang tio̍h ài chhiùⁿ chi̍t siú "hoán Kiōng khòng Gô koa", "打倒俄寇，反共产反共产；消灭朱毛，杀汉奸杀汉奸." gíná lâng chaiiáⁿ siáⁿmi̍h “汉奸” leh ? Tōahàn liáuāu khì chhōe chuliāu chiah chaiiáⁿ, oh! goânlâi tī gō͘chheng nî iukiú le̍ksú lāité, “汉奸” sǹg sī chi̍tê chin iùkhí ê miâsû, Boáná phah ji̍pkoan thóngtī kuiê tongsî ê Tiongkok, kiànli̍p Tōachheng Tèkok liáuāu, Boánchheng thóngtīchiá chútiuⁿ kakī kah Hànjîn līhāi siothong; mā sī ū Hànjîn jīnûi Boánchheng ê līek tio̍h sī Hànjîn ê līek, tìsú ū chin chē lâng kā Boán Hàn khòaⁿ choh itthé. Kiànnā ûipōe in ê līek ê lâng lóng kiò choh “汉奸”, ìsù sī thong te̍kjîn ê lâng. TōaChheng Tèkok thóngtī Tiongkok 276 nî (1636—1912), iûgoân ū chin chē chhinchhiūⁿ Sun Tiongsan chit khoán lâng, jīnûi Boáná kah Hànjîn pēng m̄sī itthé, só͘í i kekbēng ê chongchí ū chi̍t tiâu sī "驱逐鞑虏", 鞑虏 goânpún sī chí Tiongkok tāilio̍k pakhong Bôngkó͘, Lúchin téng iûbo̍k bîncho̍k, tongjiân m̄sī Hàn bîncho̍k ê lâng.

　　 Tiong Ji̍t chiàncheng tiong, óa Ji̍tpún chhimlio̍kchiá á・sī óa Ji̍tpún lâng só͘ hûchhî ê só͘ūi "Gūi chèngkoân" ê lâng, chèngkì chhionghun ê, lóngchóng chhengho͘ choh “汉奸”, khiòngchiàn sènglī liáuāu, hiahê “汉奸” lóng tio̍h siū símphòaⁿ tēngchōe.

　　 Chiúⁿ Κàichio̍h kah Tiongkok Kokbîntóng chènghú hō͘ Tiongkok Kiōngsántóng phah kah cháulō͘ lâi Tâioân, tongjiân tùi tongsî tī Mâu Te̍ktong, Chu Tek léngtōhā ê Tiongkok Kiōngsántóng hūn kàu ji̍pkut; tùi tī āupiah sáisú kah chioân ê So͘liân kiōngsántóng mē choh sī "俄寇","寇"sī chha̍tá thó͘húi. Thiaⁿkóng goán gíná sîtāi só͘ chhiùⁿ ê hitsiú "hoán kiōng khòng Gô koa"koasû sī Chiúⁿ Κàichio̍h siá ê, lán ētàng líkái i ná ē mē lâng “汉奸”.

　　 Hiānchhúsî tī Tiongkok, káucha̍pit hòe ê Chu Tiongkun lúsū, sī chi̍t ūi chin siū chunkèng ê kongkiōng tìsek hūnchú, i bat tamjīm kòe Tiongkok Siāhōe Khoha̍k īⁿ Bíkok Giánkiùsó͘ só͘tiúⁿ. I kóng, tùi bô kâng khoán ìkiàn ê lâng to̍h mē i sī “汉奸”,”汉奸” chitê sû soah piàn choh "kok mē", kā “汉奸” chitê sû ke tī ìkiàn kah góa bô kâng ê lâng sinchiūⁿ, mā sī "Tiongkok te̍ksek", jîchhiáⁿ sī hiānchāi ê "Tiongkok te̍ksek". Ánne, lán tio̍h chaiiáⁿ goânlâi Lâu Kachhiong lī lán Tâioân jōani̍h hn̄g.

　　 Kináji̍t tī Tâioân, ū kúiê lâng koansim,”汉奸” sī siáⁿmi̍h óaⁿko? 　　(211231)
Chù,"汉奸" 俄寇hoán Kiōng khòng Gô koakhek ê koasû chhiáⁿ liām Hôagí

Pe̍h-ōe-jī-pán/白话字版

《 Le̍k-sek toán-phêng 》　　　　　　　　 Lí Lâm-hêng
　　　　　　　　　”汉奸”sī siáⁿ-mi̍h óaⁿ-ko?

Cha̍p-jī-goe̍h cha̍p-peh, Sù-tāi Kong-tâu kiat-kó Tiong-kok Kok-bîn-tóng lóng su, tóng lāi tio̍h ū lâng khai-sí teh "chhōe chiàn-hoān". Kóng sī kǹg-thi̍h Hân-hún, chu-chhim im-ga̍k lâng Lâu Ka-chhiong kui-ê lâng pang-・khì, tōa-siaⁿ mē kóng,"Hâu Iú-gî m̄ sī poān-tô͘, siáⁿ-mi̍h chiah sī poān-tô͘? " phàu-hong Chu Li̍p-lûn" chhōa chi̍t kûn Hàn-kan, siáng ē tòe lí chò chiàn-iú?" i ho͘-io̍k ūi-tio̍h su-lī bô kò͘ tóng-kok ê Hâu Iú-gî kah Lô͘ Siù-iàn tio̍h ka khai-tû tiāu, koh tiám miâ Ko-kim Sò͘-mûi, Kang Khé-sîn hun-pia̍t soán Sin-pak-chhī kah Tâi-tiong chhī-tiúⁿ. I kóng "2024 sī Tiong-hôa Bîn-kok kah Tâi-oân to̍k-li̍p chòe-āu ê koat-chiàn", i ho͘-io̍k Koeh Tâi-bêng táng-sū-tiúⁿ, chhut-bé thè goán kái sim-goān. "Kok-bîn-tóng nā beh ài hô-pêng thóng-it, tio̍h seng hō͘ Tâi-oân siàu-liân-lâng chai-iáⁿ ka-kī sī tó chi̍t kok ê lâng".

Tâi-oân lâng í-keng chin kú bô thiaⁿ-tio̍h “汉奸” chit-ê mē-lâng ê gí-sû. Ē kì-tit choh gín-á ê sî-chūn, ta̍k kang tio̍h ài chhiùⁿ chi̍t siú "hoán Kiōng khòng Gô koa", "打倒俄寇，反共产反共产；消灭朱毛，杀汉奸杀汉奸." gín-á lâng chai-iáⁿ siáⁿ-mi̍h “汉奸” leh ? Tōa-hàn liáu-āu khì chhōe chu-liāu chiah chai-iáⁿ, oh! goân-lâi tī gō͘-chheng nî iu-kiú le̍k-sú lāi-té, “汉奸” sǹg sī chi̍t-ê chin iù-khí ê miâ-sû, Boán-á phah ji̍p-koan thóng-tī kui-ê tong-sî ê Tiong-kok, kiàn-li̍p Tōa-chheng Tè-kok liáu-āu, Boán-chheng thóng-tī-chiá chú-tiuⁿ ka-kī kah Hàn-jîn lī-hāi sio-thong; mā sī ū Hàn-jîn jīn-ûi Boán-chheng ê lī-ek tio̍h sī Hàn-jîn ê lī-ek, tì-sú ū chin chē lâng kā Boán Hàn khòaⁿ choh it-thé. Kiàn-nā ûi-pōe in ê lī-ek ê lâng lóng kiò choh “汉奸”, ì-sù sī thong te̍k-jîn ê lâng. Tōa-Chheng Tè-kok thóng-tī Tiong-kok 276 nî (1636—-1912), iû-goân ū chin chē chhin-chhiūⁿ Sun Tiong-san chit khoán lâng, jīn-ûi Boán-á kah Hàn-jîn pēng m̄-sī it-thé, só͘-í i kek-bēng ê chong-chí ū chi̍t tiâu sī "驱逐鞑虏", 鞑虏 goân-pún sī chí Tiong-kok tāi-lio̍k pak-hong Bông-kó͘, Lú-chin téng iû-bo̍k bîn-cho̍k, tong-jiân m̄-sī Hàn bîn-cho̍k ê lâng.

　　 Tiong Ji̍t chiàn-cheng tiong, óa Ji̍t-pún chhim-lio̍k-chiá á-・sī óa Ji̍t-pún lâng só͘ hû-chhî ê só͘-ūi "Gūi chèng-koân" ê lâng, chèng-kì chhiong-hun ê, lóng-chóng chheng-ho͘ choh “汉奸”, khiòng-chiàn sèng-lī liáu-āu, hiah-ê “汉奸” lóng tio̍h siū sím-phòaⁿ tēng-chōe.

　　 Chiúⁿ Κài-chio̍h kah Tiong-kok Kok-bîn-tóng chèng-hú hō͘ Tiong-kok Kiōng-sán-tóng phah kah cháu-lō͘ lâi Tâi-oân, tong-jiân tùi tong-sî tī Mâu Te̍k-tong, Chu Tek léng-tō-hā ê Tiong-kok Kiōng-sán-tóng hūn kàu ji̍p-kut; tùi tī āu-piah sái-sú kah chi-oân ê So͘-liân kiōng-sán-tóng mē choh sī "俄寇","寇"sī chha̍t-á thó͘-húi. Thiaⁿ-kóng goán gín-á sî-tāi só͘ chhiùⁿ ê hit-siú "hoán kiōng khòng Gô koa"koa-sû sī Chiúⁿ Κài-chio̍h siá ê, lán ē-tàng lí-kái i ná ē mē lâng “汉奸”.

　　 Hiān-chhú-sî tī Tiong-kok, káu-cha̍p-it hòe ê Chu Tiong-kun lú-sū, sī chi̍t ūi chin siū chun-kèng ê kong-kiōng tì-sek hūn-chú, i bat tam-jīm kòe Tiong-kok Siā-hōe Kho-ha̍k īⁿ Bí-kok Gián-kiù-só͘ só͘-tiúⁿ. I kóng, tùi bô kâng- khoán ì-kiàn ê lâng to̍h mē i sī “汉奸”,”汉奸” chit-ê sû soah piàn choh "kok mē", kā “汉奸” chit-ê sû ke tī ì-kiàn kah góa bô kâng ê lâng sin-chiūⁿ, mā sī "Tiong-kok te̍k-sek", jî-chhiáⁿ sī hiān-chāi ê "Tiong-kok te̍k-sek". Án-ne, lán tio̍h chai-iáⁿ goân-lâi Lâu Ka-chhiong lī lán Tâi-oân jōa-ni̍h hn̄g.

　　 Kin-á-ji̍t tī Tâi-oân, ū kúi-ê lâng koan-sim,”汉奸” sī siáⁿ-mi̍h óaⁿ-ko? 　　(211231)
Chù,"汉奸" 俄寇hoán Kiōng khòng Gô koa-khek ê koa-sû chhiáⁿ liām Hôa-gí



十二月十八，四大公投结果中国国民党lóng输，党内tio̍h有人开始teh 「chhōe战犯」。讲是钢铁韩粉、资深音乐人刘家昌归个人崩去、大声骂讲，「侯友宜m̄是叛徒，siáⁿ-mi̍h才是叛徒？」炮轰朱立伦「chhōa一群汉奸，siángē跟你做战友？」伊呼吁为tio̍h私利无顾党国ê侯友宜kah卢秀燕tio̍h ka开除掉，koh点名高金素梅、江啓臣分别选新北市kah台中市长。伊讲「2024是中华民国kah台湾独立最后ê决战」，伊呼吁郭台铭董事长，出马替阮解心愿。「国民党若beh爱和平统一，tio̍h先hō͘台湾少年人知影家己是tó一国ê人」。

台湾人已经真久无听tio̍h「汉奸」chit-ê骂人ê语词。Ē记得作gín-áê时阵，逐工tio̍h爱唱一首「反共抗俄歌」：「打倒俄寇，反共产反共产；消灭朱毛，杀汉奸杀汉奸。」gín-á人知影siáⁿ-mi̍h「汉奸」咧？大汉了后去chhōe资料才知影，oh！原来tī五千年悠久历史内底，「汉奸」算是一个真幼齿ê名词，满á拍入关统治归个当时ê中国，建立大清帝国了后，满清统治者主张家己kah汉人利害相通；mā是有汉人认为满清ê利益tio̍h是汉人ê利益，致使有真chē人kā满汉看作一体。见若违背in ê利益ê人lóng叫作「汉奸」，意思是通敌人ê人。大清帝国统治中国276年（1636—-1912），犹原有真chē亲像孙中山chit款人，认为满á kah汉人并m̄是一体，所以伊革命ê宗旨有一条是「驱逐鞑虏」，鞑虏原本是指中国大陆北方蒙古、女真等游牧民族，当然m̄是汉民族ê人。

　　中日战争中，倚日本侵略者á是倚日本人所扶持ê所谓「伪政权」ê人，证据充分ê，lóng总称呼作「汉奸」，抗战胜利了后，hiah-ê「汉奸」lóng tio̍h受审判定罪。

　　蒋介石kah中国国民党政府hō͘中国共产党拍kah走路来台湾，当然对当时tī毛泽东、朱德领导下ê中国共产党恨到入骨；对tī后壁唆使kah支援ê苏联共产党骂作是「俄寇」，「寇」是贼á土匪。听讲阮gín-á时代所唱ê hit首「反共抗俄歌」歌词是蒋介石写ê，咱ētàng理解伊那ē骂人「汉奸」。

　　现此时tī中国，九十一岁ê资中筠（kun）女士，是一位真受尊敬ê公共智识分子，伊bat担任过中国社会科学院美国研究所所长。伊讲：对无仝款意见ê人to̍h骂伊是「汉奸」，「汉奸」chit-ê 词煞变作「国骂」，kā「汉奸」chit-ê 词加tī意见kah我无仝ê人身上，mā是「中国特色」、而且是现在ê「中国特色」。Án-ne，咱tio̍h知影原来刘家昌离咱台湾jōa-ni̍h远。

　　今á日tī台湾，有几个人关心：「汉奸」是siáⁿ-mi̍h碗糕？　　(211231)
注：「汉奸」　　俄寇　　反共抗俄歌曲ê歌词　　请念华语