《绿色短评》

 | | | 转寄

四大公投过了，ta̍k个tio̍h koh加油

作者 李南衡, ChoânTâijī/全台字 by Chng Hūiphêng 2022.01.02

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng
Sìtōa kongtâu kòeliáu, ta̍kê tio̍h koh kaiû!

Cha̍pjīgoe̍h cha̍ppeh kíhêng choânkok Sìtōa kongtâu, ēpo͘ sìtiám khaisí khuiphiò, kèphiò liáu Tiongsoánhōe soanpò͘ Sìtōa kongtâu tâuphiò lu̍t tī 41.08% chì 41.09% chi kan, inūi sìê àn ê soánphiò sī hunkhui niá ê, tìsú tâuphiò lu̍t chiah ē ū siókhóa bô kâng."Têngkhé hu̍tsì àn" ê tôngì phiò sī 380 bān 4,755 phiò, put tôngì phiò sī 426 bān 2,451 phiò;"Hoán Lâiti chìnkháu àn " ê tôngì phiò sī 393 bān 6,554 phiò, put tôngì phiò sī 413 bān 1,203 phiò;"Kongtâu pa̍k tāisoán àn" ê tôngì phiò sī 395 bān 1,882 phiò, put tôngì phiò sī 412 bān 038 phiò; " Saⁿchiap chhian kiàn àn" ê tôngì phiò sī 390 bān 1,171 phiò, put tôngì phiò sī 416 bān 3,464 phiò. Sìê àn ê put tôngì phiòlóng ū chhiaukòe 400 bān phiò.

　　 Chiàu "Kongtâuhoat" kuitēng, kongbîn tâuphiò àn tâuphiò kiatkó, iúhāu tôngì phiòsò͘ tio̍h pí put tôngì phiò khah chē, jîchhiáⁿ iúhāu tôngì phiò ta̍tkàu tâuphiòkoân lâng chónggia̍h sìhun chṳt ísiōng, chiah ū thongkòe; iúhāu tôngì phiò nā bô pí put tôngì phiò khah chē, á・sī iúhāu tôngì phiò sò͘ putchiok chêng hāng kuitēng sò͘gia̍h chiá, lóng bô thongkòe. Chit piàn kongtâu ê chóng tâuphiòkoân jînsò͘ sī 1,982 bān 5,468 lâng ê sìhun chṳt, ia̍h tio̍h sī 495 bān 6,367 lâng, ia̍h tio̍h sī kóng kok kongtâu àn ê tôngì phiò, tio̍h ta̍tkàu 495 bān 6367phiò, jîchhiáⁿ koh pí put tôngì phiò khah chē, kongtâu àn chiah sǹg thongkòe. Só͘í chit piàn sìê kongtâu àn lóng put chiâⁿ àn.

　　 Choân tâi 22 koānchhī,"sì àn choân tôngì" ê koānchhī 12 ê, Tâipakchhī, Thôhn̂g chhī, Kelâng chhī, Sintek chhī, Sin tek koān, Biâule̍k koān, Lâmtâu koān, Hoaliân koān, Tâitang koān, Phêⁿô͘ koān, Κimmn̂g koān, Liânkang koān,"sì àn put tôngì" ê koānchhī 8 ê, Tâilâm chhī, Kohiông chhī, Chionghòa koān, Hûnlîm koān, Kagī chhī, Kagī koān, Pîntong koān, Gîlân koān; Sinpak chhī sī " Têngkhé hu̍tsì " put tôngì," Hoán Lâiti chìnkháu","Kongtâu pa̍k tāisoán"," Saⁿchiap chhiankiàn " tôngì; Tâitiong chhī sī " Kongtâu pa̍k tāisoán " tôngì," Têngkhé hu̍tsì "," Hoán Lâiti chìnkháu"," Saⁿchiap chhiankiàn àn " put tôngì. Suijiân "sì àn choân tôngì" koānchhī pí "sì àn put tôngì" koānchhī khah chē, tānsī "sì àn choân tôngì" chiàⁿ hoán nn̄ghong phiòsò͘ chhakū bô tōa, tānsī "sì àn put tôngì" koānchhī, pauhâm Tâilâm chhī, Kohiông chhī téng koānchhī put tôngì phiòsò͘ pí tôngì phiòsò͘ ke chin chē, chòeāu Sìtōa kongtâu kiatkó chiah ē choânsò͘ hó͘koat. Chinchiàⁿ sī hókachài!

　　 Cha̍ppeh àm kongtâu ū kiatkó liáuāu, Chhòa Engbûn chóngthóng tī Chóngthónghú tiàukhui kìchiáhōe hiòng koklâng soatbêng. Chóngthóng kiôngtiāu, chit piàn kongtâu bô siáng su siáng iâⁿ ê būntê, chíū kokka bīlâi beh ánchóaⁿ kiâⁿ ê būntê; Chhòa chóngthóng kóng, chit piàn kongtâu ê kòethêng thoânta̍t "Tâioân jînbîn hibāng kiâⁿ hiòng sèkài, goānì chekke̍k chhamú kokchè" tán sìê bêngkhak ê sìnsit. Chhòa chóngthóng kóng, kongtâu mā sī jînbîn thoânta̍t tùi chènghú sichèng bô kâng khoán ê ìkiàn. Bînchú goânpún tio̍h sī ū bô kâng siūⁿhoat, chèngchhek kuiōe engkai tio̍h thiaⁿchhú bô kâng ê ìkiàn. Únkiān sichèng sī lán itkoàn ê goânchek, kok chióng siūⁿhoat lóng tio̍h la̍p ji̍p chèngchhek pêngko͘. Paukoat háichháuta póio̍k, si̍tan pékoan,"choa̍ttùi bē khiàm kin kiám niú".

　　 Sìtōa kongtâu kiatkó suijiân bô sū kòeliáu, Tâioân jînbîn kah Bînchìntóng chènghú lóng tio̍h koh kaiû! (211212)


Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng
Sì-tōa kong-tâu kòe-liáu, ta̍k-ê tio̍h koh ka-iû!

Cha̍p-jī-goe̍h cha̍p-peh kí-hêng choân-kok Sì-tōa kong-tâu, ē-po͘ sì-tiám khai-sí khui-phiò, kè-phiò liáu Tiong-soán-hōe soan-pò͘ Sì-tōa kong-tâu tâu-phiò lu̍t tī 41.08% chì 41.09% chi kan, in-ūi sì-ê àn ê soán-phiò sī hun-khui niá ê, tì-sú tâu-phiò lu̍t chiah ē ū sió-khóa bô kâng."Têng-khé hu̍t-sì àn" ê tông-ì phiò sī 380 bān 4,755 phiò, put tông-ì phiò sī 426 bān 2,451 phiò;"Hoán Lâi-ti chìn-kháu àn " ê tông-ì phiò sī 393 bān 6,554 phiò, put tông-ì phiò sī 413 bān 1,203 phiò;"Kong-tâu pa̍k tāi-soán àn" ê tông-ì phiò sī 395 bān 1,882 phiò, put tông-ì phiò sī 412 bān 038 phiò; " Saⁿ-chiap chhian- kiàn àn" ê tông-ì phiò sī 390 bān 1,171 phiò, put tông-ì phiò sī 416 bān 3,464 phiò. Sì-ê àn ê put tông-ì phiòlóng ū chhiau-kòe 400 bān phiò.

　　 Chiàu "Kong-tâu-hoat" kui-tēng, kong-bîn tâu-phiò àn tâu-phiò kiat-kó, iú-hāu tông-ì phiò-sò͘ tio̍h pí put tông-ì phiò khah chē, jî-chhiáⁿ iú-hāu tông-ì phiò ta̍t-kàu tâu-phiò-koân lâng chóng-gia̍h sì-hun chi-it í-siōng, chiah ū thong-kòe; iú-hāu tông-ì phiò nā bô pí put tông-ì phiò khah chē, á-・sī iú-hāu tông-ì phiò sò͘ put-chiok chêng hāng kui-tēng sò͘-gia̍h chiá, lóng bô thong-kòe. Chit piàn kong-tâu ê chóng tâu-phiò-koân jîn-sò͘ sī 1,982 bān 5,468 lâng ê sì-hun chi-it, ia̍h tio̍h sī 495 bān 6,367 lâng, ia̍h tio̍h sī kóng kok kong-tâu àn ê tông-ì phiò, tio̍h ta̍t-kàu 495 bān 6367phiò, jî-chhiáⁿ koh pí put tông-ì phiò khah chē, kong-tâu àn chiah sǹg thong-kòe. Só͘-í chit piàn sì-ê kong-tâu àn lóng put chiâⁿ àn.

　　 Choân tâi 22 koān-chhī,"sì àn choân tông-ì" ê koān-chhī 12 ê, Tâi-pak-chhī, Thô-hn̂g chhī, Ke-lâng chhī, Sin-tek chhī, Sin tek koān, Biâu-le̍k koān, Lâm-tâu koān, Hoa-liân koān, Tâi-tang koān, Phêⁿ-ô͘ koān, Κim-mn̂g koān, Liân-kang koān,"sì àn put tông-ì" ê koān-chhī 8 ê, Tâi-lâm chhī, Ko-hiông chhī, Chiong-hòa koān, Hûn-lîm koān, Ka-gī chhī, Ka-gī koān, Pîn-tong koān, Gî-lân koān; Sin-pak chhī sī " Têng-khé hu̍t-sì " put tông-ì," Hoán Lâi-ti chìn-kháu","Kong-tâu pa̍k tāi-soán"," Saⁿ-chiap chhian-kiàn " tông-ì; Tâi-tiong chhī sī " Kong-tâu pa̍k tāi-soán " tông-ì," Têng-khé hu̍t-sì "," Hoán Lâi-ti chìn-kháu"," Saⁿ-chiap chhian-kiàn àn " put tông-ì. Sui-jiân "sì àn choân tông-ì" koān-chhī pí "sì àn put tông-ì" koān-chhī khah chē, tān-sī "sì àn choân tông-ì" chiàⁿ hoán nn̄g-hong phiò-sò͘ chha-kū bô tōa, tān-sī "sì àn put tông-ì" koān-chhī, pau-hâm Tâi-lâm chhī, Ko-hiông chhī téng koān-chhī put tông-ì phiò-sò͘ pí tông-ì phiò-sò͘ ke chin chē, chòe-āu Sì-tōa kong-tâu kiat-kó chiah ē choân-sò͘ hó͘-koat. Chin-chiàⁿ sī hó-ka-chài!

　　 Cha̍p-peh àm kong-tâu ū kiat-kó liáu-āu, Chhòa Eng-bûn chóng-thóng tī Chóng-thóng-hú tiàu-khui kì-chiá-hōe hiòng kok-lâng soat-bêng. Chóng-thóng kiông-tiāu, chit piàn kong-tâu bô siáng su siáng iâⁿ ê būn-tê, chí-ū kok-ka bī-lâi beh án-chóaⁿ kiâⁿ ê būn-tê; Chhòa chóng-thóng kóng, chit piàn kong-tâu ê kòe-thêng thoân-ta̍t "Tâi-oân jîn-bîn hi-bāng kiâⁿ hiòng sè-kài, goān-ì chek-ke̍k chham-ú kok-chè" tán sì-ê bêng-khak ê sìn-sit. Chhòa chóng-thóng kóng, kong-tâu mā sī jîn-bîn thoân-ta̍t tùi chèng-hú si-chèng bô kâng khoán ê ì-kiàn. Bîn-chú goân-pún tio̍h sī ū bô kâng siūⁿ-hoat, chèng-chhek kui-ōe eng-kai tio̍h thiaⁿ-chhú bô kâng ê ì-kiàn. Ún-kiān si-chèng sī lán it-koàn ê goân-chek, kok chióng siūⁿ-hoat lóng tio̍h la̍p ji̍p chèng-chhek pêng-ko͘. Pau-koat hái-chháu-ta pó-io̍k, si̍t-an pé-koan,"choa̍t-tùi bē khiàm kin kiám niú".

　　 Sì-tōa kong-tâu kiat-kó sui-jiân bô sū kòe-liáu, Tâi-oân jîn-bîn kah Bîn-chìn-tóng chèng-hú lóng tio̍h koh ka-iû! (211212)

十二月十八举行全国四大公投，下晡四点开始开票，计票了中选会宣布四大公投投票率tī41.08%至41.09%之间，因为四个案ê选票是分开领ê，致使投票率才会有小khóa无仝。「重启核四案」ê同意票是380万4,755票，不同意票是426万2,451票；「反莱猪进口案」ê同意票是393万6,554票，不同意票是413万1,203票；「公投绑大选案」ê同意票是395万1,882票，不同意票是412万038票；「三接迁建案」ê同意票是390万1,171票，不同意票是416万3,464票。四个案ê不同意票lóng有超过400万票。

　　照「公投法」规定，公民投票案投票结果，有效同意票数tio̍h比不同意票khahchē，而且有效同意票达到投票权人总额四分之一以上，才有通过；有效同意票若无比不同意票khahchē，á是有效同意票数不足前项规定数额者，lóng无通过。Chit遍公投ê总投票权人数是1,982万5,468人ê四分之一，亦tio̍h 是495万6,367人，亦tio̍h是讲各公投案ê同意票，tio̍h达到495万6367票，而且koh比不同意票khahchē，公投案才算通过。所以chit遍四个公投案lóng不成案。

　　全台22县市，「四案全同意」ê县市12个：台北市、桃园市、基隆市、新竹市、新竹县、苗栗县、南投县、花莲县、台东县、澎湖县、金门县、连江县、「四案不同意」ê县市8个：台南市、高雄市、彰化县、云林县、嘉义市、嘉义县、屏东县、宜兰县；新北市是「重启核四」不同意，「反莱猪进口」、「公投绑大选」、「三接迁离」同意；台中市是「公投绑大选」同意，「重启核四」、「反莱猪进口」、「三接迁离」不同意。虽然「四案全同意」县市比「四案都不同意」县市khahchē，但是「四案全同意」正反两方票数差距无大，但是「四案不同意」县市，包含台南市、高雄市等县市不同意票数比同意票数加真chē，最后四大公投结果才会全数否决。真正是好佳哉！

　　十八暗公投有结果了后，蔡英文总统tī总统府召开记者会向国人说明。总统强调，chit遍公投无siáng输siáng赢ê问题，只有国家未来beh按怎行ê问题；蔡总统讲，chit遍公投ê过程传达「台湾人民希望行向世界，愿意积极参与国际」等四个明确ê讯息。蔡总统讲，公投mā是人民传达对政府施政无仝款ê意见。民主原本tio̍h是有无仝想法，政策规划应该tio̍h听取无仝ê意见。稳健施政是咱一贯ê原则，各种想法lóng tio̍h纳入政策评估。包括海草礁保育、食安把关，「绝对bē欠斤减两」。

　　四大公投结果虽然无事过了，台湾人民kah民进党政府lóng tio̍h koh加油！ (211212)