《绿色短评》

 | | | 转寄

抵制北京冬奥，咱政府敢ē使无出声？

作者 李南衡, ChoânTâijī/全台字 by Chng Hūiphêng 2021.12.26

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

Téchè Pakkiaⁿ Tangò , lán chènghú káⁿ ēsái bô chhut siaⁿ?

　　 Cha̍pjīgoe̍h chhela̍k, Bíkok Pe̍kkiong chiamtùi mênî beh tī Pakkiaⁿ kíhêng ê tangkùi Òūnhōe. Soanpò͘ beh chháichhú gōakau téchè , iā tio̍hsī bô phài jīmhô gōakau ah sī koaⁿhong tāipiáu chhamka, tānsī Bíkok Tangò tāipiáutūi ê soánchhiú, kàuliān thoân téng lóng ē chiàusiông chhamka. Chitê hêngtōng sī inūi Tiongkok tī Sinkiang chhîsiok chìnhêng chióngcho̍k bia̍tchoa̍t kah hoán jînlūi chōehêng. Bíkok sī giâ Olympic chengsîn tējī kah tēla̍k tiám só͘ the̍h ê "îhō͘ jînsèng chungiâm kah jînkoân" chit ki tōakî teh kóng ōe. Tiongkok gōakau pō͘ hoatgiânjîn Tiō Li̍pkiàn kóng, Tionghong tùi Bíhong ê kítōng piáusī "kiônglia̍t putboán, kiankoat hoántùi, íkeng hiòng Bíhong thêchhut giâmchiàⁿ kausia̍p, Bíhong nāsī chi̍t lâng hoān chènglâng, Tionghong ittēng ē chháichhú kiankoat hoánchè ê chhòsi."

　　 Bíkok khui chhut tēit chhèng liáuāu, "Gō͘gán Liânbêng" kokka — Niúselân, Òchiu, Canada, Engkok lóng chóng tòe Bíkok ê khapō͘, beh chháichhú gōakau téchè Pa̍kkiaⁿ Tangò . Tēitê chhutsiaⁿ ê sī Niúselân, piáusī bē phài koaⁿoân chhutse̍k, kanta kiôngtiāu kah e̍kchêng khóliōng iúkoan. Chiok hóchhiò・ê sī, Tiongkok koaⁿhong soah kóng,"kinpún bô iauchhiáⁿ lín lâi! "Mē kóng chiahê kokka sī teh chèngtī chháchoh, chū choh tochêng. Sīmchì koaⁿ pò 《 Khoânkiû Sîpò 》 chóngpianchi̍p Ô͘ Sekchìn khí phùibīn kóng, Bíkok soanpò͘ koaⁿoân lóng bô beh chhutse̍k Pakkiaⁿ Tangòhōe , haha, Tiongkok lâng kóng, lán káⁿ ū hihán in lâi?

　　 Téchè Òūnhōe pun choh saⁿ kip, siōng giâmtiōng・ê sī choânbīn téchè, siōng 1980 nî So͘liântī Bo̍ksukho kípān ê hākùi Òūnhōe, Bíkok tio̍h sī kīchoa̍t phài chhut ūntōnggoân chham isi, í khònggī So͘liân ji̍p chhim Ahùhān. Tējī kip sī kengchè téchè, suijiân ū phài ūntōnggoân chhamsài, tānsī bô beh kah chúpānkok ê sionggia̍p kikò͘ chìnhêng ha̍pchok, mā bô choánpò͘ chúpānkok ê tiānsītâi chiatbo̍k. Siōng kài khin ê tio̍h sī Bíkok chit piàn chháichhú ê gōakau téchè. Bíkok chènghú ê khóliōng sī, Òūnhōe múi sì nî chiah pān chi̍t piàn, chin chē ūntōnggoân tī i ê senggâi lāi kanta ū ke̍kchió ê kihōe ētàng chhamú Òūnhōe. Putchún ūntōnggoân chhamka m̄nā ē kā goânpún ū khólêng tittio̍h chióngpâi ê kihōe pe̍hpe̍h niū hō͘ pa̍t kok ê ūntōnggoân, chènghú mā chin ū khólêng hông mē kóng sī ûipōe ūntōng chengsîn, chèngtī kanū ūntōng. Inūi sī siōng khin ê téchè, bo̍kkoài Bíkok chêng kokbūkheng Phôngphéo（Meke Pompeo）ē mē kóng chit chióng téchè ia̍h bē thiàⁿ ia̍h bē chiūⁿ, tiantò sī kakī sitkhì li̍ptiûⁿ. Kanta ' gōakau téchè’ kinpún bô kàu la̍t! Τiongkiōng chèngkoân ná ū teh kiaⁿ lí siáⁿmi̍h gōakau téchè, inūi kàu lō͘bé písài iûgoân sī chiàusiông chìnhêng, Pakkiaⁿ kāngkhoán ē sái kakī kóng sī bānpang lâi tiâu, chiàusiông chútō sènglī. Pàiteng engkai ngē (ngē) khílâi, chiàⁿbīn kah Τiongkiōng Òūn tùi siah! Téchè pakkiaⁿ Tangò .

　　 Tiongkok m̄nā ū nn̄g chheng gōa lia̍p huitôaⁿ chng hiòng Tâioân, bô hòngkhì búle̍k káihòng Tâioân, Tâioân lâng Lí Bêngtiat khì Tiongkok sûisî sitchong, hông lia̍hkhì phòaⁿ hêng koaiⁿkaⁿ, chōe miâ sī i tī Tâioân hoān tianho̍k (Tiongkok) kokka chèngkoân chōe, Tiongkok sûipiān kóng lán ê Hêngchèngīⁿtiúⁿ So͘ Chinchhiong, Li̍phoatīⁿtiúⁿ Iû Sekkhun, gōakaupō͘tiúⁿ Gô͘ Chiausiat sī "Tâito̍k bânkò͘ hūnchú", jîchhiáⁿ chhiàngsiaⁿ beh tùi in saⁿê lâng chháichhú "têngkài" chhòsi. Káihòngkun kunki ta̍k kang poelâi lán ê Huihâng Sekpia̍tkhu jiáuloān. Beh ánchóaⁿ téchè Pakkiaⁿ Tangò , lán Hú káⁿ ēsái bô chhut siaⁿ? (211210)


Olínphíkhù chúgī chengsîn tējī kah tēla̍k tiám thêki̍p îhō͘ jînsèng chungiâm ki̍p jînkoân, put chò jīmhô khîsī ki̍p chhapia̍t thāigū, tānsī Τiongkiōng to̍kchhâi kiâⁿkèng tùi Sechông, Sinkiong kah Tiongkok kénglāi îkoân lu̍tsu ê chhimhāi, tùi jînkoân ūntōng ki̍p Hiangkáng ê chhimhāi, íki̍p tùi Tâioân ê uihia̍p, kipún siōng kai kah Òūn chengsîn pōetō jîtî sio tútak,


Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng

Té-chè Pak-kiaⁿ Tang-ò , lán chèng-hú káⁿ ē-sái bô chhut siaⁿ?

　　 Cha̍p-jī-goe̍h chhe-la̍k, Bí-kok Pe̍k-kiong chiam-tùi mê-nî beh tī Pak-kiaⁿ kí-hêng ê tang-kùi Ò-ūn-hōe. Soan-pò͘ beh chhái-chhú gōa-kau té-chè , iā tio̍h-sī bô phài jīm-hô gōa-kau ah sī koaⁿ-hong tāi-piáu chham-ka, tān-sī Bí-kok Tang-ò tāi-piáu-tūi ê soán-chhiú, kàu-liān thoân téng lóng ē chiàu-siông chham-ka. Chit-ê hêng-tōng sī in-ūi Tiong-kok tī Sin-kiang chhî-siok chìn-hêng chióng-cho̍k bia̍t-choa̍t kah hoán jîn-lūi chōe-hêng. Bí-kok sī giâ Olympic cheng-sîn tē-jī kah tē-la̍k tiám só͘ the̍h ê "î-hō͘ jîn-sèng chun-giâm kah jîn-koân" chit ki tōa-kî teh kóng ōe. Tiong-kok gōa-kau pō͘ hoat-giân-jîn Tiō Li̍p-kiàn kóng, Tiong-hong tùi Bí-hong ê kí-tōng piáu-sī "kiông-lia̍t put-boán, kian-koat hoán-tùi, í-keng hiòng Bí-hong thê-chhut giâm-chiàⁿ kau-sia̍p, Bí-hong nā-sī chi̍t lâng hoān chèng-lâng, Tiong-hong it-tēng ē chhái-chhú kian-koat hoán-chè ê chhò-si."

　　 Bí-kok khui chhut tē-it chhèng liáu-āu, "Gō͘-gán Liân-bêng" kok-ka — Niú-se-lân, Ò-chiu, Canada, Eng-kok lóng chóng tòe Bí-kok ê kha-pō͘, beh chhái-chhú gōa-kau té-chè Pa̍k-kiaⁿ Tang-ò . Tē-it-ê chhut-siaⁿ ê sī Niú-se-lân, piáu-sī bē phài koaⁿ-oân chhut-se̍k, kan-ta kiông-tiāu kah e̍k-chêng khó-liōng iú-koan. Chiok hó-chhiò-・ê sī, Tiong-kok koaⁿ-hong soah kóng,"kin-pún bô iau-chhiáⁿ lín lâi! "Mē kóng chiah-ê kok-ka sī teh chèng-tī chhá-choh, chū choh to-chêng. Sīm-chì koaⁿ pò 《 Khoân-kiû Sî-pò 》 chóng-pian-chi̍p Ô͘ Sek-chìn khí phùi-bīn kóng, Bí-kok soan-pò͘ koaⁿ-oân lóng bô beh chhut-se̍k Pak-kiaⁿ Tang-ò-hōe , ha-ha, Tiong-kok lâng kóng, lán káⁿ ū hi-hán in lâi?

　　 Té-chè Ò-ūn-hōe pun choh saⁿ kip, siōng giâm-tiōng-・ê sī choân-bīn té-chè, siōng 1980 nî So͘-liântī Bo̍k-su-kho kí-pān ê hā-kùi Ò-ūn-hōe, Bí-kok tio̍h sī kī-choa̍t phài chhut ūn-tōng-goân chham isi, í khòng-gī So͘-liân ji̍p chhim A-hù-hān. Tē-jī kip sī keng-chè té-chè, sui-jiân ū phài ūn-tōng-goân chham-sài, tān-sī bô beh kah chú-pān-kok ê siong-gia̍p ki-kò͘ chìn-hêng ha̍p-chok, mā bô choán-pò͘ chú-pān-kok ê tiān-sī-tâi chiat-bo̍k. Siōng kài khin ê tio̍h sī Bí-kok chit piàn chhái-chhú ê gōa-kau té-chè. Bí-kok chèng-hú ê khó-liōng sī, Ò-ūn-hōe múi sì nî chiah pān chi̍t piàn, chin chē ūn-tōng-goân tī i ê seng-gâi lāi kan-ta ū ke̍k-chió ê ki-hōe ē-tàng chham-ú Ò-ūn-hōe. Put-chún ūn-tōng-goân chham-ka m̄-nā ē kā goân-pún ū khó-lêng tit-tio̍h chióng-pâi ê ki-hōe pe̍h-pe̍h niū hō͘ pa̍t kok ê ūn-tōng-goân, chèng-hú mā chin ū khó-lêng hông mē kóng sī ûi-pōe ūn-tōng cheng-sîn, chèng-tī kan-ū ūn-tōng. In-ūi sī siōng khin ê té-chè, bo̍k-koài Bí-kok chêng kok-bū-kheng Phông-phé-o（Meke Pompeo）ē mē kóng chit chióng té-chè ia̍h bē thiàⁿ ia̍h bē chiūⁿ, tian-tò sī ka-kī sit-khì li̍p-tiûⁿ. Kan-ta ' gōa-kau té-chè’ kin-pún bô kàu la̍t! Τiong-kiōng chèng-koân ná ū teh kiaⁿ lí siáⁿ-mi̍h gōa-kau té-chè, in-ūi kàu lō͘-bé pí-sài iû-goân sī chiàu-siông chìn-hêng, Pak-kiaⁿ kāng-khoán ē sái ka-kī kóng sī bān-pang lâi tiâu, chiàu-siông chú-tō sèng-lī. Pài-teng eng-kai ngē (ngē) khí-lâi, chiàⁿ-bīn kah Τiong-kiōng Ò-ūn tùi siah! Té-chè pak-kiaⁿ Tang-ò .

　　 Tiong-kok m̄-nā ū nn̄g chheng gōa lia̍p hui-tôaⁿ chng hiòng Tâi-oân, bô hòng-khì bú-le̍k kái-hòng Tâi-oân, Tâi-oân lâng Lí Bêng-tiat khì Tiong-kok sûi-sî sit-chong, hông lia̍h-khì phòaⁿ hêng koaiⁿ-kaⁿ, chōe miâ sī i tī Tâi-oân hoān tian-ho̍k (Tiong-kok) kok-ka chèng-koân chōe, Tiong-kok sûi-piān kóng lán ê Hêng-chèng-īⁿ-tiúⁿ So͘ Chin-chhiong, Li̍p-hoat-īⁿ-tiúⁿ Iû Sek-khun, gōa-kau-pō͘-tiúⁿ Gô͘ Chiau-siat sī "Tâi-to̍k bân-kò͘ hūn-chú", jî-chhiáⁿ chhiàng-siaⁿ beh tùi in saⁿ-ê lâng chhái-chhú "têng-kài" chhò-si. Kái-hòng-kun kun-ki ta̍k kang poe-lâi lán ê Hui-hâng Sek-pia̍t-khu jiáu-loān. Beh án-chóaⁿ té-chè Pak-kiaⁿ Tang-ò , lán Hú káⁿ ē-sái bô chhut siaⁿ? (211210)




O-lín-phí-khù chú-gī cheng-sîn tē-jī kah tē-la̍k tiám thê-ki̍p î-hō͘ jîn-sèng chun-giâm ki̍p jîn-koân, put chò jīm-hô khî-sī ki̍p chha-pia̍t thāi-gū, tān-sī Τiong-kiōng to̍k-chhâi kiâⁿ-kèng tùi Se-chông, Sin-kiong kah Tiong-kok kéng-lāi î-koân lu̍t-su ê chhim-hāi, tùi jîn-koân ūn-tōng ki̍p Hiang-káng ê chhim-hāi, í-ki̍p tùi Tâi-oân ê ui-hia̍p, ki-pún siōng kai kah Ò-ūn cheng-sîn pōe-tō jî-tî sio tú-tak,




　　十二月初六，美国白宫针对明年behtī北京举行ê冬季奥运会。宣布beh采取外交抵制，也tio̍h是无派任何外交ah 是官方代表参加，但是美国冬奥代表队ê选手、教练团等lóngē照常参加。Chit-ê行动是因为中国tī新疆持续进行种族灭绝kah反人类罪行。美国是giâ Olympic精神第二kah第六点所提ê「维护人性尊严kah人权」chit枝大旗teh讲话。中国外交部发言人赵立坚讲，中方对美方ê举动表示「强烈不满、坚决反对，已经向美方提出严正交涉，美方若是一人犯众人，中方一定ē采取坚决反制ê措施。」

　　美国开出第一铳了后，「五眼联盟」国家—纽西兰、澳洲、加拿大、英国lóng总tòe美国ê脚步，beh采取外交抵制北京冬奥。第一个出声ê是纽西兰，表示bē派官员出席，kan-ta 强调kah疫情考量有关。足好笑ê是，中国官方soah 讲：「根本无邀请lín来！」骂讲chiah-ê国家是teh政治炒作、自作多情。甚至官报《环球时报》总编辑胡锡进起屁面讲：美国宣布官员lóng无beh出席北京冬奥会，哈哈，中国人讲，咱敢有稀罕in来？

　　抵制奥运会分作三级，上严重ê是全面抵制，像1980年苏联tī莫斯 科举办ê夏季奥运会，美国tio̍h是拒绝派出运动员参赛，以抗议苏联入侵阿富汗。第二级是经济抵制，虽然有派运动员参赛，但是无beh kah主办国ê商业机构进行合作，mā无转播主办国ê电视台节目。上kài轻êtio̍h是美国chit遍采取ê外交抵制。美国政府ê考量是，奥运会每四年才办一遍，真chē运动员tī伊ê生涯内kan-ta 有极少ê机会ē-tàng参与奥运会。不准运动员参加m̄-nāēkā原本有可能得tio̍h奖牌ê机会白白让hō͘别国ê运动员，政府mā真有可能hông骂讲是违背运动精神，政治干预运动。因为是上轻ê抵制，莫怪美国前国务卿Phông-phé-o（Mike Pompeo）ē骂讲chit种抵制亦bē疼亦bē chiūⁿ，顚倒是家己失去立场。Kan-ta 『外交抵制』根本无够力！中共政权ná有teh惊你啥物外交抵制，因为到路尾比赛犹原是照常进行，北京仝款ē使家己讲是万邦来朝、照常主导胜利。拜登应该硬（ngē）起来，正面kah中共奥运对siah！抵制北京冬奥。

　　中国m̄-nā有两千外粒飞弹装向台湾，无放弃武力解放台湾，台湾人李明哲去中国随时失踨、hông掠去判刑关监，罪名是伊tī台湾犯颠覆（中国）国家政权罪，中国随便讲咱ê行政院长苏贞昌、立法院长游锡堃、外交部长吴钊燮是「台独顽固分子」，而且唱声beh对in三个人采取「惩戒」措施。解放军军机ta̍k工飞来咱ê飞航识别区扰乱。Beh按怎抵制北京冬奥，咱府敢ē使无出声？ (211210)




奥林匹克主义精神第二及第六点提及维护人性尊严和人权，不做任何歧视和差别待遇，但是中共独裁行径对西藏、新疆及中国境内维权律师ê侵害，对人权运动和香港ê侵害，以及对台湾ê威胁，基本上皆与奥运精神背道而驰相抵触，