《绿色短评》

 | | | 转寄

中国对台湾án-ne统战，笑死人！

作者 李南衡, ChoânTâijī/全台字 by Chng Hūiphêng 2021.12.12

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　　　　　　 Lí Lâmhêng

　　　　　　 Tiongkok tùi Tâioân ánne thóngchiàn, chhiò sílâng!

　　 Cha̍pitgoe̍h jīcha̍p, Tiongkok koaⁿhong mûithé 《 Jînbîn Chèng hia̍ppò 》tī tēgō͘ pán " nn̄g hōaⁿ keng ha̍p chiukhan " khan chhut chi̍t phiⁿ bûnchiuⁿ, "ūi siáⁿmi̍h kóng Tâioân ê chiântô͘ chāi tī thóngit? " bûnchiuⁿ kóng, nā thóngit Tâioân liáuāu, Tâioân bînchiòng siōngkài ūkám ê hóchhù, mā sī siōng=kài ti̍tchiap ê hóchhù sī, Tâioân 2,300 bān bînchiòng múi lâng múi nî ētàng chēngka siuji̍p sin tâipè nn̄gbān gōa. Lūntiám sī thóngit Tâioân liáuāu, Tiongkok tio̍h bē phah Tâioân, Tâioân tio̍h bián khaichîⁿ bé kunpī búkhì kah kiám khui kimoān gōakau, chit nn̄g tiâu chîⁿ lóng séng・khílâi, chiatséⁿ chichhut sin tâipè 6,000 ek, ētàng pun hō͘ Tâioân 2,300 bān bînchiòng, múi lâng múi nî chēngka siuji̍p sin tâipè nn̄gbān gōa, tùi phó͘thong pehsèⁿ lâi kóng, chiahni̍h hó ê thóngit, tongjiân ē kîthāi.

　　 Thóngit Tâioân liáuāu, Tâioân 2,300 bān bînchiòng múi lâng múi nî ētàng chēngka siuji̍p sintâipè nn̄gbān gōa kho͘, ū siáⁿmi̍h hó kîthāi? Siatsú Tâioân bo̍kchêng sī chi̍tê bô chūiû bô bînchú bô jînkoân ê só͘chāi, Tiongkok sī chi̍tê chūiû bînchú jînkoân sianchìn ê kokka, hoahsiaⁿ kóng nā sī thóngit Tâioân liáuāu, Tâioân 2,300 bān bînchiòng tio̍h ētàng kah cha̍psì ek Tiongkok lâng kāngkhoán, kah sèkài sianchìn kokka ê lâng kāngkhoán, kòe tio̍h ū chūiû si̍thêng bînchú chuntiōng jînkoân ê sengoa̍h, ánne Tâioân phó͘thong pehsèⁿ ē ū kîthāi mā khah ūiáⁿ. Sūsi̍t sī tútú tòhoán, Tâioân sī chi̍tê chūiû bînchú jînkoân ê só͘chāi. Siatsú Tâioân bo̍kchêng sengoa̍h chúichún khah kē, Tiongkok lâng sī kòe tio̍h sèkài kip hùjū ê sengoa̍h, tōasiaⁿ hoahkóng nā sī thóngit Tâioân liáuāu, Tâioân 2,300 bān bînchiòng tio̍h ētàng kah cha̍psì ek Tiongkok lâng kāngkhoán, kah sèkài sianchìn kokka ê lâng kāngkhoán, kòe tio̍h hùjū khoàilo̍k ê sengoa̍h, ū khólêng ū chi̍tkóa Tâioân bînchiòng ē himsiān. Sūsi̍t siōng sī Tâioân pí Tiongkok hó chin chē, Tâioân jînkháu 2,300 bān lâng, múi lâng pêngkin GDP sī bíkim 2.838 bān, Tiongkok siōng ài tián ê itsòaⁿ sì tōa siâⁿchhī "Pak Siōng Kńg Chhim"— Pakkiaⁿ Siōnghái Kńgchiu Chhimchùn, bô chi̍tê siâⁿchhī pí Tâioân khah hó. Pakkiaⁿ jînkháu 2,189 bān lâng, múi lâng pêngkin GDP sī bíkim 2.391 bān, Tâioân ê 84.2%; siōng hái jînkháu 2,487 bān lâng, múi lâng pêngkin GDP sī bíkim 2.256 bān, Tâioân ê 79.5%; Kńgchiu jînkháu 1,867 bān lâng, múi lâng pêngkin GDP sī bíkim 1.940 bān, Tâioân ê 68.4%; Chhimchùn 1,756 bān lâng, múi lâng pêngkin GDP sī bíkim 2.284 bān, Tâioân ê 79.5%.

　　Nā sī chiàu Tiongkok Kokbūīⁿ chónglí Lí Khekkiông só͘ kóng・ê, Tiongkok ū la̍k ek lâng múi kògoe̍h ê siuji̍p bô kàu jînbînpè 1,000 kho͘, iok sin tâipè 4,300 kho͘, láusi̍t kóng, Tiongkok nā beh tùi Tâioân thóngchiàn, kóngtio̍h chîⁿ tio̍h chin iànkhì, chha lán hiah chē iā káⁿ kóng chîⁿ. Ū châitiāu tio̍hkóng chètō͘, kóng Tiongkok si̍tsi kiōngsán chúgī chètō͘, siáⁿmi̍h siáⁿmi̍h siáⁿmi̍h, pí Tâioân si̍tsi bînchú chètō͘ ke hó chin chē. Kóng ē chhutlâi, koh kóng ē chhut chi̍t thò thiaⁿliáu lâng ē ho̍k i ê tōlí lâi, lán mā siósió kā chunkèng. Bô, oânchoân kóng bē chhutlâi, kanta ēhiáu ēng búle̍k uihia̍p lán, ahsī ta̍k kang kunki poe ji̍plâi lán ê Sailâm Hôngkhong Sekpia̍tkhu jiáuloān, lán ná khòaⁿ i ē khí leh? Tiongkok lâng hiah chē, káⁿ bô kúiêá khah ū thâukhak ê?

　　 Tiongkok tùi Tâioân ánne thóngchiàn, chhiò sílâng! chinchiàⁿ m̄ kiaⁿ chhiò phòa lâng ê chhùi? 　　(211126)

Pe̍h-ōe-jī-pán/白话字版

《 Le̍k-sek toán-phêng 》　　　　　　　　 Lí Lâm-hêng

　　　　　　 Tiong-kok tùi Tâi-oân án-ne thóng-chiàn, chhiò sí-lâng!

　　 Cha̍p-it-goe̍h jī-cha̍p, Tiong-kok koaⁿ-hong mûi-thé 《 Jîn-bîn Chèng -hia̍p-pò 》tī tē-gō͘ pán " nn̄g hōaⁿ keng ha̍p chiu-khan " khan chhut chi̍t phiⁿ bûn-chiuⁿ, "ūi siáⁿ-mi̍h kóng Tâi-oân ê chiân-tô͘ chāi tī thóng-it? " bûn-chiuⁿ kóng, nā thóng-it Tâi-oân liáu-āu, Tâi-oân bîn-chiòng siōng-kài ū-kám ê hó-chhù, mā sī siōng=kài ti̍t-chiap ê hó-chhù sī, Tâi-oân 2,300 bān bîn-chiòng múi lâng múi nî ē-tàng chēng-ka siu-ji̍p sin tâi-pè nn̄g-bān gōa. Lūn-tiám sī thóng-it Tâi-oân liáu-āu, Tiong-kok tio̍h bē phah Tâi-oân, Tâi-oân tio̍h bián khai-chîⁿ bé kun-pī bú-khì kah kiám khui kim-oān gōa-kau, chit nn̄g tiâu chîⁿ lóng séng-・khí-lâi, chiat-séⁿ chi-chhut sin tâi-pè 6,000 ek, ē-tàng pun hō͘ Tâi-oân 2,300 bān bîn-chiòng, múi lâng múi nî chēng-ka siu-ji̍p sin tâi-pè nn̄g-bān gōa, tùi phó͘-thong peh-sèⁿ lâi kóng, chiah-ni̍h hó ê thóng-it, tong-jiân ē kî-thāi.

　　 Thóng-it Tâi-oân liáu-āu, Tâi-oân 2,300 bān bîn-chiòng múi lâng múi nî ē-tàng chēng-ka siu-ji̍p sin-tâi-pè nn̄g-bān gōa kho͘, ū siáⁿ-mi̍h hó kî-thāi? Siat-sú Tâi-oân bo̍k-chêng sī chi̍t-ê bô chū-iû bô bîn-chú bô jîn-koân ê só͘-chāi, Tiong-kok sī chi̍t-ê chū-iû bîn-chú jîn-koân sian-chìn ê kok-ka, hoah-siaⁿ kóng nā sī thóng-it Tâi-oân liáu-āu, Tâi-oân 2,300 bān bîn-chiòng tio̍h ē-tàng kah cha̍p-sì ek Tiong-kok lâng kāng-khoán, kah sè-kài sian-chìn kok-ka ê lâng kāng-khoán, kòe tio̍h ū chū-iû si̍t-hêng bîn-chú chun-tiōng jîn-koân ê seng-oa̍h, án-ne Tâi-oân phó͘-thong peh-sèⁿ ē ū kî-thāi mā khah ū-iáⁿ. Sū-si̍t sī tú-tú tò-hoán, Tâi-oân sī chi̍t-ê chū-iû bîn-chú jîn-koân ê só͘-chāi. Siat-sú Tâi-oân bo̍k-chêng seng-oa̍h chúi-chún khah kē, Tiong-kok lâng sī kòe tio̍h sè-kài kip hù-jū ê seng-oa̍h, tōa-siaⁿ hoah-kóng nā sī thóng-it Tâi-oân liáu-āu, Tâi-oân 2,300 bān bîn-chiòng tio̍h ē-tàng kah cha̍p-sì ek Tiong-kok lâng kāng-khoán, kah sè-kài sian-chìn kok-ka ê lâng kāng-khoán, kòe tio̍h hù-jū khoài-lo̍k ê seng-oa̍h, ū khó-lêng ū chi̍t-kóa Tâi-oân bîn-chiòng ē him-siān. Sū-si̍t siōng sī Tâi-oân pí Tiong-kok hó chin chē, Tâi-oân jîn-kháu 2,300 bān lâng, múi lâng pêng-kin GDP sī bí-kim 2.838 bān, Tiong-kok siōng ài tián ê it-sòaⁿ sì tōa siâⁿ-chhī "Pak Siōng Kńg Chhim"— Pak-kiaⁿ Siōng-hái Kńg-chiu Chhim-chùn, bô chi̍t-ê siâⁿ-chhī pí Tâi-oân khah hó. Pak-kiaⁿ jîn-kháu 2,189 bān lâng, múi lâng pêng-kin GDP sī bí-kim 2.391 bān, Tâi-oân ê 84.2%; siōng hái jîn-kháu 2,487 bān lâng, múi lâng pêng-kin GDP sī bí-kim 2.256 bān, Tâi-oân ê 79.5%; Kńg-chiu jîn-kháu 1,867 bān lâng, múi lâng pêng-kin GDP sī bí-kim 1.940 bān, Tâi-oân ê 68.4%; Chhim-chùn 1,756 bān lâng, múi lâng pêng-kin GDP sī bí-kim 2.284 bān, Tâi-oân ê 79.5%.

　　Nā sī chiàu Tiong-kok Kok-bū-īⁿ chóng-lí Lí Khek-kiông só͘ kóng-・ê, Tiong-kok ū la̍k ek lâng múi kò-goe̍h ê siu-ji̍p bô kàu jîn-bîn-pè 1,000 kho͘, iok sin tâi-pè 4,300 kho͘, láu-si̍t kóng, Tiong-kok nā beh tùi Tâi-oân thóng-chiàn, kóng-tio̍h chîⁿ tio̍h chin iàn-khì, chha lán hiah chē iā káⁿ kóng chîⁿ. Ū châi-tiāu tio̍h-kóng chè-tō͘, kóng Tiong-kok si̍t-si kiōng-sán chú-gī chè-tō͘, siáⁿ-mi̍h siáⁿ-mi̍h siáⁿ-mi̍h, pí Tâi-oân si̍t-si bîn-chú chè-tō͘ ke hó chin chē. Kóng ē chhut-lâi, koh kóng ē chhut chi̍t thò thiaⁿ-liáu lâng ē ho̍k i ê tō-lí lâi, lán mā sió-sió kā chun-kèng. Bô, oân-choân kóng bē chhut-lâi, kan-ta ē-hiáu ēng bú-le̍k ui-hia̍p lán, ah-sī ta̍k kang kun-ki poe ji̍p-lâi lán ê Sai-lâm Hông-khong Sek-pia̍t-khu jiáu-loān, lán ná khòaⁿ i ē khí leh? Tiong-kok lâng hiah chē, káⁿ bô kúi-ê-á khah ū thâu-khak ê?

　　 Tiong-kok tùi Tâi-oân án-ne thóng-chiàn, chhiò sí-lâng! chin-chiàⁿ m̄ kiaⁿ chhiò phòa lâng ê chhùi? 　　(211126)

　　十一月二十，中国官方媒体《人民政协报》tī第五版「两岸经合周刊」刊出一篇文章：「为啥物讲台湾ê前途在tī统一？」文章讲，nā统一台湾了后，台湾民众上kài有感ê好处，mā是上kài直接ê好处是，台湾2,300万民众每人每年ē-tàng增加收入新台币两万外元。论点是统一台湾了后，中国tio̍h bē拍台湾，台湾tio̍h免开钱买军备武器kah减开金援外交，chit两条钱lóng省起来，节省支出新台币6,000亿，ē-tàng分hō͘台湾2,300万民众，每人每年增加收入新台币两万外元，对普通百姓来讲，chiah-nih好ê统一，当然ē期待。

　　统一台湾了后，台湾2,300万民众每人每年ē-tàng增加收入新台币两万外元，有啥物好期待？设使台湾目前是一个无自由无民主无人权ê所在，中国是一个自由民主人权先进ê国家，喝声讲nā是统一台湾了后，台湾2,300万民众tio̍h ē-tàng kah十四亿中国人仝款、kah世界先进国家ê人仝款，过tio̍h有自由实行民主尊重人权ê生活，án-ne台湾普通百姓ē有期待mā khah有影。事实是tú-tú倒反，台湾是一个自由民主人权ê所在。设使台湾目前生活水准khah低，中国人是过tio̍h世界级富裕ê生活，大声喝讲nā是统一台湾了后，台湾2,300万民众tio̍hē-tàng kah十四亿中国人仝款、kah世界先进国家ê人仝款，过tio̍h富裕快乐ê生活，有可能有一寡台湾民众ē欣羡。事实上是台湾比中国好真chē，台湾人口2,300万人、每人平均GDP是美金2.838万，中国上爱展ê一线四大城市「北上广深」—北京上海广州深圳，无一个城市比台湾khah好。北京人口2,189万人、每人平均GDP是美金2.391万、台湾ê84.2%；上海人口2,487万人、每人平均GDP是美金2.256万、台湾ê79.5%；广州人口1,867万人、每人平均GDP是美金1.940万、台湾ê68.4%；深圳1,756万人、每人平均GDP是美金2.284万、台湾ê79.5%。

　　Nā是照中国国务院总理李克强所讲ê，中国有六亿人每个月ê收入无够人民币1,000元、约新台币4,300元，老实讲，中国nābeh对台湾统战，讲tio̍h钱tio̍h真iàn气，差咱hiah chē也敢讲钱。有才调tio̍h讲制度，讲中国实施共产主义制度，啥物啥物啥物，比台湾实施民主制度加好真chē。讲ē出来、koh讲ē出一套听了人ē服伊ê道理来，咱mā小小kā尊敬。无，完全讲bē出来，kan-taē晓用武力威胁咱，ah是逐工军机飞入来咱ê西南防空识别区扰乱，咱ná看伊ē起咧？中国人hiah chē，敢无几个á khah有头壳ê？

　　中国对台湾án-ne统战，笑死人！真正m̄惊笑破人ê嘴？　　(211126)