《绿色短评》

 | | | 转寄

Chit遍恶罢成功，台湾人náē-sái无觉醒！

作者 李南衡, ChoânTâijī/全台字 by Chng Hūiphêng 2021.11.07

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

　　　 Chit piàn ok pā sêngkong, Tâioânlâng ná ēsái bô kakchhéⁿ!

　　 Cha̍pgoe̍h jīsaⁿ, Tâitiong tējī soánkhu, iā chiūsī Soalo̍k, O͘ji̍t, Tōatō͘, Liôngchéⁿ, Būhong gō͘ khu ê soánbîn kíhêng "pābián li̍púi Tân Pekî tâuphiò "gō͘ khu soánkí jînsò͘ sī 29 bān 4,976 lâng, pābián thongkòe ê hō͘tēng sī sìhun chṳt, iā chiūsī 7 bān 3,744 phiò, jîchhiáⁿ, tôngì phiò tio̍h pí put tôngì phiò khah chē chiah ū chúnsǹg. Chin lântit tâuphiò lu̍t chhiaukòe 51.72%. Kàu ēpo͘ chhit tiám só͘ tittio̍h ê kiatkó, tôngì phiò 7 bān 7,899 phiò, ū hāⁿ kòe pābián ê hō͘tēng, jîchhiáⁿ pí put tôngì phiò 7 bān 3,433 phiò ū khah chē. Só͘í pābián thongkòe.

　　 Chit piàn ê pābián ēsái kóng sī chi̍t tiûⁿ tōa ap sè, kiông phah jio̍k, ok khi siān, oânchoân bô kongpêⁿ ê pābián. Chi̍tê sèkài siōng tōa tóng, ū 9,500 bān ê tóngoân ê Tiongkok kiōngsántóng, kah Tâioân tēit tōa chāṳá tóng, tī li̍phoatīⁿ ū 38 sek ê Tiongkok Kokbîntóng tàukhang, beh kā li̍phoatīⁿ siōng sè tóng, kantaⁿ ū chi̍tê li̍phoat úigoân ê Tâioân Kichìn li̍phoat úigoân Tân pekî pābián tiāu, kohchài phòeha̍p tēhng sèle̍k chin kiông ê Gânka bú chit chhut pābián àn.

　　Chit saⁿ hongbīn ū bô kāngkhoán ê siūⁿhoat kah phahsǹg. Káugoe̍h jīla̍k, Tiongkok Kiōngsántóng Chóngsukì Xíjìnpíng hoat hō͘ Chu Li̍plûn tòngsoán tóngchúse̍k ê hōtiān, tûliáu kah íóng kāngkhoán, kianchhî "Kiújī kiōngsek", hoántùi "Tâito̍k" ê kiōngtông chèngtī kichhó͘ siōng ê liôngsèng hō͘tōng, kakiông ha̍pchok ígōa, kiⁿî kah éngnî bô kâng ê "sèngchí" sī, "ūi kokka bô͘ thóngit". Xíjìnpíng kiaⁿ Chu Li̍plûn bē kìtit, te̍kpia̍t tī Chu Li̍plûn chiūjīm tóngchúse̍k hit kang, tī < Tiongiong tiānsītâi > iû Tiongkok Siākho īⁿ Tâioân giánkiùsó͘ hù giánkiùoân Tân Kùichheng hē chítō kî, te̍kpia̍t thêchhéⁿ Chu Li̍plûn ê sì ki chìⁿ, ū chi̍t ki sī pābián Tân Pekî, ū chi̍t ki sī pābián Lîm Chhióngchò, ū chi̍t ki sī nîté ê sì tōa kongtâu, tēngūi choh "tókoh kongtâu", hō͘ hiānchāi Bînchìntóng chipchèng ê hêngchèng thoântūi chi̍tê kiôngle̍k ê táⁿkek.

Le̍ksú siōng tit phiò lu̍t siōng kē tòngsoán Tiongkok Kokbîntóng chúse̍k ê Chu Li̍plûn, kín beh tī pābián Tân pekî chit àn li̍pui, koh khah iàukín sī, pābián ū chiâⁿ koh ētàng hiòng pakkiaⁿ chhéngkong, kā tī li̍phoatīⁿ siōng kianchhî Tâioân to̍kli̍p ê Tâioân Kichìn îit ê li̍púi pābián tiāu, chhiáⁿ kì liaulô chi̍t tōa kong.

Gânka ê siūⁿhoat chin kántan, khòaⁿ Tân pekî chi̍t nî cha̍p kò goe̍h chò li̍phoat úigoân chò liáu thài hó, tánthāi i chi̍t jīm chò liáu, āu chi̍t jīm li̍púi oânchoân bián siūⁿ beh soán iâⁿ, thàn i chi̍t jīm iáu bōe chò oân, sòa kā pābián tiāu tio̍h ētàng ansim á khùn.

Tiongkok Kokbîntóng tio̍h chhut oklia̍t ê pō͘sò͘, bôkoán sī chōiâu , boah o͘, súnhāi jînkeh, chhōe bô pābián ê líiû tio̍h chèchō chi̍t kóa "chiàkháu", chò chi̍t tōatui khòaⁿpán siá "chōechōng". Só͘í lâng chiah ē kóng che sī chi̍t tiûⁿ ê "ok pā". Chit pō͘ nā ē thong, Tiongkok Kiōngsántóng bián ēng chi̍t peng chi̍t chut, kantaⁿ hē chi̍t tō chi̍t tō ê "sèngchí", Tâioân ê liaulô tio̍h ētàng kā Tâioân bú kah o͘thiⁿ àmtē, puttek anlêng.

　　 Chit piàn ok pā sêngkong, Tâioânlâng ná ēsái bô kakchhéⁿ! 　　 (211023)

Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng

　　　 Chit piàn ok pā sêng-kong, Tâi-oân-lâng ná ē-sái bô kak-chhéⁿ!

　　 Cha̍p-goe̍h jī-saⁿ, Tâi-tiong tē-jī soán-khu, iā chiū-sī Soa- lo̍k, O͘-ji̍t, Tōa-tō͘, Liông-chéⁿ, Bū-hong gō͘ khu ê soán-bîn kí-hêng "pā-bián li̍p-úi Tân Pek-î tâu-phiò "gō͘ khu soán-kí jîn-sò͘ sī 29 bān 4,976 lâng, pā-bián thong-kòe ê hō͘-tēng sī sì-hun chi-it, iā chiū-sī 7 bān 3,744 phiò, jî-chhiáⁿ, tông-ì phiò tio̍h pí put tông-ì phiòkhah chē chiah ū chún-sǹg. Chin lân-tit tâu-phiò lu̍t chhiau-kòe 51.72%. Kàu ē-po͘ chhit tiám só͘ tit-tio̍h ê kiat-kó, tông-ì phiò 7 bān 7,899 phiò, ū hāⁿ kòe pā-bián ê hō͘-tēng, jî-chhiáⁿ pí put tông-ì phiò 7 bān 3,433 phiò ū khah chē. Só͘-í pā-bián thong-kòe.

　　 Chit piàn ê pā-bián ē-sái kóng sī chi̍t tiûⁿ tōa ap sè, kiông phah jio̍k, ok khi siān, oân-choân bô kong-pêⁿ ê pā-bián. Chi̍t-ê sè-kài siōng tōa tóng, ū 9,500 bān ê tóng-oân ê Tiong-kok kiōng-sán-tóng, kah Tâi-oân tē-it tōa chāi-iá tóng, tī li̍p-hoat-īⁿ ū 38 sek ê Tiong-kok Kok-bîn-tóng tàu-khang, beh kā li̍p-hoat-īⁿ siōng sè tóng, kan-taⁿ ū chi̍t-ê li̍p-hoat úi-goân ê Tâi-oân Ki-chìn li̍p-hoat úi-goân Tân pek-î pā-bián tiāu, koh-chài phòe-ha̍p tē-hng sè-le̍k chin kiông ê Gân--ka bú chit chhut pā-bián àn.

　　Chit saⁿ hong-bīn ū bô kāng-khoán ê siūⁿ-hoat kah phah-sǹg. Káu-goe̍h jī-la̍k, Tiong-kok Kiōng-sán-tóng Chóng-su-kì Xíjìnpíng hoat hō͘ Chu Li̍p-lûn tòng-soán tóng-chú-se̍k ê hō-tiān, tû-liáu kah í-óng kāng-khoán, kian-chhî "Kiú-jī kiōng-sek", hoán-tùi "Tâi-to̍k" ê kiōng-tông chèng-tī ki-chhó͘ siōng ê liông-sèng hō͘-tōng, ka-kiông ha̍p-chok í-gōa, kin-nî kah éng-nî bô kâng ê "sèng-chí" sī, "ūi kok-ka bô͘ thóng-it". Xíjìnpíng kiaⁿ Chu Li̍p-lûn bē kì-tit, te̍k-pia̍t tī Chu Li̍p-lûn chiū-jīm tóng-chú-se̍k hit kang, tī < Tiong-iong tiān-sī-tâi > iû Tiong-kok Siā-kho- īⁿ Tâi-oân gián-kiù-só͘ hù gián-kiù-oân Tân Kùi-chheng hē chí-tō kî, te̍k-pia̍t thê-chhéⁿ Chu Li̍p-lûn ê sì ki chìⁿ, ū chi̍t ki sī pā-bián Tân Pek-î, ū chi̍t ki sī pā-bián Lîm Chhióng-chò, ū chi̍t ki sī nî-té ê sì tōa kong-tâu, tēng-ūi choh "tó-koh kong-tâu", hō͘ hiān-chāi Bîn-chìn-tóng chip-chèng ê hêng-chèng thoân-tūi chi̍t-ê kiông-le̍k ê táⁿ-kek.
Le̍k-sú siōng tit phiò lu̍t siōng kē tòng-soán Tiong-kok Kok-bîn-tóng chú-se̍k ê Chu Li̍p-lûn, kín beh tī pā-bián Tân pek-î chit àn li̍p-ui, koh khah iàu-kín sī, pā-bián ū chiâⁿ koh ē-tàng hiòng pak-kiaⁿ chhéng-kong, kā tī li̍p-hoat-īⁿ siōng kian-chhî Tâi-oân to̍k-li̍p ê Tâi-oân Ki-chìn î-it ê li̍p-úi pā-bián tiāu, chhiáⁿ kì liau-lô chi̍t tōa kong.

Gân--ka ê siūⁿ-hoat chin kán-tan, khòaⁿ Tân pek-î chi̍t nî cha̍p kò goe̍h chò li̍p-hoat úi-goân chò liáu thài hó, tán-thāi i chi̍t jīm chò liáu, āu chi̍t jīm li̍p-úi oân-choân bián siūⁿ beh soán iâⁿ, thàn i chi̍t jīm iáu bōe chò oân, sòa kā pā-bián tiāu tio̍h ē-tàng an-sim á khùn.

Tiong-kok Kok-bîn-tóng tio̍h chhut ok-lia̍t ê pō͘-sò͘, bô-koán sī chō-iâu , boah o͘, sún-hāi jîn-keh, chhōe bô pā-bián ê lí-iû tio̍h chè-chō chi̍t kóa "chià-kháu", chò chi̍t tōa-tui khòaⁿ-pán siá "chōe-chōng". Só͘-í lâng chiah ē kóng che sī chi̍t tiûⁿ ê "ok pā". Chit pō͘ nā ē thong, Tiong-kok Kiōng-sán-tóng bián ēng chi̍t peng chi̍t chut, kan-taⁿ hē chi̍t tō chi̍t tō ê "sèng-chí", Tâi-oân ê liau-lô tio̍h ē-tàng kā Tâi-oân bú kah o͘-thiⁿ àm-tē, put-tek an-lêng.

　　 Chit piàn ok pā sêng-kong, Tâi-oân-lâng ná ē-sái bô kak-chhéⁿ! 　　 (211023)



　　十月二三，台中第二选区，也就是沙鹿、乌日、大肚、龙井、雾峰五区ê选民举行「罢免立委陈柏惟（Tân pek-î）投票」五区选举人数是29万4,976人，罢免通过ê户碇是四分之一，也就是7万3,744票，而且，同意票tio̍h比不同意票khahchē chiah有准算。真难得投票率超过51.72%。到下晡七点所得tio̍hê结果，同意票7万7,899票，有hāⁿ过罢免ê户碇，而且比不同意票7万3,433票有khahchē。所以罢免通过。

　　Chit遍ê罢免ē-sái讲是一场大压细、强phah弱、恶欺善，完全无公平ê罢免。一个世界siōng大党、有9,500万个党员ê中国共产党，kah台湾第一大在野党、tī立法院有38席ê中国国民党斗khang，beh kā立法院siōng细党、kan-taⁿ有一个立法委员ê台湾基进立法委员陈柏惟（Tân pek-î）罢免掉，koh再配合地方势力真强ê颜家舞chit出罢免案。

　　Chit三方面有无仝款ê想法kah phah算。九月二六，中国共产党总书记习近平发hō͘朱立伦当选党主席ê贺电，除了kah以往仝款：坚持「九二共识」、反对「台独」ê共同政治基础上ê良性互动，加强合作以外，今年kah永年无仝ê「圣旨」是：「为国家谋统一」。习近平惊朱立伦bē记得，特别tī朱立伦就任党主席hit工，tī《中央电视台》由中国社科院台湾研究所副研究员陈桂清下指导棋，特别提醒朱立伦ê四支箭，有一支是罢免陈柏惟（Tân pek-î），有一支是罢免林昶佐，有一支是年底ê四大公投，定位作「倒阁公投」，hō͘现在民进党执政ê行政团队一个强力ê打击。

历史上得票率siōng低当选中国国民党主席ê朱立伦，紧beh tī罢免陈柏惟（Tân pek-î）chit案立威，koh khah要紧是，罢免有成koh ē-tàng向北京请功，kā tī立法院siōng坚持台湾独立ê台湾基进唯一ê立委罢免掉，请记liau-lô一大功。

颜家ê想法真简单，看陈柏惟（Tân pek-î）一年十个月做立法委员做了太好，等待伊一任做了，后一任立委完全免想beh选赢，趁伊一任犹未做完，sòa kā罢免掉tio̍hē-tàng安心á困。

中国国民党tio̍h出恶劣ê步数，无管是造谣、抹乌、损害人格，chhōe无罢免ê理由tio̍h制造一寡「藉口」，做一大堆看板写「罪状」。所以人chiahē讲che是一场ê「恶罢」。Chit步nāē通，中国共产党免用一兵一卒，kan-taⁿ下一道一道ê「圣旨」，台湾ê liau-lô tio̍h ē-tàng kā台湾舞kah乌天暗地、不得安宁。

　　Chit遍恶罢成功，台湾人ná ē-sái无觉醒！　　 (211023)

注1：习近平 请用华语念 注2：陈柏惟（Tân pek-î）　请用华语念，才koh念台语发音 注3：喽罗　liâu-lô