《绿色短评》

 | | | 转寄

国、共两党kám一定tio̍h配合kah chiah-ni̍h bā？

作者 李南衡, ChoânTâijī/全台字 by Chng Hūiphêng 2021.11.14

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　　　　　　　　　 Lí Lâmhêng
　　　　　　 Kok, Kiōng nn̄g tóng kám ittēng tio̍h phòeha̍p kah chiahni̍h bā?

　　 Cha̍pgoe̍h jīcha̍p, Auchiu gīhōe í aptòsèng phiò sò͘ thongkòe "Aubêng,Tâioân chèngtī koanhē kah ha̍pchok" pòkò, kâng chi̍t kang, lán gōakau pō͘tiúⁿ Ngô͘ Chiausiat soanpò͘ ītēng āu lépài ē khì hóngbūn Auchiu, Ngô͘ Chiausiat tī li̍phoatīⁿ kiôngtiāu,"Tâioân kah Auchiu kauóng ê sin sîtāi íkeng lâi lo̍h". Tùi Ngô͘ pō͘tiúⁿ beh khì Auchiu hóngbūn chit kiāⁿ tāichì, Tiongkok gōakau pō͘ hoatgiânjîn Ong Bûnpin tī lēhêng kìchiáhōe chíchhut kóng, tng teh bi̍tchhiat koansim chùì iúkoan jînoân "chhoàn hóng" ê tōnghiòng, ē chháichhú chèngtong kah pitiàu chhòsi, kiantēng hānōe kokka chúkoân kah léngthó͘ oânchéng, jīmhô lâng to bētàng tùi chit hāng tāichì sim chûn hoànsióng.

Cha̍pgoe̍h jīit, gōakaupō͘ hoatgiânjîn Au Kangan soatbêng kóng, Ngô͘ Chiausiat pō͘tiúⁿ ìn Slovak "Choânkiû anchoân tìkhò͘" iauchhiáⁿ, ē tī cha̍pgoe̍h jīla̍k chhutse̍k kai tìkhò͘ thâuchi̍t piàn kípān ê Tâioân lūntôaⁿ hoatpiáu choantê iánkáng, chútê sī "e̍kchêng chi āu, jūnsèng kah choânkiû kengchè ha̍pchok". Jîāu ē choán óng Czech hóngbūn, chiapsiū Czech chhamgītiúⁿ Miloš Vystrčil panhoat chhamgīīⁿ "kokchè kùipin chióng hāng" gînchit chióngchiong. Hóngbūn kîkan Ngô͘ pō͘tiúⁿ mā iúì hiòng beh pàihóng Praha chhītiúⁿ Zdeněk Hřib, lēnggōa chhamka iû Czech kokka khoha̍k īⁿ kah Czech tìkhò͘ " káisek Tiongkok " ha̍p pān ê giánthóhōe.

Cha̍pgoe̍h jīsì àmsî, gōakau pō͘tiúⁿ Ngô͘ Chiausiat chē huiki chiânóng Auchiu, Ngô͘ pō͘tiúⁿ chhuthoat chêng tī Twitter hoat bûn piáusī, ùi in nn̄g kok Thiangôjiông kekbēng kàu lán kok Iápekha̍p Ha̍kūn, Tâioân, Czech kah Slovakia kín bi̍t sioliân, kāngkhoán khatbōng chūiû, jînkoân kah hoat tī." Góa chin ênghēng ētàng hóngbūn chit nn̄g kok, jîchhiáⁿ kah in ha̍pchok hō͘ sèkài koh khah hó. Thoânkiat hō͘ lán chiâⁿchoh putkhó chó͘tòng ê liôngsiān le̍kliōng!"

Cha̍pgoe̍h jīla̍k chákhí, tī Tiongkok gōakau pō͘ lēhêng kìchiáhōe tiong, Tiongkok gōakaupō͘ hoatgiânjîn Tiō Li̍pkian piáusī, Ngô͘ Chiausiat sī tiánhêng ê "Tâito̍k hunlia̍t hūnchú", sìchhù "chhoàn hóng" ê chinsi̍t bo̍ktek sī "kó͘chhoe Tâito̍k hunlia̍t chútiuⁿ, chèchō ittiong ittâi késiōng", lī keng phòhoāi "Tiongkok kah kiànkaukok ê koanhē", Tiongkok tùi "iúkoan kokka théngsēng Tâito̍k hunlia̍t hūnchú" piáusī "kiankoat hoántùi", iaukiû iúkoan kokka "khoksiú chi̍tê Tiongkok goânchek", bē sái thêkiong oa̍htāng pêⁿtâi hō͘ Tâito̍k hunlia̍t hūnchú. Tiō Li̍pkian kóng, chiàⁿ kò Tâioân tongkio̍k khìtô͘ "gia̍p iûⁿ chūtiōng" bú "Tâito̍k" chùtiāⁿ sī sílō͘ chi̍t tiâu. Tiongkok hānōe kokka chúkoân kah léngthó͘ oânchéng ê koatsim kiantēng putî, ē chháichhú itchhè pitiàu chhòsi kiankoat hún chhùi jīmhô "Tâito̍k" tô͘bô͘.

　　　 Gōakau pō͘tiúⁿ Ngô͘ Chiausiat tng teh Slovakia, Czech hóngbūn, suijiân ū chhéngkà, tānsī tī li̍phoatīⁿ gōakau kah kokhông úigoânhōe bô choh hóngbūn choanàn pòkò. Úigoânhōe tiàuúi , Tiongkok Kokbîntóng li̍púi Tân Ísìn huisiông putboán, tī bīnchheh hoatbûn phoephêng Ngô͘ pō͘tiúⁿ chhutse̍k lu̍t kē, kinpún biáusī kokhōe, Ngô͘ pō͘tiúⁿ chi̍t kang bô lâi gōaúihōe , i tio̍h poekat gōakaupō͘ ūsoàn símcha.

Pí pō͘tūi pantiúⁿ ê "chi̍tê bēnglēng chi̍tê tōngchok" koh khah līhāi, Tiongkok kiōngsántóng "hngh" chi̍tsiaⁿ, Tâioân ê Tiongkok Kokbîntóng tio̍h piàⁿsì beh siulí gōakau pō͘tiúⁿ Ngô͘ Chiausiat. Pàithok leh, Kok Kiōng nn̄g tóng kám ittēng tio̍h phòeha̍p kah chiahni̍h bā? (211029)

Pe̍h-ōe-jī-pán/白话字版

《 Le̍k-sek toán-phêng 》　　　　　　　　　　　 Lí Lâm-hêng
　　　　　　 Kok, Kiōng nn̄g tóng kám it-tēng tio̍h phòe-ha̍p kah chiah-ni̍h bā?

　　 Cha̍p-goe̍h jī-cha̍p, Au-chiu gī-hōe í ap-tò-sèng phiò sò͘ thong-kòe "Au-bêng,Tâi-oân chèng-tī koan-hē kah ha̍p-chok" pò-kò, kâng chi̍t kang, lán gōa-kau pō͘-tiúⁿ Ngô͘ Chiau-siat soan-pò͘ ī-tēng āu lé-pài ē khì hóng-būn Au-chiu, Ngô͘ Chiau-siat tī li̍p-hoat-īⁿ kiông-tiāu,"Tâi-oân kah Au-chiu kau-óng ê sin sî-tāi í-keng lâi lo̍h". Tùi Ngô͘ pō͘-tiúⁿ beh khì Au-chiu hóng-būn chit kiāⁿ tāi-chì, Tiong-kok gōa-kau pō͘ hoat-giân-jîn Ong Bûn-pin tī lē-hêng kì-chiá-hōe chí-chhut kóng, tng teh bi̍t-chhiat koan-sim chù-ì iú-koan jîn-oân "chhoàn hóng" ê tōng-hiòng, ē chhái-chhú chèng-tong kah pit-iàu chhò-si, kian-tēng hān-ōe kok-ka chú-koân kah léng-thó͘ oân-chéng, jīm-hô lâng to bē-tàng tùi chit hāng tāi-chì sim chûn hoàn-sióng.

Cha̍p-goe̍h jī-it, gōa-kau-pō͘ hoat-giân-jîn Au Kang-an soat-bêng kóng, Ngô͘ Chiau-siat pō͘-tiúⁿ ìn Slovak "Choân-kiû an-choân tì-khò͘" iau-chhiáⁿ, ē tī cha̍p-goe̍h jī-la̍k chhut-se̍k kai tì-khò͘ thâu-chi̍t piàn kí-pān ê Tâi-oân lūn-tôaⁿ hoat-piáu choan-tê ián-káng, chú-tê sī "e̍k-chêng chi āu, jūn-sèng kah choân-kiû keng-chè ha̍p-chok". Jî-āu ē choán óng Czech hóng-būn, chiap-siū Czech chham-gī-tiúⁿ Miloš Vystrčil pan-hoat chham-gī-īⁿ "kok-chè kùi-pin chióng hāng" gîn-chit chióng-chiong. Hóng-būn kî-kan Ngô͘ pō͘-tiúⁿ mā iú-ì hiòng beh pài-hóng Praha chhī-tiúⁿ Zdeněk Hřib, lēng-gōa chham-ka iû Czech kok-ka kho-ha̍k īⁿ kah Czech tì-khò͘ " kái-sek Tiong-kok " ha̍p pān ê gián-thó-hōe.

Cha̍p-goe̍h jī-sì àm-sî, gōa-kau pō͘-tiúⁿ Ngô͘ Chiau-siat chē hui-ki chiân-óng Au-chiu, Ngô͘ pō͘-tiúⁿ chhut-hoat chêng tī Twitter hoat bûn piáu-sī, ùi in nn̄g kok Thian-gô-jiông kek-bēng kàu lán kok Iá-pek-ha̍p Ha̍k-ūn, Tâi-oân, Czech kah Slovakia kín bi̍t sio-liân, kāng-khoán khat-bōng chū-iû, jîn-koân kah hoat- tī." Góa chin êng-hēng ē-tàng hóng-būn chit nn̄g kok, jî-chhiáⁿ kah in ha̍p-chok hō͘ sè-kài koh khah hó. Thoân-kiat hō͘ lán chiâⁿ-choh put-khó chó͘-tòng ê liông-siān le̍k-liōng!"

Cha̍p-goe̍h jī-la̍k chá-khí, tī Tiong-kok gōa-kau pō͘ lē-hêng kì-chiá-hōe tiong, Tiong-kok gōa-kau-pō͘ hoat-giân-jîn Tiō Li̍p-kian piáu-sī, Ngô͘ Chiau-siat sī tián-hêng ê "Tâi-to̍k hun-lia̍t hūn-chú", sì-chhù "chhoàn hóng" ê chin-si̍t bo̍k-tek sī "kó͘-chhoe Tâi-to̍k hun-lia̍t chú-tiuⁿ, chè-chō it-tiong it-tâi ké-siōng", lī keng phò-hoāi "Tiong-kok kah kiàn-kau-kok ê koan-hē", Tiong-kok tùi "iú-koan kok-ka théng-sēng Tâi-to̍k hun-lia̍t hūn-chú" piáu-sī "kian-koat hoán-tùi", iau-kiû iú-koan kok-ka "khok-siú chi̍t-ê Tiong-kok goân-chek", bē sái thê-kiong oa̍h-tāng pêⁿ-tâi hō͘ Tâi-to̍k hun-lia̍t hūn-chú. Tiō Li̍p-kian kóng, chiàⁿ kò Tâi-oân tong-kio̍k khì-tô͘ "gia̍p iûⁿ chū-tiōng" bú "Tâi-to̍k" chù-tiāⁿ sī sí-lō͘ chi̍t tiâu. Tiong-kok hān-ōe kok-ka chú-koân kah léng-thó͘ oân-chéng ê koat-sim kian-tēng put-î, ē chhái-chhú it-chhè pit-iàu chhò-si kian-koat hún chhùi jīm-hô "Tâi-to̍k" tô͘-bô͘.

　　　 Gōa-kau pō͘-tiúⁿ Ngô͘ Chiau-siat tng teh Slovakia, Czech hóng-būn, sui-jiân ū chhéng-kà, tān-sī tī li̍p-hoat-īⁿ gōa-kau kah kok-hông úi-goân-hōe bô choh hóng-būn choan-àn pò-kò. Úi-goân-hōe tiàu-úi , Tiong-kok Kok-bîn-tóng li̍p-úi Tân Í-sìn hui-siông put-boán, tī bīn-chheh hoat-bûn phoe-phêng Ngô͘ pō͘-tiúⁿ chhut-se̍k lu̍t kē, kin-pún biáu-sī kok-hōe, Ngô͘ pō͘-tiúⁿ chi̍t kang bô lâi gōa-úi-hōe , i tio̍h poe-kat gōa-kau-pō͘ ū-soàn sím-cha.

Pí pō͘-tūi pan-tiúⁿ ê "chi̍t-ê bēng-lēng chi̍t-ê tōng-chok" koh khah lī-hāi, Tiong-kok kiōng-sán-tóng "hngh" chi̍t-siaⁿ, Tâi-oân ê Tiong-kok Kok-bîn-tóng tio̍h piàⁿ-sì beh siu-lí gōa-kau pō͘-tiúⁿ Ngô͘ Chiau-siat. Pài-thok leh, Kok Kiōng nn̄g tóng kám it-tēng tio̍h phòe-ha̍p kah chiah-ni̍h bā? (211029)



　　十月二十，欧洲议会以压倒性票数通过「欧盟―台湾政治关系kah合作」报告，仝一工，咱外交部长吴钊燮宣布预定后礼拜会去访问欧洲，吴钊燮tī立法院强调，「台湾kah欧洲交往ê新时代已经来lo̍h」。对吴部长beh去欧洲访问chit件tāi-chì，中国外交部发言人汪文斌tī例行记者会指出讲，tng teh密切关心注意有关人员「窜访」ê动向，ē采取正当kah必要措施，坚定捍卫国家主权kah领土完整，任何人to bē-tàng对chit项tāi-chì心存幻想。

十月二一，外交部发言人欧江安说明讲，吴钊燮部长应斯洛伐克（Slovak）「全球安全智库」邀请，ētī十月二六出席该智库头一遍举办ê台湾论坛发表专题演讲，主题是「疫情之后：韧性kah全球经济合作」。而后ē转往捷克访问，接受捷克参议长韦德持颁发参议院「国际贵宾奖项」银质奖章。访问期间吴部长mā有意向beh拜访布拉格市长贺吉普，另外参加由捷克国家科学院kah捷克智库「解析中国」合办ê研讨会。

十月二四暗时，外交部长吴钊燮坐飞机前往欧洲，吴部长出发前tīTwitter发文表示，ùi in两国天鹅绒革命到咱国野百合学运，台湾、捷克kah斯洛伐克紧密相连，仝款渴望自由、人权kah法治。「我真荣幸ētàng访问chit两国，而且kah in合作hō͘世界koh khah好。团结hō͘咱成作不可阻挡ê良善力量！」

十月二六早起，tī中国外交部例行记者会中，中国外交部发言人赵立坚表示，吴钊燮是典型ê「台独分裂分子」，四处「窜访」ê真实目的是「鼓吹台独分裂主张，制造一中一台假象」，离间破坏「中国kah建交国ê关系」，中国对「有关国家théng-sēng台独分裂分子」表示「坚决反对」，要求有关国家「恪守一个中国原则」，bē使提供活动平台hō͘台独分裂分子。赵立坚讲，正告台湾当局企图「挟洋自重」舞「台独」注定是死路一条。中国捍卫国家主权kah领土完整ê决心坚定不移，ē采取一切必要措施坚决粉碎任何「台独」图谋。

　　　外交部长吴钊燮tng teh斯洛伐克、捷克访问，虽然有请假，但是tī立法院外交kah国防委员会无作访问专案报告。委员会召委、中国国民党立委陈以信非常不满，tī面册发文批评吴部长出席率低，根本藐视国会，吴部长一工无来外委会，伊tio̍h杯葛外交部预算审查。

比部队班长ê「一个命令一个动作」koh khah利害，中国共产党「哼」一声，台湾ê中国国民党tio̍h拼势beh修理外交部长吴钊燮。拜托咧，国共两党kám一定tio̍h配合kah chiahni̍h bā？ (211029)