《绿色短评》

 | | | 转寄

听chit阵小人án怎讲！

作者 李南衡, ChoânTâijī/全台字 by Chng Hūiphêng 2021.02.07

Choânbîn Tâioânjī pán/全民台湾字版简称ChoânTâiJī

　　2021 nî itgoe̍h jīcha̍p chákhí ( Tâioân sîkan jīit thàuchá ) tī Bíkok siúto͘ Washington te̍k khu Bíkok kokhōe tāihā piⁿ・á kíhêng tē 46 jīm Bíkok chóngthóng Biden ê chiūchit tiánlé. Lán kok chù Bíkok tāipiáu Siau Bíkhîm siū iauchhiáⁿ chhamka. Che sī 1979 nî TâiBí toānkau ílâi lán kok gōakaukoaⁿ thâuchi̍t piàn tittio̍h Bíkok chóngthóng chiūchit tiánlé tiûpī úigoânhōe ê chèngsek iauchhiáⁿ. Tiongkok Kokbîntóng li̍púi Tân Gio̍ktin kóng, chhamka Bíkok chóngthóng chiūchit kiⁿî m̄sī tēit piàn. Tân Gio̍ktin li̍púi késian m̄chaiiáⁿ, kòekhì Tâioân bôlūn sī tāisài á・sī ùi Tāipak khì ê "chiok’hō thoân" chhutsek Bíkok chóngthóng chiūchit tiánlé, lóng sī thàukòe Bíkok kokhōe gīoân thêkiong, chōūi sī itpoaⁿ bînchiòng ê koanchiòngse̍k. Tân Gio̍ktin li̍púi koh kóng, 2016 nî, Bíkok chêng chóngthóng Trump ū kah Chhòa Engbûn chóngthóng thong tiānōe, chhamka chiūchit chíputkò sī kah íchêng ê gōakau sêngchiū kāngkhoán, chit piàn Chhòa Engbûn chóngthóng bô kah Biden chóngthóng thong tiānōe sǹg sī bô ki̍pkeh.

　　 Tâioân sîkan itgoe̍h jīcha̍p ēpo͘, Tiongkok Kokbîntóng li̍púi Bé Bûnkun tī i ê bīnchheh téngbīn sng lán chènghú kóng, cháchêng siuⁿkòe thīn Bíkok chóngthóng Trump, chit piàn Tâioân beh chhamka Bíkok chóngthóng chiūchit tiánlé " Mén dū méiyǒu ", ìsù sī kóng bián siàusiūⁿ, sī bôkhólêng ê tāichì. Tâioân sîkan jīit thàuchá, chù Bí tāipiáu Siau Bíkhîm tī i ê bīnchheh téngbīn PO chi̍t tiuⁿ i khiā tī Bíkok chóngthóng chiū chit tiánlé hōetiûⁿ chêng ê siòngphìⁿ. Chi̍tsî chi kan, Bé Bûnkun li̍púi ê bīnchheh hông koàn piak khì, ū lâng kóng " Mén dū méiyǒu ", lâng Siau Bíkhîm mā ētàng ji̍pkhì. Tiongkok Kokbîntóng li̍púi Tân Ísìn kóng, gōakau pō͘ engkai kiámthó sī ánchóaⁿ kàu chòeāu chi̍t khek chiah hō͘ lán kokbîn chaiiáⁿ, tìsú hō͘ kokbîn ū chin chē gō͘hōe.

Tiongkok Kokbîntóng li̍púi Lōa Sūpó piáusī, Siau Bíkhîm tittio̍h iauchhiáⁿ chhamka "tongjiân sī hó tāichì", ta̍kê lóng chin hoaⁿhí, ta̍ttit choân kok jînbîn khéngtēng. M̄koh ánchóaⁿ tittio̍h chit hūn iauchhiáⁿhâm? Sī thàukòe sujîn koanhē ? Á・sī Bíkok beh ài Tâioân chò siáⁿmi̍h? Tûliáu chia̍h lâiti (莱ti) , bé búkhì kah kunsū iōngphín ígōa, kám iáu ū siáⁿmi̍h tngteh chìnhêng tiong ê? Iáu koh kiò lán bé siáⁿmi̍h? Siau Bíkhîm tāipiáu ittēng tio̍h hiòng choânkok jînbîn hóhóá soatbêng.

Chiamtùi Bé Bûnkun bīnchheh hoat bûn, Tiongkok Kokbîntóng soah hông chitgî teh "chhiùⁿ soe" TâiBí koanhē, Tiongkok Kokbîntóng chúse̍k Kang Khésîn thè i kóng hóōe, kiôngtiāu Tiongkok Kokbîntóng tn̂gkî ílâi ê chèngchhek tio̍h sī " Qīn měihé lù ", che chèngchhek bô káipiàn, m̄koh kokhōe gīoân ê kàmtok kaksek á・sī tùi chènghú ê chhuisak si ap, sī kok’hōe gīoân khòaⁿ tāichì ū bô kâng ê kaktō͘; chéngthé lâi kóng, iûgoân sī hibāng khòaⁿtio̍h TâiBí koanhē chinchiàⁿ si̍tchit chhimhòa, ū si̍tchit hō͘hūi chok’ûi.

　　 Ū " Wǎng hóng " bô hoattō͘ khéngtēng Siau Bíkhîm tāipiáu, o͘pe̍h sng Siau Bíkhîm sī tī chháupo͘’á téngthâu phah khah. Li̍púi Ông Tēngú jīit àm choankang tī bīnchheh téngbīn PO chhamka Biden chiūchittián ê kúi kok tāisài phah khah siòngphìⁿ, paukoat Lâmhân tāisài, Sūitián tāisài, Òchiu tāisài téng, lóng kah Siau Bíkhîm tī kâng chi̍tê tētiám phah khah.

Lí thiaⁿ chittīn lâng ánchóaⁿ ēng siáujîn ê sim teh siūⁿ tāichì, kóng tāichì. (210122)

Pe̍h-ōe-jī-pán/白话字版


　　2021 nî it-goe̍h jī-cha̍p chá-khí ( Tâi-oân sî-kan jī-it thàu-chá ) tī Bí-kok siú-to͘ Washington te̍k khu Bí-kok kok-hōe tāi-hā piⁿ-á kí-hêng tē 46 jīm Bí-kok chóng-thóng Biden ê chiū-chit tián-lé. Lán kok chù Bí-kok tāi-piáu Siau Bí-khîm siū iau-chhiáⁿ chham-ka. Che sī 1979 nî Tâi-Bí toān-kau í-lâi lán kok gōa-kau-koaⁿ thâu-chi̍t piàn tit-tio̍h Bí-kok chóng-thóng chiū-chit tián-lé tiû-pī úi-goân-hōe ê chèng-sek iau-chhiáⁿ. Tiong-kok Kok-bîn-tóng li̍p-úi Tân Gio̍k-tin kóng, chham-ka Bí-kok chóng-thóng chiū-chit kin-nî m̄-sī tē-it piàn. Tân Gio̍k-tin li̍p-úi ké-sian m̄-chai-iáⁿ, kòe-khì Tâi-oân bô-lūn sī tāi-sài á-・sī ùi Tāi-pak khì ê "chiok-hō thoân"chhut-sek Bí-kok chóng-thóng chiū-chit tián-lé, lóng sī thàu-kòe Bí-kok kok-hōe gī-oân thê-kiong, chō-ūi sī it-poaⁿ bîn-chiòng ê koan-chiòng-se̍k. Tân Gio̍k-tin li̍p-úi koh kóng, 2016 nî, Bí-kok chêng chóng-thóng Trump ū kah Chhòa Eng-bûn chóng-thóng thong tiān-ōe, chham-ka chiū-chit chí-put-kò sī kah í-chêng ê gōa-kau sêng-chiū kāng-khoán, chit piàn Chhòa Eng-bûn chóng-thóng bô kah Biden chóng-thóng thong tiān-ōe sǹg sī bô ki̍p-keh.

　　 Tâi-oân sî-kan it-goe̍h jī-cha̍p ē-po͘, Tiong-kok Kok-bîn-tóng li̍p-úi Bé Bûn-kun tī i ê bīn-chheh téng-bīn sng lán chèng-hú kóng, chá-chêng siuⁿ-kòe thīn Bí-kok chóng-thóng Trump, chit piàn Tâi-oân beh chham-ka Bí-kok chóng-thóng chiū-chit tián-lé " Mén dū méiyǒu ", ì-sù sī kóng bián siàu-siūⁿ, sī bô-khó-lêng ê tāi-chì. Tâi-oân sî-kan jī-it thàu-chá, chù Bí tāi-piáu Siau Bí-khîm tī i ê bīn-chheh téng-bīn PO chi̍t tiuⁿ i khiā tī Bí-kok chóng-thóng chiū- chit tián-lé hōe-tiûⁿ chêng ê siòng-phìⁿ. Chi̍t-sî chi kan, Bé Bûn-kun li̍p-úi ê bīn-chheh hông koàn piak khì, ū lâng kóng" Mén dū méiyǒu ", lâng Siau Bí-khîm mā ē-tàng ji̍p-khì. Tiong-kok Kok-bîn-tóng li̍p-úi Tân Í-sìn kóng, gōa-kau -pō͘ eng-kai kiám-thó sī án-chóaⁿ kàu chòe-āu chi̍t khek chiah hō͘ lán kok-bîn chai-iáⁿ, tì-sú hō͘ kok-bîn ū chin chē gō͘-hōe.

Tiong-kok Kok-bîn-tóng li̍p-úi Lōa Sū-pó piáu-sī, Siau Bí-khîm tit-tio̍h iau-chhiáⁿ chham-ka "tong-jiân sī hó tāi-chì", ta̍k-ê lóng chin hoaⁿ-hí, ta̍t-tit choân kok jîn-bîn khéng-tēng. M̄-koh án-chóaⁿ tit-tio̍h chit hūn iau-chhiáⁿ-hâm? Sī thàu-kòe su-jîn koan-hē ? Á-・sī Bí-kok beh ài Tâi-oân chò siáⁿ-mi̍h? Tû-liáu chia̍h lâi-ti (莱ti) , bé bú-khì kah kun-sū iōng-phín í-gōa, kám iáu ū siáⁿ-mi̍h tng-teh chìn-hêng tiong ê? Iáu koh kiò lán bé siáⁿ-mi̍h? Siau Bí-khîm tāi-piáu it-tēng tio̍h hiòng choân-kok jîn-bîn hó-hó-á soat-bêng.

Chiam-tùi Bé Bûn-kun bīn-chheh hoat bûn, Tiong-kok Kok-bîn-tóng soah hông chit-gî teh "chhiùⁿ soe" Tâi-Bí koan-hē, Tiong-kok Kok-bîn-tóng chú-se̍k Kang Khé-sîn thè i kóng hó-ōe, kiông-tiāu Tiong-kok Kok-bîn-tóng tn̂g-kî í-lâi ê chèng-chhek tio̍h sī " Qīn měihé lù ", che chèng-chhek bô kái-piàn, m̄-koh kok-hōe gī-oân ê kàm-tok kak-sek á-・sī tùi chèng-hú ê chhui-sak si ap, sī kok-hōe gī-oân khòaⁿ tāi-chì ū bô kâng ê kak-tō͘; chéng-thé lâi kóng, iû-goân sī hi-bāng khòaⁿ-tio̍h Tâi-Bí koan-hē chin-chiàⁿ si̍t-chit chhim-hòa, ū si̍t-chit hō͘-hūi chok-ûi.

　　 Ū " Wǎng hóng " bô hoat-tō͘ khéng-tēng Siau Bí-khîm tāi-piáu, o͘-pe̍h sng Siau Bí-khîm sī tī chháu-po͘-á téng-thâu phah khah. Li̍p-úi Ông Tēng-ú jī-it àm choan-kang tī bīn-chheh téng-bīn PO chham-ka Biden chiū-chit-tián ê kúi kok tāi-sài phah khah siòng-phìⁿ, pau-koat Lâm-hân tāi-sài, Sūi-tián tāi-sài, Ò-chiu tāi-sài téng, lóng kah Siau Bí-khîm tī kâng chi̍t-ê tē-tiám phah khah.

Lí thiaⁿ chit-tīn lâng án-chóaⁿ ēng siáu-jîn ê sim teh siūⁿ tāi-chì, kóng tāi-chì. (210122)


　　2021年一月二十早起（台湾时间二一透早）tī美国首都Washing ton特区美国国会大厦边á举行第46任美国总统Biden ê就职典礼。咱国驻美国代表萧美琴受邀请参加。这是1979年台美断交以来咱国外交官头一遍得tio̍h美国总统就职典礼筹备委员会ê正式邀请。中国国民党立委陈玉珍讲，参加美国总统就职今年m̄是第一遍。陈玉珍立委假仙m̄知影，过去台湾无论是大使抑是ùi台北去ê「祝贺团」出席美国总统就职典礼，lóng是透过美国国会议员提供、座位是一般民众ê观众席。陈玉珍立委koh讲，2016年，美国前总统Trump有kah蔡英文总统通电话，参加就职只不过是kah以前ê外交成就仝款，chit遍蔡英文总统无kah Biden总统通电话算是无及格。

　　台湾时间一月二十下晡，中国国民党立委马文君tī伊ê面册顶面酸咱政府讲，早前siuⁿ过thīn美国总统Trump，chit遍台湾beh参加美国总统就职典礼「门都没有」，意思是讲免siàu想，是无可能ê tāichì。台湾时间二一透早，驻美代表萧美琴tī她ê面册顶面PO一张她khiā tī美国总统就职典礼会场前ê相片。一时之间，马文君立委ê面册hông灌piak去，有人讲「门都没有」，人萧美琴mā ētàng入去。中国国民党立委陈以信讲，外交部应该检讨是án怎到最后一刻chiah hō͘咱国民知影，致使hō͘国民有真chē误会。

中国国民党立委赖士葆表示，萧美琴得tio̍h邀请参加「当然是好tāichì」， ta̍k个lóng真欢喜，值得全国人民肯定。M̄-koh án怎得tio̍h chit份邀请函？是透过私人关系？抑是美国beh ài台湾做啥物？除了食莱猪、买武器kah军事用品以外，kám iáu有啥物当teh进行中ê？Iáu koh叫咱买啥物？萧美琴代表一定tio̍h向全国人民好好á说明。

针对马文君面册发文，中国国民党soah hông质疑teh「唱衰」台美关系，中国国民党主席江启臣替伊讲好话，强调中国国民党长期以来ê政策tio̍h是「亲美和陆」，这政策无改变，m̄-koh国会议员ê监督角色á是对政府ê推sak施压，是国会议员看tāichì有无仝ê角度；整体来讲，犹原是希望看tio̍h台美关系真正实质深化，有实质互惠作为。

　　有「网红」无法度肯定萧美琴代表，乌白酸萧美琴是tī草埔á顶头phah卡。立委王定宇二一暗专工tī面册顶面PO参加Biden就职典ê几国大使phah卡相片，包括南韩大使、瑞典大使、澳洲大使等，lóng kah萧美琴tī仝一个地点phah卡。

你听chit阵人án怎用小人ê心teh想tāichì、讲tāichì。 (210122)