《绿色短评》

 | | | 转寄

中国国民党chit-ê溜尾á政党！

作者 李南衡, ChoânTâijī/全台字 by Chng Hūiphêng 2021.10.24

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　　　　　　　　　 Lí Lâmhêng
　　　　　Tiongkok Kokbîntóng chitê liubóeá chèngtóng!
　　 Ū chi̍t kóa pòaⁿchheⁿse̍k bînchú kokka ê gīhōe, saⁿputgō͘sî tio̍h ē ū thêngtō͘ bô kâng, chhutthâu sinkî ê pōle̍k sūkiāⁿ hoatseng. Lán tī Tâioân íkeng khòaⁿ kah koànsì koànsì ah. Chhiūⁿkóng 2016 nî chhitgoe̍h chheit, Tiongkok Kokbîntóng putboán Hêngchèngīⁿ" chi̍t lē chi̍t hiu" hongàn, káu tiám gōa ū saⁿcha̍p miâ Tiongkok Kokbîntóng li̍púi pàchiàm chúse̍k tâi. Bînchìntóng li̍púi chū pī tōasiaⁿ kong, tī tâiá kha kah Tiongkok Kokbîntóng li̍púi tùi mē. Īⁿhōe chi̍t chákhí khang choán; chhiūⁿkóng 2017 nî chhitgoe̍h cha̍psaⁿ, ū li̍phoat úigoân hiòng Hêngchèngīⁿ tn̂g Lîm Choân khian chúikiû, Lîm Choân bô hoattō͘ hoatpiáu ūsoàn pòkò. Hōegī pīpek chiāmthêng; chhiūⁿkóng 2017 nî chhitgoe̍h cha̍psì, li̍phoatīⁿ inūi lāi chèng "chêngchiam kèe̍k" hoatàn ê símhe̍k kah thongkòe, koh po̍khoat keklia̍t chhiongtu̍t. M̄nā tī kokka chòeko gīhōe tiāntn̂g phiaⁿ íá, khian chúikiû, sīmchì ū li̍púi hông phah tio̍h siong; inūi chènghú ē ùi 2021 nî chiaⁿgoe̍h chheit khí, ínchún chìnkháu Hâm ū Ractopamine (莱克多巴胺) ê Bíkok tibah kah 30 kògoe̍h ísiōng ê Bíkok gûbah. Cha̍pitgoe̍h jīchhit, Tiongkok Kokbîntóng li̍púi ūitio̍h beh chó͘chí Hêngchèngīⁿtiúⁿ So͘ Chinchhiong tī li̍phoatīⁿ chìnhêng sichèng pòkò. Ū Kokbîntóng li̍phoat úigoân hiòng So͘ Chinchhiong ê pīsûntâi khian ti paklāi, jîchhiáⁿ tī hōetiûⁿ chèchō chhòim,nâ le̍k li̍púi piakhoat giâmtiōng kithé chhiongtu̍t, So͘ Chinchhiong chòeāu tī hūnloān tiong kiatsok sichèng pòkò.

　　 Ūitio̍h "3+11" hōe sitlé sūkiāⁿ loān saⁿ kang liáuāu, thiaⁿkóng Tiongkok Kokbîntóng li̍púi chúnpī beh tī cha̍pgoe̍h chheit thêchhut 195 àn chenglia̍t pòkò sūhāng, lāṳông ū khansia̍p tio̍h "3+11", gīsū put kong, Tâitiān thiàu tiān kah khiàm tiān gītê, kokhông ūsoàn, ônglâi sekkhia kìmchí chhutkháu kàu Tiongkok, koān chhī ha̍ppèng kiámthó, līhōaⁿ hongtiān koksánhòa thiàuphiò, putchāi chek tâuphiò, kaji̍p CPTPP. Ná chhiūⁿ chinchiàⁿ beh khaisí chìnhêng chitsûn.

Cha̍pgoe̍h chheit thàuchá chhit tiám, li̍phoatīⁿ gītiûⁿ tōamn̂g chi̍tē khui, Tiongkok Kokbîntóng li̍púi tio̍h sūnlī chìnji̍p li̍phoatīⁿ gītiûⁿ, chi̍t tīn lâng khì chē koaⁿoânsek, kúiê lâng chiàm tio̍h koaⁿoân pīsûntâi, piàⁿsì hipsiōng choh kìliām, hoaⁿhí kah chhiò haihai! Chē tī koaⁿoânsek ê Tiongkok Kokbîntóng li̍púi hoaⁿhí kah itti̍t phah tohbīn. Kúiūi Tiongkok Kokbîntóng li̍púi khì kā koaⁿoân pīsûntâi ián tò, ìsù ná chhiūⁿ sī kóng, goán íkeng bôkhólêng ū kihōe khiā tī koaⁿoân pīsûntâi, mā bô ài hō͘ lín khiā tī chia chhàuchhèng. Ùi chia lán ē tàng khòaⁿchhut Tiongkok Kokbîntóng chitê liubóeá chèngtóng li̍púi ê pichêng. Siáⁿmi̍h pichêng?

　　 Káugoe̍h jīgō͘, Tiongkok Kokbîntóng soán tóngchúse̍k, tâuphiò lu̍t iok 49%, chéngthé tâuphiò sò͘ iok 18 bān 8,000 phiò, tòngsoán ê Chu Li̍plûn the̍h tio̍h 8 bān 5,000 phiò, titphiòlu̍t iok 45.78%, sǹg khílâi kantaⁿ 22.43% ê tóngoân soán i niāniā, sī Tiongkok Kokbîntóng chúse̍k ti̍t soán ílâi thâu chi̍tê titphiò bô kòe pòaⁿ ê. Chiahni̍h bôtit tóngoân chichhî, chit khoán ê tóngchúse̍k beh ná ū khólêng tī 2024 nî chóngthóng tōasoán soán iâⁿ, tittio̍h chèngkoân leh? Tiongkok Kokbîntóng chiahê li̍phoat úigoân bêng chai chitê sèbīn bô kiù, simkoaⁿ té ê khó͘chhó͘ koh bô tē tháu, thàn chitê kihōe ián tò koaⁿoân pīsûntâi lâi chhut khùi, chē tī koaⁿoânsek bóng kòe giàn.

Chit chióng hêngûi oânchoân sī chi̍tê liubóeá kiáⁿ chèngtóng li̍púi ê piáuhiān, piai ah! (211008)

Pe̍h-ōe-jī-pán/白话字版

《 Le̍k-sek toán-phêng 》　　　　　　　　　　　 Lí Lâm-hêng
　　　　　Tiong-kok Kok-bîn-tóng chit-ê liu-bóe-á chèng-tóng!
　　 Ū chi̍t kóa pòaⁿ-chheⁿ-se̍k bîn-chú kok-ka ê gī-hōe, saⁿ-put-gō͘-sî tio̍h ē ū thêng-tō͘ bô kâng, chhut-thâu sin-kî ê pō-le̍k sū-kiāⁿ hoat-seng. Lán tī Tâi-oân í-keng khòaⁿ kah koàn-sì koàn-sì ah. Chhiūⁿ-kóng 2016 nî chhit-goe̍h chhe-it, Tiong-kok Kok-bîn-tóng put-boán Hêng-chèng-īⁿ" chi̍t lē chi̍t hiu" hong-àn, káu tiám gōa ū saⁿ-cha̍p miâ Tiong-kok Kok-bîn-tóng li̍p-úi pà-chiàm chú-se̍k tâi. Bîn-chìn-tóng li̍p-úi chū pī tōa-siaⁿ kong, tī tâi-á kha kah Tiong-kok Kok-bîn-tóng li̍p-úi tùi mē. Īⁿ-hōe chi̍t chá-khí khang choán; chhiūⁿ-kóng 2017 nî chhit-goe̍h cha̍p-saⁿ, ū li̍p-hoat úi-goân hiòng Hêng-chèng-īⁿ tn̂g Lîm Choân khian chúi-kiû, Lîm Choân bô hoat-tō͘ hoat-piáu ū-soàn pò-kò. Hōe-gī pī-pek chiām-thêng; chhiūⁿ-kóng 2017 nî chhit-goe̍h cha̍p-sì, li̍p-hoat-īⁿ in-ūi lāi chèng "chêng-chiam kè-e̍k" hoat-àn ê sím-he̍k kah thong-kòe, koh po̍k-hoat kek-lia̍t chhiong-tu̍t. M̄-nā tī kok-ka chòe-ko gī-hōe tiān-tn̂g phiaⁿ í-á, khian chúi-kiû, sīm-chì ū li̍p-úi hông phah tio̍h siong; in-ūi chèng-hú ē ùi 2021 nî chiaⁿ-goe̍h chhe-it khí, ín-chún chìn-kháu Hâm ū Ractopamine (莱克多巴胺) ê Bí-kok ti-bah kah 30 kò-goe̍h í-siōng ê Bí-kok gû-bah. Cha̍p-it-goe̍h jī-chhit, Tiong-kok Kok-bîn-tóng li̍p-úi ūi-tio̍h beh chó͘-chí Hêng-chèng-īⁿ-tiúⁿ So͘ Chin-chhiong tī li̍p-hoat-īⁿ chìn-hêng si-chèng pò-kò. Ū Kok-bîn-tóng li̍p-hoat úi-goân hiòng So͘ Chin-chhiong ê pī-sûn-tâi khian ti pak-lāi, jî-chhiáⁿ tī hōe-tiûⁿ chè-chō chhò-im,nâ le̍k li̍p-úi piak-hoat giâm-tiōng ki-thé chhiong-tu̍t, So͘ Chin-chhiong chòe-āu tī hūn-loān tiong kiat-sok si-chèng pò-kò.

　　 Ūi-tio̍h "3+11" hōe sit-lé sū-kiāⁿ loān saⁿ kang liáu-āu, thiaⁿ-kóng Tiong-kok Kok-bîn-tóng li̍p-úi chún-pī beh tī cha̍p-goe̍h chhe-it thê-chhut 195 àn cheng-lia̍t pò-kò sū-hāng, lāi-iông ū khan-sia̍p tio̍h "3+11", gī-sū put kong, Tâi-tiān thiàu tiān kah khiàm tiān gī-tê, kok-hông ū-soàn, ông-lâi sek-khia kìm-chí chhut-kháu kàu Tiong-kok, koān chhī ha̍p-pèng kiám-thó, lī-hōaⁿ hong-tiān kok-sán-hòa thiàu-phiò, put-chāi chek tâu-phiò, ka-ji̍p CPTPP. Ná chhiūⁿ chin-chiàⁿ beh khai-sí chìn-hêng chit-sûn.

Cha̍p-goe̍h chhe-it thàu-chá chhit tiám, li̍p-hoat-īⁿ gī-tiûⁿ tōa-mn̂g chi̍t-ē khui, Tiong-kok Kok-bîn-tóng li̍p-úi tio̍h sūn-lī chìn-ji̍p li̍p-hoat-īⁿ gī-tiûⁿ, chi̍t tīn lâng khì chē koaⁿ-oân-sek, kúi-ê lâng chiàm tio̍h koaⁿ-oân pī-sûn-tâi, piàⁿ-sì hip-siōng choh kì-liām, hoaⁿ-hí kah chhiò hai-hai! Chē tī koaⁿ-oân-sek ê Tiong-kok Kok-bîn-tóng li̍p-úi hoaⁿ-hí kah it-ti̍t phah toh-bīn. Kúi-ūi Tiong-kok Kok-bîn-tóng li̍p-úi khì kā koaⁿ-oân pī-sûn-tâi ián tò, ì-sù ná chhiūⁿ sī kóng, goán í-keng bô-khó-lêng ū ki-hōe khiā tī koaⁿ-oân pī-sûn-tâi, mā bô ài hō͘ lín khiā tī chia chhàu-chhèng. Ùi chia lán ē tàng khòaⁿ-chhut Tiong-kok Kok-bîn-tóng chit-ê liu-bóe-á chèng-tóng li̍p-úi ê pi-chêng. Siáⁿ-mi̍h pi-chêng?

　　 Káu-goe̍h jī-gō͘, Tiong-kok Kok-bîn-tóng soán tóng-chú-se̍k, tâu-phiò lu̍t iok 49%, chéng-thé tâu-phiò sò͘ iok 18 bān 8,000 phiò, tòng-soán ê Chu Li̍p-lûn the̍h tio̍h 8 bān 5,000 phiò, tit-phiò-lu̍t iok 45.78%, sǹg khí-lâi kan-taⁿ 22.43% ê tóng-oân soán i niā-niā, sī Tiong-kok Kok-bîn-tóng chú-se̍k ti̍t soán í-lâi thâu chi̍t-ê tit-phiò bô kòe pòaⁿ ê. Chiah-ni̍h bô-tit tóng-oân chi-chhî, chit khoán ê tóng-chú-se̍k beh ná ū khó-lêng tī 2024 nî chóng-thóng tōa-soán soán iâⁿ, tit-tio̍h chèng-koân leh? Tiong-kok Kok-bîn-tóng chiah-ê li̍p-hoat úi-goân bêng chai chit-ê sè-bīn bô kiù, sim-koaⁿ té ê khó͘-chhó͘ koh bô tē tháu, thàn chit-ê ki-hōe ián tò koaⁿ-oân pī-sûn-tâi lâi chhut khùi, chē tī koaⁿ-oân-sek bóng kòe giàn.

Chit chióng hêng-ûi oân-choân sī chi̍t-ê liu-bóe-á kiáⁿ chèng-tóng li̍p-úi ê piáu-hiān, pi-ai ah! (211008)


　　有一kóa半生熟民主国家ê议会，三不五时tio̍h会有程度无仝、出头新奇ê暴力事件发生。咱tī台湾已经看kah惯势惯势ah。像讲2016年七月初一，中国国民党不满行政院「一例一休」方案，九点外有三十名中国国民党立委霸占主席台。民进党立委自备大声公，tī台á脚kah中国国民党立委对骂。院会一早起空转；像讲2017年七月十三，有立法委员向行政院长林全khian水球，林全无法度发表预算报告。会议被迫暂停；像讲2017年七月十四，立法院因为内政「前瞻计划」法案ê审核kah通过，koh爆发激烈冲突。M̄-nātī国家最高议会殿堂phiaⁿ椅á、khian水球，甚至有立委hông拍tio̍h伤；因为政府会ùi 2021年正月初一起，允准进口含有莱克多巴胺ê美国猪肉kah 30个月以上ê美国牛肉。十一月二七，中国国民党立委为tio̍h beh阻止行政院长苏贞昌tī立法院进行施政报告。有国民党立法委员向苏贞昌ê备询台khian猪腹内，而且tī会场制造噪音，蓝绿立委爆发严重肢体冲突，苏贞昌最后tī混乱中结束施政报告。

　　为tio̍h「3+11」会失礼事件乱三工了后，听讲中国国民党立委准备beh tī十月初一提出195案增列报告事项，内容有牵涉tio̍h「3+11」、议事不公、台电跳电kah欠电议题、国防预算、王梨释迦禁止出口到中国、县市合并检讨、离岸风电国产化跳票、不在籍投票、加入CPTPP。ná像真正beh开始进行质询。

十月初一透早七点，立法院议场大门一下开，中国国民党立委tio̍h顺利进入立法院议场，一阵人去坐官员席，几个人占tio̍h官员备询台，拼势hip相作纪念，欢喜kah笑hai-hai！坐tī官员席ê中国国民党立委欢喜kah一直拍桌面。几位中国国民党立委去kā官员备询台ián倒，意思ná像是讲，阮已经无可能有机会khiātī官员备询台，mā无爱hō͘恁khiātīchia臭chhèng。Ùi chia咱会tàng看出中国国民党chit-ê溜尾á政党立委ê悲情。啥物悲情？

　　九月二五，中国国民党选党主席，投票率约49％，整体投票数约18万8,000票、当选ê朱立伦the̍h tio̍h 8万5,000票、得票率约45.78%，算起来kan-taⁿ22.43%ê党员选伊niā-niā，是中国国民党主席直选以来头一个得票无过半ê。Chiah-ni̍h无得党员支持，chit款ê党主席beh ná有可能tī 2024年总统大选选赢、得tio̍h政权咧？中国国民党chiah-ê立法委员明知chit-ê势面无救，心肝底ê苦楚koh无地敨（tháu），趁chit-ê 机会ián倒官员备询台来出气（khùi），坐tī官员席bóng过瘾（kòe-giàn）。

Chit种行为完全是一个溜尾á囝政党立委ê表现，悲哀ah！ (211008)