《绿色短评》

 | | | 转寄

到底siáⁿ人几十年不长进，永远「逢中必反」？

作者 李南衡, ChoânTâijī/全台字 by Chng Hūiphêng 2021.10.17

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　　　　　　　　　　 Lí Lâmhêng

　　　Tàuté siáⁿ lâng kúi cha̍p nî put tióngchìn, éngoán "hông Tiong pit hoán"?

　　 Káugoe̍h jīpeh ēpo͘, Tiongkok Kokbîntóng sinkho chúse̍k Chu Li̍plûn khì kàu Kelâng siāphiò , i phoephêng Bînchìntóng "jīcha̍p nî lâi lâu tī goântiám put tióngchìn", éngoán "hông Tiong pit hoán". Chu Li̍plûn náē thâukhak chiah bô chhengchhó, hô͘giân loāngí ! Kóng Bînchìntóng kah só͘ū ê Tâioân lâng "hông Tiong pit hoán", ìsù sī kóng kìⁿ nā kóngtio̍h "Tiongkok", tio̍h ittēng hoántùi. Chu Li̍plûn pháiⁿ simkoaⁿ, thiautî kā "Tiongkok kiōngsántóng"( Τiongkiōng) kóng choh "Tiongkok" kánchheng choh "Tiong". Lán ná・sī "hoán Tiongkok"? Lán hoán・ê sī "Tiongkok kiōngsántóng"( Τiongkiōng).

Lán lâi khòaⁿ Bînchìntóng chipchèng chòekīn chit kúi nî, Tâioân kah Tiongkok ê bō͘e̍k ónglâi, 2017 nî sianghong ê bō͘e̍k liōng sī 1,814.7 ek bíkim, 2018 nî sī 1,931 ek bíkim, 2019 nî sī 1,905.7 ek bíkim, 2020 nî sī 2,162.3 ek bíkim, jîchhiáⁿ chhaputto ta̍k nî lóng ū siókhóa chēngka. Siáⁿ lâng hoán Tiong?

Kàu 2019 nî la̍kgoe̍h té ûichí, lán kok ê gōachek phòengó͘ jînsò͘ ta̍tkàu 54.9 bān lâng, nā àn kokchekpiat lâi khòaⁿ, í Tiongkok phòengó͘ 34.5 bān lâng siōng kài chē, iok chiàm 62.8％. Beh ánchóaⁿ hoán Tiong?

　　 Tâioân Tiongkok sianghong lâióng líiû ê jînsò͘, lán í 2019 nî choh lē, Tiongkok lâi Tâioân líiû ê jînsò͘ ū 2,714,065 lângpái, sī hit nî lâi Tâioân líiû gōakok lâng ê tēit miâ, Tâioân lâng khì Tiongkok líiû ū 2,003,023 lângpái. 2019 nî chhitgoe̍h saⁿcha̍p it, Tiongkok koattēng chū 2019 nî pehgoe̍h chheit khí chiāmthêng sìcha̍pchhit ê khaihòng lâi Tâioân chūiû kiâⁿ ê siâⁿchhī, choânbīn chiāmthêng hu̍thoat thonghêng chèng. 2020 nîchhe inūi Tiongkok Búhàn hìiām tōa liûhêng, sianghong lóng kìmchí jînbîn khì tùihong líiû. M̄ sī hoán Tiong.

　　2018 nî Tiongkok lâi Tâioân ê giánsiuseng ka ha̍kūiseng ū 25,049 miâ, inūi Búhàn hìiām e̍kchêng énghióng, Tâioân Tiongiong Liûhêng E̍kchêng Chíhui Tiongsim soanpò͘ ùi 2020 nî itgoe̍h jīla̍k khí chiāmoān Tiongseng giánsiuseng ji̍pkéng lâi Tâioân. Kám sī ū lâng hoán Tiong? M̄ sī.

　　 Chiàu ánne khòaⁿ, Bînchìntóng kah só͘ū ê Tâioân lâng ná ū "hoán Tiongkok" leh? In só͘ hoán・ê sī "Tiongkok kiōngsántóng" kántan kóng sī "Τiongkiōng". Tio̍h sī in tóng ê Chóngsukì Xíjìnpíng tī Chu Li̍plûn tòngsoán Tiongkok Kokbîntóng chúse̍k siá hōtiān lâi hitê "Tiongkok kiōngsántóng". Lán ūisiáⁿmi̍h "hoán Τiongkiōng"? inūi "í tóng niá kun","í tóng niá chèng" hitê "Tiongkok kiōngsántóng" soanpò͘ bô beh hòngkhì" ēng búle̍k phah Tâioân", chng nn̄gchheng gōa lia̍p huitôaⁿ hiòng Tâioân, kok chióng chiànki ta̍k kang chhimji̍p lán Sailâm Khonge̍k Hôngkhong Sekpia̍t khu lâi loān, í káugoe̍h jīsaⁿ choh lē, Tiongkok káihòngkun ū 24 kè chhù kunki ùi Tâihái tiongsòaⁿ í lâm khonge̍k, chìnji̍p lán Sailâm Khonge̍k Hôngkhong Sekpia̍t khu. Chu Li̍plûn kakī tèⁿ khong ké gōng to chhám síliáu ah! Iáu ū bīn mē Bînchìntóng 20 nî put tióngchìn, éngoán "hông Tiong pit hoán"? Lán khòaⁿ Chiúⁿ Κàichio̍h chóngthóng kah Chiúⁿ Kengkok chóngthóng, Láuchiúⁿ chìchió ùi 1945 nî pehgoe̍h cha̍pgō͘ khòngchiàn sènglī hit kang kàu 1975 nî sìgoe̍h chhegō͘ síkhì ûichí, 30 nî put tióngchìn, éngoán "hông Tiong pit hoán", sió Chiúⁿ kāngkhoán ùi khòngchiàn sènglī hit kang kàu 1988 nî itgoe̍h cha̍psaⁿ síkhì ûichí, chútiuⁿ kah Τiongkiōng "put chiapchhiok, put tâmphòaⁿ, put thòhia̍p" saⁿ put chèngchhek, 43 nî put tióngchìn, éngoán "hông Tiong pit hoán", hoán Τiongkiōng. Tiongkok Kokbîntóng sinkho chúse̍k Chu Li̍plûn, ánne mā in síkhì ê tóng chóngchhâi , tóng chúse̍k, kám hó? (211001)


Pe̍h-ōe-jī-pán/白话字版
《 Le̍k-sek toán-phêng 》　　　　　　　　　　　　 Lí Lâm-hêng

　　　Tàu-té siáⁿ lâng kúi cha̍p nî put tióng-chìn, éng-oán "hông Tiong pit hoán"?

　　 Káu-goe̍h jī-peh ē-po͘, Tiong-kok Kok-bîn-tóng sin-kho chú-se̍k Chu Li̍p-lûn khì kàu Ke-lâng siā-phiò , i phoe-phêng Bîn-chìn-tóng "jī-cha̍p nî lâi lâu tī goân-tiám put tióng-chìn", éng-oán "hông Tiong pit hoán". Chu Li̍p-lûn ná-ē thâu-khak chiah bô chheng-chhó, hô͘-giân loān-gí ! Kóng Bîn-chìn-tóng kah só͘-ū ê Tâi-oân lâng "hông Tiong pit hoán", ì-sù sī kóng kìⁿ nā kóng-tio̍h "Tiong-kok", tio̍h it-tēng hoán-tùi. Chu Li̍p-lûn pháiⁿ sim-koaⁿ, thiau-tî kā "Tiong-kok kiōng-sán-tóng"( Τiong-kiōng) kóng choh "Tiong-kok" kán-chheng choh "Tiong". Lán ná-・sī "hoán Tiong-kok"? Lán hoán-・ê sī "Tiong-kok kiōng-sán-tóng"( Τiong-kiōng).

Lán lâi khòaⁿ Bîn-chìn-tóng chip-chèng chòe-kīn chit kúi nî, Tâi-oân kah Tiong-kok ê bō͘-e̍k óng-lâi, 2017 nî siang-hong ê bō͘-e̍k liōng sī 1,814.7 ek bí-kim, 2018 nî sī 1,931 ek bí-kim, 2019 nî sī 1,905.7 ek bí-kim, 2020 nî sī 2,162.3 ek bí-kim, jî-chhiáⁿ chha-put-to ta̍k nî lóng ū sió-khóa chēng-ka. Siáⁿ lâng hoán Tiong?

Kàu 2019 nî la̍k-goe̍h té ûi-chí, lán kok ê gōa-chek phòe-ngó͘ jîn-sò͘ ta̍t-kàu 54.9 bān lâng, nā àn kok-chek-piat lâi khòaⁿ, í Tiong-kok phòe-ngó͘ 34.5 bān lâng siōng kài chē, iok chiàm 62.8％. Beh án-chóaⁿ hoán Tiong?

　　 Tâi-oân Tiong-kok siang-hong lâi-óng lí-iû ê jîn-sò͘, lán í 2019 nî choh lē, Tiong-kok lâi Tâi-oân lí-iû ê jîn-sò͘ ū 2,714,065 lâng-pái, sī hit nî lâi Tâi-oân lí-iû gōa-kok lâng ê tē-it miâ, Tâi-oân lâng khì Tiong-kok lí-iû ū 2,003,023 lâng-pái. 2019 nî chhit-goe̍h saⁿ-cha̍p it, Tiong-kok koat-tēng chū 2019 nî peh-goe̍h chhe-it khí chiām-thêng sì-cha̍p-chhit ê khai-hòng lâi Tâi-oân chū-iû kiâⁿ ê siâⁿ-chhī, choân-bīn chiām-thêng hu̍t-hoat thong-hêng chèng. 2020 nî-chhe in-ūi Tiong-kok Bú-hàn hì-iām tōa liû-hêng, siang-hong lóng kìm-chí jîn-bîn khì tùi-hong lí-iû. M̄ sī hoán Tiong.

　　2018 nî Tiong-kok lâi Tâi-oân ê gián-siu-seng ka ha̍k-ūi-seng ū 25,049 miâ, in-ūi Bú-hàn hì-iām e̍k-chêng éng-hióng, Tâi-oân Tiong-iong Liû-hêng E̍k-chêng Chí-hui Tiong-sim soan-pò͘ ùi 2020 nî it-goe̍h jī-la̍k khí chiām-oān Tiong-seng gián-siu-seng ji̍p-kéng lâi Tâi-oân. Kám sī ū lâng hoán Tiong? M̄ sī.

　　 Chiàu án-ne khòaⁿ, Bîn-chìn-tóng kah só͘-ū ê Tâi-oân lâng ná ū "hoán Tiong-kok" leh? In só͘ hoán-・ê sī "Tiong-kok kiōng-sán-tóng" kán-tan kóng sī "Τiong-kiōng". Tio̍h sī in tóng ê Chóng-su-kì Xíjìnpíng tī Chu Li̍p-lûn tòng-soán Tiong-kok Kok-bîn-tóng chú-se̍k siá hō-tiān lâi hit-ê "Tiong-kok kiōng-sán-tóng". Lán ūi-siáⁿ-mi̍h "hoán Τiong-kiōng"? in-ūi "í tóng niá kun","í tóng niá chèng" hit-ê "Tiong-kok kiōng-sán-tóng" soan-pò͘ bô beh hòng-khì" ēng bú-le̍k phah Tâi-oân", chng nn̄g-chheng gōa lia̍p hui-tôaⁿ hiòng Tâi-oân, kok chióng chiàn-ki ta̍k kang chhim-ji̍p lán Sai-lâm Khong-e̍k Hông-khong Sek-pia̍t -khu lâi loān, í káu-goe̍h jī-saⁿ choh lē, Tiong-kok kái-hòng-kun ū 24 kè- chhù kun-ki ùi Tâi-hái tiong-sòaⁿ í lâm khong-e̍k, chìn-ji̍p lán Sai-lâm Khong-e̍k Hông-khong Sek-pia̍t -khu. Chu Li̍p-lûn ka-kī tèⁿ khong ké gōng to chhám sí-liáu ah! Iáu ū bīn mē Bîn-chìn-tóng 20 nî put tióng-chìn, éng-oán "hông Tiong pit hoán"? Lán khòaⁿ Chiúⁿ Κài-chio̍h chóng-thóng kah Chiúⁿ Keng-kok chóng-thóng, Láu-chiúⁿ chì-chió ùi 1945 nî peh-goe̍h cha̍p-gō͘ khòng-chiàn sèng-lī hit kang kàu 1975 nî sì-goe̍h chhe-gō͘ sí-khì ûi-chí, 30 nî put tióng-chìn, éng-oán "hông Tiong pit hoán", sió Chiúⁿ kāng-khoán ùi khòng-chiàn sèng-lī hit kang kàu 1988 nî it-goe̍h cha̍p-saⁿ sí-khì ûi-chí, chú-tiuⁿ kah Τiong-kiōng "put chiap-chhiok, put tâm-phòaⁿ, put thò-hia̍p" saⁿ put chèng-chhek, 43 nî put tióng-chìn, éng-oán "hông Tiong pit hoán", hoán Τiong-kiōng. Tiong-kok Kok-bîn-tóng sin-kho chú-se̍k Chu Li̍p-lûn, án-ne mā in sí-khì ê tóng chóng-chhâi , tóng chú-se̍k, kám hó? (211001)


　　九月二八下po͘，中国国民党新科主席朱立伦去到基隆谢票，伊批评民进党「二十年来留tī原点不长进」，永远「逢中必反」。朱立伦ná-ē头壳chiah无清楚、胡言乱语！讲民进党kah所有ê台湾人「逢中必反」，意思是讲见nā讲tio̍h「中国」，tio̍h一定反对。朱立伦pháiⁿ心肝，thiau-tî kā「中国共产党」（中共）讲作「中国」简称作「中」。咱ná是「反中国」？咱反-・ê是「中国共产党」（中共）。

咱来看民进党执政最近chit几年，台湾kah中国ê贸易往来，2017年双方ê贸易量是1,814.7亿美金，2018年是1,931亿美金，2019年是1,905.7亿美金，2020年是2,162.3亿美金，而且差不多ta̍k年lóng有小khóa增加。siáⁿ人反中？

到2019年六月底为止，咱国ê外籍配偶人数达到 54.9 万人，nā按国籍别来看，以中国配偶34.5万人上盖济，约占62.8％。Beh按怎反中？

　　台湾中国双方来往旅游ê人数，咱以2019年作例，中国来台湾旅游ê人数有2,714,065人次，是hit年来台湾旅游外国人ê第一名，台湾人去中国旅游有2,003,023人次。2019年七月三十一，中国决定自2019年八月初一起暂停四十七个开放来台湾自由行ê城市，全面暂停核发通行证。2020年初因为中国武汉肺炎大流行，双方lóng禁止人民去对方旅游。M̄是反中。

　　2018年中国来台湾ê研修生加学位生有25,049名，因为武汉肺炎疫情影响，台湾中央流行疫情指挥中心宣布ùi 2020年一月二六起暂缓陆生研修生入境来台湾。敢是有人反中？M̄是。

　　照án-ne看，民进党kah所有ê台湾人ná有「反中国」咧？In所反-・ê是「中国共产党」简单讲是「中共」。Tio̍h是in党ê总书记习近平tī朱立伦当选中国国民党主席写贺电来hit-ê「中国共产党」。咱为siáⁿ物「反中共」？因为「以党领军」、「以党领政」hit-ê「中国共产党」宣布无beh放弃「用武力拍台湾」，装两千外粒飞弹向台湾，各种战机ta̍k工侵入咱西南空域防空识别区来乱，以九月二三作例，中国解放军有24架次军机ùi台海中线以南空域，进入咱西南空域防空识别区。朱立伦家己tèⁿ khong假gōng都惨死了ah！犹有面骂民进党20年不长进，永远「逢中必反」？咱看蒋介石总统kah蒋经国总统，老蒋至少ùi 1945年八月十五抗战胜利hit工到1975年四月初五死去为止，30车不长进，永远「逢中必反」：小蒋kāng款ùi抗战胜利hit工到1988年一月十三死去为止，主张kah中共「不接触、不谈判、不妥协」三不政策，43年不长进，永远「逢中必反」，反中共。中国国民党新科主席朱立伦，án-ne骂in死去ê党总裁、党主席，kám好？ (211001)