《绿色短评》

 | | | 转寄

中国国民党新科主席朱立伦是siáⁿ款人？

作者 李南衡, ChoânTâijī/全台字 by Chng Hūiphêng 2021.10.10

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

Tiongkok Kokbîntóng sinkho chúse̍k Chu Li̍plûn sī siáⁿ khoán lâng?

Káugoe̍h jīgō͘, Tiongkok Kokbîntóng káisoán tóngchúse̍k, chóng soánkí jînsò͘ sī 37 bān 711 lâng, khuiphiò khui chhut 18 bān 7,998 phiò, iúhāu phiò sò͘ 18 bān 6,018 phiò, chóng tâuphiò lu̍t sī 50.71%. Liân háigōa tâuphiò, Chu Li̍plûn tittio̍h 8 bān 5,618 phiò, titphiòlu̍t 45.2%, chiâⁿchoh sinkho ê Tiongkok Kokbîntóng chúse̍k. Chu Li̍plûn tàuté sī chi̍tê siáⁿmi̍h khoán ê lâng, lán kóng khah bē chún, lán lâi thiaⁿ chit piàn chhutlâi soán tóngchúse̍k ê kēngcheng tùichhiú, kakī ê tôngchì ánchóaⁿ kóng i.

Káugoe̍h cha̍pla̍k, Chu Li̍plûn kóng,"Bînchìntóng siōng hibāng Tiongkok Kokbîntóng soánchhut chi̍tê siōng lám, siōng ke̍ktoan ê tóngchúse̍k", hông káitha̍k sī teh àmtiong chí lēnggōa chi̍t ūi hāusoánjîn Tiuⁿ Ationg. Káugoe̍h cha̍pchhit chákhí, Tiuⁿ Ationg chiapsiū mûithé liânhóng ê sî piáusī, 2016 nî chóngthóng tōasoán, Chu Li̍plûn su 300 gōa bān phiò, titphiòlu̍t kantāⁿ 31.04 %."chhiáⁿmn̄g ánne kám iáu bô kàu lám?".

Káugoe̍h cha̍pkáu, tī chèngkiàn ē téngbīn, hiānjīm tóng chúse̍k Kang Khésîn, tòpêng phoe Tiuⁿ Ationg bô būsi̍t, chiàⁿpêng phah Chu Li̍plûn bô láusi̍t. Kang Khésîn kóng, In nn̄gê lāitàu m̄ hó, tónglāi hō͘ tàu sī bông tóng ê loāngoân.

　　 Káugoe̍h cha̍pkáu, tī Tâitiong chèngkiàn hoatpiáu hōe tiong, Tiuⁿ Ationg phoephêng Chu Li̍plûn kóng i sī âng thóng, bú thóng, khiok the̍h bē chhut chèngkì, sī "huisiông huisiông LOW ( kē kip)."

　　 Káugoe̍h cha̍pkáu àm, Tiongkok Kokbîntóng chúse̍k hāusoánjîn Tiuⁿ Ationg hoatchhut sengbêng, phàuhong lēnggōa chi̍t ūi hāusoánjîn Chu Li̍plûn kongkek i sī "âng thóng ","ke̍ktoan", ē chōsêng "tónglāi hunlia̍t", koh chè chhut "khìpó lūn" kah "bôngtóng lūn" lâi khiónghat tóngoân, che sī "thúnta̍h tôngchì chungiâm","siōng kài bôkeh"ê chokhoat, kohkhah sī chi̍t chióng "ūitio̍h soánkí, bô sioh tio̍h táⁿkek tôngchì ê khópi hêngûi".

　　 Káugoe̍h cha̍pkáu, tī Tâitiongchhī kípān Tiongkok Kokbîntóng chúse̍k chèngkiàn soatbênghōe, tóngchúse̍k chhamsoánjîn Tiuⁿ Ationg tī soatbênghōe chìnchêng chiapsiū mûithé chháihóng ê sî piáusī, Tiongkok Kokbîntóng 40 hòe íhā ê chhengliân pílu̍t bô 3%, nā koh chiàu ánne lo̍hkhì, Tiongkok Kokbîntóng khólêng tio̍h ē choa̍t kiáⁿ choa̍t sun.

　　 Káugoe̍h jīsaⁿ, tóngchúse̍k Kang Khésîn chiapsiū mûithé hóngbūn ê sî kóng, chíiàu sī ài tóng, tùi tóng ū kámchêng, bô hibāng Tiongkok Kokbîntóng "choa̍t kiáⁿ choa̍t sun" ê lâng, engkai lóng ē goānì tâuphiò chichhî góa. Tānsī lán khòaⁿ chit piàn Tiongkok Kokbîntóng chúse̍k soánkí, tī 18 bān 8,486 tiuⁿ iúhāu soánphiò lāité, Kang Khésîn chiah the̍h tit 3 bān 6,099 phiò, iok 19.15% niāniā, ánne sī m̄ sī kóng, kináji̍t chhutlâi soánkí ê Tiongkok Kokbîntóng tóngoân lāité, ū 80.85% ê tóngoân hiānhiān khòaⁿ Tiongkok Kokbîntóng ē choa̍t kiáⁿ choa̍t sun, ba̍kchiu mā liân ni̍h chi̍tē to bô. Khókiàn Tiongkok Kokbîntóng oân m̄ kiaⁿ Tiongkok Kokbîntóng choa̍t kiáⁿ choa̍t sun ê siongtong chē. Káⁿ ē bú kah Tiongkok Kokbîntóng bô bóe khì? Lán bānbāná kā khòaⁿ.

　　 Káugoe̍h cha̍ppeh ēpo͘, kíhêng Tiongkok Kokbîntóng chúse̍k soánkí tiānsī piānlūnhōe, Kang Khésîn ū the̍hmn̄g, tóng lāi hō͘siōng phah kah chiah giâmtiōng, nā tòngsoán, beh ánchóaⁿ thoânkiat tóng? Lán chioh Kang Khésîn chit kù ōe, chhéngkàu sinkho tóngchúse̍k Chu Li̍plûn siansiⁿ. (210925)


Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng

Tiong-kok Kok-bîn-tóng sin-kho chú-se̍k Chu Li̍p-lûn sī siáⁿ khoán lâng?

Káu-goe̍h jī-gō͘, Tiong-kok Kok-bîn-tóng kái-soán tóng-chú-se̍k, chóng soán-kí jîn-sò͘ sī 37 bān 711 lâng, khui-phiò khui chhut 18 bān 7,998 phiò, iú-hāu phiò sò͘ 18 bān 6,018 phiò, chóng tâu-phiò lu̍t sī 50.71%. Liân hái-gōa tâu-phiò, Chu Li̍p-lûn tit-tio̍h 8 bān 5,618 phiò, tit-phiò-lu̍t 45.2%, chiâⁿ-choh sin-kho ê Tiong-kok Kok-bîn-tóng chú-se̍k. Chu Li̍p-lûn tàu-té sī chi̍t-ê siáⁿ-mi̍h khoán ê lâng, lán kóng khah bē chún, lán lâi thiaⁿ chit piàn chhut-lâi soán tóng-chú-se̍k ê kēng-cheng tùi-chhiú, ka-kī ê tông-chì án-chóaⁿ kóng i.

Káu-goe̍h cha̍p-la̍k, Chu Li̍p-lûn kóng,"Bîn-chìn-tóng siōng hi-bāng Tiong-kok Kok-bîn-tóng soán-chhut chi̍t-ê siōng lám, siōng ke̍k-toan ê tóng-chú-se̍k", hông kái-tha̍k sī teh àm-tiong chí lēng-gōa chi̍t ūi hāu-soán-jîn Tiuⁿ A-tiong. Káu-goe̍h cha̍p-chhit chá-khí, Tiuⁿ A-tiong chiap-siū mûi-thé liân-hóng ê sî piáu-sī, 2016 nî chóng-thóng tōa-soán, Chu Li̍p-lûn su 300 gōa bān phiò, tit-phiò-lu̍t kan-tāⁿ 31.04 %."chhiáⁿ-mn̄g án-ne kám iáu bô kàu lám?".

Káu-goe̍h cha̍p-káu, tī chèng-kiàn ē téng-bīn, hiān-jīm tóng- chú-se̍k Kang Khé-sîn, tò-pêng phoe Tiuⁿ A-tiong bô bū-si̍t, chiàⁿ-pêng phah Chu Li̍p-lûn bô láu-si̍t. Kang Khé-sîn kóng, In nn̄g-ê lāi-tàu m̄ hó, tóng-lāi hō͘ tàu sī bông tóng ê loān-goân.

　　 Káu-goe̍h cha̍p-káu, tī Tâi-tiong chèng-kiàn hoat-piáu hōe tiong, Tiuⁿ A-tiong phoe-phêng Chu Li̍p-lûn kóng i sī âng thóng, bú thóng, khiok the̍h bē chhut chèng-kì, sī "hui-siông hui-siông LOW ( kē kip)."

　　 Káu-goe̍h cha̍p-káu àm, Tiong-kok Kok-bîn-tóng chú-se̍k hāu-soán-jîn Tiuⁿ A-tiong hoat-chhut seng-bêng, phàu-hong lēng-gōa chi̍t ūi hāu-soán-jîn Chu Li̍p-lûn kong-kek i sī "âng thóng ","ke̍k-toan", ē chō-sêng "tóng-lāi hun-lia̍t", koh chè chhut "khì-pó lūn" kah "bông-tóng lūn" lâi khióng-hat tóng-oân, che sī "thún-ta̍h tông-chì chun-giâm","siōng kài bô-keh"ê chok-hoat, koh-khah sī chi̍t chióng "ūi-tio̍h soán-kí, bô sioh tio̍h táⁿ-kek tông-chì ê khó-pi hêng-ûi".

　　 Káu-goe̍h cha̍p-káu, tī Tâi-tiong-chhī kí-pān Tiong-kok Kok-bîn-tóng chú-se̍k chèng-kiàn soat-bêng-hōe, tóng-chú-se̍k chham-soán-jîn Tiuⁿ A-tiong tī soat-bêng-hōe chìn-chêng chiap-siū mûi-thé chhái-hóng ê sî piáu-sī, Tiong-kok Kok-bîn-tóng 40 hòe í-hā ê chheng-liân pí-lu̍t bô 3%, nā koh chiàu án-ne lo̍h-khì, Tiong-kok Kok-bîn-tóng khó-lêng tio̍h ē choa̍t kiáⁿ choa̍t sun.

　　 Káu-goe̍h jī-saⁿ, tóng-chú-se̍k Kang Khé-sîn chiap-siū mûi-thé hóng-būn ê sî kóng, chí-iàu sī ài tóng, tùi tóng ū kám-chêng, bô hi-bāng Tiong-kok Kok-bîn-tóng "choa̍t kiáⁿ choa̍t sun" ê lâng, eng-kai lóng ē goān-ì tâu-phiò chi-chhî góa. Tān-sī lán khòaⁿ chit piàn Tiong-kok Kok-bîn-tóng chú-se̍k soán-kí, tī 18 bān 8,486 tiuⁿ iú-hāu soán-phiò lāi-té, Kang Khé-sîn chiah the̍h tit 3 bān 6,099 phiò, iok 19.15% niā-niā, án-ne sī m̄ sī kóng, kin-á-ji̍t chhut-lâi soán-kí ê Tiong-kok Kok-bîn-tóng tóng-oân lāi-té, ū 80.85% ê tóng-oân hiān-hiān khòaⁿ Tiong-kok Kok-bîn-tóng ē choa̍t kiáⁿ choa̍t sun, ba̍k-chiu mā liân ni̍h chi̍t-ē to bô. Khó-kiàn Tiong-kok Kok-bîn-tóng oân m̄ kiaⁿ Tiong-kok Kok-bîn-tóng choa̍t kiáⁿ choa̍t sun ê siong-tong chē. Káⁿ ē bú kah Tiong-kok Kok-bîn-tóng bô bóe khì? Lán bān-bān-á kā khòaⁿ.

　　 Káu-goe̍h cha̍p-peh ē-po͘, kí-hêng Tiong-kok Kok-bîn-tóng chú-se̍k soán-kí tiān-sī piān-lūn-hōe, Kang Khé-sîn ū the̍h-mn̄g, tóng lāi hō͘-siōng phah kah chiah giâm-tiōng, nā tòng-soán, beh án-chóaⁿ thoân-kiat tóng? Lán chioh Kang Khé-sîn chit kù ōe, chhéng-kàu sin-kho tóng-chú-se̍k Chu Li̍p-lûn sian-siⁿ. (210925)


九月二五，中国国民党改选党主席，总选举人数是37万711人，开票开出18万7,998票，有效票数18万6,018票，总投票率是50.71％。连海外投票，朱立伦得tio̍h 8万5,618票、得票率45.2%，成作新科ê中国国民党主席。朱立伦到底是一个siáⁿ物款ê人，咱讲khah bē准，咱来听chit遍出来选党主席ê竸争对手、家己ê同志án怎讲伊。

九月十六，朱立伦讲：「民进党siōng希望中国国民党选出一个上lám、siōng极端ê党主席」，hông解读是teh暗中指另外一位候选人张亚中。九月十七早起，张亚中接受媒体联访ê时表示，2016年总统大选，朱立伦输300外万票，得票率kan-tāⁿ31.04%。「请问án-ne kám犹无够lám？」。

九月十九，tī政见会顶面，现任党主席江启臣，左pêng批张亚中无务实、正pêng拍朱立伦无老实。江启臣讲：In两个内斗m̄好，党内互斗是亡党ê乱源。

　　九月十九，tī台中政见发表会中，张亚中评批朱立伦讲伊是红统、武统，却提bē出证据，是「非常非常LOW（低级）。」

　　九月十九暗，中国国民党主席候选人张亚中发出声明，炮轰另外一位候选人朱立伦攻击伊是「红统」、「极端」，ē造成「党内分裂」，koh祭出「弃保论」kah「亡党论」来恐吓党员，che是「践（thún）踏同志尊严」、「siōng kài无格」ê作法，koh khah是一种「为tio̍h选举，无惜tio̍h打击同志ê可悲行为」。

　　九月十九，tī台中市举办中国国民党主席政见说明会，党主席参选人张亚中tī说明会进前接受媒体采访ê时表示，中国国民党40岁以下ê青年比率无3%，若koh照án-ne落去，中国国民党可能tio̍h会绝子绝孙。

　　九月二三，党主席江启臣接受媒体访问ê时讲：只要是爱党、对党有感情，无希望中国国民党「绝子绝孙」ê人，应该lóng ē愿意投票支持我。但是咱看chit遍中国国民党主席选举，tī18万8,486张有效选票内底，江启臣才the̍h得3万6,099票、约19.15% niā-niā，án-ne是m̄是讲，今á日出来选举ê中国国民党党员内底，有80.85%ê党员现现看中国国民党会绝子绝孙，目睭mā连nih一下都无。可见中国国民党员m̄惊中国国民党绝子绝孙ê相当chē。敢会舞kah中国国民党无尾去？咱慢慢á kā看。

　　九月十八下晡，举行中国国民党主席选举电视辩论会，江启臣有提问：党内互相phah kah chiah严重，若当选，behán怎团结党？咱借江启臣chit句话，请教新科党主席朱立伦先生。 (210925)