《绿色短评》

 | | | 转寄

中国koh teh褪裤围海！

作者 李南衡, ChoânTâijī/全台字 by Chng Hūiphêng 2021.09.26

Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》 Lí Lâmhêng


Tiongkok koh teh thǹg khò͘ ûi hái!

　　 Tiongkok Choânkok Jîntōa Siôngúihōe 2021 nî sìgoe̍h thongkòe "Tionghôa Jînbîn Kiōnghôkok háisiōng kauthong anchoânhoat" ê siuhoat, káugoe̍h chheit khaisí si̍tsi. Tiongkok Háisūkiok hoatpò͘ siuhoat kongkò, bêngkhak kuitēng íhā gō͘ lūi chûnchiah, chhàngchúikhì, hu̍ttōngle̍k chûnpe̍k, chàiūn hòngsiāsèng bu̍tchit ê chûnpe̍k, chàiūn sòaⁿchng "iû lūi, hòaha̍kphín, e̍khòa khìthé " téng ū to̍k iúhāi bu̍tchit ê chûnchiah, kah ū khólêng gûihāi Tiongkok háisiōng kauthong anchoân ê gōakokchek chûnchiah. Chìnji̍p Tiongkok niáhái ittēng tio̍h hiòng Tiongkok háisū koánlí kikò͘ thongpò. Te̍kpia̍t thêkhí Bíkok téng kunkàm bô sio̍k tī "bô hāi thongkòe".

　　 Tiongkok sī ánchóaⁿ tio̍h te̍kpia̍t siu chitê "háisiōng kauthong anchoânhoat" lâi koánlí gōakok chûnchiah leh? Inūi Tiongkok tùi "niáhái" ê jīnti kah choân sèkài kokkok ê jīnti bô kângkhoán. Choân sèkài kokkok tùi "niáhái" ê jīnti sī chunchiàu 1982 nî 《 Liânha̍pkok háṳûⁿhoat kongiok 》 í iânhōaⁿ ê kò͘tēng "hōaⁿ kū " khaktēng ūi 12 háilí, chokûi niáhái ê hoānûi.

Tānsī Tiongkok kóng ê "niáhái" m̄nā sī Tiongkok iânhōaⁿ háie̍k, koh paukoat tanghái, Tâioân chiuûi háie̍k, inūi Tiongkok kóng Tâioân sī Tiongkok putkhó hunkoah sînsèng léngthó͘ ê chi̍tpō͘hūn, só͘í Tâioân háikiap sī Tiongkok ê lāihái, Tâioân chiuûi ê háie̍k sī Tiongkok ê niáhái. Lâmhái, Tiongkok sī kinkì "káutōaⁿsòaⁿ" (Ùi Tâioân lâmpêng ê Pasū háikiap hiòng lâm iân Huilu̍tpin sepō͘ háihōaⁿ ōe・lo̍hkhì, iân Pôlôchiu pakpō͘ háihōaⁿ liáu chiah hiòng saipak iân Oa̍tlâm tangpō͘ háihōaⁿ ōe kàu Háilâmtó lâmpêng ûichí, chhinchhiūⁿ chi̍t tè gûchi̍h hêng ）, kóng chiahê hoānûi lāi ê háie̍k kah tósū háita chū kó͘ tio̍h sī Tiongkok ê. Chitê "káutōaⁿsòaⁿ" kah Huilu̍tpin, Málâisea, Bûnlâi, Oa̍tlâm kokkok chiàu 《 Liânha̍pkok háṳûⁿ kongiok 》 só͘ ōe ê niáhái kah keng chē háie̍k ū chin chē tāng thia̍p ê só͘chāi. 2014 nî Huilu̍tpin thêchhut Lâmhái tiōngchhâi àn, 2016 nî chhitgoe̍h cha̍pjī, Háigê Siôngsiat Tiōngchhâi Hoatīⁿ chhâikoat Tiongkok "káutōaⁿsòaⁿ" tī Kokchèhoat ēbīn bô hāule̍k bô hoatlu̍t kinkì. Tānsī Tiongkok bô beh sêngjīn Háigê Hoatīⁿ ê chhâikoat. Kiⁿî káugoe̍h chheit khí Tiongkok chìn chi̍tpō͘ chútiuⁿ tùi chenggī háie̍k ióngiú chúkoân.

　　 Káugoe̍h chheit, Bíkok Kokbū īⁿ kóng, Bíkok kianchhî só͘ū ê kokka bôlūn tōasè, lóng tio̍h chunsiú kâng chi̍t thò háṳûⁿ hoatlu̍t, in ē kèsio̍k hoántùi Tiongkok "huihoat, kòethâu ê háṳûⁿ chútiuⁿ". Káugoe̍h chhejī, Òchiu Kokhôngpō͘ kiôngtiāu bô chhap Tiongkok ê Háianhoat, ē kèsio̍k kinkì kokchè hoat chūiû hânghêng, jîchhiáⁿ hōtiàu bêngiú chòhóe chūiû hânghêng. Káugoe̍h chhesì, Bíkok Tēchhit Kàmtūi koaⁿhong bīnchheh ū Bíkok Háikun, Engkok Hôngka Háikun saⁿ tâi kunkàm chìnji̍p Tanghái ê siòngphìⁿ. Káugoe̍h chhepeh, Bíkok Tēchhit Kàmtūi piáusī, Bíkok " Carl Vinson hō" hôngkhongbólām táⁿkek kûn chhegō͘, chhela̍k tī Lâmhái hùnliān, tīniông ū Tē 2 Lām Chàihuihêng Liântūi, Tē 1 Khutio̍klām Tiongtūi, sûniûⁿlām " Lake Champlain hō", khutio̍klām " Chafee hō", pînhái chiàntàulām " Tulsa hō". Tiongkok khì kah phokphok thiàu. Bíkok hôngkhongbólām tī Lâmhái hânghêng pēng bô hikî,"Goán Háikun kinkì kokchè hoattī kuiê Ìn thài tēkhu hêngtōng chhiaukòe 75 nî, goán ē kèsio̍k ánne chò. "Te̍kpia̍t kiôngtiāu pēng bô thongti Tiongkok.

Tiongkok "thǹgkhò͘ ûi hái"chitê chèngthâu kúkú tio̍h ē khíkông chi̍t piàn, ē hông chhiòsiáu niāniā. (210910)

Pe̍h-ōe-jī-pán/白话字版


《 Le̍k-sek toán-phêng 》 Lí Lâm-hêng


Tiong-kok koh teh thǹg khò͘ ûi hái!


　　 Tiong-kok Choân-kok Jîn-tōa Siông-úi-hōe 2021 nî sì-goe̍h thong-kòe "Tiong-hôa Jîn-bîn Kiōng-hô-kok hái-siōng kau-thong an-choân-hoat" ê siu-hoat, káu-goe̍h chhe-it khai-sí si̍t-si. Tiong-kok Hái-sū-kiok hoat-pò͘ siu-hoat kong-kò, bêng-khak kui-tēng í-hā gō͘ lūi chûn-chiah, chhàng-chúi-khì, hu̍t-tōng-le̍k chûn-pe̍k, chài-ūn hòng-siā-sèng bu̍t-chit ê chûn-pe̍k, chài-ūn sòaⁿ-chng "iû lūi, hòa-ha̍k-phín, e̍k-hòa khì-thé " téng ū to̍k iú-hāi bu̍t-chit ê chûn-chiah, kah ū khó-lêng gûi-hāi Tiong-kok hái-siōng kau-thong an-choân ê gōa-kok-chek chûn-chiah. Chìn-ji̍p Tiong-kok niá-hái it-tēng tio̍h hiòng Tiong-kok hái-sū koán-lí ki-kò͘ thong-pò. Te̍k-pia̍t thê-khí Bí-kok téng kun-kàm bô sio̍k tī "bô hāi thong-kòe".

　　 Tiong-kok sī án-chóaⁿ tio̍h te̍k-pia̍t siu chit-ê "hái-siōng kau-thong an-choân-hoat" lâi koán-lí gōa-kok chûn-chiah leh? In-ūi Tiong-kok tùi "niá-hái" ê jīn-ti kah choân sè-kài kok-kok ê jīn-ti bô kâng-khoán. Choân sè-kài kok-kok tùi "niá-hái" ê jīn-ti sī chun-chiàu 1982 nî 《 Liân-ha̍p-kok hái-iûⁿ-hoat kong-iok 》 í iân-hōaⁿ ê kò͘-tēng "hōaⁿ kū " khak-tēng ūi 12 hái-lí, chok-ûi niá-hái ê hoān-ûi.

Tān-sī Tiong-kok kóng ê "niá-hái" m̄-nā sī Tiong-kok iân-hōaⁿ hái-e̍k, koh pau-koat tang-hái, Tâi-oân chiu-ûi hái-e̍k, in-ūi Tiong-kok kóng Tâi-oân sī Tiong-kok put-khó hun-koah sîn-sèng léng-thó͘ ê chi̍t-pō͘-hūn, só͘-í Tâi-oân hái-kiap sī Tiong-kok ê lāi-hái, Tâi-oân chiu-ûi ê hái-e̍k sī Tiong-kok ê niá-hái. Lâm-hái, Tiong-kok sī kin-kì "káu-tōaⁿ-sòaⁿ" (Ùi Tâi-oân lâm-pêng ê Pa-sū hái-kiap hiòng lâm iân Hui-lu̍t-pin se-pō͘ hái-hōaⁿ ōe-・lo̍h-khì, iân Pô-lô-chiu pak-pō͘ hái-hōaⁿ liáu chiah hiòng sai-pak iân Oa̍t-lâm tang-pō͘ hái-hōaⁿ ōe kàu Hái-lâm-tó lâm-pêng ûi-chí, chhin-chhiūⁿ chi̍t tè gû-chi̍h hêng ）, kóng chiah-ê hoān-ûi lāi ê hái-e̍k kah tó-sū hái-ta chū kó͘ tio̍h sī Tiong-kok ê. Chit-ê "káu-tōaⁿ-sòaⁿ" kah Hui-lu̍t-pin, Má-lâi-se-a, Bûn-lâi, Oa̍t-lâm kok-kok chiàu 《 Liân-ha̍p-kok hái-iûⁿ kong-iok 》 só͘ ōe ê niá-hái kah keng chē hái-e̍k ū chin chē tāng thia̍p ê só͘-chāi. 2014 nî Hui-lu̍t-pin thê-chhut Lâm-hái tiōng-chhâi àn, 2016 nî chhit-goe̍h cha̍p-jī, Hái-gê Siông-siat Tiōng-chhâi Hoat-īⁿ chhâi-koat Tiong-kok "káu-tōaⁿ-sòaⁿ" tī Kok-chè-hoat ē-bīn bô hāu-le̍k bô hoat-lu̍t kin-kì. Tān-sī Tiong-kok bô beh sêng-jīn Hái-gê Hoat-īⁿ ê chhâi-koat. Kin-nî káu-goe̍h chhe-it khí Tiong-kok chìn chi̍t-pō͘ chú-tiuⁿ tùi cheng-gī hái-e̍k ióng-iú chú-koân.

　　 Káu-goe̍h chhe-it, Bí-kok Kok-bū- īⁿ kóng, Bí-kok kian-chhî só͘-ū ê kok-ka bô-lūn tōa-sè, lóng tio̍h chun-siú kâng chi̍t thò hái-iûⁿ hoat-lu̍t, in ē kè-sio̍k hoán-tùi Tiong-kok "hui-hoat, kòe-thâu ê hái-iûⁿ chú-tiuⁿ". Káu-goe̍h chhe-jī, Ò-chiu Kok-hông-pō͘ kiông-tiāu bô chhap Tiong-kok ê Hái-an-hoat, ē kè-sio̍k kin-kì kok-chè -hoat chū-iû hâng-hêng, jî-chhiáⁿ hō-tiàu bêng-iú chò-hóe chū-iû hâng-hêng. Káu-goe̍h chhe-sì, Bí-kok Tē-chhit Kàm-tūi koaⁿ-hong bīn-chheh ū Bí-kok Hái-kun, Eng-kok Hông-ka Hái-kun saⁿ tâi kun-kàm chìn-ji̍p Tang-hái ê siòng-phìⁿ. Káu-goe̍h chhe-peh, Bí-kok Tē-chhit Kàm-tūi piáu-sī, Bí-kok " Carl Vinson hō" hông-khong-bó-lām táⁿ-kek kûn chhe-gō͘, chhe-la̍k tī Lâm-hái hùn-liān, tīn-iông ū Tē 2 Lām Chài-hui-hêng Liân-tūi, Tē 1 Khu-tio̍k-lām Tiong-tūi, sûn-iûⁿ-lām " Lake Champlain hō", khu-tio̍k-lām " Chafee hō", pîn-hái chiàn-tàu-lām " Tulsa hō". Tiong-kok khì kah phok-phok thiàu. Bí-kok hông-khong-bó-lām tī Lâm-hái hâng-hêng pēng bô hi-kî,"Goán Hái-kun kin-kì kok-chè hoat-tī kui-ê Ìn -thài tē-khu hêng-tōng chhiau-kòe 75 nî, goán ē kè-sio̍k án-ne chò. "Te̍k-pia̍t kiông-tiāu pēng bô thong-ti Tiong-kok.

Tiong-kok "thǹg-khò͘ ûi hái"chit-ê chèng-thâu kú-kú tio̍h ē khí-kông chi̍t piàn, ē hông chhiò-siáu niā-niā. (210910)


　　中国全国人大常委会2021年四月通过「中华人民共和国海上交通安全法」ê修法，九月初一开始实施。中国海事局发布修法公告，明确规定以下五类船只：潜水器、核动力船舶、载运放射性物质ê船舶、载运散装「油类、化学品、液化气体」等有毒有害物质ê船只、kah有可能危害中国海上交通安全ê外国籍船只。进入中国领海一定tio̍h向中国海事管理机构通报。特别提起美国等军舰无属tī「无害通过」。

　　中国是án怎tio̍h特别修chit-ê「海上交通安全法」来管理外国船只leh？因为中国对「领海」ê认知kah全世界各国ê认知无仝款．全世界各国对「领海」ê认知是遵照1982年《联合国海洋法公约》以沿岸ê固定「岸距」确定为12海里，作为领海ê范围。

但是中国讲ê「领海」m̄-nā是中国沿岸海域，koh包括东海，台湾周围海域，因为中国讲台湾是中国不可分割神圣领土ê一部分，所以台湾海峡是中国ê内海，台湾周围ê海域是中国ê领海。南海，中国是根据「九段线」（Ùi台湾南旁ê巴士海峡向南沿菲律宾西部海岸画落去，沿婆罗洲北部海岸了才向西北沿越南东部海岸画到海南岛南旁为止，亲像一块牛舌形），讲chiah-ê范围内ê海域kah岛屿海礁自古tio̍h是中国ê。Chit-ê「九段线」kah菲律宾、马来西亚、汶莱、越南各国照《联合国海洋公约》所画ê领海kah经chē海域有真chē重叠ê所在。2014年菲律宾提出南海仲裁案，2016年七月十二，海牙常设仲裁法院裁决中国「九段线」tī国际法下面无效力无法律根据。但是中国无beh承认海牙法院ê裁决。今年九月初一起中国进一步主张对争议海域拥有主权。

　　九月初一，美国国务院讲，美国坚持所有ê国家无论大细，lóng tio̍h遵守仝一套海洋法律，in会继续反对中国「非法、过头ê海洋主张」。九月初二，澳洲国防部强调无chhap中国ê海安法，会继续根据国际法自由航行，而且号召盟友做伙自由航行。九月初四，美国第七舰队官方面册有美国海军、英国皇家海军三台军舰进入东海ê相片。九月初八，美国第七舰队表示，美国「卡．文森号」航舰打击群初五、初六tī南海训练，阵容有第2舰载飞行联队、第1驱逐舰中队、巡洋舰「闪浮莲湖号」、驱逐舰「查飞号」、濒海战斗舰「杜沙号」。中国气kah phok-phok跳。美国航舰tī南海航行并无稀奇，「阮海军根据国际法tī归个印太地区行动超过75年，阮会继续án-ne做。」特别强调并无通知中国。

中国「褪裤围海」chit-ê症头久久tio̍h会起狂一遍，会hông笑siáu niā-niā。 (210910)