《绿色短评》

 | | | 转寄

中国国民党射出「回力镖」！

作者 李南衡, ChoânTâijī/全台字 by Chng Hūiphêng 2021.09.19

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng
Tiongkok Kokbîntóng siāchhut "Hoela̍tpio"!

Tiongkok Kokbîntóng chèngtī jînbu̍t kah pō͘hūn mûithé lâng, itchài chitgî chùe̍kbiâu tējī lūi lāité ê tē 6 hāng kah tē 7 hāng "îchhî hônge̍k théhē ūnchok ê tiongiong chènghú kah tēhng chènghú tiōngiàu koaⁿoân" ê chùsiā chênghêng, mē kóng sī "jînsò͘ phòngtiòng","chhin sio̍k te̍kkoân", mē kóng chiahê tiongng tōakoaⁿ bô beh chù Kotoan e̍kbiâu, hoántńg kah lāuehsèⁿ chhiúⁿ chìnkháu e̍kbiâu, chhiúⁿ jînbîn ê e̍kbiâu. Tiongkok Kokbîntóng li̍púi Lîm E̍khôa piáusī, Ōehokpō͘ ê phiauchún hō͘ lâng chin pháiⁿ chiapsiū, in ēng kakī koânle̍k ê hongpiān, beh hō͘ siáⁿlâng chù e̍kbiâu tio̍h hō͘ siáⁿlâng chù e̍kbiâu, bo̍kkòai tējī lūi ê jînoân ē ùi goânlâi ītēng ê káubān gōalâng phòng kàu jīcha̍p gōa bān lâng, Tiongiong Liûhêng E̍kchêng Chíhui Tiongsim kám bián hō͘ jînbîn chi̍tê kautài?

　　 Pehgo̍eh saⁿcha̍p, ū kìchiá kongkhai mn̄g " Tiongiong Liûhêng E̍kchêng Chíhui Tiongsim " Chíhuikoaⁿ Tân Sîtiong pō͘tiúⁿ, tàuté si̍tchāi ê chênghêng sī ánchóaⁿ? I kóng, tējī lūi lāité ê tē 6 hāng kah tē 7 hāng, îchhî hônge̍k théhē ūnchok ê tiongiong kah tēhng koaⁿoân lóngchóng ū nn̄gbān la̍kchheng lâng chù e̍kbiâu. I kóng, tiongiong koaⁿoân m̄sī siōng chē. Tiongiong chènghú tiōngiàu koaⁿoân chō chheh 1,710 lâng, kîtiong chù tēit che ê ū 1,692 lâng, chù tējī che ê ū 925 lâng; îchhî hônge̍k théhē ūnchok ê tēhng chènghú tiōngiàu koaⁿoân chō chheh ê ū 28,794 lâng, chù tēit che ê ū 24,793 lâng, íkeng chù tējī che ê ū 5,886 lâng.

　　 Ū kìchiá khì ó͘ chuliāu hoathiān, choânkok 16 koānchhī the̍hpò "tēhngkoaⁿoân" miâchheh tiong, Nâiâⁿ chipchèng ê 4 ê koānchhī, the̍hpò jînsò͘ tio̍h chhaputto chiàm tējī lūi tē chhithāng îchhî hônge̍k théhē ūnchok tēhng koaⁿoân chóngsò͘ ê 77.4％.

Pehgo̍eh saⁿcha̍pit, sinbûn pòtō kóng, tī tēhng koaⁿoân chōchheh tiong, jînsò͘ chêng 4 miâ hūnpa̍t sī Chionghòa koān ū 8,238 lâng ( chiàm 27%), Hûnlîm koān ū 5,499 lâng ( chiàm 18%), Lâmtâu koān ū 4,710 lâng ( chiàm 15%), Ka gī chhī ū 3,842 lâng ( chiàm 12%), lóng sī Nâiâⁿ chipchèng ê koānchhī.

　　 Lâmtâu koān ná ē hiahchē chē kàu piàn choânkok tēsaⁿ ? Koantiúⁿ Lîm Bêngchin kóng, inūi kā sàng chōchheh miâtoaⁿ ê lîntiúⁿ, hō͘chèng jînoân kah hônge̍k chìkang lóng lia̍tchoh îchhî hônge̍k théhē ūnchok ê tiōngiàu tēhng koaⁿ oân. Bînchìntóng li̍phoatúigoân Chhòa Īû ēng Kagīchhī chohlē kóng, Kagīchhī sinpò ê tējī lūi tē chhithāng tiōngiàu tēhng koaⁿoân ū 3,842 lâng, lán khòaⁿ jînkháu sò͘ sī Kagīchhī 2 pōe ê Kagīkōan, kantaⁿ the̍hpò bô kàu 150 lâng. I chhiò kóng "Chiàntàunâ" tio̍h násiōng chi̍tê siā "Hôela̍tpio" ê lâng, siā chhutkhì poe tòtńglâi phah kakī.

　　 Káugo̍eh chheit chákhí, Tiongkok Kokbîntóng li̍phoatīⁿ tóngthoân tiàukhui kìchiáhōe , Chóngtiàu Hùi Hôngthài hoánkek Bînchìntóng li̍púi Chhòa Īû kóng, "Mài o͘pe̍h phoah sái", jîchhiáⁿ hiòng Chíhui Tiongsim hoahsiaⁿ, iaukiû kongpò͘ "tējī lūi, tē chhithāng tàuté ū siáⁿkhoán ê lâng, bôkoán tó ittóng chipchèng ê koānchhī, choânpō͘ kongpò͘ hó boh?"

　　Ánne kám hó? Só͘ū ê miâtoaⁿ kongpò͘ chhutlâi, Tiongkok Kokbîntóng ê bīn beh giâ khì tóūi? Hùi Hôngthài chinchiàⁿ m̄chai iáⁿ "Hôela̍tpio" sī siáⁿ? Hùi Hôngthài lín tio̍h kín siám khah khui, á・sī kín sió khû・lo̍hkhì chi̍tē, lín siā chhutkhì ê " Hôela̍tpio " teh beh se̍h tò tńglâi tôaⁿ tio̍h lín kakī ah! (210903)


Pe̍h-ōe-jī-pán/白话字版
《 Le̍k-sek toán-phêng 》 Lí Lâm-hêng
Tiong-kok Kok-bîn-tóng siā-chhut "Hoe-la̍t-pio"!

Tiong-kok Kok-bîn-tóng chèng-tī jîn-bu̍t kah pō͘-hūn mûi-thé lâng, it-chài chit-gî chù-e̍k-biâu tē-jī lūi lāi-té ê tē 6 hāng kah tē 7 hāng "î-chhî hông-e̍k thé-hē ūn-chok ê tiong-iong chèng-hú kah tē-hng chèng-hú tiōng-iàu koaⁿ-oân" ê chù-siā chêng-hêng, mē kóng sī "jîn-sò͘ phòng-tiòng","chhin sio̍k te̍k-koân", mē kóng chiah-ê tiong-ng tōa-koaⁿ bô beh chù Ko-toan e̍k-biâu, hoán-tńg kah lāu-eh-sèⁿ chhiúⁿ chìn-kháu e̍k-biâu, chhiúⁿ jîn-bîn ê e̍k-biâu. Tiong-kok Kok-bîn-tóng li̍p-úi Lîm E̍k-hôa piáu-sī, Ōe-hok-pō͘ ê phiau-chún hō͘ lâng chin pháiⁿ chiap-siū, in ēng ka-kī koân-le̍k ê hong-piān, beh hō͘ siáⁿ-lâng chù e̍k-biâu tio̍h hō͘ siáⁿ-lâng chù e̍k-biâu, bo̍k-kòai tē-jī lūi ê jîn-oân ē ùi goân-lâi ī-tēng ê káu-bān gōa-lâng phòng kàu jī-cha̍p gōa bān lâng, Tiong-iong Liû-hêng E̍k-chêng Chí-hui Tiong-sim kám bián hō͘ jîn-bîn chi̍t-ê kau-tài?

　　 Peh-go̍eh saⁿ-cha̍p, ū kì-chiá kong-khai mn̄g " Tiong-iong Liû-hêng E̍k-chêng Chí-hui Tiong-sim " Chí-hui-koaⁿ Tân Sî-tiong pō͘-tiúⁿ, tàu-té si̍t-chāi ê chêng-hêng sī án-chóaⁿ? I kóng, tē-jī lūi lāi-té ê tē 6 hāng kah tē 7 hāng, î-chhî hông-e̍k thé-hē ūn-chok ê tiong-iong kah tē-hng koaⁿ-oân lóng-chóng ū nn̄g-bān la̍k-chheng lâng chù e̍k-biâu. I kóng, tiong-iong koaⁿ-oân m̄-sī siōng chē. Tiong-iong chèng-hú tiōng-iàu koaⁿ-oân chō chheh 1,710 lâng, kî-tiong chù tē-it che ê ū 1,692 lâng, chù tē-jī che ê ū 925 lâng; î-chhî hông-e̍k thé-hē ūn-chok ê tē-hng chèng-hú tiōng-iàu koaⁿ-oân chō chheh ê ū 28,794 lâng, chù tē-it che ê ū 24,793 lâng, í-keng chù tē-jī che ê ū 5,886 lâng.

　　 Ū kì-chiá khì ó͘ chu-liāu hoat-hiān, choân-kok 16 koān-chhī the̍h-pò "tē-hng-koaⁿ-oân" miâ-chheh tiong, Nâ-iâⁿ chip-chèng ê 4 ê koān-chhī, the̍h-pò jîn-sò͘ tio̍h chha-put-to chiàm tē-jī lūi tē chhit-hāng î-chhî hông-e̍k thé-hē ūn-chok tē-hng koaⁿ-oân chóng-sò͘ ê 77.4％.

Peh-go̍eh saⁿ-cha̍p-it, sin-bûn pò-tō kóng, tī tē-hng koaⁿ-oân chō-chheh tiong, jîn-sò͘ chêng 4 miâ hūn-pa̍t sī Chiong-hòa koān ū 8,238 lâng ( chiàm 27%), Hûn-lîm koān ū 5,499 lâng ( chiàm 18%), Lâm-tâu koān ū 4,710 lâng ( chiàm 15%), Ka- gī chhī ū 3,842 lâng ( chiàm 12%), lóng sī Nâ-iâⁿ chip-chèng ê koān-chhī.

　　 Lâm-tâu- koān ná ē hiah-chē chē kàu piàn choân-kok tē-saⁿ ? Koan-tiúⁿ Lîm Bêng-chin kóng, in-ūi kā sàng chō-chheh miâ-toaⁿ ê lîn-tiúⁿ, hō͘-chèng jîn-oân kah hông-e̍k chì-kang lóng lia̍t-choh î-chhî hông-e̍k thé-hē ūn-chok ê tiōng-iàu tē-hng koaⁿ- oân. Bîn-chìn-tóng li̍p-hoat-úi-goân Chhòa Ī-û ēng Ka-gī-chhī choh-lē kóng, Ka-gī-chhī sin-pò ê tē-jī lūi tē chhit-hāng tiōng-iàu tē-hng koaⁿ-oân ū 3,842 lâng, lán khòaⁿ jîn-kháu sò͘ sī Ka-gī-chhī 2 pōe ê Ka-gī-kōan, kan-taⁿ the̍h-pò bô kàu 150 lâng. I chhiò kóng "Chiàn-tàu-nâ" tio̍h ná-siōng chi̍t-ê siā "Hôe-la̍t-pio" ê lâng, siā chhut-khì poe tò-tńg-lâi phah ka-kī.

　　 Káu-go̍eh chhe-it chá-khí, Tiong-kok Kok-bîn-tóng li̍p-hoat-īⁿ tóng-thoân tiàu-khui kì-chiá-hōe , Chóng-tiàu Hùi Hông-thài hoán-kek Bîn-chìn-tóng li̍p-úi Chhòa Ī-û kóng, "Mài o͘-pe̍h phoah sái", jî-chhiáⁿ hiòng Chí-hui Tiong-sim hoah-siaⁿ, iau-kiû kong-pò͘ "tē-jī lūi, tē chhit-hāng tàu-té ū siáⁿ-khoán ê lâng, bô-koán tó it-tóng chip-chèng ê koān-chhī, choân-pō͘ kong-pò͘ hó boh?"

　　Án-ne kám hó? Só͘-ū ê miâ-toaⁿ kong-pò͘ chhut-lâi, Tiong-kok Kok-bîn-tóng ê bīn beh giâ khì tó-ūi? Hùi Hông-thài chin-chiàⁿ m̄-chai iáⁿ "Hôe-la̍t-pio" sī siáⁿ? Hùi Hông-thài lín tio̍h kín siám khah khui, á-・sī kín sió khû-・lo̍h-khì chi̍t-ē, lín siā chhut-khì ê " Hôe-la̍t-pio " teh beh se̍h tò tńg-lâi tôaⁿ tio̍h lín ka-kī ah! (210903)


中国国民党政治人物kah部分媒体人，一再质疑注疫苗第二类内底ê第6项kah第7项「维持防疫体系运作ê中央政府kah地方政府重要官员」ê注射情形，骂讲是「人数膨胀」、「亲属特权」，骂讲chiah-ê中央大官无beh注高端疫苗，反转kah老百姓抢进口疫苗、抢人民ê疫苗。中国国民党立委林奕华表示，卫福部ê标准hō͘人真pháiⁿ接受，in用家己权力ê方便，beh hō͘啥人注疫苗tio̍h hō͘啥人注疫苗，莫怪第二类ê人员ēùi原来预定ê九万外人膨到二十外万人，中央流行疫情指挥中心kám免hō͘人民一个交代？

　　八月三十，有记者公开问「中央流行疫情指挥中心」指挥官陈时中，到底实在ê情形是按怎？伊讲：第二类内底ê第6项kah第7项，维持防疫体系运作ê中央kah地方官员lóng总有两万六千人注疫苗。伊讲：中央官员m̄是上chē。中央政府重要官员造册1,710人，其中注第一剂ê有1,692人、注第二剂ê有925人；维持防疫体系运作ê地方政府重要官员造册ê有28,794人，注第一剂ê有24,793人、已经注第二剂ê有5,886人。

　　有记者去挖（ó͘）资料发现，全国16县市提报「地方官员」名册中，蓝营执政ê4个县市，提报人数tio̍h差不多占第二类第七项维持防疫体系运作地方官员总数ê77.4％。

八月三十一，新闻报导讲，tī地方官员造册中，人数前4名分别是彰化县有8,238人（占27%），云林县有5,499人（占18%），南投县有4,710人（占15%），嘉义市有3,842人（占12%），lóng是蓝营执政ê县市。

　　南投县ná ēhiahchē chē到变全国第三？县长林明溱讲，因为kā送造册名单ê邻长、户政人员kah防疫志工lóng列作维持防疫体系运作ê重要地方官员。民进党立法委员蔡易余用嘉义市作例讲，嘉义市申报ê第二类第七项重要地方官员有3,842人，咱看人口数是嘉义市2倍ê嘉义县，kan-taⁿ提报无到150人。伊笑讲「战斗蓝」tio̍h ná像一个射「回力镖」ê人，射出去飞倒转来拍家己。

　　九月初一早起，中国国民党立法院党团召开记者会，总召费鸿泰反击民进党立委蔡易余讲，「Mài乌白泼屎」，而且向指挥中心喝声，要求公布「第二类、第七项到底有啥款ê人，无管tó一党执政ê县市，全部公布好boh？」

　　Án-nekám好？所有ê名单公布出来，中国国民党ê面beh夯去tó位？费鸿泰真正m̄知影「回力镖」是啥？费鸿泰líntio̍h紧闪khah开、抑是紧小khû落去一下，lín射出去ê「回力镖」teh beh se̍h倒转来弹tio̍hlín家己ah！ (210903)