《绿色短评》

 | | | 转寄

台湾ē-tàng帮助！是真ê。

作者 李南衡, ChoânTâijī/全台字 by Chng Hūiphêng 2021.09.12

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　　　　　　　　　　　 Lí Lâmhêng

　　　　　　　　 Tâioân ētàng pangchō͘ sī chin・ê.

　　 Kokchè e̍kchêng sioliânsòa giâmchùn, kokkok ūitio̍h hônge̍k anchoân, tùi chûnoân chiūⁿ hōaⁿ kauōaⁿ lóng chháichhú giâmkeh ê piankéng koánchè, bo̍kchêng choân sèkài tāiiok ū 25 bānmiâ chûnoân lâu tī háisiōng bôhoattō͘ sūnlī tńgkhì kakī ê kò͘hiong, Liânha̍pkok kah kokchè háisū cho͘chit téng kokchè cho͘chit lóng ū tùi che piáusī koansim.

　　 Chù Tāipak Ìnnî Kengchè Bō͘e̍k Tāipiáuchhù （IETO）ū tùi lán Gōakaupō͘ hoánèng, kóng tī Tâioân hūkīn háie̍k ū chi̍t chiah gōakokchek ê chûnchiah, chûnténg ū chin chē Ínnî chek chûnoân suijiân khèiok íkeng kàu kî, tānsī inūi chûnthâuke kah chûnkîkok bētàng chhúlí hósè, tìsú chûnoân bôhoattō͘ tńgkhì Ìnnî, íkeng tùi in ê sinsim kiānkhong chōsêng hūbīn énghióng. Ìnnî Tāipiáuchhù mā liáukái Tâioân ūitio̍h khakpó piankéng hônge̍k anchoân ê chhùkéng, Tâioân kantaⁿ ū khàihòng kokchek chûnchiah kah kòjîn tâuchu kengêng ê chûnchiah téngbīn ê gōachek chûnoân tī Tâioân chìnhêng chûnoân kauōaⁿ. Tānsī Ínnî Tāipiáuchhù iûgoân kîthāi Tâioân chènghú kiî jîntō hia̍pchō͘ ê li̍ptiûⁿ, ētàng pangchō͘ Ìnnî chûnoân tńgkhì kò͘hiong.

　　 Lán kok Gōakaupō͘ chiap tio̍h thongpò liáuāu, siongtong tiōngsī chûnoân ê hiānkhóng kah koânek, sûisî tiàukhui khòapō͘ ē choanàn hia̍ptiau hōegī, lîchheng siongkoan koânchek liáuāu génggí hia̍pchō͘ hongàn. Kinkì "Háisū lôkang kokchè kongiok" téng siongkoan kuihoān, gōachek chûnchiah téngbīn ê gōachek chûnoân tńgkhì in kok sūgî sio̍k chûnthâuke, chûnkîkok kah chûnoânkok ê chekjīm. Lán kok tùi gōachek chûnchiah téngbīn ê gōachek chûnoân bô koánhatkoân, tānsī kiî póchiòng kokchè jînkoân kah lo̍ksi̍t jîntō oânchō͘ chengsîn, lán kok chènghú tī e̍kchêng giâmchùn, hônge̍k lêngliōng iúhān ê tiâukiāⁿ chi hā, iûgoân chhunchhiú choânle̍k hia̍pchō͘ lâu tī háisiōng íkeng chin kú ê Ìnnîchek chûnoân tńgkhì in kok.

Kengkòe Kauthongpō͘ Hângkángkiok kah Gōakaupō͘ ha̍pchok kuiōe, chènghú kok siongkoan pō͘mn̂g kah gōachek chûnchiah tī Tâioân ê chûnbū tāilí gia̍pchiá to pái hia̍psiong, tī kiamkò͘ tio̍h piankéng hônge̍k anchoân kah jîntō būntê ê goânchek chi hā, gítēng choanàn. Chitê choanàn seng chìnhêng anchoân chagiām liáuāu, chiah í "Kòekéng put ji̍pkéng" ê "hônge̍k thongtō" hongsek chiūⁿhōaⁿ, múi chi̍t ūi lóng ū chhēng hônghō͘ ibō, chiah chiàu sūnsī chē bahsuh chiânóng Siókáng Kokchè Kitiûⁿ chē huiki, lán chènghú ū tōngoân pahgōa miâ kangchok jînoân, sūnlī hia̍pchō͘ 105 miâ Ìnnîchek chûnoân kah 16 miâ lâu tī Tâioân ê Ìnnî kiâubîn, tī pehgoe̍h jīcha̍p àmsî cha̍pit tiám chē Ìn nî chènghú anpâi ê choanki tńgkhì Ìnnî. Tiongiong Liûhêng E̍kchêng Chíhui Tiongsim Hùchíhuikoaⁿ Tân Chonggān ū tī hiāntiûⁿ sīchhat khiántńg chokgia̍p chênghêng.

Tâioân kah Ìnnî ha̍pchok chiphêng chitê choanàn, lóng tôngì sianghong engkai chiamtùi chûnoân phèngkò͘ kah siongkoan gītê chìnhêng tùiōe, í thêseng chûnoân koânek. Bīlâi Tâioân siongkoan pō͘mn̂g mā ē ihoat thàukòe kángkháukok koánchè, tengkiám, khulī téng chokhoat, îhō͘ Tâioân chiupiⁿ háie̍k ê tia̍tsū kah anlêng, tôngsî khakpó gōachek chûnoân tī gōakokchek chûnchiah téngbīn ê khoânlī, hóhó chò chi̍tê kokchè siāhōe hū chekjīm sêngoân ê gībū.

Chit piàn sūnlī pangchō͘ Ìnnî phiauliû tī háisiōng ê pahgōa miâ chûnoân sūnlī tńgkhì Ìnnî, hō͘ lán siūⁿkhí kūnî lán kā kakī sengsán ê chhùiam chēngsàng hō͘ chiok suiàu ê sèkài kokkok, lán kóng “Taiwan Can Help”"Tâioân ētàng pangchō͘", chit kù ōe chitmá mā sī chin・ê! (210827)

Pe̍h-ōe-jī-pán/白话字版

《 Le̍k-sek toán-phêng 》　　　　　　　　　　　　　 Lí Lâm-hêng

　　　　　　　　 Tâi-oân ē-tàng pang-chō͘ sī chin・ê.

　　 Kok-chè e̍k-chêng sio-liân-sòa giâm-chùn, kok-kok ūi-tio̍h hông-e̍k an-choân, tùi chûn-oân chiūⁿ hōaⁿ kau-ōaⁿ lóng chhái-chhú giâm-keh ê pian-kéng koán-chè, bo̍k-chêng choân sè-kài tāi-iok ū 25 bān-miâ chûn-oân lâu tī hái-siōng bô-hoat-tō͘ sūn-lī tńg-khì ka-kī ê kò͘-hiong, Liân-ha̍p-kok kah kok-chè hái-sū cho͘-chit téng kok-chè cho͘-chit lóng ū tùi che piáu-sī koan-sim.

　　 Chù Tāi-pak Ìn-nî Keng-chè Bō͘-e̍k Tāi-piáu-chhù （IETO）ū tùi lán Gōa-kau-pō͘ hoán-èng, kóng tī Tâi-oân hū-kīn hái-e̍k ū chi̍t chiah gōa-kok chek ê chûn-chiah, chûn-téng ū chin chē Ín-nî chek chûn-oân sui-jiân khè-iok í-keng kàu kî, tān-sī in-ūi chûn-thâu-ke kah chûn-kî-kok bē-tàng chhú-lí hó-sè, tì-sú chûn-oân bô-hoat-tō͘ tńg-khì Ìn-nî, í-keng tùi in ê sin sim kiān-khong chō-sêng hū-bīn éng-hióng. Ìn-nî Tāi-piáu-chhù mā liáu-kái Tâi-oân ūi-tio̍h khak-pó pian-kéng hông-e̍k an-choân ê chhù-kéng, Tâi-oân kan-taⁿ ū khài-hòng kok-chek chûn-chiah kah kò-jîn tâu-chu keng-êng ê chûn-chiah téng-bīn ê gōa-chek chûn-oân tī Tâi-oân chìn-hêng chûn-oân kau-ōaⁿ. Tān-sī Ín-nî Tāi-piáu-chhù iû-goân kî-thāi Tâi-oân chèng-hú ki-î jîn-tō hia̍p-chō͘ ê li̍p-tiûⁿ, ē-tàng pang-chō͘ Ìn-nî chûn-oân tńg-khì kò͘-hiong.

　　 Lán kok Gōa-kau-pō͘ chiap tio̍h thong-pò liáu-āu, siong-tong tiōng-sī chûn-oân ê hiān-khóng kah koân-ek, sûi-sî tiàu-khui khòa-pō͘ ē choan-àn hia̍p-tiau hōe-gī, lî-chheng siong-koan koân-chek liáu-āu géng-gí hia̍p-chō͘ hong-àn. Kin-kì "Hái-sū lô-kang kok-chè kong-iok" téng siong-koan kui-hoān, gōa-chek chûn-chiah téng-bīn ê gōa-chek chûn-oân tńg-khì in kok sū-gî sio̍k chûn-thâu-ke, chûn-kî-kok kah chûn-oân-kok ê chek-jīm. Lán kok tùi gōa-chek chûn-chiah téng-bīn ê gōa-chek chûn-oân bô koán-hat-koân, tān-sī ki-î pó-chiòng kok-chè jîn-koân kah lo̍k-si̍t jîn-tō oân-chō͘ cheng-sîn, lán kok chèng-hú tī e̍k-chêng giâm-chùn, hông-e̍k lêng-liōng iú-hān ê tiâu-kiāⁿ chi hā, iû-goân chhun-chhiú choân-le̍k hia̍p-chō͘ lâu tī hái-siōng í-keng chin kú ê Ìn-nî-chek chûn-oân tńg-khì in kok.

Keng-kòe Kau-thong-pō͘ Hâng-káng-kiokkah Gōa-kau-pō͘ ha̍p-chok kui-ōe, chèng-hú kok siong-koan pō͘-mn̂g kah gōa-chek chûn-chiah tī Tâi-oân ê chûn-bū tāi-lí gia̍p-chiá to pái hia̍p-siong, tī kiam-kò͘ tio̍h pian-kéng hông-e̍k an-choân kah jîn-tō būn-tê ê goân-chek chi hā, gí-tēng choan-àn. Chit-ê choan-àn seng chìn-hêng an-choân cha-giām liáu-āu, chiah í "Kòe-kéng put ji̍p-kéng" ê "hông-e̍k thong-tō" hong-sek chiūⁿ-hōaⁿ, múi chi̍t ūi lóng ū chhēng hông-hō͘ i-bō, chiah chiàu sūn-sī chē bah-suh chiân-óng Sió-káng Kok-chè Ki-tiûⁿ chē hui-ki, lán chèng-hú ū tōng-oân pah-gōa miâ kang-chok jîn-oân, sūn-lī hia̍p-chō͘ 105 miâ Ìn-nî-chek chûn-oân kah 16 miâ lâu tī Tâi-oân ê Ìn-nî kiâu-bîn, tī peh-goe̍h jī-cha̍p àm-sî cha̍p-it tiám chē Ìn -nî chèng-hú an-pâi ê choan-ki tńg-khì Ìn-nî. Tiong-iong Liû-hêng E̍k-chêng Chí-hui Tiong-sim Hù-chí-hui-koaⁿ Tân Chong-gān ū tī hiān-tiûⁿ sī-chhat khián-tńg chok-gia̍p chêng-hêng.

Tâi-oân kah Ìn-nî ha̍p-chok chip-hêng chit-ê choan-àn, lóng tông-ì siang-hong eng-kai chiam-tùi chûn-oân phèng-kò͘ kah siong-koan gī-tê chìn-hêng tùi-ōe, í thê-seng chûn-oân koân-ek. Bī-lâi Tâi-oân siong-koan pō͘-mn̂g mā ē i-hoat thàu-kòe káng-kháu-kok koán-chè, teng-kiám, khu-lī téng chok-hoat, î-hō͘ Tâi-oân chiu-piⁿ hái-e̍k ê tia̍t-sū kah an-lêng, tông-sî khak-pó gōa-chek chûn-oân tī gōa-kok-chek chûn-chiah téng-bīn ê khoân-lī, hó-hó chò chi̍t-ê kok-chè siā-hōe hū chek-jīm sêng-oân ê gī-bū.

Chit piàn sūn-lī pang-chō͘ Ìn-nî phiau-liû tī hái-siōng ê pah-gōa miâ chûn-oân sūn-lī tńg-khì Ìn-nî, hō͘ lán siūⁿ-khí kū-nî lán kā ka-kī seng-sán ê chhùi-am chēng-sàng hō͘ chiok su-iàu ê sè-kài kok-kok, lán kóng “Taiwan Can Help”"Tâi-oân ētàng pang-chō͘", chit kù ōe chit-má mā sī chin ê! (210827)


　　国际疫情相连sòa绁严峻，各国为tio̍h防疫安全，对船员上岸交换lóng采取严格ê边境管制，目前全世界大约有25万名船员留tī海上无法度顺利tńg去家己ê故乡，联合国kah国际海事组织等国际组织lóng有对che表示关心。

　　驻台北印尼经济贸易代表处（IETO）有对咱外交部反应，讲tī台湾附近海域有一只外国籍ê船只，船顶有真chē印尼籍船员虽然契约已经到期，但是因为船东kah船旗国bē-tàng处理好sè，致使船员无法度tńg去印尼，已经对inê身心健康造成负面影响。印尼代表处mā了解台湾为tio̍h确保边境防疫安全ê处境，台湾kan-taⁿ有开放国籍船只kah国人投资经营ê船只顶面ê外籍船员tī台湾进行船员交换。但是印尼代表处犹原期待台湾政府基于人道协助ê立场，会tàng帮助印尼船员tńg去故乡。

　　咱国外交部接tio̍h通报了后，相当重视船员ê现况kah权益，随时召开跨部会专案协调会议，厘清相关权责了后研拟协助方案。根据「海事劳工国际公约」等相关规范，外籍船只顶面ê外籍船员tńg去in国事宜属于船东、船旗国kah船员国ê责任。咱国对外籍船只顶面ê外籍船员无管辖权，但是基于保障国际人权kah落实人道援助精神，咱国政府tī疫情严峻、防疫量能有限ê条件之下，犹原伸手全力协助留tī海上已经真久ê印尼籍船员tńg去in国。

经过交通部航港局kah外交部合作规划，政府各相关部门kah外籍船只tī台湾ê船务代理业者多次协商，tī兼顾tio̍h边境防疫安全kah人道问题ê原则之下，拟定专案。Chit-ê专案先进行安全查验了后，才以「过境不入境」ê「防疫通道」方式上岸，每一位lóng有穿防护衣帽，才照顺序坐巴士前往小港国际机场坐飞机，咱政府有动员百外名工作人员，顺利协助105名印尼籍船员kah 16名留tī台湾ê印尼侨民，tī八月二十暗时十一点坐印尼政府安排ê专机tńg去印尼。中央流行疫情指挥中心副指挥官陈宗彦有tī现场视察遣tńg作业情形。

台湾kah印尼合作执行chit-ê专案，lóng同意双方应该针对船员聘雇kah相关议题进行对话，以提升船员权益。未来台湾相关部门mā会依法透过港口国管制、登检、驱离等作法，维护台湾周边海域ê秩序kah安宁，同时确保外籍船员tī外国籍船只顶面ê权利，好好做一个国际社会负责任成员ê义务。

Chit遍顺利帮助印尼漂流tī海上ê百外名船员顺利tńg去印尼，hō͘ 咱想起旧年咱kā家己生产ê嘴掩赠送hō͘足需要ê世界各国，咱讲“Taiwan Can Help”「台湾ētàng帮助」，chit句话chit-má mā是真ê！ (210827)