《绿色短评》

 | | | 转寄

Án-ne，你beh kā陈其迈注几分？

作者 李南衡, ChoânTâijī/全台字 by Chng Hūiphêng 2021.09.05

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　　　　　　　　　　　　　　 Lí Lâmhêng
　　　　　　　Ánne, lí beh kā Tân KÎmāi chù kúihun?

　　 Pehgoe̍h cha̍ppeh sinbûn pòtō,"Sin Tâioân kokchhek tìkhò͘ " chahng kongpò͘ Kohiông chhītiúⁿ Tân KÎmāi chiūjīm chi̍t nî bîntiāu, chéngthé boánìtō͘ koân kàu 71.1％, 69.3％ tùi Tân KÎmāi ū hókám, 57.8％ tôngì Tân KÎmāi sī í piàⁿmiā samlông chengsîn teh chhuitōng chhīchèng, 65.1％ chichhî i liânjīm.

　　 Lán te̍kpia̍t koansim Tân chhītiúⁿ tī Búhàn hìiām hôngtī ê piáuhiān siongtong koân, ū 83.5％ siūhóngchiá boánì. La̍kgoe̍h cha̍pgō͘, choânkok kok koānchhī ūi siōng kài nîlāu, 85 hòe ísiōng ê akong Amá chù e̍kbiâu, hoānnā ū sūsian choh miâchheh ê koānchhī lóng chiâⁿ sūnsī, sī ánchóaⁿ Kohiông chhī ē hông siōng kài oló? Inūi Kohiông chhī chiàu"Tiongiong liûhêng e̍kchêng chíhui tiongsim"só͘ kongpò͘ ê cha̍p tōalūi chùe̍kbiâu tùisiōng kah sūnsī, chi̍t lîn chi̍t lí chi̍t khu chi̍t khu sūsian kā miâchheh kah thongtitoaⁿ lóng chò hósè," Tiongiong chíhui tiongsim"chi̍tē kongpò͘ kúi goe̍h kúi ji̍t khaisí chù tē kúilūi bînchiòng e̍kbiâu, chhīchènghú thongti lí pānkongsek sûisî hoat thongti hō͘ kok lîn, choán hoat hō͘ kok hō͘. Thongtitoaⁿ téngbīn siá chhengchhó kúi goe̍h kúi ji̍t siōngngó͘ iahsī hāngó͘ kúitiám chì kúitiám kàu siáⁿmi̍h tiûⁿsó͘. Bô chhinchhiūⁿ Tâipakchhī kantaⁿ thongti siōngngó͘ iahsī hāngó͘, bo̍kkòai chi̍t tōatīn lāulâng thàuchá tio̍h khì pâilia̍t, koh hō͘ Koa Bûntiat chhītiúⁿ koài kóng, hiahchē lāulâng thàuchá lâi pâilia̍t chhòngsiáⁿ ? Nn̄gê chhī chi̍tē pí tio̍h chaiiáⁿ koânkē chhe chin chē. Jîchhiáⁿ Kohiông chhī sī Tâioân thâu chi̍tê chháṳōng Ji̍tpún "宇美町" sek chù e̍kbiâu, tio̍h sī "bînchiòng puttāng, ihō͘ tāng. " Bînchiòng chi̍tpâi chi̍tpâi kehkhui chē hósè bián sóa tāng, kín koh hósè, bo̍kkòai hông tōatōa oló, chinchē koānchhī mā kín tòe Kohiông chhī Ánne chò. Tâipak chhītiúⁿ Koa Bûntiat khòaⁿliáu chiâⁿ putpêng, soah kóng sī ánchóaⁿ "Tiongiong chíhui tiongsim" chi̍tē kongpò͘ khaisí chù e̍kbiâu, Kohiông chhī tio̍h sûisî ētàng hoat thongti ? Kîtiong ittēng ū lāisòaⁿ! Bô kóng, lán m̄chai iáⁿ Koa Bûntiat chhītiúⁿ thâukhak lāité khangkhang.

　　 Sinbûn pòtō kóng, Tân KÎmāi tī pehgoe̍h jīsì chhītiúⁿ chiūⁿjīm tio̍h móa chi̍t nî, píkàu i tútú chiūⁿjīm 100 kang ê sî, Tiongkok Kokbîntóng jīnûi i sèngtē siuⁿ kip, kā chù 43 hun, chitmá íkeng kā i thêseng kàu 60 hun, oló i si chín ūkàu jīnchin, bînchìntóng kah bô tóng liânbêng, mā hunpia̍t kā i chù 99 pun kah 70 pun ê hó sêngchek.

　　 Sinbûn pòtō kóng, Kohiông chhī Thôgoân khu “Minbaklu” kiô hō͘ “Lupit” hongthai tòalâi ê tōachúi chhiong tn̄g・khì, tùi gōa kauthong toānchoa̍t, Tân KÎmāi chhītiúⁿ chē ti̍tsengki khì khàmchai, jîchhiáⁿ chài chi̍tkóa kiùchai bu̍tchu khì soaⁿ・ni̍h. Tiongkok Kokbîntóng chek ê Kohiông chhīgīoân Lōa Bûntek kóng,"kîsi̍t kantaⁿ chit piàn “Lupit” hongthai, góa chhinba̍k khòaⁿtio̍h lán Tân chhītiúⁿ chhinsin lâi goán soaⁿ・ni̍h ū kúi piàn."Chit ūi goânchūbîn chhīgīoân tī chhīgīhōe chitsûn ê sî, khuichhùi tio̍hsī kámsiā chhītiúⁿ tùi goânhiong ê ló͘le̍k. I tùi Tân KÎmāi chhītiúⁿ kóng "goán kiⁿî ê kichhó͘ kiànsiat, chhītiúⁿ chiahni̍h ū phekle̍k, chi̍tpiàn tio̍h chēngka 500 bān, si̍tchāi chin kámsiā." púnsin sī Tiongkok Kokbîntóng chek ê chhīgīoân Lōa Bûntek tùi Tân chhītiúⁿ kóng, mênî chhītiúⁿ soánkí góa bētàng chichhî lí Tân chhītiúⁿ, tānsī, góa ē kiò góa saⁿê hāuseⁿ lóng soán hō͘ lí, lâi pòtap lí tùi goân_hiong ê thiàⁿsioh.

　　 Siatsú Tân KÎmāi sī lí ê chhītiúⁿ, lí beh kā i chù kúihun? 　　(210820)

Pe̍h-ōe-jī-pán/白话字版
《 Le̍k-sek toán-phêng 》　　　　　　　　　　　　　　　　 Lí Lâm-hêng
　　　　　　　Án-ne, lí beh kā Tân KÎ-māi chù kúi-hun?

　　 Peh-goe̍h cha̍p-peh sin-bûn pò-tō,"Sin Tâi-oân kok-chhek tì-khò͘ " cha-hng kong-pò͘ Ko-hiông chhī-tiúⁿ Tân KÎ-māi chiū-jīm chi̍t nî bîn-tiāu, chéng-thé boán-ì-tō͘ koân kàu 71.1％, 69.3％ tùi Tân KÎ-māi ū hó-kám, 57.8％ tông-ì Tân KÎ-māi sī í piàⁿ-miā sam-lông cheng-sîn teh chhui-tōng chhī-chèng, 65.1％ chi-chhî i liân-jīm.

　　 Lán te̍k-pia̍t koan-sim Tân chhī-tiúⁿ tī Bú-hàn hì-iām hông-tī ê piáu-hiān siong-tong koân, ū 83.5％ siū-hóng-chiá boán-ì. La̍k-goe̍h cha̍p-gō͘, choân-kok kok koān-chhī ūi siōng kài nî-lāu, 85 hòe í-siōng ê a-kong A-má chù e̍k-biâu, hoān-nā ū sū-sian choh miâ-chheh ê koān-chhī lóng chiâⁿ sūn-sī, sī án-chóaⁿ Ko-hiông chhī ē hông siōng kài o-ló? In-ūi Ko-hiông chhī chiàu"Tiong-iong liû-hêng e̍k-chêng chí-hui tiong-sim"só͘ kong-pò͘ ê cha̍p tōa-lūi chù-e̍k-biâu tùi-siōng kah sūn-sī, chi̍t lîn chi̍t lí chi̍t khu chi̍t khu sū-sian kā miâ-chheh kah thong-ti-toaⁿ lóng chò hó-sè," Tiong-iong chí-hui tiong-sim"chi̍t-ē kong-pò͘ kúi goe̍h kúi ji̍t khai-sí chù tē kúi-lūi bîn-chiòng e̍k-biâu, chhī-chèng-hú thong-ti lí pān-kong-sek sûi-sî hoat thong-ti hō͘ kok lîn, choán hoat hō͘ kok hō͘. Thong-ti-toaⁿ téng-bīn siá chheng-chhó kúi goe̍h kúi ji̍t siōng-ngó͘ iah-sī hā-ngó͘ kúi-tiám chì kúi-tiám kàu siáⁿ-mi̍h tiûⁿ-só͘. Bô chhin-chhiūⁿ Tâi-pak-chhī kan-taⁿ thong-ti siōng-ngó͘ iah-sī hā-ngó͘, bo̍k-kòai chi̍t tōa-tīn lāu-lâng thàu-chá tio̍h khì pâi-lia̍t, koh hō͘ Koa Bûn-tiat chhī-tiúⁿ koài kóng, hiah-chē lāu-lâng thàu-chá lâi pâi-lia̍t chhòng-siáⁿ ? Nn̄g-ê chhī chi̍t-ē pí tio̍h chai-iáⁿ koân-kē chhe chin chē. Jî-chhiáⁿ Ko-hiông chhī sī Tâi-oân thâu chi̍t-ê chhái-iōng Ji̍t-pún "宇美町" sek chù e̍k-biâu, tio̍h sī "bîn-chiòng put-tāng, i-hō͘ tāng. "Bîn-chiòng chi̍t-pâi chi̍t-pâi keh-khui chē hó-sè bián sóa tāng, kín koh hó-sè, bo̍k-kòai hông tōa-tōa o-ló, chin-chē koān-chhī mā kín tòe Ko-hiông chhī Án-ne chò. Tâi-pak chhī-tiúⁿ Koa Bûn-tiat khòaⁿ-liáu chiâⁿ put-pêng, soah kóng sī án-chóaⁿ "Tiong-iong chí-hui tiong-sim" chi̍t-ē kong-pò͘ khai-sí chù e̍k-biâu, Ko-hiông chhī tio̍h sûi-sî ē-tàng hoat thong-ti ? Kî-tiong it-tēng ū lāi-sòaⁿ! Bô kóng, lán m̄-chai iáⁿ Koa Bûn-tiat chhī-tiúⁿ thâu-khak lāi-té khang-khang.

　　 Sin-bûn pò-tō kóng, Tân KÎ-māi tī peh-goe̍h jī-sì chhī-tiúⁿ chiūⁿ-jīm tio̍h móa chi̍t nî, pí-kàu i tú-tú chiūⁿ-jīm 100 kang ê sî, Tiong-kok Kok-bîn-tóng jīn-ûi i sèng-tē siuⁿ kip, kā chù 43 hun, chit-má í-keng kā i thê-seng kàu 60 hun, o-ló i si chín ū-kàu jīn-chin, bîn-chìn-tóng kah bô tóng liân-bêng, mā hun-pia̍t kā i chù 99 pun kah 70 pun ê hó sêng-chek.

　　 Sin-bûn pò-tō kóng, Ko-hiông chhī Thô-goân khu “Minbaklu” kiô hō͘ “Lupit” hong-thai tòa-lâi ê tōa-chúi chhiong tn̄g・khì, tùi gōa kau-thong toān-choa̍t, Tân KÎ-māi chhī-tiúⁿ chē ti̍t-seng-ki khì khàm-chai, jî-chhiáⁿ chài chi̍t-kóa kiù-chai bu̍t-chu khì soaⁿ・ni̍h. Tiong-kok Kok-bîn-tóng chek ê Ko-hiông chhī-gī-oân Lōa Bûn-tek kóng,"kî-si̍t kan-taⁿ chit piàn “Lupit” hong-thai, góa chhin-ba̍k khòaⁿ-tio̍h lán Tân chhī-tiúⁿ chhin-sin lâi goán soaⁿ・ni̍h ū kúi piàn."Chit ūi goân-chū-bîn chhī-gī-oân tī chhī-gī-hōe chit-sûn ê sî, khui-chhùi tio̍h-sī kám-siā chhī-tiúⁿ tùi goân-hiong ê ló͘-le̍k. I tùi Tân KÎ-māi chhī-tiúⁿ kóng "goán kin-nî ê ki-chhó͘ kiàn-siat, chhī-tiúⁿ chiah-ni̍h ū phek-le̍k, chi̍t-piàn tio̍h chēng-ka 500 bān, si̍t-chāi chin kám-siā." pún-sin sī Tiong-kok Kok-bîn-tóng chek ê chhī-gī-oân Lōa Bûn-tek tùi Tân chhī-tiúⁿ kóng, mê-nî chhī-tiúⁿ soán-kí góa bē-tàng chi-chhî lí Tân chhī-tiúⁿ, tān-sī, góa ē kiò góa saⁿ-ê hāu-seⁿ lóng soán hō͘ lí, lâi pò-tap lí tùi goân_hiong ê thiàⁿ-sioh.

　　 Siat-sú Tân KÎ-māi sī lí ê chhī-tiúⁿ, lí beh kā i chù kúi-hun? 　　(210820)


　　八月十八新闻报导，「新台湾国策智库」cha-hng公布高雄市长陈其迈就任一年民调，整体满意度koân到71.1％，69.3％对陈其迈有好感，57.8％同意陈其迈是以拚命三郎精神teh推动市政，65.1％支持伊连任。

　　咱特别关心陈市长tī武汉肺炎防治ê表现相当koân，有83.5％受访者满意。六月十五，全国各县市为上kài年老、85岁以上ê阿公阿妈注疫苗，凡若有事先作名册ê县市lóng chiâⁿ顺序，是按怎高雄市会hông上kàio-ló？因为高雄市照「中央流行疫情指挥中心」所公布ê十大类注疫苗对象kah顺序，一邻一里一区一区事先kā名册kah通知单lóng做好势，「中央指挥中心」一下公布几月几日开始注第几类民众疫苗，市政府通知里办公室随时发通知hō͘各邻、转发hō͘各户。通知单顶面写清楚几月几日上午iah是下午几点至几点到啥物场所。无亲像台北市kan-taⁿ通知上午iah是下午，莫怪一大阵老人透早tio̍h去排列，koh hō͘ 柯文哲市长怪讲，hiahchē老人透早来排列创啥？两个市一下比tio̍h 知影koân低差真chē。而且高雄市是台湾头一个采用日本「宇美町」式注疫苗，tio̍h是「民众不动，医护动。」民众一排一排隔开坐好势免徙动，紧koh好势，莫怪hông大大o-ló，真chē县市mā紧tòe高雄市Án-ne做。台北市长柯文哲看了chiâⁿ不平，soah讲是按怎「中央指挥中心」一下公布开始注疫苗，高雄市tio̍h随时会tàng发通知？其中一定有内线！无讲，咱m̄知影柯文哲市长头壳内底空空。

　　新闻报导讲，陈其迈tī八月二四市长上任tio̍h满一年，比较伊抵抵上任100工ê时，中国国民党认为伊性地siuⁿ急，kā注43分，chit-má已经kā伊提升到60分，o-ló伊施政有够认真，民进党kah无党联盟，mā分别kā伊注99分kah 70分ê好成绩。

　　新闻报导讲，高雄市桃源区明霸克露桥hō͘卢碧风台带来ê大水冲断去，对外交通断绝，陈其迈市长坐直升机去勘灾，而且载一寡救灾物资去山里。中国国民党籍ê高雄市议员赖文德讲，「其实kan-taⁿchit遍卢碧风台，我亲目看tio̍h咱陈市长亲身来阮山里有几遍。」Chit位原住民市议员tī市议会质询ê时，开嘴tio̍h是感谢市长对原乡ê努力。伊对陈其迈市长讲「阮今年ê基础建设，市长chiah-ni̍h有魄力，一遍tio̍h增加500万，实在真感谢。」本身是中国国民党籍ê市议员赖文德对陈市长讲，明年市长选举我bē-tàng支持你陈市长，但是，我ē叫我三个后生lóng选hō͘你，来报答你对原乡ê疼惜。

　　设使陈其迈是你ê市长，你beh kā伊注几分？　　(210820)