《绿色短评》

 | | | 转寄

奥运会选手奖牌领了，续落去leh？

作者 李南衡, ChoânTâijī/全台字 by Chng Hūiphêng 2021.08.29

Choânbîn Tâioânjī pán/全民台湾字版简称ChoânTâiJī
《 Le̍ksek toánphêng 》　　　　　　　　　 Lí Lâmhêng
　　　　　Òūnhōe soánchhiú chióng pâi niá liáu, sòa lo̍hkhì leh?

　　 Chit piàn Tangkiaⁿ Òūnhōe tī pehgoe̍h chhepeh oânboán pìbō͘. Lán khòaⁿtio̍h múi chi̍t hāngba̍k, keklia̍t piàⁿ chhut choân sèkài siōng kiông ê chêng saⁿ miâ tittio̍h chióng pâi ê soánchhiú, ta̍ttit lán kā chunkèng phòeho̍k. In khiā tī tâi téng, chiapsiū panchióng ê sî, hōetiûⁿ seng kiò chhut soánchhiú ê kokmiâ, sengkhí soánchhiú ê kokkî, tôngsî iánchàu in ê kokkoa, sī hôténg ê kongêng. Lēgōa ê sī lán Tâioân soánchhiú tittio̍h iusèng panchióng ê sî, kiò chhut hithō m̄chiâⁿ kok iâ ê Tionghôa Tāipak, sengkhí hithō m̄chiâⁿ kokkî ê óaⁿko kî, iánchàu hithō m̄chiâⁿ kokkoa ê óaⁿko koa.

　　 Kokchè Olympic úigoânhōe tûliáu panhoat kimpâi, gînpâi, tângpâi ígōa, bô jīmhô chióngkim. Iusèng ê soánchhiú chióngpâi niá liáu, chiapsiū ê bô chhiūⁿ óngnî o͘khâmkhâm koanchiòng ê hoanho͘ kah phah phoká, kiⁿî e̍kchêng koanhē, hiāntiûⁿ koanchiòng bô kúiê. Chióngpâi niá liáu sòa lo̍hkhì leh?

Iusèng ê soánchhiú tńgkhì kò͘hiong, thènghāu in ê sī inkok chènghú kah in tôngpau jia̍tchêng ê gêngchiap kah bu̍tchit siōng ê kó͘lē. Siōng si̍tchāi ê bu̍tchit siōng kó͘lē sī hiānkim. Thiaⁿkóng chióngkim siōng koân ê sī Sinkapho, Òūnhōe tit kimpâi chióngkim 74 bān 4 chheng bíkim iok sin tâipè 2,083 bān, gînpâi chióngkim 37 bān 2 chheng bíkim iok sintâipè 1,041 bān, tângpâi chióngkim 28 bān 6 chheng bíkim iok sin tâipè 800 bān. Tâioân kah sèkài kok kok ē píphēngtit, kimpâi chióngkim sintâipè 2,000 bān, gînpâi sin tâipè 750 bān, tângpâi sin tâipè 500 bān.

Huilu̍tpin ê Hitilin Tiachu（Hidilyn Diaz）, tī lúchú 55 kongkin kip giâ tāng písài tiong toa̍ttio̍h kimpâi, Huilu̍tpin choân kok hoaⁿhí kah chhù kòa beh giâ tiāu, inūi i tittio̍h Huilu̍tpin le̍ksú siōng tēit bīn Òūn kimpâi, hông chúnchoh kokka enghiông, Huilu̍tpin chóngthóng phah tiānōe chiokhō chhinchhùi tapèng i kòjîn kah chènghú ê siúⁿkim lóngchóng ū 60 bān bíkim iok sintâipè 1,680 bān ê chiónglē, lēnggōa sàng i chi̍t keng konggū. Ū nn̄gūi senglí lâng tapèng sàng i 1,500 bān Piso iok sintâipè 750 bān koh chi̍t keng pia̍tchong.

Múi chi̍t kok ê chiónglē bô kângkhoán, Gôlôsu ê soánchhiú nā Òūn tittio̍h chióng pâi, bô tējī kù ōe, seng sàng chi̍t tâi kiauchhia, tongjiân kimgîntâng pâi só͘ sàng ê chhia ū chhapia̍t. Iáu ū chhùthe̍h kah chióngkim chióngchióng ê chiónglē. Khah kîkhiáu ê sī Lâmhui, 2012 nî Lûntun Òūnhōe tittio̍h lâmchú khinliōngkip sìlâng sáitêng hāngbo̍k koankun, múi chi̍tê lâng tittio̍h chi̍t chiah gûbó, sī chi̍t ūi senglí lâng só͘ sàng ê.

　　 Chióng pâi niá liáu, siúⁿkim chióngphín niá liáu, sòa lo̍hkhì leh? Káⁿ ū lâng siūⁿtio̍h ūntōng soánchhiú ê chionglâi?

　　 Sinbûn pòtō, Tiongkok chêng théchhau kokchhiú TiuⁿSiōngbú , 2001 nî tī sèkài tāiha̍k ūntōnghōe théchhau hāngbo̍k ūi Tiongkok tittio̍h nn̄g bīn kimpâi, āulâi kha siūsiong, jînseng chū ánne oânchoân tōa káipiàn, i tûliáu théchhau ígōa, bô pa̍t hāng kilêng, tìsú līkhui thétôaⁿ liáuāu, tī chènglâng bīnchêng piáuián kántan ê théchhau tōngchok, tán lâng siúⁿ i kúi sián chîⁿ, kóng khah hóthiaⁿ kiò choh "kethâu gējîn", sūsi̍t siōng téngî sī khitchia̍h.

　　 Lán kîthāi lán ê ūntōnggoân tī āupiàn ê Òūnhōe ū hó ê sêngchek, lán koh khah kîthāi lán ê chènghú ētàng hóhó kuiōe, ánchóaⁿ pangchō͘ ūntōnggoân ê chionglâi. Tongjiân, hoangêng ū sim ê khìgia̍p thoânthé mā ēsái chhamú. Íbián ta̍k piàn Òūnhōe liáu, tio̍h mn̄g kóng, Òūnhōe soánchhiú chióngpâi niá liáu, sòa lo̍hkhì leh? (210811)

Pe̍h-ōe-jī-pán/白话字版
《 Le̍k-sek toán-phêng 》　　　　　　　　　 Lí Lâm-hêng
　　　　　Ò-ūn-hōe soán-chhiú chióng pâi niá liáu, sòa lo̍h-khì leh?

　　 Chit piàn Tang-kiaⁿ Ò-ūn-hōe tī peh-goe̍h chhe-peh oân-boán pì-bō͘. Lán khòaⁿ-tio̍h múi chi̍t hāng-ba̍k, kek-lia̍t piàⁿ chhut choân sè-kài siōng kiông ê chêng saⁿ miâ tit-tio̍h chióng pâi ê soán-chhiú, ta̍t-tit lán kā chun-kèng phòe-ho̍k. In khiā tī tâi téng, chiap-siū pan-chióng ê sî, hōe-tiûⁿ seng kiò chhut soán-chhiú ê kok-miâ, seng-khí soán-chhiú ê kok-kî, tông-sî ián-chàu in ê kok-koa, sī hô-téng ê kong-êng. Lē-gōa ê sī lán Tâi-oân soán-chhiú tit-tio̍h iu-sèng pan-chióng ê sî, kiò chhut hit-hō m̄-chiâⁿ kok -iâ ê Tiong-hôa Tāi-pak, seng-khí hit-hō m̄-chiâⁿ kok-kî ê óaⁿ-ko kî, ián-chàu hit-hō m̄-chiâⁿ kok-koa ê óaⁿ-ko koa.

　　 Kok-chè Olympic úi-goân-hōe tû-liáu pan-hoat kim-pâi, gîn-pâi, tâng-pâi í-gōa, bô jīm-hô chióng-kim. Iu-sèng ê soán-chhiú chióng-pâi niá liáu, chiap-siū ê bô chhiūⁿ óng-nî o͘-khâm-khâm koan-chiòng ê hoan-ho͘ kah phah phok-á, kin-nî e̍k-chêng koan-hē, hiān-tiûⁿ koan-chiòng bô kúi-ê. Chióng-pâi niá liáu sòa lo̍h-khì leh?

Iu-sèng ê soán-chhiú tńg-khì kò͘-hiong, thèng-hāu in ê sī in-kok chèng-hú kah in tông-pau jia̍t-chêng ê gêng-chiap kah bu̍t-chit siōng ê kó͘-lē. Siōng si̍t-chāi ê bu̍t-chit siōng kó͘-lē sī hiān-kim. Thiaⁿ-kóng chióng-kim siōng koân ê sī Sin-ka-pho, Ò-ūn-hōe tit kim-pâi chióng-kim 74 bān 4 chheng bí-kim iok sin- tâi-pè 2,083 bān, gîn-pâi chióng-kim 37 bān 2 chheng bí-kim iok sin-tâi-pè 1,041 bān, tâng-pâi chióng-kim 28 bān 6 chheng bí-kim iok sin tâi-pè 800 bān. Tâi-oân kah sè-kài kok kok ē pí-phēng-tit, kim-pâi chióng-kim sin-tâi-pè 2,000 bān, gîn-pâi sin tâi-pè 750 bān, tâng-pâi sin tâi-pè 500 bān.

Hui-lu̍t-pin ê Hitilin Tiachu（Hidilyn Diaz）, tī lú-chú 55 kong-kin kip giâ tāng pí-sài tiong toa̍t-tio̍h kim-pâi, Hui-lu̍t-pin choân kok hoaⁿ-hí kah chhù- kòa beh giâ tiāu, in-ūi i tit-tio̍h Hui-lu̍t-pin le̍k-sú siōng tē-it bīn Ò-ūn kim-pâi, hông chún-choh kok-ka eng-hiông, Hui-lu̍t-pin chóng-thóng phah tiān-ōe chiok-hō chhin-chhùi tap-èng i kò-jîn kah chèng-hú ê siúⁿ-kim lóng-chóng ū 60 bān bí-kim iok sin-tâi-pè 1,680 bān ê chióng-lē, lēng-gōa sàng i chi̍t keng kong-gū. Ū nn̄g-ūi seng-lí lâng tap-èng sàng i 1,500 bān Piso iok sin-tâi-pè 750 bān koh chi̍t keng pia̍t-chong.

Múi chi̍t kok ê chióng-lē bô kâng-khoán, Gô-lô-su ê soán-chhiú nā Ò-ūn tit-tio̍h chióng pâi, bô tē-jī kù ōe, seng sàng chi̍t tâi kiau-chhia, tong-jiân kim-gîn-tâng pâi só͘ sàng ê chhia ū chha-pia̍t. Iáu ū chhù-the̍h kah chióng-kim chióng-chióng ê chióng-lē. Khah kî-khiáu ê sī Lâm-hui, 2012 nî Lûn-tun Ò-ūn-hōe tit-tio̍h lâm-chú khin-liōng-kip sì-lâng sái-têng hāng-bo̍k koan-kun, múi chi̍t-ê lâng tit-tio̍h chi̍t chiah gû-bó, sī chi̍t ūi seng-lí lâng só͘ sàng ê.

　　 Chióng pâi niá liáu, siúⁿ-kim chióng-phín niá liáu, sòa lo̍h-khì leh? Káⁿ ū lâng siūⁿ-tio̍h ūn-tōng soán-chhiú ê chiong-lâi?

　　 Sin-bûn pò-tō, Tiong-kok chêng thé-chhau kok-chhiú TiuⁿSiōng-bú , 2001 nî tī sè-kài tāi-ha̍k ūn-tōng-hōe thé-chhau hāng-bo̍k ūi Tiong-kok tit-tio̍h nn̄g bīn kim-pâi, āu-lâi kha siū-siong, jîn-seng chū án-ne oân-choân tōa kái-piàn, i tû-liáu thé-chhau í-gōa, bô pa̍t hāng ki-lêng, tì-sú lī-khui thé-tôaⁿ liáu-āu, tī chèng-lâng bīn-chêng piáu-ián kán-tan ê thé-chhau tōng-chok, tán lâng siúⁿ i kúi sián chîⁿ, kóng khah hó-thiaⁿ kiò choh "ke-thâu gē-jîn", sū-si̍t siōng téng-î sī khit-chia̍h.

　　 Lán kî-thāi lán ê ūn-tōng-goân tī āu-piàn ê Ò-ūn-hōe ū hó ê sêng-chek, lán koh khah kî-thāi lán ê chèng-hú ē-tàng hó-hó kui-ōe, án-chóaⁿ pang-chō͘ ūn-tōng-goân ê chiong-lâi. Tong-jiân, hoan-gêng ū sim ê khì-gia̍p thoân-thé mā ē-sái chham-ú. Í-bián ta̍k piàn Ò-ūn-hōe liáu, tio̍h mn̄g kóng, Ò-ūn-hōe soán-chhiú chióng-pâi niá liáu, sòa lo̍h-khì leh? (210811)


　　Chit遍东京奥运会tī八月初八圆满闭幕。咱看tio̍h每一项目，激烈拼出全世界上强ê前三名得tio̍h奖牌ê选手，值得咱kā尊敬佩服。Inkhiā tī台顶，接受颁奖ê时，会场先叫出选手ê国名、升起选手ê国旗、同时演奏inê国歌，是何等ê光荣。例外ê是咱台湾选手得tio̍h优胜颁奖ê时，叫出hit号m̄成国名ê中华台北、升起hit号m̄成国旗ê碗糕旗、演奏hit号m̄成国歌ê碗糕歌。

　　国际Olympic委员会除了颁发金牌、银牌、铜牌以外，无任何奖金。优胜ê选手奖牌领了，接受ê无像往年乌khâm-khâm观众ê欢呼kah拍phok-á，今年疫情关系，现场观众无几个。奖牌领了续落去leh？

优胜ê选手转去故乡，等候inê是in国政府kah in同胞热情ê迎接kah物质上ê鼓励。上实在ê物质上鼓励是现金。听讲奖金上koânê是新加坡，奥运会得金牌奖金74万4千美金约新台币2,083万，银牌奖金37万2千美金约新台币1,041万，铜牌奬金28万6千美金约新台币800万。台湾kah世界各国ē比phēng得，金牌奖金新台币2,000万，银牌新台币750万，铜牌新台币500万。

菲律宾ê Hitilin Tiachu（Hidilyn Diaz），tī女子55公斤级giâ重比赛中夺tio̍h金牌，菲侓宾全国欢喜kah厝kòa behgiâ掉，因为伊得tio̍h菲律宾历史上第一面奥运金牌，hông准作国家英雄，菲律宾总统拍电话祝贺亲嘴答应伊个人kah政府ê赏金lóng总有60万美金约新台币1,680万ê奖励，另外送伊一间公寓。有两位生理人答应送伊1,500万Piso约新台币750万koh一间别chong。

每一国ê奖励无仝款，俄罗斯ê选手若奥运得tio̍h奖牌，无第二句话，先送一台轿车，当然金银铜牌所送ê车有差别。犹有厝宅kah奖金种种ê奖励。Khah奇巧ê是南非，2012年伦敦奥运会得tio̍h男子轻量级四人赛艇项目冠军，每一个人得tio̍h 一只牛母，是一位生理人所送ê。

　　奖牌领了，赏金奖品领了，续落去leh？敢有人想tio̍h运动选手ê将来？

　　新闻报导，中国前体操国手张尚武，2001年tī世界大学运动会体操项目为中国得tio̍h两面金牌，后来脚受伤，人生自án-ne完全大改变，伊除了体操以外，无别项技能，致使离开体坛了后，tī众人面前表演简单ê体操动作，等人赏伊几sián钱，讲khah好听叫作「街头艺人」，事实上等于是乞食。

　　咱期待咱ê运动员tī后遍ê奥运会有好ê成绩，咱koh khah期待咱ê政府ētàng好好规画，按怎帮助运动员ê将来。当然，欢迎有心ê企业团体māē使参与。以免ta̍k遍奥运会了，tio̍h问讲：奥运会选手奖牌领了，续落去leh？ (210811)