《绿色短评》

 | | | 转寄

萧美琴坚强上súi ê身影

作者 李南衡, ChoânTâijī/全台字 by Chng Hūiphêng 2021.07.11

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng
Siau Bíkhîm kiankiông siōng súi ê siniáⁿ
　　 Kiⁿî gō͘・goe̍h khaisí, Tâioân bīntùi sin chi̍tpho e̍kchêng ê thiauchiàn, kasiōng lán hiòng gōakok tēng 2,000 bān che e̍kbiâu kiòngèng chin bô úntēng ê chênghóng chi hā, Bíkok, Ji̍tpún nn̄gê Tâioân tiōngiàu ê bînchú tângphōaⁿ, chiok chhengchhó Tiongkok sūnsè beh bē, beh sàng Tiongkok e̍kbiâu hō͘ Tâioân, pek Tâioân tī "chi̍tê Tiongkok" ēbīn súiōng Tiongkok e̍kbiâu; tī Tâioân ê Nâpe̍htóng chhiò Tâioân chènghú bé bô e̍kbiâu, lāisîn thong gōakúi, chèchō Tâioân jînbîn ê hoânló putan, pek Tâioân chiapsiū Tiongkok e̍kbiâu.

Ji̍tpún kah Bíkok khòaⁿ chāi gánlāi, cheksî hiòng lán chhunchhut oânchō͘. Ji̍tpún kóaⁿkín chài 124 bān che e̍kbiâu lâi kiù kip, Bíkok saⁿ ūi chhamgīoân choankang chē Bíkok kunki lâi Siôngsan, soanpò͘ Bíkok beh sàng Tâioân 75 bān che e̍kbiâu, chin kín tio̍h ē ūn lâi.

Chit tiongkan, ū gōakau thoântūi ê ló͘le̍k, ū Tâikiâu ê cháuchông, ū Bíkok kokhōe kah kokkài khòa tóngphài thēngkàuté; tī kòethêngtiong, Chhòa Engbûn chóngthóng itti̍t chútōng hiòng Bíhong chengchhú, piáuta̍t Tâioân kah sèkài chin chē kokka kāngkhoán, lóng tôngsî tú tio̍h e̍kchêng thiauchiàn kah e̍kbiâu kiòngèng bô úntēng ê khùnkéng, Tâioân chiok suiàu kohkhah chē e̍kbiâu, Tâioân suiàu bînchú tângphōaⁿ kohkhah tōa ê chichhî le̍kliōng. Chhòa Engbûn chóngthóng ēsái kóng sī bômê bôji̍t kah ChùbÍ tāipiáu Siau Bíkhîm thong tiānōe, sûisî ti̍tchiap hē chílēng, tôngsî Siau Bíkhîm tāipiáu pòaⁿmê mā phah tiānōe hiòng chóngthóng pòkò siōng sin ê chìntián.

Bíkok hutjiânkan soanpò͘ beh sàng Tâioân 250 bān che Mótenah e̍kbiâu, sī la̍kgoe̍h chhela̍k soanpò͘ beh sàng lán Tâioân 75 bān che ê saⁿ pōe gōa. Bíkok chènghú kā Siau Bíkhîm tāipiáu kóng, nā chiàu itpoaⁿ thêngsū suiàu chin chē kang, nā beh ài kín tio̍h chhinsin khì Thénási chiu ê Munhoesu niá hòe. Siau Bíkhîm tāipiáu tongjiân chaiiáⁿ chá chi̍tji̍t chá chi̍tji̍t hó, chá chi̍ttiámcheng chá chi̍ttiámcheng hó, i bô tējī kù ōe, sûisî chhinsin piàⁿ khì niá hòe, jîchhiáⁿ chhinba̍k khòaⁿ só͘ū ê e̍kbiâu sàng khí khì Tionghôa hângkhong hòeūnki téng.

　　 La̍kgoe̍h cha̍pkáu, Bíkok Kokbūīⁿ hoatgiânjîn Phúlaisuh（Ned Price）piáusī, e̍kbiâu íkeng sūnlī tengki, ītēng ē tī bînáchài pe kàu Tâioân. I tī Twitter hoatbûn í "khí poe loh!" ê jīgán lâi soatbêng chit piàn sàng Tâioân e̍kbiâu ê henghùn chi chêng, bûn tiong ū the̍h kàu Bíkok koansàng 250 bān che Mótenah e̍kbiâu hō͘ Tâioân, chitmá íkeng sūnlī ūn sàngchhut khì ah. Phúlaisuh koh tī bûn tiong thêkhí, hibāng thàukòe Tâioân kah Bíkok ê kongkiōng ōeseng tângphōaⁿ koanhē, ē táng káikiù sèkài kok tē ê sèⁿmiā, Bíkok Kokbū īⁿ chin hoaⁿhí ētàng chichhî si̍thiān Pe̍hkiong piàⁿla̍t tī pangchō͘ sèkài chiànsèng “COVID19”（Búhàn hìiām）e̍kchêng ê sênglo̍k. Phúlaisuh tī bûn tiong te̍kpia̍t tah chi̍t tiuⁿ lán kok Chùbí tāipiáu Siau Bíkhîm ê siòngphìⁿ, i khiā tī thêngkipêng khòaⁿ e̍kbiâu ūnsàng khí khì Tionghôa hângkhong hòeki ê kui ê kòethêng, chiokchiok ū la̍k tiámcheng. I te̍kpia̍t kā Siau Bíkhîm tāipiáu ê siniáⁿ hip・ lo̍h・lâi pho͘ hō͘ ta̍kê khòaⁿ.

　　 Lán só͘ū ê Tâioânlâng khòaⁿtio̍h Siau Bíkhîm khiā tī thêngkipêng ê siniáⁿ, si̍tchāi chin m̄kam. Sūsi̍t siōng lán khòaⁿtio̍h・ê sī Siau Bíkhîm kiankiông, siōng súi ê siniáⁿ! (210625)

Pe̍h-ōe-jī-pán/白话字版
《 Le̍k-sek toán-phêng 》 Lí Lâm-hêng
Siau Bí-khîm kian-kiông siōng súi ê sin-iáⁿ
　　 Kin-nî gō͘-・goe̍h khai-sí, Tâi-oân bīn-tùi sin chi̍t-pho e̍k-chêng ê thiau-chiàn, ka-siōng lán hiòng gōa-kok tēng 2,000 bān che e̍k-biâu kiòng-èng chin bô ún-tēng ê chêng-hóng chi hā, Bí-kok, Ji̍t-pún nn̄g-ê Tâi-oân tiōng-iàu ê bîn-chú tâng-phōaⁿ, chiok chheng-chhó Tiong-kok sūn-sè beh bē, beh sàng Tiong-kok e̍k-biâu hō͘ Tâi-oân, pek Tâi-oân tī "chi̍t-ê Tiong-kok" ē-bīn sú-iōng Tiong-kok e̍k-biâu; tī Tâi-oân ê Nâ-pe̍h-tóng chhiò Tâi-oân chèng-hú bé bô e̍k-biâu, lāi-sîn thong gōa-kúi, chè-chō Tâi-oân jîn-bîn ê hoân-ló put-an, pek Tâi-oân chiap-siū Tiong-kok e̍k-biâu.

Ji̍t-pún kah Bí-kok khòaⁿ chāi gán-lāi, chek-sî hiòng lán chhun-chhut oân-chō͘. Ji̍t-pún kóaⁿ-kín chài 124 bān che e̍k-biâu lâi kiù kip, Bí-kok saⁿ ūi chham-gī-oân choan-kang chē Bí-kok kun-ki lâi Siông-san, soan-pò͘ Bí-kok beh sàng Tâi-oân 75 bān che e̍k-biâu, chin kín tio̍h ē ūn lâi.

Chit tiong-kan, ū gōa-kau thoân-tūi ê ló͘-le̍k, ū Tâi-kiâu ê cháu-chông, ū Bí-kok kok-hōe kah kok-kài khòa tóng-phài thēng-kàu-té; tī kòe-thêng-tiong, Chhòa Eng-bûn chóng-thóng it-ti̍t chú-tōng hiòng Bí-hong cheng-chhú, piáu-ta̍t Tâi-oân kah sè-kài chin chē kok-ka kāng-khoán, lóng tông-sî tú tio̍h e̍k-chêng thiau-chiàn kah e̍k-biâu kiòng-èng bô ún-tēng ê khùn-kéng, Tâi-oân chiok su-iàu koh-khah chē e̍k-biâu, Tâi-oân su-iàu bîn-chú tâng-phōaⁿ koh-khah tōa ê chi-chhî le̍k-liōng. Chhòa Eng-bûn chóng-thóng ē-sái kóng sī bô-mê bô-ji̍t kah Chù-bÍ tāi-piáu Siau Bí-khîm thong tiān-ōe, sûi-sî ti̍t-chiap hē chí-lēng, tông-sî Siau Bí-khîm tāi-piáu pòaⁿ-mê mā phah tiān-ōe hiòng chóng-thóng pò-kò siōng sin ê chìn-tián.

Bí-kok hut-jiân-kan soan-pò͘ beh sàng Tâi-oân 250 bān che Mó-te-nah e̍k-biâu, sī la̍k-goe̍h chhe-la̍k soan-pò͘ beh sàng lán Tâi-oân 75 bān che ê saⁿ pōe gōa. Bí-kok chèng-hú kā Siau Bí-khîm tāi-piáu kóng, nā chiàu it-poaⁿ thêng-sū su-iàu chin chē kang, nā beh ài kín tio̍h chhin-sin khì Thé-ná-si chiu ê Munhoesu niá hòe. Siau Bí-khîm tāi-piáu tong-jiân chai-iáⁿ chá chi̍t-ji̍t chá chi̍t-ji̍t hó, chá chi̍t-tiám-cheng chá chi̍t-tiám-cheng hó, i bô tē-jī kù ōe, sûi-sî chhin-sin piàⁿ khì niá hòe, jî-chhiáⁿ chhin-ba̍k khòaⁿ só͘-ū ê e̍k-biâu sàng khí khì Tiong-hôa hâng-khong hòe-ūn-ki téng.

　　 La̍k-goe̍h cha̍p-káu, Bí-kok Kok-bū-īⁿ hoat-giân-jîn Phú-laisuh（Ned Price）piáu-sī, e̍k-biâu í-keng sūn-lī teng-ki, ī-tēng ē tī bîn-á-chài pe kàu Tâi-oân. I tī Twitter hoat-bûn í "khí poe loh!" ê jī-gán lâi soat-bêng chit piàn sàng Tâi-oân e̍k-biâu ê heng-hùn chi chêng, bûn tiong ū the̍h kàu Bí-kok koan-sàng 250 bān che Mó-te-nah e̍k-biâu hō͘ Tâi-oân, chit-má í-keng sūn-lī ūn sàng-chhut khì ah. Phú-laisuh koh tī bûn tiong thê-khí, hi-bāng thàu-kòe Tâi-oân kah Bí-kok ê kong-kiōng ōe-seng tâng-phōaⁿ koan-hē, ē táng kái-kiù sè-kài kok tē ê sèⁿ-miā, Bí-kok Kok-bū- īⁿ chin hoaⁿ-hí ē-tàng chi-chhî si̍t-hiān Pe̍h-kiong piàⁿ-la̍t tī pang-chō͘ sè-kài chiàn-sèng “COVID-19”（Bú-hàn hì-iām）e̍k-chêng ê sêng-lo̍k. Phú-laisuh tī bûn tiong te̍k-pia̍t tah chi̍t tiuⁿ lán kok Chù-bí tāi-piáu Siau Bí-khîm ê siòng-phìⁿ, i khiā tī thêng-ki-pêng khòaⁿ e̍k-biâu ūn-sàng khí khì Tiong-hôa hâng-khong hòe-ki ê kui ê kòe-thêng, chiok-chiok ū la̍k tiám-cheng. I te̍k-pia̍t kā Siau Bí-khîm tāi-piáu ê sin-iáⁿ hip・ lo̍h・lâi pho͘ hō͘ ta̍k-ê khòaⁿ.

　　 Lán só͘-ū ê Tâi-oân-lâng khòaⁿ-tio̍h Siau Bí-khîm khiā tī thêng-ki-pêng ê sin-iáⁿ, si̍t-chāi chin m̄-kam. Sū-si̍t siōng lán khòaⁿ-tio̍h-・ê sī Siau Bí-khîm kian-kiông, siōng súi ê sin-iáⁿ! (210625)


　　今年五月开始，台湾面对新一波疫情ê挑战，加上咱向外国订2,000万剂疫苗供应真无稳定ê情况之下，美国、日本两个台湾重要ê民主同伴，足清楚中国顺势beh卖、beh送中国疫苗hō͘台湾，逼台湾tī「一个中国」下面使用中国疫苗；tī台湾ê蓝白党笑台湾政府买无疫苗，内神通外鬼，制造台湾人民ê烦恼不安，逼台湾接受中国疫苗。

日本kah美国看在眼内，即时向咱伸出援助。日本赶紧载124万剂疫苗来救急，美国三位参议员专工坐美国军机来松山，宣布美国beh送台湾75万剂疫苗，真紧tio̍h会运来。

Chit中间，有外交团队ê努力，有台侨ê走chông，有美国国会kah各界跨党派挺到底；tī过程中，蔡英文总统一直主动向美方争取，表达台湾kah世界真chē国家仝款，lóng同时抵tio̍h疫情挑战kah疫苗供应无稳定ê困境，台湾足需要koh-khah chē疫苗，台湾需要民主同伴koh-khah大ê支持力量。蔡英文总统ē-sái讲是无暝无日kah驻美代表萧美琴通电话，随时直接下达指令，同时萧美琴代表半暝mā拍电话向总统报告上新ê进展。

美国忽然间宣布beh赠送台湾250万剂Mó-te-nah疫苗，是六月初六宣布beh赠送咱台湾75万剂ê三倍外。美国政府kā萧美琴代表讲，若照一般程序需要真chē工，若beh爱紧tio̍h亲身去Thé-ná-si州ê Munhoesu领货。萧美琴代表当然知影早一日早一日好、早一点钟早一点钟好，伊无第二句话，随时亲身拼去领货，而且亲目看所有ê疫苗送起去中华航空货运机顶。

　　六月十九，美国国务院发言人Phú-laisuh（Ned Price）表示，疫苗已经顺利登机，预定ē tī明á载飞到台湾。伊tīTwitter发文以「起飞loh！」ê字眼来说明chit遍赠送台湾疫苗ê兴奋之情，文中有提到美国捐送250万剂Mó-te-nah疫苗hō͘台湾，chit-má已经顺利运送出去ah。Phú -laisuh koh tī文中提起，希望透过台湾kah美国ê公共卫生同伴关系，会táng解救世界各地ê生命，美国国务院真欢喜ē-tàng支持实现白宫拚力tī帮助世界战胜“COVID-19”（武汉肺炎）疫情ê承诺。Phú-laisuh tī文中特别贴一张咱国驻美代表萧美琴ê相片，伊khiā tī停机坪看疫苗运送起去中华航空货机ê归个过程，足足有六点钟。伊特别kā萧美琴代表ê身影hip・落来pho͘ hō͘ ta̍k-ê看。

　　咱所有ê台湾人看tio̍h萧美琴徛tī停机坪ê身影，实在真m̄甘。事实上咱看tio̍h-・ê是萧美琴坚强，上súi ê身影！ (210625)