《绿色短评》

 | | | 转寄

世界上kài bē见笑ê是tó一个？

作者 李南衡, ChoânTâijī/全台字 by Chng Hūiphêng 2021.07.18

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng


Sèkài siōng kài bē kiànsiàu ê sī tó chi̍tê?
　　
Chhitgoe̍h chheit sī Tiongkok Kiōngsántóng kiàn tóng chi̍tpah chiunî kìliāmji̍t, kinkì Tiongkok Sinhôasiā la̍kgoe̍h saⁿcha̍p ēpo͘ ê pòtō, paukoat Tiongkok Kokbîntóng chêng chúse̍k Liân Chiàn, Âng Siùthiāu, Chhinbîntóng chúse̍k Sòng Chhó͘jû téng, lio̍ksio̍k hiòng Tiongkok Kiōngsántóng piáuta̍t chiokhō.

　　 Kinkì pòtō, Liân Chiàn tī hōtiān chíchhut,"Tiongkok Kiōngsántóng chhòng kiàn pah nî, chútō sîn chiu tāilio̍k kiànsiat chhitcha̍pjī nî, Tionghôa bîncho̍k ho̍kheng chìntêng íkeng ta̍tkàu gō͘chheng nî le̍ksú sin ko’hong!"chin ǹgbāng nn̄g hōaⁿ koanhē hôpêng hoattián,"só͘ū Tionghôa jîlú ha̍p la̍t ūi lán bîncho̍k ê sūgia̍p chài chō sin iû". Bat chòkòe Tionghôa Bînkok hù chóngthóng, Tiongkok Kokbîntóng chúse̍k ê Liân Chiàn, i ê hōtiān sī kóng, hó tit chi̍tpah tang chêng ê chhitgoe̍h chheit Tiongkok Kiōngsántóng kiàn tóng, chiah ū hoattō͘ tī jīcha̍ppeh nî āu ê 1949 nî, kā Tiongkok Kokbîntóng ê Tionghôa Bînkok iántó, Tiongkok Kiōngsántóng chiah ē tàng "chútō sîn chiu tāilio̍k kiànsiat chhitcha̍pjī nî, "Tionghôa bîncho̍k ho̍kheng chìntêng" chiah ū hoattō͘ "íkeng ta̍tkàu gō͘chheng nî le̍ksú sin kohong!" Liân Chiàn chittīn sī móasim kámsiā Tiongkok Kiōngsántóng, 1949 nî kā Tiongkok Kokbîntóng ê Tionghôa Bînkok chènghú phah kah cháu bô lō͘, puttekí chiah cháulâi Tâioân chò lānbîn.

　　 Tiongkok Kokbîntóng chêng chúse̍k Âng Siùthiāu thàukòe hōhâm piáusī,"Tionghôa bîncho̍k úitāi ho̍kheng sī le̍ksú ê pitjiân". Chiok hibāng nn̄g hōaⁿ "chhiokchìn iôngha̍p, simlêng khèha̍p, kia̍tchīn simla̍t kiōngtông oânsêng kokka thóngit tōa gia̍p, kiōng tiok kokka hùkiông, bîncho̍k ho̍kheng, jînbîn hēnghok ê Tiongkok bāng." lán kanta beh mn̄g Âng Siùthiāu chêng chúse̍k, lí tng nî ná ē í "lānbîn" ê sinhūn cháulō͘ lâi Tâioân? Phiah siáⁿmi̍h lān lâi Tâioân chhòng siáⁿ?

　　Bat chòkòe Tiongkok Kokbîntóng tiongiong tóng pō͘ pìsu tiúⁿ, Tâioân séngtiúⁿ, hiānjīm Chhinbîntóng chúse̍k ê Sòng Chhó͘jû tī hōtiān tiong chíchhut, "Tiongkok Kiōngsántóng kankhó͘ tohcho̍at, hùntàu put hāi, tiôngchìn hoahā, í jînbîn hokchí ūi seng, jînlūi miāūn kiōngtôngthé ūi liām, chhimchhim hō͘ sèkan lâng tiôngsin khòaⁿthāi". Sêng ǹgbāng bīlâi sianghong tìle̍k chhiokchìn nn̄g hōaⁿ hôpêng hoattián,"si̍thiān Tionghôa bîncho̍k ho̍kheng". Sòng Chhó͘jû sī kóng, hókachài 100 nî chêng Tiongkok Kiōngsántóng chhòngli̍p, 1949 nî kā Tiongkok Kokbîntóng ê Tionghôa Bînkok chènghú kóaⁿ lâi Tâioân, chiah ē tàng tiôngchìn hoahā, Tiongkok Kiōngsántóng si̍tchāi chin liáuputkhí. Chhéngkàu Sòng Chhó͘jû chúse̍k, lí tng nî ná ē í "lānbîn" ê sinhūn cháulō͘ lâi Tâioân? Sī tó chi̍tê úitāi ê tóng hāi lí piàn choh lānbîn? Lí kináji̍t tōatōa kā oló?

　　 Siōng kài khiáu ê sī Tiongkok Kokbîntóng tiongiong tóng pō͘, oânchoân bô phah sǹg beh hoat hōtiān, kanta kiôngtiāu kòekhì bôlūn Tiongkok Kokbîntóng iah sī Tiongkok Kiōngsántóng ê tóng khèng, nn̄g tóng lóng bô phah hōtiān hō͘ tùihong ê chêng lē.

Cháchêng Tiongkok Kokbîntóng tī Tâioân kàuio̍k lán, Tiongkok kiōngsántóng sī "万恶的共匪", lán nā bô tòe i ánne kóng tio̍h sī "susiúⁿ ū būntê". Kináji̍t Tiongkok Kiōngsántóng iáu chng nn̄gchheng lia̍p huitôaⁿ tùi Tâioân, iáu chhùchhù chó͘gāi lán Tâioân bé Búhàn hìiām e̍kbiâu, bô mā in to̍h chhám síliáu ah, Samūi Tiongkok Kokbîntóng chêng chúse̍k kèngjiân kongkhai tōatōa oló Tiongkok Kiōngsántóng, chi̍tê pí chi̍tê koh khah bē kiànsiàu!

Sèkài siōng kài bē kiànsiàu ê sī tó chi̍tê? Lí kóng leh. 　　(210702)
Chù," 万恶的共匪"　　 chhiáⁿ liām Hôagí

Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng

Sè-kài siōng kài bē kiàn-siàu ê sī tó chi̍t-ê?

　　 Chhit-goe̍h chhe-it sī Tiong-kok Kiōng-sán-tóng kiàn tóng chi̍t-pah chiu-nî kì-liām-ji̍t, kin-kì Tiong-kok Sin-hôa-siā la̍k-goe̍h saⁿ-cha̍p ē-po͘ ê pò-tō, pau-koat Tiong-kok Kok-bîn-tóng chêng chú-se̍k Liân Chiàn, Âng Siù-thiāu, Chhin-bîn-tóng chú-se̍k Sòng Chhó͘-jû téng, lio̍k-sio̍k hiòng Tiong-kok Kiōng-sán-tóng piáu-ta̍t chiok-hō.

　　 Kin-kì pò-tō, Liân Chiàn tī hō-tiān chí-chhut,"Tiong-kok Kiōng-sán-tóng chhòng kiàn pah nî, chú-tō sîn chiu tāi-lio̍k kiàn-siat chhit-cha̍p-jī nî, Tiong-hôa bîn-cho̍k ho̍k-heng chìn-têng í-keng ta̍t-kàu gō͘-chheng nî le̍k-sú sin ko-hong!"chin ǹg-bāng nn̄g hōaⁿ koan-hē hô-pêng hoat-tián,"só͘-ū Tiong-hôa jî-lú ha̍p la̍t ūi lán bîn-cho̍k ê sū-gia̍p chài chō sin iû". Bat chò-kòe Tiong-hôa Bîn-kok hù chóng-thóng, Tiong-kok Kok-bîn-tóng chú-se̍k ê Liân Chiàn, i ê hō-tiān sī kóng, hó tit chi̍t-pah tang chêng ê chhit-goe̍h chhe-it Tiong-kok Kiōng-sán-tóng kiàn tóng, chiah ū hoat-tō͘ tī jī- cha̍p-peh nî āu ê 1949 nî, kā Tiong-kok Kok-bîn-tóng ê Tiong-hôa Bîn-kok ián-tó, Tiong-kok Kiōng-sán-tóng chiah ē tàng "chú-tō sîn chiu tāi-lio̍k kiàn-siat chhit-cha̍p-jī nî, "Tiong-hôa bîn-cho̍k ho̍k-heng chìn-têng" chiah ū hoat-tō͘ "í-keng ta̍t-kàu gō͘-chheng nî le̍k-sú sin ko-hong!" Liân Chiàn chit-tīn sī móa-sim kám-siā Tiong-kok Kiōng-sán-tóng, 1949 nî kā Tiong-kok Kok-bîn-tóng ê Tiong-hôa Bîn-kok chèng-hú phah kah cháu bô lō͘, put-tek-í chiah cháu-lâi Tâi-oân chò lān-bîn.

　　 Tiong-kok Kok-bîn-tóng chêng chú-se̍k Âng Siù-thiāu thàu-kòe hō-hâm piáu-sī,"Tiong-hôa bîn-cho̍k úi-tāi ho̍k-heng sī le̍k-sú ê pit-jiân". Chiok hi-bāng nn̄g hōaⁿ "chhiok-chìn iông-ha̍p, sim-lêng khè-ha̍p, kia̍t-chīn sim-la̍t kiōng-tông oân-sêng kok-ka thóng-it tōa gia̍p, kiōng tiok kok-ka hù-kiông, bîn-cho̍k ho̍k-heng, jîn-bîn hēng-hok ê Tiong-kok bāng." lán kan-ta beh mn̄g Âng Siù-thiāu chêng chú-se̍k, lí tng nî ná ē í "lān-bîn" ê sin-hūn cháu-lō͘ lâi Tâi-oân? Phiah siáⁿ-mi̍h lān lâi Tâi-oân chhòng siáⁿ?

　　Bat chò-kòe Tiong-kok Kok-bîn-tóng tiong-iong tóng pō͘ pì-su tiúⁿ, Tâi-oân séng-tiúⁿ, hiān-jīm Chhin-bîn-tóng chú-se̍k ê Sòng Chhó͘-jû tīhō-tiān tiong chí-chhut, "Tiong-kok Kiōng-sán-tóng kan-khó͘ toh-cho̍at, hùn-tàu put hāi, tiông-chìn hoa-hā, í jîn-bîn hok-chí ūi seng, jîn-lūi miā-ūn kiōng-tông-thé ūi liām, chhim-chhim hō͘ sè-kan lâng tiông-sin khòaⁿ-thāi". Sêng ǹg-bāng bī-lâi siang-hong tì-le̍k chhiok-chìn nn̄g hōaⁿ hô-pêng hoat-tián,"si̍t-hiān Tiong-hôa bîn-cho̍k ho̍k-heng". Sòng Chhó͘-jû sī kóng, hó-ka-chài 100 nî chêng Tiong-kok Kiōng-sán-tóng chhòng-li̍p, 1949 nî kā Tiong-kok Kok-bîn-tóng ê Tiong-hôa Bîn-kok chèng-hú kóaⁿ lâi Tâi-oân, chiah ē tàng tiông-chìn hoa-hā, Tiong-kok Kiōng-sán-tóng si̍t-chāi chin liáu-put-khí. Chhéng-kàu Sòng Chhó͘-jû chú-se̍k, lí tng nî ná ē í "lān-bîn" ê sin-hūn cháu-lō͘ lâi Tâi-oân? Sī tó chi̍t-ê úi-tāi ê tóng hāi lí piàn choh lān-bîn? Lí kin-á-ji̍t tōa-tōa kā o-ló?

　　 Siōng kài khiáu ê sī Tiong-kok Kok-bîn-tóng tiong-iong tóng pō͘, oân-choân bô phah sǹg beh hoat hō-tiān, kan-ta kiông-tiāu kòe-khì bô-lūn Tiong-kok Kok-bîn-tóng iah sī Tiong-kok Kiōng-sán-tóng ê tóng khìn, nn̄g tóng lóng bô phah hō-tiān hō͘ tùi-hong ê chêng lē.

Chá-chêng Tiong-kok Kok-bîn-tóng tī Tâi-oân kàu-io̍k lán, Tiong-kok kiōng-sán-tóng sī "万恶的共匪", lán nā bô tòe i án-ne kóng-tio̍h sī "su-siúⁿ ū būn-tê". Kin-á-ji̍t Tiong-kok Kiōng-sán-tóng iáu chng nn̄g-chheng lia̍p hui-tôaⁿ tùi Tâi-oân, iáu chhù-chhù chó͘-gāi lán Tâi-oân bé Bú-hàn hì-iām e̍k-biâu, bô mā in to̍h chhám sí-liáu ah, Sam-ūi Tiong-kok Kok-bîn-tóng chêng chú-se̍k kèng-jiân kong-khai tōa-tōa o-ló Tiong-kok Kiōng-sán-tóng., chi̍t-ê pí chi̍t-ê koh khah bē kiàn-siàu!

Sè-kài siōng kài bē kiàn-siàu ê sī tó chi̍t-ê? Lí kóng leh. 　　(210702)
Chù," 万恶的共匪"　　 chhiáⁿ liām Hôa-gí


　　七月初一是中国共产党建党一百周年纪念日，根据中国新华社六月三十下晡ê报导，包括中国国民党前主席连战、洪秀柱、亲民党主席宋楚瑜等，陆续向中国共产党表达祝贺。

　　根据报导，连战tī贺电指出，「中国共产党创建百年，主导神州大陆建设七十二年，中华民族复兴进程已经达到五千年历史新高峰！」真ǹg望两岸关系和平发展，「所有中华儿女合力为咱民族ê事业再造新遒（iû）」。Bat作过中华民国副总统、中国国民党主席ê连战，伊ê贺电是讲，好得一百冬前ê七月初一中国共产党建党，才有法度tī二十八年后ê1949年，kā中国国民党ê中华民国偃倒（ían-tó），中国共产党才会tàng「主导神州大陆建设七十二年，」「中华民族复兴进程」才有法度「已经达到五千年历史新高峰！」连战chit阵是满心感谢中国共产党，1949年kā中国国民党ê中华民国政府拍kah走无路、不得已才走来台湾作难民。

　　中国国民党前主席洪秀柱透过贺函表示，「中华民族伟大复兴是历史ê必然」。足希望两岸「促进融合，心灵契合，竭尽心力共同完成国家统一大业，共筑国家富强、民族复兴、人民幸福ê中国梦。」咱kan-ta beh问洪秀柱前主席，你当年ná会以「难民」ê身分走路来台湾？避啥物难来台湾创啥？

　　Bat作过中国国民党中央党部秘书长、台湾省长、现任亲民党主席ê宋楚瑜tī贺电中指出，「中国共产党艰苦卓绝，奋斗不懈，重振华夏，以人民福祉为先，人类命运共同体为念，深深hō͘世间人重新看待」。诚ǹg望未来双方致力促进两岸和平发展，「实现中华民族复兴」。宋楚瑜是讲，好佳哉100年前中国共产党创立，1949年kā中国国民党ê中华民国政府赶来台湾，才会tàng 重振华夏，中国共产党实在真了不起。请教宋楚瑜主席，你当年那会以「难民」ê身分走路来台湾？是tó一个伟大ê党害你变作难民？你今á日大大kā o-ló？

　　上盖巧ê是中国国民党中央党部，完全无拍算beh发贺电，kan-ta强调过去无论中国国民党iah是中国共产党ê党庆，两党拢无拍贺电hō͘对方ê前例。

早前中国国民党tī台湾教育咱，中国共产党是「万恶的共匪」，咱若无tòe伊án-ne讲tio̍h是「思想有问题」。今á日中国共产党犹装两千粒飞弹对台湾，犹处处阻碍咱台湾买武汉肺炎疫苗，无骂in to̍h惨死了ah，三位中国国民党前主席竟然公开大大o-ló中国共产党.，一个比一个koh khah bē见笑！

世界上kài bē见笑ê是tó一个？你讲leh。　　(210702)
注：「万恶的共匪」　　请念华语