《绿色短评》

 | | | 转寄

日本beh送疫苗hō͘台湾，中国teh跳啥？

作者 李南衡, ChoânTâijī/全台字 by Chng Hūiphêng 2021.06.06

Choânbîn Tâioânjī pán/全民台湾字版简称ChoânTâiJī
《 Le̍ksek toánphêng 》　　　　　　　　　　 Lí Lâmhêng 　　　　　　　 Ji̍tpún beh sàng e̍kbiâu hō͘ Tâioân, Tiongkok teh thiàu siáⁿ?
　　 Gō͘go̍eh jīpeh, Ji̍tpún 《 Sánkeng sinbûn 》 pòtō, Ji̍tpún chènghú chi̍tē chaiiáⁿ Búhàn hìiām e̍kchêng tī Tâioân khoktōa, chiok khiàm e̍kbiâu, sûisî khólī beh kiòngèng"AZ e̍kbiâu"hō͘ Tâioân. Pòtō kóng, Ji̍tpún chènghú ū kah Bíkok 辉瑞 io̍hchhiúⁿ chhiamiok bé 1 ek 9,400 bān che e̍kbiâu, ū kah Bíkok 莫德纳 io̍hchhiúⁿ chhiamiok bé 5,000 bān che e̍kbiâu. Tàu khílâi ū 2 ek 4,000 bān che ( iok 1 ek 2,000 bān lâng hūn) , khakpó 16 hòe ísiōng kokbîn chù e̍kbiâu ê sò͘liōng. Lēnggōa Ji̍tpún chènghú ū ke bé 1 ek 2,000 bān che ê"AZ e̍kbiâu", ū beh sàng hō͘ suiàu ê kokka, m̄nā ū Tâioân ê hūn, jîchhiáⁿ ē seng sûn=mn̄g Tâioân chènghú suiàu e̍kbiâu ê sò͘liōng kah thêkiong ê sîkan. Gō͘go̍eh jīpeh ēpo͘, Ji̍tpún gōasiōng 茂木敏充 chèngsi̍t, Ji̍tpún chènghú ū teh khólī thêkiong"AZ e̍kbiâu"hō͘ Tâioân, i te̍kpia̍t thêkhí, tī 311 tang Ji̍tpún tōa tētāng liáuāu, Tâioân siōng chá thêkiong chioân bō͘khóan oânchō͘ Ji̍tpún. In chaiiáⁿ Tâioân tī chhitgo̍eh kok sán e̍kbiâu chiūⁿchhī chìnchêng, chin suiàu e̍kbiâu, só͘í Ji̍tpún chènghú chiahē piàⁿ la̍kgo̍eh chhesì sàng 124 bān che e̍kbiâu khì Tâioân. Ji̍tpún Kāuseⁿ Lôtōngséng ū kah AZ io̍hchhiúⁿ hia̍psiong siukái ha̍piok tiâukhoán,"AZ e̍kbiâu"chiah ētàng chhut hòe khì Tâioân.

　　 Sūsi̍t siōng, 2011 nî Ji̍tpún 311 tōa tētāng, Tâioân sī tēitê oânchō͘, oânchō͘ siōngchē ê kokka, koankhóan chhiaukòe 200 ek ji̍tîⁿ, pí kîtha só͘ū kokka lóng chóng ê koankhóan koh khah chē. Kūnî sìgo̍eh, Ji̍tpún e̍kchêng khoktōa khiàm chhùi’am ê sî, Tâioân koan sàng Ji̍tpún 200 bān phìⁿ chhùi’am. 2016 nî Tâilâm tētāng, Ji̍tpún sûisî koan bíkim chi̍tpah bān; 2018 nî Hoalian tētāng ê sî, Ji̍tpún sûisî phài kiùlântūi kàu chaikhu kiùchai.

　　 Tùi Ji̍tpún chènghú ū beh thêkiong"AZ e̍kbiâu"hō͘ Tâioân, gō͘go̍eh jīpeh àm, Chhòa Engbûn chóngthóng tī Twitter ēng Ji̍tbûn siáchhut kámsiā bûn, i kóng"TâiJi̍t chi kan ê sio kiatliân, hiánhiān chhutlâi bînchú kokka ētàng thàukòe hō͘siong hia̍pchō͘, lâi kiônghòa tùi kokka ê tīlí, ná chhinchhiūⁿ e̍kbiâu ētàng hō͘ lâng biáne̍kla̍t ánne. Góa chin hoaⁿhí tī chitê khùnlân ê sîchūn, TâiJi̍t kan ētàng hō͘siōng chichhî, tàutīn tō͘kòe lânkoan ê thāitō͘ pí íóng koh khah sianbêng, góa tùi sianghong chhimkāu ê iúgî chhimchhim piáusī kámsiā."

　　 Thiaⁿkóng Ji̍tpún chènghú beh thêkiong"AZ e̍kbiâu"hō͘ Tâioân, Tiongkok gōakaupō͘ hoatgiânjîn Tiō Li̍pkian tējī kang tio̍h chhiàngsiaⁿ,"Tâioân ētàng tittio̍h Tiongkok e̍kbiâu ê lō͘ sī thongtháu・ ê, nāsī chiá e̍kbiâu ' bô͘to̍k’ (bô͘ kiû to̍kli̍p) sī bôkhólêng ta̍ttio̍h bo̍ktek・ê."

Gō͘go̍eh saⁿcha̍p it, Tiongkok gōakaupō͘ hoatgiân jîn 汪文斌tī kìchiáhōe kóng, Tiongkok kúi piàn piáusī gōanì chīn siōngtōa ê ló͘le̍k pangchō͘ Tâioân tôngpau èngtùi e̍kchêng, tānsī Bînchìntóng tongkio̍k khiok ùi chèngtī sulī chhuthoat, tùi Tiongkok ê siānì tèⁿ bô khòaⁿtio̍h, che sī tùi Tâioân tôngpau sèⁿmiā kiānkhong ê hutsī kah thúnta̍h. Ji̍tpún bo̍kchêng iáu bô hoattō͘ khakpó chū sin e̍kbiâu ê chhiongchiok kiongkip, khiok soanpò͘ beh hiòng Tâioân tēkhu thêkiong e̍kbiâu. E̍kbiâu oânchō͘ engkai tio̍h hôekui bánkiù sèⁿmiā ê chho͘sim, bô engkai lûnlo̍h choh tô͘bô͘ chèngtī sulī ê kangkū. I siōngbóeá chit kúikù ōe bêngbêng sī teh mā in Tiongkok kakī.

　　 Ji̍tpún beh sàng e̍kbiâu hō͘ Tâioân, Tiongkok teh thiàu siáⁿ? Chhiò phòa lâng ê chhùi! 　　(210604)
Chù, 辉瑞　 莫德纳 　　 chhiáⁿ liām Hôagí


Pe̍h-ōe-jī-pán/白话字版
《 Le̍k-sek toán-phêng 》　　　　　　　　　　　 Lí Lâm-hêng 　　　　　　　 Ji̍t-pún beh sàng e̍k-biâu hō͘ Tâi-oân, Tiong-kok teh thiàu siáⁿ?
　　 Gō͘-go̍eh jī-peh, Ji̍t-pún 《 Sán-keng sin-bûn 》 pò-tō, Ji̍t-pún chèng-hú chi̍t-ē chai-iáⁿ Bú-hàn hì-iām e̍k-chêng tī Tâi-oân khok-tōa, chiok khiàm e̍k-biâu, sûi-sî khó-lī beh kiòng-èng"AZ e̍k-biâu"hō͘ Tâi-oân. Pò-tō kóng, Ji̍t-pún chèng-hú ū kah Bí-kok 辉瑞 io̍h-chhiúⁿ chhiam-iok bé 1 ek 9,400 bān che e̍k-biâu, ū kah Bí-kok 莫德纳 io̍h-chhiúⁿ chhiam-iok bé 5,000 bān che e̍k-biâu. Tàu khí-lâi ū 2 ek 4,000 bān che ( iok 1 ek 2,000 bān lâng hūn) , khak-pó 16 hòe í-siōng kok-bîn chù e̍k-biâu ê sò͘-liōng. Lēng-gōa Ji̍t-pún chèng-hú ū ke bé 1 ek 2,000 bān che ê"AZ e̍k-biâu", ū beh sàng hō͘ su-iàu ê kok-ka, m̄-nā ū Tâi-oân ê hūn, jî-chhiáⁿ ē seng sûn=mn̄g Tâi-oân chèng-hú su-iàu e̍k-biâu ê sò͘-liōng kah thê-kiong ê sî-kan. Gō͘-go̍eh jī-peh ē-po͘, Ji̍t-pún gōa-siōng 茂木敏充 chèng-si̍t, Ji̍t-pún chèng-hú ū teh khó-lī thê-kiong"AZ e̍k-biâu"hō͘ Tâi-oân, i te̍k-pia̍t thê-khí, tī 311 tang Ji̍t-pún tōa tē-tāng liáu-āu, Tâi-oân siōng chá thê-kiong chi-oân bō͘-khóan oân-chō͘ Ji̍t-pún. In chai-iáⁿ Tâi-oân tī chhit-go̍eh kok sán e̍k-biâu chiūⁿ-chhī chìn-chêng, chin su-iàu e̍k-biâu, só͘-í Ji̍t-pún chèng-hú chiah-ē piàⁿ la̍k-go̍eh chhe-sì sàng 124 bān che e̍k-biâu khì Tâi-oân. Ji̍t-pún Kāu-seⁿ Lô-tōng-séng ū kah AZ io̍h-chhiúⁿ hia̍p-siong siu-kái ha̍p-iok tiâu-khoán,"AZ e̍k-biâu"chiah ē-tàng chhut hòe khì Tâi-oân.

　　 Sū-si̍t siōng, 2011 nî Ji̍t-pún 311 tōa tē-tāng, Tâi-oân sī tē-it-ê oân-chō͘, oân-chō͘ siōng-chē ê kok-ka, koan-khóan chhiau-kòe 200 ek ji̍t-îⁿ, pí kî-tha só͘-ū kok-ka lóng chóng ê koan-khóan koh khah chē. Kū-nî sì-go̍eh, Ji̍t-pún e̍k-chêng khok-tōa khiàm chhùi-am ê sî, Tâi-oân koan sàng Ji̍t-pún 200 bān phìⁿ chhùi-am. 2016 nî Tâi-lâm tē-tāng, Ji̍t-pún sûi-sî koan bí-kim chi̍t-pah bān; 2018 nî Hoa-lian tē-tāng ê sî, Ji̍t-pún sûi-sî phài kiù- lân-tūi kàu chai-khu kiù-chai.

　　 Tùi Ji̍t-pún chèng-hú ū beh thê-kiong"AZ e̍k-biâu"hō͘ Tâi-oân, gō͘-go̍eh jī-peh àm, Chhòa Eng-bûn chóng-thóng tī Twitter ēng Ji̍t-bûn siá-chhut kám-siā bûn, i kóng"Tâi-Ji̍t chi kan ê sio kiat-liân, hián-hiān chhut-lâi bîn-chú kok-ka ē-tàng thàu-kòe hō͘-siong hia̍p-chō͘, lâi kiông-hòa tùi kok-ka ê tī-lí, ná chhin-chhiūⁿ e̍k-biâu ē-tàng hō͘ lâng bián-e̍k-la̍t án-ne. Góa chin hoaⁿ-hí tī chit-ê khùn-lân ê sî-chūn, Tâi-Ji̍t kan ē-tàng hō͘-siōng chi-chhî, tàu-tīn tō͘-kòe lân-koan ê thāi-tō͘ pí í-óng koh khah sian-bêng, góa tùi siang-hong chhim-kāu ê iú-gî chhim-chhim piáu-sī kám-siā."

　　 Thiaⁿ-kóng Ji̍t-pún chèng-hú beh thê-kiong"AZ e̍k-biâu"hō͘ Tâi-oân, Tiong-kok gōa-kau-pō͘ hoat-giân-jîn Tiō Li̍p-kian tē-jī kang tio̍h chhiàng-siaⁿ,"Tâi-oân ē-tàng tit-tio̍h Tiong-kok e̍k-biâu ê lō͘ sī thong-tháu-・ ê, nā-sī chiá e̍k-biâu ' bô͘-to̍k’ (bô͘ kiû to̍k-li̍p) sī bô-khó-lêng ta̍t-tio̍h bo̍k-tek-・ê."

Gō͘-go̍eh saⁿ-cha̍p it, Tiong-kok gōa-kau-pō͘ hoat-giân jîn 汪文斌tī kì-chiá-hōe kóng, Tiong-kok kúi piàn piáu-sī gōan-ì chīn siōng-tōa ê ló͘-le̍k pang-chō͘ Tâi-oân tông-pau èng-tùi e̍k-chêng, tān-sī Bîn-chìn-tóng tong-kio̍k khiok ùi chèng-tī su-lī chhut-hoat, tùi Tiong-kok ê siān-ì tèⁿ bô khòaⁿ-tio̍h, c he sī tùi Tâi-oân tông-pau seⁿ-miā kiān-khong ê hut-sī kah thún-ta̍h. Ji̍t-pún bo̍k-chêng iáu bô hoat-tō͘ khak-pó chū sin e̍k-biâu ê chhiong-chiok kiong-kip, khiok soan-pò͘ beh hiòng Tâi-oân tē-khu thê-kiong e̍k-biâu. E̍k-biâu oân-chō͘ eng-kai tio̍h hôe-kui bán-kiù seⁿ-miā ê chho͘-sim, bô eng-kai lûn-lo̍h choh tô͘-bô͘ chèng-tī su-lī ê kang-kū. I siōng-bóe-á chit kúi-kù ōe bêng-bêng sī teh mā in Tiong-kok ka-kī.

　　 Ji̍t-pún beh sàng e̍k-biâu hō͘ Tâi-oân, Tiong-kok teh thiàu siáⁿ? Chhiò phòa lâng ê chhùi! 　　(210604)
Chù, 辉瑞　 莫德纳 　　 chhiáⁿ liām Hôa-gí


　　五月二八，日本《产经新闻》报导，日本政府一下知影武汉肺炎疫情tī台湾扩大，足欠疫苗，随时考虑beh供应「AZ疫苗」hō͘台湾。报导讲，日本政府有kah美国辉瑞药厂签约买1亿9,400万剂疫苗、有kah美国莫德纳药厂签约买5,000万剂疫苗。斗起来有2亿4,000万剂（约1亿2,000万人份），确保16岁以上国民注疫苗ê数量。另外日本政府有加买1亿2,000万剂ê「AZ疫苗」，有beh送hō͘需要ê国家，m̄-nā有台湾ê份，而且会先询问台湾政府需要疫苗ê数量kah提供ê时间。五月二八下晡，日本外相茂木敏充证实，日本政府有teh考虑提供「AZ疫苗」hō͘台湾，伊特别提起，tī 311东日本大地动了后，台湾上早提供支援募款援助日本。In知影台湾tī七月国产疫苗上市进前，真需要疫苗，所以日本政府chiah-ē拼六月初四送124万剂疫苗去台湾。日本厚生劳动省有kah AZ药厂协商修改合约条款，「AZ疫苗」chiah ē-tàng出货去台湾。

　　事实上，2011年日本311大地动，台湾是第一个援助、援助上chēê国家，捐款超过200亿日圆，比其他所有国家lóng总ê捐款koh khahchē。旧年四月，日本疫情扩大欠嘴掩ê时，台湾捐送日本200万片嘴掩。2016年台南地动，日本随时捐美金一百万；2018年花莲地动ê时，日本随时派救难队到灾区救灾。

　　对日本政府有beh提供「AZ疫苗」hō͘台湾，五月二八暗，蔡英文总统tīTwitter用日文写出感谢文，伊讲「台日之间ê相结连，显现出来民主国家会tàng透过互相协助，来强化对国家ê治理，ná亲像疫苗会tàng hō͘人免疫力án-ne。我真欢喜tī chit-ê困难ê时阵，台日间会tàng互相支持、斗阵渡过难关ê态度比以往koh khah鲜明，我对双方深厚ê友谊深深表示感谢。」

　　听讲日本政府beh提供「AZ疫苗」hō͘台湾，中国外交部发言人赵立坚第二工tio̍h唱声：「台湾ē-tàng得tio̍h（中国）大陆疫苗ê路是通tháu-・ê，若是藉疫苗『谋独』（谋求独立）是无可能达tio̍h目的-・ê。」

五月三十一，中国外交部发言人汪文斌tī记者会讲，中国几遍表示愿意尽上大ê努力帮助台湾同胞应对疫情，但是民进党当局却ùi政治私利出发，对中国ê善意tèⁿ无看tio̍h，che是对台湾同胞生命健康ê忽视kah thún踏。日本目前犹无法度确保自身疫苗ê充足供给，却宣布beh向台湾地区提供疫苗。疫苗援助应该tio̍h回归挽救生命ê初衷，无应该沦落作图谋政治私利ê工具。伊上尾á chit几句话明明是teh骂in中国家己。

　　日本beh送疫苗hō͘台湾，中国teh跳啥？笑破人ê嘴！　　(210604)
注：辉瑞　　莫德纳　　请念华语