《绿色短评》

 | | | 转寄

中国疫苗，无讲你m̄知thang惊！

作者 李南衡, ChoânTâijī/全台字 by Chng Hūiphêng 2021.06.13

Choânbîn Tâioânjī pán/全民台湾字版简称ChoânTâiJī
《 Le̍ksek toánphêng 》 Lí Lâmhêng 　　　　　　　 Tiongkok e̍kbiâu, bô kóng lí m̄chai thang kiaⁿ!
　　 Tâioân ê Búhàn hìiām púnthó͘ ànlē chìnji̍p gō͘・go̍eh hutjiânkan chēngka chin chē, chin kín. Tâioân ū lâng itti̍t hoahkóng tio̍h bé Tiongkok e̍kbiâu. Gō͘go̍eh jīla̍k, Tiongkok Koktâipān hoatgiânjîn 朱凤莲 mn̄g kóng, tùi sèkài ōeseng cho͘chit jīnkhó ê Tiongkok e̍kbiâu, Tiongkok ū beh koan hō͘ Tâioân, Tâioân tàuté ài á・sī bôài? Lio̍kúihōe ti̍tti̍t kóng lán chènghú kah BⁿT Tekkok goânchhiúⁿ chiapchhiok chháikáng e̍kbiâu, chhaputto chiapkīn oânsêng chhiamiok ê sî, inūi Tiongkok kàiji̍p chó͘tòng, iântî kàu kináji̍t iáu bôhoattō͘ chhiamiok. Khah iàukín・ê, lán engkai hō͘ ta̍kê chaiiáⁿ, Tiongkok e̍kbiâu ê chinsi̍t chōnghóng, kah Tiongkok e̍kbiâu ū jōani̍h khióngpò͘.

Tiongkok e̍kbiâu chúiàu ū saⁿ chióng, tēit chióng sī Tiongkok 科兴 e̍kbiâu (Sinovac) , kánchheng kiò choh"科兴 e̍kbiâu", choân sèkài ū 23 ê kokka tēkhu chháṳōng; tē jī chióng sī Kokio̍h chi̍pthoân pakkiaⁿ sengbu̍t e̍kbiâu, kánchheng kiò choh"kokio̍h e̍kbiâu"（Sinopharm）, choân sèkài ū 37 ê kokka tēkhu chháṳōng; tē saⁿ chióng sī Tiongkok 康希诺 sengbu̍t e̍kbiâu 克威莎（Convidencia）, te̍ktiám sī chù chi̍t tâng tio̍h ēsái, chin chió gōakok chháṳōng. Chiàu sèkài ōeseng cho͘chit choanka ê pòkò, Tiongkok saⁿ chióng e̍kbiâu ê kiōngtông te̍ksek sī, ūsin ê chabó͘lâng, 60 hòe ísiōng nîtióngchiá kah ū bānsèngpēⁿ ê hoānchiá, chù liáuāu ê hoánèng téng anchoânsèng ê chèngkì bô kàu.

　　 Lâm Bíchiu 智利ū bé 6,600 bān che ê Tiongkok 科兴 e̍kbiâu, jīgoe̍h chhesaⁿ khaisí chù ílâi, tī choânkok 1,900 bān jînkháu tiong íkeng ū 29%（551 bān lâng ） chù tēit che, ū 15%（285 bān lâng ） chù liáu nn̄g che, tānsī khakchín lē tiantò jú chē. Saⁿgoe̍h chhe, Thó͘níkî khaisí chù Tiongkok 科兴 e̍kbiâu, kàu saⁿgo̍eh jījī, ū chhiaukòe 800 bān lâng chù kòe tēit che, ū 500 bān lâng chù oân nn̄g che, iok chiàm Thó͘níkî jînkháu ê 15%. Kàu saⁿgo̍eh jīit lúikè khakchín ànlē thu̍tphòa 300 bān, tanji̍t liânsòa sìkang phòa nn̄gbān lē. Ínkhí Thó͘níkî jînbîn siongtong putbóan. Tiongkok thêkiong hō͘ Pase siōngkài chē Tiongkok 科兴 e̍kbiâu, tānsī Pase Búhàn hìiām síbông jînsò͘ íkeng chhiaukòe 40 bān lâng. Sìgo̍eh jīkáu. Thàikok lúchú pâikiûtūi tūioân kah kangchok jînoân khì chù Tiongkok 科兴e̍kbiâu, gō͘go̍eh cha̍pjī, jīcha̍p jī ê lâng khì chò sàichêng kiámchhek, giām chhut lóng chóng iôngsèng hoánèng.

Tiongkok Kokio̍h e̍kbiâu mā bô hó kah tohūi khì. Sìgo̍eh chhekáu sinbûn pòtō, Huilu̍tpin chóngthóng ê 126 ê sûisin anchoân jînoân, khòsè tī kūnî té to̍h lóng ū chù Kokio̍h e̍kbiâu, chòekīn kiámchhek choânthé khakchín. Gō͘go̍eh chhegō͘ sinbûn pòtō, Lamhui tangpō͘, jînkháu cha̍pbān ê tókok Sisea, íkeng ū la̍ksiâⁿ bînchiòng chù kòe Búhàn hìiām e̍kbiâu, kîtiong la̍ksiâⁿ (saⁿbān la̍k chheng lâng) chù Tiongkok Kokio̍h e̍kbiâu. Chòekīn chi̍tⁿ̄g lépài kai kok e̍kchêng sengun, ū saⁿhun chṳt ê tāngpēⁿ pēⁿlē ū chù kòe nn̄g che e̍kbiâu. Jīgo̍eh chhesì, 匈牙利 chèngsek khàihòng bînchiòng tōa kuibô͘ chù Tiongkok Kokio̍h e̍kbiâu liáuāu, khiok piàn choh choânkiû Búhàn hìiām síbông lu̍t siōng koân ê kokka.

Gō͘goe̍h jīcha̍p sinbûn pòtō, ū gō͘ miâ chiânóng Oa̍tlâm khóchhat ê Tiongkok choanka, tńgkhì Tiongkok liáuāu khakchín liámpēⁿ, chit gō͘ ūi choanka chhutkok chêng lóng ū chù kòe Tiongkok kok sán e̍kbiâu, khósioh bô kóng toh chi̍t pâi ê e̍kbiâu. Kîtiong chi̍t miâ choanka íkeng choán choh tāngchèng hoānchiá, kàu gō͘go̍eh cha̍ppeh i itti̍t ū"siókhóa ho͘khip khùnlân".

　　 Tiongkok e̍kbiâu, bô kóng lí m̄chai thang kiaⁿ! Beh chù Tiongkok e̍kbiâu ê lâng chhiáⁿ gia̍h chhiú. (210528)

Chù, 智利 　匈牙利 　chhiáⁿ liām Hôagí

Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng 　　　　　　　 Tiong-kok e̍k-biâu, bô kóng lí m̄-chai thang kiaⁿ!
　　 Tâi-oân ê Bú-hàn hì-iām pún-thó͘ àn-lē chìn-ji̍p gō͘-go̍eh hut-jiân-kan chēng-ka chin chē, chin kín. Tâi-oân ū lâng it-ti̍t hoah-kóng tio̍h bé Tiong-kok e̍k-biâu. Gō͘-go̍eh jī-la̍k, Tiong-kok Kok-tâi-pān hoat-giân-jîn 朱凤莲 mn̄g kóng, tùi sè-kài ōe-seng cho͘-chit jīn-khó ê Tiong-kok e̍k-biâu, Tiong-kok ū beh koan hō͘ Tâi-oân, Tâi-oân tàu-té ài á-・sī bô-ài? Lio̍k-úi-hōe ti̍t-ti̍t kóng lán chèng-hú kah BⁿT Tek-kok goân-chhiúⁿ chiap-chhiok chhái-káng e̍k-biâu, chha-put-to chiap-kīn oân-sêng chhiam-iok ê sî, in-ūi Tiong-kok kài-ji̍p chó͘-tòng, iân-tî kàu kin-á-ji̍t iáu bô-hoat-tō͘ chhiam-iok. Khah iàu-kín-・ê, lán eng-kai hō͘ ta̍k-ê chai-iáⁿ, Tiong-kok e̍k-biâu ê chin-si̍t chōng-hóng, kah Tiong-kok e̍k-biâu ū jōa-ni̍h khióng-pò͘.

Tiong-kok e̍k-biâu chú-iàu ū saⁿ chióng, tē-it chióng sī Tiong-kok 科兴 e̍k-biâu (Sinovac) , kán-chheng kiò choh"科兴 e̍k-biâu", choân sè-kài ū 23 ê kok-ka tē-khu chhái-iōng; tē jī chióng sī Kok-io̍h chi̍p-thoân pak-kiaⁿ seng-bu̍t e̍k-biâu, kán-chheng kiò choh"kok-io̍h e̍k-biâu"（Sinopharm）, choân sè-kài ū 37 ê kok-ka tē-khu chhái-iōng; tē saⁿ chióng sī Tiong-kok 康希诺 seng-bu̍t e̍k-biâu 克威莎（Convidencia）, te̍k-tiám sī chù chi̍t tâng tio̍h ē-sái, chin chió gōa-kok chhái-iōng. Chiàu sè-kài ōe-seng cho͘-chit choan-ka ê pò-kò, Tiong-kok saⁿ chióng e̍k-biâu ê kiōng-tông te̍k-sek sī, ū-sin ê cha-bó͘-lâng, 60 hòe í-siōng nî-tióng-chiá kah ū bān-sèng-pēⁿ ê hoān-chiá, chù liáu-āu ê hoán-èng téng an-choân-sèng ê chèng-kì bô kàu.

　　 Lâm Bí-chiu 智利ū bé 6,600 bān che ê Tiong-kok 科兴 e̍k-biâu, jī-goe̍h chhe-saⁿ khai-sí chù í-lâi, tī choân-kok 1,900 bān jîn-kháu tiong í-keng ū 29%（551 bān lâng ） chù tē-it che, ū 15%（285 bān lâng ） chù liáu nn̄g che, tān-sī khak-chín lē tian-tò jú chē. Saⁿ-goe̍h chhe, Thó͘-ní-kî khai-sí chù Tiong-kok 科兴 e̍k-biâu, kàu saⁿ-go̍eh jī-jī, ū chhiau-kòe 800 bān lâng chù kòe tē-it che, ū 500 bān lâng chù oân nn̄g che, iok chiàm Thó͘-ní-kî jîn-kháu ê 15%. Kàu saⁿ-go̍eh jī-it lúi-kè khak-chín àn-lē thu̍t-phòa 300 bān, tan-ji̍t liân-sòa sì-kang phòa nn̄g-bān lē. Ín-khí Thó͘-ní-kî jîn-bîn siong-tong put-bóan. Tiong-kok thê-kiong hō͘ Pa-se siōng-kài chē Tiong-kok 科兴 e̍k-biâu, tān-sī Pa-se Bú-hàn hì-iām sí-bông jîn-sò͘ í-keng chhiau-kòe 40 bān lâng. Sì-go̍eh jī-káu. Thài-kok lú-chú pâi-kiû-tūi tūi-oân kah kang-chok jîn-oân khì chù Tiong-kok 科兴e̍k-biâu, gō͘-go̍eh cha̍p-jī, jī-cha̍p jī ê lâng khì chò sài-chêng kiám-chhek, giām chhut lóng chóng iông-sèng hoán-èng.

Tiong-kok Kok-io̍h e̍k-biâu mā bô hó kah toh-ūi khì. Sì-go̍eh chhe-káu sin-bûn pò-tō, Hui-lu̍t-pin chóng-thóng ê 126 ê sûi-sin an-choân jîn-oân, khò-sè tī kū-nî té to̍h lóng ū chù Kok-io̍h e̍k-biâu, chòe-kīn kiám-chhek choân-thé khak-chín. Gō͘-go̍eh chhe-gō͘ sin-bûn pò-tō, Lam-hui tang-pō͘, jîn-kháu cha̍p-bān ê tó-kok Si-se- a, í-keng ū la̍k-siâⁿ bîn-chiòng chù kòe Bú-hàn hì-iām e̍k-biâu, kî-tiong la̍k-siâⁿ (saⁿ-bān la̍k chheng lâng) chù Tiong-kok Kok-io̍h e̍k-biâu. Chòe-kīn chi̍t-nn̄g lé-pài kai kok e̍k-chêng seng-un, ū saⁿ-hun chi-it ê tāng-pēⁿ pēⁿ-lē ū chù kòe nn̄g che e̍k-biâu. Jī-go̍eh chhe-sì, 匈牙利 chèng-sek khài-hòng bîn-chiòng tōa kui-bô͘ chù Tiong-kok Kok-io̍h e̍k-biâu liáu-āu, khiok piàn choh choân-kiû Bú-hàn hì-iām sí-bông lu̍t siōng koân ê kok-ka.

Gō͘-goe̍h jī-cha̍p sin-bûn pò-tō, ū gō͘ miâ chiân-óng Oa̍t-lâm khó-chhat ê Tiong-kok choan-ka, tńg-khì Tiong-kok liáu-āu khak-chín liám-pēⁿ, chit gō͘ ūi choan-ka chhut-kok chêng lóng ū chù kòe Tiong-kok kok sán e̍k-biâu, khó-sioh bô kóng toh chi̍t pâi ê e̍k-biâu. Kî-tiong chi̍t miâ choan-ka í-keng choán choh tāng-chèng hoān-chiá, kàu gō͘-go̍eh cha̍p-peh i it-ti̍t ū"sió-khóa ho͘-khip khùn-lân".

　　 Tiong-kok e̍k-biâu, bô kóng lí m̄-chai thang kiaⁿ! Beh chù Tiong-kok e̍k-biâu ê lâng chhiáⁿ gia̍h chhiú. (210528)

Chù, 智利 　匈牙利 　chhiáⁿ liām Hôa-gí

　　台湾ê武汉肺炎本土案例进入五月忽然间增加真chē、真紧。台湾有人一直喝讲tio̍h买中国疫苗。五月二六，中国国台办发言人朱凤莲问讲，对世界卫生组织认可ê中国疫苗，中国有beh捐hō͘台湾，台湾到底爱抑是无爱？陆委会直直讲咱政府kah BⁿT德国原厂接触采购疫苗，差不多接近完成签约ê时，因为中国介入阻挡，延迟到今á日犹无法度签约。Khah要紧ê，咱应该hō͘逐个知影，中国疫苗ê真实状况，kah中国疫苗有jōa-ni̍h恐怖。

中国疫苗主要有三种：第一种是中国科兴疫苗（Sinovac），简称叫作「科兴疫苗」，全世界有23个国家地区采用；第二种是国药集团北京生物疫苗，简称叫作「国药疫苗」（Sinopharm），全世界有37个国家地区采用；第三种是中国康希诺生物疫苗克威莎（Convidencia），特点是注一筒tio̍hē-sái，真少外国采用。照世界卫生组织专家ê报告，中国三种疫苗ê共同特色是，有身ê查某人、60岁以上年长者kah有慢性病ê患者，注了后ê反应等安全性ê证据无够。

　　南美洲智利有买6,600万剂ê中国科兴疫苗，二月初三开始注以来，tī全国1,900万人口中已经有29%（551万人）注第一剂，有15%（285万人）注了两剂，但是确诊例顚倒愈chē。三月初，土耳其开始注中国科兴疫苗，到三月二二，有超过800万人注过第一剂，有500万人注完两剂，约占土耳其人口ê15%。到三月二一累计确诊案例突破300万，单日连续四工破两万例。引起土耳其人民相当不满。中国提供hō͘巴西上盖chē中国科兴疫苗，但是巴西武汉肺炎死亡人数已经超过40万人。四月二九。泰国女子排球队队员kah工作人员去注中国科兴疫苗，五月十二，二十二个人去做赛前检测，验出lóng总阳性反应。

中国国药疫苗mā无好kahtoh位去。四月初九新闻报导，菲律宾总统ê126个随身安全人员，靠势tī旧年底tio̍h lóng有注国药疫苗，最近检测全体确诊。五月初五新闻报导，南非东部、人口十万ê岛国西施亚，已经有六成民众注过武汉肺炎疫苗，其中六成（三万六千人）注中国国药疫苗。最近一两礼拜该国疫情升温，有三分之一ê重病病例有注过二剂疫苗。二月初四，匈牙利正式开放民众大规模注中国国药疫苗了后，却变作全球武汉肺炎死亡率上koânê国家。

五月二十新闻报导，有五名前往越南考察ê中国专家，转去中国了后确诊染病，chit五位专家出国前lóng有注过中国国产疫苗，可惜无讲toh一牌ê疫苗。其中一名专家已经转作重症患者，到五月十八伊一直有「小khóa呼吸困难」。 　　中国疫苗，无讲你m̄知thang惊！Beh注中国疫苗ê人请gia̍h手。 (210528)

注：智利　匈牙利　　请念华语