《绿色短评》

 | | | 转寄

每遍大选前，无派人去中国，中国国民党tio̍h bē晓选举？！

作者 李南衡, ChoânTâijī/全台字 by Chng Hūi-phêng 2023.12.31




Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》 Lí Lâmhêng

　　 Múipiàn tōasoán chêng, bô phài lâng khì Tiongkok, Tiongkok Kokbîntóng tio̍h bē hiáu soánkí?!

　　 Tiongkok Kokbîntóng hù chúse̍k Hā Li̍pgiân tī chit piàn chóngthóng tōasoán tâuphiò chêng saⁿcha̍p kang khì Tiongkok, ínkhí siāhōe gīlūn, bīntùi Bînchìntóng iaukiû soatbêng, cha̍pjīgoe̍h cha̍pgō͘, Tiongkok Kokbîntóng chúse̍k Chu Li̍plûn chiapsiū hóngbūn ê sî, phoephêng Bînchìntóng" bô boah âng tio̍h bē hiáu soánkí", koh kóng sòa lo̍hkhì ê soán chiàn, kok chióng boah o͘, boah âng, chō iâu lóng ū khólêng ē chhuthiān.

　　 Cha̍pjīgoe̍h chhekáu, Bînchiòngtóng chúse̍k Koa Bûntiat khì Lô͘chiu sàu ke pài phiò, hông mn̄g khí Tiongkok Kokbîntóng hù chóngthóng chhamsoánjîn Tiō Siáukhong, putboán Koa Bûntiat tī hō͘ tóngoân ê kongkhai phoe lāité boah âng Tiongkok Kokbîntóng. Koa Bûntiat chhiàng kóng,"púnlâi tio̍h sī âng・ê, kā in boah âng túhó niāniā."lán bô chhinchhiūⁿ ánne. Lán kóng líiû hō͘ Chu Li̍plûn chúse̍k chaiiáⁿ, lâng ná ē kā Tiongkok Kokbîntóng boah âng?

　　2016 nî itgoe̍h cha̍pla̍k, Tâioân chóngthóng hù chóngthóng kah li̍phoat úigoân soánkí, saⁿ kògoe̍h chêng ê 2015 nî cha̍pgoe̍h cha̍psaⁿ, tongsî sinûi Hêngchèngīⁿ Lio̍kúihōe chúúi ê Hā Li̍pgiân khì Kńgchiu chhamhóng, kah tongsî Tiongkok Koktâipān chújīm Tiuⁿ Chìkun hōebiān, tâmkhí nn̄g hōaⁿ léngtōchiá khólêng kìⁿbīn ê kihōe, chhioksêng cha̍pitgoe̍h chhechhit, Tiongkok kokka chúchek 习近平 kah Tâioân chóngthóng Má Engkiú tī Sinkapho hōebiān. Bêngbêng sī teh chō kihōe, the̍h koân Tiongkok Kokbîntóng ê siaⁿsè, khìtô͘ énghióng soánkí.

　　2022 nî pehgoe̍h chhejī, Bíkok Chiònggīīⁿ gītiúⁿ 佩洛西（Nancy Pelosi） bô chhap pakkiaⁿ ê kéngkò koân tiāu hóngbūn Tâioân, jîchhiáⁿ kah Tâioân chóngthóng Chhòa Engbûn kìⁿbīn. 佩洛西 soânhongsek tī Tāipak hóngbūn 20 tiámcheng līkhui Tâioân liáuāu, pehgoe̍h chhesì, Tiongkok káihòngkun hoattōng 2022 nî kuibô͘ phòa kìlo̍k hoân Tâi kunsū iánsi̍p ê sî, Tiongkok Kokbîntóng tihōe Lio̍kúihōe kaitóng hù chúse̍k Hā Li̍pgiân kah Chu Li̍plûn chúse̍k ê chhekū Ko Suphok ìn Tiongkok Kiōngsántóng tiongiong ê iauchhiáⁿ beh cho͘thoân khì Tiongkok, jîchhiáⁿ kóng ū "khólêng" ē kìⁿ Tiongkok Kiōngsántóng koaⁿoân, bôkoán chènghú khó͘khǹg kóng sîki bô ha̍pgî, in kui tīn iûgoân tī pehgoe̍h chhecha̍p piàⁿ khì Tiongkok, kóng sī ūi kongchit jînoân soánkí bō͘khoán. Hā Li̍pgiân khì liáu āu, Tiongkok tùi Tâi kunsū iánsi̍p m̄nā bô sokté, tiantò iântn̂g kunsū iánsi̍p sîkan. Che bêngbêng tio̍h sī kakī sàngkhì hō͘ Tiongkok ê thóngchiàn sò͘châi, Lio̍kúihōe phêngkek sī "Tī kunián ē thiauì hóngbūn Tiongkok, ho͘èng tùihōaⁿ thóngchiàn soânlu̍t, sīmchì sī khì hō͘ lâng phùi chhùinōa tī bīn ê hêngûi, oânchoân bôkoán koklāi kóngtōa bînì ê hoántùi". Saⁿ kògoe̍h āu ê cha̍pitgoe̍h jīcha̍pla̍k, tútú sī Tâioân ti̍that chhītiúⁿ, ti̍that chhī gīoân, koān ( chhī) tiúⁿ, koān (chhī) gīoân soánkí.

　　 Kiⁿî cha̍pjīgoe̍h cha̍psaⁿ àm, Tâioân chóngthóng tōasoán chìnji̍p saⁿcha̍p kang chêng siongtong bínkám ê sîkhek, Tiongkok Kokbîntóng hù chúse̍k Hā Li̍pgiân koh khì Tiongkok chhamhóng, ītēng cha̍pjīgoe̍h jīcha̍p tńglâi, ínhoat koântō͘ ê chenggī. Chioh mn̄g Tiongkok Kokbîntóng Chu Li̍plûn chúse̍k, sī ánchóaⁿ múi chi̍t piàn Tâioân tōasoán chêng, Tiongkok Kokbîntóng ittēng phài hù chúse̍k téng kokip tóngkoaⁿ khì Tiongkok? Tâioân lâng tongjiân ē hoâigî, lín tàuté sī khì Tiongkok niá "sèngchí" á・sī khì niá "chhèngchí"? Tâioân lâng kā lín boah âng káⁿ ū kā lín óngkhut? sī ánchóaⁿ múi chi̍t piàn tōasoán chêng, bô phài lâng khì Tiongkok, Tiongkok Kokbîntóng tio̍h bē hiáu soánkí?! kóng chi̍tê líiû lâi thiaⁿ. (231222)

Chù, 习近平 　　佩洛西 　　 chhiáⁿ liām Hôagí



Pe̍h-ōe-jī-pán/白话字版



《 Le̍k-sek toán-phêng 》 Lí Lâm-hêng

　　 Múi-piàn tōa-soán chêng, bô phài lâng khì Tiong-kok, Tiong-kok Kok-bîn-tóng tio̍h bē hiáu soán-kí?!

　　 Tiong-kok Kok-bîn-tóng hù chú-se̍k Hā Li̍p-giân tī chit piàn chóng-thóng tōa-soán tâu-phiò chêng saⁿ-cha̍p kang khì Tiong-kok, ín-khí siā-hōe gī-lūn, bīn-tùi Bîn-chìn-tóng iau-kiû soat-bêng, cha̍p-jī-goe̍h cha̍p-gō͘, Tiong-kok Kok-bîn-tóng chú-se̍k Chu Li̍p-lûn chiap-siū hóng-būn ê sî, phoe-phêng Bîn-chìn-tóng" bô boah âng tio̍h bē hiáu soán-kí", koh kóng sòa lo̍h-khì ê soán chiàn, kok chióng boah o͘, boah âng, chō iâu lóng ū khó-lêng ē chhut-hiān.

　　 Cha̍p-jī-goe̍h chhe-káu, Bîn-chiòng-tóng chú-se̍k Koa Bûn-tiat khì Lô͘-chiu sàu ke pài phiò, hông mn̄g khí Tiong-kok Kok-bîn-tóng hù chóng-thóng chham-soán-jîn Tiō Siáu-khong, put-boán Koa Bûn-tiat tī hō͘ tóng-oân ê kong-khai phoe lāi-té boah âng Tiong-kok Kok-bîn-tóng. Koa Bûn-tiat chhiàng kóng,"pún-lâi tio̍h sī âng-・ê, kā in boah âng tú-hó niā-niā."lán bô chhin-chhiūⁿ án-ne. Lán kóng lí-iû hō͘ Chu Li̍p-lûn chú-se̍k chai-iáⁿ, lâng ná ē kā Tiong-kok Kok-bîn-tóng boah âng?

　　2016 nî it-goe̍h cha̍p-la̍k, Tâi-oân chóng-thóng hù chóng-thóng kah li̍p-hoat úi-goân soán-kí, saⁿ kò-goe̍h chêng ê 2015 nî cha̍p-goe̍h cha̍p-saⁿ, tong-sî sin-ûi Hêng-chèng-īⁿ Lio̍k-úi-hōe chú-úi ê Hā Li̍p-giân khì Kńg-chiu chham-hóng, kah tong-sî Tiong-kok Kok-tâi-pān chú-jīm Tiuⁿ Chì-kun hōe-biān, tâm-khí nn̄g hōaⁿ léng-tō-chiá khó-lêng kìⁿ-bīn ê ki-hōe, chhiok-sêng cha̍p-it-goe̍h chhe-chhit, Tiong-kok kok-ka chú-chek 习近平 kah Tâi-oân chóng-thóng Má Eng-kiú tī Sin-ka-pho hōe-biān. Bêng-bêng sī teh chō ki-hōe, the̍h koân Tiong-kok Kok-bîn-tóng ê siaⁿ-sè, khì-tô͘ éng-hióng soán-kí.

　　2022 nî peh-goe̍h chhe-jī, Bí-kok Chiòng-gī-īⁿ gī-tiúⁿ 佩洛西（Nancy Pelosi） bô chhap pak-kiaⁿ ê kéng-kò koân tiāu hóng-būn Tâi-oân, jî-chhiáⁿ kah Tâi-oân chóng-thóng Chhòa Eng-bûn kìⁿ-bīn. 佩洛西 soân-hong-sek tī Tāi-pak hóng-būn 20 tiám-cheng lī-khui Tâi-oân liáu-āu, peh-goe̍h chhe-sì, Tiong-kok kái-hòng-kun hoat-tōng 2022 nî kui-bô͘ phòa kì-lo̍k hoân Tâi kun-sū ián-si̍p ê sî, Tiong-kok Kok-bîn-tóng ti-hōe Lio̍k-úi-hōe kai-tóng hù chú-se̍k Hā Li̍p-giân kah Chu Li̍p-lûn chú-se̍k ê chhe-kū Ko Su-phok ìn Tiong-kok Kiōng-sán-tóng tiong-iong ê iau-chhiáⁿ beh cho͘-thoân khì Tiong-kok, jî-chhiáⁿ kóng ū "khó-lêng" ē kìⁿ Tiong-kok Kiōng-sán-tóng koaⁿ-oân, bô-koán chèng-hú khó͘-khǹg kóng sî-ki bô ha̍p-gî, in kui tīn iû-goân tī peh-goe̍h chhe-cha̍p piàⁿ khì Tiong-kok, kóng sī ūi kong-chit jîn-oân soán-kí bō͘-khoán. Hā Li̍p-giân khì liáu āu, Tiong-kok tùi Tâi kun-sū ián-si̍p m̄-nā bô sok-té, tian-tò iân-tn̂g kun-sū ián-si̍p sî-kan. Che bêng-bêng tio̍h sī ka-kī sàng-khì hō͘ Tiong-kok ê thóng-chiàn sò͘-châi, Lio̍k-úi-hōe phêng-kek sī "Tī kun-ián ē thiau-ì hóng-būn Tiong-kok, ho͘-èng tùi-hōaⁿ thóng-chiàn soân-lu̍t, sīm-chì sī khì hō͘ lâng phùi chhùi-nōa tī bīn ê hêng-ûi, oân-choân bô-koán kok-lāi kóng-tōa bîn-ì ê hoán-tùi". Saⁿ kò-goe̍h āu ê cha̍p-it-goe̍h jī-cha̍p-la̍k, tú-tú sī Tâi-oân ti̍t-hat chhī-tiúⁿ, ti̍t-hat chhī gī-oân, koān ( chhī) tiúⁿ, koān (chhī) gī-oân soán-kí.

　　 Kin-nî cha̍p-jī-goe̍h cha̍p-saⁿ àm, Tâi-oân chóng-thóng tōa-soán chìn-ji̍p saⁿ-cha̍p kang chêng siong-tong bín-kám ê sî-khek, Tiong-kok Kok-bîn-tóng hù chú-se̍k Hā Li̍p-giân koh khì Tiong-kok chham-hóng, ī-tēng cha̍p-jī-goe̍h jī-cha̍p tńg-lâi, ín-hoat koân-tō͘ ê cheng-gī. Chioh mn̄g Tiong-kok Kok-bîn-tóng Chu Li̍p-lûn chú-se̍k, sī án-chóaⁿ múi chi̍t piàn Tâi-oân tōa-soán chêng, Tiong-kok Kok-bîn-tóng it-tēng phài hù chú-se̍k téng ko-kip tóng-koaⁿ khì Tiong-kok? Tâi-oân lâng tong-jiân ē hoâi-gî, lín tàu-té sī khì Tiong-kok niá "sèng-chí" á-・sī khì niá "chhèng-chí"? Tâi-oân lâng kā lín boah âng káⁿ ū kā lín óng-khut? sī án-chóaⁿ múi chi̍t piàn tōa-soán chêng, bô phài lâng khì Tiong-kok, Tiong-kok Kok-bîn-tóng tio̍h bē hiáu soán-kí?! kóng chi̍t-ê lí-iû lâi thiaⁿ. (231222)

Chù, 习近平 　　佩洛西 　　 chhiáⁿ liām Hôa-gí





　　中国国民党副主席夏立言tī chit遍总统大选投票前三十工去中国，引起社会议论，面对民进党要求说明，十二月十五，中国国民党主席朱立伦接受访问ê时，批评民进党「无抹红tio̍h bē晓选举」，koh讲续落去ê选战，各种抹黑、抹红、造谣lóng有可能ē出现。

　　十二月初九，民众党主席柯文哲去芦洲扫街拜票，hông问起中国国民党副总统参选人赵少康，不满柯文哲tīhō͘党员ê公开批内底抹红中国国民党。柯文哲唱讲，「本来tio̍h是红ê，kā in抹红tú好niā-niā。」咱无亲像án-ne。 咱讲理由hō͘朱立伦主席知影，人náēkā中国国民党抺红？

　　2016年一月十六，台湾总统副总统kah立法委员选举，三个月前ê2015年十月十三，当时身为行政院陆委会主委ê夏立言去广州参访，kah当时中国国台办主任张志军会面，谈起两岸领导者可能见面ê机会，促成十一月初七，中国国家主席习近平kah台湾总统马英九tī新加坡会面。明明是teh造机会，提koân中国国民党ê声势，企图影响选举。

　　2022年八月初二，美国众议院议长佩洛西（Nancy Pelosi）无chhap北京ê警告高调访问台湾，而且kah台湾总统蔡英文见面。佩洛西旋风式tī台北访问20点钟离开台湾了后，八月初四，中国解放军发动2022年规模破纪录环台军事演习ê时，中国国民党知会陆委会该党副主席夏立言kah朱立伦主席ê妻舅高思博应中国共产党中央ê邀请beh组团去中国，而且讲有「可能」会见中国共产党官员，无管政府苦劝讲时机无合宜，in归阵犹原tī八月初十拚去中国，讲是为公职人员选举募款。夏立言去了后，中国对台军事演习m̄-nā无缩短，顚倒延长军事演习时间。Che明明tio̍h是家己送去hō͘中国ê统战素材，陆委会抨击是「Tī军演下thiau意访问中国，呼应对岸统战旋律，甚至是去hō͘人phùi嘴澜tī面ê行为，完全无管国内广大民意ê反对」。三个月后ê十一月二十六，tútú是台湾直辖市长、直辖市议员、县（市）长、县（市）议员选举。

　　今年十二月十三暗，台湾总统大选进入三十工前相当敏感ê时刻，中国国民党副主席夏立言koh去中国参访，预定十二月二十转来，引发高度ê争议。借问中国国民党朱立伦主席，是按怎每一遍台湾大选前，中国国民党一定派副主席等高级党官去中国？台湾人当然ē怀疑，恁到底是去中国领「圣旨」抑是去领「铳chí」？台湾人kā恁抺红敢有kā恁枉屈？是按怎每一遍大选前，无派人去中国，中国国民党tio̍h bē晓选举？！讲一个理由来听。 (231222)

注：习近平　　佩洛西　　请念华语