《绿色短评》

 | | | 转寄

乌白骂民进党政府无能，咱听数字按怎讲！

作者 李南衡, ChoânTâijī/全台字 by Chng Hūi-phêng 2024.01.07




Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》　 Lí Lâmhêng

　 O͘pe̍h mē Bînchìntóng chènghú bô lêng, lán thiaⁿ sò͘jī ánchóaⁿ kóng!

Cha̍pitgoe̍h chhesì ēpo͘, Tiongkok Kokbîntóng tī Tâipak chhīchènghú chêng kóngtiûⁿ kípān bān lâng chōsè oa̍htāng, Má Engkiú chêng chóngthóng tì sû kóng, Bînchìntóng chipchèng 7 nî gōa si̍tchāi sī chò liáu siuⁿkòe chha. I kóng i bat choh kòe Tâipak chhītiúⁿ mā bat choh kòe chóngthóng, chi̍tê chènghú ētàng chò kah chiahni̍h chha mā bô kántan.

Kám ánne? lâng kóng sò͘jī ē kóngōe, lán lâi thiaⁿ sò͘jī ánchóaⁿ kóng.

Tiongiong chènghú chit kúi nî châichèng chóngkoatsoàn, Tiongkok Kokbîntóng Má Engkiú chènghú chipchèng peh nî, nînî ângjī, hūchè lúilúi. Siōnghó・ê 2015 nî hūchè 100 ek, siōngchha・ê 2018 nî hū chè 2,141 ek. Bînchìntóng Chhòa Engbûn chènghú chipchèng chhit nî gōa, ta̍k nî lóng ū chhunchîⁿ, siōngchha・ê 2017 nî tútú chiap Má chènghú 2016 nî hūchè 442 ek, kanta chhun 25 ek, siōnghó・ê 2022 nî chhun 4,964 ek.

Má Engkiú chêng chóngthóng chipchèng 8 nî, kengchè sêngtióng pêngkin 2.8%, pí choânkiû pêngkin ê 3.3% khah kē. Chhòa Engbûn chóngthóng chipchèng chhit nî gōa, Tâioân ùi 2019 nî khaisí, kengchè sêngtióng lu̍t chhiaukòe 3%, suijiân e̍kchêng tng giâmtiōng, tānsī Tâioân kengchè piáuhiān chiok súikhùi, 2020 kàu 2021 nî, kengchè sêngtióng lu̍t ùi 3.39% chhiong kàu 6.53%. Má Engkiú chêng chóngthóng chipchèng 8 nî Tâioân kengchè sī Achiu siōng bóe miâ, ha̍kchiá píkàu Má Engkiú chêng chóngthóng chipchèng 8 nî, kah Chhòa Engbûn chóngthóng chipchèng 7 nî gōa, kengchè oânchoân bô hoattō͘ siopí.

Lán lâi khòaⁿ chhutkháu kah gōasiau tèngtoaⁿê sò͘ kù thóngkè tio̍h chiok chhengchhó, Má Engkiú chêng chóngthóng chipchèng ê 2008 nî 3,517.3 ek bíkim, itti̍t kàu 2016 nî 4,445.4 ek bíkim. Chhòa Engbûn chóngthóng chipchèng ê chòekīn 2 nî 2021 chì 2022 nî chhiong phòa 6,741 ek bíkim, chhutkháu sò͘jī ta̍k nî seng koân, kūnî (2022 nî ) lán choân kok tùi gōa bō͘e̍k, íkeng chhiaukòe 9,000 ek bíkim, pí Má Engkiú chêng chóngthóng 2016 nî kau hō͘ Chhòa Engbûn chóngthóng ê sêngchek sêngtióng 70%, lâng kóng ánne kiò choh :"Tâioân sángia̍p siahsiah kiò!"

　　 Má Engkiú chêng chóngthóng jīmlāi 8 nî, Tâioân sitgia̍p lu̍t siōngkoân sī 2009 nî 5.85%, siōngkē sī 2015 nî 3.78%, Chhòa Engbûn chóngthóng chipchèng kàu bo̍kchêng chhit nî gōa, Tâioân sitgia̍p lu̍t siōngkoân sī 2021 nî 3.95%, siōng kē sī 2019 nî sī 3.64%.

　　 Má Engkiú chêng chóngthóng chipchèng ê chêng sì nî, Tâioân kó͘chhī itti̍t tī 7, 8,000 tiám gô lâi gô khì, tìsú 2012 nî piàⁿ liânjīm ê sî, bat chohkòe Má chènghú Kengchèpō͘ tiúⁿ ê Ún Khébêng tōasiaⁿ hoah, chhiáⁿ ta̍kê chichhî Má Engkiú chóngthóng, i nā liânjīm sêngkong, Tâioân kó͘chhī tio̍h ē pehchiūⁿ chi̍tbān tiám. Má Engkiú chêng chóngthóng liânjīm sêngkong, tānsī lóng m̄bat chiūⁿ chi̍tbān tiám, siōnghó・ê 2014 nî hongkoan sī 8,972.5 tiám. Ū chin chē lâng koài Ún Khébêng o͘pe̍h khui chiphiò. Ún Khébêng káisoeh kóng, soán Má Engkiú Tâioân kó͘chhī ē chiūⁿ chi̍tbān tiám, sī chi̍t chióng soánkí gígiân. Chhòa Engbûn chóngthóng bô kóng siáⁿmi̍h soánkí gígiân phiàn soánphiò, chipchèng tē jī nî ê 2017 nî hongkoan, Tâioân kó͘chhī tio̍h chiūⁿ chi̍tbān tiám, chòekīn 2023 nî cha̍pjīgoe̍h jīchhit, Tâioân kó͘chhī sī 17,897 tiám.

　　 Má Engkiú chêng chóngthóng kóng, chi̍tê chènghú beh chò kah chiahni̍h chha mā bô kántan. Goânlâi i sī teh kóng i kakī. 　　　(231229)


Pe̍h-ōe-jī-pán/白话字版



《 Le̍k-sek toán-phêng 》　 Lí Lâm-hêng

　 O͘-pe̍h mē Bîn-chìn-tóng chèng-hú bô lêng, lán thiaⁿ sò͘-jī án-chóaⁿ kóng!

Cha̍p-it-goe̍h chhe-sì ē-po͘, Tiong-kok Kok-bîn-tóng tī Tâi-pak chhī-chèng-hú chêng kóng-tiûⁿ kí-pān bān lâng chō-sè oa̍h-tāng, Má Eng-kiú chêng chóng-thóng tì sû kóng, Bîn-chìn-tóng chip-chèng 7 nî gōa si̍t-chāi sī chò liáu siuⁿ-kòe chha. I kóng i bat choh kòe Tâi-pak chhī-tiúⁿ mā bat choh kòe chóng-thóng, chi̍t-ê chèng-hú ē-tàng chò kah chiah-ni̍h chha mā bô kán-tan.

Kám án-ne? lâng kóng sò͘-jī ē kóng-ōe, lán lâi thiaⁿ sò͘-jī án-chóaⁿ kóng.

Tiong-iong chèng-hú chit kúi nî châi-chèng chóng-koat-soàn, Tiong-kok Kok-bîn-tóng Má Eng-kiú chèng-hú chip-chèng peh nî, nî-nî âng-jī, hū-chè lúi-lúi. Siōng-hó-・ê 2015 nî hū-chè 100 ek, siōng-chha-・ê 2018 nî hū chè 2,141 ek. Bîn-chìn-tóng Chhòa Eng-bûn chèng-hú chip-chèng chhit nî gōa, ta̍k nî lóng ū chhun-chîⁿ, siōng-chha-・ê 2017 nî tú-tú chiap Má chèng-hú 2016 nî hū-chè 442 ek, kan-ta chhun 25 ek, siōng-hó-・ê 2022 nî chhun 4,964 ek.

Má Eng-kiú chêng chóng-thóng chip-chèng 8 nî, keng-chè sêng-tióng pêng-kin 2.8%, pí choân-kiû pêng-kin ê 3.3% khah kē. Chhòa Eng-bûn chóng-thóng chip-chèng chhit nî gōa, Tâi-oân ùi 2019 nî khai-sí, keng-chè sêng-tióng lu̍t chhiau-kòe 3%, sui-jiân e̍k-chêng tng giâm-tiōng, tān-sī Tâi-oân keng-chè piáu-hiān chiok súi-khùi, 2020 kàu 2021 nî, keng-chè sêng-tióng lu̍t ùi 3.39% chhiong kàu 6.53%. Má Eng-kiú chêng chóng-thóng chip-chèng 8 nî Tâi-oân keng-chè sī A-chiu siōng bóe miâ, ha̍k-chiá pí-kàu Má Eng-kiú chêng chóng-thóng chip-chèng 8 nî, kah Chhòa Eng-bûn chóng-thóng chip-chèng 7 nî gōa, keng-chè oân-choân bô hoat-tō͘ sio-pí.

Lán lâi khòaⁿ chhut-kháu kah gōa-siau tèng-toaⁿê sò͘ -kù thóng-kè tio̍h chiok chheng-chhó, Má Eng-kiú chêng chóng-thóng chip-chèng ê 2008 nî 3,517.3 ek bí-kim, it-ti̍t kàu 2016 nî 4,445.4 ek bí-kim. Chhòa Eng-bûn chóng-thóng chip-chèng ê chòe-kīn 2 nî 2021 chì 2022 nî chhiong phòa 6,741 ek bí-kim, chhut-kháu sò͘-jī ta̍k nî seng koân, kū-nî (2022 nî ) lán choân kok tùi gōa bō͘-e̍k, í-keng chhiau-kòe 9,000 ek bí-kim, pí Má Eng-kiú chêng chóng-thóng 2016 nî kau hō͘ Chhòa Eng-bûn chóng-thóng ê sêng-chek sêng-tióng 70%, lâng kóng án-ne kiò choh :"Tâi-oân sán-gia̍p siah-siah kiò!"

　　 Má Eng-kiú chêng chóng-thóng jīm-lāi 8 nî, Tâi-oân sit-gia̍p lu̍t siōng-koân sī 2009 nî 5.85%, siōng-kē sī 2015 nî 3.78%, Chhòa Eng-bûn chóng-thóng chip-chèng kàu bo̍k-chêng chhit nî gōa, Tâi-oân sit-gia̍p lu̍t siōng-koân sī 2021 nî 3.95%, siōng kē sī 2019 nî sī 3.64%.

　　 Má Eng-kiú chêng chóng-thóng chip-chèng ê chêng sì nî, Tâi-oân kó͘-chhī it-ti̍t tī 7, 8,000 tiám gô lâi gô khì, tì-sú 2012 nî piàⁿ liân-jīm ê sî, bat choh-kòe Má chèng-hú Keng-chè-pō͘ -tiúⁿ ê Ún Khé-bêng tōa-siaⁿ hoah, chhiáⁿ ta̍k-ê chi-chhî Má Eng-kiú chóng-thóng, i nā liân-jīm sêng-kong, Tâi-oân kó͘-chhī tio̍h ē peh-chiūⁿ chi̍t-bān tiám. Má Eng-kiú chêng chóng-thóng liân-jīm sêng-kong, tān-sī lóng m̄-bat chiūⁿ chi̍t-bān tiám, siōng-hó-・ê 2014 nî hong-koan sī 8,972.5 tiám. Ū chin chē lâng koài Ún Khé-bêng o͘-pe̍h khui chi-phiò. Ún Khé-bêng kái-soeh kóng, soán Má Eng-kiú Tâi-oân kó͘-chhī ē chiūⁿ chi̍t-bān tiám, sī chi̍t chióng soán-kí gí-giân. Chhòa Eng-bûn chóng-thóng bô kóng siáⁿ-mi̍h soán-kí gí-giân phiàn soán-phiò, chip-chèng tē jī nî ê 2017 nî hong-koan, Tâi-oân kó͘-chhī tio̍h chiūⁿ chi̍t-bān tiám, chòe-kīn 2023 nî cha̍p-jī-goe̍h jī-chhit, Tâi-oân kó͘-chhī sī 17,897 tiám.

　　 Má Eng-kiú chêng chóng-thóng kóng, chi̍t-ê chèng-hú beh chò kah chiah-ni̍h chha mā bô kán-tan. Goân-lâi i sī teh kóng i ka-kī. 　　　(231229)




十一月初四下晡，中国国民党tī台北市政府前广场举办万人造势活动，马英九前总统致词讲，民进党执政7年外实在是做了siuⁿ过差。伊讲伊bat作过台北市长mā bat作过总统，一个政府ētàng做kah chiah-ni̍h差mā无简单。

Kám án-ne？人讲数字ē讲话，咱来听数字按怎讲。

中央政府chit几年财政总决算，中国国民党马英九政府执政八年，年年红字，负债lú-lú。上好ê2015年负债100亿，上差ê2018年负债2,141亿。民进党蔡英文政府执政七年外，逐年lóng有chhun钱，上差ê2017年tú-tú接马政府2016年负债442亿，kan-ta chhun 25亿，上好ê2022年chhun 4,964亿。

马英九前总统执政8年，经济成长平均2.8％，比全球平均ê3.3％ khah低。蔡英文总统执政七年外，台湾ùi 2019年开始，经济成长率超过3%，虽然疫情tng严重，但是台湾经济表现足súi气，2020到2021年，经济成长率ùi 3.39%冲到6.53%。马英九前总统执政8年台湾经济是亚洲上尾名，学者比较马英九前总统执政8年，kah蔡英文总统执政7年外，经济完全无法度相比。

咱来看出口kah外销订单ê数据统计tio̍h足清楚：马英九前总统执政ê 2008年3,517.3亿美金，一直到2016年4,445.4亿美金。蔡英文总统执政ê最近2年2021至2022年冲破6,741亿美金，出口数字逐年升koân，旧年（2022年）咱全国对外贸易，已经超过9,000亿美金，比马英九前总统2016年交hō͘蔡英文总统ê成绩成长70%，人讲án-ne叫作:「台湾产业siah-siah叫！」

　　马英九前总统任内8年，台湾失业率上koân是2009年5.85%，上低是2015年3.78%，蔡英文总统执政到目前七年外，台湾失业率上koân是2021年3.95％，上低是2019年是3.64%。

　　马英九前总统执政ê前四年，台湾股市一直tī7、8,000点gô来gô去，致使2012年拚连任ê时，bat作过马政府经济部长ê尹启铭大声喝，请ta̍kê支持马英九总统，伊若连任成功，台湾股市tio̍hē peh上一万点。马英九前总统连任成功，但是lóngm̄-bat上一万点，上好ê2014年封关是8,972.5点。有真chē人怪尹启铭乌白开支票。尹启铭解说讲：选马英九台湾股市ē上一万点，是一种选举语言。蔡英文总统无讲啥物选举语言骗选票，执政第二年ê2017年封关，台湾股市tio̍h上一万点，最近2023年十二月二七，台湾股市是17,897点。

　　马英九前总统讲：一个政府beh做kah chiah-ni̍h差mā无简单。原来伊是teh讲伊家己。　　　(231229)