《绿色短评》

 | | | 转寄

Chit款ê柯文哲讲伊是深绿ê，m̄惊笑破人ê嘴！

作者 李南衡, ChoânTâijī/全台字 by Chng Hūi-phêng 2023.12.24




Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》　 Lí Lâmhêng

　Chitkhoán ê Koa Bûntiat kóng i sī chhim le̍k・ê, m̄ kiaⁿ chhiò phòa lâng ê chhùi!

Cha̍pjīgoe̍h chhela̍k pòchhut ê Hôasī sinbûn choanhông tiong, Bînchiòngtóng chóngthóng chhamsoánjîn Koa Bûntiat kóng "góa lāisim púnchit iûgoân sī chhim le̍k・ ê!" chin chē lâng thiaⁿliáu lóng gāng・khì.

　　2014 nî cha̍pitgoe̍h chhechhit, Tâipakchhītiúⁿ soánkí tiānsī piānlūn hōe, Tiongkok Kokbîntóng hāusoánjîn Liân Sèngbûn chitgî bô tóngphài hāusoánjîn Koa Bûntiat kòekhì bat kóng kakī sī "kimkule̍k", chitmá khiok kóng beh têng khuiki, chhiauoa̍t Nâle̍k, thāitō͘ péngkhí péngtó. Koa Bûntiat hoánpo̍k kóng "góa kóng kòe góa sī kimkule̍k, hit tongsî sī ūitio̍h hiòng chitê siāhōe chèngbêng lí ê chhèng siong sī chin・ê, góa ánne kóng sī ūitio̍h Tâioân siāhōe ê hôhâi, lí kináji̍t kóng góa sī kimkule̍k, lí sī teh thiahli̍h chitê siāhōe, ūitio̍h lí kòjîn ê chèngtī līek!"Koa Bûntiat sī kóng 2010 nî cha̍pitgoe̍h jīla̍k, Gō͘ to͘ soánkí chêng chi̍t àm, Liân Sèngbûn tī Énghôchhī chō͘soán, hông khui chhèng gō͘ siong tio̍h sàngkhì Tâitāi pēⁿīⁿ, ū lâng hoâigî Liân Sèngbûn tio̍hsiong sī ké・ê, tongsî Tâitāi Chhòngsiong Iha̍kpō͘ chújīm Koa Bûntiat chhut bīn tēngchheng "góa sī chhimle̍k・ê, góa sī siōng tōa ê chèngjîn, chitê bôkhólêng chō ké". Ta̍kê oló Koa Bûntiat, hit piàn Tâipakchhī tiúⁿ soánkí chin chē Tâipak chhībîn tâuphiò soán hō͘ Koa Bûntiat.

2014 nî Koa Bûntiat tòngsoán chhītiúⁿ liáuāu, itchài sengbêng i sī chhēng pe̍hphâu ê iseng, tāipiáu Pe̍ksek le̍kliōng, chhiauoa̍t Nâ Le̍k ok tàu. Chin chē chhībîn siongsìn Pe̍hsek mā bē bái. 2015 nî pehgoe̍h cha̍ppeh, Koa Bûntiat chhītiúⁿ tē it piàn khì Siōnghái chhamka Siangsiâⁿ Lūntôaⁿ, khuibō͘ tìsû kóng i chichhî "两岸一家亲" ê chengsîn kah "sìê hō͘siong" goânchek, ta̍tkàu chhiokchìn kaulâu, chēngka siānì ê bo̍kphiau. Hông tōa kiaⁿ chi̍ttiô ê sī, 2013 nî cha̍pgoe̍h chhela̍k, Tiongkok kokka chúsek 习近平 tī Ìnnî Bâlîtó chèngsek thêchhut "两岸一家亲" ê kónghoat liáuāu, Koa Bûntiat sī tēitê tòe 习近平 ê chhùibóe kóng "两岸一家亲" ê Tâioân chèngtī jînbu̍t, 习近平 thiaⁿliáu liông sim tōa hí, Tiongkok kín kā Koa Bûntiat tòngchoh "kakī ê lâng". Chhúāu, Koa Bûntiat itchài hoatpiáu pô͘ Τiongkiōng khachhng ê giânlūn. Tâipak chhībîn kā Koa Bûntiat kóng choh sī "Italíah kok kî"— le̍k, pe̍h, âng saⁿ sek, khólêng ū lâng thiaⁿ khah bô, kóng Koa Bûntiat sī pinⁿ̂g khah chhengchhó, gōapiáu sī le̍k・ê, lāité pe̍h・ê, pō͘ pō͘ chi̍tē kui chhùi sī âng・ê. 2019 nî pehgoe̍h chhela̍k, Tâioân Bînchiòngtóng sêngli̍p, kiaⁿ hông kóng kah Le̍kiâⁿ jú kiâⁿ jú hn̄g. Káugoe̍h chhesaⁿ, Koa Bûntiat chiapsiū 《POP Tōakokbîn 》choanhóng ê sî, bat pióthài kòe sī chhimle̍k ê Koa Bûntiat kóng i kakī ê tések bô piàn, iûgoân sī le̍kté・ê.

　　 Koa Bûntiat káⁿ ūiáⁿ sī chhimle̍k・ ê? i nā chinchiàⁿ sī chhimle̍k・ê, bôkhólêng tī gō͘goe̍h hoatpiáu kokchèng pe̍hphôesu, lāṳông the̍h kàu Nn̄ghōaⁿ tio̍h tiôngsin khétāng Hòeba̍uh kah Ho̍kba̍uh tâmphòaⁿ; Koa Bûntiat nā chinchiàⁿ sī chhimle̍k・ê, bôkhólêng ē khì kah Nâsek ê Tiongkok Kokbîntóng tàukhang soán chóngthóng hùchóngthóng, siūⁿ beh ián tò le̍ksek ê Bînchìntóng; cha̍pitgoe̍h cha̍pgō͘, ū lâng mn̄g kóng, Koa Bûntiat kòeóng bat kóng chhutsì kàu taⁿ kakī siōng thóià ê sī bángá, kachoa̍h kah Tiongkok Kokbîntóng. Kináji̍t khiok beh kah Tiongkok Kokbîntóng chéngha̍p? Koa Bûntiat nā chinchiàⁿ sī chhimle̍k・ê, bôkhólêng ìn kóng, kakī chin thóià Kokbîntóng, tānsī koh khah thònghūn Bînchìntóng; Koa Bûntiat nā chinchiàⁿ sī chhimle̍k・ê, bôkhólêng ē tī cha̍pjīgoe̍h chhepeh kóng Bînchìntóng chúse̍k, chóngthóng hāusoánjîn Lōa Chhengtek "lâng chhengho͘ i sī Tâito̍k kimsun, góa khòaⁿ i chitmá íkeng sī Tâito̍k kusun".

Chitkhoán ê Koa Bûntiat kóng i sī chhimle̍k・ê, m̄ kiaⁿ chhiò phòa lâng ê chhùi! (231215)

Chù, 两岸一家亲 　习近平 chhiáⁿ liām Hôagí



Pe̍h-ōe-jī-pán/白话字版




《 Le̍k-sek toán-phêng 》　 Lí Lâm-hêng

　Chit-khoán ê Koa Bûn-tiat kóng i sī chhim le̍k-・ê, m̄ kiaⁿ chhiò phòa lâng ê chhùi!

Cha̍p-jī-goe̍h chhe-la̍k pò-chhut ê Hôa-sī sin-bûn choan-hông tiong, Bîn-chiòng-tóng chóng-thóng chham-soán-jîn Koa Bûn-tiat kóng "góa lāi-sim pún-chit iû-goân sī chhim le̍k-・ ê!" chin chē lâng thiaⁿ-liáu lóng gāng-・khì.

　　2014 nî cha̍p-it-goe̍h chhe-chhit, Tâi-pak-chhī-tiúⁿ soán-kí tiān-sī piān-lūn hōe, Tiong-kok Kok-bîn-tóng hāu-soán-jîn Liân Sèng-bûn chit-gî bô tóng-phài hāu-soán-jîn Koa Bûn-tiat kòe-khì bat kóng ka-kī sī "kim-ku-le̍k", chit-má khiok kóng beh têng khui-ki, chhiau-oa̍t Nâ-le̍k, thāi-tō͘ péng-khí péng-tó. Koa Bûn-tiat hoán-po̍k kóng "góa kóng kòe góa sī kim-ku-le̍k, hit tong-sî sī ūi-tio̍h hiòng chit-ê siā-hōe chèng-bêng lí ê chhèng siong sī chin-・ê, góa án-ne kóng sī ūi-tio̍h Tâi-oân siā-hōe ê hô-hâi, lí kin-á-ji̍t kóng góa sī kim-ku-le̍k, lí sī teh thiah-li̍h chit-ê siā-hōe, ūi-tio̍h lí kò-jîn ê chèng-tī lī-ek!"Koa Bûn-tiat sī kóng 2010 nî cha̍p-it-goe̍h jī-la̍k, Gō͘ -to͘ soán-kí chêng chi̍t àm, Liân Sèng-bûn tī Éng-hô-chhī chō͘-soán, hông khui chhèng gō͘ siong tio̍h sàng-khì Tâi-tāi pēⁿ-īⁿ, ū lâng hoâi-gî Liân Sèng-bûn tio̍h-siong sī ké-・ê, tong-sî Tâi-tāi Chhòng-siong I-ha̍k-pō͘ chú-jīm Koa Bûn-tiat chhut bīn tēng-chheng "góa sī chhim-le̍k-・ê, góa sī siōng tōa ê chèng-jîn, chit-ê bô-khó-lêng chō ké". Ta̍k-ê o-ló Koa Bûn-tiat, hit piàn Tâi-pak-chhī -tiúⁿ soán-kí chin chē Tâi-pak chhī-bîn tâu-phiò soán hō͘ Koa Bûn-tiat.

2014 nî Koa Bûn-tiat tòng-soán chhī-tiúⁿ liáu-āu, it-chài seng-bêng i sī chhēng pe̍h-phâu ê i-seng, tāi-piáu Pe̍k-sek le̍k-liōng, chhiau-oa̍t Nâ Le̍k ok tàu. Chin chē chhī-bîn siong-sìn Pe̍h-sek mā bē bái. 2015 nî peh-goe̍h cha̍p-peh, Koa Bûn-tiat chhī-tiúⁿ tē it piàn khì Siōng-hái chham-ka Siang-siâⁿ Lūn-tôaⁿ, khui-bō͘ tì-sû kóng i chi-chhî "两岸一家亲" ê cheng-sîn kah "sì-ê hō͘-siong" goân-chek, ta̍t-kàu chhiok-chìn kau-lâu, chēng-ka siān-ì ê bo̍k-phiau. Hông tōa kiaⁿ chi̍t-tiô ê sī, 2013 nî cha̍p-goe̍h chhe-la̍k, Tiong-kok kok-ka chú-sek 习近平 tī Ìn-nî Bâ-lî-tó chèng-sek thê-chhut "两岸一家亲" ê kóng-hoat liáu-āu, Koa Bûn-tiat sī tē-it-ê tòe 习近平 ê chhùi-bóe kóng "两岸一家亲" ê Tâi-oân chèng-tī jîn-bu̍t, 习近平 thiaⁿ-liáu liông sim tōa hí, Tiong-kok kín kā Koa Bûn-tiat tòng-choh "ka-kī ê lâng". Chhú-āu, Koa Bûn-tiat it-chài hoat-piáu pô͘ Τiong-kiōng kha-chhng ê giân-lūn. Tâi-pak chhī-bîn kā Koa Bûn-tiat kóng choh sī "I-ta-lí-ah kok kî"— le̍k, pe̍h, âng saⁿ sek, khó-lêng ū lâng thiaⁿ khah bô, kóng Koa Bûn-tiat sī pin-nn̂g khah chheng-chhó, gōa-piáu sī le̍k-・ê, lāi-té pe̍h-・ê, pō͘ pō͘ chi̍t-ē kui chhùi sī âng-・ê. 2019 nî peh-goe̍h chhe-la̍k, Tâi-oân Bîn-chiòng-tóng sêng-li̍p, kiaⁿ hông kóng kah Le̍k-iâⁿ jú kiâⁿ jú hn̄g. Káu-goe̍h chhe-saⁿ, Koa Bûn-tiat chiap-siū 《POP Tōa-kok-bîn 》choan-hóng ê sî, bat pió-thài kòe sī chhim-le̍k ê Koa Bûn-tiat kóng i ka-kī ê té-sek bô piàn, iû-goân sī le̍k-té-・ê.

　　 Koa Bûn-tiat káⁿ ū-iáⁿ sī chhim-le̍k-・ ê? i nā chin-chiàⁿ sī chhim-le̍k-・ê, bô-khó-lêng tī gō͘-goe̍h hoat-piáu kok-chèng pe̍h-phôe-su, lāi-iông the̍h kàu Nn̄g-hōaⁿ tio̍h tiông-sin khé-tāng Hòe-ba̍uh kah Ho̍k-ba̍uh tâm-phòaⁿ; Koa Bûn-tiat nā chin-chiàⁿ sī chhim-le̍k-・ê, bô-khó-lêng ē khì kah Nâ-sek ê Tiong-kok Kok-bîn-tóng tàu-khang soán chóng-thóng hù-chóng-thóng, siūⁿ beh ián tò le̍k-sek ê Bîn-chìn-tóng; cha̍p-it-goe̍h cha̍p-gō͘, ū lâng mn̄g kóng, Koa Bûn-tiat kòe-óng bat kóng chhut-sì kàu taⁿ ka-kī siōng thó-ià ê sī báng-á, ka-choa̍h kah Tiong-kok Kok-bîn-tóng. Kin-á-ji̍t khiok beh kah Tiong-kok Kok-bîn-tóng chéng-ha̍p? Koa Bûn-tiat nā chin-chiàⁿ sī chhim-le̍k-・ê, bô-khó-lêng ìn kóng, ka-kī chin thó-ià Kok-bîn-tóng, tān-sī koh khah thòng-hūn Bîn-chìn-tóng; Koa Bûn-tiat nā chin-chiàⁿ sī chhim-le̍k-・ê, bô-khó-lêng ē tī cha̍p-jī-goe̍h chhe-peh kóng Bîn-chìn-tóng chú-se̍k, chóng-thóng hāu-soán-jîn Lōa Chheng-tek "lâng chheng-ho͘ i sī Tâi-to̍k kim-sun, góa khòaⁿ i chit-má í-keng sī Tâi-to̍k ku-sun".

Chit-khoán ê Koa Bûn-tiat kóng i sī chhim-le̍k-・ê, m̄ kiaⁿ chhiò phòa lâng ê chhùi! (231215)

Chù, 两岸一家亲 　习近平 chhiáⁿ liām Hôa-gí


《绿色短评》　李南衡

　　　　　Chit款ê柯文哲讲伊是深绿ê，m̄惊笑破人ê嘴！

十二月初六播出ê华视新闻专访中，民众党总统参选人柯文哲讲「我内心本质犹原是深绿ê！」真chē人听了lóng gāng去。

　　2014年十一月初七，台北市长选举电视辩论会，中国国民党候选人连胜文质疑无党派候选人柯文哲过去bat讲家己是「金龟绿」，chit-má却讲beh重开机、超越蓝绿，态度反起反倒。柯文哲反驳讲「我讲过我是金龟绿，hit当时是为tio̍h向chit-ê社会证明你ê铳伤是真ê，我án-ne讲是为tio̍h台湾社会ê和谐，你今á日讲我是金龟绿，你是teh拆裂chit-ê社会，为tio̍h你个人ê政治利益！」柯文哲是讲2010年十一月二六，五都选举前一暗，连胜文tī永和市助选，hông开铳误伤tio̍h送去台大病院，有人怀疑连胜文tio̍h伤是假ê，当时台大创伤医学部主任柯文哲出面澄清「我是深绿ê，我是上大ê证人，chit-ê无可能造假」。逐个o-ló柯文哲，hit遍台北市长选举真chē台北市民投票选hō͘柯文哲。

2014年柯文哲当选市长了后，一再声明伊是穿白袍ê医生，代表白色力量，超越蓝绿恶斗。真chē市民相信白色mā bē bái。2015年八月十八，柯文哲市长第一遍去上海参加双城论坛，开幕致辞讲伊支持「两岸一家亲」ê精神kah「四个互相」原则，达到促进交流、增加善意ê目标。Hông大惊一tiôê是，2013年十月初六，中国国家主席习近平tī印尼巴厘岛正式提出「两岸一家亲」ê讲法了后，柯文哲是第一个tòe习近平ê嘴尾讲「两岸一家亲」ê台湾政治人物，习近平听了龙心大喜，中国紧kā柯文哲当作「家己ê人」。此后，柯文哲一再发表pô͘中共尻川ê言论。台北市民kā柯文哲讲作是「意大利国旗」—绿、白、红三色，可能有人听khah无，讲柯文哲是槟榔khah清楚：外表是绿ê，内底白ê，哺哺一下归嘴是红ê。2019年八月初六，台湾民众党成立，惊hông讲kah绿营愈kiâⁿ愈远。九月初三，柯文哲接受《POP大国民》专访ê时，bat表态过是深绿ê柯文哲讲伊家己ê底色无变，犹原是绿底ê。

　　柯文哲敢有影是深绿ê？伊若真正是深绿ê，无可能tī五月发表国政白皮书，内容提到两岸tio̍h重新启动货贸kah服贸谈判；柯文哲若真正是深绿ê，无可能会去kah蓝色ê中国国民党斗khang选总统副总统，想beh ián倒绿色ê民进党；十一月十五，有人问讲，柯文哲过往bat讲出世到taⁿ家己上讨厌ê是báng-á、ka-choa̍h kah中国国民党。今á日却beh kah中国国民党整合？柯文哲若真正是深绿ê，无可能应讲：家己真讨厌国民党，但是koh khah痛恨民进党；柯文哲若真正是深绿ê，无可能会tī十二月初八讲民进党主席、总统候选人赖清德「人称呼伊是台独金孙，我看伊chit-má已经是台独龟孙」。

Chit款ê柯文哲讲伊是深绿ê，m̄惊笑破人ê嘴！ (231215)

注：两岸一家亲　　习近平　　　请念华语