《绿色短评》

 | | | 转寄

犹有人m̄知影侯友宜是草包！

作者 李南衡, ChoânTâijī/全台字 by Chng Hūi-phêng 2023.12.17





Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》　　 Lí Lâmhêng

　　　 Iáuū lâng m̄chai iáⁿ Hāu Iúgî sī chháupau!

Cha̍pjīgoe̍h chhesì, Tiongkok Kokbîntóng chiàⁿ, hù chóngthóng chhamsoánjîn Hāu Iúgî, Tiō Siáukhong kah kēngpān cho͘chitpō͘ hù tiàuchi̍pjîn Chiā Liôngkài, khì kàu Tâilâmchhī Chhitkó͘khu koansim kngtiān, lô͘cha būntê, jîchhiáⁿ chhiamsú "hoán puttong chèngtiān ê liânsúsu". Hāu Iúgî kóng, i khòaⁿtio̍h hóhó chhân, hîun lóng hông ēng lâi chèngtiān, Tâilâm bílē ê thó͘tē, sengthài lóng hông phòhoāi liáuliáu, oânchoân lóng bô khólī lônghîbîn ê seⁿkè, jîchhiáⁿ ē chōsêng Jia̍ttó Hāuèng, siàuliân lâng siūⁿ beh tńgkhì kò͘hiong phahpiàⁿ, lóng khòaⁿ bē tio̍h kihōe kah hibāng.

　　Hit àm, Tâilâm chhīchènghú tio̍h piáusī,"M̄thang ūitio̍h chèngtī bo̍ktek itchài hoānchhò jîchhiáⁿ chhò kah siuⁿ līphó͘!" 2019 nî saⁿgoe̍h, Môatāu bûntàn tngteh khuihoe iáu bōe kiatkó, Chiā Liôngkài bat loān kóng ū 200 bān kin bûntàn hông hiatsak tī Chanbûnkhe po͘ , koh ū phah iáⁿphìⁿ,"tiantò sīhui". Chit piàn kā iâmthoaⁿ tē kóng choh hîtiān kiōngseⁿ àn tiûⁿ,"lóng sī lāmsám kóng"! Tâilâm chhīchènghú mā ū chèchok"thàṳông kngtiān káⁿ ē chōsêng Jia̍ttó hāuèng?" "káⁿ ūiáⁿ chin chē hóhó chhân hông ēng lâi chèngtiān?" téng kngtiān sió chaibat tô͘khah,têngchheng iâugiân m̄ sī sūsi̍t, chhiáⁿ m̄thang thiaⁿ sìn!"Jia̍ttó hāuèng" sī chí to͘chhī pí chiuûi tēkhu untō͘ khah koân ê hiānsiōng, Tâioân thàṳông kngtiānpán bīnchek pēng bô ta̍tkàu to͘chhī kuibô͘, m̄ sī thôaⁿgiân só͘ kóng ê. Jîchhiáⁿ hóhó chhân mā bē hông ēng lâi chèngtiān, kinkì 2020 nî chhitgoe̍h siuchèng ê "lônggia̍p chúkoán kikoan tôngì lônggia̍p ēng tē piànkeng súiōng símcha chokgia̍p iàutiám" kuitēng, hānchè te̍ktēng lônggia̍pkhu kah ióngsi̍t hîgia̍p sengsán khu lāi, lóng bē sái piànkeng siattì kngtiān.

Iúkoan Tiongkok Kokbîntóng chóngthóng chhamsoánjîn Hāu Iúgî kóng "kngtiānpán ē chōsêng Jia̍ttó hāuèng", "phòhoāi sengthài". Cha̍pjīgoe̍h chhegō͘, Bînchìntóng chóngthóng chhamsoánjîn Lōa Chhengtek hoánkek kóng, kngtiān sángia̍p bô hun Nâ Le̍k chipchèng lóng sī kokka chèngchhek, kngtiān bē tòalâi Jia̍ttó hāuèng, bē énghióng kànghō͘ liōng, mā bē chōsêng thiankáujia̍t, che sī kipún ê khoha̍k siôngsek. Chi̍tê chóngthóng chhamsoánjîn "engkai ū kipún ê khoha̍k siôngsek", jīmhô hāusoánjîn to bē sái ūitio̍h soánkí līek thiaukang kā Tâilâmchhī, kngtiān sángia̍p " tah phiauthâu".

　　 Cha̍pjīgoe̍h chhegō͘, Tâilâm chhītiúⁿ N̂g Úitiat tùi chittiám ti̍t chhiàng, Hāu Iúgî "bô siôngsek koh m̄ tha̍kchheh", kinpún sī "chhiauoa̍t Hân Kokjû ê tōa chháupau". N̂g chhītiúⁿ kóng liáu chha chi̍ttiámá, bô kàu khùi. Lán thiaⁿ Lâu Kachhiong ánchóaⁿ kóng,

La̍kgoe̍h cha̍psì chákhí, ithiòng chichhî Tiongkok Kokbîntóng ê chuchhim imga̍k lâng Lâu Kachhiong tī bīnchheh hoat bûn piáusī, i kakī khòaⁿliáu Hāu Iúgî tī Chèngtī Tāiha̍k kah ha̍kseng ê tappiān liáuāu, chiah thiatté liáukái, Hāu Iúgî "M̄nā sī chi̍tê chháupau, i chháupau lāité liân chi̍t ki chháu to bô","lâng mn̄g tang i ìn sai, līphó͘ kàu chīnpōng, o͘pe̍h loān kóng". Lâu Kachhiong kóng, bīntùi tâikha Tāiha̍kseng ê the̍hmn̄g, Hāu Iúgî ê ìntap náchhiūⁿ "chho͘tiongseng" ê thêngtō͘, sūāu ha̍kseng kā Hāu Iúgî chù 56 pun bô ki̍pkeh. Lâu Kachhiong jīnûi ánne sǹg sī "chiok tionghō͘"ah.

　　 Chin chē lâng iáu m̄chai iáⁿ Hāu Iúgî sī chháupau! Koh khah m̄chai iáⁿ Hāu Iúgî sī chi̍tê lāité liân chi̍t ki chháu to bô ê chháupau! 　　　　(231208)



Pe̍h-ōe-jī-pán/白话字版



《 Le̍k-sek toán-phêng 》　　 Lí Lâm-hêng

　　　 Iáu-ū lâng m̄-chai iáⁿ Hāu Iú-gî sī chháu-pau!

Cha̍p-jī-goe̍h chhe-sì, Tiong-kok Kok-bîn-tóng chiàⁿ, hù chóng-thóng chham-soán-jîn Hāu Iú-gî, Tiō Siáu-khong kah kēng-pān cho͘-chit-pō͘ hù tiàu-chi̍p-jîn Chiā Liông-kài, khì kàu Tâi-lâm-chhī Chhit-kó͘-khu koan-sim kng-tiān, lô͘-cha būn-tê, jî-chhiáⁿ chhiam-sú "hoán put-tong chèng-tiān ê liân-sú-su". Hāu Iú-gî kóng, i khòaⁿ-tio̍h hó-hó chhân, hî-un lóng hông ēng lâi chèng-tiān, Tâi-lâm bí-lē ê thó͘-tē, seng-thài lóng hông phò-hoāi liáu-liáu, oân-choân lóng bô khó-lī lông-hî-bîn ê seⁿ-kè, jî-chhiáⁿ ē chō-sêng Jia̍t-tó Hāu-èng, siàu-liân lâng siūⁿ beh tńg-khì kò͘-hiong phah-piàⁿ, lóng khòaⁿ bē tio̍h ki-hōe kah hi-bāng.

　　Hit àm, Tâi-lâm chhī-chèng-hú tio̍h piáu-sī,"M̄-thang ūi-tio̍h chèng-tī bo̍k-tek it-chài hoān-chhò jî-chhiáⁿ chhò kah siuⁿ lī-phó͘!" 2019 nî saⁿ-goe̍h, Môa-tāu bûn-tàn tng-teh khui-hoe iáu bōe kiat-kó, Chiā Liông-kài bat loān kóng ū 200 bān kin bûn-tàn hông hiat-sak tī Chan-bûn-khe po͘ , koh ū phah iáⁿ-phìⁿ,"tian-tò sī-hui". Chit piàn kā iâm-thoaⁿ tē kóng choh hî-tiān kiōng-seⁿ àn tiûⁿ,"lóng sī lām-sám kóng"! Tâi-lâm chhī-chèng-hú mā ū chè-chok"thài-iông kng-tiān káⁿ ē chō-sêng Jia̍t-tó hāu-èng?" "káⁿ ū-iáⁿ chin chē hó-hó chhân hông ēng lâi chèng-tiān?" téng kng-tiān sió chai-bat tô͘-khah,têng-chheng iâu-giân m̄ sī sū-si̍t, chhiáⁿ m̄-thang thiaⁿ sìn!"Jia̍t-tó hāu-èng" sī chí to͘-chhī pí chiu-ûi tē-khu un-tō͘ khah koân ê hiān-siōng, Tâi-oân thài-iông kng-tiān-pán bīn-chek pēng bô ta̍t-kàu to͘-chhī kui-bô͘, m̄ sī thôaⁿ-giân só͘ kóng ê. Jî-chhiáⁿ hó-hó chhân mā bē hông ēng lâi chèng-tiān, kin-kì 2020 nî chhit-goe̍h siu-chèng ê "lông-gia̍p chú-koán ki-koan tông-ì lông-gia̍p ēng tē piàn-keng sú-iōng sím-cha chok-gia̍p iàu-tiám" kui-tēng, hān-chè te̍k-tēng lông-gia̍p-khu kah ióng-si̍t hî-gia̍p seng-sán khu lāi, lóng bē sái piàn-keng siat-tì kng-tiān.

Iú-koan Tiong-kok Kok-bîn-tóng chóng-thóng chham-soán-jîn Hāu Iú-gî kóng "kng-tiān-pán ē chō-sêng Jia̍t-tó hāu-èng", "phò-hoāi seng-thài". Cha̍p-jī-goe̍h chhe-gō͘, Bîn-chìn-tóng chóng-thóng chham-soán-jîn Lōa Chheng-tek hoán-kek kóng, kng-tiān sán-gia̍p bô hun Nâ Le̍k chip-chèng lóng sī kok-ka chèng-chhek, kng-tiān bē tòa-lâi Jia̍t-tó hāu-èng, bē éng-hióng kàng-hō͘ liōng, mā bē chō-sêng thian-káu-jia̍t, che sī ki-pún ê kho-ha̍k siông-sek. Chi̍t-ê chóng-thóng chham-soán-jîn "eng-kai ū ki-pún ê kho-ha̍k siông-sek", jīm-hô hāu-soán-jîn to bē sái ūi-tio̍h soán-kí lī-ek thiau-kang kā Tâi-lâm-chhī, kng-tiān sán-gia̍p " tah phiau-thâu".

　　 Cha̍p-jī-goe̍h chhe-gō͘, Tâi-lâm chhī-tiúⁿ N̂g Úi-tiat tùi chit-tiám ti̍t chhiàng, Hāu Iú-gî "bô siông-sek koh m̄ tha̍k-chheh", kin-pún sī "chhiau-oa̍t Hân Kok-jû ê tōa chháu-pau". N̂g chhī-tiúⁿ kóng liáu chha chi̍t-tiám-á, bô kàu khùi. Lán thiaⁿ Lâu Ka-chhiong án-chóaⁿ kóng,

La̍k-goe̍h cha̍p-sì chá-khí, it-hiòng chi-chhî Tiong-kok Kok-bîn-tóng ê chu-chhim im-ga̍k lâng Lâu Ka-chhiong tī bīn-chheh hoat bûn piáu-sī, i ka-kī khòaⁿ-liáu Hāu Iú-gî tī Chèng-tī Tāi-ha̍k kah ha̍k-seng ê tap-piān liáu-āu, chiah thiat-té liáu-kái, Hāu Iú-gî "M̄-nā sī chi̍t-ê chháu-pau, i chháu-pau lāi-té liân chi̍t ki chháu to bô","lâng mn̄g tang i ìn sai, lī-phó͘ kàu chīn-pōng, o͘-pe̍h loān kóng". Lâu Ka-chhiong kóng, bīn-tùi tâi-kha Tāi-ha̍k-seng ê the̍h-mn̄g, Hāu Iú-gî ê ìn-tap ná-chhiūⁿ "chho͘-tiong-seng" ê thêng-tō͘, sū-āu ha̍k-seng kā Hāu Iú-gî chù 56 pun bô ki̍p-keh. Lâu Ka-chhiong jīn-ûi án-ne sǹg sī "chiok tiong-hō͘"ah.

　　 Chin chē lâng iáu m̄-chai iáⁿ Hāu Iú-gî sī chháu-pau! Koh khah m̄-chai iáⁿ Hāu Iú-gî sī chi̍t-ê lāi-té liân chi̍t ki chháu to bô ê chháu-pau! 　　　　(231208)




十二月初四，中国国民党正、副总统参选人侯友宜、赵少康kah竞办组织部副召集人谢龙介，去到台南市七股区关心光电、炉碴问题，而且签署「反不当种电ê连署书」。侯友宜讲，伊看tio̍h好好田、鱼塭lóng hông用来种电，台南美丽ê土地、生态lóng hông破坏了了，完全lóng无考虑农渔民ê生计，而且ē造成热岛效应，少年人想beh转去故乡拍拚，lóng看bē tio̍h机会kah希望。

　　Hit暗，台南市政府tio̍h表示，「M̄-thang为tio̍h政治目的一再犯错而且错kahsiuⁿ离谱！」2019年三月，麻豆文旦当teh开花犹未结果，谢龙介bat乱讲有200万斤文旦hông hiat-saktī曾文溪埔、koh有拍影片，「顚倒是非」。Chit遍kā盐滩地讲作渔电共生案场，「lóng是滥糁讲」！台南市政府mā有制作「太阳光电敢ē造成热岛效应？」「敢有影真chē好好田hông用来种电？」等光电小知识图卡，澄清谣言m̄是事实，请m̄-thang听信！「热岛效应」是指都市比周围地区温度khah koânê现象，台湾太阳光电板面积并无达到都市规模，m̄是传言所讲ê。而且好好田mā bē hông用来种电，根据2020年七月修正ê「农业主管机关同意农业用地变更使用审查作业要点」规定，限制特定农业区kah养殖渔业生产区内，lóng bē使变更设置光电。

有关中国国民党总统参选人侯友宜讲「光电板ē造成热岛效应」、「破坏生态」。十二月初五，民进党总统参选人赖清德反击讲，光电产业无分蓝绿执政lóng是国家政策，光电bē带来热岛效应、bē影响降雨量，mā bē造成天狗热，che是基本ê科学常识。一个总统参选人「应该有基本ê科学常识」，任何候选人都bē使为tio̍h选举利益刁工kā台南市、光电产业「贴标头」。

　　十二月初五，台南市长黄伟哲对chit点直唱，侯友宜「无常识koh m̄读册」，根本是「超越韩国瑜ê大草包」。黄市长讲了差一点á、无够气。咱听刘家昌按怎讲：

六月十四早起，一向支持中国国民党ê资深音乐人刘家昌tī面册发文表示，伊家己看了侯友宜tī政治大学kah学生ê答辩了后，才彻底了解，侯友宜「M̄-nā是一个草包，伊草包内底连一枝草都无」、「人问东伊应西、离谱到尽磅，乌白乱讲」。刘家昌讲，面对台脚大学生ê提问，侯友宜ê应答那像「初中生」ê程度，事后学生kā侯友宜注56分无及格。刘家昌认为án-ne算是「足忠厚」ah。

　　真chē人犹m̄知影侯友宜是草包！Koh khah m̄知影侯友宜是一个内底连一枝草都无ê草包！　　　　(231208)