《绿色短评》

 | | | 转寄

侯友宜beh kah人比啥？

作者 李南衡, ChoânTâijī/全台字 by Chng Hūi-phêng 2023.12.10




Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　 Lí Lâmhêng

　　　　　 Hāu Iúgî beh kah lâng pí siáⁿ?

　　 Gō͘goe̍h cha̍pchhit, Tiongkok Kokbîntóng tengtiàu Sinpak chhītiúⁿ Hāu Iúgî chhamsoán chóngthóng, Bíkok 《 New York Sîpò 》 sûisî pòtō, Tiongkok Kokbîntóng chêng nn̄g piàn chóngthóng tōasoán sitlī ê koankiàn insò͘, sī chútiuⁿ Nn̄ghōaⁿ kakiông kaulâu. Pakkiaⁿ tùi Tâioân pō͘pō͘ chìnpek tìsú soánbîn hoânló ê sî, Tiongkok Kokbîntóng kā kohchài chipchèng ê hibāng kiàthok tī chi̍t ūi chhutsin kéngkài, siū soánbîn hoangêng, tī Nn̄ghōaⁿ gītê téngbīn náchhīⁿ chi̍t tiuⁿ pe̍h chóa, i tùi Tiongkok ê khòaⁿhoat bôngbông biáubiáu."华尔街Ji̍tpò" te̍kpia̍t kiôngtiāu, Tiongkok būntê sī Tâioân chóngthóng tōasoán ê he̍ksim gītê, Hāu Iúgî tùi Tiongkok būntê chháichhú ê li̍ptiûⁿ kipún siōng sī ē siám tio̍h siám.

　　Cha̍pitgoe̍h jīsì chákhí, Tiongkok Kokbîntóng Hāu Iúgî koattēng kah hùchhiú Tiō Siáukhong liânha̍p chhutchiàn, Hāu Iúgî kiôngtiāu i kah Tiō Siáukhong ê chèngkiàn tōapō͘hūn kāngkhoán, kanta sió pō͘hūn bô kâng, putkò soánchiàn itchhè "í chóngthóng chhamsoánjîn choh chúthé tiongsim". Tiō Siáukhong sûisî chiap lo̍hkhì kóng,"Hāu chhītiúⁿ thêchhut・lâi ê chin chē chèngkiàn lóng sī góa ê. "Tiongkok Kokbîntóng thêmiâ ê chóngthóng chhamsoán jîn bô chèngkiàn, tàuté beh kah lâng pí siáⁿ?

Sinbûn pòtō, cha̍pitgoe̍h jīla̍k, Hāu Iúgî thè Nâiâⁿ li̍púi chhamsoánjîn Lí Gānsiù khiā tâi ê sî kámsiā Tiō Siáukhong, kóng "jînseng tio̍h sī kóng sìniōng. Hiaⁿtī kóng thīn lí tio̍h thīn lí, i kóng Nâ Pe̍h ētàng ha̍p tio̍h ha̍p, bē tàng ha̍p i mā ē sio thīn! "sòa lo̍hkhì i náchhiūⁿ sī teh àm chhiùⁿ Koa Bûntiat,"M̄kiaⁿsí ê lâng tú tio̍h hitê bē kiànsiàu ê lâng, bē kiànsiàu ê lâng ittēng ē sí."bôtāi bôchì hông tôaⁿ tio̍h chhèng ê Koa Bûntiat, tējī kang hôeèng kóng,"bô iàukín lah, I ( Hāu Iúgî) engkai ē kóng i sitgiân! "haha chhiò chi̍tsiaⁿ. Nn̄g kang āu Hāu Iúgî chiah têngchheng kóng,"góa sī kóng Bînchìntóng lah", bô teh kóng pa̍t lâng.

Goânlâi, bô siáⁿ thang pí ê Hāu Iúgî, siūⁿ beh kah Bînchìntóng pí bē kiànsiàu! Tiongkok Kokbîntóng bē kiànsiàu sī sèkàṳt・ê, siáng káⁿ kah i pí? "Nâ Pe̍h ha̍p" hia̍pgī tiong, chi̍tê tôngtông pahnî tōa tóng ê Tiongkok Kokbîntóng bē kiànsiàu kah iaukiû chi̍tê siósió ê Bînchiòngtóng, pí bîn tiāu ê sî tio̍h niū i 3%! to iáubōe soánkí,"Nâ Pe̍h ha̍p" hia̍pgī tio̍h phahphài siáⁿ lâng choh siáⁿmi̍h pō͘tiúⁿ, náchhiūⁿ chha̍tá thó͘húi teh hunchong. Cha̍pitgoe̍h jīsaⁿ, Bînchiòngtóng chúse̍k Koa Bûntiat liôngsim hoathiān, kóng "Nâ Pe̍h ha̍p" la̍k tiâu hia̍pgī khióngkiaⁿ ū ûihoán" kîiok iūsoán". Bô liôngsim ê Tiongkok Kokbîntóng tongjiân m̄chai iáⁿ siáⁿmi̍h kiòchoh bē kiànsiàu.

　　 Bô siáⁿ thang pí ê Hāu Iúgî, cha̍pitgoe̍h jīla̍k kóng, "siáⁿ lâng ē pí góa khah ài Tâioân? Lōa Chhengtek kám ē pí góa khah ài Tâioân?" siáⁿ lâng khah ài Tâioân m̄ sī chhinchhiūⁿ Hāu Iúgî só͘ mē・ê,"Lōa Chhengtek ēng chhùi ài Tâioân, góa sī ēng hêngtōng ài Tâioân, ēng sèⁿmiā kò͘ Tâioân!" cha̍pitgoe̍h jīchhit Hāu Iúgî kóng, i nā tòngsoán chóngthóng beh tōaliōng khàihòng Tiongkok lúkheh, Tiongkok ha̍kseng lâi Tâioân tha̍kchheh koh chiūgia̍p, ánne lâi chhìkek Tâioân kengchè. Kiⁿî itgoe̍h chì la̍kgoe̍h, Tiongkok chhengliân (16 chì 24 hòe) ê sitgia̍plu̍t pêngkin sī 19.58%, la̍kgoe̍h 21.3% sī le̍ksú siōng tēit koân. Kiⁿî itgoe̍h chì la̍kgoe̍h, lán Tâioân chhengliân sitgia̍p lu̍t pêngkin sī 11.44%. Hāu Iúgî ài Tâioân ài ùi Tiongkok khì, hoânló Tiongkok chhengliân sitgia̍plu̍t siuⁿ koân, ài Tâioân ài kah hiâm Tâioân chhengliân sitgia̍plu̍t siuⁿ kē, ánne kám sī teh ài Tâioân!? (231201)

Chù, 华尔街 chhiáⁿ liām Hôagí


Pe̍h-ōe-jī-pán/白话字版



《 Le̍k-sek toán-phêng 》　　　 Lí Lâm-hêng

　　　　　 Hāu Iú-gî beh kah lâng pí siáⁿ?

　　 Gō͘-goe̍h cha̍p-chhit, Tiong-kok Kok-bîn-tóng teng-tiàu Sin-pak chhī-tiúⁿ Hāu Iú-gî chham-soán chóng-thóng, Bí-kok 《 New York Sî-pò 》 sûi-sî pò-tō, Tiong-kok Kok-bîn-tóng chêng nn̄g piàn chóng-thóng tōa-soán sit-lī ê koan-kiàn in-sò͘, sī chú-tiuⁿ Nn̄g-hōaⁿ ka-kiông kau-lâu. Pak-kiaⁿ tùi Tâi-oân pō͘-pō͘ chìn-pek tì-sú soán-bîn hoân-ló ê sî, Tiong-kok Kok-bîn-tóng kā koh-chài chip-chèng ê hi-bāng kià-thok tī chi̍t ūi chhut-sin kéng-kài, siū soán-bîn hoan-gêng, tī Nn̄g-hōaⁿ gī-tê téng-bīn ná-chhīⁿ chi̍t tiuⁿ pe̍h chóa, i tùi Tiong-kok ê khòaⁿ-hoat bông-bông biáu-biáu."华尔街Ji̍t-pò" te̍k-pia̍t kiông-tiāu, Tiong-kok būn-tê sī Tâi-oân chóng-thóng tōa-soán ê he̍k-sim gī-tê, Hāu Iú-gî tùi Tiong-kok būn-tê chhái-chhú ê li̍p-tiûⁿ ki-pún siōng sī ē siám tio̍h siám.

　　Cha̍p-it-goe̍h jī-sì chá-khí, Tiong-kok Kok-bîn-tóng Hāu Iú-gî koat-tēng kah hù-chhiú Tiō Siáu-khong liân-ha̍p chhut-chiàn, Hāu Iú-gî kiông-tiāu i kah Tiō Siáu-khong ê chèng-kiàn tōa-pō͘-hūn kāng-khoán, kan-ta sió pō͘-hūn bô kâng, put-kò soán-chiàn it-chhè "í chóng-thóng chham-soán-jîn choh chú-thé tiong-sim". Tiō Siáu-khong sûi-sî chiap lo̍h-khì kóng,"Hāu chhī-tiúⁿ thê-chhut-・lâi ê chin chē chèng-kiàn lóng sī góa ê. "Tiong-kok Kok-bîn-tóng thê-miâ ê chóng-thóng chham-soán- jîn bô chèng-kiàn, tàu-té beh kah lâng pí siáⁿ?

Sin-bûn pò-tō, cha̍p-it-goe̍h jī-la̍k, Hāu Iú-gî thè Nâ-iâⁿ li̍p-úi chham-soán-jîn Lí Gān-siù khiā tâi ê sî kám-siā Tiō Siáu-khong, kóng "jîn-seng tio̍h sī kóng sìn-iōng. Hiaⁿ-tī kóng thīn lí tio̍h thīn lí, i kóng Nâ Pe̍h ē-tàng ha̍p tio̍h ha̍p, bē tàng ha̍p i mā ē sio thīn! "sòa lo̍h-khì i ná-chhiūⁿ sī teh àm chhiùⁿ Koa Bûn-tiat,"M̄-kiaⁿ-sí ê lâng tú tio̍h hit-ê bē kiàn-siàu ê lâng, bē kiàn-siàu ê lâng it-tēng ē sí."bô-tāi bô-chì hông tôaⁿ tio̍h chhèng ê Koa Bûn-tiat, tē-jī kang hôe-èng kóng,"bô iàu-kín lah, I ( Hāu Iú-gî) eng-kai ē kóng i sit-giân! "ha-ha chhiò chi̍t-siaⁿ. Nn̄g kang āu Hāu Iú-gî chiah têng-chheng kóng,"góa sī kóng Bîn-chìn-tóng lah", bô teh kóng pa̍t lâng.

Goân-lâi, bô siáⁿ thang pí ê Hāu Iú-gî, siūⁿ beh kah Bîn-chìn-tóng pí bē kiàn-siàu! Tiong-kok Kok-bîn-tóng bē kiàn-siàu sī sè-kài-it-・ê, siáng káⁿ kah i pí? "Nâ Pe̍h ha̍p" hia̍p-gī tiong, chi̍t-ê tông-tông pah-nî tōa tóng ê Tiong-kok Kok-bîn-tóng bē kiàn-siàu kah iau-kiû chi̍t-ê sió-sió ê Bîn-chiòng-tóng, pí bîn tiāu ê sî tio̍h niū i 3%! to iáu-bōe soán-kí,"Nâ Pe̍h ha̍p" hia̍p-gī tio̍h phah-phài siáⁿ lâng choh siáⁿ-mi̍h pō͘-tiúⁿ, ná-chhiūⁿ chha̍t-á thó͘-húi teh hun-chong. Cha̍p-it-goe̍h jī-saⁿ, Bîn-chiòng-tóng chú-se̍k Koa Bûn-tiat liông-sim hoat-hiān, kóng "Nâ Pe̍h ha̍p" la̍k tiâu hia̍p-gī khióng-kiaⁿ ū ûi-hoán" kî-iok iū-soán". Bô liông-sim ê Tiong-kok Kok-bîn-tóng tong-jiân m̄-chai iáⁿ siáⁿ-mi̍h kiò-choh bē kiàn-siàu.

　　 Bô siáⁿ thang pí ê Hāu Iú-gî, cha̍p-it-goe̍h jī-la̍k kóng, "siáⁿ lâng ē pí góa khah ài Tâi-oân? Lōa Chheng-tek kám ē pí góa khah ài Tâi-oân?" siáⁿ lâng khah ài Tâi-oân m̄ sī chhin-chhiūⁿ Hāu Iú-gî só͘ mē-・ê,"Lōa Chheng-tek ēng chhùi ài Tâi-oân, góa sī ēng hêng-tōng ài Tâi-oân, ēng sèⁿ-miā kò͘ Tâi-oân!" cha̍p-it-goe̍h jī-chhit Hāu Iú-gî kóng, i nā tòng-soán chóng-thóng beh tōa-liōng khài-hòng Tiong-kok lú-kheh, Tiong-kok ha̍k-seng lâi Tâi-oân tha̍k-chheh koh chiū-gia̍p, án-ne lâi chhì-kek Tâi-oân keng-chè. Kin-nî it-goe̍h chì la̍k-goe̍h, Tiong-kok chheng-liân (16 chì 24 hòe) ê sit-gia̍p-lu̍t pêng-kin sī 19.58%, la̍k-goe̍h 21.3% sī le̍k-sú siōng tē-it koân. Kin-nî it-goe̍h chì la̍k-goe̍h, lán Tâi-oân chheng-liân sit-gia̍p lu̍t pêng-kin sī 11.44%. Hāu Iú-gî ài Tâi-oân ài ùi Tiong-kok khì, hoân-ló Tiong-kok chheng-liân sit-gia̍p-lu̍t siuⁿ koân, ài Tâi-oân ài kah hiâm Tâi-oân chheng-liân sit-gia̍p-lu̍t siuⁿ kē, án-ne kám sī teh ài Tâi-oân!? (231201)

Chù, 华尔街 chhiáⁿ liām Hôa-gí




　　五月十七，中国国民党徵召新北市长侯友宜参选总统，美国《纽约时报》随时报导，中国国民党前两遍总统大选失利ê关键因素，是主张两岸加强交流。北京对台湾步步进迫致使选民烦恼ê时，中国国民党kā koh再执政ê希望寄托tī一位出身警界、受选民欢迎、tī两岸议题顶面那像一张白纸，伊对中国ê看法茫茫渺渺。「华尔街日报」特别强调，中国问题是台湾总统大选ê核心议题，侯友宜对中国问题采取ê立场基本上是ē闪tio̍h闪。

　　十一月二四早起，中国国民党侯友宜决定kah副手赵少康联合出战，侯友宜强调伊kah赵少康ê政见大部分仝款、kan-ta小部分无仝，不过选战一切「以总统参选人作主体中心」。赵少康随时接落去讲，「侯市长提出来ê真chē政见lóng是我ê。」中国国民党提名ê总统参选人无政见，到底beh kah人比啥？

新闻报导：十一月二六，侯友宜替蓝营立委参选人李彦秀khiā台ê时感谢赵少康，讲「人生tio̍h是讲信用。兄弟讲thīn你tio̍h thīn你，伊讲蓝白ētàng合tio̍h合，bē tàng合伊māē相thīn！」续落去伊那像是teh暗唱柯文哲，「M̄惊死ê人抵tio̍h hit-ê bē见笑ê人，bē见笑ê人一定ē死。」无代无志hông弹tio̍h铳ê柯文哲，第二工回应讲：「无要紧lah，伊（侯友宜）应该ē讲伊失言！」哈哈笑一声。两工后侯友宜才澄清讲，「我是讲民进党lah」，无teh讲别人。

原来，无啥thang比ê侯友宜，想beh kah民进党比bē见笑！中国国民党bē见笑是世界一ê，siáng敢kah伊比？「蓝白合」协议中，一个堂堂百年大党ê中国国民党bē见笑kah要求一个小小ê民众党，比民调ê时tio̍h让伊3%！都犹未选举，「蓝白合」协议tio̍h拍派啥人作啥物部长，那像贼仔土匪teh分赃。十一月二三，民众党主席柯文哲良心发现，讲「蓝白合」六条协议恐惊有违反「期约贿选」。无良心ê中国国民党当然m̄知影啥物叫作bē见笑。

　　无啥thang比ê侯友宜，十一月二六讲，「啥人ē比我khah爱台湾？赖清德kámē比我khah爱台湾？」啥人khah爱台湾m̄是亲像侯友宜所骂ê：「赖清德用嘴爱台湾，我是用行动爱台湾、用生命顾台湾！」十一月二七侯友宜讲，伊若当选总统beh大量开放中国旅客、中国学生来台湾读册koh就业，án-ne来刺激台湾经济。今年一月至六月，中国青年（16至24岁）ê失业率平均是19.58%，六月21.3%是历史上第一koân。今年一月至六月，咱台湾青年失业率平均是11.44%。侯友宜爱台湾爱ùi中国去、烦恼中国青年失业率siuⁿkoân、爱台湾爱kah嫌台湾青年失业率siuⁿ低，án-ne kám是teh爱台湾！？ (231201)

注：华尔街　　请念华语