《绿色短评》

 | | | 转寄

Kā「中华民国」hit顶「ē变ân ê头kho͘」pak掉！

作者 李南衡, ChoânTâijī/全台字 by Chng Hūiphêng 2021.05.02

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　　　　　　　　　　　　　 Lí Lâmhêng 　　　　　
Kā "Tionghôa Bînkok" hit téng "ē piàn ân ê thâukho͘" pak tiāu!

Bat khòaⁿkòe 《 Seiûkì 》chit pún chheh ê lâng, lóng ittēng tùi Sun Ngō͘khong thâukhak téng hit téng "ē piàn ân ê thâukho͘ " ìnsiōng chiâⁿ chhim. Hōngbēng chi̍tlō͘ póhō͘ Samchiōng khì Ìntō͘ chhú keng ê Sun Ngō͘khong búgē kokiông, tānsī nā siókhóa bô sūn Sanchōng ê ì, Sanchōng tio̍h ē sûisî liām "ân kho͘ chó͘", “omnibeimeihóng”, i jú liām thâukho͘ tio̍h ē jú ân, Sun Ngō͘khong ê thâu tio̍h ē jú thiàⁿ, thiàⁿ kah kiò m̄ káⁿ. Goânlâi Koanim Jûlâihu̍t chaiiáⁿ Sun Ngō͘khong ài súi, the̍h chi̍t téng hoe bōá siâⁿ i, Sun Ngō͘khong khòaⁿtio̍h sûisî the̍h khílâi tì, i tongjiân m̄chaiiáⁿ bōá lāité chhàng chi̍tê "ē piàn ân ê thâukho͘", tì lo̍hkhì ê sî bô te̍kpia̍t kámkak, ittàn tì lo̍hkhì tio̍h pak bē lo̍hlâi.

　　1971 nî cha̍pgoe̍h jīgō͘, tē 26 kài Liânha̍pkok tāihōe téngbīn, chiū Alupania téng 23 kok thêàn"hoeho̍k Tionghôa Jînbîn Kiōnghôkok tī Liânha̍pkok cho͘chit tiong ê ha̍phoat khoânlī būntê "chìnhêng piáukoat, Liânha̍pkok tāihōe tē 2758 hō koatgī, thongkòe ê koatgī lāṳông tiōngtiám sī, sêngjīn Tionghôa Jînbîn Kiōnghôkok chènghú sī Tiongkok tī Liânha̍pkok cho͘chit ê îit ha̍phoat tāipiáu, jîchhiáⁿ sûisî kā Chiúⁿ Κàichio̍h ê tāipiáu ùi i tī Liânha̍pkok cho͘chit kah só͘ sio̍k itchhè kikò͘ tiong só͘ huihoat chiàmniá ê se̍kūi kóaⁿ chhut khì. Chū ánne, Tiongkok tùi Tâioân kakī tì ê hit téng "Tionghôa Bînkok" "ē piàn ân ê thâukho͘"chiok hoaⁿhí, Tiongkok nā bēsóng, i tio̍h liām"ân kho͘ chó͘", “chi̍tê Tiongkok”, Tâioân thâukhak tio̍h thiàⁿ・sí, bētàng tī kokchè siāhōe chhunkha chhutchhiú, bētàng chhamka Liânha̍pkok siongkoan ê kokchè cho͘chit, chin chē kokka m̄káⁿ kah Tâioân kiànkau.

　　 Bíkok sîkan sìgoe̍h cha̍pkáu, iû Bíkok Chiònggīīⁿ Gōakau Úigoânhōe Athài siócho͘ Bînchútóng chek chúse̍k Bela(Ami Bera) , Kiōnghôtóng chèng Gīoân Khòtisu(Joⁿh Curtis), Chiònggīīⁿ "Kokhōe Tâioân Liânsòaⁿ" sì ūi kiōngtông chúse̍k Siahpò(Steve Chabot), Silesu(Albio Sires), TiaPála̍t(Mario DiazBalart) kah Konnoli(Gerald Connolly) kiōngtông thêchhut "Tâioân Kokchè Thoânkiat Hoatàn", hoatàn chíchhut, Liânha̍pkok tē 2758 hō koatgī pēng bô chhúlí Tâioân kah Tâioân jînbîn tī Liânha̍pkok ah sī chiupiⁿ cho͘chit tāipiáu koân ê būntê, mā bô tī Tionghôa Jînbîn Kiōnghôkok kah Tâioân koanhē téngbīn chháichhú siáⁿ khoán ê li̍ptiûⁿ, ah sī pauhâm jīmhô iúkoan Tâioân chúkoân ê sengbêng. Hoatàn piáusī, Bíhong hoántùi jīmhô bô Tâioân jînbîn tôngì hē, siūⁿ beh káipiàn Tâioân tēūi ê chhiònggī; hoatàn í "Kokhōe ìkiàn" piáusī, Bíkok chènghú engkai kó͘lē bêngiú tângphōaⁿ, hoántùi Tiongkok siahjio̍k Tâioân kah pangkaukok, hui pangkaukok ê koanhē. Hoatàn iaukiû Bíkok Kokbūkheng tī nîtō͘ pòkò tiong, siôngsè kóng Tiongkok kòekhì, hiānchāi tī kokchè cho͘chit tiong, ū chò siáⁿmi̍h siahjio̍k Tâioân hōeoân ahsī koanchhatoân sinhūn ê chokûi.

　　 Liânha̍pkok tē 2758 hō koatgī jī thâu jībóe lóng bô kóngtio̍h Tâioân kah Tâioân jînbîn, lán engkai kóaⁿkín kakī pak tiāu"Tionghôa Bînkok" hit téng "ē piàn ân ê thâukho͘". Tiongkok nā koh liām "ân kho͘ chó͘ " : “chi̍tê Tiongkok”, kah lán Tâioân, Tâioân lâng bô koanhē, thâukhak bē thiàⁿ, Tâioân ē chiok khinsang.

　　 Lán cháchá tio̍h engkai kā "Tionghôa Bînkok" hit téng "ē piàn ân ê thâukho͘" pak tiāu! (210423)
Chù, Bíkok kokhōe gīoân () lāi ê goânmiâ bián liām

Pe̍h-ōe-jī-pán/白话字版
　　　Kā "Tiong-hôa Bîn-kok" hit téng "ē piàn ân ê thâu-kho͘" pak tiāu!

Bat khòaⁿ-kòe 《 Se-iû-kì 》chit pún chheh ê lâng, lóng it-tēng tùi Sun Ngō͘-khong thâu-khak téng hit téng "ē piàn ân ê thâu-kho͘ " ìn-siōng chiâⁿ chhim. Hōng-bēng chi̍t-lō͘ pó-hō͘ Sam-chiōng khì Ìn-tō͘ chhú keng ê Sun Ngō͘-khong bú-gē ko-kiông, tān-sī nā sió-khóa bô sūn San-chōng ê ì, San-chōng tio̍h ē sûi-sî liām "ân kho͘ chó͘", “om-ni-bei-mei-hóng”, i jú liām thâu-kho͘ tio̍h ē jú ân, Sun Ngō͘-khong ê thâu tio̍h ē jú thiàⁿ, thiàⁿ kah kiò m̄ káⁿ. Goân-lâi Koan-im Jû-lâi-hu̍t chai-iáⁿ Sun Ngō͘-khong ài súi, the̍h chi̍t téng hoe bō-á siâⁿ i, Sun Ngō͘-khong khòaⁿ-tio̍h sûi-sî the̍h khí-lâi tì, i tong-jiân m̄-chai-iáⁿ bō-á lāi-té chhàng chi̍t-ê "ē piàn ân ê thâu-kho͘", tì lo̍h-khì ê sî bô te̍k-pia̍t kám-kak, it-tàn tì lo̍h-khì tio̍h pak bē lo̍h-lâi.

　　1971 nî cha̍p-goe̍h jī-gō͘, tē 26 kài Liân-ha̍p-kok tāi-hōe téng-bīn, chiū Alupania téng 23 kok thê-àn"hoe-ho̍k Tiong-hôa Jîn-bîn Kiōng-hô-kok tī Liân-ha̍p-kok cho͘-chit tiong ê ha̍p-hoat khoân-lī būn-tê "chìn-hêng piáu-koat, Liân-ha̍p-kok tāi-hōe tē 2758 hō koat-gī, thong-kòe ê koat-gī lāi-iông tiōng-tiám sī, sêng-jīn Tiong-hôa Jîn-bîn Kiōng-hô-kok chèng-hú sī Tiong-kok tī Liân-ha̍p-kok cho͘-chit ê î-it ha̍p-hoat tāi-piáu, jî-chhiáⁿ sûi-sî kā Chiúⁿ Κài-chio̍h ê tāi-piáu ùi i tī Liân-ha̍p-kok cho͘-chit kah só͘ sio̍k it-chhè ki-kò͘ tiong só͘ hui-hoat chiàm-niá ê se̍k-ūi kóaⁿ chhut khì. Chū án-ne, Tiong-kok tùi Tâi-oân ka-kī tì ê hit téng "Tiong-hôa Bîn-kok" "ē piàn ân ê thâu-kho͘"chiok hoaⁿ-hí, Tiong-kok nā bē-sóng, i tio̍h liām"ân kho͘ chó͘", “chi̍t-ê Tiong-kok”, Tâi-oân thâu-khak tio̍h thiàⁿ-・sí, bē-tàng tī kok-chè siā-hōe chhun-kha chhut-chhiú, bē-tàng chham-ka Liân-ha̍p-kok siong-koan ê kok-chè cho͘-chit, chin chē kok-ka m̄-káⁿ kah Tâi-oân kiàn-kau.

　　 Bí-kok sî-kan sì-goe̍h cha̍p-káu, iû Bí-kok Chiòng-gī-īⁿ Gōa-kau Úi-goân-hōe A-thài sió-cho͘ Bîn-chú-tóng chek chú-se̍k Bela(Ami Bera) , Kiōng-hô-tóng chèng Gī-oân Khò-ti-su(Joⁿh Curtis), Chiòng-gī-īⁿ "Kok-hōe Tâi-oân Liân-sòaⁿ" sì ūi kiōng-tông chú-se̍k Siah-pò(Steve Chabot), Silesu(Albio Sires), Tia-Pá-la̍t(Mario Diaz-Balart) kah Kon-no-li(Gerald Connolly) kiōng-tông thê-chhut "Tâi-oân Kok-chè Thoân-kiat Hoat-àn", hoat-àn chí-chhut, Liân-ha̍p-kok tē 2758 hō koat-gī pēng bô chhú-lí Tâi-oân kah Tâi-oân jîn-bîn tī Liân-ha̍p-kok ah sī chiu-piⁿ cho͘-chit tāi-piáu koân ê būn-tê, mā bô tī Tiong-hôa Jîn-bîn Kiōng-hô-kok kah Tâi-oân koan-hē téng-bīn chhái-chhú siáⁿ khoán ê li̍p-tiûⁿ, ah sī pau-hâm jīm-hô iú-koan Tâi-oân chú-koân ê seng-bêng. Hoat-àn piáu-sī, Bí-hong hoán-tùi jīm-hô bô Tâi-oân jîn-bîn tông-ì hē, siūⁿ beh kái-piàn Tâi-oân tē-ūi ê chhiòng-gī; hoat-àn í "Kok-hōe ì-kiàn" piáu-sī, Bí-kok chèng-hú eng-kai kó͘-lē bêng-iú tâng-phōaⁿ, hoán-tùi Tiong-kok siah-jio̍k Tâi-oân kah pang-kau-kok, hui pang-kau-kok ê koan-hē. Hoat-àn iau-kiû Bí-kok Kok-bū-kheng tī nî-tō͘ pò-kò tiong, siông-sè kóng Tiong-kok kòe-khì, hiān-chāi tī kok-chè cho͘-chit tiong, ū chò siáⁿ-mi̍h siah-jio̍k Tâi-oân hōe-oân ah-sī koan-chhat-oân sin-hūn ê chok-ûi.

　　 Liân-ha̍p-kok tē 2758 hō koat-gī jī thâu jī-bóe lóng bô kóng-tio̍h Tâi-oân kah Tâi-oân jîn-bîn, lán eng-kai kóaⁿ-kín ka-kī pak tiāu"Tiong-hôa Bîn-kok" hit téng "ē piàn ân ê thâu-kho͘". Tiong-kok nā koh liām "ân kho͘ chó͘ " : “chi̍t-ê Tiong-kok”, kah lán Tâi-oân, Tâi-oân lâng bô koan-hē, thâu-khak bē thiàⁿ, Tâi-oân ē chiok khin-sang.

　　 Lán chá-chá tio̍h eng-kai kā "Tiong-hôa Bîn-kok" hit téng "ē piàn ân ê thâu-kho͘" pak tiāu! (210423)
Chù, Bí-kok kok-hōe gī-oân () lāi ê goân-miâ bián liām

　　　　　Kā「中华民国」hit顶「ē变ân ê头kho͘」pak掉！

Bat看过《西游记》chit本册ê人，lóng一定对孙悟空头壳顶hit顶「ē变ân ê头kho͘」印象诚深。奉命一路保护三藏去印度取经ê孙悟空武艺高强，但是nā小khóa无顺三藏ê意，三藏tio̍hē随时念「ân kho͘咒」：“om-ni-bei-mei-hóng”，伊jú念头kho͘ tio̍hējú ân，孙悟空ê头tio̍hējú疼，疼kah叫m̄敢。原来观音如来佛知影孙悟空爱súi，the̍h一顶花帽á siâⁿ伊，孙悟空看tio̍h随时the̍h起来戴，伊当然m̄知影帽á内底藏一个「ē变ân ê头kho͘」，戴落去ê时无特别感觉，一旦戴落去tio̍h pak bē落来。

　　1971年十月二五，第26届联合国大会顶面，就Alupania等23国提案「恢复中华人民共和国tī联合国组织中ê合法权利问题」进行表决，联合国大会第2758号决议，通过ê决议内容重点是：承认中华人民共和国政府是中国tī联合国组织ê唯一合法代表，而且随时kā蒋介石ê代表ùi伊tī联合国组织kah所属一切机构中所非法占领ê席位赶出去。自按呢，中国对台湾家己戴êhit顶「中华民国」「ē变ân ê头kho͘」足欢喜，中国nābē爽，伊tio̍h念「ân kho͘咒」：“chi̍t-ê Tiong-kok”，台湾头壳tio̍h疼死，bē-tàngtī国际社会伸脚出手，bē-tàng参加联合国相关ê国际组织，真chē国家m̄敢kah台湾建交。

　　美国时间四月十九，由美国众议院外交委员会亚太小组民主党籍主席Bela（Ami Bera）、共和党众议员Khò-ti-su（John Curtis）、众议院「国会台湾连线」四位共同主席Siah-pò（Steve Chabot）、Silesu（Albio Sires）、Tia-Pá-la̍t（Mario Diaz-Balart）kah Kon-no-li（Gerald Connolly）共同提出「台湾国际团结法案」，法案指出，联合国第2758号决议并无处理台湾kah台湾人民tī联合国ah是周边组织代表权ê问题，mā无tī中华人民共和国kah台湾关系顶面采取啥款ê立场，ah是包含任何有关台湾主权ê声明。法案表示，美方反对任何无台湾人民同意下，想beh改变台湾地位ê倡议；法案以「国会意见」表示，美国政府应该鼓励盟友同伴，反对中国削弱台湾kah邦交国、非邦交国ê关系。法案要求美国国务卿tī年度报告中，详细讲中国过去、现在tī国际组织中，有做啥物削弱台湾会员ah是观察员身分ê作为。

　　联合国第2758号决议字头字尾lóng无讲tio̍h台湾kah台湾人民，咱应该赶紧家己pak掉「中华民国」hit顶「ē变ân ê头kho͘」。中国nākoh念「ân kho͘咒」:“chi̍t-ê Tiong-kok”，kah咱台湾、台湾人无关系，头壳bē疼，台湾ē足轻松。

　　咱早早tio̍h应该kā「中华民国」hit顶「ē变ân ê头kho͘」pak掉！ (210423)
注：美国国会议员（）内ê原名免念