《绿色短评》

 | | | 转寄

好厉害ê翁茂钟！

作者 李南衡, ChoânTâijī/全台字 by Chng Hūiphêng 2021.04.25

Choânbîn Tâioânjī pán/全民台湾字版简称ChoânTâiJī

Hó līhāi ê Ang Bō͘chiong!

Sìgoe̍h chheit sinbûn pòtō, pùsiong Ang Bō͘chiong bat inūi ûihoán chèngkoàn kaue̍khoat chi̍t àn, hông phòaⁿ chi̍t nî tô͘hêng khaktēng, keng chún kái ho̍k siāhōe lôtōng káu kògoe̍h, ho̍k oân 2,196 siósî lôtōng. Putkò, ū chi̍tkóa kongbūoân tī i kái ho̍k lôtōng chiphêng ê sî ū sia̍phiâm higûi chohké, Lâmkiámsú kináji̍t thôaⁿhoàn cha̍pchhit miâ sia̍p àn kongbūoân kàu àn, í gūichō bûnsu chōe chengpān. Chinchē nî chêng, Ang Bō͘chiong sia̍phiâm kah kó͘chhī miâchhùi "kó͘tóng Tiuⁿ " Tiuⁿ Sèkiat, chò hóe chhá choh Kahô kó͘phiò, 2012 nî gō͘goe̍h Chòeko Hoatīⁿ í ûihoán chèngkauhoat phòaⁿ Tiuⁿ Sèkiat chi̍t nî cha̍pi̍t kò goe̍h tô͘hêng, phòaⁿ Ang Bō͘chiong chi̍t nî tô͘hêng khaktēng. 2012 nî itgoe̍h chì káugoe̍h kan, ētàng kā 2,196 siósî ê siāhōe lôtōng chiphêng oân, kái ho̍k siāhōe lôtōng 6 siósî ētàng tú hêngkî chi̍t ji̍t, múi ji̍t bēsái chhiaukòe 8 siósî, Ang Bō͘chiong káu kògoe̍h lāi ho̍k oân 2,196 siósî, chho͘pō͘ ōaⁿsǹg múi ji̍t lôtōng chhiaukòe 8 siósî, liânsòa lôtōng 270 ji̍t, tiongkan bô hiohkhùn chiah ū pānhoat ta̍tsêng chitê bôkhólêng ê jīmbū, kongbū kikoan chiu hiu nn̄g ji̍t pàngká kîkan, thongsiông bē anpâi kái ho̍k siāhōe lôtōng, só͘í kiámhong jīmtēng Ang Bō͘chiongê chiphêng soktō͘ siuⁿkòe kín, bô ha̍h siônglí. Liân kanta ūitio̍h ētàng thêchá chhutga̍k, Ang Bō͘chiong tio̍h ū hoattō͘ chhōa cha̍pchhit chiah ba̍kchiu kô͘ tio̍h lâábah ê pih lo̍hlàm, chi̍t kōaⁿ ná bahchàng.

Kóngtio̍h bahchàng, cha̍pchhit lia̍p iáu sǹg sī sèkōaⁿ・ê.

Sìgoe̍h chhela̍k sinbûn pòtō, Kahô chi̍pthoân hūchekjîn Ang Bō͘chiong kah chinchē suhoatkoaⁿ kauchêng chiâⁿ hó, Suhoatīⁿ íkeng tiâucha bat kah Ang Bō͘chiong chiapchhiok・kòe ê suhoatkoaⁿ tāiiok ū sìcha̍p ūi, Suhoatīⁿ Jînsū Símgī Úigoânhōe chhegō͘ khaisí símgī, tio̍h ēng saⁿ kang nn̄g mê lâi thólūn, phahphòa Tâioân iúsú ílâi sîkan siōng tn̂g ê kìlio̍k. Suhoatīⁿ tēit pho tiâucha íkeng tī itgoe̍h cha̍ppeh kongpò͘, tongsî ū sàng chhitūi hoatkoaⁿ khì Jînsímhōe símgī, chòeāu la̍k ūi sàng Kàmchhatīⁿ; lēnggōa cha̍pjī ūi chêngchat khahkhin, goânpún engkai hêngchèng chhúhoa̍t, tānsī inūi ûisit sîkan tiám chhiaukòe gō͘ nî, íkeng chhiaukòe sîhāu, chòeāu bô siū chhùhūn. Chit piàn sī tējī pho tiâucha, Suhoatīⁿ koattēng kah tēit pho bô siū chhúhoa̍t ê cha̍pjī ūi, chòhóe sàngkau Jînsímhōe símgī, só͘í chóng jînsò͘ chiah ē ū sìcha̍p ūi.

　　 Lēnggōa, ū gō͘ ūi tōahoatkoaⁿ bat chhuthiān tī Ang Bō͘chiong ê "kìsū phō͘" lāi, tānsī inūi tōahoatkoaⁿ chióngtêng pēng m̄ sī Jînsímhōe só͘ ētàng koattēng・ê, chòeāu kau hō͘ Suhoatīⁿ tiúⁿ kiam Tōahoatkoaⁿ hōegī chúse̍k Khó͘ Chongle̍k chhinsin tiàukhui tōahoatkoaⁿ chūlu̍t ioktâm, kîtiong ū chi̍t ūi íkeng kòesin, só͘í kanta ū sì ūi tōahoatkoaⁿ ē kàu tōahoatkoaⁿ hōegī soatbêng.

Phángchit pùsiong Ang Bō͘chiong bat í iànkheh, sàng saⁿ, kah chi̍tkóa kiámchhatkoaⁿ, kéngchhat, tiâucha jînoân, suhoat jînoân bô chèngtong ê kauóng, līhāi ê só͘chāi sī siáⁿmi̍h sîkan, tī siáⁿmi̍h só͘chāi, kah siáⁿmi̍h siáⁿmi̍h lâng chòhóe chia̍hpn̄g limchiú, sàng siáⁿmi̍h lémi̍h, lóngchóng kì tī i kúicha̍p pún ê " kìsū phó͘" lāité, kéngkoaⁿ chi̍t tōa kōaⁿ, kiámchhatkoaⁿ chi̍t tōa kōaⁿ, tiâucha jînoân chi̍t tōa kōaⁿ, suhoatkoaⁿ chi̍t tōa kōaⁿ, liân tōahoatkoaⁿ mā chi̍t kōaⁿ.

Hó līhāi ê Ang Bō͘chiong lâi chò siáⁿ siōng sekha̍p? Nā lâi khui bahchàng tiàm ittēng ē chin se̍kchhiú! 　(210416)

Pe̍h-ōe-jī-pán/白话字版


Hó lī-hāi ê Ang Bō͘-chiong!

Sì-goe̍h chhe-it sin-bûn pò-tō, pù-siong Ang Bō͘-chiong bat in-ūi ûi-hoán chèng-koàn kau-e̍k-hoat chi̍t àn, hông phòaⁿ chi̍t nî tô͘-hêng khak-tēng, keng chún kái ho̍k siā-hōe lô-tōng káu kò-goe̍h, ho̍k oân 2,196 sió-sî lô-tōng. Put-kò, ū chi̍t-kóa kong-bū-oân tī i kái ho̍k lô-tōng chip-hêng ê sî ū sia̍p-hiâm hi-gûi choh-ké, Lâm-kiám-sú kin-á-ji̍t thôaⁿ-hoàn cha̍p-chhit miâ sia̍p àn kong-bū-oân kàu àn, í gūi-chō bûn-su chōe cheng-pān. Chin-chē nî chêng, Ang Bō͘-chiong sia̍p-hiâm kah kó͘-chhī miâ-chhùi "kó͘-tóng Tiuⁿ " Tiuⁿ Sè-kiat, chò -hóe chhá choh Ka-hô kó͘-phiò, 2012 nî gō͘-goe̍h Chòe-ko Hoat-īⁿ í ûi-hoán chèng-kau-hoat phòaⁿ Tiuⁿ Sè-kiat chi̍t nî cha̍p-i̍t kò goe̍h tô͘-hêng, phòaⁿ Ang Bō͘-chiong chi̍t nî tô͘-hêng khak-tēng. 2012 nî it-goe̍h chì káu-goe̍h kan, ē-tàng kā 2,196 sió-sî ê siā-hōe lô-tōng chip-hêng oân, kái ho̍k siā-hōe lô-tōng 6 sió-sî ē-tàng tú hêng-kî chi̍t ji̍t, múi ji̍t bē-sái chhiau-kòe 8 sió-sî, Ang Bō͘-chiong káu kò-goe̍h lāi ho̍k oân 2,196 sió-sî, chho͘-pō͘ ōaⁿ-sǹg múi ji̍t lô-tōng chhiau-kòe 8 sió-sî, liân-sòa lô-tōng 270 ji̍t, tiong-kan bô hioh-khùn chiah ū pān-hoat ta̍t-sêng chit-ê bô-khó-lêng ê jīm-bū, kong-bū ki-koan chiu hiu nn̄g ji̍t pàng-ká kî-kan, thong-siông bē an-pâi kái ho̍k siā-hōe lô-tōng, só͘-í kiám-hong jīm-tēng Ang Bō͘-chiongê chip-hêng sok-tō͘ siuⁿ-kòe kín, bô ha̍h siông-lí. Liân kan-ta ūi-tio̍h ē-tàng thê-chá chhut-ga̍k, Ang Bō͘-chiong tio̍h ū hoat-tō͘ chhōa cha̍p-chhit chiah ba̍k-chiu kô͘ tio̍h lâ-á-bah ê pih lo̍h-làm, chi̍t kōaⁿ ná bah-chàng.

Kóng-tio̍h bah-chàng, cha̍p-chhit lia̍p iáu sǹg sī sè-kōaⁿ-・ê.

Sì-goe̍h chhe-la̍k sin-bûn pò-tō, Ka-hô chi̍p-thoân hū-chek-jîn Ang Bō͘-chiong kah chin-chē su-hoat-koaⁿ kau-chêng chiâⁿ hó, Su-hoat-īⁿ í-keng tiâu-cha bat kah Ang Bō͘-chiong chiap-chhiok-・kòe ê su-hoat-koaⁿ tāi-iok ū sì-cha̍p ūi, Su-hoat-īⁿ Jîn-sū Sím-gī Úi-goân-hōe chhe-gō͘ khai-sí sím-gī, tio̍h ēng saⁿ kang nn̄g mê lâi thó-lūn, phah-phòa Tâi-oân iú-sú í-lâi sî-kan siōng tn̂g ê kì-lio̍k. Su-hoat-īⁿ tē-it pho tiâu-cha í-keng tī it-goe̍h cha̍p-peh kong-pò͘, tong-sî ū sàng chhit-ūi hoat-koaⁿ khì Jîn-sím-hōe sím-gī, chòe-āu la̍k ūi sàng Kàm-chhat-īⁿ; lēng-gōa cha̍p-jī ūi chêng-chat khah-khin, goân-pún eng-kai hêng-chèng chhú-hoa̍t, tān-sī in-ūi ûi-sit sî-kan tiám chhiau-kòe gō͘ nî, í-keng chhiau-kòe sî-hāu, chòe-āu bô siū chhù-hūn. Chit piàn sī tē-jī pho tiâu-cha, Su-hoat-īⁿ koat-tēng kah tē-it pho bô siū chhú-hoa̍t ê cha̍p-jī ūi, chò-hóe sàng-kau Jîn-sím-hōe sím-gī, só͘-í chóng jîn-sò͘ chiah ē ū sì-cha̍p ūi.

　　 Lēng-gōa, ū gō͘ ūi tōa-hoat-koaⁿ bat chhut-hiān tī Ang Bō͘-chiong ê "kì-sū phō͘" lāi, tān-sī in-ūi tōa-hoat-koaⁿ chióng-têng pēng m̄ sī Jîn-sím-hōe só͘ ē-tàng koat-tēng-・ê, chòe-āu kau hō͘ Su-hoat-īⁿ tiúⁿ kiam Tōa-hoat-koaⁿ hōe-gī chú-se̍k Khó͘ Chong-le̍k chhin-sin tiàu-khui tōa-hoat-koaⁿ chū-lu̍t iok-tâm, kî-tiong ū chi̍t ūi í-keng kòe-sin, só͘-í kan-ta ū sì ūi tōa-hoat-koaⁿ ē kàu tōa-hoat-koaⁿ hōe-gī soat-bêng.

Pháng-chit pù-siong Ang Bō͘-chiong bat í iàn-kheh, sàng saⁿ, kah chi̍t-kóa kiám-chhat-koaⁿ, kéng-chhat, tiâu-cha jîn-oân, su-hoat jîn-oân bô chèng-tong ê kau-óng, lī-hāi ê só͘-chāi sī siáⁿ-mi̍h sî-kan, tī siáⁿ-mi̍h só͘-chāi, kah siáⁿ-mi̍h siáⁿ-mi̍h lâng chò-hóe chia̍h-pn̄g lim-chiú, sàng siáⁿ-mi̍h lé-mi̍h, lóng-chóng kì tī i kúi-cha̍p pún ê " kì-sū phó͘" lāi-té, kéng-koaⁿ chi̍t tōa kōaⁿ, kiám-chhat-koaⁿ chi̍t tōa kōaⁿ, tiâu-cha jîn-oân chi̍t tōa kōaⁿ, su-hoat-koaⁿ chi̍t tōa kōaⁿ, liân tōa-hoat-koaⁿ mā chi̍t kōaⁿ.

Hó lī-hāi ê Ang Bō͘-chiong lâi chò siáⁿ siōng sek-ha̍p? Nā lâi khui bah-chàng tiàm it-tēng ē chin se̍k-chhiú! 　(210416)


四月初一新闻报导：富商翁茂钟bat因为违反证券交易法一案，hông判一年徒刑确定，经准改服社会劳动九个月，服完2,196小时劳动。不过，有一寡公务员tī伊改服劳动执行ê时有涉嫌虚伪作假，南检署今á日传唤十七名涉案公务员到案，以伪造文书罪侦办。真chē年前，翁茂钟涉嫌kah股市名嘴「古董张」张世杰，做伙炒作佳和股票，2012年五月最高法院以违反证交法判张世杰一年十一个月徒刑，判翁茂钟一年徒刑确定。2012年一月至九月间，会tàng kā 2,196小时ê社会劳动执行完，改服社会劳动6小时ē-tàng抵刑期一日，每日bē-sái超过8小时，翁茂钟九个月内服完2,196小时，初步换算每日劳动超过8小时，连续劳动270日，中间无歇困才有办法达成chit-ê无可能ê任务，公务机关周休两日放假期间，通常bē安排改服社会劳动，所以检方认定翁茂钟ê执行速度siuⁿ过紧，无合常理。连kan-ta为tio̍hē-tàng提早出狱，翁茂钟tio̍h有法度chhōa十七只目睭糊tio̍h 蜊á肉ê鼈落坔（làm），一kōaⁿ若肉粽。

讲tio̍h肉粽，十七粒犹算是细kōaⁿ-・ê。

　　四月初六新闻报导，佳和集团负责人翁茂钟kah真chē司法官交情诚好，司法院已经调查bat kah翁茂钟接触过ê司法官大约有四十位，司法院人事审议委员会初五开始审议，tio̍h用三工两暝来讨论，拍破台湾有史以来时间上长ê纪录。司法院第一波调查已经tī 一月十八公布，当时有送七位法官去人审会审议，最后六位送监察院；另外十二位情节khah轻，原本应该行政处罚，但是因为违失时间点超过五年，已经超过时效，最后无受处分。Chit遍是第二波调查，司法院决定kah第一波无受处罚ê十二位，做伙送交人审会审议，所以总人数才ē有四十位。

　　另外，有五位大法官bat出现tī翁茂钟ê「记事簿」内，但是因为大法官奖惩并m̄是人审会所ē-tàng决定ê，最后交hō͘司法院长兼大法官会议主席许宗力亲身召开大法官自律约谈，其中有一位已经过身，所以kan-ta有四位大法官ē到大法官会议说明。

纺织富商翁茂钟bat以宴客、送衫，kah一寡检察官、警察、调查人员、司法人员无正当ê交往，厉害ê所在是啥物时间、tī啥物所在、kah啥物啥物人做伙食饭lim酒、送啥物礼物，lóng总记tī伊几十本ê「记事簿」内底，警官一大kōaⁿ、检察官一大kōaⁿ、调查人员一大kōaⁿ、司法官一大kōaⁿ，连大法官mā一kōaⁿ。

好厉害ê翁茂钟来做啥上适合？若来开肉粽店一定ē真熟手！　(210416)