《绿色短评》

 | | | 转寄

中国褪裤围海koh围山！

作者 李南衡, ChoânTâijī/全台字 by Chng Hūi-phêng 2023.09.17




Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》 Lí Lâmhêng

Tiongkok thǹg khò͘ ûi hái koh ûi soaⁿ!

　　 Pehgoe̍h jīpeh, Tiongkok Chūjiân Chugoânpō͘ hoat pò͘ "2023 nî pán phiauchún tētô͘ ", lāité paukoat Saisoa kûntó kah Lâmsoa kûntó, koh kā goânpún ê Lâmhái "káu tōaⁿ sòaⁿ"（Tio̍h sī ùi Tâioân lâm pêng ê Pasū háikiap hiòng lâm iân Huilu̍tpin sepō͘ háihōaⁿ ōe・lo̍hkhì, iân Phôlôchiu pakpō͘ háihōaⁿ liáu chiah hiòng sai pak, iân Oa̍tlâm tangpō͘ háihōaⁿ hiòng saipak ōe kàu Háilâmtó lâm pêng ûichí, chhinchhiūⁿ chi̍t tè gûchi̍h hêng ）, khoktiong kàu Tâioân tangpō͘ háie̍k chiâⁿchoh cha̍p tōaⁿ sòaⁿ, kā Tâioân ōe・ji̍pkhì, sīmchì kā Ji̍tpún ê Tiòhîtâi ōe ji̍p Tiongkok ê pántô͘. Tiongkok "微博" tōasiaⁿ kóng,"Tiongkok tētô͘ chi̍t tiám chi̍t sòaⁿ to bēsái chhò","tētô͘ chi̍t tiám chi̍t sòaⁿ lóng tāipiáu chó͘kok tōahó soaⁿhô".

Pehgoe̍h saⁿcha̍pit, Tâioân Gōakaupō͘ hôeèng 《 Ji̍t keng Achiu 》 chhâsûn ê sî piáusī,"Tionghôa Bînkok Tâioân sī chi̍tê chúkoân to̍kli̍p ê kokka, put lēsio̍k tī Tionghôa Jînbîn Kiōnghôkok. Tionghôa Jînbîn Kiōnghôkok chūlâi m̄bat thóngtī kòe Tâioân. Che sī sūsi̍t, mā sī kokchè siāhōe phó͘phiàn chiapsiū ê hiānkhóng. Bôlūn Tiongkok chènghú ánchóaⁿ niúkhiok tùi Tâioân chúkoân ê chútiuⁿ, lóng bô hoattō͘ káipiàn Tionghôa Bînkok Tâioân chûnchāi ê khehkoan sūsi̍t." pehgoe̍h saⁿcha̍pit, Huilu̍tpin Gōakaupō͘ sengbêng piáusī,"chòe sin chi̍t kiāⁿ chhìtô͘ ha̍phoat hòa Tiongkok tùi Huilu̍tpin léngthó͘, háie̍k chúkoân kah koánhat koân ê chútiuⁿ, pēng bô hûha̍p Kokchèhoat, te̍kpia̍t sī 1982 nî Liânha̍pkok tāihōe koatgī ê háṳûⁿ hoat kongiok （UNCLOS）", ho͘io̍k Pakkiaⁿ tongkio̍k tiánhiān hū chekjīm kiâⁿkèng, chunsiú Háṳûⁿhoat kongiok kah 2016 nî "Lâmhái tiōngchhâi" hó͘ⁿkoat Tiongkok káu tōaⁿ sòaⁿ ê chhâisī. Pehgoe̍h saⁿcha̍pit àm, Oa̍tlâm Gōakaupō͘ hoatgiânjîn í subīn hôehok mûithé sûnmn̄g piáusī, Tiongkok chitê hêngûi chhimhoān tio̍h Oa̍tlâm tùi Saisoa kûntó kah Lâmsoa kûntó ê chúkoân, iáu ū 1982 nî Liânha̍pkok Háṳûⁿhoat kongiok （UNCLOS） só͘ khakli̍p Oa̍tlâm tùi só͘ sio̍k háie̍k ê chúkoân, chúkoân khoânlī kah koánhat koân. Pehgoe̍h saⁿcha̍pit, Ìnnî gōakau pō͘tiúⁿ 勒特诺（Retno Marsudi） chiū Tiongkok sin tētô͘ pēngthun Ìnnî léngthó͘ hiòng Tiongkok thêchhut khònggī, i piáusī, ōe sòaⁿ ahsī chò jīmhô chútiuⁿ lóng tio̍h hûha̍p 1982 nî Liânha̍pkok Háṳûⁿhoat kongiok. Pehgoe̍h saⁿcha̍pit, Málâisea Gōakaupō͘ hoatpiáu siaⁿbêng kóng, Tiongkok chòe sin hoatpò͘ ê tētô͘ kā Málâisea ê kiongthô͘ ōe・ji̍pkhì, Málâisea bētàng sêngjīn chit khoán ê chútiuⁿ.


Tiongkok thǹg khò͘ ûi hái iáu bē soah, koh thǹg khò͘ ûi soaⁿ. Ìntō͘ kah Tiongkok ū chenggī ê piankài chhiaukòe 3,488 konglí, kîtiong, Ìntō͘ si̍tchit tīlí tiong ê阿鲁纳查 séng （Arunachal Pradesh）, Tiongkok chhengchoh Chōnglâm tēkhu; lēnggōa tōapō͘hūn tēkhu bo̍kchêng sī iû Tiongkok iúhāu khòngchè ê阿克赛钦（Aksai Chin）, mā lóng ōe ji̍pkhì Tiongkok sin tētô͘. Pehgoe̍h jīkáu ēpo͘, Ìntō͘ Gōakau pō͘ hoatgiânjîn巴格奇（Arindam Bagchi） hoatpiáu siaⁿbêng kóng, Tiongkok só͘ūi ê 2023 nî phiauchún tētô͘ kā Ìntō͘ léngthó͘ ōe・ji̍pkhì, Ìntō͘ íkeng thàukòe gōakau koántō hiòng Tiongkok thêchhut " kiônglia̍t khònggī". Ìntō͘ gōakau pō͘tiúⁿ 苏杰生 （Subrahmanyam Jaishankar） kiônglia̍t hôeèng kóng, kā pa̍t kok ê léngthó͘ ōe・ji̍pkhì kakī ê tētô͘, íkeng sī Tiongkok kú nî ê lāu si̍pkoàn, chit chióng chokhoat bô hoattō͘ káipiàn sūsi̍t.


　　 kîkoài, Tiongkok thǹg khò͘ ûi hái koh ûi soaⁿ, ná ē bô ài kuikhì thǹg khò͘ ûi tēkiû, kám bô khah sóng? 　　(230908)


Chù, 微博 　勒特诺　阿鲁纳查 　阿克赛钦　巴格奇　苏杰生 　　 chhiáⁿ liām Hôagí



Pe̍h-ōe-jī-pán/白话字版


《 Le̍k-sek toán-phêng 》 Lí Lâm-hêng

Tiong-kok thǹg khò͘ ûi hái koh ûi soaⁿ!

　　 Peh-goe̍h jī-peh, Tiong-kok Chū-jiân Chu-goân-pō͘ hoat pò͘ "2023 nî pán phiau-chún tē-tô͘ ", lāi-té pau-koat Sai-soa kûn-tó kah Lâm-soa kûn-tó, koh kā goân-pún ê Lâm-hái "káu tōaⁿ sòaⁿ"（Tio̍h sī ùi Tâi-oân lâm pêng ê Pa-sū hái-kiap hiòng lâm iân Hui-lu̍t-pin se-pō͘ hái-hōaⁿ ōe-・lo̍h-khì, iân Phô-lô-chiu pak-pō͘ hái-hōaⁿ liáu chiah hiòng sai pak, iân Oa̍t-lâm tang-pō͘ hái-hōaⁿ hiòng sai-pak ōe kàu Hái-lâm-tó lâm pêng ûi-chí, chhin-chhiūⁿ chi̍t tè gû-chi̍h hêng ）, khok-tiong kàu Tâi-oân tang-pō͘ hái-e̍k chiâⁿ-choh cha̍p tōaⁿ sòaⁿ, kā Tâi-oân ōe-・ji̍p-khì, sīm-chì kā Ji̍t-pún ê Tiò-hî-tâi ōe ji̍p Tiong-kok ê pán-tô͘. Tiong-kok "微博" tōa-siaⁿ kóng,"Tiong-kok tē-tô͘ chi̍t tiám chi̍t sòaⁿ to bē-sái chhò","tē-tô͘ chi̍t tiám chi̍t sòaⁿ lóng tāi-piáu chó͘-kok tōa-hó soaⁿ-hô".

Peh-goe̍h saⁿ-cha̍p-it, Tâi-oân Gōa-kau-pō͘ hôe-èng 《 Ji̍t keng A-chiu 》 chhâ-sûn ê sî piáu-sī,"Tiong-hôa Bîn-kok Tâi-oân sī chi̍t-ê chú-koân to̍k-li̍p ê kok-ka, put lē-sio̍k tī Tiong-hôa Jîn-bîn Kiōng-hô-kok. Tiong-hôa Jîn-bîn Kiōng-hô-kok chū-lâi m̄-bat thóng-tī kòe Tâi-oân. Che sī sū-si̍t, mā sī kok-chè siā-hōe phó͘-phiàn chiap-siū ê hiān-khóng. Bô-lūn Tiong-kok chèng-hú án-chóaⁿ niú-khiok tùi Tâi-oân chú-koân ê chú-tiuⁿ, lóng bô hoat-tō͘ kái-piàn Tiong-hôa Bîn-kok Tâi-oân chûn-chāi ê kheh-koan sū-si̍t." peh-goe̍h saⁿ-cha̍p-it, Hui-lu̍t-pin Gōa-kau-pō͘ seng-bêng piáu-sī,"chòe sin chi̍t kiāⁿ chhì-tô͘ ha̍p-hoat hòa Tiong-kok tùi Hui-lu̍t-pin léng-thó͘, hái-e̍k chú-koân kah koán-hat koân ê chú-tiuⁿ, pēng bô hû-ha̍p Kok-chè-hoat, te̍k-pia̍t sī 1982 nî Liân-ha̍p-kok tāi-hōe koat-gī ê hái-iûⁿ hoat kong-iok （UNCLOS）", ho͘-io̍k Pak-kiaⁿ tong-kio̍k tián-hiān hū chek-jīm kiâⁿ-kèng, chun-siú Hái-iûⁿ-hoat kong-iok kah 2016 nî "Lâm-hái tiōng-chhâi" hó͘ⁿ-koat Tiong-kok káu tōaⁿ sòaⁿ ê chhâi-sī. Peh-goe̍h saⁿ-cha̍p-it àm, Oa̍t-lâm Gōa-kau-pō͘ hoat-giân-jîn í su-bīn hôe-hok mûi-thé sûn-mn̄g piáu-sī, Tiong-kok chit-ê hêng-ûi chhim-hoān tio̍h Oa̍t-lâm tùi Sai-soa kûn-tó kah Lâm-soa kûn-tó ê chú-koân, iáu ū 1982 nî Liân-ha̍p-kok Hái-iûⁿ-hoat kong-iok （UNCLOS） só͘ khak-li̍p Oa̍t-lâm tùi só͘ sio̍k hái-e̍k ê chú-koân, chú-koân khoân-lī kah koán-hat koân. Peh-goe̍h saⁿ-cha̍p-it, Ìn-nî gōa-kau pō͘-tiúⁿ 勒特诺（Retno Marsudi） chiū Tiong-kok sin tē-tô͘ pēng-thun Ìn-nî léng-thó͘ hiòng Tiong-kok thê-chhut khòng-gī, i piáu-sī, ōe sòaⁿ ah-sī chò jīm-hô chú-tiuⁿ lóng tio̍h hû-ha̍p 1982 nî Liân-ha̍p-kok Hái-iûⁿ-hoat kong-iok. Peh-goe̍h saⁿ-cha̍p-it, Má-lâi-se-a Gōa-kau-pō͘ hoat-piáu siaⁿ-bêng kóng, Tiong-kok chòe sin hoat-pò͘ ê tē-tô͘ kā Má-lâi-se-a ê kiong-thô͘ ōe-・ji̍p-khì, Má-lâi-se-a bē-tàng sêng-jīn chit khoán ê chú-tiuⁿ.


Tiong-kok thǹg khò͘ ûi hái iáu bē soah, koh thǹg khò͘ ûi soaⁿ. Ìn-tō͘ kah Tiong-kok ū cheng-gī ê pian-kài chhiau-kòe 3,488 kong-lí, kî-tiong, Ìn-tō͘ si̍t-chit tī-lí tiong ê阿鲁纳查 séng （Arunachal Pradesh）, Tiong-kok chheng-choh Chōng-lâm tē-khu; lēng-gōa tōa-pō͘-hūn tē-khu bo̍k-chêng sī iû Tiong-kok iú-hāu khòng-chè ê阿克赛钦（Aksai Chin）, mā lóng ōe ji̍p-khì Tiong-kok sin tē-tô͘. Peh-goe̍h jī-káu ē-po͘, Ìn-tō͘ Gōa-kau pō͘ hoat-giân-jîn巴格奇（Arindam Bagchi） hoat-piáu siaⁿ-bêng kóng, Tiong-kok só͘-ūi ê 2023 nî phiau-chún tē-tô͘ kā Ìn-tō͘ léng-thó͘ ōe-・ji̍p-khì, Ìn-tō͘ í-keng thàu-kòe gōa-kau koán-tō hiòng Tiong-kok thê-chhut " kiông-lia̍t khòng-gī". Ìn-tō͘ gōa-kau pō͘-tiúⁿ 苏杰生 （Subrahmanyam Jaishankar） kiông-lia̍t hôe-èng kóng, kā pa̍t kok ê léng-thó͘ ōe-・ji̍p-khì ka-kī ê tē-tô͘, í-keng sī Tiong-kok kú nî ê lāu si̍p-koàn, chit chióng chok-hoat bô hoat-tō͘ kái-piàn sū-si̍t.


　　 kî-koài, Tiong-kok thǹg khò͘ ûi hái koh ûi soaⁿ, ná ē bô ài kui-khì thǹg khò͘ ûi tē-kiû, kám bô khah sóng? 　　(230908)


Chù, 微博 　勒特诺　阿鲁纳查 　阿克赛钦　巴格奇　苏杰生 　　 chhiáⁿ liām Hôa-gí




　　八月二八，中国自然资源部发布「2023年版标准地图」，内底包括西沙群岛kah南沙群岛，koh kā原本ê南海「九段线」（Tio̍h是ùi台湾南旁ê巴士海峡向南沿菲律宾西部海岸画落去，沿婆罗洲北部海岸了chiah向西北，沿越南东部海岸向西北画到海南岛南旁为止，亲像一块牛舌形），扩张到台湾东部海域成作十段线，kā台湾画入去，甚至kā日本ê钓鱼台画入中国ê版图。中国「微博」大声讲：「中国地图一点一线都bē-sái错」，「地图一点一线lóng代表祖国大好山河」。

八月三十一，台湾外交部回应《日经亚洲》查询ê时表示：「中华民国台湾是一个主权独立ê国家，不隶属tī中华人民共和国。中华人民共和国自来m̄-bat统治过台湾。Che是事实，mā是国际社会普遍接受ê现况。无论中国政府按怎扭曲对台湾主权ê主张，lóng无法度改变中华民国台湾存在ê客观事实。」八月三十一，菲律宾外交部声明表示，「最新一件试图合法化中国对菲律宾领土、海域主权kah管辖权ê主张，并无符合国际法，特别是1982年联合国大会决议ê海洋法公约（UNCLOS）」，呼吁北京当局展现负责任行径，遵守海洋法公约kah 2016年「南海仲裁」否决中国九段线ê裁示。八月三十一暗，越南外交部发言人以书面回覆媒体询问表示，中国chit-ê行为侵犯tio̍h越南对西沙群岛kah南沙群岛ê主权，犹有1982年联合国海洋法公约（UNCLOS）所确立越南对所属海域ê主权、主权权利kah管辖权。八月三十一，印尼外交部长勒特诺（Retno Marsudi）就中国新地图并吞印尼领土向中国提出抗议，伊表示，划线ah是做任何主张lóng tio̍h符合1982年联合国海洋法公约。八月三十一，马来西亚外交部发表声明讲，中国最新发布ê地图kā马来西亚ê疆土画入去，马来西亚bē-tàng承认chit款ê主张。


中国褪裤围海犹bē煞，koh褪裤围山。印度kah中国有争议ê边界超过3,488公里，其中，印度实质治理中ê阿鲁纳查省（Arunachal Pradesh），中国称作藏南地区；另外大部分地区目前是由中国有效控制ê阿克赛钦（Aksai Chin），mālóng画入去中国新地图。八月二九下晡，印度外交部发言人巴格奇（Arindam Bagchi）发表声明讲，中国所谓ê2023年标准地图kā印度领土画入去，印度已经透过外交管道向中国提出「强烈抗议」。印度外交部长苏杰生（Subrahmanyam Jaishankar）强烈回应讲，kā别国ê领土画入去家己ê地图，已经是中国久年ê老习惯，chit种作法无法度改变事实。


　　奇怪，中国褪裤围海koh围山，ná ē无ài归气褪裤围地球，kám无khah爽？　　(230908)


注：微博　勒特诺　阿鲁纳查　阿克赛钦　巴格奇　苏杰生　　请念华语